గుండె జబ్బులున్నవారు ఆ ఎయిర్‌పోర్ట్ మీదుగా ప్రయాణిస్తే ప్రాణాలకే ప్రమాదమా? ‘16 మంది మృతి’కి కారణమేంటి

ఇథియోపియా విమానాశ్రయం, నైజీరియా
ఫొటో క్యాప్షన్, బోలే అంతర్జాతీయ విమానాశ్రయం కీలకమైన విమాన ప్రయాణ కేంద్రంగా ఉంది.
    • రచయిత, అలెక్స్ ఫిలిప్స్
    • హోదా, బీబీసీ ప్రతినిధి
  • ప్రచురణ
  • చదివే సమయం: 2 నిమిషాలు

ఇథియోపియా ప్రధాన విమానాశ్రయం మీదుగా ప్రయాణించేటప్పుడు జాగ్రత్తగా ఉండాలని నైజీరియా ప్రభుత్వం తన పౌరులకు సూచించింది. ముఖ్యంగా ఆరోగ్య సమస్యలు ఉన్నవారు ఈ మార్గంలో మరింత జాగ్రత్తపడాలని హెచ్చరించింది.

ఆరోగ్య సమస్యలతో బాధపడుతున్న 16 మంది నైజీరియన్లు ఈ ఏడాది అడిస్ అబాబా మీదుగా ప్రయాణించే సమయంలో మరణించినట్లు అబుజాలోని విదేశాంగ శాఖ వెల్లడించింది.

సముద్ర మట్టానికి 2,334 మీటర్ల (7,657 అడుగుల) ఎత్తులో అడిస్ అబాబా నగరం ఉంది. ప్రపంచంలోనే అత్యంత ఎత్తులో ఉన్న రాజధాని నగరాల్లో ఇదీ ఒకటి.

ఆఫ్రికా, మధ్యప్రాచ్యం, ఆసియా దేశాల మధ్య విమాన ప్రయాణాలకు బోలే అంతర్జాతీయ విమానాశ్రయం కీలక కేంద్రంగా ఉంది. ఏటా లక్షల మంది ప్రయాణికులు ఈ విమానాశ్రయం నుంచి రాకపోకలు సాగిస్తుంటారు.

గుండె సంబంధిత, శ్వాసకోశ సమస్యలున్నవారికి ఈ ఎత్తైన ప్రాంతం వల్ల ప్రమాదం ఎక్కువగా ఉంటుందని నైజీరియా ప్రభుత్వం తెలిపింది.

బీబీసీ న్యూస్ తెలుగు వాట్సాప్ చానల్
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

మరణించిన ప్రయాణికుల వివరాలను లేదా వారి మరణాలకు గల కచ్చితమైన కారణాలను నైజీరియా విదేశాంగ శాఖ వెల్లడించలేదు.

ఎత్తైన ప్రాంతాల్లో ఉండటం వల్ల ఆరోగ్య సమస్యలు తీవ్రమయ్యే అవకాశం ఉన్నవారు అడిస్ అబాబా మీదుగా ప్రయాణించేటప్పుడు అప్రమత్తంగా ఉండి ప్రత్యేక జాగ్రత్తలు తీసుకోవాలని సూచించింది. ప్రయాణానికి ముందు తగిన వైద్య సలహా కోరాలని చెప్పింది.

అయితే, ఇథియోపియా రాజధాని మీదుగా నైజీరియన్లు ప్రయాణించడాన్ని నిరుత్సాహపరచడం తమ ఉద్దేశం కాదని ఆ శాఖ స్పష్టం చేసింది.

ఎత్తైన ప్రాంతాల్లో ప్రయాణం ప్రమాదకరమా?

గుండె, ఊపిరితిత్తుల వ్యాధులతో బాధపడేవారికి ఎత్తైన ప్రాంతాల్లో పర్యటించడం ప్రమాదకరమని నిపుణులు చెబుతున్నారు. అలాంటి ప్రాంతాల్లో గాలి పీడనం తక్కువగా ఉండటంతో శరీరానికి అందే ఆక్సిజన్ పరిమాణం తగ్గుతుంది.

దీంతో శరీరంలోని వివిధ భాగాలకు తగినంత ఆక్సిజన్ అందించేందుకు గుండె ఎక్కువగా పనిచేయాల్సి వస్తుంది. ఇప్పటికే గుండె సంబంధిత సమస్యలున్నవారిలో ఇది కొన్నిసార్లు గుండె వైఫల్యానికి దారితీయవచ్చని అమెరికన్ హార్ట్ అసోసియేషన్ తెలిపింది.

ఎత్తైన ప్రాంతాల్లో ఆక్సిజన్ స్థాయి తక్కువగా ఉండటం వల్ల ఆరోగ్యంగా ఉన్నవారిలోనూ తల తిరగడం, అలసట, శ్వాస తీసుకోవడంలో ఇబ్బంది వంటి సమస్యలు తలెత్తవచ్చు.

ఊపిరితిత్తుల వ్యాధులతో బాధపడేవారికి ఇవి మరిన్ని ఆరోగ్య సమస్యలకు దారితీయవచ్చని అధ్యయనాలు చెబుతున్నాయి.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)