Spòrs

Latest updates

  1. Ceistean mòra mu sgioba na h-Albaair fhoillseachadh aig 14:37 GMT

    Fo-thiotal a’ bhidio,

  2. Leòdhas is na Hearadh troimhe an Cupa Football Timesair fhoillseachadh aig 09:19 GMT 16 An t-Samhain

    Bidh sgioba Leòdhais is na Hearadh a-nise an aghaidh Alanais san iar-chuairt dheireannaich de Chupa Football Times is iad air adhartas a dhèanamh air an deireadh-sheachdain.

    Rinn na h-eileanaich an gnothach 3-0 air Bunillidh Thistle ann am Baile Dhubhthaich Disathairne, na tadhail a' tighinn bho Mhata Davidson sa chiad leth is an uairsin Ross Dòmhnallach is Robbie MacCoinnich san dàrna leth.

    Tha dùil gum bi an geama an aghaidh Alanais ann air a' 5mh den Dùbhlachd, ged nach eil cinnt ann fhathast càite an tèid a chluich.

    Tha a h-uile coltas ann gur e geama nas dorra a bhios ann dha Leòdhas is na Hearadh is Alanais iad fhèin air a' chùis a dhèanamh 3-0 air Bunillidh Thistle bho chionn beagan sheachdainean.

    San iar-chuairt dheireannaich eile bidh Inbhir Theòrsa an aghaidh A' Ghearasdain.

  3. Sgioba Leòdhais is na Hearadh ag amas air adhartas an Cupa Football Timesair fhoillseachadh aig 15:57 GMT 13 An t-Samhain

    Bidh Sgioba Leòdhais is na Hearadh air tìr-mòr Disathairne is iad a' dol an aghaidh Bunillidh Thistle sa chairteal chuairt dheireannaich de Chupa Football Times.

    Ràinig na h-eileanaich an ìre seo nuair a rinn iad an gnothach 4-2 air Tain St Duthus sa chiad chuairt.

    Bidh an geama an aghaidh Bhun Ilidh ann aig Pàirc Ghrannd ann am Baile Dhubhthaich is tòisichidh e aig 12:45f.

  4. Àrd-oifigear ùr air Comann na Camanachdair fhoillseachadh aig 17:22 GMT 12 An t-Samhain

    Fo-thiotal a’ bhidio,

  5. Sgiobaidhean ball-coise WIIGA dearbhte 'son Geamannan nan Eilean 2027air fhoillseachadh aig 09:42 GMT 12 An t-Samhain

    Sgioba nam ban aig WIIGA aig Geamannan nan Eilean ann an 2025

    Tha an dà chuid sgioba nam fear agus sgioba nam ban aig WIIGA air dearbhadh fhaighinn gum bi àite ann dhaibh aig Geamannan nan Eilean 2027 anns na h-Eileanan Fàrach.

    Bha ceist air a bhith ann mu àite do na fir is dùil ri barrachd sgiobaidhean aig an fharpais.

    Ann am bliadhnaichean eile bha feum air taghadh a dhèanamh 'son co-dhùnadh cò gheibheadh àite.

    Cha bhi feum air sin 'son Geamannan 2027 is cuid - leithid Arcaibh - air innse do bhuidheann riaghlaidh nan geamannan nach bi iad a' cur sgioba dhan fharpais.

    Gheibh sgiobaidhean WIIGA a-mach Diardaoin an ath-sheachdain (19mh) cò a bhios iad a' cluich aig ìre nam buidhnean anns na h-Eileanan Fàrach.

    Bidh na geamannan ann eadar an 3mh is an 9mh den Iuchar.

  6. ICT is County troimhe an Cupa Dùbhlain na h-Albaair fhoillseachadh aig 09:01 GMT 4 An t-Samhain

    Cluicheadair ball-coise ann an lèine ghorm is dhearg is e a' leum san adhair le toileachas. Air a chùl tha trìuir luchd-taic nan suidhe is coltas mosach orra.Tùs an deilbh, SNS
    Fo-thiotal an deilbh,

    'S e Alfie Stiùbhart a fhuair an tadhal a chuir Caley Thistle troimhe

    Chaidh Caley Thistle Inbhir Nis is Ross County air adhart dhan 16 mu dheireadh ann an Cupa Dùbhlain na h-Alba is iad le chèile air buannachadh oidhche Mhàirt.

