ఇన్‌స్టాగ్రామ్‌: మీ ఫేవరెట్ క్రియేటర్ పేరుతో మీతో చాట్ చేసేది ఎవరు?

ఇన్‌స్టాగ్రామ్
ఫొటో క్యాప్షన్, ఇన్‌స్టాగ్రామ్ ఏఐ ఆటో రిప్లైస్ ఫీచర్ ప్రస్తుతం యూజర్లందరికీ అందుబాటులో లేదని ఇన్‌స్టాగ్రామ్ పేర్కొంది.
    • రచయిత, మల్యాల జాహ్నవి
    • హోదా, బీబీసీ కోసం
  • ప్రచురణ
  • చదివే సమయం: 6 నిమిషాలు

ఓ రోజు నాకు ఇన్‌స్టాగ్రామ్ నుంచి ఓ కొత్త నోటిఫికేషన్ వచ్చింది. దాని పేరు 'ఏఐ ఆటో రిప్లైస్ ఫీచర్.. ఇదేదో సాధారణ ఫీచరే కదా అనుకుంటూ దానిపై క్లిక్ చేశా. ఆ తరువాత కొంతసేపటికి ఆ విషయమే మరిచిపోయా.

కొన్ని గంటల తర్వాత నా డీఎంలు (డైరెక్ట్ మెసేజ్‌లు) చెక్ చేస్తుంటే నా ఫాలోవర్లు అడిగిన ప్రశ్నలకు సమాధానాలు ఇచ్చినట్టు కనిపించింది. విచిత్రం ఏమిటంటే ఆ సమాధానాలు నేనిచ్చినవి కావు. నేను టైప్ చేయలేదు. కనీసం ఆన్‌లైన్‌లో కూడా లేను.

మరి నా డీఎంలకు సమాధానం ఇచ్చింది ఎవరు?

‘‘అది మెటా ఏఐ’’ అని ఒక ఇన్‌స్టాగ్రామ్ క్రియేటర్ చెప్పారు.

అంటే సోషల్ మీడియాలో మీరు ఫాలో అవుతున్న వ్యక్తితోనే మాట్లాడుతున్నారా? లేక వారి స్థానంలో ఆర్టిఫిషియల్ ఇంటెలిజెన్స్‌(ఏఐ)తో మాట్లాడుతున్నారా? ఇప్పుడు ఇన్‌స్టా యూజర్స్‌ను వెంటాడుతున్న ప్రశ్న ఇదే. ఇంతకీ అసలేంటీ ఫీచర్? ఇదెలా పనిచేస్తుంది? దీనికారణంగా నమ్మకం, గోప్యత, వ్యక్తిగత అనుబంధంపై ఎలాంటి ప్రశ్నలు తలెత్తుతున్నాయి? ఏఐ రిప్లై ఇస్తే ఇబ్బందులు రావా? దీనిపై మెటా, ఇన్‌స్టాగ్రామ్ ఏం చెబుతున్నాయి?

బీబీసీ న్యూస్ తెలుగు వాట్సాప్ చానల్‌
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి
ఇన్‌స్టాగ్రామ్
ఫొటో క్యాప్షన్, ఏఐ సమాధానం ఇచ్చిన మెసేజ్‌లను ఇన్‌బాక్స్‌లోని 'యువర్ ఏఐ రిప్లయిడ్ ఫిల్టర్ ద్వారా ఒకేచోట చూసి, అవసరమైతే నేరుగా మీరు కూడా ఆ చాట్‌లో జాయిన్ కావచ్చని ఇన్‌స్టాగ్రామ్ తన వెబ్‌సైట్‍‌‌లో పేర్కొంది.

ఇన్‌స్టాగ్రామ్ తన అధికారిక వెబ్‌సైట్‌లో చెప్పిన వివరాల ప్రకారం.. ఏఐ ఆటో రిప్లైస్ క్రియేటర్ ఏఐకు చెందిన ఒక ప్రత్యేక ఫీచర్.

క్రియేటర్లు ఎంపిక చేసుకున్న ఆడియెన్స్ నుంచి వచ్చే డీఎంలకు (డైరెక్ట్ మెసేజ్‌లకు) ఆటోమేటిక్‌గా సమాధానం చెప్పేందుకు ఈ ఫీచర్ ఉపయోగపడుతుంది.

