రష్యా, చైనా, అమెరికా అధినేతల సమావేశం పుతిన్‌కు దక్కిన భారీ విజయమా?

రష్యా,  యుక్రెయిన్, చైనా, అమెరికా
ఫొటో క్యాప్షన్, యుక్రెయిన్‌పై దాడి తర్వాత రష్యాను అంతర్జాతీయంగా ఏకాకి అయ్యారు.
    • రచయిత, స్టీవ్ రోజన్‌బర్గ్
    • హోదా, బీబీసీ రష్యా ఎడిటర్
  • ప్రచురణ
  • చదివే సమయం: 4 నిమిషాలు

రష్యా అధ్యక్షుడు వ్లాదిమిర్ పుతిన్, అమెరికా అధ్యక్షుడు ట్రంప్, చైనా అధ్యక్షుడు షి జిన్‌పింగ్ మధ్య సమావేశం ప్రారంభానికి ముందే రష్యాకు విజయంగా పరిగణిస్తున్నారు.

2022లో ఏం జరిగిందో ఒక్కసారి గుర్తు చేసుకుంటే యుక్రెయిన్‌పై రష్యా దాడి చేసిన తర్వాత అధ్యక్షుడు పుతిన్ అంతర్జాతీయంగా ఏకాకి అయ్యారు.

యుక్రెయిన్ యుద్ధాన్ని కారణంగా చూపి పుతిన్‌ను, రష్యాను బహిష్కరించాలని పాశ్చాత్య దేశాల నాయకులు నిర్ణయించుకున్నారు.

కానీ 2026 నాటికి వ్లాదిమిర్ పుతిన్ షెన్‌జెన్‌లో ఒక చారిత్రక సమావేశాన్ని ఖరారు చేసుకున్నారు. చైనా, రష్యా, అమెరికా దేశాల నాయకులు కేవలం ఈ మూడు దేశాల మధ్య చర్చల కోసం ఒకే చోట సమావేశం కావడం చరిత్రలో ఇదే తొలిసారి.

దీంతో పుతిన్ ఆయన చేరాలనుకున్నస్థానానికి సరిగ్గా చేరుకున్నట్టవుతుంది. ప్రపంచ రాజకీయాల్లో అత్యంత కీలకవేదికపై ప్రపంచంలోని ఇద్దరు అగ్రరాజ్యాల నాయకులతో కలిసి కూర్చునే అవకాశం లభించింది.

బీబీసీ న్యూస్ తెలుగు వాట్సాప్ చానల్‌
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

రష్యాపై పాశ్చాత్య దేశాల ఒత్తిడి విఫలమైందని చెప్పుకునే అవకాశం పుతిన్‌కు ఈ సమావేశం కల్పిస్తుంది.

"రష్యాను ఏకాకిని చేసేందుకు విఫల ప్రయత్నాలు జరిగాయి. రష్యా మునుపెన్నడూ లేని విధంగా ఆంక్షల ఒత్తిడికి గురైంది" అని ఆసియా-పసిఫిక్ ఎకనామిక్ కోఆపరేషన్ (ఎపెక్) వాణిజ్య సదస్సులో పుతిన్ అన్నారు. ఆ తర్వాత ఆయన జిన్‌పింగ్‌తో సమావేశమయ్యారు.

షెన్‌జెన్‌లో జరిగే అతిపెద్ద కార్యక్రమం పుతిన్, జిన్‌పింగ్, డోనల్డ్ ట్రంప్‌ల మధ్య జరిగే త్రైపాక్షిక సమావేశమేనని రష్యా చెబుతోంది.

రష్యా,  యుక్రెయిన్, చైనా, అమెరికా
ఫొటో క్యాప్షన్, ట్రంప్, పుతిన్, జిన్‌పింగ్ సమావేశంపై ప్రపంచవ్యాప్తంగా అందరిదృష్టి నెలకొంది.

