Faransiiska oo wajahaya hubanti la'aan siyaasadeed kadib markii doorashadii baarlamaanka aaney cidna helin aqlabiyad

Tebin toos ah

1. 18 Sebtembar 2026War deg deg ah, Trump oo go'aan cusub oo xaaladda uga sii dari kara ka fikiraya

   

   Xigashada Sawirka, Reuters

   Madaxweynaha Mareykanka Donald Trump ayaa sheegay inuu ku dhow yahay inuu go’aan weyn ka gaaro in Mareykanku dib u bilaabo weerarro ballaaran oo ka dhan ah Iran, sida uu qoray Axios, oo soo xigtay weriye Barak Ravid.

   Trump ayaa Ravid u sheegay in uu horyaallo go’aan ku saabsan inuu qaado tallaabo milatari oo lagu burburinayo xukuumadda Iran iyo in kale.

   Hadalkan ayaa yimid ka hor kulan uu Trump Talaadada la yeelanayo hoggaamiyeyaasha Sacuudiga, Imaaraadka, Qadar, Bahrain, Kuwait iyo Cumaan, kaas oo ka dhacaya New York inta uu socdo shirka Golaha Guud ee Qaramada Midoobay. Trump wuxuu sheegay inuu doonayo inuu ogaado mowqifyada dalalka Gacanka ka hor inta uusan go’aansan tallaabada xigta.

   Dhanka kale, warbixinnadu waxay sheegayaan in ciidamada Mareykanka ee Bariga Dhexe loo diyaarinayo inay si buuxda ugu diyaar garoobaan suurtagalnimada in dagaalku mar kale xoog yeesho dhammaadka sanadkan.

   Trump ayaa sidoo kale sheegay in laga yaabo inuu New York kula kulmo Ra’iisul Wasaaraha Israel Benjamin Netanyahu toddobaadka soo socda.

2. 18 Sebtembar 2026War deg deg ah, Diyaarad F-16 ah oo ku burburtay Michigan dalka Mareykanka

   

   Xigashada Sawirka, EPA-EFE/REX/Shutterstock

   Mas’uuliyiinta gobolka Michigan ee Mareykanka ayaa sheegay in diyaarad dagaal oo nooca F-16 ah ay Khamiistii ku burburtay deegaanka Traverse County.

   Shilku wuxuu sababay in si degdeg ah loo daadgureeyo qayb ka mid ah dadka deegaanka ee ku dhow goobta ay diyaaradda ku burburtay.

   Afhayeen u hadlay Garabka 149-aad ee Ciidamada Cirka Qaranka Texas ayaa sheegay in duuliyuhu uu diyaaradda ka booday ka hor inta aysan burburin, isla markaana xaaladdiisu deggan tahay. Hadda waxaa lagu daweynayaa isbitaal.

   Afhayeenku wuxuu sheegay in diyaaradda ay ku jirtay tababar caadi ah markii shilku dhacay.

3. 18 Sebtembar 2026Wariye caan ahaa oo la afduubtay saacado kadibna la helay meydkiisa

   

   Xigashada Sawirka, Owen Ndlovu/Facebook

   Tacsi iyo baroordiiq ayaa loo dirayaa tabiyihii ciyaaraha ee caanka ahaa ee Koonfur Afrika, Owen Ndlovu, oo meydkiisa la helay Arbacadii, saacado kadib markii la afduubtay xilli gaarigiisa lagu dhacay xaafad ku dhow Johannesburg.

   Ndlovu, oo hore uga tirsanaa warbaahinta dowladda ee SABC, ayaa Talaadadii la afduubtay xilli uu xaaskiisa ka soo qaadayay kaniisad ku taalla Katlehong, sida ay booliisku sheegeen.

   Meydkiisa ayaa subaxdii xigtay ay heleen dadka deegaanka, kuwaas oo sheegay in jirkiisa ay ka muuqdeen dhaawacyo rasaas ah.

