4నెలలుగా కనిపించకుండా పోయిన బాలిక, 2నెలల పసికందుతో దట్టమైన అడవిలో ఉన్నట్టు పోలీసులు ఎలా కనిపెట్టారు? అసలేం జరిగింది?

ఫొటో సోర్స్, SpecialArrangements
- రచయిత, జె. పరనీతరన్
- హోదా, బీబీసీ కోసం
- ప్రచురణ
- చదివే సమయం: 4 నిమిషాలు
(ఈ కథనంలో మిమ్మల్ని కలిచివేసే అంశాలున్నాయి)
శ్రీలంకలో నాలుగు నెలల క్రితం కనిపించకుండా పోయిన 15 ఏళ్ల బాలిక, రెండునెలల పసిబిడ్డతోపాటు దట్టమైన అడవిలో ఉన్నట్టు కనిపెట్టిన పోలీసులు ఆమెను, ఆమె బిడ్డను రక్షించారు.
నకిల్స్ పర్వతశ్రేణిలోని దట్టమైన అటవీ ప్రాంతంలో, పెద్ద పెద్ద బండరాళ్ల మధ్య ఉన్న గుహలో ప్లాస్టిక్ టార్పాలిన్లతో ఏర్పాటు చేసిన నివాసంలో ఉన్నట్లు గుర్తించిన శ్రీలంక పోలీసులు ఆమెను రక్షించారు.
ఈ ఘటనకు సంబంధించి 23 ఏళ్ల యువకుడిని, ఆయనకు సహకరించినట్లు ఆరోపణలు ఎదుర్కొంటున్న 36 ఏళ్ల మరో వ్యక్తిని అరెస్ట్ చేశారు.
శ్రీలంకలోని నకిల్స్ పర్వతశ్రేణి పశ్చిమ వాలుకు సమీపంలో ఉన్న మీమురే, కందకెట్టియ ప్రాంతంలో నివసిస్తున్న 15 ఏళ్ల బాలిక కనిపించకుండా పోయింది. దీనిపై ఆమె కుటుంబ సభ్యులు జూలై 13న ఉడుదుంబర పోలీస్ స్టేషన్లో ఫిర్యాదు చేశారు.

నాలుగు నెలలుగా గాలింపు
బాలిక కోసం పోలీసులు, కుటుంబ సభ్యులు, స్నేహితులు కలిసి గాలించినప్పటికీ ఆచూకీ తెలియలేదు.
ఉడుదుంబర పోలీస్ స్టేషన్ ప్రధాన అధికారి తుషిత తొంబగమ్మన నేతృత్వంలో ప్రత్యేక దర్యాప్తు ప్రారంభించారు.
బాలిక సాధారణంగా వెళ్లే ప్రదేశాలు, ఆమెతో సంబంధాలు కలిగి ఉన్న స్నేహితులు తదితర కోణాల్లో విచారణ జరిపారు.
అయినప్పటికీ నాలుగు నెలల పాటు ఆమెకు సంబంధించిన ఎలాంటి సమాచారం లభించలేదు.
ఆచూకీ ఎలా?
స్థానికంగా ఉన్న ఓ దుకాణం నుంచి ఓ యువకుడు సాధారణం కంటే ఎక్కువ మొత్తంలో బియ్యం, ఇతర ఆహార పదార్థాలను ప్రతిరోజూ తీసుకెళ్తున్న ఓ యువకుడి గురించి గ్రామస్థులు పోలీసులకు సమాచారం ఇచ్చారు. దీంతో పోలీసులు ఆ యువకుడి కదలికలపై నిఘా పెట్టారు.
నవంబర్ 14న ఆ యువకుడు బియ్యం తీసుకుని జనసంచారం లేని అటవీ ప్రాంతం వైపు వెళ్లడంతో పోలీసులకు అనుమానం మరింత పెరిగింది.
దీంతో ఆయనను వెంబడించిన పోలీసులు, మీమురే గ్రామానికి సుమారు ఐదు కిలోమీటర్ల దూరంలో ఉన్న నకిల్స్ పర్వతశ్రేణి పశ్చిమ వాలులోని దట్టమైన అటవీ ప్రాంతానికి చేరుకున్నారు.
అక్కడ బండరాళ్ల మధ్య గుహలో ప్లాస్టిక్ టార్పాలిన్లతో ఏర్పాటు చేసిన నివాసంలో రెండు నెలల ఆడ శిశువుతో కలిసి ఓ బాలిక ఉంటున్నట్లు గుర్తించారు. నాలుగు నెలల క్రితం కనిపించకుండా పోయినట్లు ఫిర్యాదు అందిన 15 ఏళ్ల బాలిక ఆమెనేనని పోలీసులు నిర్ధరించారు.
దీంతో పోలీసులు ఆ ప్రాంతాన్ని చుట్టుముట్టి, అక్కడికి ఆహార పదార్థాలను తీసుకెళ్తున్న 23 ఏళ్ల యువకుడిని అరెస్ట్ చేశారు. బాలికతో పాటు రెండు నెలల ఆడ శిశువును సురక్షితంగా అక్కడి నుంచి తీసుకెళ్లారు.
ఈ ఘటనతో సంబంధం ఉన్నట్లు భావిస్తున్న, ఆ యువకుడికి సహకరించినట్లు ఆరోపణలు ఎదుర్కొంటున్న 36 ఏళ్ల మరో వ్యక్తిని కూడా ఉడుదుంబర పోలీసులు అరెస్ట్ చేశారు.

