ప్రధాని మోదీ ఏయే దేశాలలో అత్యధికంగా పర్యటించారు?

ఫొటో సోర్స్, DAMIR SENCAR/POOL/AFP via Getty Images
- రచయిత, జాస్మిన్ నిహలానీ
- హోదా, బీబీసీ ప్రతినిధి
- ప్రచురణ
- చదివే సమయం: 5 నిమిషాలు
ప్రధానమంత్రి నరేంద్ర మోదీ అధికారంలోకి వచ్చినప్పటి నుంచి 12 ఏళ్లలో ఆయన విదేశీ పర్యటనల కోసం రూ.900 కోట్లకు పైగా ఖర్చు చేశారు.
లోక్సభ, రాజ్యసభల్లో అడిగిన ప్రశ్నలకు సమాధానంగా విదేశాంగ మంత్రిత్వ శాఖ (ఎంఈఏ) ఈ వివరాలను వెల్లడించింది.
ఈ గణాంకాలు 2014 జూన్ నుంచి 2026 జులై వరకు సంబంధించినవి. ఈ కాలంలో ప్రధాని 81 దేశాల్లో 183 పర్యటనలు చేశారు. జులై నుంచి ఇప్పటివరకు మరో మూడు పర్యటనలు చేశారు. అయితే వాటికి సంబంధించిన ఖర్చుల వివరాలు బహిరంగంగా అందుబాటులో లేవు.
మరోవైపు మాజీ ప్రధాని మన్మోహన్ సింగ్ 2004 మే నుంచి 2014 మే వరకు తన పదేళ్ల పదవీకాలంలో 96 దేశాల్లో పర్యటించారు.
మన్మోహన్ సింగ్ అత్యధికంగా అమెరికాలో 10 సార్లు పర్యటించారు. అయితే ఆయన విదేశీ పర్యటనల కోసం చేసిన మొత్తం ఖర్చుకు సంబంధించిన పూర్తి వివరాలు అందుబాటులో లేవు. కానీ ఆయన పదేళ్ల పదవీకాలంలో చార్టర్డ్ విమానాల కోసం సుమారు రూ.795 కోట్లు ఖర్చయ్యాయి.

ప్రస్తుతం ప్రధానమంత్రి నరేంద్ర మోదీ రెండు రోజుల ఫిలిప్పీన్స్ పర్యటనలో ఉన్నారు. మనీలాలో జరిగే ఆసియాన్-భారత్ శిఖరాగ్ర సదస్సు (ఆగ్నేయాసియా దేశాల అసోసియేషన్)లో పాల్గొనేందుకు ఆయన అక్కడికి వెళ్లారు. అనంతరం అక్కడే జరిగే క్వాడ్ సదస్సులోనూ మోదీ పాల్గొంటారు.
ఇంతకుముందు ఆగస్ట్లో ఆయన ద్వైపాక్షిక పర్యటనలో భాగంగా ఉజ్బెకిస్తాన్ వెళ్లారు. ఆ తర్వాత కిర్గిస్తాన్లో జరిగిన షాంఘై కో ఆపరేషన్ ఆర్గనైజేషన్(ఎస్సీఓ) వార్షిక శిఖరాగ్ర సదస్సులో పాల్గొన్నారు.
ఈ తరహా ఉన్నతస్థాయి పర్యటనలు వివిధ దేశాలతో సంబంధాలను బలోపేతం చేసుకోవడానికి చేపడుతున్నట్లు విదేశాంగ మంత్రిత్వ శాఖ (ఎంఈఏ) పార్లమెంటులో సమాధానం ఇచ్చింది.ద్వైపాక్షిక, ప్రాంతీయ, అంతర్జాతీయ స్థాయిల్లో భారత్ భాగస్వామ్యాన్ని పెంపొందించడం కూడా వీటి ఉద్దేశమని పేర్కొంది.
విదేశీ పర్యటనల ఖర్చుల గురించి మంత్రిత్వ శాఖ వివరిస్తూ.. ప్రధానమంత్రి మరో దేశంలో పర్యటించినప్పుడు ఆయనను ఆ దేశ అతిథిగా పరిగణిస్తారని తెలిపింది.
