వైవాహిక అత్యాచారం నేరమో కాదో తేల్చనున్న సుప్రీం కోర్టు

మారిటల్ రేప్‌కు సంబంధించి సుప్రీం కోర్టు 10 పిటిషన్లపై విచారణ జరుపుతోంది
ఫొటో క్యాప్షన్, మారిటల్ రేప్‌కు సంబంధించి సుప్రీం కోర్టు 10 పిటిషన్లపై విచారణ జరుపుతోంది
    • రచయిత, వినీత్ భల్లా
    • హోదా, బీబీసీ కరస్పాండెంట్
  • ప్రచురణ
  • చదివే సమయం: 7 నిమిషాలు

భారతీయ చట్టాల ప్రకారం.. 18 ఏళ్లు నిండని లేదా పెళ్లికాని మహిళను సెక్స్ కోసం బలవంతపెట్టడం అత్యాచారం కిందకు వస్తుంది. దీని చట్టబద్ధతను ఇప్పుడు సుప్రీంకోర్టు నిర్ణయించనుంది.

భార్యపై భర్త బలవంతంగా లైంగిక చర్యకు పాల్పడితే ఆమె ఖచ్చితంగా బాధితురాలే అని 2026 సెప్టెంబర్‌లో సీజేఐ సూర్యకాంత్, జస్టిస్ వి మోహనలతో కలసి ఈ పిటిషన్లపై జరిపిన విచారణలో భాగంగా జస్టిస్ జోయ్‌మాల్య బాగ్చీ వ్యాఖ్యానించారు. అయితే ప్రభుత్వం దీన్ని రేప్‌గా భావిస్తుందా లేదా అనేది ఇక్కడ కీలకం.

‘‘తప్పా, రైటా అని కాదు.. ప్రస్తుతం ఉన్న చట్టం ఇది. ఇది శిక్షా చట్టం’’ అని ఆయన అన్నారు. దీనికి ఉన్న మినహాయింపులు రాజ్యాంగబద్దమా కాదా అనేది నిర్ణయించడానికి ముందే వీటిని 'రేప్' కింద కోర్టులు విచారణకు అనుమతించాలా లేదా అని ఆయన ప్రశ్నించారు.

అవివాహిత మహిళలకు లైంగిక హింస నుంచి ఎలాంటి రక్షణ లభిస్తుందో వివాహిత మహిళలకు కూడా అలాంటి రక్షణే లభిస్తుందా అనేది కోర్టు తీర్పు నిర్ణయిస్తుంది.

జాతీయ కుటుంబ ఆరోగ్య సర్వే-5 (2019-21) వివరాలు ఈ అంశం తీవ్రతను తెలియచేస్తున్నాయి. లైంగిక హింసకు గురైన 18-49 ఏళ్ల వయసున్న వివాహిత మహిళల్లో 82శాతం మంది తమ ప్రస్తుత భర్త, 14శాతం మంది తమ మాజీ భర్తలే ఈ దాడులకు కారణం అని తెలిపారు. మొత్తంగా, తమకు ఇష్టం లేకపోయినా బలవంతంగా తమతో భర్తలు లైంగిక చర్యకు పాల్పడ్డారని 4.6శాతం మంది, బెదిరించడమో లేదా తమకు ఇష్టంలేని రీతిలో లైంగిక చర్యలు చేయాలనో భర్తలు బలవంతపెట్టారని 3.8శాతం మంది తెలిపారు.

బీబీసీ న్యూస్ తెలుగు వాట్సాప్ చానల్‌
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి
లైంగిక హింస
ఫొటో క్యాప్షన్, వైవాహిక బంధంలో లైంగిక అంగీకారంపై హైకోర్టులు భిన్నమైన తీర్పులు ఇచ్చాయి.

చట్టపరమైన ప్రశ్న ఏంటి?

బ్రిటిష్ కాలం నాటి ఇండియన్ పీనల్ కోడ్ (ఐపీసీ) సెక్షన్ 375లోని మినహాయింపు 2 పైనే చట్టపరమైన సవాలు ఎదురవుతోంది. భారతీయ న్యాయ సంహిత (బీఎన్ఎస్) సెక్షన్ 63లో కూడా ఇది ఉంది.

దీని ప్రకారం 18 ఏళ్లు నిండిన భార్యతో భర్త జరిపే లైంగిక సంపర్కం లేదా లైంగిక చర్యలు అత్యాచారం కాదు.