ఫొటో సోర్స్, SpecialArrangements
'అడవిలోనే ప్రసవం'
పోలీసుల సంరక్షణలోకి తీసుకున్న బాలికను, 23 ఏళ్ల యువకుడిని విచారించగా.. అడవిలోనే ఎలాంటి వైద్య సాయం లేకుండా బాలిక ప్రసవించినట్లు వెల్లడైంది.
ప్రసవ సమయంలో అవసరమైన సాయమంతా తానే చేశానని, ప్రసవం తర్వాత తాటి వృత్తిలో ఉపయోగించే పదునైన ఆయుధంతో శిశువు బొడ్డు తాడు కోశానని ఆ యువకుడు చెప్పినట్లు పోలీసులు తెలిపారు.

ఫొటో సోర్స్, SpecialArrangements
కాండీ నేషనల్ హాస్పిటల్కు బాలిక, శిశువు
పోలీసులు రక్షించిన రెండు నెలల ఆడ శిశువుతో పాటు 15 ఏళ్ల బాలికను వైద్య పరీక్షలు, తదుపరి చికిత్స నిమిత్తం కాండీ జాతీయ ఆసుపత్రికి తరలించారు.
ఈ ఘటనకు సంబంధించి అరెస్ట్ చేసిన 23 ఏళ్ల యువకుడితో పాటు, ఆయనకు సహకరించినట్లు ఆరోపణలు ఎదుర్కొంటున్న 36 ఏళ్ల బంధువును తెల్దనియా మేజిస్ట్రేట్ కోర్టులో హాజరుపరిచారు.
వారిద్దరినీ తదుపరి విచారణ నిమిత్తం నవంబర్ 20వ తేదీ వరకు రిమాండ్లో ఉంచాలని న్యాయస్థానం ఆదేశించింది.

ఫొటో సోర్స్, Getty Images
సోషల్ మీడియాలో విమర్శలు
ఈ ఘటన సోషల్ మీడియాలో చర్చనీయాంశంగా మారింది.
15 ఏళ్ల బాలిక తల్లికావడం, వైద్య సాయం లేకుండా సురక్షితం కాని అటవీ ప్రాంతంలో బిడ్డకు జన్మనివ్వడం, తల్లీబిడ్డలను అక్కడే ఉంచడంవంటి అంశాలపై కొందరు విమర్శలు చేస్తున్నారు.
ఇలాంటి చర్యలు శిక్షార్హమైన నేరాలని సోషల్ మీడియాలో తమ అభిప్రాయాలను వ్యక్తం చేస్తున్నారు.
అదే సమయంలో బిడ్డ పుట్టిన తర్వాత ఏదో ఒక విధంగా తల్లీబిడ్డల భద్రతకు ఏర్పాట్లు చేసి అక్కడే ఉంచడం కొంతవరకు ఊరటనిచ్చే విషయమని మరికొంతమంది అభిప్రాయపడ్డారు.
(బీబీసీ కోసం కలెక్టివ్ న్యూస్రూమ్ ప్రచురణ)
(బీబీసీ తెలుగును వాట్సాప్, ఫేస్బుక్, ఇన్స్టాగ్రామ్, ట్విటర్లో ఫాలో అవ్వండి. యూట్యూబ్లో సబ్స్క్రైబ్ చేయండి.)




























