ቀጥታ, ትራምፕ፡ ንመሓዛ ኣመሪካ ዝኾነት ዖማን፡ ምስ ኢራን ሓዊሱ ክድብድባ ከምዝኽእል ኣፈራሪሑ

ቀጥታዊ ሸፈነ

1. 30 ሓምለ 2026መራሒ ተቓዋሚ ኡጋንዳ ኣብ ቤት ፍርዲ ቀልቡ ስሒቱ ወዲቝ

   መራሒ ተቓዋሚ ሰልፊ ኡጋንዳ ኪዛ ቤሲጄ፡ ​​ኣብ ቤት ፍርዲ ቀልቡ ስሒቱ ምስ ወደቐ ናብ ፅኑዕ-ክትትል ዝግበረሉ ሕክምና ከምዝተኣተወ በዓልቲ ቤቱ ገሊጻ።

   ኣብ ሕቡራት ሃገራት ሓላፊት ኤጀንሲ ኤችኣይቪ/ኤይድስ [ዩኤንኤድስ]፡ ዊኒ ቢያኒማ፡ ኣብ መርበብ ሓበሬታ ኤክስ፡ ኣብ ዝዘርግሓቶ ጽሑፍ፡ “ቀልቡ ስሒቱ እዩ ወዲቑ፤ ክዛረብ ኣይክእልን፤ ንመነቓቕሒ መድሓኒት’ውን ምላሽ ኣይህብን” ይብል።

   እዚ ወዲ 70 ዓመት ፖለቲከኛ ካብ ሕዳር 2024 ጀሚሩ ኣብ ቤት ማእሰርቲ ይርከብ።

   እቲ ፖለቲከኛ መጋባእያ ቀልቡ ስሒቱ እንትወድቕ፡ ጠበቓታት መንግስቲ ንዕኡ ክውክሉ ክሽየሙ እንከለዉ ይቃወም ነይሩ። ብድሕሪኡ ብሓለውቲ ቤት ማእሰርቲ ናብ ሆስፒታል ተወሲዱ።

   ነቲ ንነዊሕ እዋን ኣብ ስልጣን ዝፀንሐ ፕረዚደንት ዮወሪ ሙሰቨኒ፡ ኣርባዕተ ግዜ ንፕረዚደንትነት ዝተወዳደረ እዚ ፖለቲከኛ፡ ቅድሚ ክልተ ዓመት ካብ ኬንያ ተጨውዩ እዩ ናብ ኡጋንዳ ተወሲዱ።

   ካብ ሽዑ ጀሚሩ፡ ምስ ሓጋዚኡ ኦቤይድ ሎታሌ ኣብ ቤት ማእሰርቲ ይርከቡ።

   ክልቲኦም ብኽሕደት ሃገር እዮም ዝኽሰሱ።

   ኣኽበርቲ ሕጊ፡ እቲ ፖለቲከኛን ሓጋዚኡን "መንግስቲ ፕረዚደንት ሙሰቨኒ ንምውዳቕ ውዲት ፈጺሞም" ክብሉ እዩ ከሲሶም። ንሳቶም ብወገኖም ነቲ ክሲ ኣይቕበሉዎን።

   ክሕደት ሃገር ኣብ ኡጋንዳ ከቢድ ገበን ኮይኑ፡ ብሞት ዘቕጻዕ እዩ።

2. 29 ሓምለ 2026ኢራን፡ ኣመሪካን ስዑዲ ዓረብን ኣብ ዒራቕ ንዝፈፀመኦ መጥቃዕቲ ኰኒና

   ምኒስትሪ ጉዳያት ወጻኢ ኢራን፡ ኣብ ዒራቕ ዝካየድ ዘሎ ሓባራዊ መጥቃዕቲ ኣመሪካን ስዑዲ ዓረብን፡ ብትሪ ከምእትኹንን ኣፍሊጣ።

   እቲ ምኒሰትሪ፡ እዚ ሓድሽ መጥቃዕቲ፡ ነቲ ኣብ ማእከላይ ምብራቕ ዘሎ ግጭት፡ ንምግዳድን ንምስፋሕን ዝዓለመ እዩ ክብል’ውን ከሲሱ።

   ኢራን ነተን ክልተ ሃገራት “ርኩሳን” ብምባል ዝዀነነት ኮይና፡ እቲ ስጉምቲ ንመትከላት ሕቡራት ሃገራት ዝጥሕስ ምዃኑ'ውን ሓቢራ።

   ኣመሪካን ስዑድያን፡ ኣብ ዒራቕ ንዝርከቡ ብኢራን ዝድገፉ ዕጡቓት፡ ዒላማ ይገብሩ ከምዘለዉ እዮም ዝገልፁ።

3. 29 ሓምለ 2026ሓሪሽ፡ ኣብ ኢትዮጵያ ንኣስታት ኣርብዓ ዓመታት ተራእዩ ከም ዘይፈልጥ ተገሊፁ

   ሓሪሽ፡ ኣብ ኢትዮጵያ ኣብ ሓደ እዋን መለለዪን ጽባቐን ግርማ ሞገስን ካብ ዝነበሩ እንስሳታት ሓደ ምንባሩ ይጥቀስ።

   ንኣስታት 40 ዓመታት ዓመታት ኣብ ዕቃበን ምርምርን እንስሳ ዘገዳም ዝሰርሐ በዓል ሞያ፡ እቲ እንስሳ ኣብ ሓደ እዋን ሃብቲ ብሄራዊ ፓርክ ኦሞ ከምዝነበረ መስኪሩ ኣሎ።

   ብተወሳኺ፡ ኣብ ዝርዝር ናይቶም ኣብ መስራቲ ሰነድ ናይቲ ፓርክ 'ሓለዋ ዝግበረሎም" ኣጥበውቲ እንስሳ ዘገዳም ኣብ ዝብል- ተመዝጊቡ ይርከብ።

   ይኹን እምበር ኣብ ኢትዮጵያ ንዝሓለፉ ኣርባዕተ ዓሰርተታት ዓመታት ሓሪሽ ተራእዩ ከምዘይፈልጥ መፅናዕቲታት የመልክቱ።

   ኣብ በዓል መዚ ልምዓትን ዕቃበን እንስሳ ዘገዳም ኢትዮጵያ ተመራማሪ ዶክተር ፋኑኤል ከበደ፡ ንቢቢሲ ኣብ ዝሃቦ ሓበሬታ፡ ሓሪሽ ንመወዳእታ ግዜ ቅድሚ 44 ዓመት "ኢልባ" ኣብ ዝተባህለ ኣብ ሃገራዊ ፓርክ ኦሞ ከምዝተራእየ ሓቢሩ።

4. 29 ሓምለ 2026ጃፓን፡ ብዝሒ ምውታት ምንቅጥቃጥ ምድሪ 13 ኣብ ዝበጽሓሉ ስርሓት ህይወት ኣድሕን ይቕጽል ኣሎ

   ኣብ ደቡባዊ ምዕራብ ጃፓን ብዘጋጠመ ምንቅጥቃጥ ምድሪ ክሳብ ሕጂ ሸሞንተ ሰባት ክሞቱ እንከለዉ፡ ኣብ ሓደ ማእከል ዕዳጋ ብዘጋጠመ ምድርማስ ተጸቒጦም ዘለዉ ሰባት ንምውጻእ ጻዕርታት ይግበር ከም ዘሎ ሰብመዚ እታ ሃገር ኣፍሊጦም።

