ሑቲ፡ ኣብ ርእሰ ከተማ ስዑዲ ዓረብ መጥቃዕቲ ድሮናትን ባሊስቲክ ሚሳይላትን ከምዘካየዱ ኣፍሊጦም

ቀጥታዊ ሸፈነ

1. 23 ሰነ 2026ምስቲ ኣብ ኣውሮጳ ተኸሲቱ ዘሎ ረስኒ ብዝተሓሓዝ 40 ሰባት ሞይቶም

   

   ምንጪ ስእሊ, PA Media

   ኣብ ኣውሮጳ ተኸሲቱ ዘሎ ዋዒ ክራማት ሓደኛ እናኾነ ይመጽእ ኣሎ።

   ኣብ ፈረንሳ ጥራይ፡ ምስቲ ተፈጢሩ ዘሎ ረስእኒ ብዝተኣሳሰር 40 ሰባት ኣብ ማያት ጥሒሎም ከምዝሞቱ ጸብጻባት ሓቢሮም።

   ሰብመዚ እታ ሃገር ሰባት ብዘይ ሓለዋ ክኢላታት ናብ ባሕሪ፡ ቀላያትን ወሓይዝን ከይኣትዉ ኣተሓሳሲቦም ኣለዉ።

   ፈረንሳ፡ ኢጣልያን ስጳኛን ገለ ካብተን በቲ ውዑይ ኩነታት ኣየር ዝያዳ ዝተጸልዋ ሃገራት እየን።

   ትማሊ ኣብ ታሪኽ ፈረንሳ እታ ዝወዓየት ለይቲ ኮይና ሓዲራ። ሎሚ'ውን መጠን ዋዒ ኣብታ ሃገር ናብ 44.3 ዲግሪ ዓሪጉ ውዒሉ።

   ኣብ ስጳኛ'ውን መጠን ዋዒ ክሳብ 40 ዲግሪ ሴንቲግሬድ ክበጽሕ ትጽቢት ይግበር።

   ከም ሮማ፡ ቦሎኛ፡ ሚላን፡ ቨኒስ፡ ፍሎረንስን ናፖሊን ዝበላ ከተማታት ኢጣልያ'ውን መጠንቀቕታ ኣውጺአን ኣለዋ።

   ኣብ ብሪጣንያ ድማ፡ ዛጊት 33.7 ዲግሪ ተመዝጊቡ'ሎ። ኣብ ታሪኽ እታ ሃገር ኣብ ወርሒ ሰነ ዝተመዝገበ ዝለዓለ መጠን እቲ ኣብ 1976 ዝተራእየ 35.6 ዲግሪ እዩ ነይሩ።

   ብሰንኪ'ቲ ኩነታት ኣብ ብሪጣንያ ትርከበን ዝተፈላለያ ሃገራት ሰብመዚ ኣብያተ ትምህርቲ ዝርከብዎም ትካላት ምሉእ ብምሉእ ወይ ብኸፊልን ክዓጽዉ ተገዲዶም ኣለዉ።

   ክቱር ረስኒ ንሓዲዳት ባቡር ስለዘግፍሖ'ውን መጓዓዝያ ባቡር ከተዓናቕፍ ይኽእል'ዩ። ሓደ ካብ ዓበይቲ ትካላት ባቡር ብሪጣንያ ጽባሕ ረቡዕ መገሻታት ክግታእ ተማሕጺኑ ኣሎ።

   ዝኾነ ሰብ መሬት ጠለስ ምስ በለ ክንቀሳቐስን ማይ ከይሓድግን ድማ ሰብሞያ ጥዕና ብወገኖም ይምሕጸኑ ኣለዉ።

2. 23 ሰነ 2026ምኒስተር ምክልኻል ኣመሪካ ንወፃኢታት ኲናት ኢራን 80 ቢልዮን ዶላር ሓቲቱ

   

   ምኒስትሪ ምክልኻል ኣመሪካ፡ ኲናት ኢራን ንምሽፋን፡ ኣስታት 80 ቢልዮን ዶላር ወፃኢታት ከምዝሓተቶ ንኣባላት ባይቶ ሓቢሩ።

   ዋይት ሃውስ እቲ ሕቶ ባጀት ዛጊድ ብወግዒ ከምዘይቀረበ እኳ እንተገለጸ፡ ንጸሓፊ (ምኒስተር) ኲናት እታ ሃገር፡ ፒት ሄግሰት ግን ኣብ ዝሓለፈ መዓልታት ምስ ኣባላት ባይቶ ክራኸብን ክዘራረበሉን ከምዝቐነየ ይግለጽ።

   ኣብ ዝሓለፈዓመት ንኲናት ኢራን ዝውዕል ገንዘብ ሕቶ ናብ ኣባላት ባይቶ ከምዝቐረበ፡ ክልተ ፈለጥቲ-ውሽጢ ምንጭታት ብምጥቃስ ኣሶሼትድ ፕረስ ፀብፂቡ ነይሩ።

   ብሰፊሑ ‘ፔንታጎን’ ብዝብል ዝፍለጥ እቲ ቤት ፅሕፈት ምክልኻል ሃገር ግን ርእይቶ ክህበሉ ንዝቐረበሉ ሕቶ ምላሽ ኣይሃበን።

   እቲ ናይ ባጀት ሕቶ፡ ፕረዚደንት ትራምፕ ኣብ ልዕሊ ኢራን ዘካየዶ ውግእ ካብ ዘይድግፉ ኣባላት ባይቶ፡ ተቓውሞ ከጋጥሞ ትጽቢት ይግበር።

   ኣብ ወርሒ ግንቦት፡ ኣብ ናይ ሃገራዊ ባይቶ ኣኼባ ሕቶን መልስን ፡ ንሰልፊ ደሞክራሲ እትውክል ኣባል ባይቶ ፓቲ ሊ፡ ንሄግሰት፡ "ብዙሓት ኣመሪካውያን ዝተቓወምዎ ኲናት ንምምዋል ገንዘብ ተውጽእ ኣለኻ" ኢላ ነቒፋቶ ምንባራ ይዝከር።

3. 23 ሰነ 2026ደቡብ ሱዳን፡ ድሕሪ ናፅነት ንፈለማ እዋን ሃገራዊ መረፃ ከተካይድ'ያ

   

   ምንጪ ስእሊ, AFP via Getty Images

   ደቡብ ሱዳን፡ ድሕሪ ናጽነታ ንፈለማ እዋን፡ ኣብ ዝመጽእ ዓመት ኣብ ወርሒ ታሕሳስ ሃገራዊ መረፃ ክተካይድ ምዃና ሰበስልጣን እታ ሃገር ኣፍሊጦም።

