జీటీఏ 6 విడుదల.. ప్రపంచవ్యాప్తంగా ఎందుకింత క్రేజ్?

GTA 6, వీడియో గేమ్, రాక్‌స్టార్, అమెరికా
ఫొటో క్యాప్షన్, ప్రపంచవ్యాప్తంగా అత్యంత ప్రాచుర్యం పొందిన గేమ్ 'గ్రాండ్ థెఫ్ట్ ఆటో 6' (జీటీఏ 6) విడుదలైంది.
    • రచయిత, దుష్యంత్ కుమార్
    • హోదా, బీబీసీ కోసం
  • ప్రచురణ
  • చదివే సమయం: 7 నిమిషాలు

ప్రపంచవ్యాప్తంగా అత్యంత ప్రాచుర్యం పొందిన గేమ్ 'గ్రాండ్ థెఫ్ట్ ఆటో 6' (జీటీఏ 6) విడుదలైంది. దీంతో ఈ గేమ్ కొత్త వెర్షన్ కోసం 13 ఏళ్లుగా కొనసాగుతున్న నిరీక్షణకు తెరపడింది.

ప్రపంచంలోని వివిధ కాలమానాల ప్రకారం అర్ధరాత్రి సమయం దాటుతున్న కొద్దీ ఈ గేమ్‌ను దశలవారీగా విడుదల చేస్తూ వచ్చారు. అంటే ఇప్పటికే ప్రపంచవ్యాప్తంగా చాలామంది జీటీఏ 6ను ఆడటం ప్రారంభించారు.

భారత్‌లో కూడా గురువారం (నవంబర్ 19) నుంచి జీటీఏ 6 అందుబాటులోకి వచ్చింది.

ఈ గేమ్‌లో ఆటగాళ్లు అమెరికాలో కల్పిత రాష్ట్రం 'లియోనిడా'ను అన్వేషించవచ్చు. త్రీడీ సెట్టింగ్‌తో రూపొందించిన ఈ వెర్షన్‌లో జీటీఏ సిరీస్ చరిత్రలో తొలిసారి మహిళను ప్రధాన పాత్రలో పరిచయం చేశారు.

బీబీసీ న్యూస్ తెలుగు వాట్సాప్ చానల్‌
ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

ఒక సినిమా సీక్వెల్ కోసం 13 ఏళ్లు ఎదురు చూడటం చాలా సుదీర్ఘమైన సమయం అనిపించవచ్చు.

కానీ జీటీఏ 6 విషయంలో అభిమానుల ఉత్సాహం ఆ స్థాయిని దాటిపోయింది. ఈ గేమ్ ఆడేందుకు కొందరు తమ ఆఫీసులకు సెలవులు కూడా పెట్టుకున్నారు. మరికొందరు అర్ధరాత్రి దాటిన తర్వాత కూడా మేల్కొని గేమ్ విడుదల కోసం ఎదురుచూశారు.

జీటీఏ 6ను అమెరికాకు చెందిన వీడియో గేమ్ సంస్థ రాక్‌స్టార్ గేమ్స్ అభివృద్ధి చేసింది. గ్రాండ్ థెఫ్ట్ ఆటో , రెడ్ డెడ్ రిడెంప్షన్ వంటి ప్రపంచవ్యాప్తంగా ప్రాచుర్యం పొందిన గేమ్ సిరీస్‌లతో ఈ సంస్థకు ప్రత్యేక గుర్తింపు ఉంది.

GTA 6, వీడియో గేమ్, రాక్‌స్టార్, అమెరికా
ఫొటో క్యాప్షన్, 13ఏళ్ల తర్వాత జీటీఏ 6 విడుదలైంది.

సమీక్షకులు ఏమంటున్నారు?

టామ్ రిచర్డ్సన్, రియా కాలిన్స్

బీబీసీ న్యూస్‌బీట్

అన్ని కాలాల్లోనూ అత్యంత ఆసక్తిగా ఎదురుచూసిన గేమ్‌లలో ఒకటైన జీటీఏ 6 అంచనాలను అందుకుందా అనే ప్రశ్నకు ప్రారంభ సమీక్షలు సానుకూల సమాధానమే ఇస్తున్నాయి.

