మహిళలను వశపరచుకుని, బెదిరించి లైంగిక దాడులకు పాల్పడిన పాస్టర్‌కు త్వరలో శిక్ష

జీతం లేకుండా రెవరెండ్ క్రిస్ బ్రెయిన్ ఇంట్లో పని చేసేందుకు నియమితులైన ఆ యువతులకు ఇచ్చిన సూచనల పత్రంలో ఒక విస్తుపోయే అంశం కూడా ఉంది.

హోం బేస్ టీమ్‌ అని పిలిచే ఆ బృందంలో పని చేసే యువతులు చర్చ్ ఆఫ్ ఇంగ్లండ్ పాస్టర్ క్రిస్ బ్రెయిన్ 'ఏం చెబితే అది చేయాలి'.

వాళ్లు వారానికి 7 రోజులు, రోజుకు 24 గంటలు షిఫ్టుల్లో రోజువారీ పనులు చేసేవారు.

వంట చేయడం, ఇల్లు ఊడవడం, బట్టలు ఇస్త్రీ చేయడం, షాపింగ్, బ్రెయిన్ చిన్న కూతురిని చూసుకోవడం, ఆయన కుక్కను వాకింగ్‌కు తీసుకెళ్లడం వంటివి అందులో ఉన్నాయి.

షెఫీల్డ్ చర్చికి 1980, 90లలో యువతను ఆకర్షించిన 'నైన్ ఓ క్లాక్ సర్వీస్' (ఎన్ఓఎస్) ఉద్యమాన్ని నడిపించేందుకు బ్రెయిన్‌కు ఖాళీ సమయం ఇవ్వడం కోసం ఆయన ఇంట్లో పనులను ఇలా యువతులకు కేటాయించారు.

రేవ్ కల్చర్, లైవ్ మ్యూజిక్, పర్యావరణ క్రియాశీలత, ప్రార్థనల సమ్మేళనంతో ఈ నైన్ ఓ క్లాక్ సర్వీస్ అప్పట్లో సంచలనం సృష్టించింది.

అయితే క్రిస్ బ్రెయిన్ ఇంట్లో పని చేసే టీమ్‌లోని యువతులకు అప్పగించిన డ్యూటీల్లో ఎక్కడా ఆయన బెడ్‌రూమ్‌లో ఆయన చేసే డిమాండ్ల గురించి రాయలేదు.

క్రూక్స్ పట్టణం శివార్లలో ఉన్న ఆయన ఇంట్లో పని చేస్తున్న యువతులపై అత్యాచారం, అసభ్య ప్రవర్తన ఆరోపణల గురించి బాధితులు జ్యూరీకి వివరించారు.

లైంగిక దాడుల ఆరోపణలు

ప్రస్తుతం 69 ఏళ్ల వయసున్న క్రిస్ బ్రెయిన్, గతంలో తన సంఘానికి చెందిన ఒక మహిళపై అత్యాచారానికి, ముగ్గురు మహిళలపై నాలుగుసార్లు లైంగిక దాడికి పాల్పడినట్లు అక్టోబర్ 2న ఇన్నర్ లండన్ క్రౌన్ కోర్టులో జరిగిన విచారణలో తేలింది.

2025 ఆగస్టులో జరిగిన మొదటి విచారణలో ఆయన 17 లైంగిక దాడుల కేసుల్లో దోషిగా తేలారు. అయితే మిగిలిన 5 ఆరోపణలపై జ్యూరీ ఏకాభిప్రాయానికి రాకపోవడంతో మరోసారి విచారణ జరిగింది.

బ్రెయిన్‌కు ఈ ఏడాది చివర్లో శిక్ష ఖరారు కానుంది. ఆయనకు జైలు శిక్ష పడే అవకాశం ఉందని కోర్టు తెలిపింది.

ఒకప్పుడు ఈ ఎన్‌ఓఎస్ ఉద్యమాన్ని అమెరికాకు కూడా విస్తరించి గ్లోబల్ స్థాయికి తీసుకెళ్లాలని ప్లాన్ చేసిన పాస్టర్ పతనం ఈ తీర్పుతో ముగిసింది.