దీనివల్ల సమయం ఆదా అవ్వడమే కాకుండా ఎక్కువ మంది అభిమానులను క్రియేటర్లు చేరుకునేందుకు ఉపయోగపడుతుంది అని ఇన్‌స్టాగ్రామ్ చెబుతోంది.

ఏఐ ఆటో రిప్లైస్: క్రియేటర్లకు ప్రయోజనాలేంటి?

మీ ఏఐ సమాధానాల కోసం ఏ ఇన్‌స్టాగ్రామ్, థ్రెడ్స్ కంటెంట్‌ను ఉపయోగించాలి, ఏయే కొత్త లింక్‌లను షేర్ చేయాలి, ఏ అంశాలకు దూరంగా ఉండాలి వంటి ఆప్షన్స్ మీరే సెట్ చేసుకోవచ్చు.

మీరు ఫాలో అవ్వని వారికి లేదా ఎంపిక చేసుకున్న వారికి మాత్రమే సమాధానం ఇచ్చేలా ఆడియెన్స్‌ను ఎప్పుడైనా మార్చుకోవచ్చు.

ఏఐ పంపే మెసేజ్‌లు "ఏఐ-మీ పేరు" లేబుల్‌తో కనిపిస్తాయి. మీరు స్వయంగా చాట్ చేస్తున్నప్పుడు ఏఐ ఆగిపోతుంది, మీరు చాట్ చేయడం ఆపేసిన కాసేపటికి మళ్ళీ మొదలవుతుంది.

ఏఐ సమాధానం ఇచ్చిన మెసేజ్‌లను ఇన్‌బాక్స్‌లోని 'యువర్ ఏఐ రిప్లయిడ్ ఫిల్టర్ ద్వారా ఒకేచోట చూసి, అవసరమైతే నేరుగా మీరు కూడా ఆ చాట్‌లో జాయిన్ కావచ్చు.

అయితే ఈ ఏఐ కేవలం ఇంగ్లిష్‌ భాషలోనే శిక్షణ పొందిందని ఇన్‌స్టాగ్రామ్ వెబ్‌సైట్‌ పేర్కొంది. ఇతర భాషల్లో ఖచ్చితత్వం తక్కువగా ఉండవచ్చని తెలిపింది.

దీన్ని వైద్య, ఆర్థిక లేదా న్యాయపరమైన నిపుణుల సలహాలకు ప్రత్యామ్నాయంగా ఉపయోగించకూడదని సూచించింది. అయితే ఏఐ ఆటో రిప్లైస్ ఫీచర్ వద్దనుకుంటే, ఎప్పుడైనా క్రియేటర్లు దాన్ని ఆఫ్ చేసుకునే సౌకర్యం ఉందని ఇన్‌స్టాగ్రామ్ పేర్కొంది.

ఏఐ, మెటా

ఎవరికి అందుబాటులో..

ఇన్‌స్టాగ్రామ్ ఏఐ ఆటో రిప్లైస్ ఫీచర్ ప్రస్తుతం యూజర్లందరికీ అందుబాటులో లేదని ఇన్‌స్టాగ్రామ్ పేర్కొంది. దానికి ప్రత్యేకంగా ప్రొఫెషనల్ అకౌంట్ అంటే క్రియేటర్ లేదా బిజినెస్ అకౌంట్ ఉండాలి.

అలాగే ఇది కేవలం ఇన్‌స్టాగ్రామ్ మొబైల్ యాప్‌కు మాత్రమే పరిమితం. ఈ ఫీచర్‌ను వాడాలంటే మీరు మెటా ఏఐ స్టూడియోని ఉపయోగించి 'క్రియేటర్ ఏఐ'ని రూపొందించి ఉండాలి.

అంతేకాక అధికారిక ఇన్‌స్టాగ్రామ్ క్రియేటర్ ఏఐ నిబంధనలకు అంగీకరించి ఉండాలి. అప్పుడు మాత్రమే మీరు ఈ ఫీచర్‌ని ఉపయోగించుకోగలరు.

ఏఐ రిప్లై
ఫొటో క్యాప్షన్, మన బదులు ఏఐ రిప్లై ఇస్తోందని ఫ్యాన్స్‌కి తెలిస్తే, వాళ్లు చాలా బాధపడతారని క్రియేటర్ వైష్ణవి అన్నారు.