ఈ మినహాయింపు వివాహిత మహిళల విషయంలో రాజ్యాంగంలోని 14వ ఆర్టికల్ ద్వారా సంక్రమించిన రాజ్యాంగబద్ధమైన సమానత్వపు హక్కు, ఆర్టికల్ 15 కింద వివక్షకు గురికాకుండా ఉండటం, ఆర్టికల్ 21 కింద జీవించే హక్కు, గౌరవం, గోప్యత, తమ శరీరంపై స్వతంత్రత కలిగి ఉండే హక్కుల ఉల్లంఘన కిందకు వస్తుందా అనేది సుప్రీం కోర్టు బెంచ్ నిర్ణయించనుంది.

రేప్, బాధితులు, కోర్టు
ఫొటో క్యాప్షన్, ప్రతీకాత్మక చిత్రం

ఈ పిటిషన్లు ఏం కోరుతున్నాయి?

కర్ణాటక హైకోర్టు 2022లో ఇచ్చిన తీర్పుపై అప్పీలు చేస్తూ ఓ భర్త వేసిన పిటిషన్ వీటిలో ఒకటి. భార్య వేసిన రేప్ కేసులో భర్తపై విచారణకు అనుమతిస్తూ హైకోర్టు తీర్పు చెప్పింది. దిల్లీ హైకోర్టు 2022లో వెలువరించిన భిన్నాభిప్రాయాల తీర్పు (స్ప్లిట్ వర్డిక్ట్) పై మరో నాలుగు అప్పీళ్లు దాఖలయ్యాయి.

చట్టంలోని మినహాయింపును సమర్థిస్తూ వచ్చిన అభిప్రాయాన్ని రద్దు చేయాలని 'ఆల్ ఇండియా డెమోక్రటిక్ ఉమెన్స్ అసోసియేషన్ (ఐద్వా)', భర్త తనతో బలవంతంగా శృంగారంలో పాల్గొన్నాడని ఆరోపిస్తున్న ఒక బాధితురాలు కోరుతుంటే.. ఆ మినహాయింపును కొట్టివేస్తూ వచ్చిన మరో అభిప్రాయాన్ని 'మెన్ వెల్ఫేర్ ట్రస్ట్', 'హృదయ నెస్ట్ ఆఫ్ ఫ్యామిలీ హార్మొనీ' అనే సంస్థలు సవాలు చేస్తున్నాయి.

సుప్రీం కోర్టులోనే నేరుగా 4 పిటిషన్లు దాఖలయ్యాయి. ఈ మినహాయింపు రాజ్యాంగవిరుద్ధమని చెప్పాలని కోరుతూ 2019లో యూత్ ఫర్ ఇనీక్వాలిటీ, 2022లో ఉద్యమకర్త రూత్ మనోరమ, 2024లో ఐద్వా, 2025లో అవేక్ష విమెన్స్ చారిటబుల్ ట్రస్ట్ వీటిని దాఖలు చేశాయి.

భార్యతో బలవంతంగా సెక్స్ చేశారంటూ విడాకుల తర్వాత కూడా భర్తకు 2 నుంచి 5 ఏళ్ల జైలు శిక్ష (అత్యాచారానికి విధించే కనీస శిక్ష 10 ఏళ్ల కన్నా ఇది తక్కువ) విధించడానికి కారణమైన ఐపీసీ సెక్షన్ 376బీని, ఈ ఫిర్యాదులపై కోర్టులు విచారణ జరిపే ముందు తీవ్రమైన విధానపరమైన నిబంధనలను అనుసరించాలని చెబుతున్న సీపీసీ సెక్షన్ 198బీని కూడా కొందరు పిటిషనర్లు సవాలు చేశారు.

2022లో కర్ణాటక హైకోర్టు, దిల్లీ హైకోర్టు తీర్పులతో పాటు 2025లో దిల్లీ హైకోర్టు ఇచ్చిన తీర్పు, అలాగే ఆంధ్ర ప్రదేశ్, గుజరాత్, ఉత్తరాఖండ్, ఛత్తీస్‌ఘడ్ హైకోర్టుల నిర్ణయాలను 2026 మేలో రెడ్ డాట్ ఫౌండేషన్ దాఖలు చేసిన పిటిషన్ సవాలు చేసింది.

