గుజరాత్ అల్లర్ల గ్యాంగ్ రేప్ కేసులో ఇద్దరు దోషులకు బెయిల్.. ‘గుండె పగిలింది’ అన్న బాధిత మహిళ

ఫొటో సోర్స్, ANI
- రచయిత, గీతా పాండే
- హోదా, ఉమన్&సోషల్ ఎఫైర్స్ ఎడిటర్, ఇండియా
- ప్రచురణ
- చదివే సమయం: 5 నిమిషాలు
(ఈ కథనంలోని అంశాలు కలిచివేయవచ్చు)
"2002 గుజరాత్ అల్లర్ల సమయంలో గర్భవతిగా ఉన్న ఓ ముస్లిం మహిళపై సామూహిక అత్యాచారం జరిగింది. ఈ అల్లర్లలో14 మంది కుటుంబ సభ్యులు హత్యకు గురవడాన్ని ఆమె కళ్లారా చూశారు. అయితే, తనపై అత్యాచారానికి పాల్పడిన దోషుల్లో ఇద్దరికి ఇటీవల బెయిల్ మంజూరు కావడంపై ఆమె తీవ్ర 'బాధను, దిగ్భ్రాంతిని, అపనమ్మకాన్ని వ్యక్తం చేశారు.
సుప్రీంకోర్టు ఆదేశాల గురించి మీడియా కథనాల ద్వారానే తెలుసుకున్నానని, ఈ నిర్ణయంపై న్యాయపోరాటం కొనసాగిస్తానని బిల్కిస్ బానో ఒక ప్రకటనలో తెలిపారు.
బిల్కిస్ బానోపై దాడికి పాల్పడిన హిందూ మూకకు చెందిన 11 మంది దోషుల్లో తాజాగా బెయిల్ పొందిన ఈ ఇద్దరు కూడా ఉన్నారు. వీరందరికీ జీవిత ఖైదు విధించారు.
గుజరాత్ ప్రభుత్వం 2022లో ఇచ్చిన ఉత్తర్వుల మేరకు ఈ 11 మంది దోషులూ జైలు నుంచి విడుదలయ్యారు. వారు జైలు నుంచి బ యటకు వచ్చినప్పుడు జరుపుకున్న సంబరాలతో పాటు గుజరాత్ ప్రభుత్వ నిర్ణయంపై ప్రపంచవ్యాప్తంగా తీవ్ర నిరసనలు వ్యక్తమయ్యాయి. అయితే 2024లో సుప్రీంకోర్టు ఆ విడుదల ఉత్తర్వులను రద్దు చేసింది.

బాంబే హైకోర్టు 2017 నాటి తీర్పును సవాలు చేస్తూ వారు దాఖలు చేసిన పిటిషన్పై ప్రస్తుతం విచారణ జరుగుతుండగానే, అక్టోబర్ 28న సుప్రీంకోర్టు మూడు పేజీల సంక్షిప్త ఉత్తర్వులు జారీ చేస్తూ.. బిపిన్చంద్ కన్హయ్యాలాల్ జోషి, ప్రదీప్ రమణ్లాల్ మోధియాలకు బెయిల్ మంజూరు చేయడంతో పాటు వారి శిక్షలను నిలిపివేసింది.
ఈ ఇద్దరు దోషులు ‘‘17 ఏళ్లకు పైగా జైలు శిక్ష అనుభవించారని’’ వారిలో ‘‘ఒకరికి తీవ్ర వైకల్యం’’ ఉందంటూ న్యాయమూర్తులు బెయిల్ మంజూరుకు గల కారణాలనువివరించారు.
జోషి, మోధియాల విడుదల వార్త ‘బిల్కిస్ను తీవ్రంగా కలచివేసిందని’ మంగళవారం బిల్కిస్ బానో తరఫు న్యాయవాది శోభా గుప్తా బీబీసీతో చెప్పారు.
"న్యాయం కోసం ఆమె మళ్లీ పోరాటం మొదలుపెట్టాల్సి వస్తోంది. ఈ కేసు సుప్రీంకోర్టు ముందుకు వస్తోందనే సమాచారం ఆమెకు లేదు. ఇలాంటి ఘటన జరిగిన ప్రతిసారీ న్యాయవ్యవస్థపై ఆమెకు ఉన్న నమ్మకంపై ప్రభావం పడుతుందేమోనని ఆందోళన చెందుతున్నాం" అని ఆమె అన్నారు.