   Booliisku waxay bilaabeen baadigoob ay ku raadinayaan saddex qof oo looga shakisan yahay dilka, waxayna baarayaan sida ay wax u dhaceen.

   Dilka ayaa mar kale soo jiitay indhaha xaaladda dambiyada rabshadaha wata ee ka jira Koonfur Afrika

4. 18 Sebtembar 2026War deg deg ah, Beerka xoolaha oo la cuno ma daweyn karaa cudurro la sheego in Soomaalida ay ku badanyihiin?

   Inta badan dadka waxay maqlaan talo ah: "cun beer si dhiiggaagu u fiicnaado," waxaana si gaar ah loogu sheegaa haweenka uurka leh ama dadka daciifka ah.

   Taasi waa sababta ay dad badani u jecel yihiin cunista beerka ari ama digaag, balse su'aashu waxay tahay: ma run baa arrintaas? Ma caawin kartaa cunista beerka digaag ama ari in ay yarayso dhaawaca ee bini'aadamka?

   Arrintan la xiriirta, Machadka Qaranka ee Caafimaadka ee Maraykanka (NIH) wuxuu sheegay in fitamiinno, bir (iron), borotiin iyo nafaqooyin kale oo badan laga helo beerka digaagga iyo ariga, sidoo kale waxaa laga helaa beerka lo'da iyo doofaarka.

   Sii akhri: Beerka xoolaha oo la cuno ma daweyn karaa cudurada beerka ee ku dhaca bini'aadamka?

5. 18 Sebtembar 2026War deg deg ah, Mareykanka oo lagu eedeyay inuu galay dambiyo dagaal

   

   Xigashada Sawirka, Getty Images

   Guddi baaritaan oo Qaramada Midoobay ah oo qaabilsan Iran ayaa sheegay inay jiraan caddeymo xooggan oo muujinaya in Mareykanku galay dambiyo dagaal, kadib laba weerar oo bishii Febraayo ka dhacay Iran, kuwaas oo ay ku dhinteen in ka badan 170 qof.

   Warbixintu waxay sheegtay in gantaallo lagu weeraray iskuul ku yaalla Minab iyo garoon ciyaareed oo ku yaalla Lamerd, ayna weerarradu ahaayeen kuwo ula kac ah oo aan kala sooc lahayn, taasoo sababtay dhimasho iyo dhaawac iyo burbur soo gaaray kaabayaal rayid ah.

   Mareykanka ayaa hore u diiday inuu weerar ka geystay Lamerd, halka uu sheegay inuu baarayo wixii ka dhacay Minab.

   Guddiga ayaa sidoo kale mas’uuliyiinta Iran ku eedeeyay dambiyo ka dhan ah aadanaha, kuwaas oo la sheegay inay ka dhaceen dadaallada lagu caburinayay dibadbaxyo looga soo horjeeday dowladda horaantii sanadkan.

6. 17 Sebtembar 2026War deg deg ah, War degdeg: Fal amni darro oo hadda laga soo warinayo Marinka Hormuz

   

   Hay’adda Hawlgallada Ganacsiga Badda ee Britain UKMTO, ayaa sheegtay inay heshay warbixin ku saabsan dhacdo amni oo ka dhacday Marinka Hormuz, meel 16 mayl-badda waqooyi-bari kaga beegan magaalada Khasab ee Cumaan.

   Hay’addu waxay sheegtay in shaqaalihii markabka ay badqabaan, isla markaana aanay jirin wax saameyn ah oo deegaanka ah oo la xaqiijiyay xilligan. Mas’uuliyiinta ayaa baaraya dhacdada.

   UKMTO ayaa sidoo kale maanta soo sheegtay dhacdo kale oo badda ka dhacday. Waxay sheegtay in doon xawaare sare leh ay isku dayday inay joojiso markab shidaal oo marayay dhanka bari ilaa galbeed, meel qiyaastii 140 kiiloomitir bari kaga beegan Gacanka Cadmeed.

