మీ శ్వాసలో పండ్ల వాసన వస్తోందా? - డయాబెటిస్ గురించి ఈ 6 లక్షణాలు తెలుసుకోండి

డయాబెటిస్
ఫొటో క్యాప్షన్, డయాబెటిక్ కీటోఅసిడోసిస్ అనేది మధుమేహం వల్ల వచ్చే తీవ్రమైన సమస్యల్లో ఒకటిగా పరిగణిస్తారు.
    • రచయిత, నందిని వెల్లైచామి
    • హోదా, బీబీసీ తమిళ్
  • ప్రచురణ
  • చదివే సమయం: 5 నిమిషాలు

ప్రపంచవ్యాప్తంగా మధుమేహానికి సంబంధించిన కీలక గణాంకాలను అంతర్జాతీయ డయాబెటిస్ ఫెడరేషన్ ఇటీవల విడుదల చేసింది. 2024లో భారత్‌లో 3.86 కోట్ల మంది తమకు మధుమేహం(డయాబెటిస్) ఉందనే విషయం తెలియక, పరీక్షలు చేయించుకోలేదని ఆ వివరాల్లో తెలిసింది.

ఈ విషయంలో ప్రపంచంలోని మొదటి పది దేశాల్లో చైనా తర్వాత భారత్ రెండో స్థానంలో ఉంది. 20 ఏళ్లలోపు పిల్లలు, టీనేజర్లలో 3,01,000 మందికి టైప్‌-1 డయాబెటిస్ ఉంది.

ఈ గణాంకాలను పరిశీలిస్తే, చాలామంది మధుమేహ లక్షణాలను నిర్లక్ష్యం చేయడం లేదా భయంతో పరీక్షలు చేయించుకోకపోవడం వల్ల వ్యాధిని గుర్తించలేకపోతున్నారని వైద్య నిపుణులు భావిస్తున్నారు.

అధిక దాహం, తరచూ మూత్ర విసర్జన, ఆకలి ఎక్కువగా వేయడం, శరీర బరువు తగ్గడం వంటి సాధారణ లక్షణాలే డయాబెటిస్‌ ఉన్నవారికి ఉంటాయని చాలామందికి తెలుసు. కానీ మనం గుర్తించకపోయినా మధుమేహ తీవ్రతను సూచించే మరికొన్ని లక్షణాలు కూడా ఉన్నాయని వైద్యులు చెబుతున్నారు.

"డయాబెటిస్ ఉన్నవారిలో దాదాపు 50 శాతం మందికి ఎలాంటి లక్షణాలూ కనిపించకపోవచ్చు. అందుకే ప్రతి ఆరు నెలలకోసారి తప్పనిసరిగా డయాబెటిస్ టెస్ట్‌లు చేయించుకోవాలి. ఎలాంటి లక్షణాలు లేకపోయినా, కొన్నిసార్లు టెస్ట్‌ చేయించినప్పుడు రక్తంలో చక్కెర స్థాయులు 300-400 వరకు ఉండొచ్చు. లక్షణాలు కనిపించాలనే నిబంధన ఏమీ లేదు" అని డయాబెటిస్ అండ్ ఎండోక్రోనాలజిస్ట్ డాక్టర్ ఎస్. రాజ్‌కుమార్ అంటున్నారు.

బీబీసీ న్యూస్ తెలుగు వాట్సాప్ చానల్‌
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

1. ముడతల దగ్గర చర్మం నల్లగా మారడం

శరీర భాగాల్లో చర్మం నల్లగా మారడం

ఇన్సులిన్ నిరోధకత (ఇన్సులిన్ రెసిస్టెంట్) కారణంగా శరీరంలోని ముడతలు ఉండే ప్రాంతాల్లో, ముఖ్యంగా మెడ భాగంలో చర్మం నల్లగా మారుతుందని డాక్టర్ రాజ్‌కుమార్ చెబుతున్నారు.

అయితే అధిక బరువు వల్ల కూడా ఈ సమస్య రావచ్చు. ఈ పరిస్థితిని అకాంతోసిస్ నైగ్రికన్స్ అంటారు.

ఇన్సులిన్ అనేది క్లోమ గ్రంథి (ప్యాంక్రియాస్) ఉత్పత్తి చేసే హార్మోన్.

రక్తంలో ఉండే చక్కెరను కణాలు శక్తిగా వినియోగించుకునేందుకు ఇది సహాయపడుతుంది.

రక్తంలో ఇన్సులిన్ స్థాయులు ఎక్కువగా ఉన్నప్పుడు చర్మ కణాలు సాధారణం కంటే వేగంగా వృద్ధి చెందుతాయి. దీనివల్ల చర్మం నల్లగా మారే సమస్య ఏర్పడుతుంది.

"శరీర బరువు ఎక్కువగా ఉన్నప్పుడు ఇన్సులిన్ ఉత్పత్తి కూడా ఎక్కువగా ఉంటుంది. దీంతో మెడ తదితర శరీర ముడతలున్న ప్రాంతాల్లో చర్మం నల్లగా మారుతుంది. అధిక బరువు ఉన్నవారు, రక్తపోటు, కొలెస్ట్రాల్, పీసీఓడీ సమస్యలు ఉన్నవారు, శారీరక శ్రమ ఎక్కువగా చేయనివారు, కుటుంబంలో ఎవరికైనా మధుమేహం ఉన్నవారు తప్పనిసరిగా తమకు మధుమేహం ఉందేమో పరీక్షలు చేయించుకోవాలి" అని డాక్టర్ రాజ్‌కుమార్ చెబుతున్నారు.

చక్కెర వ్యాధి
ఫొటో క్యాప్షన్, వేగంగా, అధిక మొత్తంలో కీటోన్లు ఉత్పత్తైనప్పుడు అవి శరీరంలో ప్రమాదకర స్థాయిలో పేరుకుపోయి తీవ్ర సమస్యలకు దారితీయచ్చు

2. శ్వాసలో పండ్ల వాసన రావడం

"మధుమేహం ఉన్నవారిలో వ్యాధి తీవ్రత పెరిగినప్పుడు ఈ సమస్య కనిపిస్తుంది. శరీరంలో చక్కెర స్థాయిలు ఎక్కువగా ఉన్నప్పుడు కీటోన్ ఆమ్లాలు ఉత్పత్తి అవుతాయి. వాటిలో బీటా హైడ్రాక్సీబ్యూటిరిక్ ఆమ్లం ఒకటి. దీనివల్ల శ్వాసలో పండ్ల వాసన వస్తుంది" అని డాక్టర్ రాజ్‌కుమార్ చెబుతున్నారు.

డయాబెటిక్ కీటోఅసిడోసిస్ అనేది మధుమేహం వల్ల వచ్చే తీవ్రమైన సమస్యల్లో ఒకటిగా పరిగణిస్తారు.

"రక్తంలోని చక్కెరను శక్తిగా వినియోగించుకోవడానికి కణాల్లోకి పంపించడానికి తగినంత ఇన్సులిన్ శరీరంలో లేనప్పుడు ఈ సమస్య ఏర్పడుతుంది. దీంతో శరీరం శక్తి కోసం కొవ్వును విచ్ఛిన్నం చేయడం ప్రారంభిస్తుంది. ఈ ప్రక్రియలో కీటోన్లు అనే ఆమ్లాలు ఉత్పత్తి అవుతాయి.

వేగంగా, అధిక మొత్తంలో కీటోన్లు ఉత్పత్తైనప్పుడు అవి శరీరంలో ప్రమాదకర స్థాయిలో పేరుకుపోయి తీవ్రమైన సమస్యలకు దారితీయవచ్చు" అని డాక్టర్ రాజ్‌కుమార్ హెచ్చరిస్తున్నారు.

చేతులు, కాళ్లలో నొప్పి
ఫొటో క్యాప్షన్, రక్తంలో చక్కెర స్థాయులు ఎక్కువగా ఉండటం వల్ల నరాలు దెబ్బతిన్నప్పుడు దాన్ని డయాబెటిక్ న్యూరోపతి అంటారు.

3. చేతులు, కాళ్లలో నొప్పి

"రక్తంలో చక్కెర స్థాయులు పెరిగినప్పుడు చేతులు, కాళ్లలో సూదులతో గుచ్చినట్లుగా నొప్పి రావచ్చు. లేదా స్పర్శ తెలియని స్థితి ఏర్పడవచ్చు. ఇవి కూడా శరీరంలో షుగర్ లెవెల్స్ ఎక్కువగా ఉన్నాయనడానికి సంకేతాలు. ముఖ్యంగా రాత్రిపూట చేతులు, కాళ్లలో తిమ్మిరి రావచ్చు(పారెస్థీషియా)" అని డాక్టర్ రాజ్‌కుమార్ చెబుతున్నారు.

రక్తంలో చక్కెర స్థాయులు ఎక్కువగా ఉండటం వల్ల నరాలు దెబ్బతిన్నప్పుడు దాన్ని డయాబెటిక్ న్యూరోపతి అంటారు. దీనివల్ల నొప్పి లేదా కండరాల తిమ్మిరి వంటి సమస్యలు రావచ్చు. ఈ నొప్పి కాళ్లు లేదా పాదాల్లో ఎక్కువగా ఉండవచ్చు. అలాగే చేతులు, కాళ్లు సహా శరీరంలోని ఇతర భాగాల్లోనూ మంట, జలదరింపు లేదా స్పర్శ తెలియకపోవడం వంటి లక్షణాలు కనిపించవచ్చు.

ఏ రకమైన నరాలు ప్రభావితమయ్యాయనే దానిపై ఈ లక్షణాలు ఆధారపడి ఉంటాయి.

