అండర్ 19 ఆసియా కప్: గెలుపు తర్వాత భారత జట్టు సంబరాలపై పాకిస్తాన్‌లో చర్చ దేనికి?

అండర్-19 ఆసియా కప్ ఫైనల్‌, భారత్-పాకిస్తాన్
ఫొటో క్యాప్షన్, అండర్-19 ఆసియా కప్ ఫైనల్‌లో పాకిస్తాన్‌ను ఓడించిన తర్వాత భారత ఆటగాళ్లు సంబరాలు చేసుకున్నారు.
ప్రచురణ
చదివే సమయం: 5 నిమిషాలు

ఒమన్‌లో అండర్-19 ఆసియా కప్ ఫైనల్‌లో గెలిచిన తర్వాత భారత క్రికెట్ జట్టు సంబరాలు చేసుకున్న తీరుపై సోషల్ మీడియాలో పెద్ద ఎత్తున చర్చ జరుగుతోంది.

కొంతమంది భారత క్రికెట్ జట్టు ఆటగాళ్లకు మద్దతు ఇస్తుండగా.. కొంతమంది క్రీడామైదానంలో అలాంటి సంబరాలను చేపట్టకూడదని అంటున్నారు.

ముఖ్యంగా పాకిస్తానీ క్రికెట్ అభిమానులు, మాజీ క్రికెటర్లు, నిపుణులు భారత క్రికెట్ జట్టు సంబరాలు చేసుకున్న తీరుపై పలు ప్రశ్నలు సంధిస్తున్నారు.

విజయం తర్వాత భారత యువ ఆటగాళ్లు చాలా దూకుడుగా, ఉత్సాహంగా సంబరాలు చేసుకున్నారు. కొందరు పాకిస్తానీ ఆటగాళ్ల ముందే సంబరాలు చేసుకుంటూ కనిపించారు.

ఈ సమయంలో, భారత జట్టు సహాయక సిబ్బంది ఆటగాళ్లను శాంతపరిచి, వారిని మైదానం నుంచి బయటకు తీసుకువెళ్లడం కనిపించింది. కొందరు ఆటగాళ్లు పాకిస్తాన్ జట్టు వైపు సైగలు చేయడం కూడా కనిపించింది.

బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

బీసీసీఐ ఏం చెప్పింది?

ఈ విషయంపై భారత క్రికెట్ నియంత్రణ మండలి (బీసీసీఐ) ఒక ప్రకటన జారీ చేసింది. బీసీసీఐ కార్యదర్శి దేవజిత్ సైకియా భారత క్రికెట్ జట్టుకు తన మద్దతును ప్రకటించారు. వార్తా సంస్థ ఏఎన్ఐతో మాట్లాడుతూ.. ''ఇది స్ఫూర్తిని, భారత క్రికెట్ జట్టు పోరాట పటిమను చూపుతుంది'' అని తెలిపారు.

"ఇది ఒక హోరాహోరీ పోరు. ఈ మ్యాచ్ భారత్ చేతిలో లేదు. మీరు గమనిస్తే, సుమారు 280 పరుగుల వద్ద ఎనిమిది వికెట్లు పడ్డాయి. ఇంకా ఆడటానికి కొన్ని బంతులే మిగిలి ఉన్నాయి. అలాంటి పరిస్థితి నుంచి భారత జట్టు గెలిచింది. ఇది భారత జట్టు ఆత్మవిశ్వాసాన్ని పెంచినట్లు కనిపిస్తోంది" అని దేవజిత్ సైకియా అన్నారు.

''ఇలాంటి క్లిష్టమైన మ్యాచ్‌ను వారు గెలిస్తే, ఆ తర్వాత కొంత సంబరాలు చేసుకున్నారు. దానికి ప్రతి ఒక్కరూ ఆమోదం తెలపాలి. వారు గెలిచిన విధానం తీరు చూస్తే, వారి సంబరాలు సమర్థనీయమైనవే అని నేను అనుకుంటున్నాను'' అని తెలిపారు.

అండర్-19 ఆసియా కప్ ఫైనల్‌, భారత్-పాకిస్తాన్
ఫొటో క్యాప్షన్, భారత క్రికెట్ జట్టు దూకుడుగా సంబరాలు చేసుకోవడాన్ని పాకిస్తానీ క్రికెటర్లు విమర్శించారు.

పాకిస్తాన్ మాజీ క్రికెటర్లు ఏమన్నారు?

శనివారం జరిగిన అండర్-19 ఆసియా కప్ ఫైనల్ మ్యాచ్ ఫలితం చివరి బంతికి కానీ తేలలేదు. ఈ మ్యాచ్‌లో భారత్ ఒక వికెట్ తేడాతో విజయం సాధించింది.

అయితే, ఒక దశలో విజయం భారత్ చేజారిపోతుందేమో అనిపించే పరిస్థితి ఏర్పడింది.

కానీ చివరకు జట్టులోని టెయిలెండర్లు భారత క్రికెట్ జట్టును చాంపియన్‌‌గా నిలిపారు.

