గుడ్ నైట్, లైవ్ పేజ్ వార్తలను ఇంతటితో ముగిస్తున్నాం.
ఈరోజు ముఖ్యమైన వార్తలు.
డాక్టర్ అంబేడ్కర్ కోనసీమ జిల్లాలో గ్యాస్ లీక్ కావడంతో స్థానిక ప్రజలను అధికారులు తరలించారు. దీనిపై ఆంధ్రప్రదేశ్ ముఖ్యమంత్రి చంద్రబాబు నాయుడు అధికారులతో మాట్లాడినట్టు ఏఎన్ఐపేర్కొంది.
ఈరోజు ముఖ్యమైన వార్తలు.

ఫొటో సోర్స్, Mandel NGAN / AFP via Getty Images
సీమాంతర ఉగ్రహవాదం సహా, ఉగ్రవాదం ఏరూపంలో ఉన్నా ఆమోదనీయం కాదని క్వాడ్ దేశాలు ఓ సంయుక్త ప్రకటనలో స్పష్టం చేశాయి.
మనీలాలో క్వాడ్ నేతల శిఖరాగ్ర సమావేశం జరిగింది. ఈ సమావేశానికి భారత ప్రధానమంత్రి నరేంద్ర మోదీ, అమెరికా అధ్యక్షుడు డొనల్డ్ ట్రంప్, ఆస్ట్రేలియా ప్రధానమంత్రి ఆంథోనీ అల్బనీస్, జపాన్ ప్రధానమంత్రి టకైచి సానే హాజరయ్యారు.
క్వాడ్ నేతల సంయుక్త పత్రికా ప్రకటనను భారత విదేశీ వ్యవహారాల మంత్రిత్వశాఖ విడుదల చేసింది.
సీమాంతర ఉగ్రవాదం, తీవ్రవాదం సహా ఏరూపంలో ఉన్న ఉగ్రవాదమైనా ఆమోదనీయం కాదని నాలుగుదేశాల నేతలు తీవ్రంగా ఖండించారు.
ఉగ్రవాదంపై పోరులో నాలుగు దేశాల మధ్య సహకారాన్ని మరింత పెంచుతామని ప్రకటించాయి.
ప్రాంతీయ శాంతి, భద్రతలకు భంగం కలిగించే ఏకపక్ష చర్యలను వ్యతిరేకిస్తున్నట్లు తెలిపాయి. బలప్రయోగం లేదా ఒత్తిడి ద్వారా ప్రస్తుత పరిస్థితులను మార్చే ప్రయత్నాలను కూడా వ్యతిరేకించాయి.
ఎగుమతులపై ఏకపక్షంగా ఆంక్షలు విధించడం వంటి ఆర్థిక ఒత్తిళ్లపైనా ఆందోళన వ్యక్తం చేశాయి.
ఇండో-పసిఫిక్ ప్రాంతంలో సముద్ర నిఘా, సమాచార మార్పిడిని మెరుగుపరిచేందుకు 'ఇండో-పసిఫిక్ మారిటైమ్ సర్వైలెన్స్ కోలాబరేషన్' పేరుతో కొత్త కార్యక్రమాన్ని క్వాడ్ దేశాలు ప్రకటించాయి.

ఫొటో సోర్స్, ANI
2027 ప్రారంభంలో తొలిసారిగా 'క్వాడ్ బిజినెస్ లీడర్స్ ఫోరమ్' నిర్వహించనున్నట్లు క్వాడ్ దేశాలు ప్రకటించాయి.
ఇండో-పసిఫిక్ ప్రాంతంలో నమ్మకమైన కృత్రిమ మేధ (ఏఐ) అందుబాటులోకి రావడం, దాని వినియోగాన్ని పెంచడం కోసం 'ఏఐ యాక్సిలరేటర్' ప్రాముఖ్యతను నాలుగు దేశాలు మరోసారి గుర్తుచేశాయి.
స్వేచ్ఛాయుత, సురక్షిత సైబర్ స్పేస్ కోసం కలిసి పనిచేస్తామని ప్రకటనలో పేర్కొన్నాయి.
సమాచార మార్పిడి కోసం సురక్షితమైన, నమ్మకమైన వ్యవస్థలను విస్తరించేందుకు చేపట్టిన భాగస్వామ్యంలో సాధించిన పురోగతిని క్వాడ్ దేశాలు స్వాగతించాయి.
