ایف ای اې: پنجاب کې د ماشومانو تر ټولو ډېر نامناسب فلمونه پر انټرنېټ خپرېږي
د عکس سرچینه، Getty Images
د پاکستان فدرالي څېړنیزې ادارې ایف ای اې چارواکي وايي، پر انټرنېټ د ماشومانو نامناسبو (پورنوګرافیک) فلمونو او تصویرونو خپرولو کې د دغه هېواد پنجاب ایالت مرکزي سیمې له ټولو مخکې دي.
د دغه ایالت قصور سیمه کې پر ماشومانو د جنسي تېري او وژنو له پېښو وروسته دغې ادارې پلټنې پیل کړې دي. ایف ای اې چارواکي وايي، تر اوسه د ماشومانو نامناسب فلمونو ثبتولو له شکایتونو وروسته نیول شوي ډېر کسان د مرکزي پنجاب اوسېدونکي دي.
دا لومړی ځل دی، چې پاکستان کې د دغې قضیې څېړنې لپاره ځانګړی ټیم فعالیت پیلوي. له دې مخکې د سایبر کرایم یا انټرنېټي جرمونو مخنیوي ادارې دغو مسایلو کې پلټنه کوله.
د دغه دوه کسیزې ډلې مشر عمران حیدر بي بي سي ته وویل، دې لړ کې ورسره د پاکستان مخابراتي ادارې تر څنګ ځايي خلک هم مرسته کوي.
نوموړی وايي، له هغو کسانو به هم پوښتنې ګروېږنې کېږي، چې د نجونو نامناسب تصویرونه یې پر انټرڼېټ خپاره کړي، نیول شوي او اوس د هېواد بېلا بېلو زندانونو کې دي.
ښاغلی حیدر وايي، د ماشومانو په تړاو پر انټرنېټ د موادو خپروونکو خلاف ځکه اغېزمن فعالیت نه دی شوی، چې په وینا یې اغېزمن شوي خلک خپل شکایتونه چارواکو سره نه ثبتوي.
د هغه په خبره د ځینو کسانو خلاف د نړیوال انټرپول له لارې پاکستان کې انټرپول ته معلومات ورکړل شوي او له هغه وروسته یې پر ضد اقدامات شوي دي.
د عکس سرچینه، .
چارواکي وايي، دې لړ کې ځینې نیول شويو کسانو د انټرنېټ له لارې د پاکستاني ماشومانو پورنو ګرافیک فلمونه د انټرنېټ له لارې پلورل یا یې چمتو کول.
نوموړی وايي، دې لړ کې ډېری نیول شويو کسان لوړې زدکړې کړې او مسلکي کسان دي. ایف ای اې دا وروستیو کې د پنجاب جهنګ سیمې تیمور نومې سړي له هغه وروسته د ماشومانو نامناسبو تصویرونو خپرولو په تور ونیو، چې له کاناډا یې په اړه انټرپول معلومات ورکړي وو.