    'S e 1-0 a bh' ann do ICT aig an taigh an aghaidh Mhon Rois is an tadhal a' tighinn bho Alfie Stiùbhart le aona mhionaid deug air fhàgail.

    Thuirt leas-mhanaidsear Inbhir Nis, Billy MacAoidh, gun robh còir aca a bhith air tadhal fhaighinn gu math nas tràithe.

    "Bha e follaiseach gun robh smachd againn air a' gheama, còrr is 20 oidhirp, is 's e am briseadh-dùil a bh' ann nach do ghabh sinn na cothroman. Dh'fhaodadh gun robh geama sin seachad sa chiad leth," thuirt MacAoidh.

    "Feumaidh sinn a bhith nas fheàrr a thaobh chothroman a ghabhail, ach ann am farpais cupa 's e an rud as motha a dhol troimhe dhan ath-chuairt is 's e sin a rinn sinn."

    Bha cùisean cofhurtail gu leòr do Chounty is iadsan air a' chùis a dhèanamh 2-0 air Celtic B ann an Inbhir Pheofharain.

    Chuir Kieran Phillips na Staggies air thoiseach às dèidh dusan mionaid is chuir an dearbh chluicheadair an dàrna tadhal tràth san dàrna leth.

    "Geama farpaiseach a bh' ann is bha sinn a' faireachdainn aig leth-ùine nach robh sinn a' cumail a' bhuill mar a bha còir againn," thuirt manaidsear Chounty, Stuart Kettlewell.

    "Shaoil mi gun robh sinn na b' fheàrr san dàrna leth is chruthaich sinn tòrr chothroman. Mura b' e am fear-glèidhidh òg aig Celtic B bhiodh sinn air barrachd thadhal fhaighinn.

    "Bha e math cuideachd cothrom is mionaidean a thoirt do chuid san sguad againn nach eil air a bhith a' cluich ro thric".

  7. Cha bhi fir Arcaibh sa bhall-coise aig Geamannan nan Eilean 2027air fhoillseachadh aig 14:58 GMT 3 An t-Samhain

    George Ewing, Jay Foubister, Owen Young, Liam Delday  is Jason Scott a' seasamh ann an loidhne is làmh aca uile air ball-coise beag sa mheadhanTùs an deilbh, Comann Ball-Coise Amaitearach Arcaibh
    Fo-thiotal an deilbh,

    Na cluicheadairean a bha air an targaid do dh'Arcaibh aig ìre nam buidhnean ann an Geamannan nan Eilean 2025

    Cha bhi fireannaich Arcaibh a' cluich ann am farpais a' bhuill-choise aig Geamannan nan Eilean anns na h-Eileanan Fàrach an ath-bhliadhna.

    Thuirt Comann Ball-Coise Amaitearach Arcaibh gur e ionmhas as coireach is nach robh ceist idir ann a thaobh miann a bhith a' cluich san fharpais.

    Thog iad air na cosgaisean a tha a' tighinn air gach cluicheadair a thaobh siubhail is àite-fuirich is thuirt iad nach robh ach glè bheag air a bhith comasach aig an ìre seo gealltanas a thoirt air a' chiad chnap airgid a phàigheadh.

    Thuirt iad gun robh cus mhì-chinnt an lùib ainm Arcaibh a chur san taghadh leis a' chunnart gun cailleadh daoine airgead nam biodh aca ri tarraing a-mach.

    "Air a' cheann thall cha robh dol às againn ach co-dhùnadh nach bi Arcaibh a' cluich ann am farpais ball-coise nam fear," thuirt iad.

    Chrìochnaich fir Arcaibh sa chòigeamh àite aig geamannan 2025 is iad a' cluich aig an taigh.

  8. Sgiobaidhean Gàidhealach ag amas air adhartas an Cupa Dùbhlain na h-Albaair fhoillseachadh aig 11:34 GMT 3 An t-Samhain

    Scott KellacherTùs an deilbh, SNS

    Bidh sgiobaidhean na Gàidhealtachd ag amas air adhartas a dhèanamh ann an Cupa Dùbhlain na h-Alba oidhche Mhàirt is iad ri chèile aig an taigh san 32 mu dheireadh.

    Cuiridh Caley Thistle, a chaill sa chuairt dheireannaich san fharpais seo an-uiridh, fàilte air Mon Rois.