భారత క్రికెట్ జట్టు కాస్త దూకుడుగా సంబరాలు చేసుకోవడాన్ని పాకిస్తానీ క్రికెటర్లు విమర్శించారు.

''ఈ టోర్నమెంట్ గెలిచినందుకు భారత్‌కు శుభాకాంక్షలు. ఈ టోర్నమెంట్ అంతటా అద్భుతమైన ఆటతీరును కనబర్చినందుకు, మ్యాచ్‌ను చక్కగా ఆడినందుకు పాకిస్తాన్ అండర్-19 జట్టుకు కూడా ఈ ఘనత దక్కుతుంది. అయితే, విజయాన్ని ఆనందంతో జరుపుకోవాలి. అంతేకానీ దూకుడుగా ప్రవర్తించడం లేదా అనవసరంగా శత్రుత్వాన్ని రెచ్చగొట్టడం ద్వారా కాదు. వీరు యువ క్రీడాకారులు, గెలుపు ఓటములకు అతీతమైనదే ఆట స్ఫూర్తి అని వారికి నేర్పించడం చాలా ముఖ్యం" అని పాకిస్తాన్ మాజీ క్రికెటర్ అహ్మద్ షెహ్‌జాద్ ఇన్‌స్టాగ్రామ్‌లో రాశారు.

"దురదృష్టవశాత్తు, సీనియర్ ఆటగాళ్లు మారాల్సిన కొన్ని సంప్రదాయాలను కొనసాగిస్తున్నారు. ఇప్పుడు మనం మారాల్సిన సమయం వచ్చింది. ప్రత్యర్థి జట్టును గౌరవించి, క్రీడాస్ఫూర్తిని అలవర్చుకోవాలి. గర్వంతో గెలవండి, పూర్తి ఉత్సాహంతో పోటీపడండి, కానీ ఎల్లవేళలా ఆటను గౌరవించండి" అని రాశారు.

పాకిస్తాన్ మాజీ ఫాస్ట్ బౌలర్ షోయబ్ అక్తర్ కూడా ఒక కార్యక్రమంలో మాట్లాడుతూ.. ''భారత్‌కు అభినందనలు. వారు చాలా మంచి క్రికెట్‌ను ఆడారు. కానీ, నేనొక్కటి చెప్పదలుచుకున్నా, మనం ఒక్క క్రికెట్‌నే ఆడటం లేదు. మనం విలువలను కూడా ఆచరించాలి. నేటికి కూడా నేను సచిన్‌ గురించి మంచిగా మాట్లాడతాను. నేటికి కూడా ఆయన్ను ప్రపంచంలో నెంబర్ వన్ బ్యాట్స్‌మాన్‌గా పరిగణిస్తాను. సెహ్వాగ్, సౌరవ్, మేమందరం ఒకరితో ఒకరం కలిసి ఆడాం. మేమందరం మంచి స్నేహితులం. మేమెప్పుడూ ఒకరిపై ఒకరం ఇలా ప్రవర్తించలేదు'' అని అన్నారు.

"వారు చిన్నవారేనని అంగీకరిస్తాను. కానీ, మనం మన పిల్లలకు కూడా విలువలను నేర్పించాలి. గత మ్యాచ్‌లో, భారత జట్టు కెప్టెన్ మాట్లాడుతూ.. 'వారు మా కంటే మెరుగ్గా ఆడారని, వాళ్లే మాకంటే మంచి జట్టు' అని చెప్పారు. ఇలాంటి మంచి విలువలతో కూడిన మాటలు వినడం ఎంతో ఆనందంగా అనిపించింది. భారత ఆటగాళ్లకు నా సందేశం ఇదే.. కచ్చితంగా దూకుడును ప్రదర్శించండి, అది చూడటానికి చాలా బాగుంటుంది. అదే సమయంలో, పాకిస్తాన్ జట్టు కూడా మెరుగైన జట్టు. వారు కూడా టోర్నమెంట్ అంతటా బాగా ఆడారని నేను చెప్పాలనుకుంటున్నాను" అని షోయబ్ అక్తర్ చెప్పారు.

''ఆసియా కప్ అండర్ 19 ముగిసింది. ఇంత ఒత్తిడిలో కూడా భారత జట్టు ఎప్పటిలాగే పాకిస్తాన్‌ను ఓడించింది. భవిష్యత్తులో స్టార్ ఆటగాళ్లుగా ఎదిగే సత్తా ఉన్న రెండు జట్ల ఆటగాళ్లకు ఇది ఎంతో గొప్ప నేర్చుకునే వేదికగా నిలిచింది.

