BBC News, Somali
U gudub qaybta macluumaadka

Faransiiska oo wajahaya hubanti la'aan siyaasadeed kadib markii doorashadii baarlamaanka aaney cidna helin aqlabiyad

Dagaalka ayaa waxaa ku dhintay tiro badan oo ah miliiishiyaadkii iska soo horjeeday

Tebin toos ah

  1. War deg deg ah, Saddex kamid ah ciidanka dab damiska oo ku geeriyoodaay dabka Keymaha

    DABKA

    Xigashada Sawirka, EPA

    Saddex ka mid ah dab-demiyeyaasha Giriigga ayaa ku geeriyooday iyagoo la tacaalaya dababka kaymaha ee ka kacay jasiiradda Kereetee (Crete) iyo gacanka Peloponnese.

    Dabeylo xooggan ayaa sii huriyay ololka dabka Jasiiradda Kereetee, taasoo sababtay in dadka laga daadgureeyo dhowr tuulo.

    Laba dab-demiyeyaal ah ayaa halkaas ku dhintay kaddib markii ay dabku ku go'doomiyeen xilli uu ku fiday gobolka Rethymno ee galbeedka jasiiradda.

    Dhanka kale, dab-demis kale ayaa geeriyooday kaddib markii isagoo miyir beelay laga helay meel u dhow magaalada dekedda ah ee Gytheio, oo ku taalla koonfurta gacanka Peloponnese.

    Mowjaddii afraad ee kulaylaha daran ee xagaagan ayaa ka billowday dalalka Isbaanishka iyo Faransiiska, halkaas oo dab-demiyeyaashu ay ku dadaalayaan inay ka hortagaan in dabab waaweyn oo dhawaan la xakameeyay ay mar kale dib u holcaan.

    Goobjoogayaal ayaa sheegay in dhowr dab ay ka qarxeen jasiiradda Kereetee, kuwaas oo si xawli ah u fiday. Dabka ugu weyn ayaa ku fiday dhul gaaraya ilaa 15 kiiloomitir.

  2. Sacuudiga oo ka wajahaya xaalad jahwareer ah dagaalka Bariga dhexe

  3. War deg deg ah, Waa kuwee magaalooyinka iyo goobaha laga soo wariyay qaraxyo iyo weerarro ka dhacay Iiraan ilaa hadda?

    Kadib markii ciidamada Maraykanku ay saaka Khamiista bilaabeen duqeymaha cirka ah, kuwaas oo yimid afar maalmood oo hakad ah kadib, isla markaana jawaab u ahaa weerarradii gantaallada ee Ciidanka Ilaalada Kacaanka ee Iiraan (IRGC) ay subaxnimadii Arbacada ku qaadeen fariisimaha Maraykanka ee Urdun, waxaa magaalooyin iyo deegaanno kala duwan oo Iiraan ah laga soo sheegay qaraxyo iyo duqeymo cirka ah.

    Qeshm: Ku-xigeenka arrimaha siyaasadda, amniga iyo bulshada ee gobolka Hormozgan ayaa sheegay in jasiiradda Qeshm lagu qaaday weerar cirka ah abaare 4:00 aroornimo ee Khamiista. Hal saac kadib weerarka, Ahmad Nafisi ayaa sheegay in gantaallo cadow ay ku dhaceen guri ku yaalla deegaanka Chah Tango ee magaalada Qeshm.

    Khuzestan: Ku-xigeenka guddoomiyaha gobolka Khuzestan ayaa xaqiijiyay in weerarro ka dhaceen duleedka magaalada Abadan, hase yeeshee weli lama shaacin khasaaraha ka dhashay. Dhanka kale, weriye ka tirsan warbaahinta dowladda Iiraan ee gobolka Khuzestan ayaa sheegay in qaraxyo laga maqlay ugu yaraan afar magaalo oo gobolka ka tirsan, kuwaas oo kala ah Shadegan, Arvandkenar iyo Abadan, halka toddoba qarax laga maqlay magaalada Ahvaz.

