గుంతల రోడ్లు, భూ రికార్డుల చిక్కులకు ఏఐతో పరిష్కారాలు చూపుతున్న భారత స్టార్టప్‌లు

ఆర్టిఫిషియల్ ఇంటెలిజెన్స్, స్టార్టప్స్, భూ రికార్డులు, గుంతల రోడ్లు, డిజిటల్ ప్లాట్‌ఫామ్
ఫొటో క్యాప్షన్, దాదాపు అరడజను భారతీయ స్టార్టప్‌లు రోడ్లపై గుంతలను మ్యాపింగ్ చేసి అధికారులకు సమాచారం ఇవ్వడానికి ఏఐని ఉపయోగిస్తున్నాయి.
    • రచయిత, నిఖిల్ ఇనాందార్
    • హోదా, బీబీసీ ప్రతినిధి
  • ప్రచురణ
  • చదివే సమయం: 6 నిమిషాలు

సంజయ్ మండవ తన కుటుంబ భూవివాదాన్ని పరిష్కరించుకోవడానికి 2020లో చికాగో నుంచి చెన్నైకి వచ్చారు.

ఆ ఆస్తి తమ కుటుంబానిదేనని నిరూపించడానికి అవసరమైన పదుల కొద్దీ పత్రాల కోసం ఆయన కొన్ని నెలల పాటు ప్రభుత్వ కార్యాలయాల చుట్టూ తిరగాల్సి వచ్చింది.

తల్లిదండ్రులు ఆ భూమిని కొన్నప్పటి సేల్ డీడ్ ఒక్కటే సరిపోలేదు. మరిన్ని పత్రాలను చూపించాలని అధికారులు ఆయన్ను అడిగారు.

ఈ అనుభవంతో విసిగిపోయిన ఆయన 'ల్యాండీడ్' అనే ఏఐ ఆధారిత డిజిటల్ ప్లాట్‌ఫామ్‌ను రూపొందించారు.

దీని ద్వారా దేశంలోని 24 రాష్ట్రాల్లో విడివిడిగా ఉన్న భూ రికార్డులను ఒకే చోట చేర్చుకోవచ్చు. కేవలం కొన్ని బటన్లు నొక్కడం ద్వారా యాజమాన్య హక్కులను తనిఖీ చేసుకోవచ్చు.

బీబీసీ న్యూస్ తెలుగు వాట్సాప్ చానల్‌
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

భారతదేశానికే ప్రత్యేకమైన ఒక సమస్యకు పరిష్కారం చూపేందుకు మండవ ప్రయత్నిస్తున్నారు.

"అమెరికా లేదా బ్రిటన్‌లో మీరు ఒక ఆస్తిని కొనుగోలు చేసినప్పుడు, యాజమాన్య హక్కులను ప్రభుత్వమే నిర్ధారిస్తుంది. కానీ భారత్‌లో 'ప్రిజంప్టివ్ టైట్లింగ్' విధానం అమల్లో ఉంది. అంటే ఆస్తి తనదేనని నిరూపించుకునే బాధ్యత కొనుగోలుదారుడిపైనే ఉంటుంది. సేల్ డీడ్ అనేది కేవలం లావాదేవీని మాత్రమే నమోదు చేస్తుంది. యాజమాన్య హక్కును నిరూపించుకోవడానికి ఇంకా చాలా పత్రాలు అవసరమవుతాయి" అని మండవ బీబీసీతో చెప్పారు.

వీటిలో భవన నిర్మాణ ధ్రువీకరణ పత్రాలు, ఆస్తి పన్ను రసీదులు, భూమి సర్వే మ్యాప్‌ల వంటివి ఉంటాయి. ఈ వ్యవస్థ దుర్వినియోగానికి ఎక్కువ అవకాశం ఇస్తోంది.

ఆర్టిఫిషియల్ ఇంటెలిజెన్స్, స్టార్టప్స్, భూ రికార్డులు, గుంతల రోడ్లు, డిజిటల్ ప్లాట్‌ఫామ్
ఫొటో క్యాప్షన్, భారతదేశంలో భూమి యజమానులే తమ హక్కుల్ని నిరూపించుకోవాల్సి ఉంటుంది.

రోజువారీ సవాళ్లపై దృష్టి

కుటుంబాల సంపదలో దాదాపు 80 శాతం రియల్ ఎస్టేట్ రూపంలోనే ఉన్న భారతదేశంలో, సివిల్ కోర్టు కేసుల్లో అత్యధికం ఆస్తి వివాదాలే ఉంటున్నాయి.