ఆకర్షణీయమైన వ్యక్తిత్వంతో అందరినీ శాసించే ఈ పాస్టర్‌ను అనుచరులు ఒక ప్రవక్తలా చూసేవారని, ఆయన్ను నిద్రపుచ్చడానికి, మసాజ్ చేయడానికి మహిళా విశ్వాసులను పిలిచేవారని బాధితులు జ్యూరీ ఎదుట చెప్పారు.

బ్రెయిన్ ఇంట్లో ఎక్కువగా లోదుస్తులతో ఉండేవారని ఆ సమయంలో తనను ముద్దు పెట్టుకోవాలని, లైంగికంగా తాకాలని యువతులను డిమాండ్ చేసేవారని బాధితులు జ్యూరీకి చెప్పారు.

ముద్దు పెట్టుకోవడానికి నిరాకరిస్తే తమను దైవ సమూహం నుంచి బహిష్కరిస్తారని లేదా దేవుని శాపానికి గురవుతామనే భయంతో మహిళలు లొంగిపోయేవారని వారు చెప్పిన మాటలను కోర్టు విన్నది.

"బ్రెయిన్‌ను అసంతృప్తికి గురిచేస్తే, దేవుడిని అసంతృప్తి పరిచినట్లేనని మేము భావించాం" అని బాధిత మహిళల్లో ఒకరు కోర్టులో సాక్ష్యం చెప్పారు.

మ్యూజిక్ బ్యాండ్ నుంచి చర్చి ఉద్యమం వరకు..

1980ల ప్రారంభంలో బ్రెయిన్ దంపతులు, కొంతమంది క్రైస్తవ స్నేహితులు క్రూక్స్‌లోని సెయింట్ థామస్ చర్చిలో చేరడంతో 'ఎన్ఓఎస్' ఉద్యమం మొదలైంది.

'ప్రెజెంట్ టెన్స్' అనే బ్యాండ్ చుట్టూ ఉన్న ఈ డజను మంది ఆరాధకులు సంప్రదాయ ఆంగ్లికన్ ప్రార్థనల పట్ల అసంతృప్తితో ఉండేవారు.

బ్రెయిన్ ఆ బ్యాండ్‌కు బాస్ గిటారిస్ట్‌, ఎన్నిక కాని నాయకుడుగా ఉండేవారు.

సంపన్నులకే పరిమితమైన "ఫ్యాన్సీ గోల్ఫ్ క్లబ్ క్రిస్టియానిటీ"ని బ్రెయిన్ వ్యతిరేకించేవారు.

1984లో చర్చికు చెందిన వికార్ రాబర్ట్ వారెన్ ప్రతి ఆదివారం రాత్రి 9:00 గంటలకు బ్రెయిన్ గ్రూప్ ప్రయోగాలు చేసుకునే అవకాశం ఇచ్చారు.

ఆ బ్యాండ్ తమ పాత రాక్ పాటలను పక్కనబెట్టి షెఫీల్డ్‌లో అప్పట్లో ట్రెండ్‌గా ఉన్న ఎలక్ట్రానిక్ మ్యూజిక్ శైలిని ఎంచుకుంది.

దీంతో నైన్ ఓ క్లాక్ సర్వీస్ పెద్ద సంచలనంగా మారింది.

అత్యాధునిక సంగీతం, వీడియోలు, ప్రార్థనలు, డ్యాన్స్‌ సమ్మేళనంతో దాదాపు 600 మంది యువతీ యువకులను ఆకర్షించింది.

బ్రెయిన్ గ్రూప్ చర్చికి యువతకు మధ్య ఉన్న దూరాన్ని తగ్గించిందని అప్పట్లో బీబీసీ రేడియో ప్రోగ్రామ్ కూడా కథనం ప్రసారం చేసింది.

దీని ప్రజాదరణ చూసి షెఫీల్డ్ డియోసెస్ అధికారులు బ్రెయిన్‌ను పాస్టర్‌గా నియమించారు.

బ్రిటన్‌లోని ప్రతి నగరంలోనూ ఒక 'ఎన్ ఓ' ఎస్' ఉండాలని కోరుకుంటున్నట్లు ఆర్చ్ బిషప్ ఆఫ్ కాంటర్‌బరీ అప్పట్లో బ్రెయిన్‌తో చెప్పారు.

ఈ సేవలు తరువాత ఒక పెద్ద లేజర్ సెంటర్‌కు మారాయి.

