Rabhadh nach bi aiseag eachdraidheil buan ri linn còir uachdarain air teachd a-steach

Tha a' bhuidheann a tha a' ruith seirbheis aiseig eadar an t-Eilean Sgitheanach agus tìr-mòr ag iarraidh crathadh a thoirt air seann lagh Albannach fom faigh uachdaran cuibhreann den teachd a-steach aca.

Cha bhi an MV Gleann a' Chaolais a' dol eadar Caol Reithe an ceann a deas an Eilein Sgitheanaich agus Gleann Eilg ach eadar a' Chàisg agus an Dàmhair.

Tha dùil gur i an aon bhàt'-aiseig le clàr-tionndaidh airson carbadan a tha fhathast a' seòladh san t-saoghal.

Tha cead laghail - neo còirichean aiseig - aig uachdaran Oighreachd Chaoil Reithe, Richard Oliphant of that Ilk, air 5% de theachd a-steach bliadhnail Companaidh Coimhearsneachd Bàta-aiseig an Eilein Sgitheanaich.

Tha a' bhuidheann ag ràdh nach eil an suidheachadh "cothromach", agus tha iad a' sireadh taic chomhairlichean is luchd-poileataigs nan iomairt an lagh atharrachadh.

Dh'iarr BBC Naidheachdan beachd air Mgr Oliphant, ceann-feadhna Clann Olliphant, ach cha d' fhuair sinn freagairt.

Tha soitheach a ghabhas carbadan air a bhith a' seòladh tarsainn Chaoil Reatha bho 1934, ach tha seirbheis aiseig air a bhith air an t-slighe airson nan ceudan de bhliadhnaichean.

Ge-tà, dh'fhaodadh lagh a tha a cheart cho aosta a cur an cunnart.

Fon aonta-màil eadar Companaidh Coimhearsnachd Bàta-aiseig an Eilein Sgitheanaich agus Mgr Oliphant chan urrainn dhaibh nas lugha a phàigheadh dha na thug iad dha a' bhliadhna ron sin.

Thuirt Jo Crawford, Àrd-oifigeach na companaidh: "Gu fortanach, b' e bliadhna gu math soirbheachail a bh' ann an 2025 dhan aiseag agus bha an teachd a-steach a bu mhotha riamh againn.

"Tha esan a' faiginn 5% den teachd a-steach sin agus a dh'aindeoin na chosnas sinn sna bliadhnaichean às dèidh sin, agus am-bliadhna tha dùil gum faigh sinn nas lugha na an-uiridh, ach bidh e fhathast comasach dha £10,000 iarraidh oirnn."

Tha i ag ràdh, mar chompanaidh a stèidhicheadh a chùm màith na coimhearsnachd, gum b' fheàrr leotha gun tèid an t-airgead a thoirt dhaibh fhèin neo do bhuidhnean coimhearsneachd eile san sgìre.

Tha Companaidh an Aiseig ag iarraidh sealbh fhaighinn air an lamraig ann an Caol Reatha.

Tha iad ag ràdh gum biodh cothrom aca leasachaidhean a dhèanamh air na goireasan, cleas mar a rinn iad nuair a chaidh na còirichean aiseig air taobh Ghleann Eilg den t-slighe a reic riutha le Urras Togalaich is Talmhain Bhurton leis a bheil an talamh air tìr-mòr an sin.

Tha Donnie MacDhòmhnaill, sgiobair a' bhàta-aiseig, a' cumail a-mach nach eil Mgr Oliphant "a' dèanamh rud sam bith dhuinn".

Thuirt e: "Sgàinein sam bith air a' chidhe, obair saimeant, feumaidh sinn cuideigin fhaighinn airson a dhèanamh. Cha bhi e a' cosg sgillinn."

Tha còrr is 22,000 ainm air athchuinge ag iarraidh air Riaghaltas na h-Alba a dhol an sàs anns an eas-aonta eadar a' chompanaidh aiseig agus an t-uachdaran.

Tha BBC Naidheachdan air iarrtas a chur gu Mgr Oliphant a dh'fhaighinn a bheachd air a' chùis ach cha d' fhuaireadh freagairt.