ټرمپ: له ایران سره خبرې روانې دي او له سخت اقدام مخکې وروستی فرصت ورکوو

ژوندی پوښښ

1. ۱۸ چنګاښ ۱۴۰۵ - ۹ جولای ۲۰۲۶وروستی, سپاه پاسداران وايي، که په هرمز تنګي کې څوک "لاس‌وهنه" وکړي نو "غاښ‌ماتوونکی" ځواب به ورکړي

   د ایران انقلابي ځواکونو یا سپاه پاسداران ویلي چې هرمز تنګی د دوی په واک کې دی او ګواښ یې کړی چې که څوک پکې "لاس‌وهنه" وکړي نو "غاښ‌ماتوونکی" ځواب به ورکړي.

   په سپاه پاسداران پورې تړلي‌ ایراني تسنیم خبري اژانس یې اعلامیه خپره کړې چې دغو ځواکونو په کې ویلي، په تېرو دوو اوونیو کې یې "د تنګي امنیت ساتلی" او د دې سمندري لارې "تدریجي بیا پرانیستل" یې پیل کړي دي.

   په خبرپاڼه کې د سپاه پاسداران له خولې ویل شوي چې پر دې لار د تېرېدونکو بېړیو کچه اوس تر جګړې د مخه حالت ته ورګرېدلې یعني "شاوخوا ۵۰ سلنې" ته ختلې او د هغو کښتیو د تګ‌راتګ "زیاتولو ته دوام ورکوي" چې له ایرانه "اجازه اخلي".

   په خبرپاڼه کې راغلي، "موږ یو ځل بیا دا په ډاګه کوو چې نه پر دې ځمکه او نه هم پر هرمز تنګي کوم بهرني‌ ځواکونو د دعوې حق لري" او په وینا یې، هر ډول لاس‌وهنه به له "غاښ‌ماتوونکي غبرګون" سره مخامخ شي.

   د ایران او امریکا ترمنځ د ترینګلتیا دا زیاتېده په داسې حال کې ده چې د دغه هېواد د وژل شوي پخواني ستر مذهبي مشر ایت الله علي خامنه‌اي جنازه نن مشهد ته وړل شوې او هلته یې د جنازې وروستیو مراسمو ته زرګونه خلک ورټول دي.

2. ۱۸ چنګاښ ۱۴۰۵ - ۹ جولای ۲۰۲۶وروستی, په اردن کې د خطر زنګونه کړنګول شوي؛ وايي چې د ایران ۸ توغندي یې شنډ کړي

   د اردن دولتي اژانس د دغه هېواد د وسله‌والو ځواکونو د ویاند له خولې خبر ورکړی چې له ایرانه ورتوغول شوي اته توغندي یې په خپل فضايي حریم کې "شنډ" کړي دي.

   په ځینو سیمو کې د توغندیو چرې او پاتې شوني لوېدلي دي خو چا ته پکې د ځاني یا مالي تاوان اوښتو خبر نه دی ورکړل شوی.

   تر دې مخکې په دغه هېواد کې د خطر زنګونه کړنګول شوي وو او دولتي‌ رسنیو خبر ورکړی و چې له ایرانه ور توغول شوي توغندي د اردن هوايي حریم ته ننوتي دي.

   د اردن وسله‌والو ځواکونو ویلي چې له هر راز ګواښ سره مقابلې ته چمتو دي.

   امریکا چې په اردن کې پوځي اډه او سرتېري لري، لا په دې اړه څه نه دي ویلي.

   ایرانیو رسنیو تر دې وړاندې امریکا تورنه کړې چې نن سهار یې د دغه هېواد د اټومي انرژۍ یوې کارخونې ته نږدې برید کړی دی.‌

3. ۱۸ چنګاښ ۱۴۰۵ - ۹ جولای ۲۰۲۶وروستی, د ایران په بوشهر ولایت کې د چاودنو غږونه اورېدل شوي

   د بي‌بي‌سي فارسي د خبر له مخې، د ایران خبري سرچینو د ځايي خلکو له خولې ویلي چې په بوشهر ولایت کې د دوو چاودنو غږونه اورېدل شوي دي.