   እቲ ብኣቈጻጽራ እቲ ሰዓት 4፡27 ድሕሪ ቀትሪ ዘጋጠመ 7.1 ሬክተር ዝዓቐኑ ምንቅጥቓጥ ምድሪ፡ ኣብ ከባቢታት ደሴት ክያንሹ’ያ ተኸሲቱ።

   ብሰንኪ እዚ ድማ ልዕሊ 150,000 ሰባት ናብ ውሑስ ቦታ ክግዕዙ ተነጊርዎም ኣሎ።

   ብሰንኪ እቲ ምንቅጥቃጥ ምድሪ ሓያለ ጽርግያታታን ኣባይትን ክዓኑ እንከሎ፡ ኣገልግሎት ኤለትሪክ እቲ ከባቢ ምሉእ ንምሉእ ተቛሪጹ ኣሎ።

   ቀዳመይቲ ምኒሰተር እታ ሃገር ሳና ታኪቺ’ውን ነበርቲ እቲ ከባቢ ናብ ውሑስ ቦታ ክግዕዙ ተማሕጺና።

   ናብቲ እቲ ምንቅጥቃጥ ምድሪ ዘጋጠመሉ ቦታ ዝቐረበ መዓርፎ ነፈርቲ ሃኔዳ ልዕሊ 40 ዝኸውን ውሽጣውን ዓለምለኻውን በረራታት ደው ከብል ተገዲዱ ኣሎ።

5. 27 ሓምለ 2026ኣብ ኲናት ኢራን 18 ወተሃደራት ኣሜሪካ ክሞቱ እንከለዉ ልዕሊ 600 ቆሲሎም

   ፕረዚደንት ትራምፕ፡ ኣብ ወርሒ ለካቲት ኣብ ልዕሊ ኢራን መጥቃዕቲ ክካየድ ካብ ዝእዝዝ ንደሓር፡ 18 ወተሃደራት ኣመሪካ ከምዝሞቱን ብውሕዱ 624 ከምዝቖሰሉን ፔንታጎን ጸብጺቡ።

   ካብቶም ጉድኣት ዝበፅሖም እቶም 417 ምስ ስርሒት ‘ኤፒክ ፉሪ’ ዝተኣሳሰሩ ክኾኑ ከለዉ፡ 207 ድማ ኣብ “ስርሒታት ወጻኢ ሃገራት” ዝተሳተፉ እዮም።

   ኣብ ዝሓለፈ ሰሙን ፔንታጎን ኣብ ኲናት ኢራን ካብ ዝተቐትሉ ኣርባዕተ ኣባላቱ ሓዊሱ፡ ኣብቲ ኲናት ዝተቐትሉን ዝቖሰሉን ብዝሒ ዝርዝር ኣመሓይሹ ኣሎ።

   መረዳእታ ሚኒስትሪ ምክልኻል፡ ክሳብ ዝሓለፈ ሰሉስ፡ ኣብ ወፍሪ ኢራን 18 ተቐቲሎም 482 ድማ ቆሲሎም ዝብል ነይሩ።

   ድሕሪኡ ዝተገብረ ምምሕየዓሽ ግን ቁጽሪ ዝሞቱ ብኣርባዕተ ብምንካይ ጠቕላላ ቁጽሪ ዝሞቱ ናብ 14 ኣውሪዱዎ።

   እቲ ለውጢ ቁጽሪ ጉድኣትን ሞትን፡ ብዘይ ዝኾነ መብርሂ ዝተገብረ ብምዃኑ፡ ሌተናል ኮሎኔል ሰራዊት ነበር ቤን ሆጅስ “ስእነት ግሉፅነት” ክብል ተነቒፉ።

   ወሃቢ ቃል ፔንታጎን ሾን ፓርነል ነቲ ኣብ ብዝሒ ሞት፡ ዝተገብረ ለውጢ “ግዝያዊ ጸገም መረዳእታ” ክብል ገሊጽዎ።

   እቲ ቅድሚ ሕጂ ዘይነበረ “ስርሒታት ሃገራት ወፃኢ” ዝብል ክፋል፡ ካብ ትማሊ ሰንበት ጀሚሩ ኣብ መርበብ ሓበሬታ ክፍሊ ምክልኻል ከምዝተዘርግሐ ዘ ኣሶሴይትድ ፕረስ ጸብጺቡ።

   እቲ ክፍሊ ኣብ ቀረባ እዋን ዝሞቱ ኣርባዕተ ሰባትን ዝቘሰሉ 207ን ይዝርዝር።

   እቶም ጉዱኣት ኣብ እዋን ኲናት ኢራን ድዮም ኣይኮኑን ንጹር ኣይኮነን።

6. 27 ሓምለ 2026ኣመሪካን ኢራንን መጥቃዕቲ ደው ምባለን ስዒቡ ዋጋ ነዳዲ ጐዲሉ

   ዘይተጻረየ ነዳዲ፡ ብሓደ ግዜ ልዕሊ 9 ሚእታዊት ዝነከየ ኮይኑ ዋጋ ሓደ በርሚል ናብ ትሕቲ 88 ወሪዱ።

   እዚ ምንካይ ዋጋ፡ ኣምባሳደር ኣመሪካ ኣብ ሕቡራት ሃገራት፡ "ንዝርርባት ገለ ቦታ" ንምሃብ፡ ኣብ ልዕሊ ኢራን ዝፍጸም ዝነበረ መጥቃዕቲ ንኻልኣይ ተኸታታሊ ምሸት ደው ከምዝበለ ድሕሪ ምግላጹ'ዩ።

   ወሃቢ ቃል ሰራዊት ኢራን ትማሊ ሰንበት ኣብ ዝሃቦ መግለጺ፡ ቴህራን ግብረ መልሲ ንምሃብ ኣብቲ ዞባ ዝፍጸም ዝነበረ "ሕነ ምፍዳይ" መጥቃዕቲ ደው ከምዘበለት ሓቢሩ።

   ምጅማር ኲናት ኢራን፡ እቲ ግጭት ነቲ መብዛሕትኡ ግዜ ኣስታት 20 ሚእታዊት ካብ ነዳድን ፈሳሲ ተፈጥሮኣዊ ጋዝን ዓለም ዝስከም ቁልፊ መስመር መራኽብ መጻብቦ ሆርሙዝ ብኣድማዒ መንገዲ ክዕጾ ስለዝገበረ፡ ዋጋ ነዳዲ ብሓያል ወሰኽ ኣበጊሱ ነይሩ።

   ኢራንን ኣመሪካን ኣብ ወርሒ ሰነ ወተሃደራዊ ግጭት ደው ንምባልን ​​ነቲ መጻብቦ ዳግማይ ንምኽፋትን ስምምዕ ምስ ፈረማ፡ ዋጋ ነዳዲ ናብቲ ቅድሚ ኲናት ዝነበረ ደረጃ ኣስታት 70 ዶላር ንሓደ በርሚል ተመሊሱ ከምዝነበረ ይዝከር።

   ይኹን እምበር፡ ኣብ መጀመርታ ናይዚ ወርሒ ዝፈረሰ ውዕል ምቁራጽ ተኹሲ ስዒቡ፡ ኣብ ልዕሊ ዓለማዊ ቀረብ ጸዓት ዝነበረ ስግኣት ዳግማይ ኣበጊሱ፡ ዋጋ ነዳዲ ዳግማይ ክብርኽ ገይሩ ነይሩ።

7. 26 ሓምለ 2026ህንዲ፡ ምኒስተር ትምህርቲ ካብ ስልጣን ድሕሪ ምልቃቝ፡ ህዝባዊ ተቓውሞ 'ድዱዕ' ደው ኢሉ

   ምኒስተር ትምህርቲ ዳርመንድራ ፕራድሃን፡ ካብ ስልጣኑ ድሕሪ ምልቃቑ፡ ንሓሙሽተ ሰሙን ዝቐጸለ ሰፊሕ ተቓውሞ ህንዲ ድዱዕ -'ኮክርች'- ደው ኢሉ።

