పిల్లాడు పుట్టినప్పుడే చనిపోయాడన్నారు, కానీ ‘నేను నీ కొడుకునే' అంటూ ఓ 42 ఏళ్ల వ్యక్తి ఆమె జీవితంలోకి వచ్చారు....

ఆస్ట్రేలియా, న్యూజీలాండ్, మతసంప్రదాయాలు, దత్తత, కెనడా
ఫొటో క్యాప్షన్, డయాన్‌కు వచ్చిన ఓ మెయిల్ ఆమె జీవితాన్ని మార్చేసింది.
    • రచయిత, జో ఫిడ్జెన్, మే కామెరాన్
    • హోదా, బీబీసీ ప్రతినిధులు
  • ప్రచురణ
  • చదివే సమయం: 8 నిమిషాలు

అది 2018 డిసెంబర్.

న్యూజీలాండ్‌కు చెందిన 63 ఏళ్ల వెటర్నరీ డాక్టర్ డయాన్ షీహాన్.. స్నేహితులతో డిన్నర్ తర్వాత ఆస్ట్రేలియాలోని బ్రిస్బేన్‌లో ఉన్న తన ఇంటికి చేరుకున్నారు.

ఆమె సోఫాలో కూర్చుని ఉండగా.. ఒక మెయిల్ నోటిఫికేషన్ వచ్చింది. అది ఆమె జీవితాన్నే మార్చేసింది.

"నేను ఫోన్ తీసి చూశా. ఒక యువకుడి నుంచి నాకు ఈ మెయిల్ వచ్చింది. అందులో ఆయన తాను పుట్టిన తేదీ, తాను పుట్టిన ఆసుపత్రి వివరాలు తెలిపారు. తాను కొంత పరిశోధన చేశానని, నేనే అతని తల్లినని నమ్ముతున్నానని ఆయన చెప్పారు" అని బీబీసీ 'ఔట్‌లుక్' కార్యక్రమంలో డయాన్ తెలిపారు.

"నా మెదడు మొద్దుబారిపోయింది. ఏమీ ఆలోచించలేకపోయా. ఊపిరి కూడా తీసుకోలేకపోయా. నా శరీరం నా ఆధీనంలో లేదు'' అని ఆమె గుర్తుచేసుకున్నారు.

బీబీసీ న్యూస్ తెలుగు వాట్సాప్ చానల్‌
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

ఈ మెయిల్ పంపిన యువకుడు చెప్పిన తేదీన, చెప్పిన ఆస్పత్రిలోనే 1976లో డయాన్‌కు ఒక బిడ్డ పుట్టారు.

కానీ, అతను చనిపోయాడని ఆమెకు చెప్పారు. సిడ్నీ ఆస్పత్రి వైద్యులే ఆమెకు ఈ విషయం చెప్పారు.

మరి ఇప్పుడు ఆమెను సంప్రదించిన ఆ వ్యక్తి ఎవరు?

ఆస్ట్రేలియా, న్యూజీలాండ్, మతసంప్రదాయాలు, దత్తత, కెనడా
ఫొటో క్యాప్షన్, డయాన్, రిక్‌లు కెనడాలో కలుసుకున్నారు.

అనుకోకుండా గర్భం దాల్చి....

డయాన్ 1950ల్లో న్యూజీలాండ్‌లోని వెల్లింగ్‌టన్‌లో కాథలిక్ ఆచారాలు బాగా పాటించే ఓ కుటుంబంలో జన్మించారు. సన్యాసినులు నడిపే పాఠశాలలో సంప్రదాయబద్ధమైన విద్యను అభ్యసించారు.

"అప్పట్లో ప్రత్యేకంగా లైంగిక విద్య ఏమీ ఉండేది కాదు. అబ్బాయిలతో కలిసి బస్సు కూడా ఎక్కొద్దని హెచ్చరించేవారు. ఒకే సీటులో కూర్చుంటే గర్భవతులవుతామని చెప్పేవారు" అని డయాన్ గుర్తుచేసుకున్నారు.

అలాంటి వాతావరణంలో పెరిగిన ఆమె, కెనడాలో ఉన్నప్పుడు రిక్ అనే యువకుడితో ప్రేమలో పడ్డారు. మొదటిసారి లైంగిక సంబంధంలోకి వెళ్లినప్పుడు గర్భనిరోధకసాధనాలు వాడాలనే ఆలోచన తనకు ఎప్పుడూ రాలేదని ఆమె చెప్పారు.