   که څه هم تر اوسه د دغو چاودنو د ځای‌ځایګي په اړه رسمي‌ خبر نه دی خپور شوی خو نن سهار امریکا په دغه ولایت کې ځينې ځایونه په نښه کړي‌ وو.

   تر دې مخکې هم د بوشهر د برېښا کارخونې باندې د توغندي لګېدو رپوټونه ورکړل شوي وو خو وروسته یې والي دا خبر رد کړ.

4. ۱۸ چنګاښ ۱۴۰۵ - ۹ جولای ۲۰۲۶وروستی, د ایران پر "۱۷۰" هدفونو د امریکا د بریدونو ډرون ويډيو

   د امریکا پوځ د ډرون په مرسته ثبت شوې هغه ویډيو خپره کړې چې وايي، په تېرو دوو شپو کې یې په ایران کې ۱۷۰ هدفونه په نښه کړي دي. دا په تېرو ۴۸ ساعتونو کې پر ایران د امریکا د بریدونو دویمه څپه یا پړاو دی.

   په لومړي هغه کې سېنټکام یا د امریکا مرکزي قومندانۍ د ۹۰ هدفونو د ویشتو خبره کړې وه او اوس د امریکا پوځ وايي چې د بریدونو په دواړو څپو کې یې ټولټال ۱۷۰ هدفونه ویشتي دي.تېره سې‌شنبه د ایران پوځ وویل چې د هرمز تنګي ساحل ته څېرمه یې د امریکا په بریدونو کې اته سرتېري وژل شوي دي.

   په ورته حال کې بیا د ایران پوځ ویلي چې د ډرونونو پر مټ یې په کوېت، قطر او بحرین کې د امریکا پوځي مرکزونه په نښه کړي دي. سپاه پاسداران ویلي‌ چې دا بریدونه "لږ مخکې شوي" او د ایران پوځ‌ له لوري "په سيمه کې د امریکا پر اډو د بریدونو په دوام" شوي دي.‌

5. ۱۸ چنګاښ ۱۴۰۵ - ۹ جولای ۲۰۲۶وروستی, د ایران روغتیا وزارت: د امریکا د دوو شپو بریدونو کې ۱۴ کسان وژل شوي

   د ایران روغتیا وزارت وايي چې د امریکا د بریدونو په وروستۍ څپه کې تر اوسه ۱۴ کسان وژل شوي دي.

   د دغه وزارت د عامه اړیکو مشر حسین کرمانپور وايي چې د روانې میلادي میاشتې (جولای) پر اتمه او نهمه نېټه (په تېرو دوو شپو ورځو کې) د ایران پر پنځو ولایتونو د امریکا په بریدونو کې ۷۸ تنه ژوبل شوي هم دي.

   هغه ویلي چې د ټپیانو له ډلې ۴۷ کسان لا هم په روغتون کې بستر دي.

   په همدې حال کې د ایران د جنوبي ښار ایران‌شهر ښاروال دولتي رسنیو ته ویلي چې د هوايي دګر پر یوې ودانۍ د امریکا په برید کې یو کس وژل شوی دی.

6. ۱۸ چنګاښ ۱۴۰۵ - ۹ جولای ۲۰۲۶وروستی, ایران وايي، په کوېت، قطر او بحرین کې یې د امریکا پوځي مرکزونه په نښه کړي

   د ایران پوځ وايي چې د ډرونونو پر مټ یې په کوېت، قطر او بحرین کې د امریکا پوځي مرکزونه په نښه کړي دي.‌

   په کوېت کې د امریکا (پېټریوټ توغندیز سيسټم)، په قطر کې (د خبرداري ورکولو سپوږمکۍ انتن) او په بحرین کې د امریکا د تېلو زېرمه کولو تاسیسات هغه هدفونه ښودل شوي چې د ایران له لوري په ډرون بریدونو کې په نښه شوي‌ دي.

