القاعدہ کا افغانستان میں وجود نہیں ہے اور ہمارا اس سے کوئی تعلق نہیں ہے: ترجمان طالبان

لائیو کوریج

1. 18 اگست 2021طالبان کو افغانستان کے مالی وسائل تک رسائی نہیں دیں گے: امریکہ

   ویسے تو طالبان کو افغانستان پر کنٹرول حاصل ہو گیا ہے تاہم ملک کے مالی وسائل تک اُنھیں رسائی نہیں حاصل ہوئی ہے۔

   بدھ کو مرکزی بینک کے سربراہ اجمل احمدی نے ٹوئٹر پر کہا کہ افغانستان کے مرکزی بینک کے پاس نو ارب ڈالر کا زرِمبادلہ ہے جس کا زیادہ تر حصہ بیرونِ ملک اکاؤنٹس میں ہے۔

   امریکی حکومت کے ایک اہلکار نے خبر رساں ادارے اے ایف پی کو بتایا کہ افغان مرکزی بینک کے جو بھی اثاثے امریکہ میں ہیں، وہ طالبان کو نہیں دیے جائیں گے۔

   اجمل احمدی کا کہنا تھا کہ امریکہ کے فیڈرل ریزرو میں افغانستان کے سات ارب ڈالر کیش جبکہ 1 اعشاریہ دو ارب ڈالر سونے کی صورت میں موجود ہیں، جبکہ باقی رقم بینک آف انٹرنیشل سیٹلمنٹس سمیت دیگر اکاؤنٹس میں موجود ہے۔

   X پوسٹ نظرانداز کریں

   X کا مواد دکھانے کی اجازت دی جائے؟?

   اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔

   Accept and continue

   تنبیہ: بی بی سی دیگر ویب سائٹس کے مواد کی ذمہ دار نہیں ہے۔

   X پوسٹ کا اختتام

2. 18 اگست 2021حکومتی ناقدین کے پاس اپنا کوئی سنجیدہ منصوبہ نہیں، برطانوی وزیرِ خارجہ

   

   ،تصویر کا ذریعہUK Parliament

   برطانوی وزیرِ خارجہ ڈومینیک راب نے کہا ہے کہ لیبر پارٹی کے رہنما کیر سٹارمر نے اُن فیصلوں پر تنقید تو کی ہے جن کی اُنھوں (ڈومینیک راب) نے حمایت کی، تاہم کیر سٹارمر کے پاس ان کا ’کوئی سنجیدہ اور قابلِ بھروسہ متبادل‘ نہیں ہے۔

   اُنھوں نے کہا کہ گذشتہ 24 گھنٹوں کے دوران 646 افراد کو افغانستان سے نکالا گیا ہے جن میں برطانوی شہری، برطانیہ کے لیے کام کرنے والے افغان، اور برطانیہ کے اتحادی شامل ہیں۔

   ڈومینیک راب نے کہا کہ اُنھیں فخر ہے کہ حکومت مشکلات میں گھرے لوگوں کو محفوظ ٹھکانہ دے کر برطانوی لوگوں کی بڑے دل والی روایات کی پاسداری کر رہی ہے۔‘

3. 18 اگست 2021تاجکستان میں افغان سفارت خانے نے امراللہ صالح کو حقیقی حکمران تسلیم کر لیا, اشرف غنی پر 16 کروڑ ڈالر سے زائد رقم لے جانے کا الزام

   

   ،تصویر کا ذریعہReuters

   تاجکستان میں افغانستان کے سفارت خانے نے اعلان کیا ہے کہ وہ امراللہ صالح کو افغانستان کا حکمران تسلیم کرتے ہیں۔

   افغانستان کے آئین کے مطابق نائب صدر اول کو صدر کی غیر موجودگی میں ریاست کا سربراہ تسلیم کیا جاتا ہے۔ خبر رساں ادارے اویستا نے تاجکستان میں افغانستان کے سفیر محمد ظاہر اکبر کے حوالے سے بتایا کہ اُنھوں نے اشرف غنی کے افغانستان سے فرار ہونے کو دھوکہ قرار دیا۔