    Waxaa sidoo kale la soo wariyay in qaraxyo laga maqlay jasiiradaha Abu Muusa iyo Kish, iyo weliba aagga badda ee ku dhow jasiiradda Qeshm iyo marin-biyoodka Hormuz.

    Gobolka Fars: Subaxnimadii Khamiista waxaa la soo sheegay qaraxyo laga maqlay magaalada Noorabad Mamasani.

    Qiyaastii saacad kadibna, warar la xiriira duqeymo ay ciidamada Maraykanku fuliyeen ayaa laga helay magaalada Kazerun oo iyaduna ka tirsan gobolka Fars.

    Wararka ilaa hadda soo baxay ayaa muujinaya in weerarradu ay ku fideen dhowr gobol iyo jasiirado istiraatiiji ah oo ku yaalla koonfurta Iiraan, inkasta oo aan weli si rasmi ah loo shaacin baaxadda khasaaraha ka dhashay duqeymahan.

  4. War deg deg ah, CENTCOM oo xaqiijisay duqeymo cusub oo ka dhan ah Iiraan

    Maraykanka

    Xigashada Sawirka, Getty Images

    Taliska Dhexe ee Ciidamada Maraykanka (CENTCOM) ayaa ku dhawaaqay in ciidamada Maraykanku ay bilaabeen weerarradooda ka dhanka ah Iiraan qiyaastii 8:00 fiidnimo ee Arbacadii, waqtiga Bariga Maraykanka (Eastern Time), taas oo ku beegnayd qiyaastii 3:00 aroornimo waqtiga Iiraan.

    Sida lagu sheegay bayaanka CENTCOM, weerarradan waxaa lagu fuliyey jawaab adag oo laga bixiyey isku daygii Iiraan ee shalay ay ku weerartay ciidamada Maraykanka ee ku sugan gobolka.

    CENTCOM ma aysan shaacin faahfaahin dheeraad ah oo ku saabsan bartilmaameedyada la weeraray, goobaha ay hawlgalladu ka dhaceen ama baaxadda khasaaraha ka dhashay.

    Tallaabadan ayaa timid kadib markii Ciidanka Ilaalada Kacaanka Islaamiga ah ee Iiraan uu shalay ku dhawaaqay inuu gantaallo ku weeraray saldhigyo Maraykan ah oo ku yaalla Urdun.

    Xalay, CENTCOM ayaa sidoo kale, iyada oo kaashanaysa Sacuudi Carabiya, weerartay fariisimo ay leeyihiin maleeshiyaad Shiico ah oo ay Iiraan taageerto kuwaas oo ku kala yaalla dhowr gobol oo Ciraaq ah.

    CENTCOM waxay sheegtay in weerarkaas uu jawaab u ahaa weerarro loo adeegsaday diyaarado aan duuliye lahayn (drone) oo lagu qaaday xarumaha shidaalka ee Sacuudi Carabiya, kuwaas oo Riyaad ay ku andacootay inay ka soo bilaabmeen dhulka Ciraaq.

  5. War deg deg ah, Ciiwaannada wakaalada wararka Iiraan ee Tasnim ee afafka Faarisiga, Ingiriisiga, Carabiga iyo Cibraaniga ee X oo hakiyey

    Kadib markii Ciidanka Ilaalada Kacaanka Islaamiga ah ee Iiraan uu Arbacadii ku dhawaaqay in la hakiyey kanaalkiisii xiriirka dadweynaha ee Telegram-ka isla markaana uu arrintaas ka cabtay, waxaa sidoo kale la hakiyey akoonkii wakaaladda wararka Tasnim, oo xiriir dhow la leh Ciidanka Ilaalada Kacaanka, ee shabakadda X (Twitter).

    Fiidnimadii Arbacada, dadka isticmaala X ayaa arkay farriinta "Akoonkan waa la hakiyey" markii ay isku dayeen inay galaan akoonnada Tasnim ee ku baxa afafka Faarisiga, Ingiriisiga, Carabiga iyo Cibraaniga.

    Maraykanka, Midowga Yurub iyo dalal kale oo dhowr ah ayaa Ciidanka Ilaalada Kacaanka Islaamiga ah ee Iiraan ku daray liiska ururrada argagixisada.

