పుతిన్ తర్వాత రష్యా ఎలా ఉండబోతోంది? సంపన్న వ్యాపారవేత్తల్లో మొదలైన కొత్త ఆలోచనలు

వ్లాదిమిర్ పుతిన్, రష్యా, యుక్రెయిన్‌తో యుద్ధం, రష్యా సంపన్నుల ఆలోచనలు
    • రచయిత, విటాలీ షెవ్‌చెంకో
    • హోదా, చీఫ్ అనలిస్ట్, బీబీసీ మానిటరింగ్
  • ప్రచురణ
  • చదివే సమయం: 9 నిమిషాలు

యుక్రెయిన్‌పై పూర్తిస్థాయి దండయాత్ర ప్రారంభించిన కొన్ని గంటలకే, 2022 ఫిబ్రవరి 24న రష్యాలోని అత్యంత సంపన్న వ్యాపారవేత్తలను క్రెమ్లిన్‌లోని విశాలమైన యెకటెరినిన్స్కీ హాల్‌కు వ్లాదిమిర్ పుతిన్ ఆహ్వానించారు.

వారిలో 36 మందికి పైగా హాల్‌లోని ఒక గోడ పక్కన గుమిగూడి కూర్చున్నారు. కోవిడ్ మహమ్మారి కారణంగా ముఖాలకు మాస్కులు ధరించారు. వారంతా పాలిపోయి, నిద్రలేమితో ఉన్నట్లు ఓ రష్యా వార్తాపత్రిక విలేఖరి వర్ణించారు. హాల్‌లోకి వచ్చిన పుతిన్ అవతలి వైపు కూర్చున్నారు. ఆయనకు, వ్యాపారవేత్తలకు మధ్య చాలా పెద్ద ఖాళీ ప్రదేశం ఉంది. ఎప్పటిలాగే పుతిన్ మాత్రం మాస్క్ ధరించలేదు.

తనకు అలవాటైన పరోక్ష భాషలో మాట్లాడుతూ.. యుద్ధానికి వారు మద్దతు ఇస్తారని ఆశిస్తున్నట్లు చెప్పారు.

"ప్రస్తుతం జరుగుతున్న పరిణామాలను అర్థం చేసుకోవాలని మిమ్మల్ని కోరుతున్నాను. ఉత్పత్తి, ఆర్థిక వ్యవస్థ, ఉద్యోగాలకు మద్దతిచ్చే మార్గాలను కనుగొనేందుకు ప్రభుత్వంతో కలిసి పనిచేయాలి" అన్నారు.

ఈ సమావేశానికి సంబంధించిన క్రెమ్లిన్ విడుదల చేసిన వీడియోలో ఆహ్వానం అందుకున్న బిలియనీర్లలో ఒక్కరు కూడా మాట్లాడలేదు.

బీబీసీ న్యూస్ తెలుగు వాట్సాప్ చానల్
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

రష్యాలోని అత్యంత సంపన్నుల వ్యవహారశైలిలో ఈ మౌనం ఒక భాగంగా మారింది. పుతిన్ పాలనలో దశాబ్దాలుగా కొనసాగుతున్న పరిస్థితులను గమనించి.. నోరు విప్పితే భారీ మూల్యం చెల్లించుకోవాల్సి వస్తుందని వారు తెలుసుకున్నారు.

2003లో పుతిన్ హయాంలో విపరీతమైన అవినీతి జరుగుతోందని అప్పటికి రష్యాలో అత్యంత సంపన్నుడైన చమురు వ్యాపారవేత్త మిఖాయిల్ ఖోడోర్కోవ్‌స్కీ ఆరోపించారు. ఆయన పలు ప్రతిపక్ష సంస్థలకు ఆర్థిక సాయం చేసేవారు. ఆ తర్వాత పన్ను ఎగవేత, మోసం, నిధుల దుర్వినియోగం కేసుల్లో దోషిగా తేలడంతో పదేళ్లు జైలు జీవితం గడిపారు.

అయితే, తనపై వచ్చిన ఆరోపణలను ఆయన ఖండించారు. పుతిన్‌ను విమర్శించాలనుకునే ఇతరులకు ఈ పరిణామం ఒక హెచ్చరికగా మారింది.