చివరగా ఆసియాన్ ఐక్యతకు, ఆ ప్రాంతంలో దాని కీలక పాత్రకు తమ మద్దతును నాలుగు దేశాలు మరోసారి ప్రకటించాయి.

ఫొటో సోర్స్, ANI
ఇండియన్ ప్రీమియర్ లీగ్ (ఐపీఎల్) 2027కి ముందు... జట్ల మధ్య క్రీడాకారుల మార్పిడి కొనసాగుతోంది.
ఫాస్ట్ బౌలర్లు మహమ్మద్ షమీ, ఎం సిద్ధార్థ్లను రాజస్థాన్ రాయల్స్ ట్రేడ్ చేయగా.. సామ్ కరన్ లఖ్నవూ సూపర్ జెయింట్స్లో చేరుతున్నాడు.
షమీని అంతకుముందు లఖ్నవూ సూపర్ జెయింట్స్ రూ.10 కోట్లకు కొంది. ఇప్పుడు షమీ రూ.8 కోట్లకు రాజస్థాన్ రాయల్స్లో చేరుతున్నాడు.
టూ-టైమ్ పర్పుల్ క్యాప్ విన్నర్ హర్షల్ పటేల్.. ప్రస్తుతం గుజరాత్ టైటాన్కు ఆడనున్నాడు.
2025 ఐపీఎల్ వేలంలో హర్షల్ పటేల్ను రూ.8 కోట్లకు సన్రైజర్స్ హైదరాబాద్ కొనుగోలు చేసింది. ప్రస్తుతం రూ.4 కోట్లకు గుజరాత్ టైటాన్స్ తరఫున ఆడనున్నాడు.
నవంబర్ 11న పంజాబ్ కింగ్స్, ముంబయి ఇండియన్స్ మధ్య కీలకమైన ట్రేడ్ జరిగింది. దీనిలో హార్దిక్ పాండ్యా పంజాబ్ కింగ్స్లో చేరగా, అర్ష్దీప్ సింగ్ ముంబయి ఇండియన్స్కు వెళ్లాడు.

ఫొటో సోర్స్, ANI
ఫిలిప్పీన్స్లోని మనీలాలో అమెరికా అధ్యక్షుడు డోనల్డ్ ట్రంప్ను, జపాన్ ప్రధాని సనాయ్ తకాయిచిని, ఆస్ట్రేలియా ప్రధాని ఆంథోనీ ఆల్బనీస్ను భారత ప్రధానమంత్రి నరేంద్ర మోదీ కలిశారు.
ప్రాంతీయ, ప్రపంచ అంశాలపై క్వాడ్ దేశాల నాయకులతో ట్రంప్ ఒక ఉన్నత స్థాయి సమావేశాన్ని నిర్వహించారు.
ఈ సందర్భంగా మాట్లాడిన డోనల్డ్ ట్రంప్.. ‘‘ఆయన (పీఎం మోదీ) చాలా కఠినమైన వ్యక్తి. బహుశా ఆమె (జపాన్ ప్రధాని సనాయ్ తకాయిచి) ఆయన కంటే కూడా మరింత కఠినమైన వ్యక్తి కావచ్చు" అన్నారు.
"రాబోయే 12 నెలలు ప్రజలను ఎంతగానో ఆశ్చర్యపరుస్తాయి. మేం దీని గురించి అంతర్గతంగా చర్చిస్తున్నాం. మేం చేస్తున్న పనులు నిజంగానే అద్భుతమైనవి" అని అన్నారు.
ప్రధాని మోదీని ఉద్దేశించి మాట్లాడుతూ.. ‘‘ఆయన నా స్నేహితుడని నేను మీకు చెప్పాలనుకుంటున్నా. ఆయన గొప్ప నేత. ప్రపంచవ్యాప్తంగా ప్రతి ఒక్కరూ ఆయన్ను ఎంతో గౌరవిస్తారు’’ అని ట్రంప్ చెప్పారు.