వివిధ సమీక్షలను సమగ్రంగా విశ్లేషించే మెటాక్రిటిక్ ఈ గేమ్‌కు 100కి 99 స్కోర్ ఇచ్చింది. దాదాపు సమీక్షకులంతా జీటీఏ 6ను అత్యంత ప్రతిష్ఠాత్మక ప్రాజెక్టుగా అభివర్ణిస్తూ, ఓపెన్-వరల్డ్ యాక్షన్ గేమింగ్‌కు ఇది కొత్త ప్రమాణాలను నెలకొల్పేస్థాయిలో ఉందని అభిప్రాయపడ్డారు.

జీటీఏ 6 కోసం అభిమానుల13 ఏళ్ల నిరీక్షణకు తగిన ఫలితం దక్కింది.

అయితే ఈ ప్రశంసలతో అందరూ ఏకీభవించడం లేదు.

ఈ గేమ్‌పై అతిగా ఉత్సాహం చూపడాన్ని ఆన్‌లైన్ ఫోరమ్‌లలో కొందరు తప్పుపట్టారు. ఒక యూజర్ దీనిని "అభిమానుల అత్యుత్సాహంతో సృష్టించిన హైప్"గా అభివర్ణించారు.

అయినప్పటికీ సమీక్షకులు ఈ గేమ్‌ను విపరీతంగా ప్రశంసించారనడంలో ఎలాంటి సందేహం లేదు. ప్రముఖ గేమింగ్ వెబ్‌సైట్ ఐజీఎన్ (ఐజీఎన్) జీటీఏ6ను ఇంతకుముందెన్నడూచూడని, నమ్మశక్యంకాని గేమ్‌గా వర్ణించింది.

యూరోగేమర్ ఈ గేమ్‌కు ఫైవ్ స్టార్ రేటింగ్ ఇచ్చింది. గ్రాఫిక్స్, కథ విషయంలో "వీడియో గేమ్‌ల స్థాయిని రాక్‌స్టార్ మరోసారి మరింత ముందుకు తీసుకెళ్లింది" అని పేర్కొంది.

జీటీఏ 6 కేవలం గుర్తుండిపోయే కారు ప్రమాదాలు, దోపిడీలకే పరిమితం కాలేదని సమీక్షకుడు యూసుఫ్ కోల్ అన్నారు. ఆటగాళ్లు చేసే ప్రతి పనికి ఎదురయ్యే పరిణామాలను కూడా ఈ గేమ్‌లో చూపించారని చెప్పారు.

"పోలీసు వాహనాలు వెంటాడుతుండగా నగర వీధుల్లో వేగంగా కారు నడిపిన సందర్భాలు నాకు అత్యంత గుర్తుండిపోయే అనుభవాలుగా నిలిచాయి" అని ఆయన రాశారు.

జీటీఏ 6 గ్రాఫిక్స్‌పై అభిమానుల్లో భారీ అంచనాలు నెలకొన్నాయి. ఇప్పటివరకు వచ్చిన సమీక్షలను బట్టి చూస్తే ఆ అంచనాలను గేమ్ అందుకుందనే అభిప్రాయం వ్యక్తమవుతోంది.

గేమ్‌లోని లియోనిడా ప్రాంతం ఎంతో సహజంగా, నిజమైన ప్రదేశంలా కనిపిస్తోందని గార్డియన్ పేర్కొంది. "కొన్ని సందర్భాల్లో అది నిజం కాదని నమ్మడం కూడా కష్టంగా ఉంటుంది" అని అభిప్రాయపడింది.

GTA 6, వీడియో గేమ్, రాక్‌స్టార్, అమెరికా
ఫొటో క్యాప్షన్, GTA 6

‘మహిళాపాత్రతో మరో లెవెల్‌కు’

గేమ్‌లోని ప్రధాన పాత్రలు జేసన్, లూసియా మధ్య ఉన్న సంబంధం కూడా సమీక్షకులను ఆకట్టుకుంది.

"వాళ్లు ఆటగాడి ఆదేశాల మేరకు కదిలే పాత్రల్లా కాకుండా, నిజమైన మనుషుల్లా అనిపిస్తారు" అని ది గార్డియన్‌కు చెందిన కైజా మెక్‌డొనాల్డ్ తన సమీక్షలో రాశారు.

