గురి తప్పని బాణం: ఆసియా క్రీడల కాంపౌండ్‌ ఆర్చరీలో భారత్‌కు స్వర్ణపతకం

జపాన్‌లోని ఐచి-నగోయాలో జరుగుతున్న 2026 ఆసియా క్రీడల్లో భారత మహిళల కాంపౌండ్ ఆర్చరీ జట్టు స్వర్ణపతకాన్ని గెలుచుకుంది.

మహిళల కాంపౌండ్ టీమ్ ఈవెంట్ ఫైనల్‌లో చైనాను 238-234తేడాతో ఓడించి భారత్ స్వర్ణ పతకాన్ని గెలుచుకుంది. 238 పాయింట్ల స్కోరుతో భారత్ ఆర్చర్ల మహిళల టీమ్ విభాగంలో ఉన్న ప్రపంచ రికార్డును కూడా సమంచేశారు.

అంతకుముందు జరిగిన సెమీ ఫైనల్ మ్యాచ్‌లో భారతజట్టు దక్షిణకొరియాను 235-233 తేడాతో ఓడించింది. ఈ విజయంతో భారత మహిళల జట్టు ఫైనల్స్‌కు చేరుకుంది.

కాంపౌండ్ ఆర్చరీ జట్టులో జ్యోతి సురేఖ, చికితారావు, ప్రీతిక ఉన్నారు. జ్యోతి సురేఖ, చికితారావు తెలుగమ్మాయిలు.

గత ఆసియా క్రీడల్లోనూ జ్యోతి సురేఖ అద్భుతంగా రాణించింది. ఆర్చరీలో మూడు గోల్డ్ మెడల్స్ సాధించి, టోర్నీలో అప్పుడు భారత పతకాల పట్టికలో దూసుకుపోవడంలో సురేఖ తనవంతు పాత్ర పోషించింది.

ఎవరీ సురేఖ?

జ్యోతి సురేఖ ఆంధ్రప్రదేశ్‌కు చెందిన అమ్మాయి. క్రీడల్లో అడుగుపెట్టినప్పటి నుంచి జ్యోతి రాణిస్తూనే ఉంది. ఆర్చరీలో అరుదైన విజయాలు సాధించింది ఈ తెలుగమ్మాయి. వరుసగా పతకాలు సాధిస్తూ విజయ పరంపర కొనసాగించింది.

జూనియర్‌ స్థాయిలో అండర్ 13 పోటీల్లో ప్రస్థానం ప్రారంభించింది జ్యోతి.

జ్యోతి సురేఖ తండ్రి సురేంద్ర కుమార్ కబడ్డీ క్రీడాకారుడు. స్థానికంగా ఆటల పోటీల్లో ఆయన రాణించేవారు.

కూతుర్ని క్రీడాకారిణిగా చేయాలని చిన్నప్పటి నుంచి పట్టుదలగా ప్రయత్నించారు సురేంద్ర. దీంతో కూతురు శిక్షణ కోసం గుంటూరు జిల్లా రేపల్లె నియోజకవర్గం నడింపల్లి నుంచి విజయవాడకు మకాం మార్చారు.

తొలుత ఈత పోటీల్లో సురేఖ రాణించడంతో అందులో ప్రోత్సహించారు.

నాలుగేళ్ల వయసులోనే జ్యోతి సురేఖ కృష్ణానదిలో 5 కి.మీ. దూరాన్ని 3 గంటల 20 నిమిషాల 8 సెకండ్లలో ఈది రికార్డు సృష్టించింది.

ఈత విన్యాసాలతో లిమ్కా బుక్ ఆఫ్ రికార్డ్స్ లో కూడా చోటు దక్కించుకుంది.

గురితప్పని బాణం

కొద్దికాలం తర్వాత జ్యోతి సురేఖ విలువిద్య పైకి దృష్టి మళ్లించింది.

ఎనిమిదేళ్ల వయసులో బాణం గురి పెట్టిన సురేఖ, వెనుదిరిగి చూడలేదు. 13 ఏళ్లకే అంతర్జాతీయ పోటీల్లో తన మార్కు చూపించింది.

అండర్ 16, అండర్ 19, తర్వాత సీనియర్ విభాగాల్లోనూ విజయాలు సాధించింది సురేఖ. ఈ క్రీడలో అంతర్జాతీయ గుర్తింపును కూడా తెచ్చుకుంది.

ముఖ్యంగా కాంపౌండ్ ఆర్చరీలో జ్యోతి సురేఖ తిరుగులేని విజయాలు దక్కించుకుంది.

గత ఆసియా క్రీడల్లోనూ అదే పరంపరను కొనసాగించి, మూడు బంగారు పతకాలు దక్కించుకుంది.

2017లో అప్పటి రాష్ట్రపతి రామ్‌నాథ్ కోవింద్ నుంచి అర్జున అవార్డును స్వీకరించింది జ్యోతి సురేఖ.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)