    Sidaas darteed, marka laga soo tago cunaqabataynta milatari iyo dhaqaale ee tooska ah, waxay sidoo kale xayiraado saareen hay'adaha iyo ururrada lala xiriiriyo ciidankaas.

  6. War deg deg ah, Qaraxyo laga maqlayo gudaha Iiraan

    Iiraan

    Xigashada Sawirka, Getty Images

    Xilli ay soo baxayeen warar sheegaya in Maraykanku uu subaxnimadan Khamiista bilaabay duqeymo cirka ah oo ka dhan ah Iiraan, dadka deggan Nuurabaad ee degmada Mamasaani ayaa sheegay inay maqleen jugooyin isdaba joog ah oo ka dhacay agagaarka magaalada ee gobolka Faars. Waxay sidoo kale fariin ku saabsan dhacdadaas u direen kanaalka Telegram-ka ee Vahid Online.

    Qiyaastii saacad ka hor, dadka deggan magaalada Yazd ayaa iyaguna sheegay inay maqleen diyaarado dagaal oo dulmaraya hawada magaalada ama ay suuragal tahay in gantaallo lagu ridayay hawada sare ee magaalada.

    Hay'adaha wararka ee ku dhow ilaha milatariga ee Iiraan ayaa sidoo kale sheegay inuu qarax ka dhacay Riyaad, caasimadda Boqortooyada Sacuudi Carabiya. Hase yeeshee, wararkaas weli ma xaqiijin ilo lagu kalsoon yahay oo madax-bannaan.

  7. War deg deg ah, Trump: "Waa markeennii aan Iiraan ku duqeyn lahayn"

    Trump

    Xigashada Sawirka, Getty Images

    Madaxweynaha Maraykanka, Donald Trump, ayaa mar kale Arbacadii Aqalka Cad ka sheegay inuu Iiraan ku qaadi doono weerar culus.

    Isagoo ka hadlayey weerarkii gantaallada ee ay Iiraan habeenkii Talaadada ku qaaday saldhig ciidan oo Maraykan leeyahay oo ku yaalla Urdun, ayuu mar kale ku dhawaaqay in "weerar culus uu Iiraan sugayo."

    Trump ayaa su'aalo ay weriyeyaashu weydiiyeen kaga jawaabay in Washington ay eegi doonto in mustaqbalka heshiis la gaadhi karo iyo in kale, balse wuxuu yidhi: "Si adag u duqeyn doonnaa, maxaa yeelay hadda waa markeennii aan iyaga ku duqeyn lahayn."

    Donald Trump wuxuu sheegay in Iiraan ay "ogtahay in weerarkan uu soo socdo," isagoo intaas ku daray in masuuliyiinta Iiraan ayka "codsanayaan in aan la fulin." weeraradaas

    Waxa kale oo uu sheegay in dhammaan gantaalladii lagu soo riday bartilmaameedyada Maraykanka la qabtay oo la fashiliyey.

    Trump ayaa sidoo kale sheegay in loo gudbiyey warbixin faahfaahsan oo ku saabsan weerarkii diyaaradaha aan duuliyaha lahayn ee lagu qaaday maraakiibta shidaalka ee ku sugnaa xeebaha Masar.

    Saacado ka hor, Madaxweynaha Maraykanka ayaa wareysi uu siiyey Fox News ku sheegay inuu Iiraan ku qaadi doono weerar aad u culus.

  8. War deg deg ah, Iiraan oo xidhay tuhmanayaal lagu eedeeyay dilka laba xubnood oo ka tirsan ciidamada Basij

    Ciidanka Iiraan

    Xigashada Sawirka, Getty Images

    Wakaaladda wararka ee Mizan, oo xidhiidh la leh garsoorka Iran, ayaa sheegtay in ciidamada sirdoonka Iran ay xidheen tuhmanayaal lagu eedeeyay dilka laba xubnood oo ka tirsanaa ururka Basij ee magaalada Mashhad.