   اُنھوں نے الزام عائد کیا کہ اشرف غنی اپنے ساتھ 16 کروڑ 90 لاکھ ڈالر بھی لے گئے ہیں۔ یاد رہے کہ 17 اگست کو افغانستان کے نائب صدر اول امر اللہ صالح نے خود کو ملک کا نیا نگران صدر قرار دیا تھا۔

   خیال کیا جا رہا ہے کہ امراللہ صالح اپنے آبائی صوبے پنجشیر میں ہی ہیں۔

4. 18 اگست 2021افغان خواتین اور لڑکیوں کے حقوق کا تحفظ یقینی بنایا جائے، 20 ممالک کا مشترکہ اعلامیہ

   امریکی محکمہ خارجہ نے 20 ممالک کے ساتھ مل کر ایک مشترکہ اعلامیہ جاری کیا ہے جس میں افغانستان میں خواتین اور لڑکیوں کے حقوق کے متعلق بات کی گئی ہے۔

   بیان میں کہا گیا ہے کہ دستخط کنندہ ممالک افغان خواتین اور لڑکیوں کے حقِ تعلیم، روزگار اور آزادی نقل و حرکت کے متعلق تشویش کے شکار ہیں اور افغانستان میں اقتدار کے حامل افراد سے مطالبہ کرتے ہیں کہ ان حقوق کا تحفظ یقینی بنایا جائے۔

   اس اعلامیے پر البانیہ، ارجنٹینا، آسٹریلیا، برازیل، کینیڈا، چلی، کولمبیا، کوسٹاریکا، ایکواڈور، ایل سلواڈور، ہونڈیوراس، گوئٹے مالا، جمہوریہ شمالی مقدونیہ، نیوزی لینڈ، ناروے، پیراگوئے، سینیگال، سوئٹزرلینڈ، برطانیہ، امریکہ اور یورپی یونین نے دستخط کیے ہیں۔

   اعلامیے میں مزید کہا گیا ہے کہ افغانستان میں مستقبل کی حکومت پر قریبی نظر رکھی جائے گی تاکہ گذشتہ 20 برس میں افغان خواتین اور لڑکیوں کو جو حقوق حاصل ہوئے ہیں، وہ اُنھیں حاصل رہیں۔

5. 18 اگست 2021طالبان کے جھنڈے کے خلاف مظاہرے کے دوران فائرنگ کے مناظر

6. 18 اگست 2021’اشارے مل رہے ہیں کہ موجودہ طالبان 90 کی دہائی والے طالبان نہیں‘

   

   ،تصویر کا ذریعہPA Media

   برطانیہ کے چیف آف ڈیفینس سٹاف جنرل سر نک کارٹر نے کہا ہے کہ دنیا کو صبر کے ساتھ یہ دیکھنا ہوگا کہ طالبان کی حکومت میں افغانستان کا مستقبل کیسا ہوگا۔

   بی بی سی کے ریڈیو فور کے پروگرام ٹوڈے میں بات کرتے ہویے اُنھوں نے کہا کہ ’مجھے لگتا ہے کہ ہمیں صابر رہنا پڑے گا۔ ہم نے طالبان سے گذشتہ 24 گھنٹوں میں بہت کچھ سنا ہے۔

   یہ بھی ہو سکتا ہے کہ موجودہ طالبان اُن طالبان سے مختلف ہوں جنھیں ہم سنہ 1990 کی دہائی سے جانتے ہیں۔‘ ’یہ بھی ہو سکتا ہے کہ یہ طالبان زیادہ معقول اور کم رجعت پسند ہوں۔

   اور اگر آپ دیکھیں کہ وہ فی الوقت کابل کو کیسے چلا رہے ہیں، تو کچھ اشارے موجود ہیں کہ یہ زیادہ معقول ہیں۔‘

   دوسری جانب وزیرِ اعظم بورس جانسن کے دفتر نے کہا ہے کہ طالبان کو اُن کے الفاظ سے نہیں بلکہ اقدامات سے پرکھا جائے گا۔ ’ہمیں دیکھنا ہوگا کہ آگے کیا ہوتا ہے۔‘