ఆయన బస, ఇతర సౌకర్యాలకు అయ్యే ఖర్చులను ఆతిథ్య దేశ ప్రభుత్వమే భరిస్తుంది. అయితే ఈ పర్యటనల్లో ప్రధానితో పాటు వెళ్లే అధికారులు, భద్రతా ఏర్పాట్లకు అయ్యే ఖర్చులను భారత ప్రభుత్వమే భరిస్తుంది.
2022 నుంచి 2024 మధ్య ప్రధానమంత్రి విదేశీ పర్యటనల కోసం చేసిన ఖర్చుల వివరాలను 2025 మార్చిలో విదేశాంగ మంత్రిత్వ శాఖ ప్రత్యేకంగా ఇచ్చిన సమాధానంలో వెల్లడించింది. ఇందులో హోటళ్లు, బస ఏర్పాట్లు, కార్యక్రమ వేదికల ఖర్చులు, భద్రత, పరికరాలు, రవాణా, ఇతర ఖర్చులు ఉన్నాయి.
పార్లమెంటులో ఇచ్చిన సమాధానంమేరకు.. 2022 నుంచి 2024 మధ్య మూడేళ్లలో ప్రధానమంత్రి విదేశీ పర్యటనల సందర్భంగా బస ఏర్పాట్ల కోసం సుమారు రూ.104 కోట్లు ఖర్చయ్యాయి. ఆ తర్వాత అత్యధికంగా ఇతర ఖర్చుల కోసం రూ.75.7 కోట్లు వెచ్చించారు. రవాణా ఏర్పాట్ల కోసం రూ.71 కోట్లు ఖర్చు చేశారు. కార్యక్రమ వేదికలు, భద్రత, పరికరాల కోసం సుమారు రూ.4 కోట్ల చొప్పున ఖర్చు చేశారు.
అయితే ఈ విశ్లేషణలోని మొత్తం 12 ఏళ్ల కాలానికి సంబంధించి ఇంతటి వివరణాత్మక ఖర్చుల వివరాలు అందుబాటులో లేవు. అందువల్ల ప్రతి పర్యటనకు అయిన మొత్తం ఖర్చు గణాంకాలనే ప్రాతిపదికగా తీసుకున్నారు.
ఏడాదికి ఎన్ని విదేశీ పర్యటనలు చేశారు?
ఈ ఏడాది జులై వరకు ప్రధాని నరేంద్ర మోదీ 16 విదేశీ పర్యటనలు చేశారు. వీటికి దాదాపు 74.6 కోట్ల రూపాయలు ఖర్చయ్యాయి.
అయితే న ఆ తర్వాత ఆయన చేసిన మూడు పర్యటనలకు సంబంధించిన ఖర్చుల వివరాలు ప్రభుత్వ రికార్డుల్లో బహిరంగంగా అందుబాటులో లేవు. అందువల్ల ఆ ఖర్చులు ఈ లెక్కల్లో చేరలేదు.
మోదీ 12 ఏళ్ల పదవీకాలంలో అత్యధికంగా విదేశీ పర్యటనలు చేసింది 2015లోనే. ఆ ఏడాది ఆయన 28 సార్లు విదేశీ పర్యటనలు చేశారు.
ఈ సందర్భంగా అమెరికా, బ్రిటన్, చైనా వంటి ప్రధాన దేశాల్లో పర్యటించారు. రష్యా, ఫ్రాన్స్, సింగపూర్లో రెండు సార్లు పర్యటించారు.
అదే ఏడాది అనూహ్యంగా పాకిస్తాన్లోని లాహోర్లోనూ పర్యటించారు. అక్కడ అప్పటి ప్రధానమంత్రి నవాజ్ షరీఫ్తో సమావేశమయ్యారు.
2015 తర్వాత అత్యధిక విదేశీ పర్యటనలు చేసింది 2025లోనే. ఆ ఏడాది ప్రధానమంత్రి 23 దేశాల్లో పర్యటించారు.