‘చూడండి... నేనిక్కడ ఉన్నా’

రష్యా సైన్యం యుక్రెయిన్‌లోని పట్టణాలు, నగరాలపై వరుసగా దాడులు చేస్తున్నప్పటికీ ఎలాంటి షరతులు లేకుండా పూర్తిస్థాయి కాల్పుల విరమణ చేయాలనే ప్రతిపాదనను క్రెమ్లిన్ తిరస్కరిస్తున్నప్పటికీ ప్రపంచ నాయకుడిగా తనను తాను చూపించుకోడానికి పుతిన్‌కు అవకాశం లభిస్తుంది.

ఒక చిన్న సమావేశం వల్ల ప్రపంచ పరిస్థితులు పూర్తిగా మారిపోయే అవకాశం లేదు. అయితే ఇక్కడ ముఖ్యమైన విషయం ఏమిటంటే.. ఈ సమావేశాన్ని ప్రపంచం ఎలా చూస్తుందన్నదే.

ముగ్గురు నాయకులు, మూడు అగ్రదేశాలు, కీలక అంశాలపై చర్చలు.. ఈ సమావేశానికి సంబంధించిన ఫోటోలు, ప్రచారం ప్రపంచానికి ఒక ప్రత్యేక సందేశాన్ని ఇస్తాయి.

ఒకరకంగా చెప్పాలంటే వ్లాదిమిర్ పుతిన్ ఈ సమావేశం ద్వారా ప్రపంచానికి ఒక పోస్టుకార్డు పంపించాలనుకుంటున్నారు. దానిపై 'మీరు కూడా ఇక్కడ ఉంటే బాగుండేది' అని రాయడానికి బదులుగా 'చూడండి, నేను ఇక్కడ ఉన్నాను' అని చెప్పాలనుకుంటున్నారు.

రష్యా,  యుక్రెయిన్, చైనా, అమెరికా
ఫొటో క్యాప్షన్, రష్యా, చైనా, అమెరికా అధ్యక్షుల సమావేశంపై జెలియన్‌స్కీ ఆందోళన వ్యక్తంచేశారు.

యూరప్ ఆందోళన

అయితే ఈ సమావేశంలో స్థానం దక్కని వారి సంగతేంటి?

ముఖ్యంగా యూరప్ దేశాల నాయకులు, యుక్రెయిన్ ఈ సమావేశంపై ఆందోళన వ్యక్తం చేస్తున్నాయి. ఈ ముగ్గురు నాయకుల సమావేశం కేవలం ఒక మంచి ఫోటోకు మాత్రమే పరిమితం కాకపోవచ్చని వారు భయపడుతున్నారు. యుక్రెయిన్ ప్రయోజనాలకు వ్యతిరేకంగా కొన్ని నిర్ణయాలు కూడా తీసుకునే అవకాశం ఉందని ఆందోళన చెందుతున్నారు.

షెన్‌జెన్‌లో తాను చర్చించాలనుకుంటున్న 'తనకు ఇష్టమైన అంశం' యుక్రెయిన్ యుద్ధమేనని ట్రంప్ ఇప్పటికే చెప్పారు.

యుక్రెయిన్ అధికారులు లేదా యూరప్ దేశాల నాయకులు అక్కడ లేకుండా ట్రంప్, జిన్‌పింగ్‌ల ముందు తన వాదనలను వినిపించడానికి పుతిన్‌కు ఇది మంచి అవకాశంగా కనిపించవచ్చు.

పుతిన్, ట్రంప్, షీ జిన్‌పింగ్‌ల సమావేశంపై గత నెలలో యుక్రెయిన్ అధ్యక్షుడు జెలియన్‌స్కీ ఆందోళన వ్యక్తం చేశారు. ఈ సమావేశం 1945లో జరిగిన యాల్టా సదస్సును తలపించే అవకాశం ఉందని ఆయన అన్నారు.