   سر نک کارٹر نے کہا کہ ’یہ بھی ہو سکتا ہے کہ اُنھوں نے گذشتہ 20 سالوں میں ویسے ہی سیکھا ہو جیسے کہ ہم نے گذشتہ 20 سالوں میں سیکھا ہے۔‘

7. 18 اگست 2021اشرف غنی متحدہ عرب امارات میں ہیں، سرکاری طور پر تصدیق

   

   ،تصویر کا ذریعہReuters

   متحدہ عرب امارات نے کہا ہے کہ اس نے اشرف غنی کو ’انسانی بنیادوں پر‘ اپنے ملک میں داخلے کی اجازت دی ہے۔

   بدھ کو اماراتی وزارتِ خارجہ کے جاری کردہ ایک مختصر بیان کے مطابق اشرف غنی کے ساتھ اُن کے اہلِ خانہ بھی موجود ہیں۔

   واضح رہے کہ افغانستان میں طالبان کے کنٹرول کے بعد اشرف غنی اپنے قریبی رفقا سمیت افغانستان چھوڑ کر کسی اور ملک روانہ ہو گئے تھے۔

   اطلاعات یہ تھیں کہ وہ اومان، تاجکستان یا ازبکستان چلے گئے ہیں۔

   واضح رہے کہ متحدہ عرب امارات اُن تین ممالک میں سے تھا جنھوں نے سنہ 1996 سے سنہ 2001 تک افغانستان میں قائم رہنے والی طالبان حکومت کو تسلیم کیا تھا۔ دو دیگر ممالک پاکستان اور سعودی عرب تھے۔

   

8. 18 اگست 2021افغانستان کی بساط پر چین، ایران اور روس کہاں کھڑے ہیں؟

9. 18 اگست 2021افغانستان کے بحران کی وجہ امریکہ ہے: سابق برطانوی آرمی چیف

   

   ،تصویر کا ذریعہUK Parliament

   برطانوی فوج کے سابق سربراہ لارڈ رچرڈ ڈینیٹ نے امریکہ کے صدر جو بائیڈن پر افغانستان میں برسہا برس کے ’صبر آزما اور جانفشانی سے‘ کیے گئے کام کو خطرے میں ڈالنے کا الزام عائد کیا ہے۔

   ریٹائرڈ جنرل رچرڈ ڈینیٹ 2006 سے 2009 تک برطانیہ کے چیف آف جنرل سٹاف رہے ہیں۔

   برطانوی دارالامرا میں خطاب کرتے ہوئے اُنھوں نے کہا: ’افغانستان میں بحران جس انداز میں اور جتنی جلدی ہوا، وہ صدر جو بائیڈن کی جانب سے گیارہ ستمبر کے 20 سال مکمل ہونے پر افغانستان سے تمام امریکی افواج نکالنے کے فیصلے کا براہِ راست نتیجہ ہے۔‘

   ’اُنھوں نے ایک ہی جھٹکے میں افغانستان میں نظام تیار کرنے، اُن کی معیشت کو ترقی دینے، اُن کی سول سوسائٹی کو نئے خطوط پر استوار کرنے اور اُن کی سکیورٹی فورسز کی صلاحیت میں اضافے کے گذشتہ پانچ، 10 اور 15 برس کے صبر آزما اور جانفشانی سے کیے گئے کام کو خطرے میں ڈال دیا ہے۔‘

   اُنھوں نے کہا کہ اب صرف ایک اُمید باقی رہ گئی ہے کہ سنہ 2021 کے طالبان سنہ 2001 والے طالبان نہیں ہوں گے۔

   لارڈ ڈینیٹ نے افغانستان کی فوجی مہم پر عوامی انکوائری کا مطالبہ بھی کیا۔

   اُنھوں نے کہا کہ اس انکوائری میں ’سیاسی اور سینیئر فوجی سطح‘ پر ہونے والے سٹریٹجک فیصلوں کا جائزہ لیا جانا چاہیے۔

10. 18 اگست 2021جلال آباد: افغان قومی پرچم کے حامی تین مظاہرین طالبان کی فائرنگ سے ہلاک

    