   እታ ሃገር፡ ኣብ 2011 ናጽነታ ካብ እትእውጅ ንደሓር መራሕታ ናብ መረፃ ቀሪቦም ኣይፈልጡን።

   ፕረዚደንት ሳልቫ ኪር ን15 ዓመታት ፕረዚደንት ዀይኑ ኣብ ስልጣን ፀኒሑ ኣሎ።

   ኣብታ ሃገር ንፈለማ እዋን ኣብ 2015፡ ቅድሚ 11 ዓመት ሓፈሻዊ መረፃ ከተካይድ ተሓሲቡ ነይሩ።

   እንተዀነ ብሰንኪ እቲ ዝካየድ ዝነበረ ኲናት ሓድሕድ ተናዊሑ።

   ኣብ 2018 ስምምዕ ሰላም ምስተፈረመ ድማ፡ ኪር ኣቦመንበር ናይቲ ሓባራዊ መንግስቲ፡ መነሓንሕቱ ሪክ ማቻር ድማ ምክትሉ ኰይኑ ቀፂሉ።

   እቲ ስምምዕ ሰላም፡ ኣብ 2022 መረፃ ንምክያድ ዝዓለመ እኳ እንተነበረ፡ ኣብ መንጎ መራሕቲ እታ ሃገር ብዝተፈጥረ ዘይምረድዳእ ግን ምድንጓዩ ይዝከር።

   ሕዚ’ውን እንተዀነ፡ ኣብ መንጎ ክልቲኦም ፖለቲከኛታት ዝፍጠር ወጥሪ ካልእ ምድንጓይ ከየስዕብ ይስጋእ።

   ሪክማቻር ዝሓለፈ ዓመት ካብ ስልጣን ምክትል ፕረዚደነት ተኣልዩ ኣብ ቀይዲ ኣትዩ ይርከብ።

   ንሱ፡ ኣብዚ ሕጂ እዋን ኣብ ርእሰከተማ ጁባ ኣብ ናይ ገዛ ማሕዩር ዘሎ ኮይኑ፡ ካብ ዝሓለፈ ዓመት መጋቢት ጀሚሩ ኣብ ገለ ክፋል እታ ሃገር ግጭት ይረአ ኣሎ።

4. 22 ሰነ 2026ኣመሪካን ኢራንን፡ ቀዳማይ ዙርያ ዝርርብ ብፅቡቕ ከምዝተዛዘመ ምክትል ፕረዚደንት ኣመሪካ ገሊፁ

   

   ምንጪ ስእሊ, Reuters

   ምክትል ፕረዚደንት ኣመሪካ ጄ.ዲ.ቫንስ፡ ኣመሪካን ኢራንን ኣብ ስዊዘርላንድ ኣብ ዝገብርኦ ዘለዋ ዝርርብ፡ "ጽቡቕ ምዕባለ" ከምዝተርኣየን ንናይ መወዳእታ ስምምዕ "ጽቡቕ መሰረት ከምዘንበረን" ተዛሪቡ።

   ልኡኽ ኢራን ድሕሪ'ቲ ዝርርብ ምጅማሩ፡ ካብቲ መድረኽ ረጊፁ ክወፅእ ደልዩ’ኳ እንተነበረ፡ ድሕሪ ናይ ሰዓታት ልዝብ ኣብ መንጎ ክልቲአን ሃገራት ኣወንታዊ ምርድዳእ ከምዝበጽሐ ይግለጽ።

   ኣህጉራዊ ኣቶሚካዊ ጸዓት (IAEA)፡ ኒዩክለራዊ ተቘፃፀርቲ ናብ ኢራን ብምእታው ኣብ ቀዳማይ ዙርያ ዝርርብ ዝተሰማምዑሉ ነጥብታት ተኽብር ምህላዋ ከረጋግጹ ትጽቢት ይግበር።

   ኣመሪካ ብወገና፡ ኢራን ካብ ወጻኢ ሃገራት ዝተፈላለዩ ፍርያት ሕርሻ ከይትዕድግ ተነቢሩላ ዝፀንሐ ገደብ ክተልዕል ትፅቢት ይግበር።

   እቲ ወሳኒ መስመር ባሕሪ መጻብቦ ሆርሙዝ "ክፉት" ምዃኑ ዝገለጸ ምክትል ፕረዚደንት ኣመሪካ፡ ኣብ ሊባኖስ ብዛዕባ ዝካየድ ዘሎ ግጭት ከምዝተዘርበሉ ኣፍሊጡ።

   

   ምንጪ ስእሊ, Getty Images

   ብተወሳኺ ቴክኒካዊ ዝርርብ ኣብ መፃኢ ሰሙን ክቕጽል ምዃኑ እቶም ሸምገልቲ- ቐጣርን ፓኪስታንን- ኣፍሊጦም።

   ኣመሪካን ኢራንን ኣብ ውሽጢ ዝቕጽሉ 60 መዓልታት ኣብ ናይ መወዳእታ ስምምዕ ንምብጻሕ ኣብ ሓደ ፍኖተ-ካርታ ከምዝተሰማምዑ'ውን ይግለጽ።

   ሚኒስተር ጉዳያት ወጻኢ ኢራን ኣባስ ኣራግቺ፡ ኣብ ዝሃቦ መግለጺ፡ ኣብቲ ዝርርብ “ዓቢ ምምሕያሽ” ከምዝተራእየ ተዛሪቡ።

   "ኣብ ልዕሊ ሰደድ ነዳድን ፔትሮኬሚካልን ኢራን ተነቢሩ ዝፀንሐ እገዳ ተላዒሉ'ሎ" ክብል ወሲኹ ገሊጹ።

5. 22 ሰነ 2026ኤርትራ፡ ሰባት ብሓደጋ መኪና ሞይቶምን ብኸቢድ ቆሲሎምን

   

   ምንጪ ስእሊ, MoI Eritrea

   ኣብ ኤርትራ ዘጋጠመ ሓደጋ መኪና ኣብ ህይወት ሰብ ከቢድ ጉድኣት ኣስዒቡ።

   ኣብቲ ኣብ መስመር ኩዶብዑር-መንደፈራ ዘጋጠመ ሓደጋ ክልተ ሰባት ክሞቱ እንከለዉ ሓያሎ ካልኦት ከቢድ ማህሰይቲ ወሪድዎም ኣሎ።

   መንግኣስታዊ ማዕከናት ዜና እታ ሃገር ከምዝበልኦ፡ ሓሙሽተ ሰባት ከቢድ ማህሰይቲ ከጋጥሞም እንከሎ ክልተ ድማ ብፈኲስ ቆሲሎም ኣብ መወከሲ ሆስፒታል መንደፈራ ይእለዩ ኣለዉ።

   "ቀንዲ ጠንቂ ናይ’ቲ ሓደጋ ሸለልትነት ዝመንቀሊኡ ሓደገኛ ኣመራርሓን ልዕሊ መጠን ጽዕነትን ከምዝኾነ" ንመርማሪ ሓደጋ ትራፊክ ደሴ ተኽላይ ብምጥቃስ እቲ ጸብጻብ ሓቢሩ።

   እታ 9 ሰባት ጽዒና ካብ ኩዶብዑር ናብ ከተማ መንደፈራ ትጓዓዝ ዝነበረት ተሽከርካሪት፡ ናይ ገዛ መኪና ኮይና ኣብ መንጐ እምኒ ሓይሊን ድርኮን ኣብ ዝርከብ ድልድል'ያ ጸዲፋ።

