ఐపీఎల్కు ధోనీ సెలవు: నివ్వెర పరిచే స్టంపింగ్లు, హెలికాప్టర్ షాట్లు ఇక మరపురాని జ్ఞాపకాలు

ఫొటో సోర్స్, Getty Images
చెన్నై సూపర్ కింగ్స్ (సీఎస్కే) అభిమానులు ముద్దుగా 'తలా' అని పిలుచుకునే ధోనీ, ఐపీఎల్కు వీడ్కోలు పలికారు. అంతర్జాతీయ క్రికెట్లోనే కాకుండా ఐపీఎల్, ఛాంపియన్స్ లీగ్లలో విజయవంతమైన కెప్టెన్గా పేరు తెచ్చుకున్న ధోనీ రిటైర్ అవుతున్నట్టు సీఎస్కే ప్రకటించింది.
"జీవితంలో ఒక్కసారి మాత్రమే లభించే ఆటగాడు. ఒక కొత్త బాధ్యత. శాశ్వతంగా నిలిచిపోయే బంధం. మహేంద్ర సింగ్ ధోని చెన్నై సూపర్ కింగ్స్ జట్టుకు 'మెంటర్' పాత్రను స్వీకరించారు. ఎంఎస్ కేంద్రంగానే మొదలైన మా ప్రయాణం లెక్కలేనన్ని విజయాలతో, సవాళ్లు, జ్ఞాపకాలతో మా మనసులో శాశ్వతంగా ఉండిపోతుంది’ సీఎస్కే తన ప్రకటనలో తెలిపింది.
జట్టును విజయపథంలో నడిపించడంనుంచి సూపర్ కింగ్స్ తర్వాతి తరం ఆటగాళ్లకు మార్గదర్శకత్వం వహించడం వరకు, 'తల' ఎల్లప్పుడూ మా గుర్తింపులో ఒక భాగంగా ఉంటారు. ఎప్పటికీ చెన్నై ఆయన ఇల్లే. అని సీఎస్కే తెలిపింది.
"ఎంఎస్ ధోనీ లేకుండా సీఎస్కే లేదు. మేం దాదాపు రెండు దశాబ్దాలుగా గెలుపోటములు, ఎదురుదెబ్బలను చూస్తూ కలిసి ఎదిగాం. మా బంధం ఇంత బలంగా ఉండటానికి అదే ఏకైక కారణం. మేం ఒకరి ఉద్దేశాలను మరొకరు ఎప్పుడూ అనుమానించం. ఆ నమ్మకమే ఈ ప్రయాణాన్ని సాధ్యం చేసింది" అని సీఎస్కే యజమాని శ్రీనివాసన్ చెప్పారు.
"2008లో సీఎస్కే జట్టులో ధోనీని తీసుకోవాలని పట్టుబట్టా. నేను తీసుకున్న నిర్ణయాలలో అదే అత్యుత్తమమైనదిగా నిరూపితమైంది. ఇది కేవలం ధోనీ జట్టు కోసం సాధించిన విజయాల వల్లే కాదు, ఆయన ఎలాంటి వ్యక్తి అనే దాని వల్ల కూడా. ధోనీ ఎప్పుడూ మా గుర్తింపులో ఒక భాగంగా ఉంటాడు. ఈ జట్టు ఎప్పుడూ ఆయన ఇల్లే" అని ఆయన చెప్పారు.


ఫొటో సోర్స్, Getty Images
"జట్టులో చాలా మంది యువ ఆటగాళ్లు ఉన్నారు, ధోనీ మార్గదర్శకత్వం సీఎస్కే తర్వాతి తరం ఆటగాళ్లను అభివృద్ధి చేయడంలో సహాయపడుతుంది" అని చెన్నై సూపర్ కింగ్స్ జట్టు మరో యజమాని రూపా గురునాథ్ చెప్పారు.
ధోనీ రిటైర్మెంట్ గురించి చెన్నై సూపర్ కింగ్స్ మేనేజింగ్ డైరెక్టర్ కె.ఎస్. విశ్వనాథన్ కూడా మాట్లాడారు.
"మనం వెనక్కి తిరిగి చూసుకున్నప్పుడు, గెలిచిన ట్రోఫీలు ఆ ట్రోఫీలను మనం గెలిచిన విధానం కూడా గుర్తుంటుంది. అదే ధోనీ నిజమైన వారసత్వం. పసుపు రంగు జెర్సీలో అతడిని మైదానంలో చూడలేకపోతున్నందుకు మేం విచారంగా ఉన్నప్పటికీ, ఆయన మా ఆటగాళ్లకు మార్గదర్శకత్వం వహించడం కొనసాగిస్తాడనే విషయం మాకు సంతోషాన్ని కలిగిస్తోంది. ఈ బంధం మరింత బలపడి, రాబోయే అనేక ఏళ్ల పాటు ఈ జట్టుకు మార్గదర్శకంగా నిలుస్తుంది" అని అన్నారు.