బ్లూమ్‌బర్గ్ కూడా జీటీఏ6కు ఫైవ్ స్టార్ రేటింగ్ ఇచ్చి దానిని ఒక 'మాస్టర్‌పీస్'గా అభివర్ణించింది.

ఈ గేమ్ అభివృద్ధికి అయిన ఖర్చును రాక్‌స్టార్ గేమ్స్ ఇప్పటివరకు వెల్లడించలేదు. అయితే కొన్ని అంచనాల ప్రకారం జీటీఏ 6 తయారీ ఖర్చు వందకోట్ల అమెరికా డాలర్లకుపైగా ఉండవచ్చని భావిస్తున్నారు.

దాదాపు వంద గంటల పాటు జీటీఏ 6ను ఆడిన గేమింగ్ జర్నలిస్టు జోర్డాన్ మిడ్లర్ ఈ గేమ్‌లో తాను అన్వేషించాల్సిన అంశాలు ఇంకా చాలా ఉన్నాయని చెప్పారు.

"గత జీటీఏ గేమ్‌లలో మహిళా పాత్రల చిత్రణ ఎక్కువగా పురుషాధిక్య ఆలోచనాధోరణిని ప్రతిబింబించేది. లూసియాను ఈ గేమ్‌లో చేర్చడమే కాకుండా కేవలం పేరుకే ఒక పాత్రగా కాకుండా, కథలో సహజమైన భాగంగా తీర్చిదిద్దడం చాలా ముఖ్యమైన మార్పు. త్వరలోనే ఆమె అభిమానులకు ఇష్టమైన పాత్రగా మారుతుందనడంలో సందేహం లేదు" అని అన్నారు.

గేమింగ్ రంగంలో అత్యంత ప్రజాదరణ పొందిన అవార్డుల కార్యక్రమాల్లో ఒకటైన 'ది గేమ్ అవార్డ్స్' మంగళవారం(నవంబర్ 17) 2026 సంవత్సరానికి సంబంధించిన నామినేషన్లను ప్రకటించింది.

ఆ సమయానికి జీటీఏ 6 విడుదల కాకపోయినప్పటికీ, ఈ గేమ్‌కు అత్యధిక నామినేషన్లు వచ్చాయి.

మొత్తం ఎనిమిది అవార్డులకు ఈ గేమ్ నామినేట్ అయింది. వీటిలో బెస్ట్ గేమ్ ఆఫ్ ద ఇయర్, బెస్ట్ మ్యూజిక్ అవార్డులు కూడా ఉన్నాయి.

GTA 6, వీడియో గేమ్, రాక్‌స్టార్, అమెరికా
ఫొటో క్యాప్షన్, జీటీఏ 1997లో తొలిసారి విడుదలైంది.

భారత్‌లో జీటీఏ 6ను ఎలా ఆడొచ్చు?

జీటీఏ 6ను ఆడాలంటే ప్లేస్టేషన్ 5 లేదా ఎక్స్‌బాక్స్ సిరీస్ ఎక్స్/ఎస్ కన్సోల్ అవసరం. ఇవి వీడియో గేమ్స్ ఆడేందుకు ప్రత్యేకంగా రూపొందించిన పరికరాలు. వీటిని టీవీ లేదా మానిటర్‌కు అనుసంధానించి, చేతిలో పట్టుకునే కంట్రోలర్‌తో వీడియో గేమ్స్ ఆడొచ్చు.

జీటీఏ 6 ఆడాలంటే ఈ కన్సోళ్లలో ఏదో ఒకటి తప్పనిసరిగా ఉండాలి.

భారత్‌లో ప్లేస్టేషన్, ఎక్స్‌బాక్స్ స్టోర్లలో జీటీఏ 6 స్టాండర్డ్ ఎడిషన్ ధర 5,999రూపాయలు. అల్టిమేట్ ఎడిషన్ ధర 7,499 రూపాయలుగా ఉంది.

స్టాండర్డ్ ఎడిషన్‌లో గేమ్‌కు సంబంధించిన ప్రధాన కథ మొత్తం అందుబాటులో ఉంటుంది. అల్టిమేట్ ఎడిషన్‌లో అదనపు వాహనాలు, ఆయుధాలు, దుస్తులు, ఇతర డిజిటల్ వస్తువులు కూడా ఉంటాయి. కేవలం గేమ్ కథను ఆడాలనుకునే వారికి స్టాండర్డ్ ఎడిషన్ సరిపోతుంది.