ఫొటో సోర్స్, Deepak Gupta/Hindustan Times via Getty Images
ఉత్తరప్రదేశ్లో స్పెషల్ సమ్మరీ రివిజన్ (ఎస్ఎస్ఆర్) 2027 కింద ఎన్నికల సంఘం. ముసాయిదా ఓటర్ల జాబితాను విడుదల చేసింది
2026 ఏప్రిల్ 10 నుంచి 2026 నవంబర్ 17 మధ్య కాలంలో రాష్ట్రంలో మొత్తం 18 లక్షల 84 వేల 113 మంది ఓటర్లు పెరిగారని ఉత్తరప్రదేశ్ ప్రధాన ఎన్నికల అధికారి నవ్దీప్ రిన్వా చెప్పారు.
కొత్త పేర్లను చేర్చడం, పాత పేర్లను తొలగించడం చేపట్టిన తర్వాత.. రెండింటిన్నీ పరిగణనలోకి తీసుకున్నాక ఈ పెరుగుదల కనిపించిందని ఆయన స్పష్టం చేశారు.
ఓటర్ల జాబితాలో పేర్లను కేవలం సవరణ ప్రక్రియ సమయంలోనే చేర్చవచ్చని లేదా తొలగించవచ్చని భావించడం తప్పని ఆయన అన్నారు.
ఓటర్ల జాబితాను ఏడాదంతా నవీకరించవచ్చని రిన్వా అన్నారు. తుది జాబితా విడుదల చేసిన తర్వాత రోజు నుంచి ప్రజలు ఫామ్ 6, 7, 8లను సమర్పించవచ్చన్నారు.
ప్రస్తుత స్పెషల్ సమ్మరీ రివిజన్లో అర్హులైన కొత్త యువ ఓటర్లను చేరుస్తున్నట్లు ఆయన చెప్పారు.
ఉత్తరప్రదేశ్ ప్రధాన ఎన్నికల అధికారి నిర్వహించిన విలేకరుల సమావేశం తర్వాత, సమాజ్వాదీ పార్టీ అధ్యక్షుడు అఖిలేష్ యాదవ్ ట్వీట్ చేస్తూ.. 'ఫామ్ 6'లో ఏవైనా అక్రమాలు జరిగితే, ప్రజలు బీజేపీకి, అవినీతిపరులైన అధికారులకు ‘ఛఠీ కా దూద్’’ (తగిన గుణపాఠం) గుర్తు చేస్తారని పేర్కొన్నారు.
‘‘అవినీతిపరులైన అధికారులకు తదుపరి గమ్యస్థానం జైలే అవుతుంది. ఉత్తరప్రదేశ్లో తమ ఓటమి ఖాయమని గ్రహించిన బీజేపీ, దాని కుట్రపూరిత మిత్రపక్షాలు ప్రత్యేక నిఘా కార్యక్రమం పేరుతో ఏఎస్డీడీ (అంటే గైర్హాజరైనవారు, బదిలీ అయినవారు, మరణించినవారు లేదా నకిలీ/ఒకటి కంటే ఎక్కువసార్లు నమోదైన ఓటర్లు) పేరుతో నకిలీ ఓట్లను చేర్చేందుకు కుట్రలు పన్నుతున్నాయి. అధికారులపై ఒత్తిడి తెచ్చి పేర్లను చేర్చే అక్రమ చర్యకు వ్యతిరేకంగా ప్రతి సాక్ష్యాధారాన్ని సేకరిస్తాం, అలాగే ఎఫ్ఐఆర్ కూడా నమోదు చేస్తాం.
విచారణ పూర్తయ్యాక, చట్టం వారి అక్రమ సంపాదనను జప్తు చేస్తుంది. ఇది స్పష్టమైన హెచ్చరిక: ఏ అవినీతిపరుడినీ వదిలిపెట్టబోం, ఎట్టి పరిస్థితుల్లోనూ ఎవరూ తప్పించుకోలేరు’’ అని ట్వీట్ చేశారు.

ఫొటో సోర్స్, Sanjeev Verma/Hindustan Times via Getty Images
దిల్లీ మాజీ ముఖ్యమంత్రి కేజ్రీవాల్ గతంలో నివసించిన శీష్ మహాల్ను పర్యాటక కేంద్రంగా మారుస్తున్నట్టు దిల్లీ మంత్రి ప్రవేశ్ వర్మ ప్రకటించారు. వచ్చే వారం నుంచి ప్రజలు సందర్శించవచ్చని తెలిపారు.