    ،تصویر کا ذریعہEPA

    افغانستان کے شہر جلال آباد سے خبر سامنے آئی ہے کہ افغانستان کا پرچم لگانے پر مصر مجمعے پر طالبان جنگجوؤں کی فائرنگ سے تین افراد ہلاک جبکہ ایک درجن سے زیادہ زخمی ہو گئے ہیں۔

    خبر رساں ادارے روئٹرز نے دو عینی شاہدین اور ایک سابق پولیس اہلکار کے حوالے سے بتایا ہے کہ مقامی لوگ شہر کے ایک چوراہے پر قومی پرچم لگانا چاہ رہے تھے۔

    افغانستان میں موجودہ قومی پرچم کے حق میں مظاہرے کیے جا رہے ہیں جن میں احتجاج کرنے والے افراد موجودہ پرچم کو برقرار رکھنے کا مطالبہ کر رہے ہیں۔

11. 18 اگست 2021’برطانوی فوجی سوچ رہے ہیں کہ ان سب قربانیوں سے کیا حاصل ہوا‘

    

    ،تصویر کا ذریعہUK Parliament

    لیبر رکنِ پارلیمان ڈین جاروِیس نے کہا ہے کہ ’بین الاقوامی سیاسی قیادت کی تباہ کن ناکامی اور طالبان کی بربریت‘ نے افغانوں سے ایک مختلف زندگی کی وہ امیدیں چھین لی ہیں جو ’ہم نے اُنھیں دینے کی کوشش کی تھی۔‘

    پارلیمانی اجلاس سے خطاب کرتے ہوئے اُنھوں نے کہا کہ ’بہادر‘ برطانوی مرد و خواتین فوجیوں نے ان 20 سالوں میں زبردست ہمت اور پروفیشنلزم کا مظاہرہ کیا ’مگر حالیہ پیش رفت سے اُنھیں دھچکا لگا ہے۔

    ’وہ سوچ رہے ہیں کہ کیا یہ سب کوششیں اور قربانیاں فائدہ مند تھیں بھی یا نہیں۔‘

    اُنھوں نے ہلمند میں برطانوی فوجیوں کے ساتھ کام کرنے والے افغان فوجیوں کے بارے میں کہا کہ وہ سوچ رہے ہیں کہ وہ لوگ کہاں ہوں گے، اور شاید اُن میں سے کئی ہلاک بھی ہو چکے ہوں۔ ’ہم اُن کی ضرورت کے وقت کہاں ہیں؟ ہم کہیں نہیں ہیں اور یہ شرمناک ہے، اور اس کا دنیا بھر میں برطانیہ کی ساکھ پر دیرپا اثر پڑے گا۔‘

12. 18 اگست 2021بامیان میں ہزارہ رہنما کا مجسمہ مسمار

    X پوسٹ نظرانداز کریں

    X کا مواد دکھانے کی اجازت دی جائے؟?

    اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔

    Accept and continue

    تنبیہ: بی بی سی دیگر ویب سائٹس کے مواد کی ذمہ دار نہیں ہے۔

    X پوسٹ کا اختتام

    افغانستان کے شہر بامیان میں ایک نامور طالبان مخالف جنگجو کا مجسمہ توڑ دیا گیا ہے۔

    خبر رساں ادارے اے ایف پی کے مطابق شہریوں کا کہنا تھا کہ یہ واضح نہیں کہ ہزارہ رہنما عبدالعلی مزاری کا مجسمہ کس نے تباہ کیا ہے۔

    ایک شہری نے نام ظاہر نہ کرنے کی شرط پر بتایا کہ علاقے میں طالبان کے کئی گروہ موجود ہیں۔

    یاد رہے کہ بامیان وہی صوبہ ہے جہاں سنہ 2001 میں طالبان نے گوتم بدھا کے قد آور مجسموں کو مسمار کر دیا تھا۔

    اقلیتی شیعہ مسلک سے تعلق رکھنے والی ہزارہ برادری بھی ماضی میں طالبان کے نشانے پر رہی ہے۔

13. 18 اگست 2021برطانوی رکن پارلیمان کی جو بائیڈن پر جذباتی تنقید, ایس این پی کے رکن پارلیمان کہتے ہیں افغان پناہ گزینوں کے لیے سکاٹ لینڈ کے دروازے کھلے ہیں