   Sida ay hay’addu sheegtay, doontu waxay muddo daba socotay markabka.

7. 17 Sebtembar 2026War deg deg ah, MadaxweynahaTurkiga Erdogan oo la sheegayo inuu qaatay go'aan cusub oo ku wajahan doorashada

   

   Xigashada Sawirka, Reuters

   La-taliyaha sare ee Madaxweynaha Turkiga Recep Tayyip Erdogan ayaa sheegay in Erdogan uu qorsheynayo inuu mar kale u tartamo madaxtinnimada doorashada 2028, haddii doorashada la soo hormariyo.

   La-taliyaha, Mehmet Ucum, ayaa sheegay in ujeeddadu tahay in laga gudbo xaddidaadda dastuuriga ah ee muddada xilka madaxweynaha ee Erdogan haddii uu dhammaysto xilligiisa hadda.

   Wuxuu sheegay in haddii 360 xildhibaan ay taageeraan qabashada doorasho waqtigeeda laga soo hormariyay, taasoo dhici karta 16-ka Abriil 2028.

   Sida uu dhigayo dastuurka Turkiga, baarlamaanka ayaa awood u leh inuu soo hormariyo doorashada haddii ay taageeraan 360 xildhibaan.

   Xisbiga AK Party ee talada haya iyo xulafadiisa Xisbiga Dhaqdhaqaaqa Waddaniga MHP, ayaa u baahan taageerada ugu yaraan 34 xildhibaan oo dheeraad ah si ay tiradaas u helaan.

   Erdogan ayaa sannadihii u dambeeyay dhowr jeer sheegay inuusan doonayn inuu mar kale u tartamo madaxtinnimada Turkiga, isla markaana uusan ka qeybgalayn doorashada xigta.

8. 17 Sebtembar 2026War deg deg ah, Caalamkii oo ka qaylo dhaaminaya weerarrada Xuutiyiinta

   

   Xigashada Sawirka, EPA/Shutterstock

   Midowga Yurub ayaa cambaareeyay weerarrada milatari ee Xuutiyiinta Yemen iyo weerarrada ka dhanka ah Sacuudiga iyo goobaha barakeysan ee diimaha.

   Midowga Yurub ayaa sheegay inuu garab taagan yahay Sacuudiga, wuxuuna ku tilmaamay beegsiga dadka rayidka ah iyo kaabayaasha rayidka ah mid aan la aqbali karin.

   Waxa uu sidoo kale sheegay in weerarrada Xuutiyiintu ay wiiqayaan rajada laga qabo in khilaafka Yemen lagu xalliyo qaab nabadeed, isla markaana ay khatar ku yihiin amniga gobolka.

   Midowga Yurub ayaa ugu baaqay Xuutiyiinta inay joojiyaan dhammaan howlgallada milatari.

9. 17 Sebtembar 2026War deg deg ah, Dooni la sheegay in ay isku dayday in ay joojiso markab shidaal iyo xogo laga helayo

   Hay’adda Hawlgallada Ganacsiga Badda ee Britain ayaa sheegtay in doon xawaare sare ku socotay ay isku dayday inay joojiso markab shidaal oo marayay bariga-galbeed, meel qiyaastii 140 kiiloomitir bari ka xigta Gacanka Cadmeed.

   Sida ay hay’addu sheegtay, doontu waxay muddo daba socotay markabka.

   Mas’uuliyiinta ayaa baaraya dhacdada, waxaana maraakiibta lagu boorriyay inay taxaddar dheeraad ah muujiyaan oo ay soo sheegaan dhaqdhaqaaq kasta oo shaki galiya.

