నటుడు గిరిబాబు ఎన్టీఆర్ ఇంటికి వెళ్లి నా సినిమా వేరు, మీ సినిమా వేరు అని ఎందుకు చెప్పారు?

గిరిబాబు, సినిమాలు, ప్రకాం జిల్లా, హైదరాబాద్, చెన్నై, టాలీవుడ్
ఫొటో క్యాప్షన్, గిరిబాబు 80 ఏళ్ల వయసులో మరణించారు.
    • రచయిత, గరికిపాటి ఉమాకాంత్
    • హోదా, బీబీసీ కోసం
  • ప్రచురణ
  • చదివే సమయం: 5 నిమిషాలు

ప్రముఖ తెలుగు చలన చిత్ర నటుడు గిరిబాబు ఇవాళ(నవంబర్ 14) హైదరాబాద్‌లో కన్నుమూశారు. ఆయన వయసు 80ఏళ్లు.

హీరోగా, విలన్‌గా, క్యారెక్టర్‌ ఆర్టిస్ట్‌గా... వందలాది చిత్రాల్లో నటించిన గిరిబాబు పలు సినిమాలకు నిర్మాతగానూ, దర్శకుడిగానూ వ్యవహరించారు. గిరిబాబు సొంతూరు ఆంధ్రప్రదేశ్‌లోని ప్రకాశం జిల్లా రావినూతల.

కొంతకాలంగా అనారోగ్య సమస్యలతో బాధపడుతున్న ఆయన శనివారం సికింద్రాబాద్‌లోని ఓ ప్రైవేట్‌ ఆసుపత్రిలో చికిత్స పొందుతూ తుదిశ్వాస విడిచారు. గిరిబాబు మృతిపై ఏపీ సీఎం చంద్రబాబు, మాజీ సీఎం జగన్‌మోహన్‌ రెడ్డి సంతాపం వ్యక్తం చేశారు.

ప్రకాశం జిల్లా రావినూతలలో 1946 జూన్‌ 8న జన్మించిన గిరిబాబు అసలు పేరు యర్రా శేషగిరిరావు.

తొలి నుంచి సినిమాలపై ఆసక్తి పెంచుకున్న గిరిబాబు ముందు నాటకరంగంలో ప్రవేశించారు. ఒంగోలులో ధారా రామనాధశాస్త్రి వద్ద నాటరంగంలో నటనలో మెళకువలు నేర్చుకున్న గిరిబాబు స్వయంగా నాటక సమాజం స్థాపించి, ప్రకాశం జిల్లాలో ఎన్నో నాటకాలు ప్రదర్శిచారు.

బీబీసీ న్యూస్ తెలుగు వాట్సాప్ చానల్‌
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

మోహన్‌బాబు, గిరిబాబు రూమ్‌మేట్స్‌..

ఆ తర్వాత గిరిబాబు మద్రాస్‌ వెళ్లి సినిమాల్లో ప్రయత్నించారు.

అప్పట్లో మద్రాస్‌లో ఇప్పటి ప్రముఖ సినీనటుడు మోహన్‌బాబు, గిరిబాబు ఒకే రూంలో ఉండేవారు అని సినీ విశ్లేషకులు రంగావర్ఝుల భరధ్వాజ బీబీసీతో చెప్పారు.

‘‘ఇద్దరూ ఒకే రూంలో ఉంటూ సినీ ప్రయత్నాలు చేసే వారు. అప్పట్లో మోహన్‌బాబు ఓ స్కూల్‌లో డ్రిల్‌ మాస్టారుగా పనిచేస్తూ డైరెక్షన్‌ డిపార్ట్‌మెంట్‌లో అవకాశాల కోసం ప్రయత్నించగా, గిరిబాబు ఇంటి నుంచి తెచ్చుకున్న డబ్బులు ఖర్చుచేస్తూ నటుడిగా ప్రయత్నాలు చేసేవారు’’ అని భరద్వాజ వివరించారు.

గిరిబాబు, సినిమాలు, ప్రకాం జిల్లా, హైదరాబాద్, చెన్నై, టాలీవుడ్
ఫొటో క్యాప్షన్, హీరోగా, విలన్‌గా, క్యారెక్టర్ ఆర్టిస్ట్‌గా గిరిబాబు గుర్తింపు పొందారు.

హీరో అని చెప్పి విలన్‌ను చేశారు

ఈ క్రమంలో గిరిబాబుకి తొలుత ప్రముఖ సినీనిర్మాత అట్లూరి పూర్ణచంద్రరావు 1972లో జగమేమాయ అనే సినిమాలో హీరోగా అవకాశం కల్పించారు.