    Xassan Hemmatifar, dacwad-oogaha magaalada Mashhad, ayaa sheegay in saraakiisha sirdoonka, iyagoo kaashanaya baadhayaasha booliiska, ay aqoonsadeen kadibna xidheen tuhmanayaasha. Wuxuu intaa ku daray in baadhitaannada arrintan la xidhiidha ay weli socdaan.

    Warbixintu ma sheegin tirada saxda ah ee dadka la xidhay.

    Ku dhowaad labaatan maalmood ka hor, Ciidanka Ilaalada Kacaanka Islaamiga ah ee Iran (IRGC) ayaa ku dhawaaqay in laba xubnood oo Basij ah lagu toogtay laguna dilay iyagoo roondo ka waday duleedka magaalada Mashhad.

  9. War deg deg ah, Doolarku oo hoos dhacay iyo qiimaha shidaalka oo kacay kadib weerarradii Ciraaq

      • Author, Abdishukri Haybe
      • Role, BBC Somali
    Doolar iyo Shidaal

    Xigashada Sawirka, Getty Images

    Doolarka Maraykanka ayaa wax yar hoos u dhacay Arbacadii, hase yeeshee wuxuu ku sii jiray heerarkii uu maalmihii u danbeeyay uu kaga jiray lacagaha waaweyn ee caalamka.

    Arrintan ayaa ku soo beegmaysa iyadoo maalgashadayaashu sugayaan go’aanka Bangiga Dhexe ee Maraykanka ee ku saabsan dulsaarka, halka qaar ka mid ah falanqeeyayaashuna ay suuragalnimada kordhinta dulsaarka weli meesha ka saarin.

    Dhanka kale, qiimaha shidaalka ayaa sare u kacay kadib markii colaadihii Bariga Dhexe ay dib u soo cusboonaadeen, isla markaana Maraykanka iyo Sacuudigu ay si wadajir ah weerarro ugu qaadeen kooxo ay Iiraan taageerto oo ku sugan Ciraaq.

    Si kastaba ha ahaatee, isbeddellada suuqa sarifka lacagaha ayaa ahaa kuwo kooban, maadaama maalgashadayaashu ay ka fogaadeen macaamillo waaweyn iyagoo sugaya go’aanka Guddiga Suuqa Furan ee Bangiga Dhexe ee Maraykanka.

    Suuqyadu waxay hadda qiimaynayaan in ay jirto fursad dhan 36% oo ah in dulsaarka la kordhiyo.

    Tusmada cabbirta qiimaha doolarka ee lagu barbar dhigo lix lacagood oo waaweyn ayaa hoos u dhacday 0.04%, iyadoo gaartay 101.38.

    Kyle Chapman, oo ah falanqeeye ku takhasusay suuqyada lacagaha ee shirkadda Bollinger Group ee magaalada London, ayaa sheegay in ay “aad u adag tahay” in la saadaaliyo natiijada kulanka maanta ee Bangiga Dhexe ee Maraykanka.

    Wuxuuna intaas ku daray in waxa ugu macquulsan ay tahay in dulsaarka aan wax laga beddelin, balse hadallada bangigu ay muujin doonaan mowqif adag oo ku aaddan siyaasadda lacagta.

    Lacagta Yuuro ayaa kor u kacday 0.03%, iyadoo gaadhay $1.138875. Lacagta Istarliinka ee Ingiriiska ayaanay wax weyn iska beddelin, waxayna taagnayd $1.32925, inkastoo ay weli ku dhowdahay heerkii ugu hooseeyay ee ay gaartay tan iyo 1-dii Luulyo.

    Sidoo kale, doolarka Kanada ayaa 0.2% ku xoogaystay marka loo eego doolarka Maraykanka.

  10. Waa ayo kooxaha ay taageerto Iran ee ka dhisan Ciraaq?

  11. Tomahawk, Patriot and THAAD: saddexda hub ee muhiimka ah ee ka dhamaanaya Maraykanka

    .

    Xigashada Sawirka, Getty Images

    Markii Madaxweynaha Mareykanka Donald Trump uu ka hadlayay Shir-madaxeedka Difaaca iyo Hal-abuurka ee Pennsylvania horraantii bishan—isagoo ay goobjoog ka ahaayeen madaxda sare ee qaar ka mid ah shirkadaha difaaca ee ugu waaweyn Mareykanka—wuxuu maskaxda ku hayay hal farriin: soo-saara hub badan, si degdeg ahna u sameeya.