ప్రస్తుతం ఉన్న చట్టాలు వైవాహిక హింసకు సంబంధించిన సమస్యలకు పరిష్కారం చూపుతున్నాయని, పార్లమెంట్ మాత్రమే అత్యాచారాన్ని పునర్నిర్వచించగలదని ఈ మినహాయింపును సమర్థించేవారు వాదిస్తున్నారు.

సుప్రీంకోర్టు
ఫొటో క్యాప్షన్, భారతీయ శిక్షాస్మృతి (ఐపీసీ) సెక్షన్ 375లో వైవాహిక అత్యాచారానికి సంబంధించిన మినహాయింపు-2ను, కొత్త భారతీయ న్యాయ సంహిత (బీఎన్‌ఎస్‌)లో కూడా కొనసాగించారు.

హైకోర్టులు ఎలాంటి తీర్పులు వెలువరించాయి?

వైవాహిక బంధంలో లైంగిక అంగీకారంపై హైకోర్టులు భిన్నమైన తీర్పులు ఇచ్చాయి.

విడిపోయిన భార్యా భర్తలను 'దాంపత్య హక్కుల పునరుద్ధరణ' కింద తిరిగి కాపురం చేయాలని కోర్టులు ఆదేశించేందుకు వీలు కల్పించిన హిందూ వివాహ చట్టంలోని సెక్షన్‌9ని 1983లో ఆంధ్రప్రదేశ్ హైకోర్టు కొట్టివేసింది. విడిపోయిన భర్తతో ఇష్టం లేకపోయినా భార్య బలవంతంగా కాపురం చేయడానికి ఈ సెక్షన్ అధికారం కల్పిస్తోందని కోర్టు భావించింది. ఇలా రాజ్యమే బలవంతంగా భార్యను భర్త వద్దకు కాపురం చేయమని పంపడం రాజ్యాంగంలోని 14, 21 అధికరణాలు భార్యకు కల్పించిన గోప్యత ఆత్మగౌరవం, సమానత్వ హక్కులను ఉల్లంఘించడమేనని తీర్పునిచ్చింది

ప్రస్తుతం సుప్రీంకోర్టు న్యాయమూర్తిగా ఉన్న జస్టిస్ జేబీ పార్థీవాలా 2018లో గుజరాత్ హైకోర్టు న్యాయమూర్తిగా ఉన్న సమయంలో ఓ వైద్యుడిపై భార్య మోపిన అత్యాచార అభియోగాన్ని కొట్టివేశారు. భర్త తనపై బలవంతంగా లైంగికచర్యలకు దిగాడని భార్య ఆరోపించింది.

ఈ కేసును కొట్టివేస్తూ ఐపీసీ సెక్షన్ 375లోని మినహాయింపు 2 భర్తకు రక్షణ కల్పిస్తోందని న్యాయమూర్తి పేర్కొన్నారు. అంటే, భార్య ఆరోపించిన అంశాలు సెక్షన్ 375 ప్రకారం అత్యాచారంగా పరిగణించదగినవే అయినప్పటికీ, చెల్లుబాటయ్యే వివాహ బంధం ఉన్నప్పుడు భార్య అంగీకారం లేకుండా లైంగిక చర్యలకు దిగాడనే ఆరోపణల ఆధారంగా భర్తపై అత్యాచార కేసు నమోదు చేయలేని పరిస్థితి ఈ చట్టం కింద ఉందని వివరించారు.

అలాగే, మౌఖిక లేదా ఆసన సంభోగం వంటి చర్యలకు వర్తించే, 'అసహజ నేరాల'కు శిక్ష విధించేలా సెక్షన్ 377 కింద ఉన్న అభియోగాన్ని కూడా కోర్టు కొట్టివేసింది. అయితే 498A కింద భర్త క్రూరత్వం, సెక్షన్ 354 కింద మహిళ గౌరవానికి భంగం కలిగించడం వంటి అభియోగాలను కొనసాగించేందుకు అనుమతించింది.

"వివాహం అంటే భార్యపై బలవంతంగా అత్యాచారం చేయడానికి ఇచ్చిన లైసెన్స్ కాదు" అని భర్తలకు గుర్తుచేస్తూ, దీనిని ''నేరంగా పరిగణించాల్సిన హింసాత్మక చర్య, అన్యాయం'' అని అభివర్ణిస్తూ ఈ మినహాయింపును రద్దు చేయాలని జస్టిస్ పార్థీవాలా తన తీర్పులో పార్లమెంటుకు సూచించారు.

