‘ప్రాణాలతో తిరిగి రాలేనేమో’.. అత్యవసర వైద్య సాయం కోరిన ఇమ్రాన్ ఖాన్

ఫొటో సోర్స్, Getty Images
- రచయిత, కరోలిన్ డేవిస్, కెల్లీ ఎన్జీ
- హోదా, బీబీసీ ప్రతినిధులు
- ప్రచురణ
- చదివే సమయం: 3 నిమిషాలు
జైలులో ఉన్న పాకిస్తాన్ మాజీ ప్రధానమంత్రి ఇమ్రాన్ ఖాన్, తనతో పాటు భార్య బుష్రా బీబీ ఆరోగ్యం క్షీణిస్తోందని, తమకు అత్యవసర వైద్య చికిత్స అందించాలని విజ్ఞప్తి చేశారు.
''నా వయసు 74 ఏళ్లు. ఇలాగే నిరంతరంగా వేధిస్తే, బహుశా ప్రాణాలతో తిరిగి రాలేని పరిస్థితికి నన్ను తీసుకెళ్తారు'' అని ఇమ్రాన్ ఖాన్ రాసిన లేఖను ఆయన తరఫు న్యాయవాది సల్మాన్ సఫ్దర్ విడుదల చేశారు.
అయితే, ఇస్లామాబాద్లోని అధికారులు మాత్రం ఇమ్రాన్ ఖాన్కు వారానికి ఒకసారి వైద్య పరీక్షలు నిర్వహిస్తున్నామని చెబుతున్నారు. ఆయన ఆరోగ్య పరిస్థితి సంతృప్తికరంగానే ఉందని వైద్యులు నిర్ధరించినట్లు పేర్కొంటున్నారు.
ఇమ్రాన్ ఖాన్పై 100కు పైగా కేసులు ఉన్నాయి. 2023 ఆగస్టు నుంచి ఆయన జైలులోనే ఉన్నారు. గత ఏడాది ఆయన భార్య బుష్రా బీబీ కూడా జైలుపాలయ్యారు. అవినీతి నుంచి ప్రభుత్వ బహుమతుల విక్రయం వరకు తమపై నమోదైన కేసులన్నీ రాజకీయ ప్రేరేపితమైనవని ఇమ్రాన్ ఖాన్ ఆరోపిస్తున్నారు.

గత ఏడాది కాలంగా ఇమ్రాన్ ఖాన్ ఆరోగ్యంపై ఆందోళనలు పెరుగుతున్నాయి. జైలు అధికారులు సరైన సమయంలో స్పందించకపోవడంతో ఆయన కుడి కంటిచూపు దాదాపు కోల్పోయారని కుటుంబ సభ్యులు గతంలో ఆరోపించారు.
తనకు మెదడులో రక్తస్రావం, గుండెపోటు వచ్చే ప్రమాదం చాలా ఎక్కువగా ఉందని వైద్యులు చెప్పినట్లు ఇమ్రాన్ ఖాన్ తన లేఖలో పేర్కొన్నారు. ఇప్పటికే తన గుండె దెబ్బతిన్నట్లు కూడా వైద్యులు తెలిపారని వెల్లడించారు.
తన భార్య బుష్రా బీబీ ఆరోగ్య పరిస్థితిపైనా ఆయన ఆందోళన వ్యక్తం చేశారు. ఏప్రిల్లో ఆమె కంటిలోని రెటీనా పొర విడిపోయిందని, రహస్యంగా శస్త్రచికిత్స కూడా చేయించారని ఇమ్రాన్ ఖాన్ తెలిపారు. మరోసారి శస్త్రచికిత్స చేయించకపోతే ఆమె చూపు కోల్పోయే ప్రమాదం ఉందని ఆందోళన వ్యక్తం చేశారు.
''ఎన్నో కేసుల్లో అసాధ్యమనిపించే న్యాయపోరాటాలు చేశాను. ఇప్పటికీ పోరాటం ఆపలేదు. కానీ, వ్యవస్థ మాత్రం నాకు న్యాయం చేయడం మానేసింది'' అని ఆయన లేఖలో రాశారు.
తనను రోజుకు 22 గంటల వరకు ఏకాంత నిర్బంధంలో ఉంచుతున్నారని ఇమ్రాన్ ఖాన్ ఆరోపించారు. కుటుంబ సభ్యులను కలిసేందుకు అనుమతించడం లేదని, పుస్తకాలు, టెలివిజన్ కూడా అందుబాటులో లేవని తెలిపారు. ఈ పరిస్థితులు తన మానసిక ఆరోగ్యంపై తీవ్ర ప్రభావం చూపాయని పేర్కొన్నారు.
గత ఏడాది కాలంలో తన న్యాయవాదులను కేవలం నాలుగు సార్లు మాత్రమే కలుసుకోగలిగానని కూడా ఆయన ఆరోపించారు.
''నా నిర్దోషిత్వాన్ని నిరూపించుకోవాలంటే నేను ప్రాణాలతో ఉండాలి'' అని ఇమ్రాన్ ఖాన్ తన లేఖలో పేర్కొన్నారు.
అయితే, ఈ ఆరోపణలను పాకిస్తాన్ పార్లమెంటరీ వ్యవహారాల మంత్రి తారిఖ్ ఫజల్ చౌధురి ఖండించారు. జైలులో ఇమ్రాన్ ఖాన్కు ఆహారంతో సహా అన్ని సౌకర్యాలు కల్పిస్తున్నామని, ఆయన కోరుకున్న ఆహారాన్నే అందిస్తున్నామని చెప్పారు.
''ప్రస్తుతం పాకిస్తాన్లో అత్యంత సౌకర్యవంతంగా ఉన్న ఖైదీ ఆయనే'' అని మంత్రి మీడియాతో అన్నారు.
వారం రోజుల క్రితం కంటికి ఇంజెక్షన్ వేయించేందుకు ఇమ్రాన్ ఖాన్ను ప్రభుత్వ ఆసుపత్రికి తీసుకెళ్లామని, అక్కడి వైద్యులు ఆయన ఆరోగ్య పరిస్థితి నిలకడగా ఉందని నిర్ధరించారని అధికారులు చెబుతున్నారు.