   ብሰንኪ ኣብታ ሃገር ኣጋጢሙ ዘሎ ከቢድ ሕጽረት ህዝባዊ መጓዓዝያ፡ ብዙሓት ናይ ገዛ መካይን ብገንዘብ ሰባት ኣብ ምምልላስ ተዋፊረን ከምዘለዋ ይግለጽ።

   ኣብታ ሃገር ብዝርአ "ተደጋጋሚ ጥሕሰታት ሕግታት ትራፊክ ኣብ ሰብን ንብረትን ጉድኣት የውርድ ከምዘሎ" ሓላፊ መደበር ፖሊስ ንኡ ስዞባ እምኒ-ሓይሊ ኣጠንቂቑ'ሎ።

6. 22 ሰነ 2026በርንሃም ንስታርመር ብምትካእ ከም ቀዳማይ ምኒስተር ክወዳደር ምዃኑ ኣረጋጊጹ

   ኤንዲ በርንሃም ድሕሪ መግለጺ ካብ ስልጣን ምውራድ ኪር ስታርመር ሓጺር ርእይቶ ሂቡ ኣሎ።ኣብ ማሕበራዊ መራኸቢታት ድማ ከምዚ ኢሉ ጽሒፉ፤

   "ኪር ንሃገርና ዓቢ ኣገልግሎት ሂቡ እዩ፤ ኣብዚ ከምዚ ዝበለ ፈታኒ እዋን ንዘርኣዮ መሪሕነትን ተወፋይነትን ድማ ከመስግኖ እፈቱ።

   "እዚ ውሳነኡ ናይ ምስግጋር እዋን መጀመርታ ዘመልክት ኰይኑ፡ እዚ መስርሕ እዚ ብስሩዕን ብሓላፍነታውን መንገዲ ክካየድ ኣገዳሲ እዩ። ኣነ ድማ ከም ኣካል ናይዚ መስርሕ’ዚ ንገዛእ-ርእሰይ ንውድድር ከዳሉ እየ።

   "እታ ሃገር ርግኣት፡ ረዚንነትን ኣብቲ ዝያዳ ዘገድስ ጉዳያት ዘየባትኽ ትዅረት ክግበርን እያ ትጽበ፤ እቲ ዝወሃባ ድማ ንሱ እዩ። ንቕድሚት ክንግስግስ ከለና፡ ቀዳምነትና ነታ ሃገር ናብቲ ኵላትና ክትበጽሖ ንደልዮ ቦታ ንምምላስ ብሓባር ምስራሕ ክኸውን ኣለዎ።

   "ህዝቢ ኣብ ቍጠባዊ ዕብየት፡ ዋጋ መነባብሮ፡ ህዝባዊ ኣገልግሎታት፡መንበሪ ኣባይትን ንዝቕጽል ወለዶ ዝወሃብ ዕድላትን ምዕባለታት ክርኢ ይደሊ እዩ። ፖለቲካዊ ለውጢ ካብቲ ህይወት ህዝቢ ናይ ምምሕያሽ ሓላፍነት ፈጺሙ ከዘናብለና የብሉን።

   "ምንቅስቓስ ሰልፊ ዕዮ ወትሩ ዝሓየለ ዝኸውን፡ ብምትእምማንን ብዕላማን ንቕድሚት ክጥምት ከሎ እዩ።

   "ካብ ሕጂ ንደሓር ንገብሮ ነገር እዚ እዩ፤ እዚ ምስግጋር እዚ ድማ ንሰልፍናን ሃገርናን እወታዊ መስርሕ ምሕዳስ ከም ዝኸውን ክነረጋግጽ ኢና።"

7. 22 ሰነ 2026በርንሃም ንኣባላቱ፡ ከንቲባ ኰይኑ ምስራሑ ናይ ህይወቱ ዓቢ ዕድል ከም ዝነበረ ገሊጹ

   

   ምንጪ ስእሊ, Reuters

   ኤንዲ በርንሃም ሎሚ ንግሆ ምስ ኣባላት "ግሬተር ማንቸስተር ኮምባይንድ ኦቶሪቲ" ኣብ ዝነበሮ ኣኼባ ተረኺቡ፡ ንዅሎም "ካብ መዓሙቕ ልቡ" ከም ዘመስገኖም ተፈሊጡ።

   ነቶም ኣባላት፡ ከንቲባ ሜትሮ ኰይኑ ምስራሑ "ናይ ህይወቱ ዓቢ ዕድል" ከም ዝነበረ ክገልጽ ከሎ ስምዒቱ ከም ዝተንከፎ ተገሊጹ።

   ካብ ከንቲባነት ስርሑ ኣብ ዝሰናበተሉ ዘሎ እዋን፡ ቅርጺ ማንቸስተር ዘለዎ ኮረሻ ተበርኪትሉ።

   እቲ ኮረሻ፡ ምልክት ማንቸስተር ብዝዀና ኣናህብን ብናይታ ከተማ ሰማይ-ጠቀስ ህንጻታትን ዝተሰለመ ከም ዝዀነ ተፈሊጡ።

   ብተወሳኺ፡ ኣብቲ ኮረሻ "ንሕና ኣብዚ ንነገራት ብዝተፈልየ መንገዲ ኢና ንገብሮም፡” ዝብል ጽሑፍ ተጠሊፉዎ ኣሎ።

   በርንሃም ከም ኣባል ባይቶ ኰይኑ ቃልማሕላ ቅድሚ ምፍጻሙ፡ ካብ ቤት ጽሕፈት "ጂኤምሲኤ" ወጺኡ ኣሎ።

8. 22 ሰነ 2026ከንቲባ ለንደን ንቐዳማይ ምኒስተር ሞጒሱ

   ከንቲባ ለንደን ሳዲቅኻን፡ ቀዳማይ ምኒስተር ብሪጣንያ ኪር ስታርመር ስልጣኑ ከም ዝገድፍ ድሕሪ ምግላጹ፡ "ምሉእ ዕዮኡ ንህዝባዊ ኣገልግሎት ዝወፈየ እምብዛ ቅኑዕ ኰይኑ፡ንሃገሩ ዘገልገለ እዩ፡" ኢሉዎ።

   እቲ ከንቲባ ለንደን ብተወሳኺ፡ ንሱን ስታርመርን ቅድሚ 30 ዓመታት ንኣሽቱ ጠበቓታት ካብ ዝነበሩሉ ግዜ ጀሚሮም ኣዕሩኽን መሳርሕትን ከም ዝነበሩ ገሊጹ።

   "ንሱ ኣብ ሓፈሻዊ መረጻ ዝሰዓረ ሓምሻይ መራሒ ሰልፊ ዕዮ ጥራይ እዩ፡" ዝበለ ኻን፡ "ስታርመር ንሰልፊ ዕዮን ንሃገርናን ዓቢ ኣበርክቶ ገይሩ እዩ፤ ስለዚ ድማ ከመስግኖ እፈቱ፡" ክብል ወሲኹ ገሊጹ።

   እቲ ዝቕጽል ቀዳማይ ምኒስተር እቲ ሰልፊ ከተግብሮም ኢሉንዝተመስረተሎም "ምዕባለኣዊ ክብርታት" ጸኒዑ ክሕዞም ከም ዝግባእ ኣመልኪቱ።

   

   ምንጪ ስእሊ, Getty Images

9. 22 ሰነ 2026ኤንዲ በርንሃም ድሕሪ ሓጺር እዋን ቀዳማይ ምኒስተር ክኸውን ይኽእል ድዩ?

