" నా పడవకు తోడుగా సొరచేపలు వచ్చాయి".. నేలపై అడుగుపెట్టకుండా 327 రోజులు సముద్రంలోనే గడిపిన సాహస యాత్రికుడు

రాయల్ మెరైన్ మాజీ సైనికుడు డేవ్ 'డింగర్' బెల్ నేలపై కాలుమోపకుండా 327 రోజుల పాటు తన పడవలో ఒంటరిగా ఎటువంటి సహాయం లేకుండా పసిఫిక్, హిందూ మహాసముద్రాలను దాటారు.

డోర్సెట్‌లోని బేర్ రెజిస్‌కు చెందిన బెల్, గత ఏడాది నవంబర్ 9న పెరూ పశ్చిమ తీరం నుంచి తన ప్రయాణాన్ని ప్రారంభించారు.

కార్బన్ ఫైబర్‌తో తయారుచేసిన పడవలో 350 రోజులకు సరిపడా ఆహారం, ఇతర సామగ్రిని తీసుకువెళ్లారు.

సుమారు 15,000 నాటికల్ మైళ్లు (28,000 కి.మీ) ప్రయాణించిన తర్వాత కెన్యాలోని మొంబాసాకు ఉత్తరాన ఉన్న కిలిఫీ తీరానికి చేరుకున్నారు.

మానసిక సమస్యలతో బాధపడుతున్న మాజీ సైనికులు, అత్యవసర సేవల సిబ్బందికి సహాయం చేసే 'రాక్2రికవరీ' అనే సంస్థకు నిధులసేకరణకు ఆయనీ సాహసం చేశారు.

కిలిఫీ తీరానికి చేరుకోగానే బెల్ ఇసుకను ముద్దాడారు.

ఇన్ని నెలల తర్వాత నేలమీద అడుగుపెట్టడంతో సరిగ్గా నడవలేకపోయిన ఆయనకు భాగస్వామి జార్జీ సహాయం చేశారు. ఆయనకు ఒక బీర్ అందించారు.

"గత వారం రోజులు చాలా అద్భుతంగా గడిచాయి. నా జీవితంలో ఇంత ప్రశాంతంగా ఎప్పుడూ లేను. నవంబర్ 9 నుంచి ఆ పడవలోంచి కాలు బయటపెట్టలేదు. . నేలపై కాలు మోపడం ఇదే తొలిసారి" అని బెల్ విలేఖరులతో అన్నారు.

అనుకున్న సమయం కంటే ముందే తాను గమ్యానికి చేరుకున్నానని, తన దగ్గర ఇంకా 20 రోజులకు సరిపడా ఆహారం మిగిలే ఉందని బెల్ చెప్పారు.

ఎప్పుడైనా సొరచేపలు కనిపించాయా అని ప్రశ్నించగా ‘‘సముద్ర జీవులను చూడటమే ఈ ప్రయాణంలో అత్యంత ఆనందకరమైన విషయం. రెండు వైట్‌టిప్ సొరచేపలు కొన్ని వారాలపాటు నా పడవకు ఇరువైపులా తోడుగా వచ్చాయి. వాటిని చూస్తూ రోజుల తరబడి పడవ నడిపా" అని బెల్ తెలిపారు.

తీరానికి చేరుకోవడానికి ముందు సోమవారం పోస్టు చేసిన ఒక వీడియోలో.. ఇంటికి చేరుకోవాలనే ఉత్సాహానికి, ఒడ్డుకు చేరుకున్న తర్వాత చేయాల్సిన పనులు, ఏర్పాట్లకు మధ్య తన బుర్రలో ఎన్నో ఆలోచనలు మెదిలాయని బెల్ చెప్పారు.

‘‘పడవ నుంచి దిగిన తరువాత హోటల్‌కు వెళ్లి శుభ్రంగా తయారై, కాసేపు విశ్రాంతి తీసుకోవాలి. నన్ను చూడటానికి వచ్చేవారితో కొంత సమయం గడపాలి. ఆ తరువాత మళ్లీ పడవ దగ్గరకు రావాలి. అప్పటికి నేలపై నడవడం మళ్లీ అలవాటు కావాలని ఆశిస్తున్నా’’ అని ఆ వీడియోలో బెల్ వివరించారు.

