'हाताची मेहंदीही गेली नाही आणि मी कोर्टाच्या फेऱ्या मारतेय'; श्रावणी राणे-मोहम्मद फैज प्रकरण काय आहे?

'प्रेम केलं म्हणून लग्न केलं, धर्मांतर नाही'; श्रावणी राणे-मोहम्मद फैज प्रकरण काय आहे?"
फोटो कॅप्शन, श्रावणी राणे आणि मोहम्मद फैज.
    • Author, दीपाली जगताप
    • Role, बीबीसी मराठी प्रतिनिधी
  • Published
  • वाचन वेळ: 6 मिनिटे

"राजकारणामुळे हे आम्हाला सतावत आहेत. आम्ही काही राजकारणात नाही, मग आम्हाला का सतावलं जात आहे? माझ्या हाताची मेहंदीही गेली नाहीय आणि मी कोर्टाच्या फेऱ्या मारतेय."

22 वर्षीय श्रावणी राणे आणि 26 वर्षीय मोहम्मद फैज यांनी ऑक्टोबर 2026 मध्ये विशेष विवाह कायद्यानुसार (स्पेशल मॅरेज अॅक्ट) लग्न केलं. परंतु श्रावणीच्या आईने मेघवाडी पोलीस स्थानकात श्रावणीचे बळजबरीने धर्मांतर केल्याची तक्रार केली आणि त्यानंतर मोहम्मद फैज यांच्यावर गुन्हा दाखल करण्यात आला आहे.

भाजप नेते किरीट सोमय्या आणि श्रावणीची आई निलेशा राणे यांनी काही दिवसांपूर्वी मेघवाडी पोलीस स्थानकात भेट दिली. यानंतर माध्यमांशीही संवाद साधला.

श्रावणीने दिलेल्या माहितीनुसार, दोघांचंही 5 वर्षांपासूनचं प्रेमाचं नातं होतं. दोघं एकमेकांना शाळेत असल्यापासून ओळखतात. 2022 च्या अखेरपासून दोघांचं एकमेकांवर प्रेम आहे.

श्रावणीने सांगितलं की, आमच्या दोघांच्याही कुटुंबाला आधीपासूनच याची कल्पना होती. किंबहुना दोघंही एकमेकांच्या कुटुंबियांना ओळखतात. भेटीगाठीही होत होत्या.

हे सांगत असताना श्रावणीने आपल्या मोबाईलमध्ये आपली आई आणि मोहम्मद फैजचा केक भरवतानाचा फोटोही दाखवला.

परंतु आता विवाहानंतर आपल्या पतीवर गुन्हा दाखल झाल्याने लग्नाच्या अवघ्या काही दिवसांतच श्रावणीला आधी पोलीस स्टेशन आणि नंतर अटकपूर्व जामिनासाठी कोर्टाच्या फेऱ्या माराव्या लागत आहेत.

लग्नानंतर काही दिवस सारंकाही सुरळीत होतं, असं श्रावणी सांगते. आईशी फोनवर बोलणंही होत होतं. पण अचानक श्रावणीचे पती मोहम्मद फैजवर गुन्हा दाखल झाल्याची बातमी आली आणि श्रावणीलाही पोलीस स्टेशनात बोलवण्यात आलं.

दिंडोशी सत्र न्यायालयाने मेघवाडी पोलीस ठाण्यात नोंद असलेल्या महाराष्ट्र धर्मस्वातंत्र्य अधिनियम, 2026 अंतर्गत गुन्ह्यात आरोपी मोहम्मद फैज अकबर खानला अटकपूर्व जामीन मंजूर केला आहे.

न्यायालयाने 50,000 रुपयांच्या वैयक्तिक जातमुचलक्यावर आणि तितक्याच रकमेच्या एका जामीनदारावर जामीन देण्याचे आदेश दिले.

न्यायालयाने आरोपीला पुढील 90 दिवस दर सोमवारी आणि शुक्रवारी दुपारी 12 ते 3 या वेळेत संबंधित पोलीस ठाण्यात हजेरी लावण्याचे निर्देश दिले आहेत.