10. 17 Sebtembar 2026War deg deg ah, Sacuudiga oo raadinaya waddo lagu xakameeyo xowliga ay Xuutiyiintu ku socdaan

    

    Xigashada Sawirka, Reuters

    Sacuudiga ayaa Shiinaha ka codsaday inuu si hoose Iran ugala hadlo sidii loo yareyn lahaa weerarrada Xuutiyiinta Yemen, sida ay Reuters u sheegeen saddex ilo-wareed oo Iran ah.

    Codsigan ayaa yimid kadib markii Xuutiyiintu toddobaadkii hore ay horumar weyn ka sameeyeen Yemen, ayna la wareegeen qaybo ka mid ah xeebaha u dhow Marinka Bab al-Mandab.

    Shiinaha ayaa si rasmi ah ugu baaqay dhinacyada inay isdejiyaan, wadahadalna yeeshaan, isla markaana la ilaaliyo amniga maraakiibta.

    Hase yeeshee, ilo-wareedyadu waxay Reuters u sheegeen in Beijing ay Iran ka doonayso inay saameynteeda ku isticmaasho Xuutiyiinta, si looga hortago in dagaalku ku fido marinnada muhiimka ah ee shidaalka iyo tamarta, kuwaas oo muhiim u ah dhaqaalaha Shiinaha.

    Ilo-wareedyadu waxay sheegeen in Iran ay uga jawaabtay in nabadda iyo xasilloonida gobolka ay ku xiran tahay in la soo afjaro dagaalka u dhexeeya Iran iyo Mareykanka.

11. 17 Sebtembar 2026War deg deg ah, Ilaalada Kacaanka Iran oo sheegay inay soo rideen diyaarad Mareykanku leeyahay

    

    Xigashada Sawirka, AFP via Getty

    Ilaalada Kacaanka Iran ayaa sheegtay inay soo rideen diyaarad aan duuliye lahayn oo nooca MQ-9 ah oo ay leeyihiin ciidamada Mareykanka, taasoo ay sheegeen inay ku duulaysay hawada jasiiradda Qeshm.

    Waaxda xiriirka dadweynaha ee Ilaalada Kacaanka ayaa sheegtay in diyaaradda la soo riday abaare 10:12 subaxnimo xilliga maxalliga ah, iyadoo loo adeegsaday nidaam cusub oo casri ah oo difaaca cirka ah.

    Ilaalada Kacaanka waxay sidoo kale sheegtay in tani ay tahay diyaaraddii 53-aad ee MQ-9 ee ay ciidamada Iran sheegeen inay soo rideen.

    Sheekooyinka kale ee aad sii akhrisan karto:

    Waa maxay hubka ay Maraykanku u direen hawada sare?

    Maskax qayb bini'aadam ah qaybna jiir ah oo lagu sameeyay horumar sayniseed oo cusub

    Trump:"Waxaan rajaynayaa inaan ku sii dhawaanayno dhammaadka" dagaalka Iran

12. 17 Sebtembar 2026War deg deg ah, Musiibooyin dunida ku soo wajahan oo laga digayo iyo meelaha cabsida ugu badan ay ka jirto

    

    Xigashada Sawirka, © WMO/Leonor Hernandez

    Qaramada Midoobay ayaa ka digtay in biyaha macaan ee dunida si xawli ah u sii yaraanayaan.

    Warbixin ay soo saartay QM ayaa sheegtay in wabiyada iyo harooyinka ay sii qallalayaan, halka barafka buuraha iyo dhulalka qabow uu sii dhalaalayo.

    Warbixintu waxay sidoo kale sheegtay in isbeddelka cimiladu uu keenayo isbeddello daran oo aan la saadaalin karin, taasoo kordhin karta fatahaadaha iyo abaaraha.

    Qaaradda Aasiya iyo Afrika ayaa la filayaa inay si gaar ah u saameeyaan, iyadoo ku dhowaad 80% masiibooyinkii biyaha la xiriiray ee dhowaan dhacay ay ka dhaceen labada qaaradood.

