కుర్రాళ్లు కొట్టేశారు: అండర్ 19 ఆసియాకప్ ఫైనల్లో పాకిస్తాన్‌పై ఇండియా ఉత్కంఠభరిత గెలుపు

చివరి బంతిని బౌండరీకి తరలించి ఇండియా అండర్ 19 ఆసియా కప్‌ను గెలిచింది
ఫొటో క్యాప్షన్, చివరి బంతిని బౌండరీకి తరలించి ఇండియా అండర్ 19 ఆసియా కప్‌ను గెలిచింది
ప్రచురణ
చదివే సమయం: 3 నిమిషాలు

ఒమన్‌లో జరిగిన అండర్ 19 ఆసియాకప్ ఫైనల్లో డిఫెండింగ్ చాంపియన్ పాకిస్తాన్‌పై భారత కుర్రాళ్లు గుర్తుండిపోయే గెలుపును అందించారు.

క్షణక్షణం ఉత్కంఠగా సాగిన ఈ మ్యాచ్‌ను టెయిలెండర్లు గట్టెక్కించిన వైనం ఆసియాకప్ చరిత్రలో నిలిచిపోతుంది.

చివర్లో బ్యాటింగ్‌కు వచ్చి, మరో ఎండ్‌లో చిగురుపాటి వెంకట (8 బంతుల్లో 11 పరుగులు) సాయంతో మోహిత్ ఉల్వా అద్భుతమే చేశాడు. 26 బంతుల్లో 49 పరుగులు బాది భారత్‌ను విజయతీరాలకు చేర్చారు.

మోహిత్ ఉల్వా. ఈ పేరు చాలా కాలం గుర్తుండిపోతుంది.

ఈ కుర్రాడు చివర్లో బాదిన ఫోరే ఇండియాకు ఆసియా కప్ తెచ్చిపెట్టింది.

బీబీసీ న్యూస్ తెలుగు వాట్సాప్ చానల్‌
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

పాకిస్తాన్ విసిరిన 337 పరుగుల లక్ష్యాన్ని ఛేదించేందుకు బరిలోకి దిగిన భారత్‌కు శుభారంభం లభించింది.

ఓపెనర్లు లక్ష్య రాజేశ్ రాయిచందానీ, ఆర్యవీర్ సెహ్వాగ్ అర్థశతకాలు బాదారు. తరువాత వీకే వినీత్ (24), అర్జున్ రాజ్‌పుత్ (16), యశ్‌బర్దన్ చౌహాన్ (9) అన్వ్వై ద్రావిడ్ (19) పరుగులు మాత్రమే చేయడంతో ఇండియా కష్టాల్లో పడింది. కానీ మనల్ చౌహాన్ 32 బంతుల్లో 47పరుగులు చేయడంతో భారత్ మళ్లీ రేసులోకి వచ్చింది.

ఈ క్రమంలో 42 ఓవర్లకు భారత్ స్కోరు 8 వికెట్ల నష్టానికి 253 పరుగులు. అయితే అప్పటికే స్థిరంగా ఆడుతున్న మనల్ చౌహాన్‌కు మోహిత్ జత కలిశాడు. ఇద్దరూ లక్ష్యాన్ని తగ్గించే పని పెట్టుకున్నారు.

వరుసగా రెండోసారి భారత్ పాకిస్తాన్ ఆసియాకప్ అండర్ 19 ఫైనల్లో తలపడ్డాయి
ఫొటో క్యాప్షన్, వరుసగా రెండోసారి భారత్ పాకిస్తాన్ ఆసియాకప్ అండర్ 19 ఫైనల్లో తలపడ్డాయి

ఈ క్రమంలో 47.2 ఓవర్లో మనల్ చౌహాన్ (47) ఔటయ్యాడు.దీంతో ఇండియా స్కోరు 48 ఓవర్లకు 9 వికెట్ల నష్టానికి 313 పరుగులు అయింది. తరువాత మోహిత్‌కు జత కలిసిన చిగురుపాటి వెంకట జాగ్రత్తగా ఆడారు. చివరి బంతికి 3 పరుగులు అవసరమైన సమయంలో మోహిత్ ఫోర్ బాది జట్టును గెలిపించాడు.

ఒమన్, అండర్ 19 ఆసియాకప్
ఫొటో క్యాప్షన్, పాకిస్తాన్ విసిరిన 337 పరుగుల లక్ష్యాన్ని ఛేదించేందుకు బరిలోకి దిగిన భారత్‌కు శుభారంభం లభించింది.

అంతకుముందు పాకిస్తాన్ టాస్ గెలిచి బ్యాటింగ్ ఎంచుకుంది.

పాకిస్తాన్ ఓపెనర్ ఉస్మాన్ ఖాన్, సెంచరీ బాదాడు.

వన్‌‌డౌన్‌లో వచ్చిన అబ్దుల్ ఖాదిర్ (80), కెప్టెన్ ఫర్హాన్ యూసుఫ్ (63) పరుగులు చేయడంతో పాకిస్తాన్ 9 వికెట్ల నష్టానికి 337 పరుగులు చేసింది.

భారత బౌలర్లలో కావ్యా పటేల్ 10 ఓవర్లలో 68 పరుగులు ఇచ్చి 4 వికెట్లు తీశాడు. చిగురుపాటి వెంకట కూడా 5 ఓవర్లలో 40 పరుగులు ఇచ్చి 3 వికెట్లు తీశాడు.

ఇక పాకిస్తాన్ బౌలర్లలో రిజ్వానుల్లా 10 ఓవర్లలో 53 పరుగులు ఇచ్చి 3 వికెట్లు తీశాడు.

మొత్తానికి న్యూజీలాండ్‌పై 4వ వన్డేలో 244 పరుగుల తేడాతో టీమిండియా ఓడిపోయి భారత క్రికెట్ అభిమానులను విస్తుపోయేలా చేసిన వేళ అండర్ 19 ఆసియాకప్పును కుర్రాళ్లు కొట్టడం ఊరటనిచ్చే విషయమే.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)