ఫొటో సోర్స్, Getty Images
దోషులను ఎందుకు విడుదల చేస్తున్నారో అర్థం కావడం లేదని గుప్తా అన్నారు. " ఇది సాధారణ క్రిమినల్ కేసు కాదు. ప్రపంచం మొత్తాన్ని, యావత్ మానవాళి మనస్సాక్షిని కలచివేసిన ఘటనకు సంబంధించిన కేసు" అని గుప్తా చెప్పారు.
గోద్రా పట్టణంలో ఓ ప్రయాణికుల రైలులో జరిగిన అగ్నిప్రమాదంలో 60 మంది హిందూ యాత్రికులు మరణించిన తర్వాత గుజరాత్ అల్లర్లు ప్రారంభమయ్యాయి. ఈ అల్లర్ల సమయంలో బిల్కిస్ బానో, ఆమె కుటుంబంపై జరిగిన దాడి భయంకరమైన నేర ఘటనల్లో ఒకటి.
రైలులో మంటలు చెలరేగడానికి ముస్లీంలే కారణమని ఆరోపిస్తూ హిందూ మూకలు ముస్లింలు నివసించే ప్రాంతాలపై దాడులకు దిగాయి. ఈ అల్లర్లు మూడు రోజుల పాటు కొనసాగాయి. వీటిలో 1,000 మందికి పైగా మరణించారు. చనిపోయిన వారిలో ఎక్కువ మంది ముస్లీంలే
అల్లరిమూకలు బానో గ్రామంపై దాడి చేసి, ముస్లీంల ఇళ్లకు నిప్పంటించడంతో ఆమె తన 16 మంది బంధువులతో కలిసి ప్రాణాలు కాపాడుకోవడానికి అక్కడి నుంచి పారిపోయారు. అప్పటికి ఆమె వయసు 19 ఏళ్లు. ఆమెకు మూడేళ్ల కుమార్తె ఉండగా, రెండో బిడ్డను కడుపులో మోస్తున్నారు.
2002 మార్చి 3వ తేదీ ఉదయం కత్తులు, కర్రలు పట్టుకున్న కొందరు వ్యక్తులు వారిపై దాడి చేశారు. ఈ విషయాన్ని 2017లో ఆమె నాకు చెప్పారు. తన మూడేళ్ల కుమార్తెను ఒడిలో నుంచి లాక్కుని చంపేశారని ఆమె తెలిపారు.
బానోపై దాడి చేసినవారు ఆమె పొరుగువారే. ఆమె పెరుగుతున్న సమయంలో దాదాపు ప్రతిరోజూ చూసిన వ్యక్తులే. వారు ఆమె దుస్తులను చింపేశారు. కనికరించాలని ఆమె వేడుకుంటున్నా పట్టించుకోకుండా పలువురు ఆమెపై అత్యాచారానికి పాల్పడ్డారు.
రెండు రోజుల క్రితమే బిడ్డకు జన్మనిచ్చిన ఆమె కజిన్పై కూడా అత్యాచారం చేసి హత్య చేశారు. ఆమె నవజాత శిశువును కూడా చంపేశారు.
బానో స్పృహ కోల్పోవడంతో, ఆమె చనిపోయిందని భావించిన దాడి చేసినవారు అక్కడి నుంచి వెళ్లిపోయారు. దీంతో ఆమె ప్రాణాలతో బయటపడ్డారు. ఈ ఊచకోతలో ఇంకా ప్రాణాలతో మిగిలినది ఏడేళ్లు, నాలుగేళ్ల వయసున్న ఇద్దరు బాలురు మాత్రమే

ఫొటో సోర్స్, Getty Images
న్యాయం కోసం బిల్కిస్ బానో చేసిన పోరాటం సుదీర్ఘమైనది.
ఎన్నో కష్టాలు, భయానక అనుభవాలతో కూడుకున్నది.