నేను ఒక విషయం చెప్పాలనుకుంటున్నాను. మీరు క్రీడల్లో పాల్గొన్నప్పుడు లేదా ఏ స్థాయిలోనైనా పోటీపడినప్పుడు, కేవలం మీ దేశానికి మాత్రమే ప్రాతినిధ్యం వహించడం లేదు. నిజానికి, మీరు పెరిగిన తీరు, మీలో ఉన్న విలువలు, చిన్నప్పటి నుంచి మీ తల్లిదండ్రులు మీకు నేర్పించిన సంస్కారం వంటి వాటికి కూడా ప్రాతినిధ్యం వహిస్తున్నారు" అని పాకిస్తాన్ మాజీ క్రికెటర్ మొహమ్మద్ యూసఫ్ ఎక్స్‌లో ఒక పోస్టు పెట్టారు.

''మీరు గెలిచినా, ఓడినా ఎల్లప్పుడూ గౌరవంతో ప్రవర్తించాలి. సంయమనాన్ని పాటించాలి. ఫలితంతో సంబంధం లేకుండా, మైదానంలో, మైదానం వెలుపల మీరు ప్రవర్తించే తీరులోనే నిజమైన క్రీడాస్ఫూర్తిని ప్రతిబింబిస్తుంది'' అని చెప్పారు.

అండర్-19 ఆసియా కప్ ఫైనల్‌, భారత్-పాకిస్తాన్
ఫొటో క్యాప్షన్, భారత జట్టు సంబరాలు చేసుకున్న తీరుపై కొంతమంది భారతీయులు కూడా వ్యాఖ్యానించారు.

భారత్‌లోని ప్రజలేమంటున్నారు?

అండర్ 19 క్రికెట్ జట్టు చేసుకున్న సంబరాలు ఓ సహజ స్పందన అని, ఇది ఎవరికో చూపించడానిలో లేక ప్రదర్శించాలనో తాము అలా చేయలేదని భారత అండర్-19 క్రీడాకారుడు మోహిత్ ఉల్వా చెప్పాడు.

పాకిస్తాన్‌పై భారత్ ఒక వికెట్ తేడాతో ఉత్కంఠభరితమైన విజయాన్ని సాధించడంలో మోహిత్ ఉల్వా కీలక పాత్ర పోషించాడు. ఈ మ్యాచ్‌లో అతను 26 బంతుల్లో 49 పరుగులు చేశాడు.

''ఇది సహజసిద్ధంగా జరిగింది. ఎందుకంటే, ఇది భారత్-పాకిస్తాన్ మ్యాచ్. ఫైనల్ మ్యాచ్. అంతకుముందు ఒక మ్యాచ్ మమ్మల్ని ఓడించారు. వారు అప్పుడు వారి విజయాన్ని సెలబ్రేట్ చేసుకున్నారు. అప్పుడు వారేం చేశారో మేం పట్టించుకోలేదు. మేం ఇప్పుడు ఇలానే చేశాం. మా విజయాన్ని సంబరంగా చేసుకున్నాం. దీనిలో మా భావోద్వేగాలు, దూకుడుతనం ఉంది. ఇది ఎవరికో చూపించడానికి లేదా ప్రదర్శించడానికి కాదు'' అని మోహిత్ అన్నాడు.

"భారత క్రికెట్ జట్టు మైదానంలో 'దూకుడు వైఖరి'ని ప్రదర్శించాలనుకుంటే, ఇకపై వారితో సమాన స్థాయి జట్ల నుంచి ఆటగాళ్లను ఎంపిక చేసుకోవాలి. పాకిస్తాన్ ఇప్పుడు బలహీనమైన, సులభమైన లక్ష్యంగా మారింది. నేను ఆస్ట్రేలియా, దక్షిణాఫ్రికా, న్యూజిలాండ్, ఇంగ్లాండ్‌లను సూచిస్తున్నా..." అని భారత మాజీ క్రికెటర్ సంజయ్ మంజ్రేకర్ ఎక్స్‌లో రాశారు.

''భారత్, పాకిస్తాన్ జట్లు ప్రత్యర్థులు కావొచ్చు. క్రికెట్ పోటీ చాలా తీవ్రంగా ఉంటుంది. కానీ, ఇంతటి అత్యంత హేయమైన ప్రవర్తనకు ఇది సాకు కాకూడదు" అని కాంగ్రెస్ పార్టీతో సంబంధం ఉన్న శ్వేతా సోని అనే యూజర్ భారత జట్టు స్పందనపై రాశారు.

"ఇది క్రికెట్ మ్యాచ్, యుద్ధం కాదు. కొంత గౌరవం పాటించండి. మర్యాదగా ప్రవర్తించండి. సిగ్గుతో కాదు, గర్వంతో భారత్‌కు ప్రాతినిధ్యం వహించండి. ఒక దేశ క్రీడా సంస్కృతి అనేది దాని ఆటగాళ్లు ఎలా గెలుస్తారనే దానిలో మాత్రమే కాకుండా, ఓడిపోయిన వారిని ఎలా చూస్తారనే దానిలో కూడా ప్రతిబింబిస్తుంది" అని పేర్కొన్నారు.

అయితే,భారత జట్టు సంబరాలు చేసుకున్న విధానానికి చాలామంది మద్దతు పలుకుతున్నారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)