"రిక్ నిజంగా నా తొలి ప్రేమ. ఆయన చాలా ఆలోచనాపరుడు, మంచి మనసు. గుర్రాలపై నాకున్న ఆసక్తి ఆయనకు కూడా ఉంది. గుర్రపుస్వారీ అద్భుతంగా చేసేవాడు'' అని ఆమె గుర్తుచేసుకున్నారు.

డయాన్ తన తల్లిదండ్రుల ఇంటిని విడిచి వెళ్ళాలని నిర్ణయించుకున్నప్పుడు రిక్‌ను కలిశారు. ఆమె మొదట ఆస్ట్రేలియాలో తన అదృష్టాన్ని పరీక్షించుకున్నారు.

ఆ తర్వాత కెనడాలో ఆమెకు ఓ అవకాశం దొరికింది. అక్కడ ఓ కుటుంబంలో పిల్లలను చూసుకున్నందుకు ఇల్లు, భోజనం లభించేవి. దగ్గరలోని ఒక వ్యవసాయ క్షేత్రంలో రిక్ పనిచేసేవారు.

ఆ తర్వాత కొద్దికాలానికే రిక్ కాలిఫోర్నియాకు వెళ్ళిపోయారు. డయాన్ ఆయన్ను కలవడానికి వెళ్ళారు. కెనడాకు తిరిగి వెళ్ళే విమానాన్ని మిస్సవడంతో ఆమె ఉద్యోగం పోయింది. దీంతో కెనడాలో ఉండే అవకాశం లేకుండా పోయింది. తప్పనిసరి పరిస్థితుల్లో ఆస్ట్రేలియాకు తిరిగి వెళ్లాల్సి వచ్చింది.

అప్పటికే ఆమె గర్భవతి. కానీ ఆ విషయం ఆమెకు అప్పటికి తెలియదు.

Diane cuando se graduó de su ఆస్ట్రేలియా, న్యూజీలాండ్, మతసంప్రదాయాలు, దత్తత, కెనడాMBA.
ఫొటో క్యాప్షన్, ఎంబీఏ పట్టా అందుకున్నుప్పుడు డయాన్

ఎంత దాచినా దాగని నిజం

మొబైల్ ఫోన్లు, సోషల్ మీడియా లేని ఆ రోజుల్లో వాళ్లకు ఒకరితో ఒకరికి సంబంధం లేకుండా పోయింది.

ఆ తర్వాత డయాన్ సిడ్నీలో ఒక డాక్టరు, ఆయన భార్య నడుపుతున్న గుర్రాల ఫామ్‌లో ఉద్యోగం లభించింది. ఆ దంపతులకు కూడా డయాన్ తల్లిదండ్రుల మాదిరిగానే సంప్రదాయ కాథలిక్ భావాలుండేవి.

గర్భవతి అని గ్రహించడానికి డయాన్‌కు కొన్ని నెలలు పట్టింది. ఆ పరిస్థితిని ఎదుర్కోవడానికి ఇంకా ఎక్కువ సమయం పట్టింది.

"నేను దాన్ని అంగీకరించలేకపోయాను. నేను దాన్ని గట్టిగా చెప్పలేకపోయాను" అని ఆమె గుర్తుచేసుకున్నారు.

"నేను బహుశా వాస్తవాన్ని అంగీకరించలేని స్థితిలో ఉన్నాను. దాన్ని అంగీకరించడానికి నాకు దాదాపు ఆరు నెలలు పట్టిందని అనుకుంటున్నాను. నాకు భయంగా ఉండేది. ఎందుకంటే ఏం జరగబోతోందో నాకు తెలియదు. నేను పెరిగిన వాతావరణం వల్ల ఈ విషయంతో ముడిపడిన అవమానం, అపరాధభావన గురించి నాకు బాగా తెలుసు అనుకుంటా" అని ఆమె అన్నారు.

ఆ రోజుల్లో పరిస్థితులు చాలా భిన్నంగా ఉండేవని డయాన్ గుర్తుచేసుకున్నారు. ఆ భయాలతో తాను గర్భవతినన్న సంగతి డయాన్ కొన్ని నెలల పాటు ఎవరికీ తెలియకుండా జాగ్రత్తపడ్డారు.

పొలంలో వదులుగా ఉండే యూనిఫాం వేసుకునేదాన్నని చెప్పారు. సన్నగా ఉండడం వల్ల పొట్ట పెరుగుతున్న విషయం ఇతరులకు అంతగా కనిపించేది కాదు.