   እቲ ሲጄፒ ብዝብል ኣሕፅሮተ ቃል፡ ኣብ ብማሕበራዊ ሚድያ ዝውደብ ምንቅስቓስ፡ ነቲ ካብ ስልጣን ምቃቕ ስጉምቲ ኣመልኪቱ፡ ‘ዓወት ንዲሞክራስያዊ' ዝበሎ ዀይኑ፡ ኣሽሓት ደገፍቲ ኣብ ርእሰ ከተማ’ታ ሃገር- ደልሂ- ዝርከብ ቀንዲ ናይ ተቓውሞ ቦታ ዝኾነ ጃንታር ማንታር ይፅምብሉ ኣለዉ።

   እቲ ብ ብሰብሰርሖ-ብልሒ ዝተፈጥረ ናይ ኦንላይን ወፍሪ- ሲጄፒ፡ ናይ ብሓቂ ትካላዊ ሰልፊ ዘይኮነስ፡ መናእእሰይ እታ ሃገር ቍጠዐኦምን ሕርቃኖምን ዘንፀባርቕሉ ፍኑው መድረኽ ህዝባዊ ተቓውሞ እዩ።

   እቲ ተቓውሞ፡ ኣብ ዝሓለፉ ዓመታት ኣብ ልዕሊ መንግስቲ ቀዳማይ ሚኒስተር ናሬንድራ ሞዲ ዝረአ ዘሎ መግለጺ ዝሓየለ ህዝባዊ ቁጥዐ ኰይኑ ኣሎ።

   ፖሊስ ኣብ ልዕሊ ናብ ባይቶ ዝጓዓዙ ሰልፈኛታት ዝወሰዶ ናይ ሓይሊ ስጉምቲ ስዒቡ ድማ፡ ብዓሰርተታት ዝቑፀሩ ሰባት ኣለካላዊ ጉድኣት ዝበፅሖም ኰይኑ፡ እቲ ተቓውሞ ዝገደደ ናህሪ ወሲዅ ነይሩ።

   ፕራድሃን፡ ኣብ ኤክስ ካብ ስልጣኑ ከምዝለቐቐ ብቋንቋ ሂንዲ ኣብ ዘፍለጠሉ ጽሑፍ፡ "ባህጊ፣ ሕልምን ትፅቢታትን መንእሰያት ከምዘኽብር" ብምግላፅ ፡ ኣብ ዝሓለፈ ሒደት መዓልታት "ብዝነበረ ፍጻመታት" ዝተሰመዖ ሓዘን ኣስፊሩ።

   ዜና ምልቃቕ ስልጣን ፕራድሃን ኣብ ዝተበሰረሉ እዋን፡ ስምዒታዊ ዝኾነ ኣቢጂት ዲፕከ ዝተባህለ መስራቲ ሲጄፒ፡ ኣብቲ ኣብ ጃንታር ማንታር ዝነበረ መድረኽ "ገይርናዮ" ክብል ዓው ኢሉ ድምፁ ኣስሚዑ።

8. 26 ሓምለ 2026ኣብ ፈረንሳን ስጳኛን: ብሰንኪ ባርዕ ጫካ ልዕሊ 300 ሽሕ ሰባት ካብ መረበቶም ተመዛቢሎም

   ኣብ ፈረንሳን ስጳኛን፡ ብሰንኪ ብርቱዕ ንፋስን ልዑል ሙቐትን ዝተልዓለ፡ ንመዓልታት ዝነድድ ዘሎ ባርዕ ጫካ፡ ልዕሊ 300 ሽሕ ሰባት ካብ መረበቶም ከምዝተመዛበሉ ተገሊጹ።

   ኣባላት መጥፋእቲ ሓዊ፡ ኣብ ደቡባዊ ምዕራብ ፈረንሳ ዘጋጠመ ባርዕ ንምግታእ ይቃለሱ እኳ እንተሃለዉ፡ ሓያል ንፋስ ግን ነቲ ሃልሃልታ ናብ ካልእ ከተማ የፀግዖ ኣሎ።

   ካልኦት 55 ሽሕ ሰባት ብቀዳም ካብቲ ቦታ ክወጹ ተኣዚዞም ኣለዉ።

   ሰለዚ ድማ፡ ኣብ ደቡባዊ ምዕራብ ግዝኣታት ጂሮንደን ላንደስን ጥራይ፡ ብዝሒ ዝተመዛበሉ ሰባት 250 ሽሕ በፂሑ ኣሎ።

   ሓያል ንፋስን ደረቕ ኣየርን ነቲ ባርዕ ንምቁጽጻሩ ኣጸጋሚ ከምዝገበሮ ሰራሕተኛታት መጥፋእቲ ሓዊ ይገልጹ።

   ፈረንሳ ነቲ ሓደጋ ንምቅላስ፡ ሰራዊታ ኣዋፊራ ኣላ።

   ፕረዚደንት ኢማኑኤል ማክሮን፡ እቲ ዝዓነወ ዳግማይ ክህነፅ ምዃኑን መንግስቱ ኣብ ጎኖም ደው ከምዝብልን ገሊፁ።

   ቀዳማይ ሚኒስተር ስጳኛ ፔድሮ ሳንቸዝ ብወገኑ፡ "ከቢድ እዋን" ምዃኑ ብምግላጽ፡ በቲ ባርዕ ሓዊ ሓደ ሰብ ከምዝሞተ ኣረጋጊፁ።

   እቲ ኣብ 70ታት ዕድመ ዝርከብ ሰብኣይ፡ ኣብ መኪናኡ ውሽጢ ሞይቱ ብመጥፋእቲ ሓዊ ተረኺቡ።

   ሚኒስተር ሃገራዊ ጉዳያት፡ ፈርናንዶ ግራንደ ማርላስካ፡ እቲ ኩነታት ካብ መዓልቲ ናብ መዓልቲ እናኸፍአ ይኸይድ ኣሎ ብምባል፡ "ኩነታት ኣየር ኣይሕግዘናን ዘሎ" ክብል ኣመራሪሩ።

   ብመሰረት ፀብፃብ እቲ ሚኒስተር፡ ነቲ ሓደጋ ስዒቡ፡ ኣስታት 60 ሽሕ ሰባት ካብ ዞባታት ማድሪድን ኣቪላን ስጳኛ ክመዛበሉ እንከለዉ፡ ኣስታት 28 ሽሕ ሰባት ግና ኣብ ዘለዉዎ ክፀንሑ ተዓጊቶም ይርከቡ።

   ነበርቲ ብውሕዱ ካብ ሸሞንተ ከተማታት ግዝኣት ቶለዶ፡ ክወጹ ተኣዚዞም ኣለዉ፤ ንግዚኡ ትኽክለኛ ብዝሒ ህዝቢ ኣይተፈልጠን።

9. 23 ሓምለ 2026ሕብረት ኣፍሪቃ፡ ዕጡቓት ሑቲ ኣብ ልዕሊ መራኽብ ቀይሕ ባሕሪ ዝፍፅምዎ መጥቃዕቲ ደው ክብሉ ሓቲቱ

   ኣቦ መንበር ኮሚሽን ሕብረት ኣፍሪቃ ማሕሙድ ዓሊ ዩሱፍ፡ ዕጡቓት ሑቲ የመን ኣብ ልዕሊ መራኽብ ቀይሕ ባሕሪ ዝፈፀምዎ መጥቃዕቲ ብምኹናን፡ “ብቕልጡፍ ደው ከብሉ” ጸዊዑ።

