ప్రధాన ఎన్నికల కమిషనర్ రాజీనామా డిమాండ్‌తో దిల్లీలో విద్యార్థుల నిరసనలు

దిల్లీలో గాంధీ జయంతి రోజున విద్యార్థుల నిరసనలు కొనసాగాయి. ఎస్ఐఆర్ ప్రక్రియను వ్యతిరేకిస్తూ చీఫ్ ఎలక్షన్ కమిషనర్ జ్ఞానేశ్ కుమార్ రాజీనామా చేయాలని డిమాండ్ చేస్తూ నిరసనకారులు జంతర్ మంతర్‌కు చేరుకునే ప్రయత్నాలు చేశారు.

అయితే, దారిపొడవునా, జంతర్ మంతర్‌కు కిలోమీటరు దూరంలో భారీగా బారికేడ్లను ఏర్పాటు చేసి భద్రతా బలగాలను మోహరించారు. నిరసనకారులెవరినీ జంతర్ మంతర్ వద్దకు చేరుకోనివ్వకుండా అడ్డుకున్నారు.

జన్‌పథ్ జంక్షన్‌లో, షాంఘ్రీలా హోటల్ ముందు, పోలీసు బలగాలు నిరసనకారులను బలవంతంగా పోలీసు వాహనాల్లోకి ఎక్కించి తరలించారు. కొన్ని రాజకీయ పార్టీలకు చెందిన కార్యకర్తలను కూడా పోలీసులు అదుపులోకి తీసుకుని వేర్వేరు చోట్లకు తరలించారు.

ఈ క్రమంలో విద్యార్థి నిరసనకారులకు, పోలీసులకూ మధ్య తోపులాటలు జరిగాయి. ఘర్షణ వాతావరణం చోటుచేసుకుంది. పోలీసుల వాహనాలను అడ్డుకుంటూ రోడ్లపై బైఠాయించిన విద్యార్థినులను మహిళా పోలీసులు పట్టుకుని పక్కకు లాగిన ఘటనలు కనిపించాయి.

మెట్రో స్టేషన్ల మూసివేత

జంతర్ మంతర్‌కు సమీపంలోని మెట్రో స్టేషన్లతో సహా మొత్తం 11 మెట్రో స్టేషన్లను ఈరోజు మూసేశారు. దీంతో అనేక మంది నిరసనకారులను జంతర్ మంతర్‌కు చేరుకోకుండానే పోలీసులు అడ్డుకున్నారు. పలు జంక్షన్లలో విద్యార్థులు, నిరసనకారులు వేర్వేరు గుంపులుగా కనిపించారు.

ఈరోజు దిల్లీ పోలీసులు బీఎన్‌ఎస్‌ఎస్‌లోని 163వ సెక్షన్‌ను అమలు చేస్తున్నారు. ఇది గతంలో సీఆర్‌పీసీలోని 144వ సెక్షన్‌కు సమానమైంది. దీంతో బహిరంగంగా ఒకేచోట నలుగురు కలిసి గుమిగూడటానికి వీల్లేదు.

జంతర్ మంతర్ దగ్గర నిరసనలకు అనుమతి కోరుతూ తమకు ఎలాంటి విజ్ఞప్తులూ రాలేదని, నిరసనలకు పోలీసుల నుంచి ఎలాంటి అనుమతీ లేదని జంతర్ మంతర్ చుట్టూ అనేక జంక్షన్లలో మోహరించిన పోలీసు అధికారులు చెబుతున్నారు. అందుకే నిరసనకారులెవ్వరినీ జంతర్ మంతర్ వద్దకు వెళ్లనివ్వట్లేదని సీనియర్ పోలీసు అధికారులు చెబుతున్నారు.

అంతకుముందు ఏం జరిగింది?

ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని డిమాండ్ చేస్తూ గాంధీ జయంతి సందర్భంగా దిల్లీలోని జంతర్ మంతర్ దగ్గర నిరసన చేపట్టనున్నట్లు విద్యార్థి సంఘాలు ప్రకటించాయి.

ఎన్నికల సంఘం పనితీరు, ఓటర్ల జాబితాలకు సంబంధించిన విషయాలను అది నిర్వహించే విధానాన్ని ప్రశ్నిస్తూ వారు చీఫ్ ఎలక్షన్ కమిషనర్ రాజీనామాను డిమాండ్ చేస్తున్నారు.