4. జననాంగాల చుట్టూ పుండ్లు, ఫంగల్ ఇన్ఫెక్షన్లు

"ఈ సమస్య పురుషులు, మహిళలు ఇద్దరిలోనూ కనిపించవచ్చు. జననాంగాల వద్ద ఫంగల్ ఇన్ఫెక్షన్ కారణంగా పుండ్లు ఏర్పడే అవకాశం ఉంది. పురుషుల్లో బాలనోపోస్తైటిస్ అనే సమస్య రావచ్చు. అంటే పురుషాంగం చివరి భాగంలో తెల్లటి మచ్చలు ఏర్పడతాయి. మహిళల్లో యోని భాగంలో వెజైనల్ క్యాండిడియాసిస్ అనే ఫంగల్ ఇన్ఫెక్షన్ రావచ్చు" అని డాక్టర్ రాజ్‌కుమార్ చెబుతున్నారు.

ఇలా వచ్చే కొన్ని ఇన్ఫెక్షన్లు:

  • జననాంగాల ఇన్ఫెక్షన్లు
  • ఈస్ట్ ఇన్ఫెక్షన్లు
  • మూత్రాశయ ఇన్ఫెక్షన్లు
  • స్కిన్ ఇన్ఫెక్షన్లు

రక్తంలో చక్కెర స్థాయులు ఎక్కువగా ఉన్నప్పుడు తెల్ల రక్తకణాలు రక్తప్రవాహంలో కదలడంలో ఇబ్బంది ఏర్పడుతుంది. దీంతో ఇన్ఫెక్షన్లతో పోరాడే శరీర సామర్థ్యం తగ్గుతుంది.

జననాంగాల చుట్టూ పుండ్లు, ఫంగల్ ఇన్ఫెక్షన్లు
ఫొటో క్యాప్షన్, జననాంగాల వద్ద ఫంగల్ ఇన్ఫెక్షన్ కారణంగా పుండ్లు ఏర్పడే అవకాశం ఉంది.

5. నోరు పొడిబారడం

"నోరు పూర్తిగా పొడిబారడం కూడా మధుమేహ లక్షణమే (ఆస్మొటిక్ సిస్టమ్స్). డయాబెటిస్ ఉన్నవారిలో శరీరంలో నీటి శాతం ఎక్కువగా తగ్గిపోవడం వల్ల పాలిడిప్సియా (పాలిడిప్సియా - విపరీతమైన దాహం) ఏర్పడుతుంది" అని డాక్టర్ రాజ్‌కుమార్ చెబుతున్నారు.

నోటిలో లాలాజలం ఉత్పత్తి తగ్గడం వల్ల దంతక్షయం, చిగుళ్ల సమస్యలు వచ్చే అవకాశం పెరుగుతుంది. ఆశ్చర్యకరంగా, మధుమేహం ఉన్నట్లు నిర్ధరణైన తర్వాత కూడా నోరు పొడిబారడం కొనసాగవచ్చు. మధుమేహ చికిత్సకు ఉపయోగించే కొన్ని మందుల దుష్ప్రభావం వల్ల కూడా ఈ సమస్య రావచ్చు.

"మధుమేహం ఉన్నప్పుడు గ్లూకోజ్ శక్తిగా మారదు. దీంతో శరీరంలో గ్లూకోజ్ లేదని భావించి ఆకలిని ప్రేరేపిస్తుంది. కానీ అప్పటికే శరీరంలో చక్కెర ఎక్కువగా ఉన్నప్పటికీ అది శక్తిగా మారడం లేదు. శరీరానికి శక్తి అందకపోవడం వల్ల కళ్లు తిరగవచ్చు. అలాగే శరీరంలో అసిటోన్లు పేరుకుపోవడం వల్ల వాంతులు కూడా రావచ్చు" అని రాజ్‌కుమార్ చెబుతున్నారు.

6. కంటిచూపులో మార్పులు

"కళ్లలోని లెన్స్‌లలో చక్కెర సార్బిటాల్‌గా పేరుకుపోయినప్పుడు కంటిచూపు తగ్గవచ్చు. దీనివల్ల మసకగా కనిపించవచ్చు. రక్తంలో చక్కెర స్థాయులను నియంత్రించినప్పుడు ఈ సమస్య తగ్గుతుంది" అని డాక్టర్ రాజ్‌కుమార్ చెబుతున్నారు.

ఈ లక్షణాలు కనిపించడం మొదలైనప్పుడు మధుమేహ పరీక్షలు చేయించుకోవాలని ఆయన హెచ్చరిస్తున్నారు.

ముఖ్యంగా అధిక బరువు ఉన్నవారు, కుటుంబంలో ఇప్పటికే మధుమేహం ఉన్నవారు 30 ఏళ్లు దాటిన తర్వాత ప్రతి ఆరు నెలలకు ఒకసారి పరీక్షలు చేయించుకోవాలని వైద్యులు సూచిస్తున్నారు.

అలాగే గత మూడు నెలల సగటు రక్తంలో చక్కెర స్థాయిలను తెలిపే హెచ్‌బీఏ1సీ పరీక్ష చేయించుకోవాలని కూడా సిఫార్సు చేస్తున్నారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)