   ብተወሳኺ ሑቲ፡ ነቲ ኣብ ቀይሕ ባሕሪ ኣብ ልዕሊ ክልተ መራኽብ ነዳዲ ዘካየድዎ መጥቃዕቲ “ሓደገኛ ምዕባለ” ክብል ኮኒንዎ።

   እቶም ብኢራን ዝድገፉ ሑቲ፡ ኣብ ልዕሊ እተን ነዳዲ ዝጽዕና መራኽብ ስዑዲ ዓረብ መጥቃዕቲ ዝፈፀመት እገዳ ምስ ኣወጁ እዩ።

   እተን መራኽብ ብሰብ ኣልቦ ነፈርትን ሚሳይላትን ከምዝተሃርማ ወሃቢ ቃል ወተሃደራዊ ሓይሊ እቶም ዕጡቓት ያህያ ሳረ ኣብ ዝሃቦ መግለጺ ሓቢሩ።

   ሕብረት ኣፍሪቃ ነቲ መጥቃዕቲ “ብትሪ ይኹንኖ” ኢሉ ብምግላፅ፡ "እዚ ተግባራት ኣብ ዞባዊ ሰላምን ጸጥታን ከቢድ ጽልዋ ዘለዎ ሓደገኛ ምዕባለ'ዩ" ኢሉ።

   ምስታ መራኽባ መጥቃዕቲ ዝበጽሐን ስዑዲ ዓረብ ምሕዝነቱ ዝገለጸ ሕብረት ኣፍሪቃ፡ “ንጸጥታ፣ ልኡላውነትን ምርግጋእን” እታ ሃገር ዘለዎ ደገፍ ገሊጹ።

10. 23 ሓምለ 2026ኢራን ኣብ መሳለጥያታት ሲኣይኤ ዘካየደቶ መጥቃዕቲ፡ ​​ኢድ ሩስያ ከይህልዎ ጥርጣረታት ፈጢሩ

    ኢራን ኣብ መሳለጥያታት ሲኣይኤ ዘካየደቶ መጥቃዕቲ፡ ​ተሳትፎ​ ሩስያ ከይህልዎ ጥርጣረታት ፈጢሩ።

    እቶም ስሞም ክግለጽ ዘይደለዩ ምንጭታት ሮይተርስ፡ ነቲ ኣብ ልዕሊ መሳለጥያታት ሲኣይኤ ዝተፈጸመ መጥቃዕቲ፡ ​​ሩስያ ኢድ ኣለዋ ኢሎም ከምዘይደምደሙ ገሊጾም።

    "ዒላማን ኣድማዕነትን" ናይቲ መጥቃዕቲ፡ ​​ከምኡ'ውን ሩስያ ንኢራን ዝሃበቶ ሰፊሕ ቴክኒካዊ ደገፍ ግን ነቲ ጥርጣረ መበገሲ ክኸውን ይኽእል'ዩ።

    ሮይተርስን ካልኦት ማዕከናት ዜናን፡ ሰበስልጣን ኣመሪካ፡ ኢራን ኣብ ወሽመጥ ዓረብ ኣብ እትገብሮ መጥቃዕቲ፡ ሩስያ ቴክኒካዊ ደገፍ ትህቦ ምህላዋ ከም ዝፈልጡ ጸብጺበን።

    ኣብ ወርሒ መጋቢት ኣብ ወሽመጥ ዓረብ ዝርከባ ክልተ ማእከላት ሲኣይኤ መጥቃዕቲ ከምዝተፈጸመን ሮይተርስ ሓቢሩ።

    እቲ ሓደ መሳለጥያ ኣብ ጥቓ ኤምባሲ ኣመሪካ ኣብ ሪያድ ዝርከብ ኮይኑ፡ እቲ ካልኣይ ድማ ኣብ ምብራቓዊ ዒራቕ ይርከብ።

    ካልኦት ዒላማ ዝዀና መሳለጥያታት ሲኣይኤ እንተለዋ፡ ምንጭታት ሮይተርስ ዝርዝር ሓበሬታ ክህቡ ኣይደለዩን።

11. 22 ሓምለ 2026ኣመሪካ፡ ኣብ ኲናት ኢራን ኣስታት 37.5 ቢልዮን ዶላር ከም ዘውጽአት ተገሊጹ

    ኣመሪካ፡ ኣብቲ ኣብ ማእከላይ ምብራቕ ምስ ኢራን ዝተኻየደ ኲናት ክሳብ ሕጂ ኣስታት 37.5 ቢልዮን ዶላር ከም ዘውጽአት ሚኒስተር ምክልኻል ፒት ሄግሰት ገሊጹ።

    ሄግሰት ንሰኔት ኣብ ዝሃቦ መብርሂ፡ ኣባላት ባይቶ ንፔንታጎን ተወሳኺ 87 ቢልዮን ዶላር ከጽድቕ ሓቲቱ።

    ካብዚ እቲ 67 ቢልዮን ዶላር ኣብ ማእከላይ ምብራቕ ንዝካየድ ስርሒታት ዝዓለመ ምዃኑ እውን ሓቢሩ።

    ጌትሰት መብርሂ ኣብ ዝህበሉ ዝነበረ እዋን እቲ መስርሕ፡ ኣንጻር ጸረ ኲናት ብዝዀኑ ሰባት ብዙሕ ግዜ ዘረብኡ ከቋርጽ ተገዲዱ እዩ።

    ኣብ ዝሓለፈ ሰሙን ኣብ መንጎ ኣመሪካን ኢራንን ተጻብኦታት ዳግማይ ካብ ዝጅምር ንደሓር፡ ሄግሰት ኣብ ካፒቶል ሂል ንፈለማ እዋን እዩ ተራእዩ።

    ሰለስተ ወተሃደራት ኣመሪካ ኣብቲ ዞባ ብኢራን ከም ዝተቐትሉ ይፍለጥ።

    ዋይት ሃውስ ኣብ ወርሒ ሚያዝያ ንኮንግረስ ኣብ ዝቕጽል ባጀት ዓመት ንፔንታጎን 1.5 ትሪልዮን ዶላር ክወሃቦ ሓቲቱ ነይሩ።

    ኣመሪካ፡ ሕጂ ኣብ ልዕሊ ኢራን ትፍጽሞ ዘላ መጥቃዕቲ 11 መዓልታት ኣቝጺሩ ኣሎ።

    ኢራን ሕነ ንምፍዳይ ኣብ ልዕሊ ኣመሪካን ኣብ ማእከላይ ምብራቕ ዝርከቡ መሻርኽታን ናይ ገዛእ ርእሳ መጥቃዕቲ ክትፍጽም ጸኒሓ እያ።

    ጸሓፊ ምክልኻል ኣመሪካ፡ ኣብቲ ብሰሉስ ዝሃቦ መብርሂ፡ "ኣብ ሓደገኛ ዓለም ኢና እንነብር ዘለና" ብምባል እዚ ድማ ተባዕን ቅልጡፍን ስጉምቲ ከም ዝሓትት ተዛሪቡ።

    ብ12 ግንቦት፡ ሓደ ላዕለዋይ በዓል ስልጣን ፔንታጎን ኣመሪካ ኣብዚ ኲናት ዘውጽኣቶ ገንዘብ 29 ቢልዮን ዶላር ከም ዝኾነ ድሕሪ ምግላጹ፡ መንግስቲ ኣመሪካ ብዛዕባ ፋይናንሳዊ ወጻኢታት እቲ ኲናት ዝሃቦ ወግዓዊ ግምት ኣይነበረን።

