لوگوں کو 31 اگست کے بعد بھی افغانستان چھوڑنے کی اجازت ہوگی، طالبان کی سو سے زائد ممالک کو یقین دہانی

لائیو کوریج

1. 26 اگست 2021فرانسیسی صدر: بہت پریشان ہوں مگر ہم اپنا کام جاری رکھیں گے

   فرانس کے صدر ایمانوئیل میکخواں نے کہا ہے کہ کابل ایئرپورٹ کے اردگرد صورتحال انتہائی پریشان کن ہے۔

   ان کے مطابق اب ہم ایسی صورتحال میں جو ہمارے بھی قابو میں نہیں ہے ہر شخص کو یہی مشورہ دیں گے وہ اس صورتحال میں محتاط رہیں۔

   ان کے مطابق اس حملے باوجود فرانس افغانستان سے انخلا کے اپنے آپریشن کو جاری رکھے گا۔

   اس وقت فرانس نے اپنے 115 شہریوں کو افغانستان سے نکالا ہے جبکہ دو ہزار افغان شہریوں کو بھی فرانس بیرون ملک لے جانے میں کامیاب ہوا ہے۔

   فرانس کا آخری جہاں کل شام کو کابل ایئرپورٹ سے روانہ ہو گا۔

2. 26 اگست 2021کابل ایئرپورٹ کے باہر دھماکوں کے بعد کے مناظر

3. 26 اگست 2021افغان صحافی ہوائی اڈے پر موجود اپنی دوست کے لیے پریشان, میں یہاں مر جاؤنگی مگر میں یہاں سے نہیں جاؤنگی! سوری

   افغانستان سے تعلق رکھنے والی صحافی عائشہ احمد نے ٹویٹ کیا ہے جس میں انھوں نے بتایا کہ ان کا اپنی ایک دوست سے ساتھ رابطہ منقطع ہو گیا ہے، جسے انھوں نے وہ علاقہ چھوڑنے کے لیے آمادہ کرنے کی کوشش کی تھی۔

   عائشہ احمد نے اپنی دوست کی شناخت ظاہر نہیں کی ہے۔ عائشہ احمد کے مطابق انھوں نے اپنی دوست کو متعدد بار فون کیا مگر کوئی جواب موصول نہیں ہوا ہے۔ ان کے مطابق ان کے واٹس ایپ پر ان کی دوست کی ابھی بھی آواز محفوظ ہے جس میں وہ میں یہاں مر جاؤں گی مگر یہاں سے نہیں جاؤں گی! سوری

4. 26 اگست 2021دھماکہ بہت زوردار تھا، یہ ایک قیامت خیز لمحہ تھا

   کابل میں ایک عینی شاہد نے ایئرپورٹ پر موجود ایک صحافی کو بتایا کہ ایئرپورٹ کے ابے گیٹ کے قریب ہونے والا دھماکہ بہت زوردار تھا۔

   خبر رساں ادارے روئٹرز کی طرف سے ایک ویڈیو جاری کی ہے جس میں ایک شخص کہہ رہا ہے کہ جس جگہ پر ہم موجود تھے وہاں اچانک دھماکہ ہوا۔

   اس شخص کے مطابق اس نے دھماکے والی جگہ کے قریب کم از کم 400 سے 500 کے قریب لوگ دیکھے ہیں اور اس شخص کے مطابق اس دھماکے کے کچھ متاثرین غیر ملکی افواج سے تعلق رکھتے تھے۔

   اس عینی شاہد کے مطابق ہم نے سٹریچرز پر زخمیوں کو ہسپتال کی طرف لے کر گئے۔۔۔ اس دوران میرے کپڑے مکمل خون میں لت پت ہو گئے تھے۔

   سابقہ مترجم: یہ ایک قیامت خیز لمحہ تھا

   دیبورا ہینز، سکائی نیوز کے فارن افئیرز کے ایڈیٹر ہیں۔ انھوں نے برطانوی افواج کے ساتھ کام کرنے والے ایک سابق افغان مترجم سے بات کی ہے جو اپنی اہلیہ اور چھوٹے بچے کے ساتھ ایئرپورٹ پر بیرون ملک جانے کے لیے اپنی پرواز کا انتظار کر رہے تھے جب یہ دھماکہ ہوا۔