వ్లాదిమిర్ పుతిన్, రష్యా, యుక్రెయిన్‌తో యుద్ధం, రష్యా సంపన్నుల ఆలోచనలు
ఫొటో క్యాప్షన్, 2022లో క్రెమ్లిన్‌లో పుతిన్‌తో జరిగిన సమావేశంలో రష్యా వ్యాపారవేత్తలు మౌనంగా కనిపించారు.

యుద్ధంపై వ్యతిరేకత ఉన్నప్పటికీ.. తమ అభిప్రాయాలను బయటపెట్టకుండా మౌనంగా ఉండటానికే వ్యాపారవేత్తలు మొగ్గుచూపారు.

అయితే, ఈ మౌనం వెనుక కూడా కొన్ని గుసగుసలు వినిపిస్తున్నాయి. ఒకప్పుడు రష్యా వ్యాపార రంగాన్ని శాసించిన సంపన్నుల్లో కొందరు పుతిన్ తర్వాతి రష్యా గురించి ఆలోచిస్తున్నట్లు కనిపిస్తోంది. అధ్యక్ష పదవి నుంచి పుతిన్ తప్పుకున్నా, ఆయన మరణించినా.. 1990ల నాటి పరిస్థితులు తిరిగి వస్తాయా? అప్పట్లో రాజకీయ అధికారాన్ని ఉపయోగించుకుని ఒలిగార్క్‌లు భారీగా లబ్ధి పొందారు. లేక మరింత ఆరోగ్యకరమైన రాజకీయ వ్యవస్థ ఏర్పడుతుందా? అనే ప్రశ్నలు వారిలో తలెత్తుతున్నాయి.

రష్యా రాజకీయాలను నిశితంగా పరిశీలించే ప్రముఖ జర్నలిస్ట్, 'ది ఎకనమిస్ట్' పత్రికకు చెందిన ఆర్కడీ ఆస్ట్రోవ్‌స్కీ.. ఇటీవల రష్యాలోని అత్యంత సంపన్నుల్లో ఒకరితో గంటల తరబడి మాట్లాడారు. పుతిన్ తర్వాత రష్యా ఎలా ఉండాలనే విషయంలో సంపన్నుల ఆలోచనల్లో మార్పు కనిపిస్తోందని ఆర్కడీ అభిప్రాయపడ్డారు.

అసంతృప్తితో ఉన్న సంపన్న వ్యాపారవేత్తలు

1991లో సోవియట్ యూనియన్ పతనం తర్వాత రష్యాలో కొత్త శక్తిమంతమైన వర్గం ఆవిర్భవించింది. కమ్యూనిజం అంతమైన తర్వాత ఏర్పడిన పరిస్థితులను తమకు అనుకూలంగా మలుచుకుని అపార సంపద సంపాదించిన కొందరు.. ఆ తర్వాత తమ ప్రయోజనాల కోసం రాజకీయ నాయకులను కూడా నియంత్రించాలనుకున్నారు. వీరినే 'ఒలిగార్క్‌లు' అని పిలిచారు. ప్రాచీన గ్రీకు భాషలో ఈ పదానికి అర్థం.. కొద్దిమంది చేతుల్లో అధికారం ఉండటం. ఆ రోజుల్లో డబ్బు అంటేనే అధికారం.

'వైల్డ్ 1990లు'గా పిలిచే ఆ కాలంలో 'న్యూ రష్యన్స్'గా పేరుపొందిన కొత్త సంపన్న వర్గం తెరపైకి వచ్చింది. భారీ ప్రభుత్వ సంస్థలు ప్రైవేటు వ్యక్తుల చేతుల్లోకి వెళ్లాయి. సరైన రాజకీయ, వ్యాపార సంబంధాలు ఉన్నవారు రాత్రికి రాత్రే లక్షాధికారులు, కోటీశ్వరులుగా మారిపోయారు. అవినీతి విస్తృతంగా పెరిగింది. పలుకుబడి ఉన్నవారికి అనుకూలంగా వ్యవహరించడం సాధారణమైంది. కాంట్రాక్టు హత్యలు కూడా తరచుగా జరిగేవి.

అయితే, 2000లో తొలిసారి అధ్యక్షుడిగా ఎన్నికైన వెంటనే పుతిన్ ఈ సంపన్న వ్యాపారవేత్తలను తన నియంత్రణలోకి తెచ్చుకున్నారు. అధికారాన్ని మరెవరితోనూ పంచుకోవడానికి ఆయన ఆసక్తి చూపలేదు. రష్యా ఆర్థిక వ్యవస్థ మళ్లీ కోలుకుంటుండటం, కేంద్ర ప్రభుత్వం బలపడటం వల్ల బిలియనీర్లను ఎదిరించే స్థితిలో ఆయన ఉన్నారు.