    Munaasabaddan, Trump wuxuu ku boorriyay shirkadaha difaaca Mareykanka inay u baahan yihiin "xawaare dheeraad ah."

    Xilligii Trump uu hadalkan jeedinayay, waxaa sidoo kale goobjoog ahaa Xoghayaha Difaaca Mareykanka (oo loo yaqaan Xoghayaha Dagaalka) Pat Hegseth.

    Maamulka Trump ayaa dhacdadani ku tilmaamay inay qayb ka tahay istiraatiijiyad lagu soo nooleynayo warshadaha Mareykanka, laguna xoojinayo awoodda dagaal ee dalka.

    Si kastaba ha ahaatee, intii lagu guda jiray xafladdaas laguma shaacin inta laga isticmaalay iyo inta ka hartay kaydka ballaaran ee hubka Mareykanka ee adag in la soo saaro, intii lagu guda jiray hawlgalladii milateri ee ku aaddanaa Iran—sida hawlgalkii 'Epic Fury' horraantii sanadkan iyo weerarradii xigay—kuwaas oo socday muddo ku dhow 40 maalmood.Halkan ka akhri warbixintan oo faahfaahsan

  12. Trump oo markale ku hanjabey in uu si daran u weerari doono Iiraan

    .

    Xigashada Sawirka, EPA

    Fox News ayaa baahisay in Madaxweyne Donald Trump uu sheegay in Maraykanku uu "si aad u xooggan" u duqayn doono Iiraan, kadib markii dalkaasi gantaallo ku weerareen saldhigyada ciidamada Maraykanka ee ku yaalla Urdun.

    Fox News waxay Trump ka soo xigatay: "Si adag ayaan u garaaci doonnaa. Waxay ka shallayn doonaan go'aankooda."

    Warbaahintu waxay intaa ku dartay in madaxweynaha Maraykanku uu adeegsaday hadallo adag si uu u muujiyo hanjabaaddiisa, isagoo yiri: "Waxaan garaaci doonnaa ka hor inta aysan wax kale samayn."

    Fox News ayaa sidoo kale, iyada oo Trump soo xiganaysa, in ay dhaceen weerarro cirka ah oo ay si wadajir ah u fuliyeen Maraykanka iyo Sacuudiga, kuwaas oo lagu beegsanayo maleeshiyaad ay Iiraan taageerto oo ku sugnaa gudaha Ciraaq.

    Hadalladan loo aanaynayo Trump ayaa yimid xilli xafiiska madaxweynaha Ciraaq uu cambaareeyay weerarrada Maraykanka iyo Sacuudiga, kuna tilmaamay "xadgudub cad oo ka dhan ah madaxbannaanida Ciraaq."

  13. Maxay dadka jirka dhisa qaarkooda da'yaraan ugu dhintaan?

    Horraantii bishan, Mileson Araujo ayaa soo dhigay sawir isagoo ku sugan goobta jimicsiga (gym-ka) sida uu caadada u ahayd. Sawirka ayaa muujinayay jirkiisa, kaas oo ka dhigay ciyaaryahan xirfadle ah oo ku takhasusay dhismaha jirka iyo qof saameyn ku leh dhanka faya-qabka, isagoo leh tobanaan kun oo taageerayaal ah.

    Wuxuu xirnaa funaanad garan casaan ah, wuxuuna soo bandhigayay gacmihiisa waaweyn oo xooggan, isagoo u ekaa geesi wayn.

    Saacado yar ka dib, ninkan u dhashay dalka Brazil oo 35 jir ahaa ayaa geeriyooday ka dib markii uu xanuunsaday isagoo ku sugan gurigiisa oo ku yaalla gobolka Bahia, ee waqooyi-bari Brazil.

    Inkastoo aan weli la xaqiijin sababta rasmiga ah ee dhimashada Araujo, haddana wuxuu ka mid yahay jirdhisayaasha badan oo dhismaha jirka ku caan baxay oo si lama filaan ah u dhintay.