    Thuirt manaidsear ICT gu bheil e airson barrachd fhaicinn bho na cluicheadairean aige às dèidh dhaibh call 5-1 ri Dùn Phàrlain san lìog Disathairne.

    "Tha sinn an-còmhnaidh air a bhith meadhanach math a thaobh gnothaichean a thogail gu sgiobalta às dèidh droch là," thuirt Scott Kellacher.

    "Feumaidh sinn a bhith nas fheàrr, a bhith nas làidire, is am ball a chumail gu math nas fheàrr."

    Thèid Mon Rois a-steach dhan gheama ann an sunnd is iad air crìochnachadh 1-1 ri Hamaltan Disathairne.

    Rinn oidhirp Mhon Rois feum do Ross County is iadsan a' gluasad air thoiseach air Hamaltan aig mullach Lìog a h-Aon.

    Cuiridh na Staggies fàilte air Celtic B sa chupa oidhche Mhàirt.

    Chuir County 14 tadhail seachad air Hearts B nas tràithe san fharpais ach bidh dùil aca ri geama nas cruaidh na sin bho Celtic B, a thàinig tro ìre nam buidhnean gun geama a chall.

    Tòisichidh an dà gheama aig 7:45f.

  9. Cothroman gu leòr do chluicheadairean òga an Alba?air fhoillseachadh aig 15:43 GMT 2 An t-Samhain

    Fo-thiotal a’ bhidio,

  10. Ceann Loch Seile cinnteach air an treas àite sa Phrìomh Lìogair fhoillseachadh aig 08:58 GMT 2 An t-Samhain

    Fear-glèidhidh Camanachd an Eilein Sgitheanaich ag ullachadh gus am ball a bhualadh. Tha dithis den luchd-dìon faisg air ri taobh luchd-aghaidh Cheann Loch Seile.

    Dhearbh Ceann Loch Seile gun crìochnaich iad san treas àite ann am Prìomh Lìog nam fear nuair a rinn iad an gnothach air na nàbaidhean aca às an Eilean Sgitheanach air an deireadh-sheachdain.

    Air là fliuch bha pàirc Rèaraig gu math trom ach thòisich an dà sgioba gu math.

    Chuir Keith MacRath na Seilich air thoiseach às dèidh dìreach trì mionaidean ach bha na Sgitheanaich co-ionnan gu math sgiobalta tro Lachlann MacLeòid.

    Bha na sgiobaidhean co-ionnan aig 1-1 pìos a-steach dhan dàrna leth, ach nochd an uairsin an seann sionnach MacRath a-rithist le dà thadhal eile taobh a-staigh naoi mionaidean.

    Chrìochnaich e 3-1 is Ceann Loch Seile a' gluasad trì puingean air thoiseach air Camanachd an Òbain a tha sa cheathramh àite.

    Le dìreach aon gheama air fhàgail aig an dà sgioba tha na Seilich mar sin cinnteach air an treas àite.

    Tha aire a-nise air a' gheama mu dheireadh aca Disathairne seo tighinn nuair a chuireas iad fàilte air Ceann a' Ghiùthsaich.

    Feumaidh Ceann a' Ghiùthsaich an dà phuing gus an tiotal a bhuannachadh ach ma gheibh na Seilich dad às a' gheama 's iad Baile Ùr an t-Slèibh a gheibh an lìog.

    Tha fhathast ceithir geamaichean lìge air fhàgail aig na Sgitheanaich is bidh iadsan Disathairne air an rathad fhada a dh'ionnsaigh Chlachan Ghleann Da-Ruail 'son cluich an aghaidh Caol-Gleann.

    Didòmhaich bha dà gheama òigridh eadar an Ceann a Tuath is an Ceann a Deas.

    Rinn Tuath a' chùis 10-1 sa gheama aig ìre Fo 14 is 7-1 aig ìre Fo 17.

    Bha là air leth aig fear eile de Chlann MhicRath à Ceann Loch Seile ann an geama Fo 17 is Jay a' cur ceithir de na tadhail.

  11. Cruth-atharrachadh san iomain?air fhoillseachadh aig 16:08 GMT 30 An Dàmhair

    Fo-thiotal a’ bhidio,

  12. County agus Accies co-ionann an Inbhir Pheofharainair fhoillseachadh aig 11:35 GMT 28 An Dàmhair

    Stuart Kettlewell is Darian MacFhioghainTùs an deilbh, SNS

    Tha Ross County is Hamilton Accies fhathast co-ionnan aig mullach Lìog a h-Aon is iad air crìochnachadh co-ionann 1-1 ann an Inbhir Pheofharain oidhche Mhàirt.