మీ దగ్గర జీటీఏ 6 ఆడగలిగే గేమింగ్ కన్సోల్ లేకపోతే, దాన్ని కూడా కొనుగోలు చేయాల్సి ఉంటుంది.

ఉదాహరణకు, ప్లేస్టేషన్ 5 డిజిటల్ ఎడిషన్ ధర రూ.64,990. దీనికి గేమ్ ధర రూ.5,999 కలిపితే మొత్తం ఖర్చు రూ.70,989 అవుతుంది.

అయితే ఇందులో టీవీ లేదా మానిటర్, ఇంటర్నెట్ కనెక్షన్ ఖర్చులు కలపలేదు.

ఈ గేమ్‌ను డౌన్‌లోడ్ చేసుకోవడానికి కన్సోల్‌ను బట్టి 212 జీబీ వరకు ఖాళీ స్టోరేజ్ అవసరం కావచ్చు.

ఈ గేమ్‌ను 18 ఏళ్లు పైబడినవారి కోసం రూపొందించారు. ఇందులో హింస, మాదకద్రవ్యాల వినియోగం, లైంగిక అంశాలు, నగ్నత్వానికి సంబంధించిన దృశ్యాలు ఉంటాయని హెచ్చరికలు జారీ చేశారు.

ప్రస్తుతం విడుదల చేసిన భాషల జాబితాలో భారతీయ భాషలు లేవు.

జీటీఏ 6పై ఉన్న ఆసక్తికి ట్రైలర్లకే వచ్చిన స్పందన నిదర్శనం. 2023 డిసెంబరులో విడుదలైన తొలి అధికారిక ట్రైలర్‌కు యూట్యూబ్‌లో తొలి 24 గంటల్లోనే 9కోట్ల 3లక్షలకు పైగా వ్యూస్ వచ్చాయి.

2025 మేలో విడుదలైన రెండో ట్రైలర్‌కు వివిధ ప్లాట్‌ఫారమ్‌ల్లో తొలి 24 గంటల్లోనే 47.5 కోట్లకు పైగా వ్యూస్ వచ్చాయి.

జీటీఏ 6 ట్రైలర్లపై కనిపించిన ఆసక్తి.. గేమ్‌కు సంబంధించిన ప్రత్యేక ప్రదర్శన సమయంలోనూ కనిపించింది.

2026 ఆగస్టు 27న ఈ ప్రత్యేక ప్రదర్శనను తొలిసారిగా నెట్‌ఫ్లిక్స్‌లో ప్రసారం చేశారు.

అమ్మకాలపై భారీ అంచనాలు

జీటీఏ 6 ట్రైలర్లు సృష్టించిన ఆసక్తి, గేమ్‌కు సంబంధించిన విస్తృత ప్రివ్యూకి లభించిన స్పందనలో కూడా కనిపించింది. ఈ ప్రివ్యూ 2026 ఆగస్టు 27న తొలిసారిగా నెట్‌ఫ్లిక్స్‌లో ప్రసారమైంది.

ఆంపియర్ అనాలిసిస్ సెప్టెంబర్ 10న విడుదల చేసిన నివేదిక ప్రకారం ఆ ప్రివ్యూ ప్రభావంతో అమెరికాలో అదే రోజు లక్ష మందికిపైగా నెట్‌ఫ్లిక్స్ కొత్త సభ్యత్వాలు నమోదైనట్టు అంచనా వేసింది.

జీటీఏ 6 విడుదలైన తొలి వారంలోనే 325 కోట్ల నుంచి 520 కోట్ల అమెరికన్ డాలర్ల మధ్య అమ్మకాల ఆదాయం సాధించవచ్చని మరో గేమింగ్ మార్కెట్ ట్రాకింగ్ సంస్థ న్యూజూ అంచనా వేసింది.

GTA 6, వీడియో గేమ్, రాక్‌స్టార్, అమెరికా
ఫొటో క్యాప్షన్, స్కాట్లాండ్‌లోని డండీ నగరంలో ఉన్న ఒక చిన్న గేమింగ్ స్టూడియోలో జీటీఏ ప్రయాణం ప్రారంభమైంది.