వ్లాదిమిర్ పుతిన్, రష్యా, యుక్రెయిన్‌తో యుద్ధం, రష్యా సంపన్నుల ఆలోచనలు
ఫొటో క్యాప్షన్, 1990లలో కొందరు ఒలిగార్క్‌లు ప్రత్యేకమైన దుస్తుల శైలిని అనుసరించేవారు. ఆ తర్వాత సెయింట్ పీటర్స్‌బర్గ్‌కు చెందిన ఓ కళాకారుడు తన వ్యంగ్య చిత్రంలో ఈ శైలిని ఎత్తిచూపారు.

పుతిన్ ముందు రష్యా వ్యాపారవేత్తలు ఎలా భయంతో వణికిపోయేవారో గతంలో రష్యాలో అతిపెద్ద విదేశీ పెట్టుబడిదారుడిగా ఉన్న బిల్ బ్రౌడర్ వివరించారు. అవినీతికి వ్యతిరేకంగా ప్రచారం చేయడంతో 2005లో ఆయనను రష్యాలోకి రాకుండా నిషేధించారు.

యుద్ధానికి ముందు, దావోస్ ఆర్థిక సదస్సుకు రష్యా సంపన్న వ్యాపారవేత్తలు హాజరైన రోజులను ఆయన గుర్తుచేసుకున్నారు.

"ఒకప్పుడు ప్రపంచం తమ గుప్పిట్లో ఉన్నట్లు, ఎంతో అహంకారంతో, ఆత్మవిశ్వాసంతో తిరిగే ఒలిగార్క్‌లను చూశాను. కానీ పుతిన్ అక్కడికి రాగానే పరిస్థితి పూర్తిగా మారిపోయేది. తమను తాము గొప్పవారిగా భావించుకునే ఆ వ్యక్తులు ఒక్కసారిగా ఆయన ముందు అణిగిమణిగి ఉండేవారు. భయంతో ఉన్న పాఠశాల పిల్లల్లా కనిపించేవారు" అని బిల్ బ్రౌడర్ బీబీసీతో చెప్పారు.

2022లో యుద్ధం మొదలైనప్పటి నుంచి రష్యాలోని సంపన్న వ్యాపారవేత్తలను అదుపులో ఉంచేందుకు క్రెమ్లిన్ కఠినమైన విధానాన్ని అనుసరిస్తోంది. యుద్ధాన్ని విమర్శించిన వారి ఆస్తులను స్వాధీనం చేసుకున్నారు. ప్రభుత్వానికి విధేయంగా ఉన్నవారికి భారీ విలువైన యుద్ధ సంబంధిత కాంట్రాక్టులు ఇచ్చారు.

ప్రస్తుతం రష్యాలో బిలియనీర్ల సంఖ్య గతంలో ఎన్నడూ లేనంతగా 155కు చేరిందని ఫోర్బ్స్ పత్రిక చెబుతోంది. వారి మొత్తం సంపద దాదాపు 700 బిలియన్ డాలర్లకు చేరుకుంది.

అయితే, ప్రభుత్వానికి విధేయంగా ఉండి ప్రతిఫలం పొందుతున్న సంపన్నుల్లోనూ అసంతృప్తి పెరుగుతోంది. ఇంతటి సంపద ఉన్నా వారు సంతోషంగా లేరు.

నిరంకుశ పాలనా? ఒలిగార్కీనా? ప్రజాస్వామ్యమా?

గతంతో పోలిస్తే ఇప్పుడు వారి బిలియన్ల డాలర్ల సంపద కూడా పెద్దగా ఉపయోగపడటం లేదు. రష్యాలో రాజకీయ ప్రభావాన్ని కొనుగోలు చేసే శక్తి వారికి తగ్గిపోయింది.

"వారి చేతుల్లో ఇప్పుడు ఎలాంటి పాచికలు లేవు. రాజకీయ ఆటలో వారికి స్థానం లేదు. పుతిన్‌తో సంబంధాలు ఉండటం వల్లే వారు సంపన్నులయ్యారు. వారి వల్ల పుతిన్ సంపన్నుడు కాలేదు" అని ప్రవాసంలో ఉన్న రాజకీయ నాయకుడు, విశ్లేషకుడు దిమిత్రీ నెక్రాసోవ్ చెప్పారు.

