కొత్త జేమ్స్ బాండ్‌గా రాబర్ట్ పాటిన్‌సన్

జేమ్స్ బాండ్, రాబర్ట్ పాటిన్‌సన్, బ్రిటన్ నటుడు
ఫొటో క్యాప్షన్, 'ట్విలైట్', 'టెనెట్', 'ది బ్యాట్‌మ్యాన్', 'ది ఒడిస్సీ' వంటి ప్రముఖ చిత్రాల్లో రాబర్ట్ పాటిన్‌సన్ నటించారు.
    • రచయిత, స్టీవెన్ మెక్‌ఇంతోష్
    • హోదా, బీబీసీ ప్రతినిధి
  • ప్రచురణ
  • చదివే సమయం: 5 నిమిషాలు

'ట్విలైట్', 'ది బ్యాట్‌మ్యాన్' వంటి చిత్రాలతో గుర్తింపు పొందిన బ్రిటిష్ నటుడు రాబర్ట్ పాటిన్‌సన్.. తదుపరి జేమ్స్ బాండ్‌గా నటించనున్నారు.

సోషల్ మీడియాలో ఈ విషయాన్ని అమెజాన్ ఎంజీఎం స్టూడియోస్ సోమవారం వెల్లడించింది. 007 పాత్రలో పాటిన్‌సన్ కనిపిస్తున్న చిత్రాన్ని కూడా పోస్టు చేసింది.

40 ఏళ్ల పాటిన్‌సన్.. జేమ్స్ బాండ్ పాత్ర పోషించనున్న ఏడో నటుడు. 2028లో విడుదల కానున్న 26వ బాండ్ చిత్రంలో ఆయన కథానాయకుడిగా కనిపించనున్నారు.

''సినిమా చరిత్రలో జేమ్స్ బాండ్ అత్యంత ప్రతిష్ఠాత్మకమైన పాత్రల్లో ఒకటి. 007 పాత్ర పోషించే అవకాశం రావడం నా జీవితంలో దక్కిన గొప్ప గౌరవం'' అని పాటిన్‌సన్ అన్నారు. తనపై నమ్మకం ఉంచిన చిత్ర బృందానికి ఆయన కృతజ్ఞతలు తెలిపారు.

''ఇది నా కల నిజమైన సందర్భం అని చెప్పడం కూడా తక్కువే. ఈ భాగస్వామ్యం పట్ల, అద్భుతమైన బృందంతో కలిసి పనిచేయడం పట్ల ఎంతో ఉత్సాహంగా ఉన్నాను'' అని పాటిన్‌సన్ అన్నారు.

బీబీసీ న్యూస్ తెలుగు వాట్సాప్ చానల్
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

అమెజాన్ యాజమాన్యంలో..

తదుపరి బాండ్ చిత్రానికి డెనిస్ విలెన్యూవ్ దర్శకత్వం వహించనున్నారు. కథను స్టీవెన్ నైట్ అందించనున్నారు. అయితే, ఈ సినిమాకు సంబంధించిన టైటిల్, విడుదల తేదీని ఇంకా ప్రకటించలేదు.

డేనియల్ క్రెయిగ్ తర్వాత జేమ్స్ బాండ్ పాత్రను ఎవరు పోషిస్తారనే అంశంపై కొన్నేళ్లుగా తీవ్ర చర్చ జరుగుతోంది. సినీ పరిశ్రమలో అత్యంత ప్రతిష్ఠాత్మకమైన, ఎక్కువ మంది దృష్టిని ఆకర్షించే పాత్రల్లో ఇదొకటి.

చాలా కాలంగా బాండ్ చిత్రాల నిర్మాతలుగా ఉన్న బార్బరా బ్రోకలీ, మైఖేల్ జీ విల్సన్ ఈ బాధ్యతల నుంచి తప్పుకున్న తర్వాత వస్తున్న తొలి 007 చిత్రం ఇదే. ఎంజీఎం మాతృ సంస్థను అమెజాన్ కొనుగోలు చేసిన తర్వాత ఈ ఫ్రాంచైజీపై సృజనాత్మక నియంత్రణ కూడా అమెజాన్ చేతుల్లోకి వెళ్లింది.