तसेच पुराव्यांशी छेडछाड न करणे, तक्रारदार किंवा साक्षीदारांशी संपर्क न साधणे, तपासात सहकार्य करणे, 7 दिवसांत राहत्या पत्त्याची व संपर्काची माहिती तपास अधिकाऱ्याला देणे आणि न्यायालयाच्या परवानगीशिवाय देशाबाहेर न जाणे या अटी घालण्यात आल्या आहेत.

न्यायालयाने अटींचे उल्लंघन झाल्यास जामीन रद्द केला जाऊ शकतो, असेही स्पष्ट केले आहे.

'मी धर्मांतर केलेलं नाही'

श्रावणी राणेने बीबीसी मराठीशी बोलताना सांगितलं, "माझं स्टेटमेंट घेतलं. मी पोलिसांना सांगितलं की, मी स्वतः हून आलेली आहे. मी लग्न केलं आहे. माझ्या मर्जीने लग्न केलंय. प्रेम होतं म्हणून लग्न केलं आहे. माझं धर्मांतर झालेलं नाहीय. माझं आधार कार्ड, पॅन कार्ड श्रावणी नीलेश राणे नावाचं आहे. या गोष्टीचा माझ्या पतीला काही प्राॅब्लेम नाहीय, मग या लोकांना काय प्राॅब्लेम आहे?"

कोर्टात विवाह केल्यानंतर कौटुंबिक रिसेप्शन पत्रिकेत श्रावणीच्या नावाचा उल्लेख श्रावणी निलेशा राणे या नावासह आयेशा असाही केला गेला आणि आपण धर्मांतर केलं असल्याचा समज झाला, असं श्रावणी सांगते. परंतु आपण अद्याप धर्मांतर केलं नसल्याचा दावा श्रावणीने केला आहे.

'मी धर्मांतर केलेलं नाही'
फोटो कॅप्शन, श्रावणी राणे आणि मोहम्मद फैज.
Skip podcast promotion and continue reading
BBC News मराठी आत्ताच फॉलो करा WhatsApp कर
बीबीसी न्यूज मराठी आता व्हॉट्सॲपवर

तुमच्या कामाच्या गोष्टी आणि बातम्या आता थेट तुमच्या फोनवर

फॉलो करा

End of podcast promotion

तिने सांगितलं, "माझं धर्मांतर झालेलं नाही. आमचं रिसेप्शन झालं आहे. त्या कार्डवरील नाव प्रुफ आहे का? माझ्या कपड्यांनरून हे जज करतायत. मी माझ्या इच्छेप्रमाणे पसंतीने कपडे घातले आहे म्हणजे मी धर्मांतर केलंय असं नाही. माझं नाव मोठ्या अक्षरात लिहिलं आहे श्रावणी, ते प्रेमाने मला आयेशा बोलतात."

या प्रकरणी श्रावणीची आई निलेशा राणे यांनी मेघवाडी पोलीस स्टेशनमध्ये बळजबरीने धर्मांतर झाल्याची तक्रार केली आहे. यापूर्वी त्यांनी श्रावणी बेपत्ता झाल्याची तक्रारही केली होती. परंतु आपलं फोनवर बोलणं झालं होतं. तसंच विवाहानंतर पोलीस स्टेशनमध्ये जाऊन मॅरेज सर्टीफीकेट दिलं होतं, असंही श्रावणी सांगते.

धर्मस्वातंत्र्य कायद्याअंतर्गत मोहम्मद फैजवर गुन्हा दाखल झाला असून त्याने अटकपूर्व जामिनासाठी दिंडोशी न्यायालयात दाद मागितली आहे. या प्रकरणी न्यायालयात सध्या सुनावणी सुरू आहे.