ప్రసవ నొప్పులు వచ్చినప్పుడు కూడా ఆమె ఒంటరిగానే వాటిని భరించడానికి ప్రయత్నించారు.

"ఆ తర్వాత నేను యజమాని ఇంటికి వెళ్లాను. అక్కడ మా యజమాని భార్య ఉన్నారు. అప్పటికే నాకు వాంతులు అవుతున్నాయి అనుకుంటా. ఆమె నన్ను ఆయన నడుపుతున్న వైద్యశాలకు తీసుకెళ్లి పరీక్షించారు. ఆ తర్వాత నాకు ఒక విషయం గుర్తుంది. దాని గురించి మళ్లీ గుర్తుచేసుకోవాలని లేదు. గర్భస్థ శిశువు గుండె చప్పుడు వినడానికి ఉపయోగించే స్టెతస్కోప్‌తో పరీక్షించినప్పుడు ఆమె ముఖంలో కనిపించిన దిగ్భ్రాంతికరమైన భావం నాకు ఇప్పటికీ గుర్తుంది" అని డయాన్ చెప్పారు.

Diane Sheehan, posa con un cఆస్ట్రేలియా, న్యూజీలాండ్, మతసంప్రదాయాలు, దత్తత, కెనడాaballo.
ఫొటో క్యాప్షన్, ఇన్నేళ్ల తర్వాత కొడుకును, అతని కుటుంబాన్ని కలవడం చాలా సంతోషంగా ఉందని డయాన్ చెబుతున్నారు.

‘శిశువు చనిపోయిందని తీసుకెళ్లారు...ముఖం కూడా చూపించలేదు’

ఆసుపత్రిలో తనకు ఎదురయిన అనుభవం ఒక పీడకలలాంటిదని డయాన్ చెప్పారు.

"ఆ పరిస్థితిని ఒంటరిగా ఎదుర్కోవడం చాలా బాధాకరం. మాటల్లో చెప్పలేనంత బాధ కలిగించింది. అక్కడ నాతో ఎవరూ మాట్లాడినట్టు కూడా నాకు గుర్తులేదు. వాళ్లు నా బిడ్డను తీసుకెళ్లినప్పుడు నన్ను నగ్నంగా ఒక బల్ల మీద వదిలేశారు. రక్తస్రావం అవుతోంది. చలికి గడ్డకట్టుకుపోతున్నా" అని ఆమె చెప్పారు.

బిడ్డను తీసుకువెళ్లేటప్పుడు కనీసం ఒక్కసారైనా కూడా ఆమెకు అవకాశం ఇవ్వలేదు. బిడ్డ ముఖమూ చూపించలేదు. పుట్టింది అబ్బాయా లేదా అమ్మాయా అన్న విషయాన్ని కూడా చెప్పలేదు. బిడ్డతో ఎలాంటి సంబంధమూ లేదు. ఆ బిడ్డ చనిపోయాడని తర్వాత ఆమెకు చెప్పారు.

కానీ అది నిజం కాదు.

42ఏళ్ల తర్వాత సోఫాలో కూర్చుని చదివిన ఆ ఈ మెయిల్ చదివినప్పుడే ఆమెకు అసలు నిజం తెలిసింది. తన కొడుకు బతికే ఉన్నాడు. మరో కుటుంబానికి దత్తత ఇచ్చేశారు. బాబు గురించి వివరాలు వెల్లడించలేదు.

1950ల నుంచి 1970ల మధ్య ఆస్ట్రేలియాలో బలవంతంగా దత్తతకు వెళ్లిన పిల్లల తల్లుల్లో తాను కూడా ఒకరినని డయాన్ తర్వాత అర్థం చేసుకున్నారు.

ఒంటరి తల్లులు వారి పిల్లలను దత్తతకు ఇచ్చేలా దేశంలోని కాథలిక్ చర్చ్‌లు, ఇతర సంస్థలు ఒత్తిడి చేశాయి. ఈ ప్రక్రియలో మానసికంగా వేధించడం, తల్లులనుంచి పిల్లలను బలవంతంగా వేరు చేయడం, కొన్ని సందర్భాల్లో దత్తత ప్రక్రియలో అవకతవకలకు పాల్పడడం వంటివి ఉన్నాయి.

ఆస్ట్రేలియా ప్రభుత్వం వేలాది కుటుంబాలకు జరిగిన నష్టాన్ని 2013లో అధికారికంగా అంగీకరించి, బాధితులకు క్షమాపణలు చెప్పింది.