    

    ،تصویر کا ذریعہHoC

    برطانوی ایوانِ زیریں میں رکن پارلیمان ٹام ٹوگنڈیٹ نے امریکی صدر جو بائیڈن پر سخت تنقید کرتے ہوئے کہا ہے کہ انھوں نے اپنے حالیہ بیان سے ان افغان فوجیوں کی بہادری پر سوال اٹھایا ہے جن کے ساتھ وہ خود لڑے ہیں۔

    ٹام ٹوگنڈیٹ سابق فوجی ہیں اور افغانستان کی لڑائی میں حصہ بھی لے چکے ہیں۔

    انھوں نے اپنی جذباتی تقریر میں کہا کہ حالیہ دنوں کے واقعات نے پرانے زخم تازہ کر دیے ہیں اور امریکی صدر کا بیان ’شرمناک‘ ہے۔

    ان کا کہنا تھا کہ ’سرد جنگ بھی صبر سے جیتی گئی تھی‘ اور اس حوالے سے لامتناہی جنگوں کی بات نہیں کرنی چاہیے۔

    انھوں نے قبرص اور جنوبی کوریا کی مثالیں دیتے ہوئے کہا کہ افغانستان میں ہم نے صبر کے بجائے مزید جنگ کو دعوت دی ہے۔

    اس کے علاوہ سکاٹش نیشنل پارٹی کے ایئن بلیک فورڈ نے کہا ہے کہ سکاٹ لینڈ کی حکومت برطانوی حکومت کے ساتھ کام کرنے کے لیے تیار ہے اور سکاٹ لینڈ کے کونے کونے میں افغان پناہ گزینوں کا خیر مقدم کیا جائے گا۔

    انھوں نے افغانستان کی صورتحال کو ’دور حاضر کی سب سے بڑی پالیسی ناکامی‘ قرار دیا۔

14. 18 اگست 2021برطانوی پارلیمان کا افغانستان پر ہنگامی اجلاس، بورس جانسن ہر حزبِ اختلاف کی کڑی تنقید

    

    ،تصویر کا ذریعہPA Wire

    وزیراعظم بورس جانسن نے برطانوی ایوانِ زیریں کے افغانستان کے مسئلے پر بلائے گئے ہنگامی اجلاس سے خطاب کرتے ہوئے کہا ہے کہ برطانیہ ’اپنے مشن میں کامیاب رہا۔‘

    واضح رہے کہ برطانوی ہاؤس آف کامنز میں گرمی کی چھٹیاں ہیں یاہم افغانستان کی بدلتی صورتحال پر ہنگامی بحث کے لیے اراکین کو بدھ کو لندن طلب کیا گیا۔

    جب ان سے پوچھا گیا کہ کیا برطانیہ 20 برس کی جنگ کے بعد آج افغانستان کو اسی تنظیم کے حوالے کر رہا ہے جس سے اسے نجات دلوانی تھی، تو وزیراعظم نہ کہا کہ برطانیہ کی مداخلت سے کئی جانیں بچی ہیں۔

    انھوں نے کہا کہ افغانستان میں مزید برطانوی فوجی بھیجنے کا کوئی فائدہ نہیں اور اگر کوئی سوچتا ہے کہ دیگر ممالک میں سے کوئی ایسا کرنے کو تیار ہے تو ’یہ ایک فریب ہے۔‘

    دوسری جانب قائد حزبِ اختلاف کیئر سٹارمر نے وزیراعظم سے کہا کہ افغانستان کی صورتحال سے نمٹنے کے لیے ضروری ہے کہ وہ قیادت کی باگ ڈور سنبھالیں۔

    انھیں نے سیکریٹری دفاع کے بیان کی یاد دہانی کروائی جس میں بین والس نے کہا تھا کہ ’ہمارے ساتھ کام کرنے والے ہر شخص کو واپس لانا ممکن نہ ہوگا‘ اور کہا کہ اس کا کوئی جواز نہیں۔

15. 18 اگست 2021انس حقانی کی حامد کرزئی اور عبداللہ عبداللہ سے ملاقات

    