   سپاه پاسداران ویلي‌ چې دا بریدونه "لږ مخکې شوي" او د ایران پوځ‌ له لوري "په سيمه کې د امریکا پر اډو د بریدونو په دوام" شوي دي.

   دا خبر د ایران دولتي اژانس په ګډون ګڼو ځايي خبري رسنیو خپور کړی دی.

   تر دې مخکې د بحرین، کوېت او قطر په ګډون د خلیج څو هېوادونو خبر ورکړی و چې له بریدونو سره مخ دي‌ او امنیتي خبرتیاوې یې خپرې کړې وې.

7. ۱۸ چنګاښ ۱۴۰۵ - ۹ جولای ۲۰۲۶وروستی, د امریکا پوځ وايي، په دوو شپو کې یې د ایران ۱۷۰ هدفونه په نښه کړي

   د امریکا پوځ هغه ویډيو خپره کړې چې وايي، په تېرو دوو شپو کې یې په ایران کې ۱۷۰ هدفونه په نښه کړي دي.

   دا په تېرو ۴۸ ساعتونو کې پر ایران د امریکا د بریدونو دویمه څپه یا پړاو دی. په لومړي هغه کې سېنټکام یا د امریکا مرکزي قومندانۍ د ۹۰ هدفونو د ویشتو خبره کړې وه او اوس د امریکا پوځ وايي چې د بریدونو په دواړو څپو کې یې ټولټال ۱۷۰ هدفونه ویشتي دي.

   تېره سې‌شنبه د ایران پوځ وویل چې د هرمز تنګي ساحل ته څېرمه یې د امریکا په بریدونو کې اته سرتېري وژل شوي دي.

8. ۱۸ چنګاښ ۱۴۰۵ - ۹ جولای ۲۰۲۶وروستی, ایران د امریکا بریدونو له امله د ملګرو ملتونو امنیت شورا ته اعتراض‌لیک لېږلی

   ایران وايي چې د ملګرو ملتونو د امنیت شورا مشر او د دغه سازمان سرمنشي ته یې د امریکا د بریدونو پر ضد اعتراض‌لیکونه لېږلي دي.

   په ملګرو ملتونو کې د ایران استازي سعید ایرواني ویلي چې امریکا یو ځل بیا "د ایران پر حاکمیت او مځکنۍ بشپړتیا لوی بریدونه پيل کړي چې د ملګرو ملتونو له منشوره او نړیوالو مکلفیتونو څرګنده سرغړونه ده".

   ښاغلي ایرواني همدا راز ویلي چې امریکا په دې کارونو سره د ایران او امریکا ترمنځ د شوې هوکړې له لومړۍ مادې سرغړونه کړې ده.

9. ۱۸ چنګاښ ۱۴۰۵ - ۹ جولای ۲۰۲۶وروستی, ایراني‌ چارواکي: د امریکا په تازه بریدونو کې درې تنه وژل شوي

   د ایران د خوزستان ولایت چارواکي‌ وايي چې هلته په (اهواز) ښار کې نن سهار د امریکا په تازه بریدونو کې درې کسان وژل شوي دي.

   د خوزستان په امنیتي‌ برخه کې د والي مرستیال ولي الله حیاتي ویلي چې په دغو بریدونو کې ځينې خلک ژوبل شوي هم دي. په وینا یې، د بریدونو له امله رامنځ‌ته شوی زیان سنجول کېږي.

   د ایران دولتي خبري اژانس (ایرنا) هم ویلي چې د انقلابي ګارد یا د سپاه پاسداران د فضايي ځواکونو یو غړی پرون په اهواز ښار کې د امریکا د بریدونو پر وړاندې د دفاعي عملیاتو پرمهال وژل شوی دی.