పశ్చిమ దేశాలు విధించిన ఆంక్షల కారణంగా దేశం వెలుపల కూడా ఈ సంపన్నులకు పరిస్థితులు అనుకూలంగా లేవు.

"వారిని చిన్నస్థాయి నేరస్థుల్లా చూస్తున్నారు. తమ ప్రైవేటు విమానాల్లో ప్రయాణించలేకపోతున్నారు. యూరప్‌లోని ప్రముఖ నౌకాశ్రయాల్లో తమ విలాసవంతమైన పడవలను నిలపలేకపోతున్నారు. ఇది వారికి ఎంతో బాధాకరంగా, అవమానకరంగా ఉండాలి" అని పుతిన్‌ను తీవ్రంగా విమర్శించే బిల్ బ్రౌడర్ అన్నారు.

అందుకే, పుతిన్ రాజకీయ రంగం నుంచి తప్పుకున్న తర్వాత ఏం జరుగుతుందనే ఆలోచన కొందరు సంపన్నుల్లో మొదలైంది. ఈ వ్యాపారవేత్తలతో సన్నిహిత సంబంధాలు ఉన్న విశ్లేషకులు తనకు ఈ విషయం చెప్పినట్లు రచయిత పేర్కొన్నారు.

అయితే, పుతిన్ వెంటనే పదవి నుంచి తప్పుకునే పరిస్థితి కనిపించడం లేదు. ఆయన ఆరోగ్యం బాగోలేదని భావించడానికి కూడా ఎలాంటి కారణం లేదు. గత నెలలో 74 ఏళ్లు నిండిన పుతిన్.. పావు శతాబ్దంగా క్రెమ్లిన్‌లో అధికారంలో ఉన్నారు. అయితే, ఏదో ఒకరోజు ఆయన నిష్క్రమణ తప్పదని మాస్కోలోని ప్రజలకు తెలుసు.

2036లో తన రాజ్యాంగపరమైన పదవీకాలం ముగిసే వరకు అధ్యక్షుడిగా కొనసాగాలనుకుంటున్నారా? అని గత ఏడాది రాయిటర్స్ ప్రశ్నించగా.. "అప్పటివరకు మన ఆరోగ్యం ఎలా ఉంటుందో దేవుడికే తెలుసు" అని పుతిన్ సమాధానమిచ్చారు.

వ్లాదిమిర్ పుతిన్, రష్యా, యుక్రెయిన్‌తో యుద్ధం, రష్యా సంపన్నుల ఆలోచనలు
ఫొటో క్యాప్షన్, 1990లలో ప్రముఖ కుబేరులలో (ఒలిగార్క్‌లలో) ఒకరైన బోరిస్ బెరెజోవ్‌స్కీ.. క్రెమ్లిన్‌తో విభేదాల కారణంగా తన జీవిత చివరి రోజులను బ్రిటన్‌లో గడిపారు.

పుతిన్ రాజీనామా చేసినా, పదవిలో ఉండగానే మరణించినా.. ప్రధానమంత్రి మిఖాయిల్ మిషుస్తిన్ అధ్యక్ష బాధ్యతలు చేపడతారు. అయితే, ఆయనలో అధ్యక్ష పదవిపై ఆశలు కనిపించలేదు. బహుశా ఆయన్ను ఆ పదవికి ఎంపిక చేయడానికి ఇదొక కారణం కావచ్చు. ఇలాంటి పరిస్థితి ఏర్పడితే రష్యాలో అధికార శూన్యత ఏర్పడే అవకాశం ఉంది.

అప్పుడు రష్యా భవిష్యత్తు ఎలా ఉండొచ్చనే విషయంలో ఆ దేశ రాజకీయాలను పరిశీలిస్తున్న విశ్లేషకులు కొన్ని అవకాశాలను అంచనా వేస్తున్నారు.