భార్యపై అత్యాచారం చేశాడని ఆరోపణలు ఎదుర్కొంటున్న వ్యక్తిపై ఉన్న రేప్ కేసును కొట్టివేయడానికి కర్ణాటక హైకోర్టు న్యాయమూర్తి జస్టిస్ ఎం. నాగప్రసన్న 2022 మార్చిలో నిరాకరించారు. ఈకేసులో సెక్షన్ 377ను కూడా చేర్చాలని ఆదేశించారు.

వైవాహిక అత్యాచార మినహాయింపు ''తిరోగమన చర్యగా'' పేర్కొంటూ , "పురుషుడు పురుషుడే, చర్య చర్యే, అత్యాచారం అత్యాచారమే. అది 'భర్త' అనే వ్యక్తి 'భార్య' అనే మహిళపై చేసినా సరే'' అని కోర్టు వ్యాఖ్యానించింది. మౌనంగా బాధపడుతున్న మహిళల గొంతులను విని ఈ మినహాయింపును రద్దు చేయాలని పార్లమెంటుకు సూచించారు. అయితే, ఈ ఆదేశాలపై 2022 జూలైలో సుప్రీంకోర్టు స్టే విధించింది.

రెండు నెలల తరువాత ఈ అంశంపై దిల్లీ హైకోర్టుకు చెందిన ఇద్దరు న్యాయమూర్తులు భిన్నమైన తీర్పులు ఇచ్చారు.

జస్టిస్ రాజీవ్ శక్ధర్ ఈ మినహాయింపుతోపాటు, ఐపీసీలోని సెక్షన్ 376Bను, క్రిమినల్ ప్రొసీజర్ కోడ్‌లోని సెక్షన్ 198Bను కొట్టివేశారు. ఈ మినహాయింపునకు ఆధారమైన 'పెళ్లితో శాశ్వత అంగీకారం లభిస్తుంది' అనే సిద్ధాంతాన్ని ఆయన తిరస్కరించారు.

దేశంలో 99.1శాతం లైంగిక హింస బయటకు రావడం లేదని, ఇతరుల కంటే భర్తల నుంచే భార్యలకు 17 రెట్లు ఎక్కువగా లైంగిక హింస ఎదురవుతోందని చెబుతున్న 2015-16 నాటి జాతీయ కుటుంబ ఆరోగ్య సర్వేను ఉదహరించారు. దీనిని 'అత్యాచారం' గా పరిగణించకపోవడం వల్ల భార్యలకు గుర్తింపును రహస్యంగా ఉంచే హక్కు, వైద్య సహాయం, పరిహారం వంటి రక్షణలు అందకుండా పోతాయని జస్టిస్ శక్ధర్ పేర్కొన్నారు.

భర్తలకు ఉన్న ఈ రక్షణను తొలగించడం ద్వారా కొత్త నేరాన్ని సృష్టించినట్లు కాదని కూడా ఆయన అన్నారు.

మరోవైపు, జస్టిస్ సి. హరి శంకర్ ఈ మూడు నిబంధనలను సమర్థించారు. భర్తలు తమ భార్యలతో బలవంతంగా శారీరక సంబంధం పెట్టుకోకూడదని ఆయన అంగీకరించినప్పటికీ వివాహం ఓ ప్రత్యేక బంధమని, అందులో ''శారీరక సంబంధం పై న్యాయబద్ధమైన అంచనా'' అంటుందని పేర్కొన్నారు. అపరిచిత వ్యక్తి అత్యాచారానికి పాల్పడినప్పుడు కలిగే ఆగ్రహం, భర్త విషయంలో భార్యకు కలిగే ఆగ్రహం స్థాయి వేరుగా ఉంటుందని ఆయన అభిప్రాయపడ్డారు.