"ఎంపిక చేసుకునే అవకాశం ఇవ్వకుండా, మిమ్మల్ని మోసగించి, దురుద్దేశపూర్వకంగా ప్రవర్తించి, అక్రమాలకు గురిచేసిన వ్యవస్థ నుంచి ద్రోహానికి గురైన తల్లులారా, మీకు మేము క్షమాపణ చెబుతున్నాం" అని అప్పటి ఆస్ట్రేలియా ప్రధానమంత్రి జూలియా గిల్లార్డ్ అన్నారు.

అయితే తాను కూడా అలాంటి బాధిత మహిళల్లో ఒకరినని ఐదేళ్ల తర్వాతే డయాన్ తెలుసుకున్నారు. ఆ విషయం బయటపడటంతో ఆమె ఎంతోకాలంగా మనసులోతుల్లో దాచుకోడానికి ప్రయత్నించిన గాయం మళ్ళీ బయటకు వచ్చింది. సిడ్నీలోని ఆ ఆస్పత్రిలో ఏం జరిగిందో ఆమె ఎవరికీ చెప్పలేదు.

జరిగిన దాని గురించి నా తల్లిదండ్రులకు గానీ, మా కుటుంబానికి గానీ చెప్పడానికి నాకు ధైర్యం లేదు. అప్పుడు రిక్‌కి ఉత్తరం రాయొచ్చు అనుకున్నాను. కానీ అందులో ఏం రాయాలి?

‘‘నీ దగ్గరనుంచి వెళ్ళిపోయేటప్పుడు నేను గర్భవతిని. నీ బాబుకు జన్మనిచ్చాను. కానీ ఆ బాబు చనిపోయాడు?' అని చెప్పాలా...దానివల్ల ప్రయోజనం ఏముంది అనుకున్నాను. అప్పటికే నేను మానసికంగా చాలా దెబ్బతిని ఉండొచ్చు అనుకుంటున్నా" అని ఆమె గుర్తుచేసుకున్నారు.

కొన్నేళ్ల తర్వాత ఆమె పెళ్లిచేసుకున్నారు. ఆయనతోనూ ఈ విషయం చెప్పలేదు. ఆయనతో కలిసిగిన మరో ఇద్దరు పిల్లలకూ ఈ విషయం తెలియనివ్వలేదు.

ఈ బాధను మర్చిపోవడానికి ఆమె పశువైద్యురాలిగా పనిచేస్తూ చదువులో నిమగ్నమయ్యారు.

"ఆ నిశ్శబ్దం నన్ను ఎంతగానో ప్రభావితం చేసింది. అందుకే నాకు ఒకే ఉద్యోగం ఉన్నా సరే రెండు లేదా మూడు ఉద్యోగాలు చేయడానికి ప్రయత్నించేదాన్ని. రాత్రి పడుకునే సమయానికి పూర్తిగా అలసిపోయి ఉండాలనుకునేదాన్ని. ఏమీ ఆలోచించకూడదనిపించేది. వీలైనంత ఎక్కువ సమయం పనిలోనే గడపాలనుకునేదాన్ని'' అని ఆమె చెప్పారు.

ఆస్ట్రేలియా, న్యూజీలాండ్, మతసంప్రదాయాలు, దత్తత, కెనడా
ఫొటో క్యాప్షన్, చిన్నారిగా డయాన్

మనవరాలి ఫోటో చూసి....

డయాన్ తన కొడుకు 2018లో పంపిన ఆ ఈమెయిల్‌ను ఒకటి రెండుసార్లు కాదు చాలాసార్లు చదివారు.

తన నుంచి ఏమీ అవసరంలేదని అతను చెప్పాడు. అతను కేవలం తనను కలవాలని, వీలైతే ఒక బంధాన్ని ఏర్పరచుకుకోవాలని అనుకుంటున్నట్టు తెలిపారు.

తన జీవితం సంతోషంగా గడిచిందని, దత్తత తీసుకున్న తల్లిదండ్రులు తనకు అవసరమైనవన్నీ ఇచ్చి పెంచారని కూడా రాశారు.

ఆ తర్వాత ఆయన మరో విషయం కూడా చెప్పారు. ‘‘మీకో విషయం చెప్పాలి. ఇప్పుడు మీరు నాన్నమ్మ అయ్యారు’’ అని రాశారు.

కూతురు ఫోటోను పంపించారు.