దిల్లీలో కాలుష్యం, యమునా నది ప్రక్షాళన విషయంలో ఆమ్ ఆద్మీ పార్టీ ప్రశ్నిస్తున్న సమయంలో, అరవింద్ కేజ్రీవాల్ పాత నివాసం అంశాన్ని ప్రభుత్వం తెరపైకి తెచ్చింది.
వచ్చే వారం నుంచి దిల్లీ ప్రజలు 'శీష్ మహల్'ను సందర్శించవచ్చని దిల్లీ మంత్రి ప్రవేశ్ వర్మ తెలిపారు.
సివిల్ లైన్స్లోని 6 ఫ్లాగ్ రోడ్లోని నివాసంలో దిల్లీ ముఖ్యమంత్రిగా అరవింద్ కేజ్రీవాల్ నివసించేవారు. దీనికి బీజేపీ 'శీష్ మహల్' అని పేరు పెట్టింది.
టిక్కెట్ బుకింగ్, రిజర్వేషన్సహా ఇతర ఏర్పాట్లకు సంబంధించిన సమాచారాన్ని త్వరలో వెల్లడిస్తామని ప్రవేశ్ వర్మ విలేకరుల సమావేశంలో తెలిపారు.
"మొదటగా, మీడియావారి కోసం ఒక పర్యటన ఏర్పాటు చేయాలనుకుంటున్నాం. ఇది రాబోయే రెండు, మూడు రోజుల్లో నిర్ణయిస్తాం, దీనికి సంబంధించిన వివరాలను రేపు ప్రకటిస్తాం" అని ప్రవేశ్ వర్మ అన్నారు.

ఫొటో సోర్స్, ANI
దిల్లీలోని షాదారా ప్రాంతంలోని జ్వాలా నగర్లో మంగళవారం భవనం కూలి ఓ చిన్నారి సహా ఇద్దరు మృతి చెందారు.
"ఆ భవనం 40-50 ఏళ్ల నాటిది. ఈ ప్రమాదంలో మూడు నెలల చిన్నారి మరణించింది," అని నార్త్ ఎంసీడీ ఛైర్మన్ పంకజ్ లూథ్రా అన్నారు.
ఈ ఘటన వివేక్ విహార్ పోలీస్ స్టేషన్ పరిధిలో జరిగినట్టు ఏఎన్ఐ వార్తా సంస్థ పేర్కొంది.
"సమాచారం అందిన వెంటనే ఘటనా స్థలానికి అగ్నిమాపక, దిల్లీ పోలీసు బృందాలు, అంబులెన్స్ చేరుకున్నాయి.శిథిలాల్లో చిక్కుకున్న వారిని రక్షించారు" అని ఏఎన్ఐ తెలిపింది.

ఫొటో సోర్స్, PTI
డాక్టర్ అంబేడ్కర్ కోనసీమ జిల్లాలో గ్యాస్ లీక్ కావడంతో స్థానిక ప్రజలను అధికారులు తరలించారు. దీనిపై ఆంధ్రప్రదేశ్ ముఖ్యమంత్రి చంద్రబాబు నాయుడు అధికారులతో మాట్లాడినట్టు ఏఎన్ఐపేర్కొంది.
ఆంధ్రప్రదేశ్లోని కోనసీమలో ఓఎన్జీసీ (ONGC) గ్యాస్ లీకేజీ కారణంగా సుమారు 800 మందిని సురక్షిత ప్రాంతాలకు తరలించారని పీటీఐ వెల్లడించింది.
కోనసీమ జిల్లాలో మంగళవారం తెల్లవారుజామున ఓఎన్జీసీ గ్యాస్ బావి వద్ద భారీగా గ్యాస్ లీక్ అయినట్టు గుర్తించారు.
దీంతో అప్రమత్తమైన అధికారులు గ్యాస్ లీక్ అయిన ఒక కిలోమీటరు పరిధిలో నివసిస్తున్న సుమారు 800 మందిని తరలించారు. ఈ ఏడాది ఈ జిల్లాలో ఓఎన్జీసీకి సంబంధించి గ్యాస్ లీక్ అయినట్లు నమోదైన ఘటనల్లో ఇది కనీసం నాలుగవదిగా పీటీఐ పేర్కొంది.