    ፔንታጎን ኣቐዲሙ ንኣባላት ባይቶ ኣብ ዝሃቦ መግለጺ፡ እቲ ኲናት ኣብ ቀዳማይ ሰሙን ንኣመሪካ ኣስታት 11.3 ቢልዮን ዶላር ከም ዝሓተታ ገሊጹ እዩ።

12. 22 ሓምለ 2026ቀዳማይ ምኒስተር ካናዳ ንሓድሽ ቀረጽ ኣመሪካ ተሪር ምላሽ ክትህብ ይሕተት

    ፕረዚደንት ኣመሪካ ዶናልድ ትራምፕ ምስ ቀዳማይ ምኒስተር ካናዳ ማርክ ካርኒ ኣብ መዛዘሚ ጸወታ ዋንጫ ዓለም ብሓባር ተራእዮም ድሕሪ ሒደት ሰዓታት፡ ምምሕዳር ኣመሪካ ኣብ ልዕሊ ዝተፈላለዩ ፍርያት ካናዳ ናይ 50% ቀረጽ (ታሪፍ) ከም ዝሰልዐ ኣዊጁ።

    እዚ ብሃንደበት ዝመጽአ ቍጠባዊ ስጕምቲ፡ ኣብ መንጎ ክልተአን ሃገራት ንግዲ ንምቅልጣፍ ዝግበር ዘሎ ናይ ናጻ ንግዲ ስምምዕ (USMCA) ንምሕዳስ ዝካየድ ዘሎ ዘተ ዝያዳ ንምጽላው ዝዓለመ ምዃኑ ይግለጽ ኣሎ።

    ኣመሪካ ነዚ ስጕምቲ ዝወሰደትሉ ምኽንያት፡ ካናዳ ንፍርያት መካይን፡ ጸባን ኣልኮልን ኣመሪካ ብማዕረ ኣይተተኣናግድን እያ ብዝብል ክሲ እዩ።

    እዚ ሓድሽ ቀረጽ ካብ 19 ነሓሰ ጀሚሩ ተግባራዊ ዝኸውን ኰይኑ፡ ቀዳማይ ምኒስተር ማርክ ካርኒ ተሪር ምላሽ ክህብ ወይ ድማ ነቲ ኵነታት ብትዕግስቲ ክከታተሎ ኣብ ዝብል ከቢድ ምርጫ ወዲቑ ይርከብ።

    ኣብ ካናዳ ዝተገብረ ናይ ህዝቢ ርእይቶ መጽናዕቲ ከም ዘመልክቶ፡ መብዛሕትኦም ዜጋታት ንምምሕዳር ትራምፕ ከም ዘይኣምኑን ካርኒ ንጸቕጥታት ኣመሪካ ኢዱ ክህብ ከም ዘይደልዩን ይገልጹ።

    ገለ መራሕቲ ክፍለ-ሃገራት ካናዳ እውን መንግስቶም ብርቱዕ ምላሽ ክህብ ይጽውዑ ኣለዉ።

    ካርኒ ብወገኑ፡ "ካብ ሕማቕ ስምምዕ ዘይምስምማዕ ይሓይሽ" ዝብል መርገጺ ብምሓዝ፡ ኵለን ኣማራጺታት ይምርምር ከም ዘሎ ኣፍሊጡ።

    እዚ ቍጠባዊ ውጥረት፡ ኣብ ሰሜን ኣመሪካ ንዝርከብ ስትራተጅያዊ ንግዲ ናብ ዝለዓለ ደረጃ ዘይምርግጋእ ከም ዘሰጋገሮ ይግለጽ ኣሎ።

13. 22 ሓምለ 2026ፕረዚደንት ዘለንስኪ ንላዕለዋይ ኣዛዚ ሰራዊት ዩክረይን ካብ ስልጣኑ ኣልዩ

    ፕረዚደንት ዩክረይን ቮሎድሚር ዘለንስኪ፡ ንላዕለዋይ ኣዛዚ ሰራዊት እታ ሃገር ኦሌክሳንድር ሲርስኪ ካብ ሓላፍነቱ ከም ዘልገሶ ተገሊጹ።

    እዚ ስጕምቲ ዝተወስደ፡ እቲ ህቡብ ዝነበረ ምኒስተር ምክልኻል ሚካይሎ ፌዶሮቭ ካብ ስልጣኑ ምስ ተኣልየ፡ ንተኸታተልቲ መዓልታት ዝቐጸለ ናይ ጐደና ተቓውሞታት ስዒቡ እዩ።

    እቲ ኣብ መንጎ ወተደራዊ ኣዛዚ ሲርስኪን ምኒስተር ምክልኻል ነበር ፌዶሮቭን ዝነበረ ዘይምስምማዕ፡ ንዩክረይን ኣብ ፖለቲካዊ ውጥረት ኣእትዩዋ ጸኒሑ እዩ።

    ፌዶሮቭ (ወዲ 35 ዓመት)፡ ንሰራዊት እታ ሃገር ብተክኖሎጅን ብምውጋድ ብልሽውናን ንምሕዳስ ብዝገበሮ ጻዕሪ ልዑል ናእዳ ዝረክብ ዘሎ ኰይኑ፡ ሲርስኪ (ወዲ 60 ዓመት) ግን "ናይ ሶቭየት ዘመን" ኣሰራርሓ እዩ ዝኽተል ብዝብል ክንቀፍ ጸኒሑ እዩ።

    ኣብ ክንዲ ሲርስኪ፡ እቲ ብተዋጋኣይነቱን ተቐባልነቱን ዝፍለጥ ወዲ 43 ዓመት ጀነራል ሚካይሎ ድራፓቲ ተተኪኡ ኣሎ። ድራፓቲ ሓላፍነቱ ብተወፋይነት ከም ዝስከም ቃል ዝኣተወ ኰይኑ፡ ፌዶሮቭ’ውን ንምሻም ድራፓቲ "ክንጸግ ዘይክእል ናይ ለውጢ ድምጺ" ክብል መጒሱዎ ኣሎ።

    ፕረዚደንት ዘለንስኪ ንሲርስኪ፡ ብፍላይ ኣብ መጀመርታ ወራር ሩስያ ንርእሰ ከተማ ኪቭ ንምክልኻል ንዝተጻወቶ ተራ ምስጋና ኣቕሪብሉ።

    ብተወሳኺ ንፌዶሮቭ "ግቡእ ናይ ስልጣን ቦታ" ከም ዘቕረበሉ እኳ እንተ ገለጸ፡ ፌዶሮቭ ነቲ ዕድመ ምቕባሉ ግን ገና ኣይተሓበረን።

    እዚ ናይ ኣዘዝቲ ምልውዋጥ፡ ነቲ ኣብ ውሽጢ ዩክረይን ተፈጢሩ ዘሎ ህዝባዊ ተቓውሞ ንምህዳእን ሓድሽ ወታደራዊ ስትራተጅያዊ ስጕምቲ ንምውሳድን ዝዓለመ እዩ።

14. 21 ሓምለ 2026የመን፡ ሑቲ ክልተ ዓበይቲ መራኽብ ነዳዲ ስዑዲ ዓረብ ብቀይሕ ባሕሪ ከይሓልፋ ዓጊቱ

    ካብ ስዑዲ ዓረብ ነዳዲ ዝጸዓና ክልተ ዓበይቲ መራኽብ፡ ካብ ዕጡቓት ሑቲ የመን ብሰንኪ ዝበፅሐን መጠንቀቕታ፡ ኣብ ቀይሕ ባሕሪ መንገደን ክቕይራ ከምዝተገደዳ ተገሊፁ።