ఆల్ ఇండియా స్టూడెంట్స్ అసోసియేషన్ (ఏఐఎస్ఏ), స్టూడెంట్స్ ఫెడరేషన్ ఆఫ్ ఇండియా (ఎస్ఎఫ్ఐ), డెమోక్రటిక్ యూత్ ఫెడరేషన్ ఆఫ్ ఇండియా (డీవైఎఫ్ఐ) సంస్థలు తలపెట్టిన మార్చ్‌కు దిల్లీ పోలీసులు అనుమతి నిరాకరించారు.

అయినా తాము నిరసన ప్రదర్శన చేసి తీరాలని ఈ సంస్థలు నిర్ణయించాయి.

దీంతో ప్రతిపాదిత నిరసన ప్రదర్శనకు ముందుగానే పోలీసులు జంతర్ మంతర్‌కు వెళ్లే రహదారులపై బారికేడ్లను ఏర్పాటు చేశారు.

‘‘న్యూదిల్లీలో శాంతిభద్రతలు, ట్రాఫిక్ సజావుగా సాగేలా చూసేందుకు బీఎన్ఎస్ఎస్ 2023లోని సెక్షన్ 163 అమలులో ఉంది. దీని ప్రకారం, అనుమతి లేకుండా ప్రజలు గుమిగూడటం, బహిరంగ ప్రసంగాలు, నినాదాలు, ఊరేగింపులు, ప్రదర్శనలు, ధర్నాలు, ఉత్తర్వులో పేర్కొన్న ఇతర కార్యకలాపాలు నిషేధం పరిధిలోకి వస్తాయి" అని న్యూదిల్లీ డీసీపీ 'ఎక్స్' ప్లాట్‌ఫామ్‌లో రాశారు .

సుప్రీంకోర్టు సీనియర్ న్యాయవాది, కార్యకర్త ప్రశాంత్ భూషణ్ దిల్లీ పోలీసులను విమర్శిస్తూ, ఇన్‌స్టాగ్రామ్‌లో పోస్ట్ చేశారు.

‘‘మోదీ, షా ఆదేశాల మేరకు, జంతర్ మంతర్ నిరసనను నిరోధించడానికి దిల్లీ పోలీసులు సెంట్రల్ దిల్లీని పూర్తిగా మూసేశారు. పదకొండు మెట్రో స్టేషన్లను క్లోజ్ చేశారు.నిషేధాజ్ఞలు విధించారు. ఇంటర్నెట్‌ను సర్వీసులను ఆపేశారు. జంతర్ మంతర్‌ను చుట్టుముట్టిన పోలీసులు అక్కడి ప్రజలను నిర్బంధిస్తున్నారు" అని విమర్శించారు.

ముంబయిలో సీజేపీ నిరసనలు

కాక్రోచ్ జనతా పార్టీ అధ్యక్షుడు అభిజీత్ దీప్కే శుక్రవారం సాయంత్రం 4 గంటలకు ముంబయిలోని శివాజీ పార్కులో 'జైల్ భరో' ఉద్యమాన్ని చేపడుతున్నట్లు ప్రకటించారు.

సీఈసీ జ్ఞానేశ్ కుమార్‌కు వ్యతిరేకంగా సీజేపీ ప్రతిపాదించిన నిరసనకు ముంబై పోలీసులు అనుమతి నిరాకరించారని అభిజీత్ చెప్పారు.

2013 నాటి బాంబే హైకోర్టు ఉత్తర్వుల దృష్ట్యా శివాజీ పార్కులో ఎలాంటి సమావేశాలకు అనుమతి ఇచ్చే అధికారం తమకు లేదని ముంబై పోలీసులు స్పష్టం చేశారు.

ఆ ప్రాంతం సైలెన్స్ జోన్ అని పోలీసులు తెలిపారు.

మరోవైపు నిరసనలో పాల్గొనాలని ఆమ్ ఆద్మీ పార్టీ ప్రజలకు ఇప్పటికే విజ్ఞప్తి చేసింది.

‘‘1947లో భారతదేశానికి స్వాతంత్య్రం వచ్చినప్పుడు మనకు ఇచ్చిన ముఖ్యమైన హక్కు ఓటు హక్కు. దీనితో ప్రభుత్వాన్ని ఎవరు ఏర్పాటు చేయాలో మనం నిర్ణయించుకోవచ్చు, మన ప్రతినిధులను ఎన్నుకోవచ్చు. కానీ ఈ రోజు ప్రధాన ఎన్నికల కమిషనర్ జ్ఞానేశ్ కుమార్ ద్వారా బీజేపీ ఈ హక్కును మన నుంచి లాక్కోవడానికి ప్రయత్నిస్తోంది" అని అంతకు ముందు విడుదల చేసిన వీడియో సందేశంలో కోరారు.

(ఈ కథనం అప్‌డేట్ అవుతోంది)

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)