   ዝስዕብ እንታይ ክኸውን እዩ?

   ሕጂ ሰልፊ ዕዮ ብዛዕባ እዚ ጉዳይ’ዚ ክመያየጥ ዕድል ረኺቡ ኣሎ።ስታርመር፡ ንዓኡ ንምትካእ ዝግበር መስርሕ ምሕጻይ ድሕሪ ክልተ ሰሙን ከም ዝጅምር ኣፍሊጡ ኣሎ።

   ብዘይ ዝዀነ ውድድር ብቐጥታ መራሒ ናይ ምምዛዝ (ኣኽሊል ምድፋእ) መስርሕ ድዩ ክህሉ? ቍጽሮም እናወሰኸ ዝኸይድ ዘሎ ኣባላት ባይቶ ሰልፊ ዕዮ ከምኡ ክኸውን ከም ዝኽእል ይግምቱ።

   ኤንዲ በርንሃም እቲ ዝዓበየ ግምት ተዋሂብዎ ዘሎ ሕጹይ እዩ፤ ምስኡ ክወዳደር ዝደሊ መን ክህሉ እዩ?

   ዌስ ስትሪቲንግ ቅድም ክብል ከም ዝወዳደር ገሊጹ ነይሩ። እንተዀነ፡ ገሊኦም መሻርኽቱ ንሱ ከም ዘይወዳደር ምእማኖም ዘገርም እዩ። ኣብ ክንድኡስ ብበርንሃም ዓቢ ጽልዋ ዘለዎ ስራሕ ክወሃቦ ይኸውን?

   ይዅን እምበር፡ እቲ ሕጂ ዘሎ ናይ ግዜ ሰሌዳ፡ ካልእ ሰብ ናብዚ ውድድር እዚ ክኣቱ ዘለዎ ዕድል ክፉት ይሓድጎ እዩ። ካብ ማእከላይ-የማናዊ መስመር ዝዀነ ፖለቲከኛ ነቲ ውድድር ንምቕስቓስ ድሌት ክሓድሮ ይኽእል ይኸውን?

   እንተዀነ፡ ኵሉ ግምታት ኤንዲ በርንሃም ድሕሪ ሓጺር እዋን ቀዳማይ ምኒስተር ክኸውን ምዃኑ እዩ ዘመልክት።

10. 22 ሰነ 2026ሓድሽ ቀዳማይ ምኒስተር መዓስ ክሽየም እዩ?

    ኪር ስታርመር፡ንፈጻሚ ሽማግለ ሰልፊ ዕዮ፡ ንሕጹይ ሓድሽ መራሒ እቲ ሰልፊ ካብ 9 ሓምለ ክጅምር ክሓትት ምዃኑ ገሊጹ ኣሎ።

    እዚ መስርሕ’ዚ፡ ድሕሪ ሓደ ሰሙን፡ ማለት ብ16 ሓምለ፡ ቅድሚ ባይቶ ንኽረምቲ ምዕጻዉ ክዛዘም ምዃኑ ሓቢሩ።

    ውድድር ዝህሉ እንተዀይኑ ድማ ባይቶ ካብ ናይ ክረምቲ ዕረፍቱ ብ1 መስከረም ክምለስ ከሎ፡ ሓድሽ መራሒ ተመዚዙ ከም ዝጸንሕ ዘረጋግጽ ምዃኑ ገሊጹ።

    ከምቲ ቅድም ክብል ክንሕብሮ ዝጸናሕና፡ ንመሪሕነት ሰልፊ ዕዮ ዝግበር ውድድር ክህሉ ምዃኑን ዘይምዃኑን ገና ንጹር ኣይኰነን።

    ንኣብነት፡ እቲ ውድድር ብ9 ሓምለ ክጅምር ከሎ፡ ኤንዲ በርንሃም ብዘይ ገለ ተወዳዳሪ ክቐርብ እንተዀይኑ፡ መስርሕ ምሕጻይ ምስ ተዓጽወ መራሒ ሰልፊ ዕዮ ክኸውን ይኽእል እዩ።

    እዚ ጉዳይ’ዚ ክሳዕ ዝውሰን ድማ ስታርመር ከም ቀዳማይ ምኒስተር ኰይኑ ስራሑ ክቕጽል እዩ።

11. 22 ሰነ 2026ኪር ስታርመር ንዝመጽእ ቀዳማይ ምኒስተር ደገፍ ከም ዝገብረሉ ገሊጹ

    

    ምንጪ ስእሊ, Reuters

    ቀዳማይ ምኒስተር ዓባይ ብሪጣንያ ኪር ስታርመር፡ካብ መሪሕነት ገዛኢ ሰልፊ ዕዮ ከም ዝለቅቕ ኣፍሊጡ።

    ንሱ ነዚ ስጕምቲ እዚ ክወስድ ዝተገደደ፡እቲ ሰልፊ ንቐጻሊ ሓፈሻዊ መረጻ ንምምራሕ ብቑዕ ምዃኑን ዘይምዃኑን ንዘልዓሎ ሕቶታት ምላሽ ንምሃብ ምዃኑ ገሊጹ። ነቲ ካብ ሰልፉ ዝረኸቦ ግብረመልሲ ድማ ብጸጋ ከም ዝተቐበሎ ኣመልኪቱ።

    እቲ ቀዳማይ ምኒስተር ዝወሰዶ ኵሉ ውሳነታት ነታ ዝፈትዋ ሃገሩ ቀዳምነት ንምሃብ ዝዓለመ ምባሩ ብምግላጽ፡ "ካብ መሪሕነት ሰልፊ ዕዮ ክለቅቕ እየ፡" ኢሉ።

    እንተዀነ፡ ሓድሽ መራሒ ኣብ መስከረም ባይቶ ዳግማይ ስራሕ ቅድሚ ምጅማሩ ምእንቲ ክምረጽ፡ እቲ ሰልፊ ካብ 9 ሓምለ ጀሚሩ ክሳዕ እቲ ናይ ክረምቲ ዕረፍቲ ዝዛዘም ናይ ግዜ ሰሌዳ ክሰርዕ ሓቲቱ ኣሎ።

    ክሳዕ እቲ እዋን'ቲ ድማ ከም ቀዳማይ ምኒስተር ኰይኑ ስራሑ ክቕጽል እዩ።

    ኪር ስታርመር ንዝቕጽል ቀዳማይ ምኒስተር ኵሉ ዝከኣሎ ደገፍ ብምሃብ፡ ስልጣን ብሰላማዊ መንገዲ ክሰጋገር ከም ዝገብር ቃል ኣትዩ።

    እታ ዝስዕቦ ቀዳማይ ምኒስተር ዝርከባ ዓባይ ብሪጣንያ፡ካብታ ቅድሚ ክልተ ዓመት ዝነበረት ዝያዳ ዝሓሸትን ፍትሓዊትን ሃገር ከም ዝዀነት ኣመልኪቱ።