10. ۱۸ چنګاښ ۱۴۰۵ - ۹ جولای ۲۰۲۶وروستی, سپاه پاسداران ځواک پر کویت او بحرین د بریدونو تائید وکړ

    د ایران سپاه پاسداران ځواک تائید کړې چې تېره شپه یې په کویت او بحرین کې پر امریکايي پوځي اډو غچ اخیستونکي بریدونه کړي دي.

    سپاه پاسداران په یوه خپره کړې اعلامیه کې دغه بریدونه، ''د امریکايي تړون ماتوونکو پر ضد د سزا ورکوونکي ځواب لومړی پړاو'' بللي دي.

    سپاه پاسداران امریکا ته خبرداری ورکړی چې که د دوی په وینا ''یرغل'' دوام ومومي، نو په سیمه کې به نورو امریکایي پوځي اډو ته هم بریدونه وغځوي.

11. ۱۸ چنګاښ ۱۴۰۵ - ۹ جولای ۲۰۲۶سنټکام وایي د وروستیو بریدونو په لړ کې یې د ایران ۹۰هدفونه په نښه کړي

    د امریکا د پوځ مرکزي قوماندانۍ (سنټکام) وايي، د ایران پر ضد د دویمې پرلپسې شپې بریدونو په ترڅ کې یې د هېواد په بېلابېلو سیمو کې نږدې ۹۰هدفونه په نښه کړي دي.

    سنټکام پر اېکس د هوايي بریدونو له یوې ویډیويي ټولګې سره په خپره شوې اعلامیه کې ویلي چې ''د عملیاتو موخه دا وه چې په هرمز تنګي کې پر سوداګریزو بېړیو او بې‌ ګناه ملکي سمندري کارکوونکو د برید کولو لپاره د ایران وړتیا نوره هم کمزورې کړي.''

    د امریکايي پوځ په وینا، په نښه شويو هدفونو کې د هوايي دفاع سیسټمونه، ساحلي څارنیز تاسیسات، د توغندیو او ډرونونو د زېرمه کولو مرکزونه او د ایران د ساحلي سیمو پوځي او لوژستیکي زیربناوې شاملې وې.

    سنټکام دغه راز ویلي:

    ''دا وروستي بریدونه د تېرې شپې د بریالیو یرغلیزو عملیاتو له تعقیب وروسته ترسره شول.''

12. ۱۸ چنګاښ ۱۴۰۵ - ۹ جولای ۲۰۲۶سنټکام پر ایران د امریکا د نن شپې بریدونه تائید کړل

    د امریکا د پوځ مرکزي قوماندانۍ (سنټکام) اعلان کړی چې د ایران پر ضد یې نوي بریدونه پیل کړي دي، چې موخه یې د دوی په وینا ''هرمز تنګي کې د بېړۍ چلونې د ازادۍ پر وړاندې د ایران د ګواښ وړتیا کمزوري کول'' دي.

    د سنټکام په خپره شوې اعلامیه کې ویل شوي چې متحده ایالات ایران د هغو ''بې‌دلیله بریدونو'' مسؤل ګڼي چې د سوداګریزو بېړیو او ملکي عملو پر ضد ترسره شوي دي. د امریکا په وینا، دغه بېړۍ په یوه مهم نړیوال سمندري مسیر کې په ازاد ډول تګ راتګ کوي.

13. ۱۸ چنګاښ ۱۴۰۵ - ۹ جولای ۲۰۲۶وروستی, د ایران بریدونو ته د فارس خلیج د هېوادونو غبرګون

    وروسته له هغه چې امریکا پر ایران نوي هوايي بریدونه وکړل، چې د هرمز تنګي ته نږدې سیمې هم پکې شاملې وې، د فارس خلیج ځینو هېوادونو د امنیتي وضعیت په اړه غبرګونونه ښودلي دي.

    د بحرین پلازمېنه منامه کې د چاودنو راپورونه ورکړل شوي دي او چارواکو د هوايي خطر د خبرداري سائرنونه فعال کړي دي.