    እተን ነዳዲ ናብ ቻይናን ህንድን ዝጸዓና መራኽብ፡ ሑቲ ኣብ ልዕሊ ስዑዲ ዓረብ እገዳ ድሕሪ ምንባሩ እየን ናብ መበጊሰአን ተመሊሰን።

    ስዑዲ ዓረብ ከም ጸላኢ እትርእዮም መሓዛ ኢራን ዝኾኑ ዕጡቓት ሑቲ፡ ናብ ወደባት ስዑዲ ዓረብ ወይ ካብ ወደባት ስዑዲ ዝብገስ ዝዀነ መራኽብ ዒላማ ከም ዝገብሩ ኣጠንቂቖም ኣለዉ።

    እተን ናብ ደቡባዊ ቀይሕ ባሕሪ ዘምርሓ ዝነበራ ክልተ መራኽብ፡ ካብ ሑቲ መጠንቀቕታ ምስ በፅሐን፡ ናብ ካናል ሱዌዝ ገጸን እየን ተመሊሰን።

    ኣብ መጻብቦ ሆርሙዝ ዝካየድ ዘሎ ኲናት ኣመሪካን ኢራንን፡ ቅልውላው ዓለማዊ ዋጋ ነዳዲ ዘስዓበ ኾይኑ፡ ኣብዚ እዋን’ዚ ኣብ ቀይሕ ባሕሪ ዝረአ ዘሎ ስግኣት ነቲ ቅልውላው ዝያዳ ከየጋድዶ ሻቕሎት ፈጢሩ ኣሎ።

    ካብተን ሑቲ ክምለሳ ዝኣዘዘን መራኽብ፡ ትማሊ ሰኑይ ካብ ሓደ ኣብ ቀይሕ ባሕሪ ዝርከብ ወደብ ስዑዲ ዓረብ-ያንቡ ተበጊሳ ናብ ቻይና እተምርሕ ዝነበረት ክልተ ሚልዮን በርሚል ነዳዲ ዝጸዓነት ዓባይ ታንከር ነዳዲ- ሺ ሎንግ ያንግ- ትርከበን።

    ሑቲ ምስ ኲናት ቓዛ ብዝተሓሓዝ ምስ ኣሜሪካን እስራኤልን ርክብ ኣለወን ዝብለን ብቀይሕ ባሕሪ ዝሓልፋ መራኽብ ዒላማ ክገብር ከምዝፀንሐ ዝፍለጥ ኮይኑ፡ ገለ ካብተን መራኽብ ከም ዝጠሓላ’ውን ይዝከር።

15. 21 ሓምለ 2026ኣርባዕተ ደቁ ብመጥቃዕቲ እስራኤል ዝተቐትሉዎ ኸሊል ኣል-ሓያ ላዕለዋይ መራሒ ሓማስ ተሰዪሙ

    ፍልስጤማዊ ዕጡቕ ጕጅለ ሓማስ፡ ንኸሊል ኣል-ሓያ ሓድሽ ላዕለዋይ መራሒኡ ገይሩ ከም ዝመረጸ ኣፍሊጡ። ነቲ ብጥቅምቲ 2024 ብሰራዊት እስራኤል ዝተቐትለ ያሕያ ሲንዋር ዝተክእ ድማ እዩ።

    ኣል-ሓያ፡ ሓደ ካብቶም ድሕሪ እቲ ምስ እስራኤል ዝተኻየደ ኲናት ዝያዳ ተሰማዕነት ዘጥረዩ ናይቲ ጕጅለ "ጽኑዓት" ተባሂሎም ዝጽውዑ መራሕቲ ኰይኑ፡ ናይቲ ጕጅለ ቀንዲ ተዛታያይ ብምዃን ኣብ ዝተፈላለዩ ሃገራት ኣብ ዝተኻየደ ዘተ ክመርሕ ጸኒሑ።

    ብመስከረም 2025 ኣብ ዶሓ ካብ ዝተፈጸመ ናይ እስራኤል መጥቃዕቲ ኣየር ዝደሓነ ኰይኑ፡ ኣብ ዝተፈላለየ እዋናት ግና ብሰንኪ እስራኤል ዝፈጸመቶ መጥቃዕቲ ኣርባዕተ ደቁ ተቐቲሎምዎ እዮም።

    እስራኤል ነቶም መራሕቲ ሓማስ ንምቕታል ስጕምቲ ዝወሰደት፡ ነቲ ናይ 7 ጥቅምቲ 2023 መጥቃዕቲ ዝወደቡ እዮም ብምባል እያ።

    እቲ መረጻ ኣብ መንጎ ኣል-ሓያን እቲ ንነዊሕ እዋን መራሒ ፖለቲካዊ ቤት ጽሕፈት ሓማስ ዝነበረ ኻሊድ መሽዓልን ዝተገብረ ውድድር እዩ ነይሩ።

    ኣብቲ ቀዳማይ ዙር መረጻ መሽዓል ዝለዓለ ድምጺ እኳ እንተ ረኸበ፡ ነቲ ብሕጊ ሓማስ ዘድሊ 36 ድምጺ ግና ክረክብ ኣይከኣለን። ኣብቲ ካልኣይ ዙር ግና ኣል-ሓያ ንመሽዓል ብምስዓር ክዕወት ክኢሉ።

    እዚ ዓወት’ዚ፡ እቲ ሓማስ ብዘይ ውሕስነት ናይ ገዛእ ርእሱ መንግስቲ ምምስራት፡ ኣጽዋሩ ንኸይፈትሕ ሒዝዎ ዘሎ ጽኑዕ መርገጺ ዘርኢ እዩ።

    ሓማስ ብሰንኪ እቲ ኲናት ዝለዓለ መሪሕነቱ ዝሰኣነን ትሕተ-ቕርጹ ዝዓነወን ኰይኑ፡ ኣብቲ ዝኸፈአ እዋን ታሪኹ ይርከብ።

    እቲ ጕጅለ፡ ኣጽዋሩ ንምፍታሕ ብኣመሪካ ዝቐርበሉ ዘሎ ጸቕጢ፡ ብዘይ ገለ ፖለቲካዊ ውሕስነት ፍልስጤማዊት ሃገር ተቐባልነት ከም ዘይብሉ ይገልጽ።

16. 21 ሓምለ 2026ቀዳማይ ምኒስተር ኣንዲ በርናም ናብራ ንምቅላል ዝኸውን ሓገዝ ክእውጅ እዩ

    ሓድሽ ቀዳማይ ምኒስተር ብሪጣንያ ኣንዲ በርናም፡ ሎሚ ሰሉስ ምስ ካቢኑ ንፈለማ እዋን ኣብ ዝእከበሉ፡ ነቲ ኣጋጢሙ ዘሎ ቍጠባዊ ቅልውላው ናብራ ንምቅላል ዝሕግዝ ስጕምቲ ከም ዝእውጅ ተገሊጹ።

    በርናም ነቲ ኣብ ቍጠባዊ ጸቕጢ ዝርከብ ህዝቢ "መተንፈሲ" ዝኸውን ሓገዝ ክገብር ቃል ዝኣተወ ኰይኑ፡ ነዚ ንምኽፋል ዝውዕል ባጀት እውን ሎሚ ዝርዝሩ ክገልጽ እዩ።

    እቲ ቀዳማይ ምኒስተር ንጆን ሂሊ (ቻንስለር)፡ ኤድ ሚሊባንድ (ጉዳያት ወጻኢ)፡ ኣንጀላ ራይነር (ሰክረታርያት)ን ዌስ ስትሪቲንግ (ምክልኻል)ን ዝርከቡዎም ቀንዲ ኣባላት ካቢኑ ሰይሙ ኣሎ።