'నైన్ ఓ క్లాక్ సర్వీస్' కోసం దాదాపు 150 మంది వలంటర్లు జీతం లేకుండా ఆదివారం రాత్రి నుంచి సోమవారం తెల్లవారుజాము వరకు పనిచేసేవారు.

'కల్ట్' లాంటి వాతావరణం

మొదట్లో బ్రెయిన్ నియంత్రణ ధోరణి పనులు త్వరగా అయ్యేందుకు సహాయపడుతుందని భావించానని వికార్ వారెన్ కోర్టులో చెప్పారు.

కానీ కాలక్రమేణా అందులో "వ్యక్తి ఆరాధన లక్షణాలు" కనిపించాయని, భక్తులు బ్రెయిన్‌ను ఒక గురువులా చూడటం ప్రారంభించారని ఆయన పేర్కొన్నారు.

'ఎన్ఓఎస్' సభ్యులు సాధారణ జీవితం గడపడంతోపాటు తమ ఆదాయంలో కనీసం 10శాతం కమ్యూనిటీకి ఇవ్వాలనే నిబంధన ఉండేది.

అయితే చాలామంది అంతకంటే ఎక్కువగా విరాళమిచ్చారు. కొంతమంది తమ వారసత్వ ఆస్తులు, ఇళ్లను కూడా రాసిచ్చారు.

కానీ బ్రెయిన్ మాత్రం ఆధునిక కార్లు, మొబైల్ ఫోన్లు, డిజైనర్ దుస్తులు ధరిస్తూ విలాసవంతమైన సెలవులను గడిపేవారు.

1994లో చర్చికి విరాళంగా వచ్చిన ఒక పెద్ద ఫామ్‌హౌస్‌లోకి తన కుటుంబాన్ని మార్చారు. "మిగతా వాళ్లంతా డబ్బు కొద్దికొద్దిగా దాచుకుంటూ బతుకుతుంటే అతను మాత్రం విలాసవంతమైన జీవితాన్ని గడిపాడు" అని ఒక సభ్యుడు కోర్టుకు తెలిపారు.

ఏడేళ్లలో దాదాపు 40వేల పౌండ్లు (రూ.40 లక్షలకు పైగా) చర్చికి ఇచ్చిన ఒక మహిళ.. బ్రెయిన్ తనను మానిప్యులేట్ చేసి సౌత్ ఆఫ్రికాలో ఉన్న తన సోదరుడి పెళ్లికి వెళ్లకుండా చేసి ఆ డబ్బుతో కమ్యూనిటీ కోసం ఒక వ్యాన్ కొనేలా చేశాడని గుర్తు చేసుకున్నారు.

కుటుంబాలకు దూరం..

'నైన్ ఓ క్లాక్ సర్వీస్' సభ్యులు బయటి ప్రపంచంతో, తమ కుటుంబ సభ్యులతో బంధాలను తెంచుకోవాలని బ్రెయిన్ కోరేవారు.

ఒక మహిళ వారాంతంలో ఇంటికి వెళ్లినందుకు బ్రెయిన్, ఇతర లీడర్లు ఆమెను తీవ్రంగా మందలించారు.

"ఇకపై ఇదే మీ కుటుంబం. గొప్ప కార్యం కోసం త్యాగాలు చేయాలి" అని ఆమెకు మెసేజ్‌లు పంపేవారు.

రహదారిపై ఒంటరిగా వెళ్తున్న మహిళా భక్తుల పక్కన బ్రెయిన్ కార్ ఆపి వారిని లాంగ్‌డ్రైవ్‌కు రమ్మని పిలిచేవారు.

నైన్ ఓ క్లాక్ సర్వీస్ కమ్యూనిటీలో దీన్ని "క్రిస్-నాపింగ్" (క్రిస్ నాపింగ్ అంటే క్రిస్ బ్రెయిన్ యువతులను మానసికంగా వేధించిన విధానాన్ని సూచించే పదం) అని పిలిచేవారని బాధితులు సాక్ష్యమిచ్చారు.

ఆ సమయంలో వారిని తాకుతూ, వారిలో లైంగిక స్పందనలు చచ్చిపోయాయని చెబుతూ మానసికంగా వేధించేవారని కోర్టు విచారణలో తేలింది.