    Chuir Dylan Mac a' Ghobhainn County air thoiseach goirid às dèidh leth-uair le oidhirp bho oir a' bhocsa.

    Beagan mhionaidean às dèidh sin fhuair Stuart McKinstry Accies co-ionann.

    Cha b' urrainn do thaobh seach taobh tadhal a lorg 'son an geam a bhuannachadh is chrìochnaich e 1-1.

    Tha na sgiobaidhean ri chèile fhathast gun geama a chall san lìog gu seo is iad còmhla air 32 puing, ged a tha na Staggies air thoiseach air tadhail.

    Thuirt manaidsear Chounty Stuart Kettlewell gun robh e a' faireachdainn gur e "cothrom caillte a bh' ann gu ìre" is e den bheachd gun robh barrachd smachd aig an sgioba aigesan air a' gheama.

    Thuirt Kettlewell cuideachd ge-tà, gun robh e den bheachd nach do chruthaich County cothroman gu lèor.

    "Bha mi a' faireachdainn gun do rinn sinn gu leòr 'son an geama a bhuannachadh is air là eile, bhiodh sinn air a bhith nas clionaigaich timcheall air an tadhal is bhiodh sinn air na puingean fhaighinn.

    "Feumaidh sinn urram a shealltainn do dh'Accies ge-tà airson mar a fhuair iad iad fhèin air ais anns a' gheama".

    Bidh County air falbh Cille Bhrìghde an Ear Disathairne is Accies aig an taigh an aghaidh Mhon Rois

  13. Alba pròiseil às dèidh buannachadh an Corcaigh air fhoillseachadh aig 10:30 GMT 26 An Dàmhair

    Iain Robinson air an targaid do dh'Alba ann an CorcaighTùs an deilbh, TG4
    Fo-thiotal an deilbh,

    Iain Robinson air an targaid do dh'Alba ann an Corcaigh

    Thuirt Iain Robinson gun robh fireannaich na h-Alba air leth pròiseil às dèidh dhaibh an gnothach a dhèanamh air na h-Èireannaich sa gheama eadar-nàiseanta oidhche Shathairne.

    Bhuannaich na h-Albannaich 4-12 (24) gu 2-17 (23) ann an geama anabarrach teann ann am Páirc Uí Chaoimh ann an Corcaigh.

    Bha na h-Albannaich air a bhith trì puingean air thoiseach aig lethach slighe is an dà thadhal aca air tighinn bho Chalum McLay.

    Bha coltas ann gun robh an geama a' dol taobh nan Èireannach nuair a chaidh iadsan air thoiseach a' dol a-steach dha na mionaidean mu dheireadh.

    Fhuair Robinson fhèin treas tadhal do dh'Alba ge-tà, is nochd Innes Blackhall an uairsin le tadhal eile ann an ùine a chaidh a chur ris a' gheama.

    Bha ùine ann fhathast airson Robinson am ball a chur dhan lìon a-rithist, ach thug an rèitire an cluich air ais gus buille-peanais a thoirt do dh'Alba is fear de na h-Èireannaich air an caman aige a thilgeil.

    Chuir Alexander Michie am buille sin os cionn a' mhaide-tarsainn 'son an aon phuing a bha a dhìth air Alba fhaighinn.

    "Geama gu math cruaidh is gu math doirbh is tha sgioba na h-Èireann dìreach sgoinneil," thuirt Robinson ri TG4 às dèidh a' gheama.

    "Bha feum againn a bhith suas airson a' gheama is tha sinn pròiseil gun do bhuannaich sinn an geama".

    Nas tràithe air an là bha boireannaich na h-Èireann air pronnadh a thoirt air Alba 9-11 (38) gu 1-3 (6).

    'S i Megan Ralph a fhuair tadhal na h-Alba air là nuair a bha na h-Èireannaich pìos math air thoiseach orra.

    Thug an uairsin an droch shìde buaidh air sgiobaidhean na h-Alba is iad glaicte ann an Èirinn le plèanaichean air an cur dheth.

    Chìthear geama nam fear air TG4 an seo, taobh a-muigh is geama nam ban an seo, taobh a-muigh.