    په کویت کې پوځ اعلان کړی چې د دغه هېواد د هوايي دفاع سیستمونو هغه توغندي او ډرونونه تعقیب کړي، چې د هېواد هوايي حریم ته یې ګواښ متوجه کړی و.

    قطر هم خپلو اتباعو او اوسېدونکو ته امنیتي خبرداری ورکړی او له خلکو یې غوښتي چې د چارواکو لارښوونې تعقیب کړي او احتیاطي تدابیر مراعات کړي.

14. ۱۸ چنګاښ ۱۴۰۵ - ۹ جولای ۲۰۲۶په اسیايي بازارونو کې د تېلو بیې لوړې شوې

    د پنجشنبې په سهار د اسیايي بازارونو په راکړه ورکړه کې د نفتو بیې شاوخوا ۱ سلنه لوړې شوې. دې زیاتوالي وروسته له هغې دوام وموند چې د امریکا ولسمشر ډونلډ ټرمپ د چهارشنبې په ورځ وویل چې له ایران سره د سولې تفاهم «پای ته رسېدلی» دی.

    د بیو د لوړېدو یو مهم دلیل دا هم بلل کېږي چې د راپورونو له مخې ایران د هرمز تنګي په اوږدو کې پر بېړیو بریدونه کړي، چې له امله یې له منځني ختیځه نړیوالو انرژۍ اکمالاتو ته د احتمالي خنډونو په اړه اندېښنې یو ځل بیا زیاتې شوې دي.

    د نړیوال معیار برینټ خام نفت بیه نږدې ۱سلنه لوړه شوه او شاوخوا ۷۸.۸۰ډالره یوه بېرل ته ورسېده. دغه راز، په امریکا کې سودا کېدونکي خام نفت هم په ورته کچه لوړ شول او ۷۴.۳۰ ډالره یوه بېرل ته ورسېدل.

    د نفتو اوسنۍ بیې هغو کچو ته نږدې شوې دي چې د جون میاشتې په منځنیو ورځو کې لیدل شوې وې، یعنی له هغه مخکې چې امریکا او ایران د شخړې د پای ته رسولو په اړه د خبرو لپاره د یوې موقت تفاهم اعلان کړی و.

    سره له دې، د نفتو بیې لا هم د جګړې د لومړیو پړاوونو له لوړو کچو څخه ښکته دي، هغه مهال بیې نږدې ۱۲۰ ډالره یوه بېرل ته رسېدلې وې.

15. ۱۸ چنګاښ ۱۴۰۵ - ۹ جولای ۲۰۲۶بحرین کې د هوايي دفاع خبرداري سائرنونه وغږول شول

    د بحرین د کورنیو چارو وزارت اعلان کړی چې په هېواد کې د هوايي خطر خبرتیا سائرنونه فعال شوي دي.

    یاد وزارت د اېکس له لارې په یوه خبرپاڼه کې له ټولو اتباعو او اوسېدونکو وغوښتل چې ارام پاتې شي او ژر تر ژره خپل نږدې خوندي ځای ته لاړ شي.

16. ۱۸ چنګاښ ۱۴۰۵ - ۹ جولای ۲۰۲۶د ایران سویلي بندري ښار چابهار د شخړې له پیل راهیسې د لومړي ځل لپاره په نښه شو

    د ایران په سوېل ختیځ کې موقعیت لرونکی بندري ښار چابهار د روانې شخړې په ترڅ کې د لومړي ځل لپاره تر برید لاندې راغلی دی.

    د یوه زیانمن شوي سمندري ترافیکي کنټرول برج تصویرونه او ویډیوګانې چې پر ټولنیزو شبکو خپرې شوې، د بي بي سي وئرفای او بي بي سي فارسي څانګې لخوا ارزول او تائید شوي دي.

    د ایران نیمه رسمي خبري اژانس تسنیم راپور ورکړی چې په چابهار او نږدې کنارک ښار کې د شاوخوا لسو چاودنو غږونه اورېدل شوي دي. د راپور له مخې، د چابهار ښار په ځینو برخو کې برېښنا هم پرې شوې ده.

    د تسنیم په رپوټ کې دغه راز ویل شوي، چې امریکایي جنګي الوتکو په چابهار کې د سپاه پاسداران د سمندري ځواک امام علي اډې بمباري کړې ده.

17. ۱۸ چنګاښ ۱۴۰۵ - ۹ جولای ۲۰۲۶ټرمپ: ایران 'په ډېره بېړه' د یوې هوکړې غوښتونکی دی

    کله چې له ټرمپ نه وپوښتل شول چې ایا متحده ایالات د ایران پر وړاندې بېرته د پراخې پوځي جګړې پر لور روان دي، هغه وویل:

    ''نه پوهېږم، خو که داسې وشي، موږ به ډېر ژر بریالي شو.''

    ټرمپ یو ځل بیا خپله ادعا تکرار کړه چې امریکا لا له وړاندې ''په پوځي لحاظ بریا ترلاسه کړې'' او ویې ویل چې ایران ته ''ډېر لږ څه پاتې دي.''

    د نوموړي په خبره، ایران د یوې هوکړې د کولو لپاره ''په ډېره بېړه'' هڅه کوي.

    هغه خبریالانو ته وویل:

    ''هغوی لږ مهال مخکې زنګ وواهه، هغوی په ډېر شدت غواړي چې یوه هوکړه وکړي، خو زه نه پوهېږم چې ایا هغوی د داسې هوکړې مستحق دي که نه.''

    ټرمپ زیاته کړه:

    ''ستونزه دا ده چې زه نه پوهېږم هغوی به پر دې هوکړې عمل وکړي که نه.''

18. ۱۸ چنګاښ ۱۴۰۵ - ۹ جولای ۲۰۲۶ټرمپ: هر ځل چې دوی پر موږ برید وکړي، موږ به پرې ۲۰ برابره ځوابي ګوزار وکړو

    د امریکا ولسمشر ډونلډ ټرمپ په ولسمشرۍ الوتکه کې له خبریالانو سره د مرکې پر مهال د نننیو بریدونو په تړاو څرګندونې وکړې.

    هغه وویل: ''موږ پرې ډېر سخت ګوزارونه وکړل، او زه به ووایم چې تناسب یې ۲۰ په ۱ و.''

    ټرمپ زیاته کړه چې هر ځل ''هغوی پر موږ ګوزار وکړي، موږ به ۲۰ برابره ځواب ورکړو.''

19. ۱۸ چنګاښ ۱۴۰۵ - ۹ جولای ۲۰۲۶ټرمپ: ښايي امریکا نن شپه یو ځل بیا پر ایران سخت برید وکړي

    د امریکا ولسمشر ډونلډ ټرمپ د ناټو غونډې په څنډه کې وویل، متحده ایالات به ښايي نن شپه یو ځل بیا ایران په نښه کړي او خبرداری یې ورکړ چې دا برید به ''سخت'' وي. هغه دغه راز وویل چې امریکا ښايي د ایران سمندري محاصره بېرته پیل کړي.

    ټرمپ دا څرګندونې د اوکرایین له ولسمشر ولودیمیر زېلېنسکي سره تر لیدنې مخکې کړې.

    هغه وویل:

    ''تېره شپه، وروسته له هغه چې دوی برید وکړ، موږ پر هغوی سخت ګوزار وکړ او ښايي نن شپه هم یو ځل بیا په سختۍ سره هغوی په نښه کړو. زه هغوی ته یو څه خبرداری ورکوم، نن شپه به سخت برید وکړو، خو باید وګورو چې وضعیت څنګه پر مخ ځي.''

    ښاغلی ټرمپ وايي، چې ایران څو ډرونونه او یو توغندی توغولی او هغه بېړۍ یې په نښه کړې دي چې د هرمز په تنګي په اوبو کې وې. د هغه په وینا، دغو بېړیو ''بشپړ حق درلود'' چې په دغه سیمه کې وي.

    د امریکا ولسمشر دغه راز وویل چې د ایراني چارواکو له چلنده ناخوښ دی او د روانې جګړې اصلي هدف یې ''د ایران د اټومي وسلو پروګرام بې‌وسلې کول'' وباله.

    ټرمپ زیاته کړه چې موخه یې په ایران کې د حکومت بدلون نه دی، خو په وینا یې د واکمن جوړښت د څو پوړونو له منځه تګ ښايي په پای کې ''د حکومت د بدلون یوه بڼه'' رامنځته کړي.

    ټرمپ وویل:

    ''موضوع ډېره څرګنده ده، هغوی نه شي کولای اټومي وسله ولري. زما هدف همدا دی.''

    هغه د ایران چارواکي هم تورن کړل چې د مذاکراتو په غونډو کې داسې چلند کوي لکه د ځینو موضوعاتو په اړه چې هوکړه شوې وي، خو وروسته په خبري غونډو کې وایي چې داسې خبرې هېڅ نه دي شوې.

    د امریکا ولسمشر ټینګار وکړ:

    ''هغوی د ۴۷ کلونو لپاره د منځني ختیځ ځورونکي وو، خو نور د سیمې ځورونکي نه دي.''

20. ۱۸ چنګاښ ۱۴۰۵ - ۹ جولای ۲۰۲۶وروستی, امریکا د 'سخت ګوزار ورکولو' له ګواښ وروسته پر ایران د بریدونو لړۍ بیا پیل کړه

    له هغه وروسته چې د متحدو ایالتونو ولسمشر ډونلډ ټرمپ اشارتاً وویل، چې د سې‌ شنبې د شپې له متقابلو بریدونه وروسته به ''نن شپه بیا هم پر ایران سخت ګوزار وکړي''، امریکا پر ایران د بریدونو نوې لړۍ پیل کړه.

    د ایران دولتي رسنیو راپور ورکړی چې د هېواد په سویلي سیمو کې، په ځانګړي ډول سیریک او بندر عباس کې، د چاودنو غږونه اورېدل شوې دي. دا دواړه بندري ښارونه د هرمز تنګي پر غاړه موقعیت لري، چې د نړۍ له مهمو سمندري لارو څخه یوه ګڼل کېږي.

    د امریکا د مرکزي قوماندانۍ (سینټکام) په وینا، دا بریدونه د دې لپاره ترسره شوي چې ''د سمندري تګ راتګ د ازادۍ پر وړاندې د تهران د ګواښ وړتیا نوره هم کمزورې کړي'' او په هرمز تنګي کې د نړیوالو بېړیو امنیت خوندي وساتي.

    ایران تر اوسه د دغو وروستیو بریدونو په اړه رسماً څه نه دي ویلي، خو لوړپوړو ایراني چارواکو مخکې خبرداری ورکړی و چې د امریکا هر ډول برید ته به ''سملاسي ځواب'' ورکړل شي.

    د امریکا مرکزي قوماندانۍ زیاته کړه:

    "متحده ایالات ایران د هغو وروستیو غیرموجه بریدونو مسوول ګڼي چې د یوې مهمې نړیوالې سمندري لارې له په اوږدو کې په ازاد ډول د تګ راتګ کوونکو سوداګریزو بېړیو او ملکي عملو پر ضد یې ترسره شوي دي."

    د امریکا پوځ د سې ‌شنبې په ورځ ویلي وو چې په تنګي کې پر درېیو نفت ‌وړونکو بېړیو د بریدونو په غبرګون کې یې ''ځواکمن'' بریدونه ترسره کړي دي.

    د سې ‌شنبې او چهارشنبې ترمنځ د امریکا او ایران ترمنځ د بریدونو تبادله له هغه وخت راهیسې تر ټولو سخته بلل کېږي چې د جون په ۱۷مه د دواړو لورو ترمنځ هوکړه، چې د تفاهم یادداشت (ایم او یو) په نوم یادېږي، لاسلیک شوی و.