పుతిన్ తర్వాతి రష్యాలో ప్రజాస్వామ్యం బలపడాలని పశ్చిమ దేశాల్లోనూ, రష్యాలోనూ కొందరు ఆశిస్తున్నారు. కొత్త ఒలిగార్క్‌ల బృందం లేదా ఒకే ఒక నిరంకుశ పాలకుడి చేతుల్లో కాకుండా ప్రజల చేతుల్లో ప్రభుత్వం ఉండాలని కోరుకుంటున్నారు. అయితే, ఇది జరిగే అవకాశాలు చాలా తక్కువగా ఉన్నాయని విశ్లేషకులు చెబుతున్నారు.

పుతిన్ పాలనలో కీలక ప్రజాస్వామ్య సంస్థలు బలహీనపడ్డాయి లేదా పూర్తిగా ధ్వంసమయ్యాయి.

"రష్యా హింసకు ఎంతగా అలవాటుపడిపోయిందంటే.. సాధారణ ప్రజాస్వామ్య విధానాలకే దూరమైంది" అని ప్రవాసంలో ఉన్న రష్యా జర్నలిస్ట్, విశ్లేషకురాలు అలెగ్జాండ్రా ప్రొకోపెంకో చెప్పారు.

రెండో అవకాశం.. మరింత నిరంకుశ పాలన. పుతిన్ స్థానంలో మరో నాయకుడు వచ్చి ఆయన అనుసరించిన అణచివేత విధానాలనే కొనసాగించవచ్చు. అయితే, వెంటనే మరో బలమైన నియంతృత్వ పాలన ఏర్పడకపోవచ్చని ప్రొకోపెంకో అభిప్రాయపడ్డారు. ఇలాంటి మార్పులు జరగడానికి సమయం పడుతుందని ఆమె అన్నారు. తొలుత పుతిన్ వారసుడికి ఆయనతో పోలిస్తే తక్కువ అధికారం, తక్కువ వనరులు ఉండొచ్చని చెప్పారు.

మూడో అవకాశం.. సంపన్న వ్యాపారవేత్తలు మళ్లీ తమ అధికారాన్ని చాటుకోవడం. తద్వారా రష్యా 1990ల నాటి ఒలిగార్కీ తరహా వ్యవస్థకు తిరిగి వెళ్లడం. ఈ పరిస్థితిలో కొద్దిమంది శక్తిమంతమైన సంపన్న కుటుంబాలు, వ్యాపార వర్గాలతో కలిసి దేశాన్ని పాలిస్తాయని మాజీ క్రెమ్లిన్ సలహాదారు, ప్రస్తుతం ప్రవాసంలో ఉన్న ప్రతిపక్ష నాయకుడు దిమిత్రీ నెక్రాసోవ్ చెప్పారు.

చాలామంది సంపన్న వ్యాపారవేత్తలు కోరుకునేది ఈ మూడో మార్గమే. "తమ మాటకు విలువ ఉన్న రోజులు తిరిగి రావాలని, తమ ఆస్తులను ఎవరూ స్వాధీనం చేసుకోకూడదని, రాజకీయ వ్యవస్థ ఎలా పనిచేస్తుందో తమకు స్పష్టంగా తెలిసిన పరిస్థితులు మళ్లీ రావాలని వారు కోరుకుంటున్నారు" అని రష్యాలోని అత్యంత సంపన్నులతో చాలాకాలంగా మాట్లాడుతున్న ప్రొకోపెంకో చెప్పారు.

1990లతో పోలిస్తే ప్రస్తుతం వారి రాజకీయ అధికారం గణనీయంగా తగ్గిపోయింది. అయినప్పటికీ, అపారమైన సంపద ఉన్నందున ఏదో ఒక సమయంలో తిరిగి రాజకీయ ప్రభావాన్ని సంపాదించేందుకు వారు ప్రయత్నించే అవకాశం ఉందని భావిస్తున్నారు.

ఇప్పటికే కొందరు సంపన్నులు తమకు అనుకూలమైన భద్రతా విభాగాల అధికారులతో, మంత్రులతో స్నేహ సంబంధాలు పెంచుకునేందుకు ప్రయత్నిస్తున్నారని నెక్రాసోవ్ చెప్పారు. అయితే, అంతకుమించి ముందడుగు వేయడం చాలా ప్రమాదకరమని ఆయన అభిప్రాయపడ్డారు.

వ్లాదిమిర్ పుతిన్, రష్యా, యుక్రెయిన్‌తో యుద్ధం, రష్యా సంపన్నుల ఆలోచనలు
ఫొటో క్యాప్షన్, యుక్రెయిన్‌పై రష్యా పూర్తిస్థాయి యుద్ధం ప్రారంభించినప్పటి నుంచి.. వ్యాపారవేత్తలను తన దారిలో ఉంచుకునేందుకు పుతిన్ కఠినమైన విధానాన్ని అనుసరిస్తున్నారు.