  14. Darbaidh Gàidhealach an Cupa na h-Albaair fhoillseachadh aig 09:21 GMT 26 An Dàmhair

    Scott Bain na sheasamh ri taobh Cupa na h-AlbaTùs an deilbh, SNS

    Thèid seann darbaidh bho Lìog na Gàidhealtachd a chluich às ùr is Ross County is Brora Rangers air an taghadh còmhla san treas chuairt de Chupa na h-Alba.

    Chaidh an taghadh a dhèanamh le fear-glèidhidh na h-Alba is na h-Eaglaise Brice Scott Bain oidhche Dhòmhnaich.

    Tha mòran bhliadhnaichean bho chluich County is Brùra geama farpaiseach an aghaidh a chèile ach thèid iad a-steach dhan gheama seo sa chupa ann an sunnd is County aig mullach Lìog 1 is Brùra aig bàrr Lìog na Gàidhealtachd.

    Cluichidh Caley Thistle an aghaidh sgioba air a bheil iad eòlach gu lèor cuideachd is iadsan gus fàilte a chur air Cove Rangers.

    Tha slighe fhada ro Chlach na Cùdainn is iadsan air an taghadh air falbh an aghaidh na Sròine Reamhaire.

    Tha an taghadh slàn an seo.

    Bidh na geamaichean ann air an deireadh-sheachdain mu dheireadh den t-Samhain.

  15. An Iar-Thuath v Malaig dhethair fhoillseachadh aig 12:59 TSB 24 An Dàmhair

    Chaidh an geam mu dheireadh de sheusan Lìog Thaobh Siar na Gàidhealtachd eadar Iar-Thuath an Eilein Sgitheanaich is Malaig Disathairne a chur dheth air sgàth na droch shìde.

    'S e seo an dàil as ùire air a' gheam leis gu bheil sgioba an Iar-Thuath air a bhith trang ann an Cupa Amaitearach na h-Alba.

    Tha Malaig air an lìog a bhuannachadh mar-tha ach tha iad ag amas air an an t-seusan a chrìochnachadh gun puing idir a leigeil seachad san lìog.

    Crìochnachaidh An Iar-Thuath san dàrna àite ge brith dè thachras.

    Cha tàinig dearbhadh fhathast airson là ùr son a' gheam.

  16. Alba a' coimhead air adhart ri Páirc Uí Chaoimhair fhoillseachadh aig 15:23 TSB 23 An Dàmhair

    Fo-thiotal a’ bhidio,

  17. An Iar-Thuath is Malaig gus an seusan a thoirt gu ceannair fhoillseachadh aig 15:45 TSB 22 An Dàmhair

    Thig seusan a' bhuill-choise ionadail gu ceann Disathairne nuair a chluicheas Iar-Thuath an Eilein Sgitheanaich an aghaidh Mhalaig sa gheama mu dheireadh ann an Lìog Thaobh Siar na Gàidhealtachd.

    Tha cha mhòr dà mhìos ann bho bhuannaich Malaig an tiotal ach tha dàil air a dhol air a' gheama seo is an Iar-Thuath - a chrìochnaicheas san dàrna àite às bith dè thachras - air a bhith trang ann an Cupa Amaitearach na h-Alba.

    Rinn iad an gnothach air Bon Accord City air breaban-peanais ann an Obar Dheathain às dèidh dha na sgiobaidhean a bhith co-ionnan 3-3.

    Bha a' chiad gheama eatorra san Eilean Sgitheanach air crìochnachadh 2-2.

    Bha an Iar-Thuath an uairsin co-ionnan 3-3 ann am Port Rìgh san ath chuairt an aghaidh St Anthony's, mus do chaill iad 5-0 ann an Glaschu.

    Bha briseadh-dùil eile ann dhaibh Disathairne nuair a rinn Caol Àcain an gnothach orra 5-3 air breaban-peanais is na sgiobaidhean air crìochnachadh co-ionnan 2-2 sa chuairt dheireannaich de Chupa Eòghainn MhicRath.

    Ged a tha Malaig air a bhith nan tàmh nuair a bha sin uile a' tachairt, bidh iad fhèin gu mòr ag amas air an geama a bhuannachadh is an seusan a chrìochnachadh gun puing idir a leigeil seachad san lìog.

    Tha dùil gun tèid an geama air adhart ann an Ùige aig 11:30m.