అయితే షూటింగ్‌ ప్రారంభమయ్యే సరికి హీరో పాత్రను మురళీమోహన్‌కి ఇచ్చి అందులోనే విలన్‌ పాత్రను గిరిబాబుకి ఇచ్చారు.

జై ఆంధ్రా ఉద్యమ నేపథ్యంతో ఆ సినిమా ఒకింత ఆలస్యంగా 1973లో రిలీజ్‌ అయినప్పటికీ విజయవంతంగా నడిచింది. దీంతో గిరిబాబు సినీపరిశ్రమలో వెనుదిరిగి చూడాల్సిన పనిలేకుండా పోయింది.

జయభేరి నిర్మాణ సంస్థను స్థాపించి..

జగమే మాయతో తెలుగు సినిమాకి సరికొత్త గ్లామర్‌ విలన్‌ వచ్చాడంటూ గిరిబాబుకు పేరొచ్చింది. అప్పటివరకు అందమైన విలన్‌గా ఆర్‌. నాగేశ్వరరావుకి పేరుండేది.

ఆ తర్వాత గ్లామర్‌ విలన్‌ అంటే గిరిబాబు పేరే అందరికీ గుర్తొచ్చేది. విలన్‌గానే కాకుండా హీరోగా కూడా గిరిబాబు ఎన్నో విజయవంతమైన చిత్రాల్లో నటించారు.

ఆ తర్వాత గిరిబాబు సొంతంగా జయభేరి పేరుతో నిర్మాణ సంస్థను ప్రారంభించి పలు విజయవంతమైన చిత్రాలను నిర్మించారు. జయభేరి పతాకంపై తానే హీరోగా తీసిన దేవతాలారా దీవించండి సినిమా అప్పట్లో సూపర్‌ హిట్‌గా నిలిచింది.

గిరిబాబు, సినిమాలు, ప్రకాం జిల్లా, హైదరాబాద్, చెన్నై, టాలీవుడ్
ఫొటో క్యాప్షన్, గిరిబాబు 600కుపైగా చిత్రాల్లో నటించారు.

సింహబలుడు - సింహగర్జన పోటీ

దేవతాలారా దీవించండి హిట్‌ తర్వాత గిరిబాబు నిర్మాతగా కృష్ణ హీరోగా సింహగర్జన సినిమా ప్రారంభించారు దేవతాలారా దీవించండి సినిమాకి దర్శకత్వం వహించిన కొమ్మినేని శేషగిరిరావే ఈ సినిమాకి కూడా దర్శకుడు.

అయితే సరిగ్గా అదే సమయంలో ఎన్టీఆర్‌ సింహబలుడు సినిమా షూటింగ్‌ జరుగుతోంది. దానికి ప్రముఖ సినీ నిర్మాత డీవీఎస్‌ రాజు కుమారులు నిర్మాతలుగా వ్యవహరించారు. అయితే ఈ సినిమా కథ.. గిరిబాబు సింహబలుడు కథ ఒకటే అని అప్పట్లో ప్రచారం జరిగింది.

''తన సినిమా కథతో మరో సినిమా తీయడమేంటని ఎన్టీఆర్‌ ఒకింత ఆగ్రహంగా ఉన్నారనే ప్రచారం జరిగింది. దీంతో తానే స్వయంగా ఓ రోజు తెల్లవారుజామున ఎన్టీఆర్‌ ఇంటికి వెళ్లి సింహగర్జన సినిమా కథ చెప్పాననీ, ఈ రెండు కథలూ వేరని ఎన్టీఆర్‌ సంతృప్తి చెంది తనను ప్రోత్సహించారని గిరిబాబు ఆ తర్వాత ఎన్నో ఇంటర్వ్యూల్లో చెప్పుకొచ్చారు'' అని సినీ విమర్శకులు భరధ్వాజ గుర్తు చేశారు.

అయితే ఈ రెండు సినిమాల రిలీజ్‌ తర్వాత ఎన్టీఆర్‌ సింహబలుడు కంటే కృష్ణ, గిరిబాబుల సింహగర్జనే రెవిన్యూపరంగా ఎక్కువ వసూలు చేసిందని భరధ్వాజ అన్నారు.