గ్యాస్ లీక్ విషయంపై ఉన్నతాధికారులతో ముఖ్యమంత్రి చంద్రబాబు మాట్లాడారు. ప్రజల భద్రతకు అత్యంత ప్రాధాన్యతనివ్వాలని, ప్రభావిత ప్రాంతాల నుంచి ప్రజలను సురక్షిత ప్రాంతాలకు తరలించాలని ఆదేశించారని ముఖ్యమంత్రి కార్యాలయం ప్రకటించింది. మంగళవారం తెల్లవారుజామున 4:30 గంటల ప్రాంతంలో రాజోలు నియోజకవర్గంలోని మామిడికుదురు మండలం, నాగరం గ్రామం సమీపంలోని తాడివారిమెరక వద్ద ఈ ఘటన జరిగినట్టు సీఎంవో తెలిపింది.
బావి నుండి ఒక్కసారిగా పెద్ద శబ్దంతో గ్యాస్ బయటకు వచ్చి, భారీ మొత్తంలో గాలిలోకి వ్యాపించిందని ప్రకటనలో వెల్లడించింది. పరిస్థితిని సమీక్షించిన ముఖ్యమంత్రి, అక్కడి ప్రజలను ఆలస్యం చేయకుండా సురక్షిత ప్రాంతాలకు తరలించాలని అధికారులను ఆదేశించారు.
ఇప్పటివరకు ఎటువంటి అగ్నిప్రమాదం జరగలేదని, బావి పైభాగం సురక్షితంగానే ఉందని ఓఎన్జీసీ అధికారులు స్పష్టం చేశారు. గ్యాస్ భూమికి దగ్గరగా పేరుకుపోకుండా లేదా వ్యాపించకుండా సాంకేతిక బృందాలు చర్యలు తీసుకుంటున్నాయన్నారు. ముందు జాగ్రత్త చర్యగా, అక్కడ ఉన్న డీజిల్ జనరేటర్లు, ఇతర పరికరాలు నిలిపివేశారు. లీకేజీని పూర్తిగా అరికట్టేందుకు ఒక ప్రత్యేక 'సిమెంటింగ్ టీమ్' ఘటనా స్థలానికి చేరుకుంటోందన్నారు .

ఫొటో సోర్స్, ANI
ఉత్తరాఖండ్లోని తెహ్రీ గఢ్వాల్ జిల్లాలో సోమవారం తెల్లవారుజామున సుమారు 100 మీటర్ల లోతైన లోయలోకి ఒక ప్రయాణికుల బస్సు పడిపోయింది.
ఈ ప్రమాదంలో ఎనిమిది మంది మరణించగా, 26 మంది గాయపడ్డారని పీటీఐ వార్తా సంస్థ పేర్కొంది.
ప్రమాదం జరిగిన సమయంలో బస్సులో సుమారు 30 నుంచి 35 మంది ఉన్నారని ఏఎన్ఐ వార్తా సంస్థ వివరించింది.
డ్రైవర్ బస్సును అతివేగంగా నడిపాడని ప్రమాదంలో గాయపడిన వారు ఆరోపించారు.
"డ్రైవర్ చాలా వేగంగా నడుపుతున్నాడు. నేను అతడిని వేగం తగ్గించమని కూడా అడిగాను. నేను నిద్రపోయాను, ఆ తర్వాత ఏం జరిగిందో నాకు తెలియదు... ప్రయాణికులు అతడిని రెండు మూడు సార్లు వేగం తగ్గించమని అడిగారు, కానీ అతను వినలేదు. అదే వేగంతో నడపాడు" అని ఒక క్షతగాత్రుడు చెప్పారు.
"ఉత్తరాఖండ్లోని తెహ్రీ గఢ్వాల్ జిల్లాలో జరిగిన ప్రమాదం వార్త విని చాలా బాధపడ్డా. ఈ విషాద సమయంలో, మృతుల కుటుంబాలకు ప్రగాఢ సానుభూతిని తెలియజేస్తున్నా. గాయపడిన వారు త్వరగా కోలుకోవాలని ఆకాంక్షిస్తున్నా." అని ఈ ప్రమాదంపై విచారం వ్యక్తం చేస్తూప్రధానమంత్రి నరేంద్ర మోదీ ఎక్స్లో పోస్టు పెట్టారు.