26వ బాండ్ చిత్రం విడుదలయ్యే సమయానికి గత చిత్రం 'నో టైమ్ టు డై' విడుదలై ఏడేళ్లు పూర్తవుతుంది. 2021లో విడుదలైన ఆ సినిమాకు, తదుపరి చిత్రానికి మధ్య ఉండే విరామం బాండ్ ఫ్రాంచైజీ చరిత్రలోనే ఎక్కువగా చెప్పుకుంటున్నారు.

'డ్యూన్', 'ప్రిజనర్స్', 'సికారియో', 'అరైవల్', 'బ్లేడ్ రన్నర్ 2049' వంటి చిత్రాలతో దర్శకుడు డెనిస్ విలెన్యూవ్ గుర్తింపు పొందారు. ఇక స్టీవెన్ నైట్ 'పీకీ బ్లైండర్స్', 'హౌస్ ఆఫ్ గిన్నెస్' వంటి టీవీ సిరీస్‌లతోపాటు 'బర్న్ట్', 'స్పెన్సర్', 'లాక్' వంటి చిత్రాలకు రచయితగా పనిచేశారు.

విలెన్యూవ్ దర్శకత్వంలో రూపొందుతున్న 'డ్యూన్: పార్ట్ 3'లో పాటిన్‌సన్ ఇప్పటికే నటించారు. ఇందులో స్కైటేల్ అనే కొత్త ప్రతినాయకుడి పాత్రలో ఆయన కనిపించనున్నారు. ఈ సినిమా వచ్చే నెలలో విడుదల కానుంది.

పాటిన్‌సన్‌ను జేమ్స్ బాండ్‌గా ఎంపిక చేయడంపై విలెన్యూవ్ స్పందించారు.

''ముందుగా ఈ ప్రయాణంలో మాతో కలిసి పనిచేసిన నటీనటులందరికీ కృతజ్ఞతలు. ఎంతో ప్రతిభావంతులైన నటీనటులు మాతో ఉన్నప్పటికీ, 007 పాత్రను ఒక్కరే పోషించగలరు. రాబర్ట్ పాటిన్‌సన్‌ను కొత్త జేమ్స్ బాండ్‌గా స్వాగతించడం చాలా ఆనందంగా ఉంది. 007 పాత్రకు అవసరమైన ఆకర్షణ ఆయనలో ఉంది. ఆయన కొత్త శక్తిని కూడా తీసుకొస్తున్నారు. ఆయనతో కలిసి పనిచేయడం కోసం ఎదురుచూస్తున్నా'' అని విలెన్యూవ్ చెప్పారు.

పాటిన్‌సన్ ఎంపికపై బకింగ్‌హామ్ ప్యాలెస్ కూడా హర్షం వ్యక్తం చేసింది. ఈ వార్తను ఇన్‌స్టాగ్రామ్‌లో పోస్టు చేస్తూ.. ''హిజ్ మెజెస్టీస్ సీక్రెట్ సర్వీస్‌లోకి స్వాగతం, మిస్టర్ బాండ్'' అని పేర్కొంది.

1969లో విడుదలైన 'ఆన్ హర్ మెజెస్టీస్ సీక్రెట్ సర్వీస్' చిత్రంలో జేమ్స్ బాండ్‌గా నటించిన ఆస్ట్రేలియా నటుడు జార్జ్ లాజెన్‌బీ కూడా పాటిన్‌సన్‌‌కు స్వాగతం పలికారు. ప్రపంచంలోనే అత్యంత ప్రత్యేకమైన నటుల బృందంలోకి ఆహ్వానం పలుకుతున్నట్లు సోషల్ మీడియాలో ఓ వీడియో పోస్టు చేశారు.

''ఈ అవకాశాన్ని ఆస్వాదించడం మర్చిపోవద్దు. గతంలో మరో నటుడికి జరగని ఓ ఘటన మీకూ ఎదురవుతుందేమో చూద్దాం, ఆల్‌ ది బెస్ట్ మేట్'' అని లాజెన్‌బీ అన్నారు.

సహ నటి జెండయాతో పాటిన్‌సన్, జేమ్స్ బాండ్
ఫొటో క్యాప్షన్, సహ నటి జెండయాతో పాటిన్‌సన్.