   سابق مترجم کے مطابق یہ قیامت خیز منظر تھا، ہر طرف زخمی افراد تھے۔ انھوں نے سکائی نیوز کی ایڈیٹر کو مزید بتایا کہ اس نے دیکھا کہ لوگوں کے چہروں اور جسم پر خون ہی خون تھا اور وہ ادھر ادھر بھاگ رہے ہیں۔

5. 26 اگست 2021کوئی برطانوی فوجی زخمی نہیں ہوا

   برطانوی وزارتِ دفاع کی جانب سے کہا گیا ہے کہ کابل ایئرپورٹ کے قریب ہونے والے دھماکوں میں کسی برطانوی فوجی یا حکومتی اہلکار کے زخمی یا ہلاک ہونے کی اطلاع نہیں ہے۔

   خیال رہے کہ ہوائی اڈے کا وہ دروازہ جس کے باہر دھماکہ ہوا وہاں چند دن سے برطانوی فوج کے جوان ہی تعینات تھے

6. 26 اگست 2021کابل ایئرپورٹ کے باہر دھماکوں کے بارے میں اب تک کیا تفصیلات سامنے آ چکی ہیں

   کابل ایئرپورٹ کے ایبے گیٹ کے قریب کم از کم دو دھماکے ہوئے ہیں۔ یہ ایئرپورٹ کا وہ گیٹ ہے جسے شہریوں کے انخلا کے لیے استعمال کیا جا رہا تھا۔ ایک دھماکہ بیرون ہوٹل کے قریب ہوا جسے مغربی ممالک اپنے شہریوں کے انخلا کے لیے استعمال کر رہے تھے۔

   پینٹاگون کے ایک ترجمان نے تصدیق کی ہے کہ اس دھماکے میں متعدد امریکی اور عام شہریوں کی ہلاکتیں ہوئی ہیں۔ دھماکے کی جگہ سے ہلاک ہونے والوں کی تصاویر بھی سامنے آئی ہیں۔

   امریکی حکام کے مطابق ایئرپورٹ پر گن فائر کی بھی اطلاعات موصول ہوئی ہیں۔

   یہ دھماکے ایک ایسے وقت پر ہوئے ہیں جب امریکی اور برطانوی حکام نے اپنے شہریوں کو دہشتگردی کے دھماکوں کے خطرات کے پیش نظر ایئرپورٹ کا رخ نہ کرنے کی تجویز دی تھی۔

   امریکہ کے صدر جو بائیڈن کو اس صورتحال کے بارے میں بریفنگ دی گئی ہے اور وہ دھماکوں کی بعد کی صورتحال کو مانٹیر کر رہے ہیں۔

   برطانیہ کے وزیر اعظم بورس جانسن دھماکوں کے بعد ایمرجنسی میٹنگ کی صدارت کریں گے۔

7. 26 اگست 2021ترجیح زیادہ سے زیادہ افراد کا جلد از جلد افغانستان سے انخلا ہے: نیٹو سیکریٹری جنرل

   نیٹو کے سیکریٹری جنرل ہانس سٹولٹنبرگ نے ٹوئٹر پر اپنے پیغام میں کابل ایئرپورٹ کے باہر دہشت گرد حملے کی مذمت کرتے ہوئے کہا ہے کہ ان کی تنظیم کی ترجیح بدستور کم سے کم وقت میں جتنے افراد کو بھی ممکن ہو سکے محفوظ مقام تک پہچانا ہے۔

8. 26 اگست 2021ہوٹل کے قریب دھماکے میں بھی ’متعدد زخمی‘

   برطانیہ کی امورِ خارجہ اور قومی سلامتی کی حکمتِ عملی پر کمیٹیوں کی رکن ایلیشیا کیئرنز نے کا ہے کہ بیرن ہوٹل کے قریب ہونے والے دھماکے میں بھی کئی لوگ زخمی ہوئے ہیں۔

   بیرن ہوٹل وہ مقام ہے جہاں برطانوی حکام افغانستان سے انخلا کے قابل برطانوی اور افغان شہریوں کی جانچ پڑتال کا عمل ہو رہا ہے۔

9. 26 اگست 2021کابل ایئرپورٹ کے باہر دھماکے کے بعد کی تصاویر: زخمیوں کو ریڑھیوں پر ہسپتال منتقل کیا جا رہا ہے