13. 17 Sebtembar 2026Jabuuti: 'Ma oggolaan doonno in dhulkeenna loo adeegsado weerarro ka dhan ah Xuutiyiinta Yemen'

14. 17 Sebtembar 2026Maxaa caawa ka dhacaya caasimada Suuriya ee Dimishiq?

    Mid ka mid ah xiddigaha ugu waaweyn Suuriya, fannaanadda Assala, ayaa caawa riwaayad ku qabanaysa Dimishiq, iyadoo tani tahay markii ugu horreysay oo ay dalka ku soo laabato muddo 15 sano ah.

    Assala waxay si cad oo xooggan uga soo horjeesatay xukuumaddii Bashar al-Assad markii kacdoonkii looga soo horjeeday xukunkiisa uu billowday sanadkii 2011.

    Waqtigaas kuma sugneyn Suuriya, balse si dhab ah ayaa looga hor istaagay inay dalka dib ugu soo laabato.

    Mas’uuliyiinta Suuriya ayaa soo dhaweeyey soo laabashada Assala, iyagoo u arka inay qayb ka tahay dib-u-soo-nooleynta nolosha fanka iyo dhaqanka Suuriya.

    Hase yeeshee, qaar ka mid ah shakhsiyaadka aragtida adag qaba ayaa cambaareeyay riwaayaddeeda, iyagoo ku eedeeyay inay dhiirrigelinayso “anshax-xumo.”

15. 17 Sebtembar 2026Warbixin la soo saray oo ku saabsan muhaajiriinta iyo qaxootiga isku dayaya inay safraan Yurub

    Tirooyinkii ugu dambeeyay waxay muujinayaan in tirada muhaajiriinta iyo qaxootiga isku dayaya inay badda kaga gudbaan una safraan Yurub ay si weyn hoos ugu dhacday, hase yeeshee tirada dhimashadu ay korodhay.

    Ilaa hadda sanadkan, 60,000 qof ayaa isku dayay safarka, taas oo 39% ka yar marka loo eego isla muddadii sanadkii hore.

    Qiyaastii 2,300 qof ayaa ku dhintay safarradan, marka loo eego wax ka yar 2,000 qof oo dhintay sanadkii hore.

    Madaxa hay’adda Qaramada Midoobay u qaabilsan socdaalka, Amy Pope, ayaa sheegtay in tani ay muujinayso in dadka ay qaadanayaan safarro sii kordhaya khatartooda.

    Hoos-u-dhaca ugu weyn ee tirada dadka imanaya waxaa laga diiwaangeliyay marinka bartamaha Badda Mediterranean-ka ee ku wajahan Talyaaniga, iyadoo tiradu ka yar tahay kala bar tiradii sanadkii hore.

    Hase yeeshee, marinkaas ayaa ahaa kan ugu dhimashada badan, iyadoo tirada dadka ku dhintay ay kor u kacday 844 ilaa 996 qof.

    Sheekooyinka kale ee aad sii akhrisan karto:

    Waa maxay hubka ay Maraykanku u direen hawada sare?

    Maskax qayb bini'aadam ah qaybna jiir ah oo lagu sameeyay horumar sayniseed oo cusub

    Trump:"Waxaan rajaynayaa inaan ku sii dhawaanayno dhammaadka" dagaalka Iran

16. 17 Sebtembar 2026Duuliyihii diyaaradda F-15 e Mareykanka oo markii ugu horreysay ka sheekeeyay 50 saacadood oo uu ku dhuumanayay buuraha Iran

    Mid ka mid ah laba sarkaal oo ka tirsanaa Ciidanka Cirka Mareykanka, kuwaas oo diyaaraddooda dagaalka ee F-15E lagu soo riday hawada Iran bishii Abriil, ayaa markii ugu horreysay ka hadlay wixii dhacay.

    Sarkaalkan oo loo yaqaan "Bravo", ayaa sheegay in markii gantaalku ku dhacay diyaaradda ay ahayd "sida tareen xamuul ah oo ku dhacay oo kale."