''జయభేరితో పలు హిట్‌ చిత్రాలు తీసిన తర్వాత మిత్రుడు, నటుడు మురళీమోహన్‌ సొంతంగా సినిమాలు తీయాలనుకుని ఈ టైటిల్‌ అడిగితే ఇచ్చేశాను'' అని గిరిబాబు ఎన్నో సందర్భాల్లో స్వయంగా చెప్పారు.

జయభేరి తర్వాత తన కుమార్తె పేరుతో మాధవీ ప్రొడక్షన్స్‌ స్థాపించి పలు చిత్రాలను నిర్మించారు గిరిబాబు..

గిరిబాబు, సినిమాలు, ప్రకాం జిల్లా, హైదరాబాద్, చెన్నై, టాలీవుడ్
ఫొటో క్యాప్షన్, కుమారులు రఘుబాబు, బోసుబాబులతో గిరిబాబు

నటవారసుడిగా రఘుబాబు

తన పెద్ద కుమారుడు బోసు బాబు హీరోగా కౌబాయ్‌ సినిమా ఇంద్రజిత్‌ను మాధవీ ప్రొడక్షన్స్‌ పేరుతో గిరిబాబు దర్శకత్వంలోనే తీశారు. అప్పట్లో చిరంజీవి నటించిన కొదమ సింహం కి పోటీగా సినిమా విడుదల చేశారు. అయితే ఇంద్రజిత్‌ పెద్దగా ఆడలేదు. తన కుమారుడి సినిమాని హిట్‌ కాకుండా అప్పట్లో కొన్ని రాజకీయాలు నడిచాయంటూ గిరిబాబు పలుమార్లు బాహాటంగానే వ్యాఖ్యలు చేశారు. ఇదే ప్రొడక్షన్స్‌పై మెరుపుదాడి, ముద్దు ముచ్చట చిత్రాలను కూడా నిర్మించారు.

'రణరంగం', 'ఇంద్రజిత్‌', 'నీ సుఖమే నే కోరుతున్నా' వంటి చిత్రాలకు స్వయంగా గిరిబాబు దర్శకత్వం వహించారు.

మద్రాస్‌ నుంచి హైదరాబాద్‌కి సినీ పరిశ్రమ తరలిన తర్వాత అక్కడి నుంచి హైదరాబాద్‌ వచ్చేసిన గిరిబాబు సొంతంగా సినిమాల నిర్మాణం పక్కపెట్టి పూర్తిస్థాయిలో క్యారెక్టర్‌ నటుడిగా మారిపోయారు.

వందలాది చిత్రాల్లో తండ్రి. అన్న, తమ్ముడు, బాబాయ్‌ పాత్రల్లో సహజసిద్ధంగా నటించి.. మూడు తరాల ప్రేక్షకుల అభిమానాన్ని పొందారు. విలన్‌గా చేసినా.. క్యారెక్టర్‌ ఆర్టిస్టుగా చేసినా గిరిబాబు తన ప్రత్యేకతను కనబరిచేవారు.

1970 చివర్లలో, 80లలో గిరిబాబు విలన్‌గా అనేక సినిమాలు వచ్చాయి . ఆ తర్వాత క్యారెక్టర్‌ ఆర్టిసుగా మారిన తర్వాత భిన్నమైన పాత్రలు పోషించి.. ప్రేక్షకుల అభిమానం పొందారు. దాదాపు ఐదు దశాబ్దాల సినీ ప్రయాణంలో 600కు పైగా చిత్రాల్లో నటించి ప్రేక్షకులను అలరించారు.

హీరోగా, ప్రతినాయకుడిగా, క్యారెక్టర్‌ ఆర్టిస్టుగా, హాస్యనటుడిగా విభిన్న పాత్రలు పోషించి తనదైన ముద్ర వేశారు.

గిరిబాబుకి ఇద్దరు కుమారులు పెద్ద కుమారుడు బోసు బాబు.. ఒకటి రెండు చిత్రాల్లో హీరోగా నటించి తెరమరుగు కాగా రెండో కుమారుడు రఘుబాబు హాస్యనటుడిగా విలన్‌గా, క్యారెక్టర్‌ నటుడిగా దాదాపు రెండు దశాబ్దాలుగా తెలుగు సినీరంగంలో కొనసాగుతున్నారు.

రాజకీయాల్లోనూ...