'వారసత్వం భద్రంగా ఉంటుంది'

ఇటీవల జరిగిన స్క్రీన్ టెస్టుల్లో జోష్ ఓ'కానర్, కలమ్ టర్నర్, జాక్ లోడెన్ సహా పలువురు నటులు జేమ్స్ బాండ్ పాత్ర కోసం పోటీలో ఉన్నట్లు వార్తలు వచ్చాయి. అయితే, చివరకు ఇప్పటికే ప్రపంచవ్యాప్తంగా గుర్తింపు పొందిన పాటిన్‌సన్‌ను అమెజాన్ ఎంజీఎం ఎంపిక చేసింది.

''రాబర్ట్ పాటిన్‌సన్ చేతుల్లో జేమ్స్ బాండ్ వారసత్వం భద్రంగా ఉంటుంది. నటుడిగా ఆయన చూపించే తెగువ, తనను తాను హాస్యంగా విమర్శించుకునే స్వభావం, విభిన్న పాత్రలతో తనను తాను నిరంతరం కొత్తగా ఆవిష్కరించుకునే సామర్థ్యం.. ప్రస్తుత కాలానికి సరైన బాండ్‌గా ఆయనను నిలబెడతాయి'' అని నిర్మాతలు అమీ పాస్కల్, డేవిడ్ హేమన్ పేర్కొన్నారు.

జేమ్స్ బాండ్ పాత్ర కోసం ఆడిషన్ ఇచ్చిన నటుల్లో ఎక్కువ వయసున్న వారిలో పాటిన్‌సన్(40) ఒకరు.

పాటిన్‌సన్‌తో కుదిరిన ఒప్పందం ప్రకారం, ఆయన మూడు చిత్రాల్లో 007 పాత్ర పోషించనున్నట్లు గత వారం వార్తలు వచ్చాయి. ఇదే పాత్ర కోసం పరిశీలనలో ఉన్న మరికొందరు నటులతో నాలుగు చిత్రాలకు ఒప్పందం చేసుకోవాలని చర్చించినట్లు కూడా కథనాలు వెలువడ్డాయి. అయితే, ఈ వివరాలను అధికారికంగా ధ్రువీకరించలేదు.

జేమ్స్ బాండ్, రాబర్ట్ పాటిన్‌సన్, బ్రిటన్ నటుడు
ఫొటో క్యాప్షన్, క్రిస్టెన్ స్టీవర్ట్‌తో కలిసి 'ట్విలైట్' చిత్రాల్లో పాటిన్‌సన్ నటించాడు. 2011లో వీరిద్దరూ కలిసి కనిపించినప్పటి ఫోటో ఇది.

పాటిన్‌సన్ సినీ ప్రయాణం

2005లో విడుదలైన 'హ్యారీ పాటర్ అండ్ ది గోబ్లెట్ ఆఫ్ ఫైర్' చిత్రంలో సెడ్రిక్ డిగ్గరీ పాత్రతో రాబర్ట్ పాటిన్‌సన్ తొలిసారి విస్తృత గుర్తింపు పొందారు.

ఆ తర్వాత స్టెఫెనీ మేయర్ రాసిన పాపులర్ నవలల ఆధారంగా తెరకెక్కిన 'ట్విలైట్' చిత్రాల్లో పాటిన్‌సన్ రక్తపిశాచి ఎడ్వర్డ్ కల్లెన్ పాత్ర పోషించారు. ఈ సినిమాలు ప్రపంచవ్యాప్తంగా విశేష ఆదరణ పొందాయి.

ఈ చిత్రాల సిరీస్‌లో మొత్తం ఐదు సినిమాల్లో క్రిస్టెన్ స్టీవర్ట్‌తో కలిసి పాటిన్‌సన్ నటించారు. ఈ సినిమాలు ప్రపంచవ్యాప్తంగా బాక్సాఫీస్ వద్ద 3 బిలియన్ డాలర్లకు పైగా వసూలు చేశాయి. భారత కరెన్సీలో ఇది దాదాపు రూ.28 వేల కోట్లకు సమానం.

