మోహిత్ ఉల్వా: అండర్-19 ఆసియా కప్ ఫైనల్‌లో పాకిస్తాన్‌పై ఆటను మలుపు తిప్పిన ఈ ఆటగాడు ఎవరు?

భారత్, అండర్-19, ఆసియా కప్, పాకిస్తాన్, మోహిత్ ఉల్వా
ఫొటో క్యాప్షన్, మోహిత్ ఉల్వా, మనల్ చౌహాన్‌లు తొమ్మిదో వికెట్‌కు 57 పరుగులు జోడించి భారత్‌ను గెలిపించారు.
ప్రచురణ
చదివే సమయం: 6 నిమిషాలు

శనివారం ఒమన్‌లో జరిగిన అండర్-19 ఆసియా కప్ 2026 ఫైనల్‌లో పాకిస్తాన్‌పై భారత్ ఒక వికెట్ తేడాతో ఉత్కంఠభరితమైన విజయాన్ని సాధించడంలో మోహిత్ ఉల్వా కీలక పాత్ర పోషించాడు. ఈ మ్యాచ్‌లో అతను 26 బంతుల్లో 49 పరుగులు చేశాడు.

భారత్ ఎనిమిది వికెట్లు కోల్పోయి 252 పరుగులు చేసిన తర్వాత, విజయానికి ఇంకా 84 పరుగులు అవసరమైన సమయంలో ఎనిమిదో స్థానంలో బ్యాటింగ్‌కు దిగిన 18 ఏళ్ల మోహిత్ ఇన్నింగ్స్‌ను చక్కదిద్దాడు.

మొదట మనల్ చౌహాన్‌తో కలిసి తొమ్మిదో వికెట్‌కు 57 పరుగుల భాగస్వామ్యం నెలకొల్పాడు. ఆ తర్వాత సి. వెంకట్‌తో కలిసి చివరి వికెట్‌కు మరో 29 పరుగులు జోడించి భారత్‌ను విజయతీరాలకు చేర్చాడు.

ఫైనల్‌లో 'ప్లేయర్ ఆఫ్ ది మ్యాచ్‌' అవార్డును అందుకున్నాడు. మోహిత్ బౌలింగ్‌లోనూ రాణించి మూడు వికెట్లు పడగొట్టాడు. ఆస్ట్రేలియాతో జరిగిన మూడు మ్యాచ్‌ల యూత్ వన్డే సిరీస్‌లోనూ మోహిత్ సత్తా చాటాడు. ఆ సిరీస్‌లో ఐదు వికెట్లు తీశాడు.

బీబీసీ న్యూస్ తెలుగు వాట్సాప్ చానల్‌
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

తొలి ఇన్నింగ్స్‌లో ఉస్మాన్ ఖాన్ (107), అబ్దుల్ ఖాదిర్ (80) రాణించడంతో పాకిస్తాన్ 337 పరుగులు చేసింది. ఆసియా కప్ ఫైనల్‌లో ఈ లక్ష్యాన్ని ఛేదించడం భారత్‌కు కష్టమేనని అంతా భావించారు.

అయితే, పాకిస్తాన్ ఈ స్కోరు చేయగలిగితే మనం కూడా చేయగలమని భారత డ్రెస్సింగ్ రూమ్‌లో చర్చ జరిగిందని మోహిత్ చెప్పాడు. తమ బ్యాటింగ్‌పై భారత జట్టుకు నమ్మకం ఉందని తెలిపాడు.

''ఇది ఫ్లాట్ వికెట్ అని మాకు తెలుసు. వికెట్లు చేతిలో ఉంటే మేం గెలవగలమని భావించాం'' అని మోహిత్ అన్నాడు.

''నువ్వు చేయగలవు. నిన్ను నువ్వు నమ్ముకో'' అని జట్టు కోచ్ తనతో చెప్పారని మోహిత్ అన్నాడు.

"'నువ్వు చేయగలవు. నిన్ను నువ్వు నమ్ముకో' అని టీమ్ కోచ్ చెప్పారు. అందుకే నేను కేవలం బంతిని చూస్తూ కొడుతున్నా. ఏం జరుగుతుందో ఆలోచించలేదు" అని మోహిత్ మ్యాచ్ తర్వాత చెప్పాడు.

భారత్, అండర్-19, ఆసియా కప్, పాకిస్తాన్, మోహిత్ ఉల్వా
ఫొటో క్యాప్షన్, మోహిత్ తన కెరీర్‌ను ఆఫ్-స్పిన్నర్‌గా ప్రారంభించాడు.