‘సహజత్వమే ముఖ్యం’

ఈ క్రియేటర్ అకౌంట్‌లో అత్యంత విలువైన అంశం కంటెంటా? లేక ఆ వ్యక్తా? ఈ ప్రశ్నపై ముగ్గురు కంటెంట్ క్రియేటర్లతో బీబీసీ మాట్లాడింది.

నెవిల్‌కు ఇన్‌స్టాగ్రామ్‌లో 20 వేల మందికి పైగా ఫాలోవర్స్ ఉన్నారు. బీబీసీ ఆయనతో మాట్లాడినప్పుడు, కొన్ని ఆసక్తికరమైన ప్రశ్నలను లేవనెత్తారు.

''ఫాలోవర్లు కేవలం కంటెంట్ కోసమే కాకుండా, క్రియేటర్ వ్యక్తిత్వంపై నమ్మకంతో అనుబంధాన్ని పెంచుకుంటారు. సినిమాల్లో హీరో బదులు 'బాడీ డబుల్' నటించినట్లు, క్రియేటర్ పేరుతో ఏఐ సమాధానాలు ఇవ్వడం వారిని మోసం చేసినట్లే అవుతుంది. దీనివల్ల సహజమైన ఎమోషన్స్, వ్యక్తిగత అనుబంధం దెబ్బతింటాయి'' అని ఆయన అభిప్రాయపడ్డారు.

మరోవైపు ఏఐ పొరపాటున ఏదైనా తప్పుడు సమాచారం ఇస్తే, దానికి క్రియేటర్లే పూర్తి బాధ్యత వహించాల్సి వస్తుంది. కేవలం ట్రెండ్ కోసం డబ్బులు ఖర్చు పెట్టి ఏఐ టూల్స్ వాడటం వల్ల నిజమైన ప్రయోజనం లేకపోగా, క్రియేటర్ తన సొంత అస్థిత్వాన్ని కోల్పోయే ప్రమాదం ఉందని నెవిల్ హెచ్చరించారు.

''లక్షల మంది ఫాలోవర్లకు 24 గంటల్లో సమాధానం ఇవ్వడం కష్టమైనప్పటికీ, అందుకు ఏఐ సరైన ప్రత్యామ్నాయం కాదు. మనిషి భావోద్వేగాలను అర్థం చేసుకునే మెరుగైన టెక్నాలజీ వచ్చే వరకు, ఏఐని కేవలం అత్యవసర బేసిక్ సమాచారానికి మాత్రమే పరిమితం చేయాలి. తక్కువ మందికైనా సరే క్రియేటర్లే స్వయంగా సమాధానం ఇవ్వడం వల్ల ఫాలోవర్ల నమ్మకం, ఆప్యాయత ఎప్పటికీ చెక్కుచెదరకుండా ఉంటాయి'' అని నెవిల్ స్పష్టం చేశారు.

ఫాలోవర్
ఫొటో క్యాప్షన్, ఒక ఫాలోవర్ మీతో కంఫర్టబుల్‌గా మాట్లాడాలనుకున్నప్పుడు, ఏఐ ఇచ్చే రోబోటిక్ సమాధానాలు వారికి అస్సలు సౌకర్యవంతంగా అనిపించవని నెవిల్ అన్నారు.
చాట్ బాట్
ఫొటో క్యాప్షన్, సాంకేతిక మార్పులు వచ్చినప్పటికీ, చాట్‌బాట్‌లు మనుషుల భావోద్వేగాలను వ్యక్తపరచలేవని క్రియేటర్ స్వేచ్ఛ గాండ్ల చెప్పారు.

ఇన్‌ఫ్లుయెన్సర్స్ ఏమంటున్నారు..

''మనం పార్ట్ టైం కంటెంట్ క్రియేషన్ చేసినప్పుడు, కొలాబ్స్ కోసం, డైరెక్ట్ మెసేజ్‌ల కోసం ప్రత్యేకంగా సమయం కేటాయించాలి అంటే చాలా కష్టం. ఏఐ వల్ల పని భారం కాస్త తగ్గుతుంది. అలాగే బిజినెస్ అవసరాల కోసం ఏఐ వాడటం అయితే చాలా మంచి ఐడియానే. కానీ ఒక క్రియేటర్‌గా మన బదులు ఏఐ రిప్లై ఇస్తోందని ఫ్యాన్స్‌కి తెలిస్తే, వాళ్లు చాలా బాధపడతారు'' అని మరొక క్రియేటర్ వైష్ణవి అన్నారు.