    በርናም ኣብ ውሽጢ 40 ዓመት ዘይተርኣየ ዓቢ ፖለቲካዊ ለውጢ ከም ዘምጽእን ን10 ዓመት ዝጸንሕ "ሓድሽ ትልሚ ብሪጣንያ" ከም ዘውጽእን ገሊጹ እዩ።

    ይዅን’ምበር፡ መራሕቲ ተቓወምቲ ሰልፍታት ነቲ ትልሚ ንጹር ከም ዘይኰነ ብምግላጽ ይነቕፉዎ ኣለዉ።

    መራሒት ዓቃባዊ ሰልፊ ኬሚ ባደኖክ፡ በርናም ንጹር ትልሚ የብሉን ክትብል ከላ፡ መራሒ ጽገና ናይጀል ፋራጅ ድማ ከምዚ ዝበለ ዓቢ ለውጢ ንምግባር ህዝባዊ ውክልና ንምርካብ መረጻ ክጽዋዕ ከም ዝግባእ ገሊጹ።

    ብደገፍ ጉዳያት ወጻኢ፡ ፕረዚደንት ኣመሪካ ዶናልድ ትራምፕ፡ ፕረዚደንት ዩክረይን ቮሎድሚር ዘለንስኪን ሓላፊት ኮምሽን ኤውሮጳ ኡርሱላ ቮን ደር ሌየንን ምስቲ ሓድሽ ቀዳማይ ምኒስትሪ ተዘራሪቦም ኣለዉ።

    ትራምፕ ብዛዕባ ጸጥታ መጻብቦ ሆርሙዝን ንግድን ከም ዝተዘራረበ ክገልጽ ከሎ፡ ዘለንስኪ ድማ ንዩክረይን ዝግበር ደገፍ ቀጻሊ ምዃኑ ከም ዝተረጋገጸሉ ኣፍሊጡ።

17. 21 ሓምለ 2026ኣመሪካ ኣብ ልዕሊ ኢራን ሓደስቲ መጥቃዕቲ ኣየር ፈጺማ፡ ፕረዚደንት ትራምፕ ሓያል ግብረ-መልሲ ክህብ ምዃኑ ኣጠንቂቑ

    ወተሃደራት ኣመሪካ፡ ኢራን ኣብ መጻብቦ ሆርሙዝ ኣብ ልዕሊ መራኽብ ዘለዋ ናይ መጥቃዕቲ ዓቕሚ ንምድኻም፡ ንዓስራይ ተኸታታሊት ለይቲ ዝቐጸለ ሓድሽ መጥቃዕቲ ኣየር ፈጺሞም።

    ፕረዚደንት ዶናልድ ትራምፕ፡ እዚ ስጕምቲ እዚ ነቶም ኣብዚ ቐረባ እዋን ኣብ ዮርዳኖስን ዒራቕን ዝተቐትሉ ሰለስተ ወተሃደራት ኣመሪካ ንምፍዳይ ዝተወሰደ ኰይኑ፡ ኢራን "ከቢድ መጥቃዕቲ" ከም ዝወረዳ ገሊጹ።

    ከም ግብረ-መልሲ፡ ፕረዚደንት ኢራን መስዑድ ፐዘሽኪያን ሃገሩ ምስ ኣመሪካ ኣብ "ምሉእ ብምሉእ ኲናት" ከም ዘላ ኣዊጁ።

    ቴህራን ብወገና፡ ኣብቲ ስትራተጅያዊ መስመር ባሕሪ ኣብ ልዕሊ ክልተ ናይ ነዳዲ መራኽብ መጥቃዕቲ ከም ዝፈጸመትን ኣብ ባሕሬንን ኵዌትን ዝርከቡ ወተሃደራዊ ትካላት ኣመሪካ ከም ዝወቐዐትን ገሊጻ።

    ማእከላይ እዚ ወተሃደራት ኣመሪካ፡ እቲ መጥቃዕቲ ንወተሃደራዊ መአዘዚ ማእከላት፡ ናይ ሚሳይልን ድሮንን መተኰሲ ቦታታትን ስርዓተ ምክልኻል ኣየርን ዝዓለመ ምዃኑ ኣፍሊጡ።

    ምኒስትሪ ምክልኻል ኣመሪካ ድማ መንነት እቶም ኣብ ዮርዳኖስ ዝተቐትሉ ወተሃደራት ብወግዒ ይገልጽ ኣሎ።

    በቲ ካልእ ወገን፡ ዮርዳኖስን ኵዌትን ካብ ኢራን ዝተተኰሱ ሚሳይላትን ድሮናትን ኣብ ሰማያተን ከም ዘፍሸላ ኣፍሊጠን ኣለዋ።

    ኢራን ኣብ ልዕሊ መራኽብ ነዳዲ መጥቃዕቲ ፈጺመ ዝበለቶ ክሲ ግና ብኣመሪካ ተነጺጉ እዩ።

18. 20 ሓምለ 2026ኣንዲ በርናም ሓደስቲ ላዕለዎት ሚኒስተራት ክሸይም ጀሚሩ

    ሰኑይ ሓድሽ ቀዳማይ ሚኒስተር ብምዃን ስልጣን ዝተረከበ ኣንዲ በርናም ኣባላት ካቢነ ክሸይም ጀሚሩ።

    ድሮ እቲ ኣገዳሲ ስልጣን ሚኒስትሪ ፋይናንስ (ቻንስለር) ሚኒስተር ምክልኻል ንዝነበረ ጆን ሂሊ ተዋሂቡ ኣሎ። እቲ ኣብ ዝሓለፈ ወርሒ ንስታርመር ብምቅዋም ካብ መዝነቱ ዝወረደ ሂሊ፡ ናብቲ ጥቓ 10 ጐደና ዳውኒን ዝርከብ 11 ዳውኒን ስትሪት ተባሂሉ ዝጽዋዕ ወሳኒ ቤትጽሕፈት ክኣቱ'ዩ።

    ኣብ ሓደ እዋን መራሒ ሰልፊ ዕዮ ዝነበረ ኢድ ሚሊባንድ'ውን ጸሓፊ (ላዕለዋይ ሚኒስተር) ጉዳያት ወጻኢ ኮይኑ'ሎ።

    ብዘይካ'ዚ፡ ጸሓፊት ክፍሊ ውሽጣዊ ጉዳያት ኮይና ከተገልግል ዝጸንሐት ሻባና ማሕሙድ ኣብ ቦታኣ ክትቅጽል ዳግማይ ተመዚዛ።

    ሓያሎ ኣባላት ካቢነ ኪር ስታርመር ዝነበሩ ላዕለዎት ሚኒስተራት ግን፡ ዋላ'ኳ ገሊኦም ክቕጽሉ ድሌት እንተነበሮም ብሓደስቲ ተተኪኦም ኣለዉ። ሓደ ካብኦም እቲ ምክትል ቀዳማይ ሚኒስተርን ጸሓፊ ክፍሊ ፍትሒን ኮይኑ ከገልግል ዝጸሐ ዴቪድ ላሚ እዩ።

    ካልኦት ደገፍቱ ዝኾኑ ኣባላት ፓርላማ'ውን መዝነቶም ንምቕባል ካብን ናብን ዳውኒን ስትሪት ይኣትዉን ይወጹን ኣለዉ- መስርሕ ምቛም ካቢነ ሎሚ ለይቲ ኣብ ዝመጽእ መዓልታትን ክቕጽል'ዩ።

19. 20 ሓምለ 2026ሓድሽ ቀዳማይ ሚኒስተር ብሪጣንያ፡ መራሕቲ ዓለም እንታይ በሉ?