    ኪርስታርመር፡ ንሽዱሽተ ዓመታት ብቕርበት ምስኡን ዝሰርሑ ፈተውቱን መሳርሕቱን፡ከምኡ'ውን ንሰራሕተኛታት ቤትጽሕፈት ቍጽሪ 10 ዶውኒንግ ስትሪትን ስቪል ሰርቪስን ምስጋና ኣቕሪቡ።

    ነቲ ኣብታ ሃገር ዘሎ ዝዓበየ ሓላፍነት ንምግዳፍ ድሕሪ ምውሳኑ፡ ነቲ ዝዓበየ ስራሕ ዝበሎ ሓዳሩን ስድራቤቱን ክከናኸን ዝያዳ ግዜ ክህብ ምዃኑ ክገልጽ ከሎ ስምዒቱ ክቈጻጸር ኣይከኣለን፤ "ንብዓልቲ ቤተይ ቪክን ንደቀይን ዝሓሸ ብዓል ሓዳርን ኣቦን ክኸውን እየ፡" ድሕሪ ምባል፡ ንብዓልቲ ቤቱ ሓቚፉ ናብ ውሽጢ ቤት ጽሕፈቱ ተመሊሱ።

    

    ምንጪ ስእሊ, Reuters

12. 22 ሰነ 2026ቀዳማይ ምኒስተር ብሪጣንያ ኪር ስታርመር ስልጣኑ ክለቅቕ ምዃኑ ኣፍሊጡ

    ቀዳማይ ሚኒስተር ብሪጣንያን መራሒ ሰልፊ ዕዮን ኪር ስታርመር፡ ካብ መዝነቱ ክለቅቕ ምዃኑ ሎሚ ንግሆ ኣብ ዘውጽኦ ሃንደበታዊ መግለጺ ኣፍሊጡ። ስታርመር ነዚ ናይ ስልጣን ምልቃቕ ውሳነኡ ንንጉስ ቻርለስ ብኣካል ከም ዘፍለጦ ሓቢሩ ኣሎ።

    ስታርመር ኣብ ኣፍደገ ቤት ጽሕፈቱ - ዳውኒን ስትሪት ቍጽሪ 10 - ኰይኑ ኣብ ዝሃቦ መግለጺ፡ ሰልፉ ናብቲ ዝመጽእ ሓፈሻዊ ምርጫ ንኽመርሕ ንሱ ዝበለጸ ሰብ ድዩ ኣይኰነን ዝብል ሕቶ ብሰልፉ ከም ዝተላዕለ ብምሕባር፡ “ነቲ ሰልፈይ ዝሃቦ መልሲ ሰሚዐዮ ኣለኹ፣ ብጸጋ ድማ እቕበሎ፡” ኢሉ።

    ወሲኹ፡ “ዝወሰድኩዎ ነፍሲ-ወከፍ ውሳነ፡ ነታ ዝፈትዋ ሃገረይ ቀዳምነት ኣብ ምሃብ ዝተሰረተ እዩ፤ ስለዚ ካብ መሪሕነት ሰልፊ ዕዮ ክለቅቕ እየ፡” ክብል ውሳነኡ ብወግዒ ኣፍሊጡ።

    

    ምንጪ ስእሊ, PA Media

13. 22 ሰነ 2026ስታርመር መጻኢ ፖለቲካዊ ህይወቱ ዝግምግመሉ፡ በርንሃም ድማ ናብ ዌስት ምኒስተር የምርሕ ኣሎ

    ሰር ኬር ስታርመር፡ ሎሚ ንግሆ ወይ ድሕሪኡ ብቕልጡፍ፡ ካብ ዳውኒንግ ስትሪት ዝወርደሉ ገደብ ግዜ ከፍልጥ ይኽእል እዩ።

    ዝሓለፈ ሰሙን ኣንዲ በርንሃም ኣብ መረጻ መከርፊልድ ምስ ዓወተ፡ እቲ ቀዳማይ ምኒስተር ካብ ስልጣኑ ክወርድ ጸቕጥታት እናበዝሖ መጺኡ ኣሎ።

    ብምልኡ እዚ ቅንያት፡ ሓያሎ ፖለቲከኛታትን ኣባላት ሰልፊ ዕዮን እቲ ቀዳማይ ምኒስተር ብዛዕባ መጻኢ ህይወቱ ክሓስብ በይኑ ገዲፎሞ።

    ሎሚ እዚ ስቕታ ከብቅዕ ተኽእሎ ኣሎ፤ ምኽንያቱ ላዕለዎት ሰበ-ስልጣን መንግስቲ፡ ስታርመር ስልጣኑ ክለቅቕን ንተካኢኡ ስልጣን ዘረክበሉ መደብ ከም ከፍልጥን ይጽበዩ ኣለዉ።

    እቲ መደብ ሰሙናት ወይ ኣዋርሕ ክወስድ ዝኽእል እንተዀይኑ ዛጊት ኣይተፈልጠን።

    ውድድር ንመራሕነት ክህሉ ዝከኣል እኳ እንተዀነ፡ ከይተወዳደረ ስልጣን ምሓዝ ዝያዳ ተኽእሎ ዘለዎ ይመስል - በርንሃም ድማ እቲ ቀዳማይ ተረባሒ ክኸውን እዩ።

    ንሱ ሎሚ ድሕሪ ቀትሪ ኣብ ቤትምኽሪ ኮመንስ ከም ኣባል ፓርላማ ቃለማሕላ ክገብር ተመዲቡ ኣሎ።

    እንግሊዝ ሓድሽ ቀዳማይ ምኒስተር እንተ ረኺባ - ኣብ ውሽጢ ኣርባዕተ ዓመት ሓምሻይ ግዜ - ሓድሽ ካቢነ ክምዘዝን ሓድሽ መደብ ስራሕ ወይ ፖሊሲ ክውጠን እዩ።

    ተቓወምቲ ሰልፍታት ድማ እቲ ተካኢ ስታርመር ስልጣን ወይ ውክልና ኣለዎ ድዩ ኢሎም ክሓቱ ተኽእሎ ኣሎ።

    

    ምንጪ ስእሊ, Getty / PA Media

14. 22 ሰነ 2026ክሪስ ሜሰን፡ ኵለን ኣዕይንቲ ናብ ቀዳማይ ምኒስተር ይጥምታ፡ እንታይ ክብል እዩ?