రాబోయే సంవత్సరాల్లో ఈ వ్యాపారవేత్తల వ్యవహారశైలి వారి ఆర్థిక పరిస్థితులపై కూడా ఆధారపడి ఉంటుందని ఆయన అన్నారు. చేతిలో తక్షణమే వినియోగించుకోగలిగే నగదు ఎక్కువగా ఉన్నవారు రాజకీయ ఆటలో పాల్గొనేందుకు, పుతిన్ తర్వాతి రష్యాలో తమ స్థానాన్ని పదిలం చేసుకునేందుకు ఎక్కువ ధైర్యం చేయవచ్చు. మరోవైపు ప్రభుత్వ కాంట్రాక్టులు లేదా ప్రభుత్వ అనుగ్రహంపై ఆధారపడి సంపద సంపాదించినవారు.. ఉన్నదంతా కోల్పోతామనే భయంతో వెనకడుగు వేస్తారని ఆయన వివరించారు.

పుతిన్‌ను వ్యాపారవేత్తలు సంబోధించే తీరులోనూ మార్పు వచ్చిందని ప్రొకోపెంకో చెప్పారు. గతంలో ఆయనను 'నచాల్నిక్' (బాస్), 'పెర్వీ' (మొదటి వ్యక్తి) లేదా 'వీవీ' అనే పేర్లతో పిలిచేవారు. ఇవన్నీ గౌరవాన్ని సూచించే పేర్లే. కానీ ఇప్పుడు 'దెద్' అని పిలుస్తున్నారు. రష్యన్ భాషలో దీనికి 'ముసలాయన' లేదా 'తాతయ్య' అని అర్థం. ఈ పేరు వెనుక కొంత చులకన భావం ఉందని ప్రొకోపెంకో చెబుతున్నారు.

అణచివేత తగ్గి, భావప్రకటనా స్వేచ్ఛ పెరిగి, రాజకీయ పార్టీలు, నాయకుల మధ్య ఆరోగ్యకరమైన పోటీ ఉండాలని కొందరు సంపన్న రష్యన్లు కోరుకుంటున్నారని ఆమె చెప్పారు. ప్రజల జీవితాల్లోకి రాజకీయాలు తిరిగి రావాలని వారు ఆశిస్తున్నారని తెలిపారు.

అయితే, రష్యాలో ప్రస్తుతం నెలకొన్న భయానక వాతావరణం కారణంగా ఆ మార్పు కోసం ముందుకొచ్చే ధైర్యం వారికి లేదని ప్రొకోపెంకో అన్నారు.

ఒక సంపన్న వ్యాపారవేత్తను తాను ఇంటర్వ్యూ చేసినప్పుడు.. రహస్య పోలీసులు డిజిటల్ పరికరాల ద్వారా నిఘా పెట్టకుండా ఉండేందుకు ఆయన సంభాషణంతా తన ఫోన్‌పై కూర్చున్నారని ఆమె గుర్తుచేసుకున్నారు.

"ఇది పూర్తిగా స్టాలిన్ కాలం నాటి భయాన్ని తలపించింది. ఆ భయం ఎంత అసంబద్ధంగా ఉందో చెప్పలేం" అని ఆమె అన్నారు.

చర్చనీయమైన ఇంటర్వ్యూ

పుతిన్ తర్వాతి రష్యా నుంచి సంపన్న వ్యాపారవేత్తలు ఏం ఆశిస్తున్నారనే విషయానికి ఆండ్రీ మెల్నిచెంకో ఇచ్చిన ఇంటర్వ్యూ ఒక ఆసక్తికరమైన సంకేతంగా నిలిచింది.

ప్రపంచంలోనే ప్రముఖ ఎరువుల వ్యాపారవేత్తగా పేరున్న ఆయన ప్రస్తుతం రష్యాలో ఎనిమిదో అత్యంత సంపన్నుడు.