సుప్రీంకోర్టు కేంద్ర దర్యాప్తు సంస్థలను రంగంలోకి దించి, ఆమె కేసును ముంబయికి బదిలీ చేసిన తర్వాతే 2004లో నిందితులను తొలిసారిగా అరెస్టు చేశారు. గుజరాత్లోని కోర్టులు ఆమెకు న్యాయం చేయలేవని సుప్రీంకోర్టు అప్పట్లో పేర్కొంది.
బానో సోమవారం రాత్రి విడుదల చేసిన ప్రకటనలో "బాధ, దిగ్భ్రాంతి, అపనమ్మకంతో కన్నీళ్లు వస్తున్నాయి" అని చెప్పారు.
"రెండోసారి కూడా నన్ను పిలిచి, నా వాదన వినకుండానే సుప్రీంకోర్టు ఒక ఉత్తర్వు జారీ చేసిందంటే ఇప్పటికీ నమ్మలేకపోతున్నా" అని ఆమె అన్నారు.
"24 ఏళ్లుగా న్యాయం కోసం మళ్లీ మళ్లీ పోరాడుతూనే ఉన్నా. అయినప్పటికీ ఈ రోజు నేను ఎంతో కష్టపడి సాధించుకున్న న్యాయాన్ని మళ్లీ కోల్పోయే పరిస్థితి ఎదురైంది. మరోసారి న్యాయవ్యవస్థపై నమ్మకం కోల్పోతానేమోనని భయంగా ఉంది" అని ఆమె ఆవేదన వ్యక్తం చేశారు.
"నా పిల్లల కోసం ఈ ఉత్తర్వుపై పోరాటం చేస్తా. జీవితాంతం భయాలు, గాయాల జ్ఞాపకాలతో బతకాల్సిన పరిస్థితి వారికి రాకూడదు" అని బానో ప్రతిజ్ఞ చేశారు.
"బతికి ఉండాల్సిన నా మూడేళ్ల కుమార్తె సలేహా కోసం, ఆమె జ్ఞాపకానికి న్యాయం జరగాలనే ఈ పోరాటం చేస్తున్నా. ప్రపంచంలోని మహిళలందరి కోసం కూడా పోరాడుతున్నా. ఎందుకంటే ఏ మహిళ, ఏ బాధితురాలు, ఏ పౌరురాలు అయినా జీవితాంతం తమ అస్తిత్వాన్ని, సమానత్వపు హక్కును నిరూపించుకోవాల్సిన పరీక్షను ఎదుర్కోవాల్సిన అవసరం లేదు. జీవితాంతం న్యాయం కోసం పోరాడాల్సిన పరిస్థితి ఎవరికీ రాకూడదు" అని ఆమె పేర్కొన్నారు.
అల్లర్లు జరిగిన సమయంలో నరేంద్ర మోదీ గుజరాత్ ముఖ్యమంత్రిగా ఉన్నారు. ఆ హింసాకాండను అడ్డుకోవడానికి ఆయన తగిన చర్యలు తీసుకోలేదంటూ విమర్శలు ఎదుర్కొన్నారు. అయితే తనపై వచ్చిన ఆరోపణలను ఆయన ఖండించారు. అల్లర్లకు సంబంధించి క్షమాపణలు కూడా చెప్పలేదు.
సుప్రీంకోర్టు 2013లో నియమించిన ఒక కమిటీ కూడా మోదీపై విచారణ జరిపేందుకు తగిన ఆధారాలు లేవని పేర్కొంది. అయితే ఆయన ముఖ్యమంత్రిగా ఉన్న సమయంలోనే అల్లర్లు జరిగాయంటూ విమర్శకులు ఇప్పటికీ ఆయనను తప్పుబడుతున్నారు.
(బీబీసీ కోసం కలెక్టివ్ న్యూస్రూమ్ ప్రచురణ)
(బీబీసీ తెలుగును వాట్సాప్, ఫేస్బుక్, ఇన్స్టాగ్రామ్, ట్విటర్లో ఫాలో అవ్వండి. యూట్యూబ్లో సబ్స్క్రైబ్ చేయండి.)





