రెండో ప్రపంచ యుద్ధం ముగిసిన తర్వాత యూరప్‌లో కొత్త వ్యవస్థను నిర్ణయించేందుకు అప్పటి సోవియట్ యూనియన్, బ్రిటన్, అమెరికా నాయకులు జోసెఫ్ స్టాలిన్, విన్‌స్టన్ చర్చిల్, ఫ్రాంక్లిన్ డి.రూజ్‌వెల్ట్ ఆ సదస్సులో సమావేశమయ్యారు.

"ఈ సమావేశం 'యాల్టా 2, 3, 4'గా మారాలని మేం అస్సలు కోరుకోవడం లేదు. ప్రపంచంలోని వివిధ ప్రాంతాలపై ఎవరికి ఎంత ప్రభావం ఉండాలనే విషయాన్ని మళ్లీ విభజించే పరిస్థితి రావద్దు" అని జెలియన్‌స్కీ అన్నారు.

రష్యా,  యుక్రెయిన్, చైనా, అమెరికా
ఫొటో క్యాప్షన్, రష్యా అనుకున్న ప్రకారం యుక్రెయిన్ యుద్ధం సాగడం లేదని నిపుణులు అంటున్నారు.

‘దౌత్య విజయం సరే...యుద్ధరంగం పరిస్థితేంటి..?’

షెన్‌జెన్‌లో జరిగే చర్చల్లో యుక్రెయిన్ యుద్ధాన్ని చేర్చాలని చైనా కోరుకుంటుందా లేదా అన్నదానిపై స్పష్టత లేదు.

ఈ త్రైపాక్షిక సమావేశం గురించి చైనా అధికారికంగా చేస్తున్న ప్రకటనల్లో యుక్రెయిన్ యుద్ధం గురించి పెద్దగా ప్రస్తావించడం లేదు. దానికి బదులుగా "ప్రపంచ శాంతిని కాపాడటం, వ్యూహాత్మక స్థిరత్వాన్ని ప్రోత్సహించడం" వంటి అంశాలపై ఎక్కువగా దృష్టి పెడుతోంది.

షెన్‌జెన్‌లో జరిగే ఈ సమావేశం ద్వారా వచ్చే ప్రచారాన్ని పూర్తిగా ఉపయోగించుకోవాలని రష్యా ప్రయత్నిస్తుంది. అయితే దౌత్యపరమైన విజయం, యుద్ధరంగంలో సాధించే విజయం రెండూ ఒకటి కావు.

అధ్యక్షుడు పుతిన్ తాను 'ప్రత్యేక సైనిక చర్య'గా పిలుస్తున్న దాన్ని ప్రారంభించి దాదాపు ఐదేళ్లు కావస్తోంది. అయినప్పటికీ యుక్రెయిన్‌పై యుద్ధంలో విజయం సాధించడానికి రష్యా ఇంకా పోరాడుతూనే ఉంది.

ఈ క్రమంలో యుద్ధరంగంలో రష్యా భారీ నష్టాలను చవిచూసింది.

కొద్దిరోజుల ముందు రష్యాను క్రిమియా ద్వీపకల్పంతో కలిపే వంతెనపై యుక్రెయిన్ దాడి చేసింది. ఇది రష్యాప్రతిష్టను దెబ్బతీసింది.

యుక్రెయిన్ నుంచి క్రిమియాను స్వాధీనం చేసుకున్న తర్వాత రష్యా ఈ వంతెన నిర్మాణానికి బిలియన్ల డాలర్లు ఖర్చు చేసింది. యుక్రెయిన్ జరిపిన దాడిలో వంతెనలోని ఒక భాగం తీవ్రంగా దెబ్బతింది.

ఈ నష్టం వల్ల రష్యా అధికారులకు రాకపోకల విషయంలో ఇబ్బందులు ఎదురుకావడమే కాదు... అంతకంటే పెద్ద విషయం కూడా ఉంది.

క్రెమ్లిన్ చెబుతున్న 'ప్రత్యేక సైనిక చర్య' రష్యా అనుకున్న ప్రణాళిక ప్రకారం ఏమాత్రం సాగలేదని ఈ ఘటన మరోసారి గుర్తుచేస్తోంది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)