మడ అడవుల్లో ‘రహస్య ప్రపంచం’.. 13 ఫొటోలలో

మాంగ్రూవ్ ఫోటోగ్రఫీ అవార్డుల్లో చూడడానికి కాస్త భయంగా అనిపించే చెట్లు, వేటకోసం మాటువేసే పులులు, అరుదైన డాల్ఫిన్లు ప్రత్యేకంగా కనిపించాయి.

ఉష్ణమండల ప్రాంతాల్లోని మొక్కలు ఉప్పునీటిని కలిసేచోట పెరిగే ఈ మడ అడవులు భూమికి, సముద్రానికి మధ్య వంతెనలా నిలుస్తాయి. ఈ విలక్షణమైన పర్యావరణ వ్యవస్థల్లో ప్రపంచంలోనే అత్యంత ఆసక్తికరమైన కొన్ని జీవులకు నిలయంగా ఉన్నాయి. కొన్ని అరుదైన జీవులకు ఈ మడ అడవులు రక్షణ కల్పిస్తాయి.

మరికొన్ని జీవులకు ఇవి వేటాడే ప్రాంతాలు. ప్రపంచంలోనే అతిపెద్ద మడ అడవి అయిన భారత్‌లోని సుందర్బన్స్‌లో సంచరించే ఈ చిన్న రాయల్ బెంగాల్ టైగర్(పైన ఉన్న చిత్రంలో) కూడా అందులో ఒకటి.

2026 మాంగ్రూవ్ ఫోటోగ్రఫీ అవార్డ్స్‌కు వచ్చిన ఈ చిత్రాలు ప్రపంచంలోని మడ అడవుల అద్భుతమైన అందాన్ని, పర్యావరణ వ్యవస్థలో అవి ఎంత కీలకమనే విషయాన్ని కళ్లకు కడతాయి.

ఫ్లోరిడా నుంచి ఇండోనేసియా వరకు.. పోటీల్లో వచ్చిన ఆకర్షణీయమైన 13చిత్రాలను ఇక్కడ చూడొచ్చు.

చెట్టుకు చిక్కుకుంది.. చిక్కులు తెచ్చిపెట్టే ప్రమాదం ఉంది

పోటీలో విజేతగా నిలిచిన ఈ ఆకట్టుకునే చిత్రంలో నీటి అడుగున దాగి ఉన్న ఘోస్ట్ నెట్(రాకాసి వల) అతినీలలోహిత కాంతిలో మెరుస్తూ కనిపించింది.

గౌరవ్ పాటిల్ తీసిన ఈ చిత్రంలో భారత్‌లో ముంబయికి దక్షిణంగా అలలు తాకే తీరంలో ఉన్న చెట్టుకు చిక్కుకున్న చేపల వల కనిపిస్తుంది.

వదిలేసిన చేపల వలలు చెట్లలో చిక్కుకున్నప్పుడు వన్యప్రాణులకు ప్రమాదంగా మారతాయి.

నీటిలో ఈదుతాయి.. నేల మీద నడుస్తాయి

భారత్‌లో సుందర్‌బన్స్‌లో తీసిన ఈ చిత్రంలో రెండు రంగురంగుల మడ్‌స్కిప్పర్ చేపలు కనిపిస్తున్నాయి.

ఇవి నేలపై నడవగలవు. దూకగలవు. అలాగే నీటి బయటకూడా జీవించగలవు.

మాంగ్రూవ్స్‌ మాదిరిగానే ఇవి కూడా భూమి, సముద్రం కలిసే ప్రాంతంలో సంచరిస్తాయి.

పచ్చని చెట్ల మధ్య పొడవాటి కొంగ

మాంగ్రూవ్ చెట్లు ఉష్ణమండల, ఉప ఉష్ణమండల ప్రాంతాల్లోని వందకు పైగా దేశాల తీరప్రాంతాలు, నదులు, సముద్రంలో కలిసే ప్రాంతాల్లో కనిపిస్తాయి.

బహమాస్‌లో కనిపించే ఈ అరుదైన కొంగ పచ్చని చెట్ల మధ్య ప్రత్యేకంగా కనిపిస్తోంది.

ఆట కాదు వేట.. డాల్ఫిన్ల తెలివి చూశారా!

అమెరికాలోని ఫ్లోరిడా బే ప్రాంతంలో బాటిల్ నోస్ డాల్ఫిన్లు చాలా తెలివిగా వేటాడతాయి. మాంగ్రూవ్ చెట్లతో నిండిన ఈ తీరప్రాంతం వాటికి ముల్లెట్ చేపల వంటి ఆహారాన్ని అందిస్తుంది.

అవి నీటి అడుగు నుంచి బురదను పైకి లేపి, ఆ బురదతో ఒక వలయంలాంటి ప్రాంతాన్ని సృష్టించి చేపలను అందులో చిక్కుకునేలా చేస్తాయి.

బురద కలిసిన నీటిని వలలా ఉపయోగించే ఈ వేట పద్ధతి ఫ్లోరిడా బే ప్రాంతంలోని డాల్ఫిన్లలో ప్రత్యేకంగా కనిపిస్తుంది.

అరుదైన ఈ వేట కెమెరాకు చిక్కడం చాలా అరుదు.

పట్టుకోండి చూద్దాం! టైగర్ షార్క్ అయినా ఇప్పుడు నన్నేం చేయలేదు

మాంగ్రూవ్స్ నీటి అడుగున సంక్లిష్టమైన జీవావరణాన్ని ఏర్పరుస్తాయి.

చెట్ల వేర్ల మధ్య ఈ చిన్న గ్రీన్ టర్టిల్ ఈదుతున్న దృశ్యం దీనికి ఉదాహరణ.

