ఫ్యాట్ అంటే భయపడుతున్నారా? శరీరంలో కొవ్వు బాగా తగ్గిపోతే ఎంత ప్రమాదమో తెలుసా

ఫొటో సోర్స్, Getty Images
- రచయిత, మెలిస్సా హోజెన్బూమ్
- హోదా, బీబీసీ ప్రతినిధి
- ప్రచురణ
- చదివే సమయం: 6 నిమిషాలు
హార్మోన్లు విడుదల చేయడం నుంచి శరీర ఉష్ణోగ్రతలను నియంత్రించడం వరకు చాలా పనుల్లో మన శరీరంలోని కొవ్వు కీలక పాత్ర పోషిస్తుంది.
అందుకే విపరీతంగా బరువు తగ్గేయాలని అనుకోవడం కూడా ఆరోగ్యకరం కాకపోవచ్చు.
చాలా ఏళ్లుగా కొవ్వు అనే పదార్థాన్ని బూచిగా చూస్తున్నాం.
మన ఆహార సంస్కృతి కొవ్వుని కరిగించాలనే చెబుతోంది.
‘తక్కువ కొవ్వు’ ఉందంటూ కొన్ని ఆహార సంస్థలు తమ ఉత్పత్తులను ప్రచారం చేసుకుంటాయి.
కాసేపు సామాజిక మాధ్యమాల్లో స్క్రోల్ చేస్తే చాలు, బరువు తగ్గడంపై సలహాలు కనిపిస్తాయి.
కొవ్వు తక్కువగా ఉండి, నరాలు, కండరాలు స్పష్టంగా ఏర్పడిన సన్నని శరీరాల్లోనే దృఢత్వం ఉంటుందన్నట్లుగా చెబుతాయి అలాంటి పోస్ట్లు.
సన్నగా ఉండాలనే ట్రెండ్ ఈ ఏడాది కూడా కనిపిస్తోందని నిపుణులు ఆందోళన చెందుతున్నారు. వెయిట్ లాస్ డ్రగ్స్కి వస్తున్న పాపులారిటీ కూడా అందుకు కారణం.

అధిక కొవ్వు వల్ల ఆరోగ్య సమస్యలు తలెత్తి, ఊబకాయానికి దారితీయవచ్చు.
అయితే కొవ్వు బాగా తక్కువగా ఉండటం కూడా ఆరోగ్యానికి మంచిది కాదు అంటున్నారు నిపుణులు.
కొవ్వుని పూర్తిగా కరిగించేయడం వల్ల శారీరకంగా, సామాజికంగా హానికరమని చెబుతున్నారు.
"మనం మన శరీరంలోని కొవ్వుని ప్రేమించాలి. అది జీవక్రియలో కీలక పాత్ర పోషిస్తుంది." అని యూనివర్సిటీ ఆఫ్ మిషిగన్లో ప్రొఫెసర్ ఆఫ్ మెడిసిన్, ఎండోక్రైనాలజిస్ట్గా ఉన్న ఎలిఫ్ ఓరల్ అన్నారు.
ఎంత అవసరం?
శరీరంలో ప్రధానంగా రెండు రకాల కొవ్వు పదార్థాలు ఉంటాయి. అవి.. డైటరీ ఫ్యాట్, బాడీ ఫ్యాట్.
మనం తినే ఆహారం ద్వారా లభించే దానిని డైటరీ ఫ్యాట్ అంటారు.
ప్రస్తుతం మనకు అవసరం లేని ఎనర్జీని శరీరం సహజంగా దాచిపెట్టుకునే విధానమే బాడీ ఫ్యాట్.
ఆహారం తీసుకున్నప్పుడు, అందులోని డైటరీ ఫ్యాట్స్, కార్బోహైడ్రేట్స్, ప్రోటీన్స్ని కరిగించి శరీరం ఇంధనంగా వాడుకుంటుంది.
శరీరంలో కార్బోహైడ్రేట్స్.. గ్లూకోజ్గా, ప్రోటీన్స్.. ఎమైనో యాసిడ్స్గా, ఫ్యాట్స్.. ఫ్యాటీ యాసిడ్స్గా మారుతాయి.
సమతుల్యత ఉన్నప్పుడే శరీరాలు అత్యున్నతంగా పనిచేస్తాయి. ఏదైనా అధికంగా ఉన్నా, అత్యల్పంగా ఉన్నా ప్రమాదమే.