ల్యాండీడ్ సంస్థ జియో-స్పేషియల్ టెక్నాలజీని ఉపయోగించి భారతదేశంలోని పెద్ద ఎత్తున భూభాగాలను మ్యాపింగ్ చేసింది.

దీని కోసం రాష్ట్ర రెవెన్యూ శాఖలు, రిజిస్ట్రేషన్ కార్యాలయాలు, సర్వే రికార్డులు, మున్సిపల్ డేటాబేస్‌ల నుంచి సమాచారాన్ని సేకరించింది.

దీని ద్వారా రిజిస్టర్ అయిన ఆస్తులను వాటి అధికారిక భూ గుర్తింపు సంఖ్యలు, సర్వే నంబర్లు, యాజమాన్య రికార్డులతో అనుసంధానించింది.

ఇందులోని ఏఐ వ్యవస్థ ఈ పత్రాలను చదివి, సమాచారాన్ని సేకరించి, వాటిలోని లోపాలను నిమిషాల్లోనే గుర్తిస్తుంది. లాయర్లు, బ్రోకర్లకు రోజుల తరబడి పట్టే పనిని ఇది క్షణాల్లో పూర్తి చేస్తుంది.

దేశంలోనే అతిపెద్ద టైటిల్ డేటా (180 కోట్ల పత్రాలు) కలిగి ఉన్న ఈ యాప్‌ను ఇప్పుడు లక్షల మంది సాధారణ ప్రజలు, వ్యాపార సంస్థలు ఆస్తుల కొనుగోలు, అమ్మకాల సమయంలో ఉపయోగిస్తున్నారు.

లీగల్-టెక్ నుంచి ఆరోగ్యం, మౌలిక సదుపాయాలు, విద్య, వ్యవసాయం వరకు భారతదేశంలోని అత్యంత క్లిష్టమైన సమస్యలను ఏఐ సాయంతో పరిష్కరించడానికి ప్రయత్నిస్తున్న అనేక భారత స్టార్టప్‌లలో ఈ యాప్ కూడా ఒకటి.

అధునాతన ఏఐ లాంగ్వేజ్ మోడళ్లను నిర్మించడంలో అమెరికా, చైనా ప్రపంచ ఆధిపత్యం చలాయిస్తున్నాయి.

కానీ భారతదేశ ఏఐ విప్లవం పరిశోధనల కంటే డేటా సెంటర్ మౌలిక సదుపాయాలు, వినియోగదారుల యాప్‌ల రూపంలో ఎక్కువగా జరుగుతోంది.

ఆర్టిఫిషియల్ ఇంటెలిజెన్స్, స్టార్టప్స్, భూ రికార్డులు, గుంతల రోడ్లు, డిజిటల్ ప్లాట్‌ఫామ్
ఫొటో క్యాప్షన్, ఫ్రాక్టల్ అనలిటిక్స్ అనే ఏఐ స్టార్టప్‌ ముంబై పౌర అధికార యంత్రాంగం నడుపుతున్న ఆసుపత్రులలో తన ఏఐ సాధనం 'వైద్య'ను వినియోగిస్తోంది.

రోడ్లపై గుంతలను గుర్తించే యాప్

రోడ్లపై గుంతలను గుర్తించడం, గిరిజన భాషల అనువాదం, పని భారంతో సతమతమవుతున్న ప్రజారోగ్య సిబ్బందికి వైద్య సేవల్లో సాయం చేయడం లాంటి స్టార్టప్‌లు ఎన్నో సమస్యలను పరిష్కరిస్తున్నాయి.

ఖర్చు విషయంలో ఎంతో జాగ్రత్తగా ఉండే రంగాల్లో, విడివిడిగా ఉన్న బహుభాషా డేటా కలిగి ఉన్న రంగాల్లో కొత్త ఆవిష్కరణలకు ఈ సంస్థలు శ్రీకారం చుడుతున్నాయి.

బెంగళూరుకు చెందిన యూట్యూబ్ టీచర్ గౌరవ్ సేన్ రూపొందించిన ఏఐ యాప్ డ్యాష్-క్యామ్, శాటిలైట్ నావిగేషన్, ఏఐ విజన్ మోడల్ సాయంతో రోడ్లపై గుంతలను గుర్తిస్తుంది.

తర్వాత ఆ గుంతలను పూడ్చాల్సిన బాధ్యత ఏ మున్సిపల్ అధికారులదో గుర్తించి, వారికి ఆ సమాచారాన్ని పంపుతుంది.