    Halkan ka akhri faahfaahinta

  14. Kooxda caanka ah BTS oo ka soo horjeestay bandhigga caanka ah Grammy

    .

    Xigashada Sawirka, Amy Sussman / Getty Images

    Kooxda caanka ah ee musigga Pop-ka ee ka dhisan dalka Kuuriyada Koonfureed ee BTS ayaa ku dhowaaqday inaysan heesahooda u tartami doonin Abaalmarinta Grammy ee sannadka 2027.

    Warkan ayaa ku soo baxay qoraal isku mid ah oo dhammaan toddobada xubnood ee kooxdu ay si wada jir ah ugu daabaceen bahaooda Instagram-ka.

    "Waxaan go'aansannay in aannaan sannadkan ka qaybgalin Abaalmarinta Grammys," ayaa lagu yiri tarjumaadda warsaxaafadeedkooda. "Waxaan rajaynaynaa in musigga loo dhageysto oo loo jeclaado sida uu yahay, halkii loo qaybin lahaa gobol ama luqad."

    Kooxda ayaa si weyn looga filayay inay ku tartamaan qaar ka mid ah qaybaha ugu waaweyn ee Grammys, oo uu ka mid yahay Albamka Sannadka, ka dib markii albamkooda cusub ee Arirang uu noqday mid ka mid ah kuwa ugu iibka badan sannadka.

    Heesta qaybta ka ah ee Swim, oo noqotay heesta ugu dhegaysiga badan ee dalka Mareykanka, ayaa iyana loo saadaalinayay inay u tartanto Heesta Sannadka.

  15. Ghana oo badi xaalad koronta la'aan ah wejahaysa

    .

    Xigashada Sawirka, Getty Images

    Cilad weyn ayaa ku timid shabakadda korontada ee dalka Ghana ayaa sababtay mugdi ballaadhan oo saameeyay inta badan dalkaas, iyadoo ay koronto la’aan noqdeen caasimadda Accra, magaalada ganacsiga ee Kumasi, iyo inta badan gobollada waqooyiga.

    Shirkadda dawladda u qaabilsan qaybinta korontada ayaa sheegtay in tiro ka mid ah koronto dhaliyayaashii gobolkan ku yaalla Afrikada Galbeed a ay khasab ku noqotay inay shaqada joojiyaan saacadihii hore ee subaxnimadii Arbacada.

    "Injineerada iyo hawl-wadeennada shabakaddu waxay si joogto ah u shaqaynayaan si korontada loo soo celiyo, sida ugu dhakhsaha badan uguna habboon iyadoo la dhawrayo ammaan iyo bedqabka" ayay tiri Shirkadda Korontada ee Ghana (GRIDCo)

    Ghana waxay sannado badan la tacaalaysay koronto la’aan joogto ah — oo loo yaqaan "dumsor", oo macnaheedu yahay "dami oo shid" afka Akan-ka — inkasta oo xaaladdu ay ka wanaagsan tahay sidii hore.

    Koronto la’aanta Arbacadii ayaa keentay in guryo, ganacsiyo, iyo adeegyada aasaasiga ah ay koronto la’aan la dhibtoodaan ilaa dhawr gobol oo dalkaas ka mid ah.

  16. Maxay dadka jirka dhisa qaarkooda da'yaraan ugu dhintaan?

  17. Shan askari oo Kenyaan ah oo lagu dilay weerar ka dhacay Mandheera

    Shan askari oo ka tirsan ciidammada amniga Kenya ayaa lagu dilay dagaal dhexmaray iyaga iyo kooxda Al-Shabaab. Dagaalkani wuxuu ka dhacay deegaanka Wantey Dam ee gobolka Mandheera, oo ku dhow xadka Soomaaliya, xilli ay ciidammadu ku jireen kormeer subaxnimadii Talaadada.

    Ciidamada Kenya ayaa bilaabay hawlgal ay ku fashilinayaan kooxdaas oo weerarka soo qaaday. Qarax nooca waddada la dhigo ah, kaas oo lagu dhuftay gaadhi gaashaaman oo ciidanka gurmadka ah, kaas oo burburay.