మనం వాడుకునే దానికన్నా అధిక క్యాలరీలను పదేపదే తీసుకోవడం వల్ల అడిపోసైట్స్ అనే కొవ్వు కణాల్లో లిపిడ్స్ రూపంలో ఈ పోషకాలు పేరుకుపోతాయి. దీని కారణంగా కొవ్వు కణాల సైజ్ పెరుగుతుంది.
బాడీ ఫ్యాట్ అనేది శరీరంలో ఊరికే ఉండేది కాదు. శరీర క్రియలను నియంత్రిస్తూ, చురుకుగా పనిచేసే ఒక అవయవం.
"బాడీ ఫ్యాట్ని ఒక ప్రత్యేకమైన స్టోరేజ్ వాల్ట్ అనుకోవచ్చు.
ఎనర్జీ అధికంగా ఉన్నప్పుడు పోషకాలను దాచిపెట్టి, అవసరమైన సమయంలోనే వాటిని విడుదల చేస్తుంది.
ఆహార కొరతలను తట్టుకొని మన పూర్వీకులు బయటపడేందుకు ఈ వ్యవస్థ దోహదం చేసింది." అని స్వీడన్లో కరోలిన్స్కా ఇనిస్టిట్యూట్ క్లినికల్, ఎక్స్పెరిమెంటల్ ఫ్యాట్ టిష్యూ ఫ్రొఫెసర్ మైఖేల్ రైడెన్ తెలిపారు.
కొవ్వు చేసే మరో ముఖ్యమైన పని సమాచారాన్ని చేరవేయడం. మన దగ్గర ఎంత ఎనర్జీ ఉంది? ఇంకా ఎంత కావాలి? అనే విషయాన్ని కొవ్వు విడుదల చేసే హార్మోన్లు శరీరంలోని ఇతర భాగాలకు తెలియజేస్తాయి. అందులో ముఖ్యమైనది 'లెప్టిన్' అని ఓరల్ పేర్కొన్నారు.
"మన దగ్గర సరిపడ ఎనర్జీ నిల్వ ఉందని మెదడుకి లెప్టిన్ చెబుతుంది. దీంతో బ్రెయిన్ రిలాక్స్ అవ్వొచ్చు. అప్పుడిక రీప్రొడక్షన్ (ప్రత్యుత్పత్తి), ఇన్ఫెక్షన్లను ఎదుర్కోవడం వంటి ఇతర ముఖ్యమైన జీవక్రియలపై అది దృష్టి సారించగలుగుతుంది" అని ఓరల్ చెప్పారు.
లెప్టిన్ లేకపోతే మన దగ్గర ఎంత ఎనర్జీ ఉందో తెలియక మెదడు ఆందోళన చెందుతుంది. దాని ప్రభావం ఇతర ముఖ్యమైన క్రియలపై పడుతుంది.
శరీరం వెచ్చగా ఉండేందుకు కూడా బాడీ ఫ్యాట్ కీలకం. ప్రత్యేకమైన కణాల ద్వారా ఎనర్జీని మండించి వేడిని ఉత్పత్తి చేస్తుంది. అది శరీరం తన ఉష్ణోగ్రతలను సమతుల్యం చేసుకునేందుకు ఉపయోగపడుతుంది.

ఫొటో సోర్స్, Getty Images
కొవ్వు తక్కువగా ఉంటే?
కొవ్వు అధికంగా ఉంటే ఎలాంటి ఆరోగ్య సమస్యలు వస్తాయనేది బాగా తెలిసిందే.
గుండె సంబంధిత సమస్యలు, టైప్ 2 డయాబెటిస్, కొన్ని రకాల క్యాన్సర్లు, ఆస్టియోఅర్థరైటిస్ వంటి ప్రమాదాలను పెంచుతాయి.
అయితే కొవ్వు అతి తక్కువగా ఉండటమూ అంత మంచిది కాదు.
"క్యాలరీలను అతి తక్కువగా తీసుకోవడం వల్ల శరీరంలో బాడీ ఫ్యాట్ బాగా పడిపోతుంది. అది మన ఆరోగ్యం, శరీర పనితీరుపై తీవ్ర ప్రభావం చూపుతుంది." అని మిషిగాన్ విశ్వవిద్యాలయంలో జీవక్రియ వ్యాధులపై పరిశోధన చేస్తున్న గ్రాడ్యుయేట్ విద్యార్థిని జెస్సికా మౌంగ్ వివరించారు.
కొవ్వు తక్కువగా ఉంటే శరీరం ఎనర్జీని దాచుకునేందుకు ప్రయత్నిస్తుంది.