    Wuxuu sheegay inuu dhaawacyo dhowr ah la kulmay kadib markii diyaaraddii ay burburtay, isla markaana uu isku dayay inuu ka baxsado ciidamada Iran isagoo wata baarashuud waxyeello soo gaartay.

    Diyaaradda ayaa 3-dii Abriil lagu bartilmaameedsaday dhul buuraley ah oo koonfur ka xiga magaalada Isfahan.

    Sida ay sheegeen saraakiil Maraykan ah, hawlgalkii lagu soo badbaadinayay labada askari ayaa waxaa ku lug lahaa ku dhowaad 100 askari oo Maraykan ah, kuwaas oo galay gudaha dhulka Iran.

    Halkan ka sii akhriso

17. 17 Sebtembar 2026Wasiirka difaaca Pakistan oo shegay war cusub oo ku saabsan heshiiskii Maka

    

    Wasiirka difaaca Pakistan, Khawaja Asif, ayaa sheegay in ka dib weerarradii ugu dambeeyay ee Xuutiyiinta, waqtigii la gaaray in la dhaqan geliyo heshiiska Maka ee lala galay Sacuudiga iyo Türkiga.

    Wareysi uu siiyay warbaahinta Pakistan ee Geo News, ayuu sheegay in Islamabad ay weli ka go’an tahay ilaalinta Sacuudiga iyo goobaha barakaysan, isagoo intaas ku daray in xitaa haddii uusan heshiis jirin, mas’uuliyaddaas ay Pakistan saaran tahay.

    Mr. Asif wuxuu sheegay in Pakistan ay Sacuudiga gaarsiisay farriin uu u diray Iiraan, kaddib markii walaac laga muujiyay weerarrada Xuutiyiinta.

    “Uma maleynayo in Iiraan, iyadoo dal ahaan ah, ay furayso jiho kale oo dagaal,” ayuu intaa ku daray, isagoo sheegay in Tehran ay hadda ku mashquulsan tahay isku dhac ka socda gobolka.

    Wasiirka Difaaca Pakistan ayaa sidoo kale sheegay in Islamabad ay sii wadi doonto dadaallada ay ku doonayso in laga hortago in colaadda ay sii faafto.

    Xuutiyiinta Yemen ayaa beeniyay wax mas’uuliyad ah oo ku saabsan weerarkii ugu dambeeyay ee ka dhacay Sacuudiga.

    Sheekooyinka kale ee aad sii akhrisan karto:

    Waa maxay hubka ay Maraykanku u direen hawada sare?

    Maskax qayb bini'aadam ah qaybna jiir ah oo lagu sameeyay horumar sayniseed oo cusub

    Trump:"Waxaan rajaynayaa inaan ku sii dhawaanayno dhammaadka" dagaalka Iran

18. 17 Sebtembar 2026Waa maxay hubka ay Maraykanku u direen hawada sare?

19. 17 Sebtembar 2026Wasaaradda Sirdoonka Iiraan oo sheegtay in saddex qof lagu dilay, sagaalna lagu xiray Sistan iyo Baluchestan

    Wasaaradda Sirdoonka Jamhuuriyadda Islaamiga ah ee Iiraan ayaa sheegtay inay aqoonsatay oo ay burburisay saddex “unug oo hawlgallo fulinayay” oo ku sugnaa gobolka Sistan iyo Baluchestan, kuwaas oo ay wasaaraddu sheegtay inay qorsheynayeen inay weerarro ka fuliyaan koonfurta gobolka.

    War ay soo saartay Wasaaradda Sirdoonka ayaa lagu sheegay in saddex qof lagu dilay, sagaal kalena la xiray intii ay ciidamada ammaanka iska horimaad dhex marayay.