అలాగే బీబీసీ మాట్లాడిన మూడవ క్రియేటర్ స్వేచ్ఛ గాండ్ల కూడా ఇదే రకమైన అభిప్రాయాన్ని వ్యక్తం చేశారు. సాంకేతికత పరంగా మార్పులు వచ్చినప్పటికీ, చాట్‌బాట్‌లు మనుషుల భావోద్వేగాలను వ్యక్తపరచలేవని ఆమె చెప్పారు.

అలాగే ఏఐ ద్వారా జరిగే ఏవైనా తప్పుడు సంభాషణలకు అకౌంట్ హోల్డరే పూర్తి బాధ్యత వహించాల్సి ఉంటుందని స్వేచ్ఛ స్పష్టం చేశారు. ఈ విధానం ఫాలోవర్లతో అనుబంధాన్ని పెంచడానికి ఒకవైపు ఉపయోగపడినా.. మరోవైపు దాన్ని బలహీనపరిచే అవకాశం కూడా ఉందని ఆమె అభిప్రాయపడ్డారు.

'పని భారం తగ్గుతుంది’

కంటెంట్ ఇండస్ట్రీలో ఎన్నో ఏళ్లుగా పనిచేస్తున్న వ్యక్తి సుధీర్‌ మాట్లాడుతూ.. "ఒకప్పుడు 10 వేల మందికి రిప్లై ఇవ్వాలంటే నేనో లేదా నా టీమో ఇచ్చేవాళ్లం. కానీ ఈ ఆటో-రిప్లై సెటప్‌తో 'ఫ్రెండ్' అని టైప్ చేయగానే లక్షకు పైగా డౌన్‌లోడ్స్ సాధ్యమయ్యాయి. ఎన్ని కామెంట్స్ పెట్టినా రిప్లై రాదు అనుకునే నా ఫాలోవర్స్‌కు ఇప్పుడు క్షణాల్లో రిప్లై వెళ్లడం నాకు, వాళ్లకు ఎంతో నచ్చుతోంది" అన్నారు.

"ఏఐ ఆటో రిప్లైస్ వల్ల క్రియేటర్స్‌కి పని భారం తగ్గడమే కాకుండా, కంటెంట్ ఎక్కువ మందికి ఉపయోగపడే అవకాశం ఉంది. ఈ ఫీచర్ వల్ల ఫాలోవర్స్ పెరగడమే కాకుండా, కంటెంట్ మరింత ఎంగేజింగ్‌గా ఉంటుంది. నిజం చెప్పాలంటే, ఇది ఇన్‌స్టాగ్రామ్‌లో ఒక రివల్యూషనరీ ఫీచర్. ఇది టైమ్, మనీ, ఎమోషన్స్‌ని ఎంతో సేవ్ చేస్తోంది" అని వశిష్ఠ 360 ఛానల్ వ్యవస్థాపకులు వంశీ కృష్ణ అన్నారు.

అయితే ''మా ఏఐ మోడళ్ల పనితీరును మెరుగుపరచడానికి, మెటా మీ సందేశాల వంటి సమాచారాన్ని సేకరించి, ఉపయోగించుకోవచ్చు'' అని ఇన్‌స్టాగ్రామ్ తన అధికారిక సైట్‌లో పేర్కొంది. అంటే, ఏఐ ఇచ్చే సమాధానాలను మెరుగుపరిచేందుకు మెటా ఇంకా వర్క్ చేస్తోంది. మరింత మెరుగ్గా సమాధానాలు ఇచ్చేందుకు దీన్ని తీర్చిదిద్దుతోంది ఈ కంపెనీ.

అంతేకాక ఇన్‌స్టాగ్రామ్ ఏఐ ఆటో రిప్లయిస్ ఫీచర్‌ను ఇంకా ప్రపంచవ్యాప్తంగా దశల వారీగా లాంచ్ చేసే దశలోనే ఉంది. ఇంకా పూర్తిగా ఇది అందుబాటులోకి రాలేదు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)