"బతకాలంటే అలా చేయాల్సిందే"

"అతను నా చేయి పట్టుకుని తన తొడపై పెట్టుకున్నాడు. 'నువ్వు నన్ను ఇష్టపడుతున్నావు కదూ?' అని అడిగాడు" అని ఒక బాధితురాలు నాటి చేదు జ్ఞాపకాల గురించి కోర్టుకు చెప్పారు.

ఆమె 'లేదు' అని సమాధానం ఇచ్చి తన చేతిని వెనక్కి లాగేసుకోవడంతో, బ్రెయిన్ ఆమెపై గట్టిగా అరుస్తూ కారులోంచి దిగిపోవాలని ఆదేశించారు. ఆ ఘటనతో తాను తీవ్ర మనోవేదనకు గురయ్యానని, తనలో ‘‘క్యాథలిక్ ఫ్రిజిడిటీ’’ (క్యాథలిక్ బోధనల ప్రభావం వల్ల వ్యక్తులలో మహిళల్లో ఏర్పడే లైంగిక నిరాసక్తత లేదా భావప్రాప్తి లేకపోవడం) ఇందుకు కారణమేమోనని తనను తాను తిట్టుకున్నట్లు ఆ మహిళ కోర్టులో చెప్పారు.

కానీ అదే రోజు రాత్రి ఆమెకు బ్రెయిన్ నుండి మళ్లీ ఫోన్ వచ్చింది. "అతను చాలా మృదువైన స్వరంతో మాట్లాడుతూ, తనను వచ్చి పడుకోబెట్టగలవా అని అడిగాడు" అని ఆమె కోర్టుకు తెలిపారు.

అయితే ఈ సంఘటనకు సంబంధించి బ్రెయిన్ కోర్టులో భిన్నమైన వాదన వినిపించారు. తన సేవకులు తనకు మసాజ్ చేయడంలో "ఎలాంటి తప్పు లేదు" అని ఆయన గట్టిగా చెప్పారు.

ఒత్తిడిని తగ్గించుకోవడానికి "ఆత్మీయ స్నేహితులు" తన వెన్ను నిమిరేవారని, అది లైంగికంగా మారడం అనేది "చాలా చాలా అరుదుగా" జరిగేదని అది కూడా పరస్పర అంగీకారంతోనే జరిగేదని అతను తన రెండో విచారణలో కోర్టుకు తెలిపాడు.

లైంగికత పట్ల 'నైన్ ఓ క్లాక్ సర్వీస్' లోని యువతుల వైఖరిని తాను విమర్శించిన మాట నిజమేనని ఆయన కోర్టులో అంగీకరించారు.

అది వారిలో ఆత్మవిశ్వాసాన్ని, దృఢత్వాన్ని పెంపొందించడానికి చేసిన ప్రయత్నం అని చెప్పుకొచ్చారు.

"ఈ రకమైన ఆలోచనా విధానం థర్డ్-వేవ్ ఫెమినిజం అభివృద్ధిపై తీవ్ర ప్రభావం చూపింది. అందువల్ల నేను చేసిన దేనికీ పశ్చాత్తాపపడటం లేదు" అని ఆయన కోర్టులో చెప్పారు.

అయితే ఆయన బెడ్‌రూమ్‌కు పిలిపించుకున్న మహిళలు కోర్టు విచారణలో పూర్తి భిన్నమైన వివరాలు వెల్లడించారు.

"ఆ సమయంలో నేను బ్రతకడం కోసమే అలా చేయాల్సి వచ్చింది. అంగీకరించే లేదా నిరాకరించే స్వేచ్ఛ నాకు లేదు. నిత్యం భయంలో బతికాను" అని ఓ బాధితురాలు ఆవేదన వ్యక్తం చేశారు.

ఇంత జరుగుతున్నా మళ్లీ మళ్లీ అతని వద్దకే ఎందుకు వెళ్ళేవారు? అని బ్రెయిన్ తరపు డిఫెన్స్ లాయర్ ఆమెను ప్రశ్నించారు.

ఈ ప్రశ్నకు ఆమె బదులిస్తూ తమ జీవితంలో ఒక భాగంగా మారిపోయిన ఆ చర్చి ఉద్యమం నుంచి బహిష్కరిస్తారేమోననే భయంతోనే వెళ్లినట్లు చెప్పారు.