2022లో విడుదలైన 'ది బ్యాట్‌మ్యాన్', ఈ ఏడాది విడుదలైన క్రిస్టోఫర్ నోలన్ చిత్రం 'ది ఒడిస్సీ' వంటి భారీ చిత్రాల్లోనూ ఆయన నటించారు.

అదే సమయంలో చిన్న బడ్జెట్, ప్రయోగాత్మక, స్వతంత్ర చిత్రాల్లోనూ విభిన్న పాత్రలు పోషిస్తూ సినీ పరిశ్రమలో మంచి గుర్తింపు తెచ్చుకున్నారు.

'ది లైట్‌హౌస్', 'మిక్కీ 17', 'లైఫ్', 'ది డ్రామా', 'గుడ్ టైమ్', 'ది రోవర్', 'బెల్ ఆమీ', 'ప్రైమ్‌టైమ్', 'టెనెట్', 'ది లాస్ట్ సిటీ ఆఫ్ జెడ్' పాటిన్‌సన్ నటించిన ఇతర చిత్రాలు.

జేమ్స్ బాండ్, రాబర్ట్ పాటిన్‌సన్, బ్రిటన్ నటుడు
ఫొటో క్యాప్షన్, డేనియల్ క్రెయిగ్ మొత్తం ఐదు బాండ్ చిత్రాల్లో నటించారు.

జేమ్స్ బాండ్‌గా నటించిన ఆరుగురు

అధికారిక జేమ్స్ బాండ్ చిత్రాల్లో ఇప్పటివరకు ఆరుగురు నటులు మాత్రమే ఈ పాత్ర పోషించారు. సీన్ కానరీ, జార్జ్ లాజెన్‌బీ, రోజర్ మూర్, తిమోతీ డాల్టన్, పియర్స్ బ్రాస్నన్, డేనియల్ క్రెయిగ్ ఈ జాబితాలో ఉన్నారు.

డేనియల్ క్రెయిగ్ మొత్తం ఐదు బాండ్ చిత్రాల్లో నటించారు. 2006లో విడుదలైన 'క్యాసినో రాయల్'తో ఆయన ఈ ప్రయాణం ప్రారంభమైంది. రచయిత ఇయాన్ ఫ్లెమింగ్ సృష్టించిన గూఢచారి పాత్రలో ఆయన 16 ఏళ్ల పాటు కొనసాగారు.

ఈ సినిమా జేమ్స్ బాండ్ ఫ్రాంచైజీలో కొత్త అధ్యాయానికి నాంది కానుంది. 2021లో ఎంజీఎంను 8.5 బిలియన్ డాలర్లకు అమెజాన్ సంస్థ కొనుగోలు చేసింది. ఈ ఒప్పందంలో జేమ్స్ బాండ్ చిత్రాల పంపిణీ హక్కులు కూడా ఉన్నాయి.

ఆ తర్వాత, 2025లో ఈ ఫ్రాంచైజీపై క్రియేటివ్ కంట్రోల్‌ను అమెజాన్ ఎంజీఎంకు అప్పగించేందుకు బాండ్ చిత్రాలకు ఎక్కువ కాలం నిర్మాతలుగా ఉన్న బార్బరా బ్రోకలీ, మైఖేల్ జీ విల్సన్ అంగీకరించారు.

1962లో సీన్ కానరీ తొలిసారి బాండ్‌గా నటించిన 'డాక్టర్ నో' చిత్రం నుంచి ఈ ఫ్రాంచైజీ బ్రోకలీ కుటుంబం నియంత్రణలోనే ఉంది.

దశాబ్దాలుగా ఈ పాత్ర, ఫ్రాంచైజీ ప్రత్యేకతను బ్రోకలీ కుటుంబం కాపాడుతూ వచ్చింది. ఇతర కథలతో స్పిన్‌ఆఫ్‌లు రూపొందించడం, బ్రాండ్ పేరుతో వివిధ ఉత్పత్తులకు అనుమతులు ఇవ్వడం వంటి వాటికి వారు దూరంగా ఉన్నారు. అయితే, అమెజాన్ చేతుల్లోకి వెళ్లిన తర్వాత ఇలాంటి మార్పులు చోటుచేసుకునే అవకాశం ఉందని సినీ పరిశ్రమ నిపుణులు భావిస్తున్నారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)