రోగనిరోధక వ్యవస్థతో పాటు అనేక వ్యవస్థలు పనిచేయడం ఆగిపోతాయి.
ఎలాంటి నిల్వలు లేకపోతే శరీరం తన ఎనర్జీ కోసం కండరాలను కరిగించడం మొదలుపెడుతుంది.
ఎముకల నిర్మాణం సైతం ఆగిపోతుంది.
ఈ కారణంగా శరీరం క్షీణించి, అవయవాలు దెబ్బతినే ప్రమాదం ఉందని ఆక్స్ఫర్డ్ విశ్వవిద్యాలయంలో మెటబాలిక్ మెడిసిన్ ఫ్రొఫెసర్ ఫ్రెడెరిక్ కార్పే అన్నారు.
ఇలాంటి పరిస్థితుల్లో తీవ్రమైన ఇన్ఫెక్షన్లు తలెత్తితే శరీరం తట్టుకోలేదని చెప్పారు.
బాడీ ఫ్యాట్ అతి తక్కువగా ఉంటే అది మన హార్మోన్లను, రీప్రోడక్టివ్ హెల్త్ని దెబ్బతీస్తుంది. తక్కువగా తినే అతి సన్నగా ఉన్న పురుషుల్లో టెస్టోస్టిరాన్ స్థాయిలు, ఫిజికల్ ఫర్మార్మెన్స్ పడిపోయే ప్రమాదం ఉంది.
అతి తక్కువ బాడీ ఫ్యాట్ గల మహిళా అథ్లెట్లలో సమయానికి పీరియడ్స్ రాకపోవడం లేదా పూర్తిగా ఆగిపోవడం లాంటివి జరగవచ్చు.
ఊబకాయుల్లో గుండె సంబంధ సమస్యలు ఎక్కువగా వచ్చే ప్రమాదం ఉంది.
అయితే మరణాలు మాత్రం కొవ్వు తక్కువగా ఉన్నవారిలోనే అధికమని పలు అధ్యయనాలు చెబుతున్నాయి. దీనినే ఒబేసిటీ పారడాక్స్ అంటారు.
తీవ్రమైన గుండె సమస్యలు, స్ట్రోక్స్, ఇతర వ్యాధులను తట్టుకునే శక్తి శరీరానికి కొవ్వు అందిస్తున్నట్లు ఉందని ఓరల్ చెప్పుకొచ్చారు.
చాలా అరుదైన సందర్భాల్లో, కొవ్వు అతి తక్కువగా ఉండటం ప్రాణాంతకమూ కావొచ్చు. యానొరెక్సియా నర్వోసా (బరువు ఎక్కువగా ఉంటే అందరూ ఏమనుకుంటారో అని ఆందోళన చెందుతూ చాలా పరిమితంగా తినడం) అనే మానసిక ఆరోగ్య స్థితిలో దీర్ఘకాలంలో అవయవాలు దెబ్బతినడం, లేదా చనిపోవడం వంటివి సంభవించవచ్చు.

ఫొటో సోర్స్, Getty Images
ఎంత మేర అవసరం?
మన శరీరంలోని బాడీ ఫ్యాట్ని కొలవడం చాలా కష్టం. అయితే అందరికీ దాని అవసరం ఒకే స్థాయిలో ఉండదు. అది వ్యక్తులు, జెండర్, జాతి వంటి అనేక అంశాలపై ఆధారపడి ఉంటుంది.
అయినప్పటికీ, సాధారణంగా ఆరోగ్యవంతమైన పురుషుల్లో 10-20 శాతం బాడీ ఫ్యాట్ ఉంటుంది.
అదే మహిళల్లో అయితే అది 20 నుంచి 29 శాతం. ఊబకాయుల్లో బాడీ ఫ్యాట్ 30శాతానికి పైగా ఉంటుంది.
అథ్లెట్లలో బాడీ ఫ్యాట్ సాధారణంగా తక్కువగా ఉంటుంది.
"అత్యల్ప బాడీ ఫ్యాట్ ఎంత అని డెక్సా స్కానర్ ద్వారా కొలిచినప్పుడు, అది ఓ పురుష అథ్లెట్లో 10శాతం, మహిళా అథ్లెట్లో 16శాతంగా ఉన్నట్లు తేలింది. ఈ ఫలితం పట్ల కొందరు అథ్లెట్లు ఆశ్చర్యం వ్యక్తం చేశారు. వారు తమ బాడీ ఫ్యాట్ 1-2శాతమే ఉంటుందని భావించారు." అని డెట్రాయిట్లోని వేన్ స్టేట్ యూనివర్సిటీ వదద్ స్పోర్ట్స్ ఫర్మార్మెన్స్ రీసెర్చర్గా ఉన్న తమరా హ్యూ బట్లర్ వెల్లడించారు. ఈ అధ్యయనం కోసం రోజూ ట్రైనింగ్ తీసుకునే 700లకు పైగా అథ్లెట్లను డెక్సా స్కానర్ ద్వారా బట్లర్ స్కాన్ చేశారు.