ఆరేళ్లుగా రైల్వే గ్రౌండ్‌లో శిక్షణ

ది హిందూ గ్రూప్‌కు చెందిన క్రీడా పత్రిక 'స్పోర్ట్స్ స్టార్' కథనం ప్రకారం, మోహిత్ జామ్‌నగర్‌లోని క్రికెట్ బంగ్లాలో మహేంద్ర సింగ్ చౌహాన్ వద్ద శిక్షణ పొందుతున్నాడు. భారత క్రికెటర్ రవీంద్ర జడేజా ప్రతిభను కూడా తీర్చిదిద్దింది ఈ కోచ్‌నే.

తండ్రి సలహా మేరకు మోహిత్ చిన్నతనంలోనే క్రికెట్ ఆడటం ప్రారంభించాడు.

మాట్లాడుతూ.. "మా నాన్నకు క్రికెట్ అంటే ఇష్టం. కానీ దురదృష్టవశాత్తూ ఆయన తన కాలంలో ఆడలేకపోయారు. అయితే నాలో కొన్ని లక్షణాలను గుర్తించి, నేను క్రికెట్ ఆడగలనని భావించారు" అని 'స్పోర్ట్స్ స్టార్‌'తో మోహిత్ చెప్పాడు.

మోహిత్ తండ్రి రైల్వే ప్రొటెక్షన్ ఫోర్స్‌లో పనిచేస్తున్నారు. ఆయనే మోహిత్‌ను క్రికెట్ అకాడమీలో చేరమని ప్రోత్సహించారు.

"నిజానికి చదువుకు దూరంగా ఉండొచ్చనే ఉద్దేశంతోనే క్రికెట్ ఆడేందుకు అంగీకరించాను" అని మోహిత్ చెప్పాడు.

అప్పటికే మోహిత్ తన గ్రామంలో కజిన్స్‌తో కలిసి టెన్నిస్ బాల్ క్రికెట్ ఆడేవాడు.

"నాకూ క్రికెట్ ఆడటం నచ్చింది. వ్యక్తిగతంగా ఆ ఆటను ఆస్వాదించేవాడిని. అందుకే మా నాన్న మాట విని అకాడమీలో చేరాను" అని మోహిత్ తెలిపాడు.

తండ్రికి రాజ్‌కోట్‌కు బదిలీ కావడంతో మోహిత్ కూడా జామ్‌నగర్ నుంచి అక్కడికి వెళ్లాడు. గత ఆరేళ్లుగా రాజ్‌కోట్‌లోని రైల్వే గ్రౌండ్‌లో శిక్షణ పొందుతున్నాడు.

"అతను తొమ్మిదేళ్లుగా సాధన చేస్తున్నాడు. అతని క్రికెటే నా ప్రపంచం. అతని సాధన, దినచర్య, ఫిట్‌నెస్‌పై దృష్టి పెట్టడం, అతన్ని మానసికంగా దృఢంగా ఉంచడం, ఆత్మవిశ్వాసం కలిగించడం నా బాధ్యత. నేను అతనితో రోజూ 500 బంతులు ప్రాక్టీస్ చేయించేవాడిని. ఈ రోజు అతను విజయం సాధించాడు" అని మోహిత్ తండ్రి మహేష్‌భాయ్ ఆనందం వ్యక్తం చేశారు.

'నా కొడుకు మొదటి బంతిని బ్యాట్ మధ్యలోకి స్ట్రైక్ చేసినప్పుడే, అతను మరో 25 నుంచి 30 బంతులు ఆడితే మ్యాచ్‌ను ముగించగలడని నేను అనుకున్నాను.' అని మహేష్‌భాయ్ అన్నారు.

భారత్, అండర్-19, ఆసియా కప్, పాకిస్తాన్, మోహిత్ ఉల్వా
ఫొటో క్యాప్షన్, పాకిస్థాన్‌ను ఓడించిన తర్వాత మోహిత్ ఉల్వా తన సహచరులతో కలిసి సంబరాలు చేసుకుంటున్నాడు.

ఆఫ్-స్పిన్నర్ నుంచి ఫాస్ట్ బౌలర్‌గా..

మోహిత్ ఫిట్‌నెస్‌పై కోచ్ మహేంద్ర సింగ్ చౌహాన్ ప్రత్యేక శ్రద్ధ పెట్టారు. దీంతో అతను బాగా రాణించగలిగాడు.

మోహిత్ మొదట్లో ఆఫ్ స్పిన్ బౌలింగ్ చేసేవాడు. అయితే, ఒకరోజు మహేంద్ర సింగ్ చౌహాన్ అతడిని ఫాస్ట్ బౌలింగ్ ప్రయత్నించమని సలహా ఇచ్చారు.