    ኣብ ውሽጢ ኣርባዕተ ዓመት ንሳልሳይ ግዜ፡ ቀዳማይ ምኒስተር ካብ ስልጣኑ ንኽወርድ መደቡ ዘፍልጠሉ ኵነታት ኣጋጢሙ ኣሎ።

    እዚ ዝኸውን ዘሎ ድማ ኣብ ሓፈሻዊ መረጻ ተሳዒሩ ዘይኰነስ፡ እቲ ንሱ ዝመርሖ ሰልፊ ብዘይ ብኣኡ ‘ይሓይሽ እዩ’ ስለ ዝበለ እዩ።

    ሓያሎ ሰባት ኣብ ውሽጢ መንግስትን ኣብ ዝበዝሐ ኣባል ሰልፊ ዕዮን ከምዚ ዓይነት መግለጺ ክህብ ይጽበዩ ኣለዉ፣ ምናልባት ከኣ ሎሚ ክፍጸም ይኽእል እዩ።

    ቅድሚ ኣርባዕተ ዓመት፡ ሰለስተ ቀዳሞት ምኒስተራት ቀዲሞም ክሳብ ዝመጽኡ፡ ቦሪስ ጆንሰን ነታ ሃገር ይመርሕ ነይሩ። ንሱ ክቕጽል ከም ዝደሊ ብትሪ ይዛረብ እኳ እንተ ነበረ፡ ክመርሕ ዘኽእሎ ዓቕሚ እናተዳኸመ ምስ ከደ ግን እቲ ንያቱ እናተባሕጐገ ከይዱ።

    ኣብ መጀመርታ ሓምለ 2022፡ ኣብ ዳውኒን ስትሪት ኰይኑ መደረ ከስምዕ ከሎ ኣብኡ ነይረ። ጆንሰን ቅድሚ ገለ ዓመታት ዓቢ ዓወት ረኺቡ እኳ እንተ ነበረ፡ እቶም ናይ ባዕሉ ኣባላት ባይቶ ግን ዓቕሎም ከም ዝወድኡ ስለ ዝገለጹ፡ ብዘይ ድልየቱ ካብ ስልጣኑ ክወርድ ወሲኑ።

    ድሕሪ ሰለስተ ወርሒ፡ ዳግማይ ኣብቲ ጐደና ነይረ። እዚ ግዜ’ዚ ድማ ሊዝ ትራስ ካብ ሰልፋ ሓገዝ ስለ ዘይረኸበት ካብ ስልጣን ትወርድ ከም ዘላ ኣፍሊጣ።

    ሕጂ ከኣ ቀጺልና ኣብዚ በጺሕና ኣለና። ነቲ ሓፈሻዊ መረጻ ተዓዊቱ ካብ ሪሺ ሱናክ ስልጣን ካብ ዝርከብ ድሕሪ ክልተ ዓመት ኣብ ዘይመልእ ግዜ፡ ሰር ኪር ስታርመር ስልጣኑ ክሓድግ ኣብ ዝኽእለሉ ኵነታት በጺሑ ኣሎ።

15. 21 ሰነ 2026እስራኤልን ሕዝቦላህን ተዅሲ ከቋርጹ ከም ዝተሰማምዑ ኣመሪካ ገሊጻ, ተወሳኺ መጥቃዕትታት ኣብ ሊባኖስ ቀጺሉ

    

    ምንጪ ስእሊ, Reuters

    ኣብ ደቡባዊ ሊባኖስ 47 ሰባት ዝቐተለ ብርቱዕ መጥቃዕቲ ኣየር እስራኤል ድሕሪ ምክያዱ፡ እስራኤልን ሕዝቦላህን ኣብ ምቍራጽ ተዅሲ ከም ዝተሰማምዑ ሓደ ላዕለዋይ ብዓል ስልጣን ኣመሪካ ገሊጹ።

    እዚ ናይ መወዳእታ ስምምዕ ዝተገብረ፡ እቲ ሕዝቦላህ ኣርባዕተ ወተሃደራት እስራኤል ዝቐተለሉ ውግእ፡ ነቲ ኣብ መንጎ ኣመሪካን ኢራንን ዘሎ ውግእ ንምብቃዕ ዝተገብረ ስምምዕ ከይዓናቕፎ ካብ ዝነበረ ስግኣት ስዒቡ እዩ።

    ሓይልታት እስራኤል እቲ ምቍራጽ ተዅሲ ኣብ ግብሪ ምውዓሉ እኳ እንተ ኣረጋገጹ፡ ጸኒሑ ግን ሓደ ወሃቢ ቃል፡ ሓይሊታቶም "ነቲ ብቕጽበት ዘንጸላሉ ስግኣት ምእላይ ክትቅጽል እያ፡" ኢሉ።

    ሕዝቦላህ ነቲ ምቍራጽ ተዅሲ ዛጊት ብወግዒ ባዕሉ እኳ እንተ ዘይኣረጋገጸ፡ ዋና ጸሓፊ እቲ ጕጅለ ሸኽ ናይም ቃሰም ግን፡ "ነቲ ሕዝቦላህ ንምድምሳስ ዝተሓንጸጸ መደብ ፈሺሉ እዩ፡" ኢሉ።

    ሙሉእ ዛንታ ንምንባብ ነዚ ዝስዕብ መላግቦ ጠውቝ፡

    እስራኤልን ሕዝቦላህን ተዅሲ ከቋርጹ ከም ዝተሰማምዑ ኣመሪካ ገሊጻ፡ ተወሳኺ መጥቃዕትታት ኣብ ሊባኖስ ቀጺሉ - BBC News ትግርኛ

16. 21 ሰነ 2026ቓዛ፡ መጥቃዕቲ እስራኤል ካሜራማን ኣልጀዚራ ዝርከቦም ሽዱሽተ ሰባት ቀቲሉ

    

    ምንጪ ስእሊ, Saeed M. M. T. Jaras/Anadolu via Getty Images

    እስራኤል ኣብ ቓዛ ዘካየደቶ መጥቃዕቲ፡ ​​ሓደ ካሜራማን ኣልጀዚራን ሓደ ቆልዓን ዝርከብዎም ብውሕዱ ሽዱሽተ ሰባት ከምዝሞቱ ሰብመዚ ጥዕናን ገበርቲ ሰናይን ገሊጾም።

    ኣልጀዚራ፡ ነቲ ብቐዳም ኣብ ማእከላይ ዞባ ቓዛ ኣብ ዝርከብ መንበሪ ገዛ ኣብ ዝተፈጸመ መጥቃዕቲ ዝተቐትለ ወኪሉ ኣሕመድ ዊሻህ፡ "ጽዩፍ ገበንን ዒላማ ዝገበረ መቕተልትን" ከምዝኹንኖ ገሊጹ።

    ሓይልታት ምክልኻል እስራኤል ግን፡ ዊሻህ "ኣብ ወተሃደራዊ ክንፊ ሓማስ ከም ስናይፐር ኦፕሬቲቭ ኮይኑ ዘገልገለ ግብረሽበራዊ" እዩ ክብል ከሲሱ።

    ኣሃዛቱ ውድብ ሕቡራት ሃገራት ዝኣምነሉ፡ ሚኒስትሪ ጥዕና ጋዛ፡ ኣብ ዝሓለፈ ወርሒ ጥቅምቲ ኣብ መንጎ እስራኤልን ሓማስን ተኹሲ ደው ምባል ስምምዕ ካብ ዝግበር ንደሓር፡ ሰራዊት እስራኤል 1007 ሰባት ከም ዝቐተለ ይገልጽ።