    መራሕቲ ዓለም ብወገኖም ብዛዕባ'ቲ ሓድሽ ቀዳማይ ሚኒስተር ብሪጣንያ ብምዃን ሎሚ ስልጣን ዝተረከበ ኣንዲ በርናም ርእይቶታቶም ይገልጹ ኣለዉ።

    ንኪር ስታርም ዘለዎ ነቐፌታ ክገልጽ ዝጸንሐ ፕረዚደንት ኣመሪካ ነቲ ብዙሕ ዘይፈልጦ በርናም ከምዘድንቖ ኣሚቱ'ሎ።

    ዶናልድ ትራምፕ ኣብ ማሕበራዊ መራኸቢታቱ ኣብ ዝሃቦ መግለጺ፡ እቲ ሓድሽ ቀዳማይ ሚኒስተር ብፍላይ ኣብ ስኮትላንድ ሓጐስ ፈጢሩ ከምዘሎ ይጠቅስ።

    "ህዝቢ ኣበርዲን፡ ስኮትላንድ፡ ኣብ ጐደናታት ወጺኡ ይስዕስዕ ኣሎ፣ ምኽንያቱ እቲ ሓድሽ ቀዳማይ ሚኒስተር፡ ኣንዲ በርናም፡ ነቲ ኣብ ባሕሪ ሰሜን ብምልኡ ዘሎ ነዳዲ ከምዝኸፍቶ ብምግላጹ" ይብል።

    ክልቲኦም መራሕቲ ድሮ ብተለፎን ተዘራሪቦም ከምዘለዉ ቤት ጽሕፈት ቀዳማይ ሚኒስተር ዳውኒን ስትሪት ሓቢሩ'ሎ።

    ኣብ ከተማ ኣበርዲን ሜዳ ጐልፍ ዘለዎ ትራምፕ፡ ነቲ ኣብቲ ከባቢ ኣብ ዝርከብ ማያት ባሕሪ ሰሜን ተተኺሉ ዘሎ መመንጨፊ ንፋሳዊ ጸዓት ኣምሪሩ ክቃወሞን ኣብ ክንድኡ ኲዕታ ነዳዲ ክፍቀድን ክምሕጸን ምጽንሑ ይፍለጥ።

    መራሒት ሕብረት ኣውሮጳ ፕረዚደንት ኡርሱላ ቮን ደር ለየን ብወገና፡ ነቲ ሓድሽ ቀዳማይ ሚኒስተር ዮናኣ ብምግላጽ፡ "ኣብ መንጐ ብሪጣንያን ሕብረት ኣውሮጳን ዘሎ ሽርክነት ንምሕያል" ቅሩባት ምዃኖም ገሊጻ።

    ፕረዚደንት ፈረንሳ ኢማኑዌል ማክሮን'ውን፡ ምምጻእ በርናም ንዝምድና ለንደንን ፓሪስን "ሓድሽ ናህሪ" ዝፈጥር'ዩ ክብል ዘለዎ ተስፋ ገሊጹ።

    ዓወት ዝተመነየሉ ፕረዚደንት ዩክረይን ቮለድሚር ዘለንስኪ ድማ ምስቲ ሓድሽ መንግስቲ ንምስራሕ ድሉው ከምዘሎ ኣመልኪቱ። ብሪጣንያ ሓንቲ ካብተን ገዚፍ ወተሃደራዊን ገንዘባዊን ሓገዝ ንኪቭ ክህባ ዝጸንሓ ሃገራት ምዕራብ እያ።

20. 20 ሓምለ 2026ኣንዲ በርናም፡ መራሕቲ ተቓወምቲ ሰልፍታት ዝህብዎ ዘለዉ መግለጺታት

    መራሕቲ ተቓወምቲ ሰልፊ ብሪጣንያን ብዛዕባ ኣንዲ በርናም ስልጣን ድሕሪ ምርካቡ ገብረመልሲ ይህቡ ኣለዉ።

    መራሒ ቀንዲ ተቓዋሚ ሰልፊ ዓቃባውያን ከሚ ባደኖክ፡ ነቲ ሓድሽ ቀዳማይ ሚኒስተር ዘለዋ ሰናይ ትምኒት ብምግላጽ፡ "ጌጋታት ቀዳማይ ሚኒስተርነት ኪር ስታርመር ከይደግም" ተማሕጺና።

    መራሒ ናይቲ ብካልኣይ ደረጃ ዝስራዕ ተቓዋሚ ሰልፊ ሊበራላዊ ደሞክራሲ ኢድ ዴቪ ብወገኑ፡ በርናም ብዛዕባ "ማሕበራዊ ሓልዮት፡ ኣውሮጳ ወይ ምዕቃብ ክቡር ተፈጥሮኣዊ ኣከባቢና" ዘይምዝራቡ ነቒፉ።

    መራሒ ሓምላይ ሰልፊ ዛክ ፖላንስኪ ድማ "ፕላነት እናቃጸልካ" ዝምለስ ተስፋ የለን ክብል ጽሒፉ'ሎ። እዚ ሓድሽ ቀዳማይ ሚኒስተር ኣብ ሰሜናዊ ባሕሪ ዝግበር ኲዕታ ነዳዲ ከምዘስፍሕ ብምዝራቡ'ዩ እቲ ቀንዲ ፖለቲካዊ ዕላማኡ ምዕቃብ ኣከባቢን ክሊማ ዓለምን ዝኾነ ሰልፊ ነቲ ነቐፌታ ኣቕሪቡ ዘሎ።

    እቲ ፖለቲካዊ ጽልዋኡ ኣብታ ሃገር እናሓየለ ዝኸይድ ዘሎ መራሒ 'ሪፎርም ዩ-ከይ' ናይጃል ፋራጅ ብወገኑ፡ እቲ ብዘይሃገራዊ ምርጫ ስልጣን ሒዙ ዘሎ ሓድሽ ቀዳማይ ሚኒስተር ህዝቢ ሓላፍነት ከይሃቦ ዓበይቲ ውሳነታት ክገብር የብሉን ኢሉ'ሎ።

    እዚ ሎሚ ዝተፈጸመ ለውጢ መሪሕነት ብሃገር ደረጃ'ኳ እንተኾነ፡ ብቐንዱ ኣብ ውሽጢ ገዛኢ ሰልፊ ዕዮ ብዘጋጠመ ፍልልይ'ዩ ተኸሲቱ ዘሎ።

    እቲ ሎሚ ስልጣኑ ዘረከበ ኪር ስታርመር ሰልፊ ዕዮ ኣብቲ 2024 ዝተኻየደ ሃገራዊ ፓርላመንታዊ ምርጫ ብገፊሕ ብምዕዋት ድሕሪ ነዊሕ ዓመታት ናብ ስልጣን ክምለስ ዝገበረ'ዩ።

    ኣብ ኣባላት እቲ ሰልፊ ዝነበሮ ተቐባልነት ንኣባላት ባይቶ ዝኾኑ ብጾቱ ስለዝጸለወ ድማ'ዩ ካብ ናይ ሰልፊ መሪሕነቱ ወሪዱ፡ ስልጣኑ ክረክብ ተገዲዱ።

    ኣብ ፓርላማ ብዝርከቡ ኣባላት እቲ ሰልፊ ብዘካየድዎ ውሳነ ድማ ኣንዲ በርናም መራሒ ሰልፊ ዕዮን ቀዳማይ ሚኒስተርን ክኸውን በቒዑ።