"ఒకరోజు మహేంద్ర సర్ నన్ను ఫాస్ట్ బౌలింగ్ ప్రయత్నించమని చెప్పారు. నీ శరీరం సన్నగా ఉంది, వేగంగా పరుగెత్తగలవు కాబట్టి ఫాస్ట్ బౌలింగ్ చేయాలని సూచించారు" అని మోహిత్ తెలిపాడు.

కోచ్ సలహాను మోహిత్ పాటించాడు. ఫాస్ట్ బౌలింగ్ చేయడం మొదలుపెట్టి, క్రమంగా సహజసిద్ధమైన ఫాస్ట్ బౌలర్‌గా మారానని చెప్పాడు.

ఆసక్తికరమైన విషయం ఏమిటంటే, ఈ మార్పు వెనుక ప్రత్యేకంగా వ్యక్తిగత ఫాస్ట్ బౌలింగ్ కోచ్ ఎవరూ లేరు.

"ఫాస్ట్ బౌలింగ్ కోసం నేను వ్యక్తిగతంగా ఏ కోచ్ వద్దా శిక్షణ తీసుకోలేదు. అండర్‌-16, అండర్‌-19 స్థాయుల్లో బీసీసీఐ శిబిరాల్లో పాల్గొన్నాను. ఇతర కోచ్‌లతో కలిసి పనిచేశాను. కానీ నాకు వ్యక్తిగత ఫాస్ట్ బౌలింగ్ కోచ్ ఎప్పుడూ లేరు" అని మోహిత్ చెప్పాడు.

భారత్, అండర్-19, ఆసియా కప్, పాకిస్తాన్, మోహిత్ ఉల్వా
ఫొటో క్యాప్షన్, విజయం తర్వాత మోహిత్ ఉల్వా త్రివర్ణ పతాకంతో స్టేడియం చుట్టూ ప్రదక్షిణ చేశాడు.

ఉనద్కత్ సలహా

ఒక ప్రత్యేకమైన బౌలింగ్ వైవిధ్యంపై దృష్టి పెట్టాలని భారత క్రికెటర్ జయదేవ్ ఉనద్కత్ సలహా ఇచ్చినట్లు మోహిత్ చెప్పాడు.

నెట్స్‌లో ఉనద్కత్ స్లో బౌన్సర్ వేయడం చూసిన మోహిత్, ఆ తర్వాత తానూ ఆ బంతిని ప్రయత్నించాడు.

"నేను నెట్స్‌లో ఆయన అలా బౌలింగ్ చేయడం చూసి, నేనూ ప్రయత్నించాను. అది చూసిన జయదేవ్ భాయ్.. ఆ బంతిని ఎప్పుడూ వదిలిపెట్టవద్దని చెప్పారు. నువ్వు బాగా బౌలింగ్ చేస్తున్నావు. ఇలాగే కొనసాగించు అని ప్రోత్సహించారు" అని మోహిత్ గుర్తుచేసుకున్నాడు.

భారత్, అండర్-19, ఆసియా కప్, పాకిస్తాన్, మోహిత్ ఉల్వా
ఫొటో క్యాప్షన్, పాకిస్తాన్‌పై విజయం తర్వాత సంబరాలు చేసుకుంటున్న ఇండియా కుర్రాళ్లు

'రోలర్ కోస్టర్' ప్రయాణంలా మ్యాచ్

బ్యాటింగ్ కూడా తన ఆటలో ముఖ్యమైన భాగంగా మారిందని, అయితే అది తనకు సహజంగా అలవడిన నైపుణ్యం కాదని మోహిత్ 'స్పోర్ట్స్ స్టార్‌'తో చెప్పాడు.

"నాన్న నాతో బౌలింగ్ మెషీన్‌పై ప్రాక్టీస్ చేయిస్తారు. త్రోడౌన్స్ వేయిస్తారు. రకరకాల డ్రిల్స్ చేయిస్తారు. వాటి వల్లే నా బ్యాటింగ్ మెరుగుపడింది" అని తెలిపాడు.

ఇతర ఆటగాళ్లను చూసి నేర్చుకోవడం కూడా తనకు ఉపయోగపడిందని మోహిత్ చెప్పాడు.

అతని కృషి ఇటీవలి ఇన్నింగ్స్‌లలో స్పష్టంగా కనిపిస్తోంది. భారీ షాట్లు కొట్టడమే కాకుండా, స్ట్రైక్‌ను రొటేట్ చేస్తూ జట్టు అవసరాలకు అనుగుణంగా బ్యాటింగ్ చేస్తున్నాడు. శనివారం జరిగిన మ్యాచ్‌లోనూ అదే చేశాడు.