ఫొటో సోర్స్, Getty Images
2023లో అరెస్ట్
ఇమ్రాన్ ఖాన్ గతంలో పాకిస్తాన్ జాతీయ క్రికెట్ జట్టుకు కెప్టెన్గా వ్యవహరించారు. 2018 నుంచి 2022 వరకు దేశ ప్రధానమంత్రిగా పనిచేశారు.
2023 మేలో ఆయన అరెస్టు కావడంతో మద్దతుదారులు పెద్ద ఎత్తున హింసాత్మక నిరసనలకు దిగారు. లాహోర్లోని కార్ప్స్ కమాండర్ నివాసంపై దాడి చేసి, అక్కడి షాండ్లియర్లను ధ్వంసం చేశారు. ఫర్నిచర్, పెయింటింగ్స్తో పాటు నెమళ్లను కూడా ఎత్తుకెళ్లారు.
ఈ నిరసనల్లో కనీసం ఎనిమిది మంది మరణించారు. హింసను అదుపు చేసేందుకు సైన్యాన్ని రంగంలోకి దించారు. జైలులో ఉన్నప్పటికీ పాకిస్తాన్ రాజకీయాల్లో ఇమ్రాన్ ఖాన్ ప్రభావం కొనసాగుతోంది.
ఆయన్ను విడుదల చేయాలంటూ అక్టోబర్ మొదట్లో వేలాది మంది మద్దతుదారులు రోడ్లపైకి వచ్చారు. రోజుల తరబడి ర్యాలీలు నిర్వహించారు. ఆ తర్వాత అధికారులు నిరసనలపై కఠిన చర్యలకు ఆదేశించారు. ఇమ్రాన్ ఖాన్ పార్టీకి బలమైన పట్టు ఉన్న ఖైబర్ పఖ్తున్ఖ్వా ప్రావిన్స్లో అత్యవసర పరిస్థితి విధించారు.
ఇమ్రాన్ ఖాన్కు సరైన వైద్య చికిత్స అందించాలని కోరుతూ అంతర్జాతీయ క్రికెట్లో గతంలో కెప్టెన్లుగా పనిచేసిన పలువురు ప్రముఖులు కూడా ఇటీవలి నెలల్లో పాకిస్తాన్ ప్రధానమంత్రి షాబాజ్ షరీఫ్కు విజ్ఞప్తులు చేశారు.
(బీబీసీ కోసం కలెక్టివ్ న్యూస్రూమ్ ప్రచురణ)
(బీబీసీ తెలుగును వాట్సాప్, ఫేస్బుక్, ఇన్స్టాగ్రామ్, ట్విటర్లో ఫాలో అవ్వండి. యూట్యూబ్లో సబ్స్క్రైబ్ చేయండి.)





