ఫొటో సోర్స్, Reuters
రష్యా చేసిన బాలిస్టిక్ క్షిపణి దాడిలో యుక్రెయన్ రాజధాని కీయెవ్లో రెండు ప్రధాన వంతెనలు దెబ్బతిన్నాయని మేయర్ విటాలీ క్లిచ్కో ప్రకటించారు.
కీయెవ్లో డినిప్రో నదిపై ఉన్న ఉత్తర, దక్షిణ వంతెనలను క్షిపణులు తాకాయని, దీనివల్ల నగరంలో నీటి సరఫరా, విద్యుత్ సరఫరాకు అంతరాయం ఏర్పడిందని క్లిచ్కో వివరించారు.
ఇదిలా ఉండగా, రష్యాను ఆక్రమిత క్రిమియాతో కలిపే చారిత్రాత్మక కెర్చ్ వంతెనపై యుక్రెయిన్ వరుసగా రెండో రోజు కూడా దాడి చేసిందని, మాస్కో నియమించిన ఆ ప్రాంత గవర్నర్ తెలిపారు.
ఏళ్లుగా కొనసాగుతున్న సంఘర్షణను ముగించే లక్ష్యంతో యుక్రెయిన్, అమెరికా, ఐరోపా అధికారులు తదుపరి చర్చలు జరిపారు. ఈ నేపథ్యంలో సోమవారం రాత్రి తమ దేశంపై మాస్కో మరిన్ని దాడులు చేసే అవకాశం ఉందని యుక్రెయిన్ అధ్యక్షుడు వొలోదిమీర్ జెలియెన్స్కీ ఇంతకుముందే హెచ్చరించారు.
మంగళవారం అర్ధరాత్రికి కీయెవ్లో భారీ పేలుళ్ల శబ్దాలు వినిపించాయి. అనంతరం నగర మేయర్ విటాలి క్లిచ్కో మాట్లాడుతూ, నగరంలోని కీలక మౌలిక వసతులకు నష్టం జరిగినట్లు తెలిపారు.
"కొన్ని ప్రాంతాల్లో నీటి సరఫరా, హీటింగ్ వ్యవస్థలకు అంతరాయం ఏర్పడింది" అని ఆయన వెల్లడించారు.
కీయెవ్ నగరంలోని పశ్చిమ, తూర్పు ప్రాంతాలను అనుసంధానించే నిప్రో నదిపై ఎనిమిది ప్రధాన వంతెనలు ఉన్నాయి. నగరంలో ఒక ప్రాంతం నుంచి మరొక ప్రాంతానికి వెళ్లేందుకు సుమారు 30 లక్షల మంది ప్రజలు ఈ వంతెనలపైనే ఆధారపడుతున్నారు.

ఫొటో సోర్స్, Getty Images
బంగాళాఖాతంలో ఏర్పడిన సీఎస్ అక్వాన్ ఇవాళ సాయంత్రానికి తీవ్ర తుపానుగా మారబోతోందని ఐఎండీ, ఆంధ్రప్రదేశ్ రాష్ట్ర విపత్తుల నిర్వహణ సంస్థ ప్రకటించింది.
బంగాళాఖాతంలో అక్వాన్ తుపాన్ గడిచిన 9 గంటల్లో స్థిరంగా కేంద్రీకృతమైన తుపాను కొనసాగుతోందని ఆంధ్రప్రదేశ్ రాష్ట్ర విపత్తుల నిర్వహణ సంస్థ ఎండీ, ఆర్టీజీఎస్ సిఈవో ప్రఖర్ జైన్ తెలిపారు.
ప్రస్తుతానికి చెన్నైకి 610 కిలోమీటర్లు, మచిలీపట్నానికి 660కి లోమీటర్లు, విశాఖపట్నానికి 670 కిలోమీటర్ల దూరంలో స్థిరంగా ఉందని వివరించారు.
నవంబర్ 17 సాయంత్రానికి తీవ్ర తుపానుగా, నవంబర్ 19 ఉదయం నాటికి అతి తీవ్రమైన తుపానుగా బలపడే అవకాశం ఉంది. నవంబర్ 20 మధ్యాహ్నం సమయంలో నెల్లూరు, తుని మధ్య యానాం సమీపంలో తీరాన్ని తాకే అవకాశం ఉందని ఐఎండీ వెల్లడించింది.