"ఆ ఉంగరాల జుట్టు ఎక్కడి నుండి వచ్చిందో ఇప్పుడు మాకు అర్థమైంది" అని ఆమెకు రాసిన మెయిల్లో ఆయన రాశారు.

ఆ ఫోటో చూసిన వెంటనే అవతలి వ్యక్తి తన కొడుకే అని తెలిసిపోయిందని డయాన్ గుర్తుచేసుకున్నారు.

"నా మనవరాలి ఫోటోను చూశా. నా ఎడమ వైపున పైన పుస్తకాల అల్మారాలున్నాయి. వాటిపై కొన్ని ఫోటోలున్నాయి. వాటిలో నాకు బహుశా రెండున్నర లేదా మూడేళ్ళ వయసులో ఉన్నప్పటి ఫోటో ఒకటి ఉంది. ఆ ఫోటోలో ఉన్న నేను, నా మనవరాలు కవలల్లా ఉన్నాం. నా తల తిరిగిపోయినట్టయింది" అని డయాన్ చెప్పారు.

ఆ తర్వాత నిజం తెలుసుకోవడానికి ఆమె తీవ్రంగా ప్రయత్నించారు.

1976లో సిడ్నీలోని ఆ ఆస్పత్రిలో ఏం జరిగి ఉంటుందో తెలుసుకోడానికి గంటల తరబడి పరిశోధన చేశారు.

ఆ అన్వేషణలో బ్రిస్బేన్‌లో దత్తతకు సంబంధించిన సమస్యలపై సలహాలు, సహాయం అందించే ఒక సంస్థ గురించి తెలుసుకున్నారు.

ఆమె వాళ్లకు ఫోన్ చేయగా అవతలి వైపు వాళ్లు ఆమెతో '' ఇలాంటి వారు మీరు ఒక్కరే కాదు" అని చెప్పారు. ఆ రోజు నుంచి డయాన్ జీవితంలో ఓ కొత్త ప్రయాణం మొదలయింది. అది"చాలా బాధాకరమైన" ప్రయాణం అని ఆమె చెబుతున్నారు.

అయితే అదే ప్రయాణం తన కొడుకును, అతని కుటుంబాన్ని మళ్లీ కలుసుకునే అవకాశం కూడా ఇచ్చిందని అంటున్నారు.

ఆస్ట్రేలియా, న్యూజీలాండ్, మతసంప్రదాయాలు, దత్తత, కెనడా
ఫొటో క్యాప్షన్, డయాన్(ఎడమ), డయాన్ సోదరి(కుడి)

తల్లీకొడుకులు కలుసుకున్న క్షణం....

విషయం తెలిసిన తర్వాత డయాన్ ఎంతో బాధపడ్డారు. ఏదో భయంకరమైన గాయం మళ్ళీ మొదలయినట్టు ఆమెకు అనిపించింది.

ఇన్నాళ్లుగా తాను దాచిన రహస్యం బయటపడితే తాను ఇప్పటివరకు నిర్మించుకున్న జీవితం నాశనం అవుతుందేమోనని ఆమె భయపడ్డారు. ఎన్నో ఏళ్లుగా తనను కుంగదీస్తున్న తన జీవితంలోని ముఖ్యమైన విషయాన్ని తన పిల్లలు ఎలా స్వీకరిస్తారో ఆమెకు తెలియలేదు.

కానీ ఆమె పిల్లలు ఈ విషయాన్ని అర్ధం చేసుకున్నారు. ఆ తర్వాత జరిగిన ప్రతి విషయంలోనూ ఆమెకు అండగా నిలిచారు.

చివరికి డయాన్ ఆ ఈమెయిల్‌కు సమాధానం ఇవ్వాలని ఆ తర్వాత తన పెద్ద కొడుకును కలవడానికి వెళ్లాలని నిర్ణయించుకున్నారు.

"మొదట్లో అతను తన కుటుంబంతో కలిసి నన్ను చూడటానికి రావాలనుకున్నారు. ఆ ఆలోచన నాకు చాలా ఆందోళన కలిగించింది. బహుశా పరిస్థితులను నా నియంత్రణలో ఉంచుకోవాలని అనుకున్నానేమో. చివరకు నేనే వాళ్లను కలవడానికి విమానంలో వెళ్లాలని నిర్ణయించుకున్నా'' అని ఆమె చెప్పారు.