జీటీఏ ప్రయాణం ఎక్కడ ప్రారంభమైంది?

జీటీఏ సిరీస్ 1997లో ప్రారంభమైంది. ఇప్పుడు కనిపిస్తున్న రూపంతో పోలిస్తే తొలి గేమ్ పూర్తిగా భిన్నంగా ఉండేది. పై నుంచి కనిపించే పిక్సెల్ ప్రపంచంలో ఆటగాళ్లు కార్లు దొంగిలిస్తూ, నేర ముఠాల కోసం పనులు చేయడం వంటివి చేసేవారు. కాలక్రమేణా గేమ్‌లోని దృశ్యాలు, కథనం, గేమ్ ప్రపంచం మరింత విస్తృతంగా, వాస్తవికంగా మారాయి.

ఈ సిరీస్ మూలాలు ఉంది అమెరికాలో కాదు. స్కాట్లాండ్‌లోని డండీ నగరంలో ఉన్న ఒక చిన్న గేమింగ్ స్టూడియోలో దీని ప్రయాణం ప్రారంభమైంది.

ఈ ప్రయాణంపై బీబీసీ "ది గ్లోబల్ స్టోరీ" కార్యక్రమం 2026 నవంబర్ 13న ఒక ప్రత్యేక కథనాన్ని ప్రసారం చేసింది.

ఆ తర్వాత వచ్చిన గేమ్‌లలో లిబర్టీ సిటీ, వైస్ సిటీ, లాస్ శాంటోస్ వంటి కల్పిత అమెరికా నగరాలను విస్తృతమైన గేమ్ ప్రపంచాలుగా మలిచారు.

2013 సెప్టెంబరులో విడుదలైన జీటీఏ 5 లాస్ ఏంజెలిస్ నగరాన్ని పోలి ఉండే లాస్ శాంటోస్ నేపథ్యంలో సాగుతుంది. ఇందులో మైఖేల్, ఫ్రాంక్లిన్, ట్రెవర్ అనే మూడు ప్రధాన పాత్రలు ఉన్నాయి.

అప్పటి నుంచి జీటీఏ ప్రధాన సిరీస్‌లో కొత్త గేమ్ విడుదల కాలేదు. దీంతో జీటీఏ 6 కోసం అభిమానుల ఎదురుచూపులు ఏటేటా పెరుగుతూ వచ్చాయి.

కొత్త జీటీఏ గేమ్‌ రూపొందిస్తున్నట్టు గేమ్ డెవలపర్ రాక్‌స్టార్ గేమ్స్ 2022 ఫిబ్రవరి 4న తొలిసారి అధికారికంగా ప్రకటించింది.

అయితే గేమ్ అభివృద్ధి పనులు అసలు ఎప్పుడు ప్రారంభమయ్యాయనే విషయాన్ని కంపెనీ వెల్లడించలేదు.

ఇదే సమయంలో రాక్‌స్టార్ 2018లో రెడ్ డెడ్ రిడెంప్షన్ 2 అనే మరో భారీ ఓపెన్-వరల్డ్ గేమ్‌ను కూడా విడుదల చేసింది

రాక్‌స్టార్ గేమ్‌లలో విస్తారమైన ప్రపంచం, అనేక పాత్రలు, చిన్న చిన్న ప్రదేశాల వివరాలపైనా ప్రత్యేక శ్రద్ధ కనిపిస్తుంది. ఇలాంటి గేమ్‌లను రూపొందించడానికి చాలా సంవత్సరాల సమయం పడుతుంది. జీటీఏ 6 విషయంలోనూ అదే జరిగింది.

ఇక జీటీఏ 5తో పాటు వచ్చిన జీటీఏ ఆన్‌లైన్ కూడా ఈ కాలంలో తన ప్రాచుర్యాన్ని కొనసాగించింది.

ఇందులో ఇంటర్నెట్ ద్వారా స్నేహితులతో పాటు ఇతర ఆటగాళ్లతో కలిసి గేమ్ ఆడవచ్చు.

రాక్‌స్టార్ సంస్థ ఇందులో ఎప్పటికప్పుడు కొత్త మిషన్లు, కార్లు, వ్యాపారాలు, ఇతర అంశాలను జోడిస్తూ వచ్చింది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)