    ኣብቲ ኣብ መዓስከር ስደተኛታት ቡሬይጅ ዝርከብ ገዛ ኣብ ዝተፈጸመ መጥቃዕቲ ካልኦት ክልተ ሰባት ምስ ዊሻህ ከምዝተቐትሉ ኣብቲ ከባቢ ዝርከብ ሆስፒታልን ኣብ ህይወት ኣድሕን ዝነጥፍ ከባብያዊ ትካልን ሓቢሮም።

    ሰራዊት ምክልኻል እስራኤል፡ ነቶም ካልኦት ክልተ ዝተቐትሉ’ውን፡ ኣባላት ሓማስ እዮም ክብል ከሲሱ።

17. 21 ሰነ 2026ልዝብ ኣመሪካን ኢራንን ኣብ ስዊዘርላንድ ኣብ ዝጅመረሉ እዋን፡ ቴህራን መጻብቦ ሆርሙዝ ትዓጹ

    

    ምንጪ ስእሊ, Reuters

    ወተሃደራዊ ሓይሊ ኢራን፡ ብሰንኪ እስራኤል ኣብ ልዕሊ ደቡባዊ ሊባኖስ ዘካየደቶ መጥቃዕቲ መጻብቦ ሆርሙዝ ዳግማይ ዓጽየዮ’ኳ እንተበለት፡ ቀጥታዊ ዝርርብ ኣመሪካን ኢራንን ኣብ ስዊዘርላንድ ክጅምር ምዃኑ ተፈሊጡ።

    ኢራን ብተወሳኺ ነቲ ኲናት ንምቁራጽ ምስ ኣመሪካ ዝገበረቶ ስምምዕ ምጉዳል፡ ከም ምኽንያት ምዕጻው ጠቒሳ። ይኹን'ምበር ሰራዊት ኣመሪካ ኣብቲ መጻብቦ "ትራፊክ ይውሕዝ ኣሎ" ክብል ገሊጹ'ሎ።

    ምክትል ፕረዚደንት ኣመሪካ ጄዲ ቫንስ ትማሊ ቀዳም ንግሆ ናብ ስዊዘርላንድ ኣትዮም። እቲ ሓድሽ ዙር ድርድር ድሒሩ ክጅምር ትጽቢት ይግበር።

    ኣፈ ጉባኤ ፓርላማ መሓመድ ባገር ጋሊባፍን ሚኒስተር ጉዳያት ወጻኢ ኣባስ ኣራግቺን ዝርከብዎም ልኡኽ ኢራን ትማሊ ሰንበት ኣጋምሸት ኣትዮም።

    ኣብቲ ዝርርብ ሰበስልጣን ኣመሪካን ኢራንን ቀዳማይ ሚኒስተር ፓኪስታን ሸህባዝ ሸሪፍን ሓላፊ ምክልኻል ሰራዊት እታ ሃገር ፊልድ ማርሻል ኣሲም ሙኒርን ክጽንበሩ እዮም።

    ፓኪስታን ኣብ ምሉእ እቲ ኲናት ከም መንጎኛ ኮይና ክትሰርሕ ዝፀንሐት ኰይና፡ ቅድሚ ሕጂ ኣብ መንጎ ኣመሪካን ኢራንን ዝተኻየደ ዙርያ ድርድር ኣአንጊዳ'ያ።

    ቫንስ "ኣብ ጉዳይ ኒዩክለር" ከምኡ'ውን ኣብ "ጉዳይ ተኹሲ ደው ምባል ኣብ ሊባኖስ" ምዕባለታት ከምፅእ ተስፋ ከምዘለዎ ገሊጹ።

18. 18 ሰነ 2026እቲ ስምምዕ 'መልእኽቲ ሓያል ኢራን እዩ- ፕረዚደንት ፐዘሽኪያኒ

    

    ምንጪ ስእሊ, IRNA images

    ኣብ መንጐ ኣመሪካን ኢራንን ዝተበጽሐ ስምምዕ ዓቢ ዓወት ምዃኑ ፕረዚደንት ዶናልድ ትራምፕ ገሊጹ።

    እቲ ሎሚ ብመራሕቲ ክልቲአን ሃገራት ዝተፈረመ ስምምዕ ን60 መዓልታት ምቊራጽ ተጻብኦታት ደው ብምባል ንዝተረፈ ጉዳያት ብልዝብ ምፍታሕ ዘጠቓለለ እዩ።

    ኣብ ሊባኖስ ዘሎ ተጻብኦታት እስራኤልን ሕዝቦላህን'ውን ኣካል ናይቲ ምቊራጽ ተዂሲ እዩ። እንተኾነ፡ እቶም ተጻባእቲ ወገናት ነቲ ስምምዕ ኣይፈረምሉን።

    እቲ 14 ነጥብታት ዝሓዘ ስምምዕ "ህጹጽን ቀዋሚን ምቊራጽ ወተሃደራዊ ስርሒታት"፡ ኢራን ኑክሌራዊ ኣጽዋር ከይተማዕብል፡ ከምኡ'ውን መጻብቦ ሆርሙዝ ክኽፈት ዝብል ይርከቦ።

    መራሒ ኢራን ብዛዕባ'ቲ ስምምዕ ኣብ ዝሃቦ መብርሂ "መልእኽቲ ሓያል ኢራን" እዩ ክብል ገሊጹዎ ኣሎ።

    "እስላማዊት ሪፓብሊክ ኢራን ክብራን ናጽነታን እናሓለወት ኩሉ ሳዕ ንዓለማዊ ሰላም ጽኑዕ ቆራጽት ዘለዋ'ያ" ክብል ፕረዚደንት ማሱድ ፐዘሽኪያኒ ኣብ ኤክስ ጽሒፉ።

    እንተኾነ፡ ገለ ኣኽረርቲ ስርዓት ኢራን በቲ ስምምዕ ከምዘይተሓጐሱ'ዩ ዝግለጽ ዘሎ። ንወላዲኡ ተኪኡ ናብ ስልጣን ዝመጸ ኣያቶላህ ሞጅታባ ኻመኒ ዛጊት ብዛዕባ'ቲ ስምምዕ ዝሃቦ ወግዓዊ ርእይቶ የለን።

    ኣብ ዋሽንግተን'ውን ትራምፕ ካብ ኣባላት እቲ ንሱ ዝመርሖ ገዛኢ ሰልፊ ሪፓብሊካን ይዅን ካልኦት ወገናት ተቓውሞታት ገጢምዎ ኣሎ። እቲ ስምምዕ ዝያዳ ንኢራን ዘርብሕ'ዩ ብምባል'ዮም ዝነቕፍዎ ዘለዉ።

    ትራምፕ ግን "ዓያሹ" ክብል'ዩ ዝገልጾም ዘሎ።

    "ዕዳጋታት ስቶክ ዓሪጐም ክብረወሰን እናመዝገቡ፡ ዋጋታት ነዳዲ ንታሕቲ እናኣንቆልቍለ፡ እዞም ኣብ ልዕሊ ኢራን ኣይተረርኩን ኢሎም ዝሓስቡ ዘለዉ ዓያሹ፡ ወይ ቀናኣትን ክፉኣትን ሰባት እዮም ወይ ድማ ሕማቓት እዮም" ብምባል ምላሽ ሂቡ።