"ఆయనను చర్చి గౌరవించి మద్దతిచ్చింది. ఆయన మా పాస్టర్. ఆయన అధికారాన్ని ప్రశ్నించడానికి నేను ఎవరిని?" అని మరో మహిళ కోర్టుకు తెలిపారు.

1980ల ప్రారంభంలో బ్రెయిన్ తనను బెడ్‌పైకి నెట్టి అత్యాచారం చేశారని మరో మహిళ జ్యూరీకి తెలిపారు

"అతను నన్ను పూర్తిగా "బ్రెయిన్‌వాష్" చేశారు. ఆర్థికంగా కూడా ఆయనపై ఆధారపడేలా మార్చేశారు" అని వివరించారు.

బ్రెయిన్ ఇంట్లో పని చేసే యువతులు బిగుతుగా ఉండే స్పోర్ట్స్ వేర్ దుస్తులు లేదా లోదుస్తులు మాత్రమే ధరించాలని నిబంధన పెట్టారు. అందుకే వారిని 'లైక్రా లవ్లీస్' అని పిలిచేవారని సాక్షులు చెప్పారు.

ఆ యువతులు రాత్రి పూట బ్రెయిన్ ఆఫీసు గదిలో నేలపై పడుకునే 'బానిసల లాంటి వారని' కోర్టుకు వెల్లడించారు.

పునర్విచారణలో బ్రెయిన్ తనపై ఉన్న మునుపటి నేరాలను తిరస్కరించారు.

దీంతో ప్రాసిక్యూటర్లు బాధితులను మళ్లీ కోర్టుకు పిలిపించారు. దీని వల్ల వారు ఎదుర్కొన్న లైంగిక దాడుల భయానక అనుభవాలను రెండోసారి కూడా వివరించాల్సి వచ్చింది.

హిల్‌స్బరో తొక్కిసలాటలో చనిపోయిన తన స్నేహితులు, బంధువుల మృతదేహాలను గుర్తించడంలో సాయం చేసి తీవ్ర మానసిక ఆందోళనలో ఉన్న ఒక మహిళ ఆ సమయంలో తన బెడ్‌పైనే బ్రెయిన్ తనను లైంగికంగా వేధించారని కోర్టులో సాక్ష్యం ఇచ్చారు.

రహస్యం బట్టబయలు.. ఉద్యమానికి బ్రేక్

1995లో నైన్ ఓ క్లాక్ సర్వీస్ ఉద్యమానికి నాటకీయంగా తెరపడింది. ఈ ఉద్యమం ఒక వ్యక్తి ఆరాధనగా మారిందని అందులో బ్రెయిన్ భక్తులను లైంగికంగా వాడుకుంటున్నాడని చర్చి మాజీ సభ్యుడొకరు షెఫీల్డ్ ఆర్చ్‌ డీకన్ స్టీఫెన్ లోవ్ వద్దకు వెళ్లి హెచ్చరించారు.

తరువాత కొన్ని రోజులకు బిషప్ అయిన లోవ్, మొదట్లో 'ఎన్ఓఎస్' ఉద్యమానికి పెద్ద మద్దతుదారుగా ఉండేవారు. ఎన్ఓఎస్ గురించి 1992 లోనే ఇతర పాస్టర్లు లేవనెత్తిన అనుమానాలను ఆయన కొట్టిపారేశారు.

అయితే, పాస్టర్‌గా నియమితుడైన బ్రెయిన్ కాలక్రమంలో తనను తాను 'రక్షకుడు'లా భావించడం ప్రారంభించారని ఆర్చ్‌డీకన్ కోర్టులో అంగీకరించారు.

బ్రెయిన్ అనుచరులు అతనికి లైంగిక సేవలు అందిస్తూ "పడుకోబెడుతున్నారు" అనే దాని గురించి అజ్ఞాత వ్యక్తి చెప్పిన తర్వాత తాను బ్రెయిన్‌ను నేరుగా నిలదీశానని లోవ్ కోర్టుకు చెప్పారు.