ఈ ఏడాది ప్రారంభంలో ఆయన 'ది ఎకనమిస్ట్' పత్రికకు ఇంటర్వ్యూ ఇవ్వడం పరిశీలకులను ఆశ్చర్యపరిచింది. ముఖ్యంగా క్రెమ్లిన్ శత్రుదేశంగా భావించే దేశానికి చెందిన పత్రికకు ఒక రష్యా సంపన్నుడు ఇంటర్వ్యూ ఇవ్వడం చాలా అరుదు. అంతేకాదు, ఆయన రాసిన ఒక వ్యాసాన్ని కూడా ఆ పత్రిక ప్రచురించింది.

ఇంటర్వ్యూలోని కొన్ని అంశాల్లో క్రెమ్లిన్ వాదనలనే మెల్నిచెంకో పునరావృతం చేశారు. రష్యా, పశ్చిమ దేశాల మధ్య యుక్రెయిన్‌ యుద్ధభూమిగా మారిందని అన్నారు. రష్యా భద్రతాపరమైన ఆందోళనలను పశ్చిమ దేశాలు పట్టించుకోలేదని, తమ సార్వభౌమత్వానికి ముప్పు తెస్తున్నాయని ఆయన అభిప్రాయపడ్డారు.

అయితే, ఆ తర్వాత మెల్నిచెంకో వ్యాఖ్యలు ఆసక్తికరంగా మారాయి. పుతిన్ పదవి నుంచి దిగిపోవాలని మెల్నిచెంకో నేరుగా కోరలేదు. కానీ, రష్యాలో ఒక వ్యక్తి చేతుల్లోనే అధికారం ఉండే వ్యవస్థకు ముగింపు పలికే మార్పులు రావాలని వాదించారు. ప్రపంచ దేశాలతో రష్యా మరింతగా సంబంధాలు పెంచుకోవాలని చెప్పారు.

మెల్నిచెంకో ఉద్దేశపూర్వకంగానే బహిరంగ చర్చకు తెరతీయాలని ప్రయత్నించారని ప్రొకోపెంకో భావిస్తున్నారు.

"తనలాంటి సంపన్నులు కూడా ఇకపై మాట్లాడటం ప్రారంభించాలనే పిలుపు ఇది" అన్నారు.

హోటళ్లు, కేఫ్‌లలో మెల్నిచెంకోతో సుదీర్ఘంగా, వాడివేడిగా చర్చలు జరిగాయని ఆయనను ఇంటర్వ్యూ చేసిన జర్నలిస్ట్ ఆర్కడీ ఆస్ట్రోవ్‌స్కీ చెప్పారు. ఎక్కువగా కాఫీ తాగుతూ, కొన్నిసార్లు సిగరెట్లు కాలుస్తూ మాట్లాడుకున్నామని తెలిపారు.

రాజకీయ నాయకుల మాదిరిగా ముందే సిద్ధం చేసుకున్న సమాధానాలు చెప్పకుండా.. ప్రతి ప్రశ్నకు ఆయన నిజంగానే ఆలోచించి సమాధానం ఇచ్చినట్లు అనిపించిందని ఆస్ట్రోవ్‌స్కీ చెప్పారు.

అయితే, రష్యాలో ఏదీ అంత సులభంగా జరగదు. ఈ అసాధారణ ఇంటర్వ్యూకు క్రెమ్లిన్ నుంచి పరోక్షంగా లేదా ప్రత్యక్షంగా అనుమతి లభించి ఉంటుందని చాలామంది పరిశీలకులు భావిస్తున్నారు.

మార్పు కోసం చేసిన ఈ అసాధారణ పిలుపునకు అధికారులు ఎందుకు అనుమతించారో స్పష్టంగా తెలియదు. దేశంలో కొంతమేర భిన్నాభిప్రాయాలకు అవకాశం ఉందని చూపించేందుకు వారు ప్రయత్నించి ఉండవచ్చని భావిస్తున్నారు.

మెల్నిచెంకోకు మద్దతుగా ఇతర సంపన్న వ్యాపారవేత్తలు ఎవరూ బహిరంగంగా ముందుకు రాలేదు. అయినప్పటికీ, ఆయన తన అభిప్రాయాలను తన తరఫున మాత్రమే కాకుండా ఇతర వ్యాపారవేత్తల తరఫున కూడా వ్యక్తం చేశారని ఆస్ట్రోవ్‌స్కీ భావిస్తున్నారు.