ఆటుపోట్లు పెరిగి నీటిమట్టం పైకి వచ్చినప్పుడు ఈ ప్రాంతం జీవులతో కళకళలాడే పర్యావరణంగా మారుతుంది.

అదే సమయంలో టైగర్ షార్క్‌లవంటి వేటాడే జంతువుల నుంచి ఇతర జీవులకు ఆశ్రయం కూడా అందిస్తుంది.

ఫ్లెమింగోల మార్చ్

ఫ్లోరిడా బే ప్రాంతంలో తీసిన మరో చిత్రం పక్షుల విభాగంలో మొదటి బహుమతి గెలుచుకుంది.

ఈ చిత్రంలో అమెరికా ఫ్లెమింగోలు ఒక లెమన్ షార్క్‌ను చాలా జాగ్రత్తగా గమనిస్తున్నాయి.

పక్షులు కావు.. రెక్కలు చాచుకుని ఈదుతున్న ‘గోల్డెన్ రేస్’

గాలాపాగోస్ దీవులకు కొద్దిదూరంలో ఒక నిస్సారమైన మాంగ్రూవ్ ప్రాంతం పక్కన కొన్ని గోల్డెన్ రేస్ తేలుతూ వెళ్లే దృశ్యాన్నికెమెరాలో బంధించారు.

మడ అడవులు తమలోని జీవ వైవిధ్యాన్ని మాత్రమే కాకుండా సమీపంలోని గడ్డిమైదానాలు, పగడపు దిబ్బలు వంటి పక్కనే ఉన్న ఇతర పర్యావరణ వ్యవస్థలకు కూడా సాయపడతాయి.

చిట్టి చేపలను మింగేయడానికి వస్తున్న పెద్ద చేప

మడ అడవుల్లో 1,500లకు పైగా రకాల జీవులున్నాయి. వాణిజ్యపరంగా కీలకమైన అనేక చేపలకు ఇవి పిల్లలు పెరిగే సహజ ప్రాంతాలుగా ఉపయోగపడతాయి. బొనైర్ లోని లాక్ బే ప్రాంతంలో తీసిన ఈ చిత్రంలో చిన్న చేపల గుంపు ఇక్కడ ఆశ్రయం పొందుతోంది. అదే సమయంలో ఒక స్నూక్ చేప వాటిపై దాడి చేయడానికి ప్రయత్నిస్తోంది.

ఆకులో ఆకునై.. ఇండియన్ వైట్ ఐ

మడ అడవులు ఇతర అడవులు కంటే ఐదు రెట్లు ఎక్కువ కార్బన్ నిల్వ చేయగలవు.

వాటి వేర్లు సముద్రం నుంచి వచ్చే అలల వేగాన్ని తగ్గించి తుపాన్ల సమయంలో వచ్చే భారీ అలల నుంచి తీరప్రాంత ప్రజలను రక్షిస్తాయి.

వాటి కొమ్మలు కూడా పక్షులకు ఆశ్రయం కల్పిస్తాయి.

ఇరాన్‌లోని మాంగ్రూవ్ చెట్టుపై వాలుతున్న అందమైన ఇండియన్ వైట్ ఐ పక్షి ఇది.

దాక్కోవడానికి బెస్ట్ ప్లేస్

కల్లోల్ ముఖర్జీ తీసిన ఈ చిత్రం క్షీరదాల విభాగంలో విజేతగా నిలిచింది.

ఇందులో దట్టమైన మడ అడవుల వృక్షసంపద అడవి పిల్లి పిల్లలకు రక్షణ కల్పిస్తోంది. ఒక అంచనా ప్రకారం తీర ప్రాంతాలను స్థిరంగా ఉంచడం, నేల కోతను తగ్గించడం ద్వారా మడ అడవులు 15కోట్లకుపైగా ప్రజలకు తీరప్రాంత రక్షణను అందిస్తున్నాయి. మడ అడవులు పెద్దమొత్తంలో కార్బన్ డై ఆక్సైడ్‌ను కూడా గ్రహించి నిల్వ చేస్తాయి.

పాలపుంత వెలుగులో ఒంటరిగా..

పోటీలో ఆన్ ద గ్రౌండ్ విభాగంలో నిల్చిన ఈ చిత్రాన్ని ర్యూహే సుగురి తీశారు.

ఇందులో ఇండోనేసియాలోని ఒంటరి మాంగ్రూవ్ చెట్టు పాలపుంత వెలుగులో ప్రకాశిస్తూ కనిపిస్తోంది.

మడ అడవులకూ తప్పని మనుషుల ముప్పు

మడ అడవులకు మనుషుల కార్యకలాపాల వల్ల ప్రమాదాలు ఎదురవుతున్నాయి. అందులో కాలుష్యం కూడా ఒకటి. ఈ చిత్రం ఆ సమస్యను చాలా స్పష్టంగా, విషాదకరంగా చూపిస్తోంది.

అడవుల నరికివేత కూడా మరో పెద్ద ప్రమాదం. చేపల పెంపకం, వ్యవసాయం లేదా తీరప్రాంత అభివృద్ధికోసం అనేక మడ అడవులను తొలగించే ప్రమాదముంది.

దీనికి తోడు వాతావరణ మార్పుల ప్రభావం కూడా మడ అడవులకు ముప్పుగా మారుతోంది. అయితే అనేక ఆశాజనక విషయాలుకూడా ఉన్నాయి. గ్లోబల్ మాంగ్రూవ్ వాచ్ ప్రకారం 1985నుంచి 2025 మధ్య ప్రపంచవ్యాప్తంగా మడ అడవుల విస్తీర్ణం నికరంగా 477.2 చదరపు కిలోమీటర్లు పెరిగింది.

( బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)