పాకిస్తాన్‌తో మ్యాచ్ ఒక రోలర్ కోస్టర్ ప్రయాణంలా సాగింది. ఒక దశలో పాకిస్తాన్‌కు అనుకూలంగా ఉన్న మ్యాచ్, ఆ తర్వాత భారత్ వైపు మళ్లింది.

అయితే, భారత్ 252 పరుగులకే ఎనిమిది వికెట్లు కోల్పోయినప్పుడు ఓటమి తప్పదేమో అనిపించింది. ఆ సమయంలో మోహిత్ ఉల్వా 18 బంతుల్లో 31 పరుగులతో క్రీజులో ఉన్నాడు. పాకిస్తాన్ విజయానికి ఒక్క వికెట్ అవసరం కాగా, భారత్ గెలవాలంటే 16 బంతుల్లో 29 పరుగులు చేయాల్సి ఉంది.

వెంకట్ తొలిసారి ఆసియా కప్‌లో ఆడుతున్న నేపథ్యంలో, భారత్‌ను విజయతీరాలకు చేర్చాల్సిన బాధ్యత తనపై ఉందని మోహిత్ ఉల్వాకు తెలుసు.

భారత్, అండర్-19, ఆసియా కప్, పాకిస్తాన్, మోహిత్ ఉల్వా
ఫొటో క్యాప్షన్, ఫోర్ కొట్టిన తర్వాత బ్యాట్స్‌మెన్ సంబరాలు

అల్‌రౌండర్‌గా నిరూపించుకోవాలని...

మోహిత్ ఉల్వా సాధారణంగా బౌలింగ్ ఆల్‌రౌండర్. అండర్‌-19 ఆసియా కప్‌లో భారత జట్టు బౌలింగ్ విభాగంలో కీలక ఆటగాడు. అయితే ఈ టోర్నీలో బౌలర్‌గా అతని ప్రదర్శన అంతంతమాత్రంగానే ఉంది. బ్యాట్స్‌మన్‌గానూ పెద్దగా అవకాశాలు రాలేదు. తన ప్రతిభను నిరూపించుకోవడానికి ఫైనల్ అతనికి మంచి అవకాశం. ఈ విషయం అతని మనసులో మెదులుతూనే ఉంది.

మ్యాచ్ అనంతరం మోహిత్ ఉల్వా మాట్లాడుతూ ఇదే విషయాన్ని వెల్లడించాడు.

"నన్ను నేను నమ్మాను. దేవుడిపై విశ్వాసం ఉంచాను. ఒక బౌలర్‌గా ఈ ఆసియా కప్ నాకు అంతగా కలిసి రాలేదు. కానీ నేను ఆల్‌రౌండర్‌నని నమ్ముతున్నాను. అయితే ఇప్పటివరకు ఆ విషయాన్ని నిరూపించుకునే అవకాశం నాకు రాలేదు" అని చెప్పాడు.

లక్ష్య సాధనలో మోహిత్ ఉల్వా 49వ ఓవర్‌ను ఒక బౌండరీ, ఒక సిక్సర్‌తో ప్రారంభించాడు. ఆ తర్వాత అదే ఓవర్‌లో నాలుగో బంతిని వెంకట్ బ్యాట్ అంచుకు తాకించడంతో అది బౌండరీకి వెళ్లింది. ఆ ఓవర్‌లో భారత్‌కు 17 పరుగులు వచ్చాయి.

చివరి ఓవర్‌లో భారత్ విజయానికి ఆరు బంతుల్లో ఎనిమిది పరుగులు అవసరమయ్యాయి. అయితే తొలి ఐదు బంతుల్లో ఒక్క బౌండరీ కూడా రాలేదు. చివరి బంతికి మూడు పరుగులు అవసరమైన సమయంలో మోహిత్ బౌండరీ కొట్టి, భారత్‌కు ఒక వికెట్ తేడాతో విజయాన్ని అందించాడు.

"నేను సరైన బంతి కోసం ఎదురుచూస్తున్నాను. బౌండరీ కొట్టి మ్యాచ్‌ను ముగిస్తానని నాకు తెలుసు. ఇది నా రోజు అని, మ్యాచ్‌ను ముగించగలనని నమ్మాను" అని చివరి ఓవర్‌లో ఎనిమిది పరుగులు సాధించిన మోహిత్ ఆనందం వ్యక్తం చేశాడు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)