వ్లాదిమిర్ పుతిన్, రష్యా, యుక్రెయిన్‌తో యుద్ధం, రష్యా సంపన్నుల ఆలోచనలు
ఫొటో క్యాప్షన్, పశ్చిమ దేశాలు విధించిన ఆంక్షల కారణంగా కొందరు రష్యా సంపన్నులు ఒంటరివారయ్యారు. గతంలో తమకు అలవాటైన ప్రైవేటు విమాన ప్రయాణాలు, పశ్చిమ దేశాల్లోని విలాసవంతమైన విడిది ప్రాంతాల సందర్శనలకు ఇప్పుడు దూరమయ్యారు. ఫ్రాన్స్ దక్షిణ తీరంలోని సెయింట్-జీన్-కాప్-ఫెర్రా ఒకప్పుడు రష్యా కుబేరులకు ఇష్టమైన పర్యటక ప్రాంతాల్లో ఒకటిగా ఉండేది.

పుతిన్ నిష్క్రమణ తర్వాత రష్యా 'ఒలిగార్కిక్ రిపబ్లిక్'గా మారాలని కొందరు సంపన్నులు ఆశిస్తున్నారని ఆస్ట్రోవ్‌స్కీ చెప్పారు. అంటే, 1990లలో మాదిరిగా వ్యాపారవేత్తలే దేశ రాజకీయాలను శాసించే వ్యవస్థ తిరిగి రావాలని వారు కోరుకుంటున్నారు.

రష్యాపై ఎన్నో ఏళ్లుగా కథనాలు రాస్తున్న ఆస్ట్రోవ్‌స్కీ అభిప్రాయం ప్రకారం.. ప్రస్తుతం ఆ దేశంలోని అత్యంత సంపన్నులు తీవ్ర నిరాశలో ఉన్నారు.

"ఈ యుద్ధం రష్యాను పూర్తిగా ముందుకు వెళ్లలేని పరిస్థితిలోకి నెట్టింది. భవిష్యత్తు కనిపించడం లేదనే భావన వారిలో ఉంది" అని ఆయన చెప్పారు.

అయితే, భవిష్యత్తు గురించి ఆలోచిస్తున్నప్పటికీ.. సమీప భవిష్యత్తులో ఈ సంపన్నులు ఏదైనా చర్యకు దిగే అవకాశాలు చాలా తక్కువగా కనిపిస్తున్నాయి.

పుతిన్‌తో చాలామంది సంపన్నులు అసంతృప్తితో ఉన్నప్పటికీ, ఆయన బతికున్నంతకాలం తనకు వ్యతిరేకంగా కుట్ర చేసే అవకాశం లేదని బిల్ బ్రౌడర్ చెప్పారు.

"పుతిన్‌ను సవాలు చేసేలా ఏదైనా చేస్తే ఆయన తమను చంపేస్తారని వారికి తెలుసు. పుతిన్ చాలా అనుమాన స్వభావం ఉన్న వ్యక్తి" అని బ్రౌడర్ అన్నారు.

గతంలో రష్యాలో కీలక పెట్టుబడిదారుడిగా ఉన్న అమెరికా ఆర్థికవేత్త మైక్ కాల్వే కూడా ఇదే అభిప్రాయాన్ని వ్యక్తం చేశారు.

"జైలుకు వెళ్లి, తమ ఆస్తులన్నీ కోల్పోవడం తప్ప వారు ఇంకేం చేయగలరు? లండన్‌లో కూర్చున్నవారు 'మీరంతా ఎందుకు బయటకు వచ్చి పుతిన్‌ను ఎదురించకూడదు?' అని సులభంగా అడగవచ్చు. కానీ అలా చేస్తే నిజంగా జరిగేది జైలుకు వెళ్లడమే" అని మైక్ కాల్వే అన్నారు.

ఒకప్పుడు రష్యాలో అత్యంత ఉన్నతస్థాయి అధికారులపై కూడా ప్రభావం చూపగలిగిన స్థాయిలో ఆ దేశ సంపన్న వ్యాపారవేత్తలు ఉండేవారు.

పుతిన్ వెళ్లిపోయిన తర్వాత మళ్లీ గతంలో ఉన్న రాజకీయ ప్రభావాన్ని సంపాదించేందుకు వారు తప్పకుండా ప్రయత్నిస్తారు. అయితే, ప్రస్తుత పాలనా వ్యవస్థలో మిగిలి ఉన్న శక్తులు అందుకు అనుమతిస్తాయా? అన్నదే ఇప్పుడు ప్రశ్న.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)