    Wasaaraddu waxay dadka la xiray ku tilmaantay xubno ka tirsan kooxo “argagixiso iyo Takfiiri ah”, waxayna sheegtay inay si qarsoodi ah ugu soo galeen Iiraan kadib markii ay dibadda ku soo qaateen tababarro ciidan, qaraxyo iyo dilal ah.

    Wasaaradda Sirdoonka ayaa sidoo kale sheegtay in dadka la xiray laga soo helay hub iyo rasaas, halka hawlgal kale oo ka dhacay Sistan iyo Baluchestan lagu helay bakhaar ay ku jireen hub fudud iyo hub aan culays badan lahayn.

    Bayaanka wasaaraddu ma uusan magacaabin kooxda ama kooxaha ay dadkan ku eedaysay inay ka tirsan yihiin, mana jiraan faahfaahin madax-bannaan oo xaqiijinaysa sheegashooyinkan.

    Mas'uuliyiinta Jamhuuriyadda Islaamiga ah waxay qaar ka mid ah kooxaha hubeysan ee ka soo horjeeda dowladda Iiraan ee ka hawlgala Sistan iyo Baluchestan ku tilmaamaan “argagixiso” ama “Takfiiri.”

20. 17 Sebtembar 2026Reuters: Shiinaha oo Iiraan ku boorriyay inay isticmaasho saameynteeda si loo xakameeyo Xuutiyiinta Yemen

    Reuters, oo soo xiganaysa saddex ilo-wareed oo Iiraan ah, ayaa sheegtay in Sacuudiga uu Shiinaha ka codsaday inuu si gaar ah ula tashado Iiraan, isla markaana uu ku boorriyo inay adeegsato saameynta ay ku leedahay Xuutiyiinta Yemen si loo xakameeyo dhaqdhaqaaqooda.

    Codsigan ayaa yimid kadib markii Xuutiyiintu toddobaadkii hore ay horumarro waaweyn ka sameeyeen Yemen, iyagoo la wareegay goobo xeebeed ku dhow marinka Bab al-Mandab.

    Shiinaha ayaa hadalladiisa guud ku baaqay in la is-xakameeyo, wada-hadal la yeesho iyo in dib loo soo celiyo ammaanka maraakiibta, balse ilo-wareedyadu waxay sheegeen in farriinta uu Beijing si gaar ah u diray ay ka ballaaran tahay mowqifyadiisa uu si cad u sheegay.

    Sida ay ilo-wareedyadu sheegeen, Beijing waxay doonaysaa in Iiraan ay isticmaasho saameynta ay ku leedahay Xuutiyiinta si looga hortago in colaadda ay sii fiddo oo ay gaarto marinnada muhiimka ah ee tamarta, kuwaas oo uu ku tiirsan yahay Shiinaha oo ah dhaqaalaha labaad ee ugu weyn dunida.

    Ilo-wareedyada, oo Reuters la hadlay iyagoo codsaday inaan magacyadooda la shaacin, ayaa sheegay in Iiraan ay kaga jawaabtay in “xasilloonida iyo nabadda gobolka ay ku xiran yihiin in la soo afjaro dagaalka lala jiro Mareykanka.”

    Wakaaladda wararka ee dowladda Shiinaha ee Xinhua ayaa sheegtay in Wasiirka Arrimaha Dibadda Shiinaha, Wang Yi, uu kulan uu la yeeshay Abbas Araqchi ku adkeeyay in Beijing aysan doonayn “in xiisadaha gobolka ay sii fidaan oo ay gaaraan Yemen iyo Badda Cas.”

    Waxaa hore loo sheegay in intii uu ku sugnaa Beijing, Mr. Araqchi uu khadka telefoonka kula hadlay Wasiirka Arrimaha Dibadda Turkiga Hakan Fidan iyo Taliyaha Ciidanka Pakistan, Field Marshal Asim Munir, si ay uga wada hadlaan “xaaladihii ugu dambeeyay ee gobolka.”