కోర్టులు ఈ మినహాయింపును తొలగిస్తే కొత్త నేరం ఏర్పడుతుందని ఆయన హెచ్చరించారు. దాంతో కనీసం పదేళ్ల జైలు శిక్ష విధించే అవకాశం ఉంటుందని, ఎవిడెన్స్ యాక్ట్‌లోని సెక్షన్ 114A కూడా వర్తిస్తుందని చెప్పారు. ఈ సెక్షన్ ప్రకారం లైంగిక సంబంధం జరిగినట్లు రుజువై, తాను నిరాకరించానని మహిళ చెబితే, ఆమె అంగీకారం లేదని కోర్టు భావిస్తుంది. దీనివల్ల 'పడకగదిలో నాలుగు గోడలమధ్య' తన భార్య అంగీకరించిందని భర్త నిరూపించడం "చాలా కష్టంగా, చివరికి అసాధ్యంగా కూడా" మారవచ్చని ఆయన పేర్కొన్నారు.

రెడ్ డాట్ ఫౌండేషన్ 2024 నుంచి 2025 మధ్య సవాలు చేసిన మూడు హైకోర్టు తీర్పులు కూడా భార్యలు తమ భర్తలపై ఐపీసీ సెక్షన్ 377 కింద కేసులు పెట్టకుండా నిరోధించాయి. అత్యాచార అభియోగం పెట్టే అవకాశం లేకపోవడంతో కొందరు మహిళలు ఈ సెక్షన్‌ను ఉపయోగించేవారు. 2013 చట్ట సవరణల ద్వారా మౌఖిక, ఆసన సంభోగాన్ని అత్యాచార నిర్వచనంలోకి చేర్చి, "భర్త తన సొంత భార్యతో జరిపే శారీరక సంబంధం లేదా లైంగిక చర్యలు" అనే పదాలు కలిపి మినహాయింపు 2 పరిధిని విస్తరించారు.

దీని ఆధారంగా 2024లో ఉత్తరాఖండ్ హైకోర్టు, 2025లో ఛత్తీస్‌గఢ్, దిల్లీ హైకోర్టులు భర్తలపై సెక్షన్ 377 కింద అభియోగాలు మోపడానికి వీల్లేదని తీర్పునిచ్చాయి. మినహాయింపు 2 ప్రకారం, భార్య అంగీకారానికి ప్రాధాన్యం లేదని చెప్పాయి. తన భార్యకు ప్రాణాంతక గాయాలు కలిగించిన కేసులో దోషిగా తేలిన ఒక వ్యక్తిని ఛత్తీస్‌గఢ్ హైకోర్టు నిర్దోషిగా విడుదల చేసింది. ఈ కేసులో భార్య "అంగీకారం లేకపోవడం... ప్రాధాన్యతను కోల్పోతుంది" అని కోర్టు పేర్కొంది.

మహిళ అంగీకారం
ఫొటో క్యాప్షన్, 19 రాష్ట్రాలు, కేంద్రపాలిత ప్రాంతాల ప్రభుత్వాల్లో 10 ప్రభుత్వాలు ఈ మినహాయింపును కొనసాగించడానికి మద్దతు తెలిపాయి. మూడు రాష్ట్రాలు వ్యతిరేకించాయి.

ప్రభుత్వాల వైఖరి ఏమిటి?

ప్రస్తుతం సుప్రీంకోర్టు విచారిస్తున్నఈ వ్యాజ్యాలకు సంబంధించి, వైవాహిక అత్యాచారానికి ఇచ్చిన మినహాయింపును తొలగించడాన్ని 2024 అక్టోబర్‌లో కేంద్ర ప్రభుత్వం దాఖలు చేసిన అఫిడవిట్‌లో వ్యతిరేకించింది.

"పెళ్లి అయినంత మాత్రాన మహిళ అంగీకారం తుడిచిపెట్టుకుపోదు' అని, అంగీకారం లేని వైవాహిక శారీరక సంబంధాన్ని ఖచ్చితంగా శిక్షించాలని కేంద్ర హోం శాఖ పేర్కొంది. అయితే, కనీసం 10 ఏళ్ల జైలు శిక్ష, కఠినమైన సాక్ష్యాల నిబంధనలు ఉన్న 375, 376 సెక్షన్ల కింద దీనిని 'అత్యాచారం' నేరంగా పరిగణించడం "అతి కఠినమైన చర్య, అసమంజసమని" కేంద్రం అభిప్రాయపడింది.