ఈ సంస్థలోని దాదాపు 40 మంది మహిళలతో బ్రెయిన్‌కు లైంగిక సంబంధాలు ఉన్నాయనే ఆరోపణల గురించి బ్రెయిన్‌ను లోవ్‌ ప్రశ్నించినప్పుడు బ్రెయిన్ స్పందిస్తూ "నేను ఇంకా ఎక్కువ మందే అనుకున్నాను" అని తనతో అన్నట్లు లోవ్ కోర్టుకు తెలిపారు.

దీనిపై చర్చ్ ఆఫ్ ఇంగ్లండ్ చర్యలు మొదలుపెట్టి బ్రెయిన్‌ను ఒక సైకియాట్రిస్ట్ వద్దకు పంపింది.

"10 ఏళ్ల వయసు నుండే సెక్స్ పట్ల పిచ్చి ఉంది" అని బ్రెయిన్ స్వయంగా చెప్పినట్లు సైక్రియాటిస్ట్ నివేదిక వెల్లడించింది.

1995లో బీబీసీ డాక్యుమెంటరీ ప్రసారమవడానికి కొద్దిరోజుల ముందే బ్రెయిన్ తన పదవికి రాజీనామా చేశారు.

ఆ డాక్యుమెంటరీలో ‘‘చర్చి వాతావరణంలో ఉన్న ఒక పాస్టర్‌గా, నేను పలువురు మహిళలతో అనుచితమైన లైంగిక ప్రవర్తన నెరిపానని అంగీకరించక తప్పదు" అని చెప్పారు.

ఈ స్కాండల్ నాటి ఎన్ఓఎస్ కమ్యూనిటీని ఛిన్నాభిన్నం చేసింది.

దేశంలోని వార్తాపత్రికలలో సంచలన హెడ్‌లైన్స్‌గా మారింది.

అయితే కొంతమందికి ఇది ఊహించని విషయమేమీ కాదు.

ఈ ఆరోపణలు బహిరంగం కావడానికి ఎన్నో ఏళ్ల ముందే "అరకొర దుస్తులు ధరించిన యువతులు పాస్టర్ ఇంటికి రావడం, వెళ్లడం ఎంతవరకు సమంజసం?" అని ప్రశ్నించినట్లు సెయింట్ థామస్ చర్చి సిబ్బందిలో ఒకరు కోర్టు విచారణలో స్పష్టం చేశారు.

అయితే అప్పట్లో తన గొంతు నొక్కేశారని ఆ సాక్షి వివరించారు.

మూడు దశాబ్దాల తర్వాత శిక్ష

ఈ స్కాండల్ వార్తల్లోంచి మరుగైపోయాక బ్రెయిన్ తన పేరు మార్చుకుని ప్రజల కంట పడకుండా మాయమయ్యారు.

చెషైర్‌లోని విల్మ్‌స్లోలో ఆయన ఒక డిజైన్ కన్సల్టెన్సీని నడుపుతుండగా 2021లో ఎన్ఓఎస్ మాజీ సభ్యులు తొలిసారి సౌత్ యార్క్‌షైర్ పోలీసులను ఆశ్రయించారు.

"దీనిపై ఎవరైనా దర్యాప్తు చేయాలనుకుంటే ఆల్ ది బెస్ట్. కానీ దానివల్ల ఎలాంటి ప్రయోజనం ఉంటుందని నేను అనుకోను. ఏం జరిగిందో మనకు ఆల్రెడీ తెలుసు కదా" అని 1995 నాటి డాక్యుమెంటరీలో నాటి షెఫీల్డ్ బిషప్ డేవిడ్ లన్ చెప్పారు.

కానీ మూడు దశాబ్దాల తర్వాత బ్రెయిన్ దోషిగా తేలడంతో షెఫీల్డ్ డియోసెస్ భిన్నమైన శైలిని అవలంబించింది.

నాటి "వ్యవస్థాగత వైఫల్యాలపై స్వతంత్ర సమీక్ష" ప్రకటిస్తున్నట్లు తెలిపింది.

"అక్కడ జరిగింది అధికారాన్ని, నాయకత్వాన్ని ఘోరంగా దుర్వినియోగం చేయడమే. అలాంటిది ఎప్పటికీ జరిగి ఉండకూడదు" అని రైట్ రెవరెండ్ డాక్టర్ పీట్ విల్కాక్స్ పేర్కొన్నారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)