‘‘ పడవ నుంచి దిగి పొడి నేలపై అడుగుపెట్టడం చాలా కొత్తగా అయోమయంగా అనిపించవచ్చు’’ అని బెల్ పేర్కొన్నారు.

బెల్ 2021లో న్యూయార్క్ నుంచి కార్న్‌వాల్‌లోని న్యూలిన్ వరకు అట్లాంటిక్ మహాసముద్రాన్ని పడవలో దాటారు. అప్పట్లో మళ్లీ ఇలాంటి సాహసం చేయనని శపథం చేశారు. కానీ తేలికైన పడవలు, మెరుగైన సోలార్ ప్యానెళ్లు, ఆటోపైలట్ వ్యవస్థలు వంటి అధునాతన సాంకేతికత అందుబాటులోకి రావడంతో ఆయనకు మళ్లీ ఆసక్తి పెరిగింది. ఇంకా తాను ఏం సాధించగలనో తెలుసుకోవాలనే కోరిక పుట్టింది.

పాడ్‌కాస్ట్‌లు, ఆడియోబుక్స్ వినడంతోపాటు వాయిస్ మెసేజ్‌లు పంపడం, వచ్చిన వాటిని వినడం ద్వారా పదేపదే టైమ్ చూడటాన్ని తప్పించుకోగలిగానని ఆయన చెప్పారు.

‘‘అంతులేని ఆసక్తి కారణంగానే ఈ సాహసానికి పూనుకున్నానని హిందూ మహాసముద్రంలో ఉన్న సమయంలో రికార్డు చేసి బీబీసీ రేడియోకు పంపిన వాయిస్‌ మెసేజ్‌లో తెలిపారు.

రికార్డు సృష్టించిన బెల్‌ ప్రయాణం పసిఫిక్‌ మహాసముద్రంలో పశ్చిమ దిశగా సాగింది. ఆ తర్వాత కోరల్‌ సీ, గ్రేట్‌ బారియర్‌ రీఫ్‌, టోరెస్‌ స్ట్రెయిట్‌, ఆస్ట్రేలియా ఉత్తర తీరం మీదుగా సాగిన అనంతరం హిందూ మహాసముద్రాన్ని దాటారు.

సముద్రంలో దాదాపు 11 నెలల పాటు ఉన్న సమయంలో తనకు ఎదురైన అతిపెద్ద సవాలు, దక్షిణ పసిఫిక్‌ను దాటేటప్పుడు ఎనిమిది వారాల పాటు పడవ నడపకుండా ఉండటమేనని చెప్పారు. తుపాను కాలంలో కోరల్‌ సీకి చేరుకోకుండా ఉండటానికి ఆయన ఇలా చేయాల్సి వచ్చింది.

"నేను చాలా వేగంగా ప్రయాణిస్తున్నా అందుకే వేగం తగ్గించాల్సి వచ్చింది. నడి సముద్రంలో ఇంకో ఏడెనిమిది నెలల ప్రయాణం ఉందని తెలిసి కూడా, పడవ నడపకుండా ఖాళీగా కూర్చోవడం చాలా కష్టం" అని బెల్ వివరించారు.

టీవీ అడ్వెంచరర్ జాసన్ ఫాక్స్ సోషల్ మీడియాలో బెల్‌ను ప్రశంసించారు. "ఆయన ఒంటరిగా రెండు మహాసముద్రాలను దాటారు. ఇది నమ్మశక్యం కాని సాహసం. రాక్2రికవరీ కోసం ఇదంతా చేయడం చాలా గొప్ప విషయం" అని కొనియాడారు.

మాజీ ఫుట్‌బాల్ క్రీడాకారుడు గ్రేమ్ సౌనెస్ ఒక వీడియో పోస్ట్‌లో స్పందిస్తూ.. "డేవ్, 15,500 మైళ్లు ప్రయాణించావంటే ఊహించలేకపోతున్నా. ఇది నిజంగా అద్భుతం శభాష్" అని ప్రశంసించారు.

బెల్ చేసిన ఈ సాహసం ద్వారా 'రాక్2రికవరీ' సంస్థ కోసం ఇప్పటివరకు 110,000 పౌండ్లకు (దాదాపు రూ.1కోటి 40 లక్షలకు) పైగా నిధులు సమకూరాయి.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)