టాస్మేనియా టైగర్ తల రూ. 77 లక్షలు.. 90 సంవత్సరాల కిందట చనిపోయిన చిట్టచివరి ‘జంతువు’.. ఇవి ఎలా ఉంటాయి? ఎందుకింత డిమాండ్

పురాతన నక్క తల అని భావించిన వస్తువు నిజానికి.. అంతరించిపోయిన అరుదైన జంతువుది అని తెలిసిన తర్వాత వేలంలో రూ. 77 లక్షల భారీ మొత్తానికి అమ్ముడుపోయింది.

పురాతన వస్తువులను అమ్మే మార్కెట్‌లో తొలుత దీనిని 50 పౌండ్లకు(సుమారు రూ. 6500) కొనుగోలు చేయగా ఆ తర్వాత ఇది అరుదైన థైలసీన్ అనే జంతువు శరీర భాగం అని తేలింది. థైలసీన్‌నే టాస్మేనియా టైగర్ అంటారు.

ఈ థైలసీన్‌కి సంబంధించి ఇప్పటివరకు అందుబాటులో ఉన్న కేవలం 101 టాక్సిడెర్మీ నమూనాల్లో ఇదొకటి.

చనిపోయిన జంతువుల చర్మాన్ని శుభ్రపరిచి.. అందులో గడ్డి వంటివి నింపి అసలు జంతువులా కనిపించేలా చేయడాన్ని టాక్సిడెర్మీ అంటారు.

ఈ టాక్సిడెర్మీ తల ఇంగ్లాండ్‌లోని బ్రిస్టల్ నగరంలో వేలంలోకి రాగానే అందరి దృష్టిని ఆకర్షించింది.

"ఒక్కసారిగా వేలం పాట పదుల వేలకు చేరుకుంది. అక్కడి నుంచి పైకి వెళ్తూనే ఉంది. దీంతో హాల్ అంతా ఆశ్చర్యంతో నిశ్శబ్ధంగా మారిపోయింది. ఇదొక అద్భుతమైన సంఘటన" అని ఆక్షనీర్ ఆండ్రూ స్టో తెలిపారు.

థైలసీన్ అనేది న్యూ గినీ, ఆస్ట్రేలియా, టాస్మేనియాకు ప్రాంతాలకు చెందిన మాంసాహార జీవి.

దాదాపు కుక్క లక్షణాలతో కంగారూలా కడుపుపై సంచిలో పిల్లలను మోసుకొని తిరిగేది.

దీనికి పులిలా శరీరంపై చారలు ఉంటాయి.

2000 సంవత్సరాల క్రితమే థైలసీన్ జనాభా దాదాపుగా కనుమరుగైనా, టాస్మేనియాలో మాత్రం 20వ శతాబ్దం వరకు ఇవి కొనసాగాయి.

అయితే వేట, రోగాలు, వాటి ఆవాసాలు విధ్వంసానికి గురవడం వంటి కారణాలతో పూర్తిగా అంతరించిపోయాయి.

ఇప్పటివరకు సమాచారం అందుబాటులో ఉన్న చివరి థైలసీన్ 1936లో హోబర్ట్ జూలో చనిపోయింది.

థైలసీన్‌కు చెందిన టాక్సీడెర్మీ, పెల్ట్స్ (వెంట్రుకలతో ఉన్న తోలు), ఎముకలు, ఇతర భాగాలు ఇప్పుడు జంతు శాస్త్రజ్ఞులకు, సేకరణకర్తలకు అపురూపమైన వస్తువులు. ప్రదర్శనశాలలు, శాస్త్ర పరిశోధన సంస్థల్లో కాకుండా ఇంకెక్కడైనా ఇలా పూర్తి స్థాయి థైలసీన్‌ తల భాగాలు లభించడం దాదాపుగా అరుదైన విషయం.

ఎంతో ప్రత్యేకమైన వస్తువు మన కళ్ల ఎదుటే ఉండడం చాలా షాక్‌కి గురిచేసిందని స్టో అన్నారు.

"దీనికి అతికించి ఉన్న కళ్లు హాస్యభరితంగా, ఆకర్షణీయంగా ఉండడంతో విక్రేత దీనిని కొనుగోలు చేశారు. ఇది థైలసీన్ అని మేం ప్రకటించడంతో అందరూ ఒక్కసారిగా షాక్‌కి గురయ్యారు. దీని పుర్రె, ఎముకలు కూడా వేల పౌండ్లకు అమ్ముడుపోతాయి. అయితే ఇలాంటి ఒక పూర్తి స్థాయి వస్తువు లభించడం అనేది ఎప్పుడూ వినలేదు, మరీ ముఖ్యంగా యూకేలో.." అని స్టో పేర్కొన్నారు.

ఈ నమూనాను టాక్సీడెర్మీ, నేచురల్ హిస్టరీ సేకరణకర్త జేమ్స్ క్రాన్‌ఫీల్డ్ కొనుగోలు చేశారు. తన జీవితంలోనే ఇదొక అరుదైన అన్వేషణ అని ఆయన పేర్కొన్నారు.

ఈ థైలసీన్ తలభాగాన్ని విద్య, శాస్త్ర సంబంధ పరిశోధనల కోసం అందుబాటులో ఉంచేందుకు ప్రణాళిక చేస్తున్నట్లు క్రాన్ ఫీల్డ్ తెలిపారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)