ఆమె సిడ్నీకి విమానంలో వెళ్ళారు. ఎయిర్‌పోర్ట్‌లో దిగగానే కొడుకును మొదటిసారి చూశారు. "అక్కడ అతను చేతిలో చిన్న తెల్లటి బొకేతో నిలబడి ఉన్నాడు. అతను నన్ను గట్టిగా కౌగిలించుకున్నాడు, నేను అతన్ని వదిలిపెట్టాలని అనుకోలేదు" అని ఆమె గుర్తుచేసుకున్నారు.

ఆ తర్వాత అతని ఇంటికి వెళ్లి కోడలిని, మనవళ్లను కలుసుకున్నాను.

ఆస్ట్రేలియా, న్యూజీలాండ్, మతసంప్రదాయాలు, దత్తత, కెనడా
ఫొటో క్యాప్షన్, డయాన్ పశువైద్యురాలిగా ఉన్నారు.

"నా మనవరాలి స్కూల్‌లో జరిగే సంగీత కార్యక్రమం కోసం సిడ్నీ వెళ్లాను. అప్పుడే వాళ్లను మొదటిసారి కలిశాను. కార్యక్రమానికి వెళ్లేముందు మేమంతా కలిసి ఏదో తింటూ కూర్చున్నాం. అప్పుడు నా కొడుకును దత్తత తీసుకున్న తల్లి అకస్మాత్తుగా నావైపు వంగి నా చేతిపై తన చేయి వేసి, 'థ్యాంక్యూ' అని అన్నారు. నేను అప్పుడు ' మీకు ఏమైనా కావాలా?' అని అనుకుంటూ ఆమె వైపు చూశా. అవతలి వైపు కూర్చున్న నా కొడుకు, అతని భార్య, వాళ్ల పిల్లలను చూపిస్తూ మాకు వీళ్లందరినీ ఇచ్చినందుకు థ్యాంక్స్'అన్నది’’ అని డయాన్ గుర్తుచేసుకున్నారు.

ఆ క్షణం తనను పూర్తిగా కదిలించిందని డయాన్ చెప్పారు.

"దేవుడా...ఆ సమయంలో నా భావోద్వేగాలను అదుపులో ఉంచుకోడానికి ఎంతో శక్తిని కూడగట్టుకోవాల్సివచ్చింది.

ఇదొక విచిత్రమైన పరిస్థితి.

ప్రేమతో కూడిన ఓ బంధం వల్ల నా కొడుకు పుట్టాడు. నేను పడ్డ బాధంతా పక్కనపెడితే అసలేం జరిగిందో తెలిసిన తర్వాత నాకు మరింత బాద కలిగింది. అయితే అతన్ని దత్తత తీసుకున్న తల్లిదండ్రులు ఎంతో ప్రేమగా పెంచారు. అతన్ని జాగ్రత్తగా చూసుకున్నారు. అతనికి కావాల్సినవన్నీ ఇచ్చారు. వాళ్లు నిజంగా అద్భుతమైన వ్యక్తులు. ఎంతో మంచివారు" అని డయాన్ గుర్తుచేసుకున్నారు.

ఇప్పుడు కుటుంబంతో కలిసి...

ప్రస్తుతం డయాన్ తన కొడుకుతో పాటు అతని కుటుంబంతోనూ అనుంబంధాన్ని కొనసాగిస్తున్నారు

"జరిగిన దాన్ని దేన్నీ నేను మార్చలేను. ఈ ఘటనలో భాగమైన వ్యక్తులను, అప్పటి నిబంధనలను, సమాజంలోని ఆలోచనా విధానాన్ని కూడా మార్చలేను. కానీ 40 ఏళ్లకు పైగా నాకు దూరమైన నా కొడుకుతో ఇప్పుడు ఒక మంచి బంధాన్ని తిరిగి నిర్మించుకోవడానికి నా శక్తినంతా ఉపయోగించాలనుకుంటున్నా'' అని ఆమె చెప్పారు.

"నాకు కోపం కూడా వచ్చింది. ఆ కోపం, బాధలోనే మునిగిపోయిన కొందరిని కూడా చూశాను. కానీ ఇప్పుడు నా కుటుంబం మళ్లీ ఒక్కటవడం వల్ల కలిగిన ఆనందం చాలా గొప్పది. ఆ ఆనందం ముందు మిగతా భావాలన్నీ చిన్నవిగా అనిపిస్తున్నాయి. ఇకపై ఆ ఆనందాన్ని పెంచుకుంటూ, ఈ బంధాన్ని ఆస్వాదిస్తూ జీవించాలనుకుంటున్నా" అని డయాన్ చెప్పారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)