ఫొటో సోర్స్, Getty Images
ఐపీఎల్లో ధోనీ విజయాలు
ధోనీ నాయకత్వంలో చెన్నై సూపర్ కింగ్స్ 5 ఐపీఎల్ టైటిళ్లను గెలుచుకుంది. ఛాంపియన్స్ లీగ్ టీ20ని కూడా రెండుసార్లు గెలుచుకున్నారు.
ధోనీ కెప్టెన్గానే కాక, ఐపీఎల్ చరిత్రలోనే అత్యుత్తమ బ్యాట్స్మెన్లో ఒకడు.
ఆయన 5,314 పరుగులతో చెన్నై సూపర్ కింగ్స్ తరఫున అత్యధిక పరుగులు చేసిన వారిలో రెండో స్థానంలో ఉన్నాడు. ధోనీ ఇప్పటివరకు 272 మ్యాచ్లు ఆడి, సీఎస్కే తరఫున అత్యధిక మ్యాచ్లు ఆడిన ఆటగాడిగానూ నిలిచాడు.
ధోనీ హెలికాప్టర్ షాట్లు సీఎస్కే ఐపీఎల్ చరిత్రలో మరపురాని భాగాలుగా నిలిచిపోయాయి.
ఉత్కంఠ భరితమైన మ్యాచ్ల సమయంలో అభిమానులు ఉత్కంఠతో గోళ్లు కొరుకుతుంటే, ధోనీ తన ప్రశాంతమైన వైఖరి, బ్యాట్స్మెన్లను నివ్వెరపరిచిన మెరుపు వేగపు స్టంపింగ్లు, విలక్షణమైన వ్యూహాలువంటి పలు అంశాలు ఎప్పటికీ గుర్తుంటాయి.

ఫొటో సోర్స్, Getty Images
‘అన్నింటా ఒక అడుగు ముందే’
గొప్ప ఫినిషర్ అయిన ధోనీ తన ప్రయాణాన్ని తనదైన శైలిలో ముగించాడని సీఎస్కే మాజీ ఆటగాడు అంబటి రాయుడు అన్నారు.
"ధోనీ తన కెరీర్ శిఖరాగ్రంలో ఉన్నప్పుడు, ఎల్లప్పుడూ తన ప్రత్యర్థుల కంటే ఒక అడుగు ముందుండేవాడు. కెప్టెన్సీలో, బ్యాటింగ్లో, వికెట్ కీపింగ్ ఇలా అన్ని రంగాలలో ఒక అడుగు ముందుండేవాడు. అతనిలాంటి వారు మరొకరు ఉండరు. అతను నిజంగా ఒక దిగ్గజం. అతనితో కలిసి ఆడే అవకాశం లభించడం నా అదృష్టం" అని రాయుడు పోస్ట్ చేశాడు.
ధోనీ భారత క్రికెట్లో అత్యంత ప్రభావవంతమైన వ్యక్తులలో ఒకరని భారత మాజీ ఆటగాడు ఇర్ఫాన్ పఠాన్ అన్నాడు.
‘‘ధోనీ ఒక నాయకుడు, గొప్ప ఫినిషర్, క్లిష్ట పరిస్థితులలో కూడా తన సంయమనాన్ని, ప్రశాంతతను ఎన్నడూ కోల్పోడు. అభినందనలు, ధోనీ! మీ అపారమైన అనుభవం క్రికెట్ పరిజ్ఞానం నిస్సందేహంగా రాబోయే తరాల ఆటగాళ్లకు స్ఫూర్తినిస్తూనే ఉంటాయి’’ అని అన్నాడు.
క్రికెట్ వ్యాఖ్యాత హర్షా భోగ్లే, ఐపీఎల్ క్రికెట్ నుంచి మహేంద్ర సింగ్ ధోనీ రిటైర్మెంట్ను ఒక శకం ముగింపుగా అభివర్ణించారు.
"ఐపీఎల్ ఏటా ఎదుగుతూ వస్తోంది. కానీ ఈ రోజు, ఏదో కోల్పోయినట్లుగా, కాస్త విచారంగా అనిపిస్తోంది. చెన్నైకి వెళ్లి, అభిమానులకు, వారి హీరోకి మధ్య ఉన్న బంధాన్ని ప్రత్యక్షంగా చూడటం ఐపీఎల్ సమయంలో నాకు కలిగిన అత్యుత్తమ అనుభవాలలో ఒకటి" అని ఆయన సోషల్ మీడియాలో రాశారు.
(బీబీసీ కోసం కలెక్టివ్ న్యూస్రూమ్ ప్రచురణ)
(బీబీసీ తెలుగును వాట్సాప్, ఫేస్బుక్, ఇన్స్టాగ్రామ్, ట్విటర్లో ఫాలో అవ్వండి. యూట్యూబ్లో సబ్స్క్రైబ్ చేయండి.)





