   کابل ایئرپورٹ کے باہر دھماکے کے بعد ایسی تصاویر سامنے آئی ہیں جن میں زخمیوں کو ہاتھ والی ریڑھیوں کی مدد سے ہسپتال تک پہنچایا جا رہا ہے۔ ان تصاویر میں ان زخمیوں کے کپڑوں کو خون میں لت پت دیکھا جا سکتا ہے۔

   افغانستان کے نجی میڈیا طلوع نیوز نے ٹوئٹر پر کچھ ایسی تصاویر شیئر کی ہیں جن میں مرد، خواتین اور بچے ۔۔ جن میں سے کچھ نے اپنے سر پر ایک عارضی پٹی باندھ رکھی ہے۔۔ دھماکے کی جگہ سے محفوظ جگہ کی طرف بھاگ رہے ہیں۔

   وارننگ: کچھ تصاویر قارئین کے لیے تکلیف دہ ہو سکتی ہیں

   افغانستان سے تعلق رکھنے والے صحافی بلال سروری جو چند دن قبل کابل سے بیرون ملک جانے میں کامیاب ہوئے ہیں کہ انھیں اس دھماکے کی خبر ان کے ایک دوست نے دی جو ایئرپورٹ پر قطار میں کھڑا تھا اور دھماکے سے 15 منٹ قبل اس کی دستاویزات کی تصدیق ہوئی تھی۔

   ان کے مطابق اس کے دوست نے دیکھا کہ دھماکے کے بعد متاثرین کو لے جایا جا رہا تھا۔ ان کے مطابق فوری طور پر وہاں ایمبولینس نہیں پہنچ سکی تھیں۔

10. 26 اگست 2021دھماکے کی جگہ پر ’لاشوں کے ڈھیر‘

    کابل میں موجود بی بی سی کے سکندر کرمانی کا کہنا ہے کہ سوشل میڈیا پر دھماکے کے مقام کی جو ویڈیوز شیئر کی جا رہی ہیں ان میں لاشوں کے ڈھیر دیکھے جا سکتے ہیں اس لیے بڑی تعداد میں ہلاکتوں کا خدشہ درست ہے۔

11. 26 اگست 2021فرانسیسی صدر: افغانستان کی صورتحال ہمارے قابو سے باہر ہو سکتی ہے

    فرانس کے صدر ایمانویل میکخواں کے مطابق افغانستان کی صورتحال بہت بگڑ رہی ہے۔

    انھوں نے خبردار کیا ہے کہ صورتحال اس طرف جا رہی ہے کہ جہاں سے پھر ہم بھی اسے کنٹرول نہیں کر سکیں گے۔ فرانس کے صدر نے مزید کہا ہے کہ کابل ائیرپورٹ کے اردگرد صورتحال بہت خطرناک ہے۔

12. 26 اگست 2021کابل دھماکے میں متعدد امریکیوں اور افغانوں کے ہلاک اور زخمی ہونے کی تصدیق

    امریکی وزارتِ دفاع کے ترجمان جان کیربی کا کہنا ہے کہ کابل کے ہوائی اڈے پر ہونے والے دھماکے میں امریکی فوجی اور عام شہری دونوں ہلاک ہوئے ہیں۔

    ان کا یہ بھی کہنا تھا کہ کابل ایئرپورٹ کے دروازے کے علاوہ قریب واقع بیرن ہوٹل کے قریب بھی دھماکہ ہوا ہے۔

13. 26 اگست 2021ایئرپورٹ کے گیٹوں سے فوری طور پر دور چلے جائیں: فرانسیسی سفیر

    کابل میں فرانسیسی سفیر نے لوگوں سے اپیل کی ہے کہ مزید دھماکوں کے پیش نظر وہ ایئرپورٹ کے تمام گیٹوں سے دور ہو جائیں۔

    انھوں نے ٹوئٹر پر کہا ’تمام افغان دوستوں کے لیے، اگر آپ ایئرپورٹ کے کسی گیٹ کے قریب ہیں تو فوری طور پر وہاں سے ہٹ کر محفوظ مقام کی طرف چلے جائیں۔ کیوں کہ دوسرا دھماکہ ہو سکتا ہے۔‘

    اب سے کچھ دیر پہلے انھوں نے ہلاکتوں پر افسوس کا اظہار کرتے ہوئے کہا کہ اب تک کسی فرانسیسی کی اس واقعے میں زخمی ہونے کی اطلاعات نہیں ہیں۔