అయితే, ఖర్చుల విషయానికి వస్తే 2025లోనే ఎక్కువ మొత్తం వెచ్చించారు. ఆ ఏడాది ఆయన విదేశీ పర్యటనల కోసం కనీసం రూ.187.8 కోట్లు ఖర్చయ్యాయి. 2015లో ఈ ఖర్చు రూ.91.5 కోట్లు. ద్రవ్యోల్బణాన్ని పరిగణనలోకి తీసుకుని 2015 నాటి ఖర్చును 2025 నాటి విలువతో పోలిస్తే అది సుమారు రూ.145 కోట్లే అవుతుంది.
నరేంద్ర మోదీ ఏయే దేశాలకు ఎక్కువగా వెళ్లారు?
ప్రధానమంత్రి నరేంద్ర మోదీ తన పదవీకాలంలో అత్యధికంగా అమెరికాలో పర్యటించారు. ఇప్పటివరకు ఆయన 10 సార్లు అమెరికా వెళ్లారు.
ఆ తర్వాత యునైటెడ్ అరబ్ ఎమిరేట్స్ (యూఏఈ), జపాన్, ఫ్రాన్స్ దేశాలు ఉన్నాయి. ఈ మూడు దేశాల్లో ఆయన ఎనిమిది సార్లు పర్యటించారు.
వీటిలో కొన్ని దేశాల పర్యటనలకు భారీగా ఖర్చు కూడా అయింది.
2019లో ప్రధాని అమెరికా పర్యటన అత్యంత ఖరీదైన పర్యటనల్లో ఒకటిగా నిలిచింది. ఈ పర్యటన కోసం రూ.37.7 కోట్లు ఖర్చయ్యాయి.
ఈ సందర్భంగా హ్యూస్టన్లోని టెక్సస్లో నిర్వహించిన 'హౌడీ మోదీ' కార్యక్రమంలో ఆయన పాల్గొన్నారు. ఈ కార్యక్రమానికి సుమారు 50 వేల మంది హాజరయ్యారు.
అంతేకాకుండా 2025లో ఫ్రాన్స్ పర్యటనతో పాటు 2023, 2021లో అమెరికా పర్యటనలకు కూడా అత్యధికంగా ఖర్చయింది.
మన్మోహన్ కంటే విదేశీ పర్యటనలు మోదీవే ఎక్కువ?
ప్రధాని కార్యాలయం (పీఎంఓ) గణాంకాల విశ్లేషణ ప్రకారం.. మాజీ ప్రధానమంత్రి మన్మోహన్ సింగ్ 2004 మే నుంచి 2014 మే వరకు తన పదేళ్ల పదవీకాలంలో 96 దేశాల్లో పర్యటించారు.
మరోవైపు నరేంద్ర మోదీ 2014 మే నుంచి 2024 మే వరకు తన మొదటి పదేళ్ల పదవీకాలంలో 133 విదేశీ పర్యటనలు చేశారు.
మన్మోహన్ సింగ్ అత్యధికంగా అమెరికాలో 10 సార్లు పర్యటించారు. ఆ తర్వాత రష్యాలో తొమ్మిది సార్లు, జపాన్, జర్మనీలలో ఐదేసి సార్లు పర్యటించారు.
అయితే మన్మోహన్ సింగ్ విదేశీ పర్యటనలకైన మొత్తం ఖర్చుకు సంబంధించిన పూర్తి వివరాలు అందుబాటులో లేవు. కానీ ఆయన పదేళ్ల పదవీకాలంలో చార్టర్డ్ విమానాల కోసం సుమారు రూ.795 కోట్లు ఖర్చయ్యాయి.
(బీబీసీ కోసం కలెక్టివ్ న్యూస్రూమ్ ప్రచురణ)
(బీబీసీ తెలుగును వాట్సాప్, ఫేస్బుక్, ఇన్స్టాగ్రామ్, ట్విటర్లో ఫాలో అవ్వండి. యూట్యూబ్లో సబ్స్క్రైబ్ చేయండి.)




