భారత నగరాల్లో రోడ్ల గుంతల సమస్య తీవ్రంగా ఉండటంతో ఇటీవల ఆయన యాప్ వైరల్ అయింది.

దేశవ్యాప్తంగా దెబ్బతిన్న రోడ్లను మ్యాపింగ్ చేసి అధికారులకు నివేదించే ఇలాంటి యాప్‌లు కనీసం అరడజను వరకు ఉన్నాయి.

"మున్సిపల్ కార్పొరేషన్లు ఈ యాప్‌ను తీసుకుని ప్రభుత్వ బస్సులు, ట్యాక్సీలలో అమర్చితే, రోడ్ల పరిస్థితిపై ఎప్పటికప్పుడు తాజా సమాచారాన్ని పొందవచ్చు" అని సేన్ బీబీసీకి చెప్పారు.

భారతదేశపు ప్రముఖ ఏఐ సంస్థల్లో ఒకటైన 'ఫ్రాక్టల్ అనలిటిక్స్' తన 'వైద్య' అనే ఏఐ టూల్‌ను ముంబైలోని స్థానిక మున్సిపల్ ఆసుపత్రుల్లో ప్రవేశపెట్టింది.

ఈ యాప్ ద్వారా ప్రజలు తమ ల్యాబ్ రిపోర్టుల సారాంశాన్ని వివిధ భాషల్లో సులభంగా అర్థమయ్యేలా పొందవచ్చు.

తమ అవసరాలకు తగ్గట్టుగా దగ్గరలోని ఆసుపత్రులను గుర్తించవచ్చు.

అలాగే రోగి వైద్య చరిత్ర, మందుల వివరాలను వైద్యులకు ముందే అందించి చికిత్సకు సాయపడుతుంది.

మున్సిపల్ ఆసుపత్రుల నుంచి సేకరించిన ల్యాబ్ రిపోర్టుల ఆధారంగా ఆసుపత్రి నిర్వాహకులకు ఒక పబ్లిక్ హెల్త్ డ్యాష్‌బోర్డ్‌ను కూడా ఇది అందిస్తుంది.

దీనివల్ల కొత్తగా వ్యాపిస్తున్న ఇన్ఫెక్షన్లు, వ్యాధుల ధోరణులను అధికారులు ముందే గుర్తించగలుగుతున్నారు.

ఆర్టిఫిషియల్ ఇంటెలిజెన్స్, స్టార్టప్స్, భూ రికార్డులు, గుంతల రోడ్లు, డిజిటల్ ప్లాట్‌ఫామ్
ఫొటో క్యాప్షన్, ఏఐ మిషన్ ద్వారా స్టార్టప్‌లకు అండగా ఉంటామని ప్రభుత్వం ప్రకటించింది.

ఏఐ స్టార్టప్‌లకు చిప్‌ల లభ్యత పెద్ద సమస్య

ఈ వృద్ధి వల్ల ఏఐ స్టార్టప్‌లకు నిధుల ప్రవాహం భారీగా పెరిగింది. స్టార్టప్ సమాచార వేదిక 'ఐఎన్‌సీ42' ప్రకారం ఏడాది కాలంలో నిధులు 265 శాతం పెరిగాయి.

ఇతర రంగాలలో నిధుల సేకరణ మందకొడిగా ఉన్నప్పటికీ, ఈ ఏడాది మొదటి తొమ్మిది నెలల్లోనే ఏఐ స్టార్టప్‌లు 100 కోట్ల డాలర్లకు ( రూ. 9,337 కోట్లు) పైగా నిధులను సమీకరించాయి.

అయితే, తమ ఆలోచనలను వ్యాపారాలుగా మార్చడంలో ప్రయోగాత్మక దశను దాటి ముందుకు తీసుకెళ్లడంలో ఈ కంపెనీలు తీవ్ర సవాళ్లను ఎదుర్కొంటున్నాయి.

"భారతదేశంలో ఒక ఉత్పత్తిని తయారు చేయడానికి అయ్యే ఖర్చు, ఇక్కడి వినియోగదారులు చెల్లించడానికి సిద్ధంగా ఉన్న ధర కంటే కొన్నిసార్లు చాలా ఎక్కువగా ఉంటోంది" అని ఫ్రాక్టల్ సహ వ్యవస్థాపకుడు శ్రీకాంత్ వెలమకన్ని ముంబైలోని తన కార్యాలయంలో బీబీసీకి తెలిపారు.