గిరిబాబు మొదటి నుంచీ రాజకీయాలపై ఆసక్తితో ఉండేవారు. మొదట్లో ఎన్టీఆర్‌ తెలుగుదేశం పార్టీ పెట్టినప్పుడు ఆ పార్టీ తరఫున ప్రచారం కూడా నిర్వహించారు. అయితే ఆ తర్వాత కొద్ది కాలానికే ఎన్టీఆర్‌కి వ్యతిరేకంగా కాంగ్రెస్‌ పార్టీలో చేరారు.

అప్పట్లో కాంగ్రెస్‌ పార్టీ తరఫున విస్తృతంగా ప్రచారం చేశారు. 1987లో అప్పటి కాంగ్రెస్‌ ఎమ్మెల్యే దివంగత వంగవీటి మోహనరంగా తీసిన చైతన్య రథం సినిమాలో పోలీస్‌ అధికారి ఐపీఎస్‌ వ్యాస్‌ పాత్రను పోషించారు. చాలాకాలం కాంగ్రెస్‌ పార్టీలో ఉన్న ఆయన ఆ తర్వాత భారతీయ జనతా పార్టీలో చేరారు. బీజేపీ తరఫున ఆ పార్టీ ఎన్నికల ప్రచారంలో కూడా పాల్గొన్నారు.

ఆ తర్వాత వైయస్‌ రాజశేఖర్‌ రెడ్డి ముఖ్యమంత్రి అయిన తర్వాత కాంగ్రెస్‌తో సన్నిహితంగా వ్యవహరించారు. ఆ తర్వాత పూర్తిగా రాజకీయాలకు దూరంగా ఉన్నారు.

గిరిబాబు మృతిపై ఏపీ సీఎం చంద్రబాబు నాయుడు ‘ఎక్స్’లో సంతాపం వ్యక్తంచేశారు.

‘‘ప్రముఖ నటుడు, దర్శకుడు, నిర్మాత గిరిబాబు మృతి చెందడం తీవ్ర విచారకరం. ప్రకాశం జిల్లాలోని ఒక సామాన్య రైతు కుటుంబంలో జన్మించిన గిరిబాబు ఐదు దశాబ్దాల పాటు సాగిన తన సినీ ప్రయాణంలో 600కు పైగా సినిమాల్లో నటించారు. విలన్‌గా, హాస్యనటుడిగా, క్యారెక్టర్ ఆర్టిస్టుగా ప్రేక్షకులను అలరించారు. గిరిబాబు ఆత్మకు శాంతి చేకూరాలని ప్రార్థిస్తున్నాను. ఆయన కుటుంబ సభ్యులకు నా ప్రగాఢ సానుభూతిని తెలియజేస్తున్నాను’’ అని చంద్రబాబు ‘ఎక్స్’లో పోస్ట్ చేశారు.

గిరిబాబు మరణవార్త ఎంతో బాధించిందని వైెసీపీ అధినేత వైఎస్ జగన్ అన్నారు.

‘‘నాన్నకు మంచి స్నేహితుడు, మా పార్టీలో క్రియాశీలక సభ్యులైన ప్రముఖ నటుడు గిరిబాబు మరణవార్త ఎంతో బాధించింది. ఆయన తనదైన నటనతో ఎన్నో పాత్రలకు జీవం పోసి, తెలుగు ప్రేక్షకుల హృదయాల్లో ప్రత్యేక స్థానం సంపాదించుకున్నారు. ఆయన ఆత్మకు శాంతి చేకూరాలని ప్రార్థిస్తూ, కుటుంబ సభ్యులకు నా ప్రగాఢ సానుభూతి తెలియజేస్తున్నా’’ అని వైఎస్ జగన్ సోషల్ మీడియాలో నివాళులర్పించారు.

గిరిబాబు, సినిమాలు, ప్రకాం జిల్లా, హైదరాబాద్, చెన్నై, టాలీవుడ్
ఫొటో క్యాప్షన్, కొన్ని సినిమాలకు గిరిబాబు దర్శకత్వం వహించారు.

సొంతూరు రావినూతల ప్రత్యేకం

గిరిబాబుకి తన సొంతూరు ప్రకాశం జిల్లా రావినూతల గ్రామమంటే ప్రత్యేకమైన అభిమానం. ప్రతి సంక్రాంతికి కుటుంబమంతా రావినూతల వెళ్లి సంబరాల్లో పాల్గొనడం ద్వారా ఊరికి ప్రత్యేక గుర్తింపును తీసుకువచ్చారు.

గిరిబాబు తండ్రి యర్రా నాగయ్య శతాధిక వృద్ధుడుగా 107 ఏళ్లపాటు జీవించి 2019లో కన్నుమూశారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)