    ’آج ایبی گیٹ کے قریب کوئی فرانسیسی فوجی، پولیس اہلکار یا سفارتکار تعینات نہیں تھا‘

14. 26 اگست 2021امریکی صدر بائیڈن کو سکیورٹی بریفنگ کے دوران دھماکے کی اطلاع دی گئی

    روئٹرز کے مطابق امریکی صدر بائیڈن کو اس واقعے کے بارے میں اس وقت اطلاع دی گئی جب وہ سکیورٹی کی صورتحال پر حکام کے ساتھ میٹنگ کر رہے تھے۔

15. 26 اگست 2021کابل ایئرپورٹ: ہوائی اڈے کے دروازے پر دھماکے کے بعد ایک اور دھماکہ بھی ہوا

    بی بی سی نیوز کے نمائندے جوناتھن بیئل کا کہنا ہے کہ کابل ائیرپورٹ کے باہر ہونے والے پہلے دھماکے کے بعد ایک دوسرا دھماکہ ہوا، جس کے بعد فائرنگ بھی کی گئی۔

    دونوں دھماکے ابے گیٹ کی طرف ہی ہوئے۔ ان کے مطابق یہ کابل ائیرپورٹ کا وہ گیٹ ہے جہاں افغان مہاجرین کی بڑی تعداد کئی دنوں سے جمع تھی۔

16. 26 اگست 2021ہسپتال میں زخمیوں کی آمد

    افغانستان میں طلوع نیوز کے مطابق ایئرپورٹ کے گیٹ پر زخمی ہونے والے متعدد افراد کو مقامی ہسپتال پہنچایا گیا ہے۔

17. 26 اگست 2021پیٹاگون کی جانب سے ہلاکتوں کی تصدیق

    پینٹاگون نے تصدیق کی ہے کہ کابل میں ایئرپورٹ کے باہر دھماکے کے نتیجے میں متعدد ہلاکتیں ہوئی ہیں۔

18. 26 اگست 2021ابے گیٹ پر برطانوی فوجی تعینات تھے مگر کسی برطانوی فوجی کی ہلاکت کی تصدیق نہیں ہوئی

    برطانیہ کے ایک دفاعی ذریعے نے بی بی سی نیوز کو بتایا ہے کہ ابھی تک اس دھماکے میں کسی برطانوی فوجی کے جانی نقصان کی اطلاعات موصول نہیں ہوئی ہیں۔ تاہم ان کا کہنا تھا کہ کابل ایئرپورٹ کے ابے گیٹ پر حالیہ دنوں میں ہی برطانوی فوجی تعینات کیے گئے تھے۔

    خیال رہے کہ ابے گیٹ کابل ایئرپورٹ کے ان تین گیٹس میں سے ایک ہے، جسے دہشتگردی کے حملے کے خطرے کے پیش نظر بند کر دیا گیا تھا۔

    ایک امریکی عہدیدار نے خبر رساں ادارے روئٹرز کو بتایا ہے کہ یہ دھماکہ ایک خود کش حملہ آور نے کیا ہے۔ وائٹ ہاؤس نے اس بات کی تصدیق کی ہے کہ صدر جو بائیڈن کو بھی اس حملے کے بارے میں مطلع کر دیا گیا ہے۔ابھی تک اس دھماکے میں نقصان کی اطلاعات موصول نہیں ہوئی ہیں۔ ایئرپورٹ پر گن فائر کی بھی اطلاعات ہیں۔

19. 26 اگست 2021بریکنگ, کابل ایئرپورٹ دھماکہ: طالبان کے مطابق کم از کم 11 افراد ہلاک

    طالبان کے ایک ترجمان نے کہا ہے کہ کابل ائیر پورٹ پر حملے میں کم از کم 11 افراد ہلاک ہوگئے ہیں۔

    طالبان کے مطابق اس میں خواتین اور بچے بھی شامل ہیں اور بعض طالبان گاڑڈ بھی زخمی ہوئے ہیں۔

    ابھی ان اطلاعات کی دوسرے ذرائع سے تصدیق نہیں ہوئی ہے۔

20. 26 اگست 2021ایک نہیں دو دھماکے ہوئے ہیں: ترک وزارت دفاع

    ترکی کی وزارت دفاع کے مطابق کابل ایئرپورٹ کے باہر دو دھماکے ہوئے ہیں۔ تاہم ابھی تک اس بات کی تصدیق نہیں ہو سکی ہے۔