    Kooxda Al-Shabaab ayaa sannado badan dagaal kula dawlada geeska, waxayna weerarro joogto ah ka geystaan deegaannada xadka ku dhow sida Mandheera iyo Garissa, iyaga oo bartilmaameedsada ciidammada iyo dadka rayidka ah.

  18. Tomahawk, Patriot and THAAD: saddexda hub ee muhiimka ah ee ka dhamaanaya Maraykanka

  19. Maraykanka iyo Sucuudiga oo weeraray koox Iran taageerto oo Ciraaq ka dhisan

    Maraykanka iyo Sacuudi Carabiya ayaa weeraro ka geystay Ciraaq ay ku beegsadeen maleeshiyaad ay Iran taageerto, taas oo muujinaysa sii kordhinta suurtagalka ah ee colaadda Bariga Dhexe.

    Taliska Dhexe ee Ciidamada Maraykanka (Centcom) ayaa sheegay in weerarada lagu beegsaday "kooxo argagixiso ah oo Iran ku xiran, kuwaas oo Ciidanka Ilaalada Kacaanka Iran (IRGC) ay ku amreen inay weeraraan ciidamada Maraykanka iyo kaabayaasha tamarta ee Sacuudi Carabiya".

    Hadafka Mobilization Forces (PMF) ee Ciraaq, oo ah koox awood badan oo ay u badan yihiin maleeshiyaadka Shiicada ah ee ay Iran taageerto, ayaa sheegay in ugu yaraan 20 ka mid ah xubnahooda ay ku dhinteen weerarada wadajirka ah ee US iyo Sacuudiga ay ku qaadeen fariisimadooda.

    Arrintan ayaa timid saacado ka dib markii Centcom ay sheegtay inay Iran gantaallo ku tuurtay ciidamada Maraykanka ee Bariga Dhexe.

  20. Koonfur Afrika oo wajahaysa shaqaale yaraan ka dib markii ay ka qaxeen muhaajiriinta

    Koofur Afrika

    Xigashada Sawirka, Getty Images

    Koonfur Afrika waxay wajahaysaa yaraanta shaqaalaha kadib markii in ka badan 160,000 oo muhaajiriin ah ay dalka ka baxeen, sababo la xiriira weerarro lagu beegsaday iyo mudaaharaadyo looga soo horjeeday arrimaha la xiriira socdaalka.

    Xaaladdan ayaa bilowday inay saameyn ku yeelato waaxaha sida beeraha, dhismaha, shaqada guryaha, iyo warshadaha wax-soo-saarka, halkaas oo loo-shaqeeyayaashu ay la tacaalayaan yaraanta shaqaale beddeli kara kuwii dalka ka tegay.

    Beeraleyda iyo milkiilayaasha warshadaha ayaa sheegay in bixitaanka shaqaalaha ajaanibta ah ee xirfadda leh uu halis gelinayo wax-soo-saarkooda, halka ururrada shaqaaluhuna ay ku eedeeyeen qaar ka mid ah shirkadaha inay door bidaan shaqaalaha ajaanibta ah maaddaama mushaharkoodu uu ka hooseeyo kan muwaadiniinta.

    Hadda, dowladda dalka ayaa raadinaysa sidii ay isu dheellitiri lahayd baahida loo qabo in shaqooyin loo abuuro muwaadiniinta iyo baahida ay qabaan waaxaha kale ee ku tiirsan shaqaalaha ajaanibta ah.

    Dad badan oo dalka ka baxay ayaa sheegay inay sidaas u sameeyeen cabsi ay ka qabeen weerarrada lagu beegsanayo ajaanibta iyo tallaabooyinka adag ee ay ciidamada ammaanku ka qaadayeen dadka aan haysan dukumentiyada sharciyeysan ee degganaanshaha.

    Warar dheeraad ah:

    Maxkamad Koofur Afrikaan ah oo u hiillisay qaxootiga ay Soomaalidu ka mid tahay

    Ciidamo aad u badan oo la geeyay Koonfur Afrika iyada oo uu maanta ku ekaa waqtigii loo qabtay soo galootiga