"ఒక ఏఐ మోడల్‌ను నడపడానికి కావాల్సిన కంప్యూటింగ్ శక్తి భారత్‌లోనైనా అమెరికాలోనైనా ఒకేలా ఉంటుంది. కానీ ఇక్కడి వారి కంటే అమెరికా వినియోగదారులకు చెల్లించే సామర్థ్యం చాలా ఎక్కువ" అని ఆయన అన్నారు.

భారత ఏఐ వ్యవస్థాపకులు వనరుల కొరత మధ్య పనిచేయాల్సి వస్తోంది. సరైన స్థాయిలో, సరసమైన ధరలకు నాణ్యమైన చిప్‌లు లభించకపోవడం చాలా మందికి పెద్ద అడ్డంకిగా మారింది.

"ఈ దేశం కోసం అత్యంత ప్రభావవంతమైన వాటిలో ఒకదానిని నేను నిర్మిస్తున్నానని నమ్ముతున్నాను" అని మండవ అన్నారు.

"కానీ నాకు జీపీయూల (ఏఐ మోడళ్లకు శిక్షణ ఇచ్చే చిప్‌లు) కొరత తీవ్రంగా ఉంది. వాటిని సంపాదించడానికి చాలా కష్టాలు పడాల్సి వస్తోంది" అని ఆయన ఆవేదన వ్యక్తం చేశారు.

ఆర్టిఫిషియల్ ఇంటెలిజెన్స్, స్టార్టప్స్, భూ రికార్డులు, గుంతల రోడ్లు, డిజిటల్ ప్లాట్‌ఫామ్
ఫొటో క్యాప్షన్, భారతదేశపు ఏఐ విప్లవం డేటా సెంటర్ మౌలిక సదుపాయాలు, వినియోగదారుల అప్లికేషన్లలో జరుగుతోంది.

ప్రభుత్వ ఏఐ మిషన్ ద్వారా స్టార్టప్‌లకు 38,000 జీపీయూలను అందిస్తామని దేశం హామీ ఇచ్చింది.

కానీ ఈ కంప్యూటింగ్ శక్తికి ఉన్న డిమాండ్, సరఫరా కంటే చాలా ఎక్కువగా ఉంది.

సంక్లిష్టమైన నిబంధనలు, అధికారుల జాప్యం వంటివి ఇతర ప్రధాన సవాళ్లుగా ఉన్నాయి.

ఈ మౌలిక సమస్యలను పరిష్కరించకపోతే, భారత ఏఐ కంపెనీలు కేవలం పైపైన పరిష్కారాలను మాత్రమే రూపొందించే ప్రమాదం ఉందని, తర్వాతి తరం వ్యవస్థాపకులు వాటిని త్వరగానే పనికిరాకుండా చేస్తారని నిపుణులు అంటున్నారు.

"నా ప్రయోగాత్మక యాప్ గురించి చెబితే గూగుల్ లాంటి సంస్థ బహుశా నవ్వుతుంది. ఇది దీర్ఘకాలం నిలబడాలంటే, ఇతరులు సులభంగా కాపీ కొట్టలేని విధంగా ఉండాలంటే దీన్ని ఇంకా ఎంతో అధునాతనంగా తీర్చిదిద్దాలి" అని సేన్ తన ఉత్పత్తి ప్రస్తుత స్థాయిపై వాస్తవిక దృక్పథంతో చెప్పారు.

అనుభవజ్ఞులైన నిపుణుల కొరత నుంచి, విజయవంతమైన ప్రయోగాలను నిరంతర ప్రభుత్వ కాంట్రాక్టులుగా మార్చుకోవడం వరకు, ఖరీదైన విదేశీ టెక్నాలజీపై ఆధారపడటం వరకు భారత వ్యవస్థాపకులు ఎన్నో అడ్డంకులను దాటుకుంటూ ముందుకు సాగుతున్నారు.

విధాన నిర్ణేతల నుంచి ఏం కోరుకుంటున్నారని అడిగినప్పుడు "మేము ఇప్పటికీ సాధించగలం. మాకు రక్షణ వద్దు, కానీ మమ్మల్ని ముందుకు నడిపించండి. అత్యుత్తమ సంస్థలతో పోటీ పడటానికి మాకు అవసరమైన సాధనాలు, వనరులు ఇవ్వండి" అని మండవ అన్నారు.

"ప్రముఖ ర్యాపర్ జే-జెడ్ చెప్పినట్లు నేనే పేదవాడిగా ఉంటే పేదలకు సాయం చేయలేను" అని ఆయన ముగించారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)