    እስራኤል'ውን ብወገና በቲ ስምምዕ ባህ ከምዘይበላ'ያ ትገልጽ ዘሎ።

    ቀዳማይ ሚኒስተር በንጃሚን ነታንያሁ ገና ብዛዕባ'ቲ ዝተፈረመ ስምምዕ ዝሃቦ መብርሂ የለን። ብሰኑይ ግን ኣብ መንጐኡን ትራምፕን "ዘይምስምማዕ" ከምዝተፈጥረ ጠቒሱ ነይሩ።

    "ኣብ ዝተፈላለየ ልዝባትና ርእይቶይ ሂበ እየ" ዝበለ ነታንያሁ፡ "ብዙሕ ሳዕ ንሰማማዕ፡ ብዙሕ ሳዕ ከኣ ኣይንሰማማዕን። እዚ ኣብቲ ዝበለጸ ዝበሃል ስድራቤታት'ውን ዘጋጥም'ዩ" ኢሉ።

    ድሮ ካብ የማናውያን ወገናት ናይቲ ንሱ ዝመርሖ ልፍንታዊ መንግስቲ፡ እስራኤል በቲ ስምምዕ ክትቅየድ ከምዘይብላ ክጽውዑ ጀሚሮም ኣለዉ።

19. 16 ሰነ 2026ሶማሊላንድ ኣብ እስራኤል ኤምባሲ ከፊታ

    

    ምንጪ ስእሊ, Prime Minister of Israel's Office

    ናጽነታ ባዕላ ዝኣወጀት ሶማሊላንድ ኣብታ ኣፍልጦ ዝሃበታ እንኮ ሃገረ እስራኤል ፈላሚ ኤምባሲ ከፊታ።

    ኣብቲ ሎሚ ኣብ እዮርሳሌም ዝተፈጸመ ስነስርዓት ኣብታ ሃገር ምብጻሕ ዘካይድ ዘሎ ፕረዚደንት ሶማሊላንድ ዓብዲራሕማን መሓመድ ዓብዱላሂ (ዒሮ) ተረኺቡ ነይሩ።

    እስራኤል፡ ኣብ ዝሓለፈ ወርሒ ታሕሳስ ከም ናጻን ልኡላዊትን ሃገር ኣፍልጦ ከምዝሃበታ ይዝከር።

    ንስጉምቲ እስራኤል ብትሪ ዝተቓወመት ሞቓድሾ ሶማሊላንድ ዘይትቚረስ ኣካል ዓባይ ሶማልያ ምዃና'ያ ትኣምን።

    ቻይና፡ ሕብረት ኣፍሪቃ፡ ቱርኪ፡ ስዑዲ ዓረብን ኤርትራን ዝርከብዎም ወገናት ነቲ ኣፍልጦ ምንቃፎም ይዝከር።

    ኮሚሽን ሕብረት ኣፍሪቃ፡ ንሶማሊላንድ ዝወሃብ ዝዀነ ይዅን ኣፍልጦ ብምንጻግ ንሓድነትን ልኡላውነትን ሶማልያ ንምኽባር ዘለዎ መርገጺ ኣነጺሩ ነይሩ።

    ዒሮ ምስ ቀዳማይ ሚኒስተር በንጃሚን ነታንያሁ ዝርከቦም ላዕለዎት ሰበስልጣን እስራኤል ብምርኻብ ኣብ መንጐ ክልቲአን ሃገራት ብዛዕባ ዝህሉ ምትሕግጋዝ ክላዘብ ቀንዩ።

    እቲ ኤምባሲ ኣብ እዮርሳሌም ምኽፋቱ'ውን ተባዕ ስጉምቲ ምዃኑ ነታንያሁ ንኢዱ። ዝበዝሓ ሃገራት ዓለም ኣብ ክንዲ ኣብታ ኣሰሓሓቢት ከተማ እዮርሳሌም፡ ኤምባሲታተን ኣብ ቴል ኣቪቭ እየን ዝኸፍታ።

    ፕረዚደንት ኣመሪካ ዶናልድ ትራምፕ ንእስራኤል ዘለዎ ደገፍ ንምግላጽ፡ ኣብ 2018 ነቲ ኣብ ቴል ኣቪቭ ዝነበረ ኤምባሲ ናብ እዮርሳሌም ምግዓዙ ካብ ደገፍቲ ፍልስጤም ዝኾኑ ወገናት ዓቢ ተቓውሞ ገጢምዎ ነይሩ።

    ጓቲማላ፡ ሆንዱራስ፡ ኮሶቮ፡ ፓፗ ኒው ጊኒ፡ ፓራጓይን ፊጂን'ውን ኤምባሲታተን ናብ እዮርሳሌም ዘግዓዛ ወይ ዝኸፈታ ሃገራት እየን።

20. 16 ሰነ 2026ኣብ ፖላንድ ተቐቲሉ ዝተረኽበ ሩስያዊ ነቓፊ ፑቲን

    

    ምንጪ ስእሊ, Facebook/Semyon Skrepetsky

    ሓደ ሩስያዊ ስነጥበባዊ ኣብ ፖላንድ ተቐቲሉ ተረኺቡ።

    እቲ ንብላድሚር ፑቲን ብምንቃፍ ዝፍለጥ ወዲ 44 ዓመት ሮበርት ከይ ብሰኑይ ንጉሆ'ዩ ኣብ ከተማ ቢያላ ፖድላስካ ብጥይት ተቐቲሉ ጸኒሑ።

    ኣኽበርቲ ሕጊ ከምዝበልዎ፡ እቲ 'ሰምዮን ስክረፐትስኪ' ተባሂሉ ዝፍለጥ ሩስያዊ ኣብ ከባቢ ቆንስል ቤላሩስ'ዩ ብሓሙሽተ ጥይት ተሃሪሙ።

    ምስቲ ቅትለት ብዝተኣሳሰር ክልተ ዜጋታት ቤላሩስ ኣብ ቀይዲ ከምዘእተዉ ፖሊሲ ሓቢሩ'ሎ።

    ማዕከናት ዜና እታ ሃገር ከምዝሓበርኦ፡ እቲ ስነጥበባዊ ኣብ 2021 እዩ ናብታ ኣብ ጥቓ ዶብ ቤላሩስ እትርከብ ከተማ ግዒዙ።

    ሓደ ዘይተፈልጠ ሰብ ሃንደበት ናብቲ ዝነበሮ መዓሸጊ መካይን ብምምጻእ ክልተ ጥይት ተኲሱ ምስ ኣውደቖ፡ ደጊሙ ሰለስተ ጥይት ከምዝተኮሰሉ ሓበሬታ ኣኽበርቲ ሕጊ ይጠቅስ።

    ስክረፐትስኪ ኣሉታዊ ምስሊ ፑቲን፡ መራሒ ቤላሩስ ኣለክሳንደር ሉካሸንኮን ጆሰፍ ስታሊንን ዝበሉ ፖለቲከኛታት ብምቕራጽ ኣብ ተቓውሞታት ክሳተፍ ዝጸንሐ ምዃኑ ይፍለጥ።