సెక్షన్ 498ఏ కింద భర్త క్రూరత్వం, సెక్షన్ 354 కింద మహిళ గౌరవానికి భంగం కలిగించడంపై సెక్షన్ 354ఏ కింద లైంగిక వేధింపులపై, సెక్షన్354బీ కింద మహిళను వివస్త్రను చేయడం, గృహహింస నుంచి మహిళలను రక్షించే 2005 నాటి చట్టం వంటి నిబంధనలు "తగినంత పరిష్కారాలను" అందిస్తున్నాయని పేర్కొంది.ఈ అంశాన్ని నేరంగా పరిగణించాలా వద్దా అనేది "సామాజికపరమైన ప్రశ్న. దీనిపై పార్లమెంటు ఇప్పటికే ఒక నిర్ణయానికి వచ్చింది" అని కేంద్ర ప్రభుత్వం తన వైఖరిని వివరించింది.

2012 దిల్లీ సామూహిక అత్యాచార ఘటన తర్వాత, 2013లో జస్టిస్ జె.ఎస్. వర్మ నేతృత్వంలోని కమిటీ క్రిమినల్ చట్టాల్లో మార్పులపై సిఫార్సులు చేసింది. వైవాహిక అత్యాచారానికి ఇచ్చిన మినహాయింపును తొలగించాలని, వివాహాన్ని అత్యాచార ఆరోపణల నుంచి రక్షణగా లేదా శిక్ష తగ్గించడానికి కారణంగా పరిగణించకూడదని సూచించింది.

అయితే, పార్లమెంటు ఈ సిఫార్సును అమలు చేయలేదు. 2013లో ఐపీసీలో అత్యాచారం నిర్వచనాన్ని మార్చినప్పుడు కూడా ఈ మినహాయింపును తొలగించలేదు. 2023లో భారతీయ న్యాయ సంహిత (BNS)ను తీసుకొచ్చినప్పుడూ అలాగే కొనసాగించింది.

"వైవాహిక బంధంలో మితిమీరిన జోక్యం" ఉంటుందని హెచ్చరించిన 2000 నాటి 172వ లా కమిషన్ నివేదికను, అలాగే ఈ మినహాయింపును తొలగిస్తే "వివాహ వ్యవస్థ నాశనమవుతుందని", కుటుంబాలు "తీవ్ర ఒత్తిడికి" గురవుతాయని పేర్కొన్న 2013 పార్లమెంటరీ ప్యానెల్ నివేదికను పార్లమెంటు ఇందుకు కారణాలుగా చూపింది.

దీనిపై రాష్ట్రాలతో జరిపిన సంప్రదింపులలో స్పందించిన 19 రాష్ట్రాలు, కేంద్రపాలిత ప్రాంతాల్లో అసోం, ఛత్తీస్‌గఢ్, గోవా, ఉత్తరప్రదేశ్, గుజరాత్, మధ్యప్రదేశ్, మణిపూర్, ఉత్తరాఖండ్, చండీగఢ్, లద్ధాఖ్ ఈ మినహాయింపును కొనసాగించడానికి మద్దతు తెలిపాయి. దిల్లీ, త్రిపుర, కర్ణాటక మాత్రమే దీనిని వ్యతిరేకించాయి. మిగిలిన ఆరు ప్రభుత్వాలు తమ వైఖరిని వెల్లడించలేదు.

బాధిత మహిళకు బలమైన సహాయక వ్యవస్థ లేకపోవడం వల్ల భార్యలు, పిల్లలు "నిరాశ్రయులై, జీవనాధారం లేక అల్లాడే పరిస్థితి" ఏర్పడవచ్చని జాతీయ మహిళా కమిషన్ హెచ్చరిస్తూ, ప్రస్తుత విధానాన్నే కొనసాగించాలని సూచించింది.

కేంద్ర మహిళా, శిశు అభివృద్ధి మంత్రిత్వ శాఖ కూడా ఇదే వైఖరిని సమర్థించింది. ఈ మినహాయింపును తొలగించడం వల్ల "దాంపత్య బంధంపై తీవ్ర ప్రభావం పడవచ్చు. వివాహ వ్యవస్థలో తీవ్రమైన సమస్యలు తలెత్తవచ్చు" అని ఆందోళన వ్యక్తం చేసింది. అంతేకాకుండా, అంగీకారం ఉందా లేదా అన్నది నిరూపించడం కష్టమైన, సవాలుతో కూడుకున్న అంశమని పేర్కొంటూ, ఈ చట్టాన్ని దుర్వినియోగం చేసే అవకాశం ఉందని కూడా తెలిపింది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)