తుపాను తీరాన్ని దాటే క్రమంలో గంటకు 120-130 కిలోమీటర్ల వేగంతో, గరిష్టంగా గంటకు 145 కిలోమీటర్ల వరకు ఈదురు గాలులు వీస్తాయని ఐఎండీ పేర్కొంది.

ఫొటో సోర్స్, x.com/INCIndia
సోనియా గాంధీ రచించిన 'బిలాంగింగ్: ఎ జర్నీ ఆఫ్ లవ్' పుస్తకావిష్కరణ సందర్భంగా, తన తల్లిదండ్రులు, తన ప్రేయసికి సంబంధించిన ఒక ఘటనను లోక్సభ ప్రతిపక్ష నాయకుడు రాహుల్ గాంధీవివరించారు.
రాజకీయాల గురించి మాట్లాడవద్దని తనకు కఠినమైన ఆదేశాలు వచ్చాయని, అయితే ఒక కొడుకుగా తన తల్లి గురించి కొన్ని విషయాలు చెప్పాలనుకుంటున్నానని రాహుల్ అన్నారు .
కేంబ్రిడ్జ్లో తన తల్లి ఉయ్యాలకు తలకిందులుగా వేలాడుతున్న ఒక ఫోటో గురించి ఆయన ప్రస్తావించారు. ఎప్పుడూ తన తల్లి అలాగే ఉండేవారని రాహుల్ చెప్పారు.
ఆ తర్వాత, తన తల్లిదండ్రులు కలుసుకున్న కేంబ్రిడ్జ్లోని 'వర్సిటీ రెస్టారెంట్' కథను వివరించారు.
చాలా ఏళ్ల తర్వాత తాను కేంబ్రిడ్జ్కు వెళ్లినప్పుడు, తన తల్లిదండ్రులు ఎక్కడ కలుసుకున్నారో చూడాలనే ఉద్దేశంతో తన ప్రేయసిని ఆ రెస్టారెంట్కు రమ్మని అడిగానని రాహుల్ చెప్పారు.
తన తల్లిదండ్రులు అక్కడే కలుసుకున్నారని రెస్టారెంట్లో ఉన్న ఒక వ్యక్తితో చెప్పినప్పుడు, వాళ్లిద్దరూ తనకు తెలుసని ఆ వ్యక్తి వెంటనే అన్నారని గుర్తు చేసుకున్నారు.
అదే వ్యక్తి సలహా మేరకు తాను చికెన్ వంటకాన్ని ఆర్డర్ చేశానని రాహుల్ చెప్పారు. "మీరు ప్రేమలో పడాలనుకుంటే, వర్సిటీ రెస్టారెంట్కు వెళ్లండి" అని సరదాగా రాహుల్ అన్నారు.
తన తల్లిదండ్రులకు అక్కడి ఆహారం గురించి చాలా మంచి జ్ఞాపకాలు ఉన్నాయని, తనకు మాత్రం ఆ వంటకం అంతగా నచ్చలేదని రాహుల్ చెప్పారు.
రాహుల్ గాంధీ ప్రసంగం ముగిసిన తర్వాత,ప్రస్తుతం మీ ప్రియురాలు ఎక్కడ ఉన్నారని అడగ్గా, దానికి రాహుల్ గాంధీ నవ్వుతూ "ఆమె నా స్నేహితురాలు" అని ఆయన బదులిచ్చారు.
బీబీసీ న్యూస్ తెలుగు లైవ్ పేజీకి స్వాగతం. నేను, బీబీసీ ప్రతినిధి ఖగేష్, ఇప్పటి నుంచి మధ్యాహ్నం 3 గంటల వరకు మీకు ముఖ్యమైన వార్తలను అందిస్తాను.
నిన్నటి లైవ్ పేజీ కోసం ఇక్కడ క్లిక్ చేయండి.
ముఖ్యమైన వార్తలను చదవడానికి ఇక్కడ క్లిక్ చేయండి. బీబీసీ న్యూస్ తెలుగు ముఖ్యమైన వార్తలను చదవడానికి కింది లింక్లపై క్లిక్ చేయండి.