Lissu: Ushahidi wa mashtaka unaibua mashaka makubwa katika kesi
Mwenyekiti wa CHADEMA, Tundu Lissu, akiwasilisha hoja zake mbele ya majaji, amedai kuwa mbali na upande wa mashtaka kushindwa kuthibitisha hoja saba za msingi katika kesi hiyo, ushahidi uliowasilishwa umeacha mashaka makubwa kuhusu uhalali wa uchunguzi uliofanyika na msingi wa mashtaka yenyewe.
Lissu amesema chanzo kikuu cha mashaka hayo ni kile alichodai kuwa kesi hiyo iliasisiwa na mtu mmoja au wawili, akimtaja shahidi wa kwanza wa upande wa mashtaka, George Bagyemu, kuwa mhusika mkuu katika hatua za awali za uchunguzi.
Kwa mujibu wa Lissu, Bagyemu ndiye aliyeamua peke yake kuwa maneno yanayolalamikiwa yalikuwa yanaunda kosa la uhaini.
“Kesi hii yote imetengenezwa na mtu mmoja, au pengine wawili. George Bagyemu ndiye aliyeamua yeye peke yake kwamba maneno haya yanatengeneza kosa la uhaini,” amesema Lissu.
Amesema rekodi za mahakama zinaonyesha kuwa shahidi huyo aliamua kufungua faili la uhaini siku chache baada ya kuonyeshwa video iliyokuwa sehemu ya ushahidi wa kesi hiyo.
“Baada ya kuoneshwa video, akaamua kufungua faili la uhaini kabla hata hajawashirikisha wakuu wake wa kazi. Aliwafahamisha baadaye, baada ya uamuzi kuwa tayari umefanyika,” amesema.
Lissu amedai kuwa Bagyemu alifungua faili hilo kabla ya kuwashirikisha viongozi wake wa kazi, wakiwemo ZPC na DCI, na kwamba aliwajulisha baada ya hatua hiyo kuwa tayari imechukuliwa.
Aidha, amesema shahidi huyo hakuomba wala kupata ushauri wa kisheria kabla ya kufungua faili la uhaini, na kwamba hata baada ya kulifungua hakumuarifu Mkurugenzi wa Mashtaka (DPP).
“PW1 hakupata ushauri wowote wa kisheria kabla ya kufungua faili hili. Hata DPP hakujulishwa, na hakuna hata mmoja wa watu walioambiwa kuhusu kesi hii aliyekuja mahakamani kutoa ushahidi,” amesema.
Katika hoja nyingine, Lissu amesema Bagyemu hakushirikisha mamlaka nyingine za uchunguzi au taasisi za serikali katika hatua za awali za uchunguzi.
“Unafanya uchunguzi wa kesi ya uhaini lakini hushirikishi mamlaka nyingine za uchunguzi wala taasisi husika za serikali. Hilo pekee linaibua mashaka makubwa,” amesema.
Pia amedai kuwa ushahidi wa shahidi huyo ulitofautiana na maelezo ya baadhi ya mashahidi wengine wa upande wa mashtaka.
Akimtaja shahidi wa 16 (PW16), Lissu amesema ushahidi wake ulionyesha kuwa vyombo husika havikushirikishwa katika uchunguzi huo, jambo ambalo, kwa mujibu wake, linaongeza mashaka kuhusu mwenendo wa kesi na msingi wa mashtaka yaliyofunguliwa dhidi ya mshtakiwa.
“PW16 alithibitisha kwamba hawakushirikisha vyombo husika. Haya ni mambo yanayoonyesha uwepo wa mashaka makubwa na ya msingi juu ya kesi nzima ya upande wa mashtaka,” amesema Lissu.
Pia unaweza kusoma:











