महाराष्ट्रातील भाविकांचा राजस्थानमध्ये भीषण अपघात; एकाच कुटुंबातील 9 जणांचा मृत्यू, 6 जखमी

राजस्थानमध्ये भीषण अपघात
Published
वाचन वेळ: 3 मिनिटे

राजस्थानमधील कोटा-उदयपूर महामार्गावर झालेल्या भीषण अपघातात महाराष्ट्रातील एकाच कुटुंबातील 9 जणांचा मृत्यू झाला, तर 6 जण जखमी झाले आहेत. जखमींना उपचारासाठी कोटा येथील शासकीय रुग्णालयात दाखल करण्यात आले असून त्यांच्यावर योग्य उपचार सुरू आहेत.

ही घटना शनिवारी (21 नोव्हेंबर) मध्यरात्री 12 वाजेच्या सुमारास घडली. मृतांमध्ये धुळे शहरातील शांतिगीत नगर, नवनाथ नगर तसेच शिंदखेडा तालुक्यातील अमराळे येथील रहिवाशांचा समावेश आहे.

अपघातग्रस्त फोर्स ट्रॅव्हलर वाहनात एकूण 15 लोक प्रवास करीत होते. कोटा येथील पोलीस नियंत्रण कक्षाकडून प्राप्त झालेल्या प्राथमिक माहितीच्या आधारे धुळे जिल्हा आपत्ती नियंत्रण कक्षाने ही माहिती दिली आहे.

अपघाताचे नेमके कारण अद्याप स्पष्ट झालेले नसून, दुर्घटनेबाबत पुढील अधिकृत माहिती प्राप्त झाल्यानंतर अधिक तपशील स्पष्ट होणार असल्याचं माहिती जिल्हा आपत्ती नियंत्रण कक्षाकडून सांगण्यात आलं आहे.

दरम्यान, पंतप्रधान नरेंद्र मोदी यांनी या अपघातात मृत्युमुखी पडलेल्यांच्या कुटुंबीयांना पंतप्रधान राष्ट्रीय मदत निधीतून प्रत्येकी 2 लाख रुपये, तर जखमींना प्रत्येकी 50 हजार रुपयांची सानुग्रह मदत जाहीर केली आहे.

या दुर्घटनेत 9 जणांचा मृत्यू झाला असून, 6 जण जखमी झाले आहेत
फोटो कॅप्शन, या दुर्घटनेत 9 जणांचा मृत्यू झाला असून, 6 जण जखमी झाले आहेत.

पंतप्रधान कार्यालयाने सोशल मीडिया प्लॅटफॉर्म 'एक्स'वर पोस्ट करून पंतप्रधान मोदी यांचे निवेदनही प्रसिद्ध केले आहे. "कोटा येथील अपघाताची बातमी अत्यंत दुर्दैवी आहे. या घटनेत मृत्यू झालेल्या व्यक्तींच्या कुटुंबीयांच्या दुःखात मी सहभागी आहे. तसेच अपघातातील जखमी लवकरात लवकर बरे व्हावेत, अशी प्रार्थना करतो", अशी भावना त्यांनी व्यक्त केली.

राजस्थानचे मुख्यमंत्री भजनलाल शर्मा यांनी या अपघातासंदर्भात निवेदन जारी करून सर्वतोपरी मदतीचे आश्वासन दिले आहे, अशी माहिती बीबीसी हिंदीचे राजस्थानमधील सहयोगी वार्ताहर मोहर सिंग मीना यांनी दिली.

जखमींना सर्वोत्तम वैद्यकीय उपचार मिळावेत आणि अपघातग्रस्त कुटुंबीयांना सर्वतोपरी मदत पुरवावी, असे निर्देश संबंधित अधिकाऱ्यांना दिल्याचंही मुख्यमंत्री शर्मा यांनी सांगितलं.

अपघातातील मृत व्यक्तींची नावे

मृत व्यक्तींमध्ये धुळे शहरातील शांतिगीत नगर येथील 4, नवनाथ नगर येथील 2 आणि शिंदखेडा तालुक्यातील अमराळे येथील 3 व्यक्तींचा समावेश असल्याची माहिती जिल्हा आपत्ती नियंत्रण कक्षाकडून देण्यात आली आहे. प्राप्त सुधारित माहितीनुसार, अपघातात मृत्यू झालेल्या व्यक्तींची नावं, पुढीलप्रमाणे -

  • उषाबाई सज्जन पवार (60 वर्षे)
  • सुशिलाबाई बाबूलाल पवार (65 वर्षे)
  • कैलास भगवान पवार (45 वर्षे)
  • सान्वी गणेश पवार (6 वर्षे)
  • 7 वर्षीय मुलगा
  • अनिता कैलास पवार (40 वर्षे)
  • बाबूलाल दौलत पवार
  • जान्हवी कैलास पवार (13 वर्षे)
  • माधवी गणेश पवार (45 वर्षे)

अपघातात मृत्यू झालेल्या 9 व्यक्तींचे मृतदेह कोटा येथील न्यू मेडिकल कॉलेजमध्ये ठेवण्यात आले असल्याची माहिती जिल्हा आपत्ती नियंत्रण कक्षाकडून देण्यात आली आहे.

अपघातातील जखमी व्यक्तींची नावे

जिल्हा आपत्ती नियंत्रण कक्षाकडून प्राप्त सुधारित माहितीनुसार, अपघातात जखमी झालेल्या व्यक्तींची नावे पुढीलप्रमाणे आहेत. -

  • मनीषा शरद पवार (41 वर्षे)
  • मयुरी शरद पवार (20 वर्षे)
  • जगदीश कैलास पवार (10 वर्षे)
  • श्रीजीत गणेश पवार (4 वर्षे)
  • शरद बाबूलाल पवार (45 वर्षे)
  • गणेश सज्जन पवार (32 वर्षे)

कोटा येथील अतिरिक्त जिल्ह्याधिकाऱ्यांनी काय माहिती दिली?

कोटा येथील अतिरिक्त जिल्हाधिकारी राजेश जोशी यांनी एनआय वृत्तसंस्थेला दिलेल्या माहितीनुसार, कोटा येथील शंभूपुरा परिसरात शनिवारी (21 नोव्हेंबर) मध्यरात्रीच्या सुमारास भाविकांना घेऊन जाणाऱ्या वाहनाची रस्त्याच्या कडेला उभ्या असलेल्या ट्रकला जोरदार धडक बसली.

एएनआयच्या माहितीनुसार, हे सर्वजण खाटू श्याम यांचे दर्शन घेऊन महाराष्ट्रात परतत होते, त्यावेळी अपघात घडला. या घटनेत 9 जणांचा जागीच मृत्यू झाल्याची माहिती आहे.

"मृतांच्या मृतदेहांचे शवविच्छेदन करण्याची प्रक्रिया सुरू आहे. जखमींना योग्य वैद्यकीय उपचार मिळावेत आणि त्यांची प्रकृती सुधारावी, हे सुनिश्चित करण्याला आमचं प्राधान्य आहे", असं अतिरिक्त जिल्हाधिकारी राजेश जोशी यांनी सांगितलं.

राष्ट्रपतींनी व्यक्त केलं दु:ख

राष्ट्रपती द्रौपदी मुर्मू यांनी या घटनेवर दु:ख व्यक्त केले. त्यांनी सोशल मीडिया प्लॅटफॉर्म एक्सवर पोस्ट करत म्हटलं, "राजस्थानच्या कोटा येथे रस्ते अपघाताची घटना अत्यंत दु:खद आहे. या अपघातात मृत्यू झालेल्या व्यक्तींच्या कुटुंबीयांप्रति माझ्या संवेदना आहेत. अपघातातील जखमी लवकरात लवकर बरे व्हावेत, यासाठी मी प्रार्थना करते."

राजस्थानचे माजी मुख्यमंत्री अशोक गेहलोत यांनी या अपघाताबद्दल तीव्र दुःख व्यक्त केले. खाटू श्यामजींचे दर्शन घेऊन परतणाऱ्या एकाच कुटुंबातील अनेक भाविकांचा कोटा-उदयपूर राष्ट्रीय महामार्गावरील (NH-52) शंभूपुरा गावाजवळ झालेल्या भीषण अपघातात मृत्यू झाल्याची घटना अत्यंत दुर्दैवी असल्याचं गेहलोत भावना व्यक्त करताना म्हणाले.

त्यांनी मृतांच्या कुटुंबीयांप्रति शोकसंवेदना व्यक्त केल्या. या कठीण प्रसंगातून सावरण्याचे बळ त्यांच्या कुटुंबीयांना मिळो. तसेच अपघातातील जखमी लवकर बरे व्हावेत, अशी प्रार्थना करत असल्याची भावना त्यांनी व्यक्त केली.

(बीबीसीसाठी कलेक्टिव्ह न्यूजरूमचे प्रकाशन)