కొవ్వును ఎక్కడ నిల్వ చేస్తున్నారు అనేది కూడా ముఖ్యమే. అధికంగా ఉంటే బెల్లీ ఫ్యాట్ (విసెరల్ ఫ్యాట్) చాలా ప్రమాదకరం. చర్మం కింద ఉంటే కొవ్వు కన్నా, బెల్లీ ఫ్యాట్ కీలకమైన అవయవాల చుట్టూ ఉండి, మంటగొలిపే రసాయనాలను విడుదల చేస్తుంది. దీనివల్ల రక్తపోటు పెరిగి, ఇన్సులిన్కి ఆటంకం ఏర్పరుస్తుంది. దీంతో శరీరానికి బ్లడ్ షుగర్ని నియంత్రించడం కష్టమై, టైప్ 2 డయాబిటిస్ ముప్పు పెరుగుతుంది.
ఆరోగ్యకరమైన శరీరం కోసం బాడీ ఫ్యాట్ని కచ్చితత్వంతో కొలవాల్సిన పనిలేదు. ఆరోగ్యకరమైన బరువుని నిర్వహిస్తూ, కొవ్వు ఎక్కడికి చేరుతుందో తెలుసుకునేందుకు రెండు మార్గాలు ఉన్నాయి.
కడుపు భాగంలో ఎంత కొవ్వు ఉందో తెలుసుకునేందుకు టేప్తో నడుము-ఎత్తు నిష్పత్తి కొలిచి చూడొచ్చు. ఆ రేంజ్ 0.4 నుంచి 0.49 మధ్య ఉంటే మంచిది.
నడుము-తుంటి నిష్పత్తి మరో విధానం. ఇందులో పురుషులకు 0.90, మహిళలకు 0.85 కన్నా ఎక్కువగా వస్తే బాడీ ఫ్యాట్ అధికంగా ఉన్నట్లు.
బాడీ ఫ్యాట్ని కొలిచేందుకు బాడీ మాస్ ఇండెక్స్ (బీఎమ్ఐ) చూడటం సరికాదు. ఎందుకంటే అది బాడీ ఫ్యాట్ని, కండరాల బరువుని వేరు చేసి చూడలేదు. కండరాలు అధికంగా ఉండి, తక్కువ కొవ్వు ఉన్నవారిలోనూ బీఎమ్ఐ అధికంగా ఉండొచ్చు.
వయసు పెరిగేకొద్దీ మీ బాడీ కంపోజిషన్ ఎలా ఉందో తెలుసుకోవాలనే కుతూహలం పెరగవచ్చు. కొవ్వు పెరుగుతూ, కండరాలు, ఎముకలు బలహీనపడొచ్చు. దీనివల్ల తీవ్రమైన ఆరోగ్య సమస్యలు వస్తాయి. అందుకే ఆరోగ్యవంతమైన భోజనం చేయడం, వ్యాయామాలు, స్ట్రెంగ్త్ ట్రైనింగ్ వంటివి చాలా ముఖ్యం.
కొవ్వు.. మన జీవితంలో ఎందుకు, ఎంత ముఖ్యమో తెలుసుకొని, దానిని తీవ్రంగా కరిగించేయాలనే లక్ష్యాలకు దూరంగా ఉండటం మంచిది. తక్కువ కొవ్వు ఉండాలని ప్రయత్నించడం కన్నా సరైన మోతాదులో ఉంచుకోవడం ముఖ్యం. అందుకే 'కొవ్వు అనేది అందమైనది, శక్తిమంతమైనది' అని ఓరల్ అంటారు.
(బీబీసీ కోసం కలెక్టివ్ న్యూస్రూమ్ ప్రచురణ)
(బీబీసీ తెలుగును వాట్సాప్, ఫేస్బుక్, ఇన్స్టాగ్రామ్, ట్విటర్లో ఫాలో అవ్వండి. యూట్యూబ్లో సబ్స్క్రైబ్ చేయండి.)





