मोहम्मद फैज यांचे वकील करीम पठाण यांनी सांगितलं, "मुलगा मुस्लीम आहे, मुलगी हिंदू आहे. स्पेशल मॅरेज अॅक्टअंतर्गत लग्न केलं. त्यांनी रिसेप्शन ठेवलं होतं. रिसेप्शन पत्रिकेवर आयेशा असं लिहिलं होतं तर तिने धर्मांतर केल्याचं त्यांनी गृहित धरलं आहे. पोलिसांनी गुन्हा दाखल केला. पोलिसांनी चौकशी केली. मुलाने जामिनासाठी दिंडोशी सेशन्स कोर्टामध्ये अर्ज केला होता. कोर्टाने अंतरिम सुरक्षा दिली आहे."

मोहम्मद फैजला अटकपूर्व जामीन मिळाल्यावर त्याचे वकील करीम पठाण म्हणाले, "हा कायदा अजूनही हायकोर्ट आणि सुप्रीम कोर्टात प्रलंबित आहे. या कायद्याचा चुकीचा वापर करून निरपराध व्यक्तीला अडकवलं गेलं. मात्र सेशन्स कोर्टात ज्याप्रकारे बाजू मांडण्यात आली, त्यातून हा एफआयआर आणि आरोप चुकीचे होते हे सांगण्यात आलं. हा आमच्यासाठी त्या जोडप्यासाठी मोठा विजय आहे."

राजकारण केलं जात असल्याचा आरोप

हिंदू-मुस्लीम विवाह असल्याने आपल्यासोबत राजकारण केलं जात असल्याचा आरोप श्रावणीने केला आहे.

भाजपाचे नेते किरीट सोमय्या यांनी या प्रकरणी माध्यमांशी बोलताना सांगितलं, "ज्या प्रकारे 22 वषीय हिंदू मुलीला फसवण्यात आलं तिच्यावर दबाव टाकून तिचं धर्मांतर करण्यात आलं याबाबतीत मुलीची आई धडपड करायला लागल्यानंतर आधीच जाऊन त्या तरूणाने स्पेशल मॅरेज अॅक्टअंतर्गत लग्न केलं."

"नंतर 3 आठवड्यानंतर मुस्लीम पद्धतीने निकाह याचा अर्थ दाल मे कुछ काला हैं. मुलीला आधी फसवलं, मग शारिरीक संबंध, मग लग्नाचं आमिष दाखवून धर्मांतर. धर्मांतर विरोधी कायद्यानुसार हा गुन्हा आहे. गुन्हा दाखल झाला आहे. पोलिसांनी चौकशी सुरू केली आहे, " असा आरोप सोमय्यांनी केला. तसेच आईला न्याय मिळेल, असंही नमूद केलं.

'मी धर्मांतर केलेलं नाही'
फोटो कॅप्शन, श्रावणी राणे आणि मोहम्मद फैज यांच्या रिसेप्शनची पत्रिका

तर श्रावणीने आपल्या पतीवर केलेले आरोप फेटाळत आपल्यासोबत राजकारण केलं जात असल्याचा आरोप केला आहे.

श्रावणी सांगते, "किरीट सोमय्यांनी व्हीडिओ टाकला की, माझ्यावर जबरदस्ती केली आहे, प्रेशर आहे. त्यांना कोणी सांगितलं? त्यांनी कधी मला बघितलं नाही. जबरदस्ती झाली हे कोणी सांगितलं? आम्ही 5 वर्षांपासून रिलेशनशीपमध्ये आहोत."

राजकारणासाठी आपल्याला का सतावलं जात आहे? असाही प्रश्न श्रावणीने उपस्थित केला आहे.

'कुटुंबाला कल्पना होती'

आपल्या कुटुंबाला प्रेमसंबंध असल्याची कल्पना होती आणि आमचे कौटुंबिक संबंध होते, असाही दावा श्रावणी राणेने केला आहे.

ती सांगते, "माझ्या कुटुंबाला ही गोष्ट माहीत होती की, तो माझा बाॅयफ्रेंड आहे. माझी आईही त्याच्याशी बोलत होती. घरी माहीत होतं की, मी त्यांच्या घरी जायचे, तो माझ्या घरी यायचा.सगळ्यांना माहीत होतं तरी आई बोलते की तिला माहीत नव्हतं. माझ्याकडे केक भरवलेला फोटोही आहे."