    ،تصویر کا ذریعہTaliban Media

    طالبان رہنما اور سراج الدین حقانی کے بھائی انس حقانی نے بدھ کو کابل میں سابق افغان صدر حامد کرزئی اور مصالحتی کونسل کے سربراہ عبداللہ عبداللہ سے ملاقات کی ہے۔

    طالبان ذرائع کے مطابق ملاقات کے دوران افغان اسمبلی کے سپیکر عبدالہادی مسلم یار بھی موجود تھے۔

    اس سے قبل حامد کرزئی اور عبداللہ عبداللہ نے طالبان رہنما عامر خان متقی سے منگل کو ملاقات کی تھی۔

    کرزئی کے ایک قریبی ساتھی کے مطابق بات چیت میں ’شراکتداری پر مبنی ایک ایسی حکومت قائم کرنے کے بارے میں بات ہوئی جو سب کے لیے قابل قبول ہو اور معاشرے کو امن اور ترقی کا راہ پر لے کر چلے۔‘

16. 18 اگست 2021ملا برادر آج کابل پہنچیں گے، طالبان اور مصالحتی کونسل کے درمیان حکومت سازی پر بات چیت

    

    ،تصویر کا ذریعہReuters

    طالبان کے شریک بانی اور دوحا میں ان کے سیاسی دفتر کے سربراہ ملا عبدالغنی برادر افغانستان پہنچ چکے ہیں اور بدھ کو ان کی کابل آمد کی توقع کی جا رہی ہے۔

    ملا برادر طالبان کے دیگر رہنماؤں کے ساتھ منگل کو ملک کے جنوبی شہر قندھار پہنچے تھے۔

    ملا برادر کا تعلق پوپلزئی قبیلے سے بتایا جاتا ہے۔ یہ قبیلہ افغانستان میں انتہائی بااثر سمجھا جاتا ہے اور سابق افغان صدر حامد کرزئی کا تعلق بھی اسی قبیلے سے ہے۔ اس قبیلے کے افراد سرحد کے دونوں جانب یعنی پاکستان کے صوبہ بلوچستان اور پشاور میں بھی آباد ہیں۔

    بعد ازاں فروری سنہ 2010 میں انھیں پاکستان کے شہر کراچی سے امریکہ اور پاکستان کی مشترکہ کارروائی میں گرفتار کیا گیا۔

    اس وقت افغان حکومت سے امن مذاکرات کو فروغ دینے کے لیے طالبان کی جانب سے جن قیدیوں کی رہائی کا مطالبہ کیا جاتا تھا اس فہرست میں ملا عبدالغنی برادر کا نام سرفہرست ہوتا تھا۔

    انھیں ستمبر 2013 میں پاکستانی حکومت نے رہا کر دیا تھا۔ لیکن یہ واضح نہیں ہو سکا کہ وہ پاکستان میں ہی رہے یا کہیں اور چلے گئے۔ ملا برادر طالبان رہنما ملا محمد عمر کے سب سے قابل اعتماد سپاہی اور نائب رہے۔

17. 18 اگست 2021’2200 افراد کو کابل سے نکالا جا چکا ہے‘

    

    ،تصویر کا ذریعہReuters

    خبر رساں ادارے روئٹرز کے مطابق کابل سے اب تک 2200 سے زیادہ سفارت کار اور دیگر عام شہریوں کو نکالا جا چکا ہے۔

    اس میں انڈیا کا سفارتی عملہ بھی شامل تھا جو بدھ کی صبح سی 17 طیارے کے ذریعے انڈیا کے دارالحکومت نئی دہلی پہنچا۔

    ایک اہلکار کے مطابق لوگوں کو نکالنے کا کام بپت تیزی سے چل رہا ہے تاہم اس وقت واضح نہیں کہ ان 2200 افراد میں کتنے شہری شامل ہیں اور آیا ان میں وہ 600 سے زائد افغان بھی شامل ہیں جنھیں اتوار کو ایک اور سی 17 طیارے کے ذریعے قطر پہنچایا گیا تھا۔

18. 18 اگست 2021کیا طالبان کی واپسی افغانستان کو القاعدہ اور دہشتگرد تنظیموں کا گڑھ بنا دے گی؟

19. 18 اگست 2021امریکی جہاز کے پہیوں میں پھنسے انسانی باقیات کی تحقیقات شروع

    

    ،تصویر کا ذریعہUGC

    امریکی حکام نے کہا ہے کہ وہ ان انسانی باقیات سے متعلق تحقیقات کر رہے ہیں جو اس کے فوجی طیارے کے پہیوں میں پھنسے ہوئے تھے۔

    دو روز قبل طالبان کی کابل آمد پر شہر کے ایئر پورٹ پر افراتفری کے ایسے مناظر دیکھنے میں آئے جن میں ملک چھوڑنے کے خواہشمند افراد امریکی طیارے سی 17 کے ساتھ بھاگ رہے تھے اور بعض نے تو اس کے ساتھ لٹکنے کی بھی کوشش کی۔

    کابل ایئر پورٹ پر اس حادثے میں کم از کم دو افراد ہلاک ہوئے۔

    امریکی فضائیہ نے ایک بیان میں کہا ہے کہ ان کا یہ طیارہ کابل ایئر پورٹ پر پیر کو اُترا اور اس کے گرد سینکڑوں افغان شہری جمع ہوگئے تھے۔ ’سکیورٹی صورتحال میں خرابی کے باعث، سی 17 کے عملے نے جلد از جلد ایئر پورٹ سے اڑان بھرنے کا فیصلہ کیا۔‘

    یہ جہاز قطر کے ایک ہوائی اڈے پر اترا تھا۔

    امریکی فضائیہ کا کہنا ہے کہ ’اس طیارے کو گراؤنڈ کر دیا گیا ہے تاکہ انسانی باقیات کو جمع کیا جاسکے اور اس پرواز کی بحالی کے لیے جہاز کا جائزہ لیا جائے گا۔‘

20. 18 اگست 2021برطانوی جنرل: ’سب طالبان ایک جیسے نہیں۔۔۔ انھیں حکومت سازی کا موقع دینا پڑے گا‘

    

    ،تصویر کا ذریعہGetty Images

    برطانیہ کے چیف آف ڈیفینس سٹاف نے کہا ہے کہ برطانوی افواج اس وقت افغانستان میں طالبان کے ساتھ مل کر کام کر رہی ہیں۔

    جنرل نک کارٹر نے بی بی سی کو بتایا کہ برطانوی فوجی کابل ایئر پورٹ کو سیکیورٹی فراہم کر رہے ہیں اور شہر کے وسطی حصے کو پرسکون رکھے ہوئے ہیں۔

    ان کا کہنا تھا کہ طالبان ایسے لوگوں کو کچھ نہیں کہہ رہے جو ملک سے نکلنا چاہتے ہیں۔ ’وہ اس وقت معقول انداز میں پیش آ رہے ہیں۔‘

    پروگرام ’بی بی سی بریک فاسٹ‘ میں بات کرتے ہوئے ان کا کہنا تھا کہ برطانیہ بدھ کو تقریباً ایک ہزار افراد کو افغانستان سے نکالے گا اور اس کام کے لیے سات طیارے کابل بھیجے گئے ہیں۔

    ’ہمیں صبر سے کام لینا ہوگا اور (طالبان کو) حکومت سازی کا موقع دینا پڑے گا۔‘

    جنرل کارٹر 2002 سے 2013 تک افغانستان میں مختلف عہدوں پر فائز رہے۔

    جنرل کارٹر نے بتایا کہ وہ سابق افغان صدر حامد کرزئی سے مسلسل رابطے میں ہیں اور وہ بدھ کو طالبان کی سیاسی اور عسکری کمیشن سے ملاقاتیں کریں گے۔

    ان کا کہنا تھا کہ ہو سکتا ہے اس ملاقات کے بعد معلوم ہو کہ یہ طالبان پہلے کی نسبت زیادہ معقول ہیں۔

    ان کے مطابق سب طالبان ایک جیسے نہیں ہیں اور یہ تنظیم مختلف قبائلی جنگجوؤں پر مبنی ہے جو افغانستان کے مختلف حصوں سے تعلق رکھتے ہیں۔