रिसेप्शनच्या पत्रिकेवर आयेशा नावाचा उल्लेख असल्याने धर्मांतर केलं, असं म्हणणं चुकीचं आहे असंही श्रावणीने स्पष्ट केलं.

श्रावणी राणे सासूसोबत.
फोटो कॅप्शन, श्रावणी राणे सासूसोबत.

प्रेम विवाहाकडे धार्मिक आणि राजकीय दृष्टीने पाहू नये, असंही श्रावणीने सांगितलं. या प्रकरणामुळे आम्ही कुठेही सुरक्षित नाही, असंही ती सांगते.

"लग्न होऊन महिनाच झालेला. हे आरोप करणं चुकीचं आहे. आम्ही कुठेच सेफ नाहीय. प्रेम करतो म्हणून लग्न केलंय. जात-धर्माचा आमच्यासाठी काही इश्यू नाहीय. प्रेम हे धर्म पाहून होत नाही. प्रेम हे कुठेही होऊ शकतं, कोणाहीसोबत होऊ शकतं."

"आम्ही प्रेमासाठी लग्न केलं. सोबत राहता यावं म्हणून लग्न केलं. आम्हाला माहीत नव्हतं की, आमचं लग्न धर्माचा मुद्दा होईल. माझे पती मराठी धर्म मानतात. माझी सासू स्वतः हिंदू धर्मातून आहे," असंही ती सांगते.

मार्च 2026 मध्ये राज्य सरकारने धर्मस्वातंत्र्य विधेयक मंजूर केले होते. यानुसार बळजबरीने किंवा फसवणूक करून धर्मांतर केल्यास शिक्षेची तरतूद करण्यात आली आहे. तसंच धर्मांतर करायचे असल्याचे प्रक्रियाही कायद्यात देण्यात आली आहे.

व्हीडिओ कॅप्शन, श्रावणी राणे-मोहम्मद फैज यांचं लग्न विशेष विवाह कायद्यानुसार, तरीही वाद का?

श्रावणीच्या आईचं म्हणणं काय आहे?

श्रावणीची आई निलेशा राने यांनी आपल्या मुलीचं धर्मांतर झाल्याचा ‌दावा केला आहे. याबाबत आपल्याकडे व्हीडिओ असल्याचंही त्यांचं म्हणणं आहे.

निलेशा राणे यांनी बीबीसी मराठीशी बोलताना सांगितलं, "धर्मांतर केलं नाही, तर मग मला मिळालेले काझी बसलेले व्हीडिओ कुठून आले. त्यांनी धर्म बदलायला लावलाच ना. मराठीत लग्नाचे विधी का नाही केले? तो आधीपासून धमक्या देत होता, तरीही तिने लग्न केले. तिने धर्म बदलला आहे हे साफ कळत आहे."

न्यायालयाने न्याय द्यावा आणि माझी मुलगी माझ्याकडे परत आली पाहिजे, अशी मागणी श्रावणीच्या आईने केली आहे. तसंच धर्मांतर केलं जात आहे याबाबत मे 2026 मध्येच पोलिसांकडे तक्रार अर्ज दिला होता, असंही निलेशा राणे सांगतात.

"धर्मांतर झालेलं आहे. मला हे मान्य नाही. हा विवाह मला मान्य नाही. मला माझी मुलगी परत पाहिजे. तिने विवाह केला त्यावेळी मला कोर्ट मॅरेजची कल्पना नव्हती. तिने धर्म बदलायला नको. धर्मांतर केलं नाही, तर बुरखा का घातला आहे? मी केक भरवला कारण तो तिचा मित्र होता. तिचा हिरो आहे म्हणून केक भरवला नव्हता," असं निलेशा राणे यांचं म्हणणं आहे.

या प्रकरणी दिंडोशी सेशन्स कोर्टात सुनावणी सुरू आहे.

(बीबीसीसाठी कलेक्टिव्ह न्यूजरूमचे प्रकाशन)