‘నా ప్రాణం కాపాడారు, మీరే నా సర్వస్వం’ అంటూ ట్రంప్‌కు చేరువైన నటాలీ హార్ప్ ఎవరు? ఆయన నమ్మకాన్ని ఆమె ఎలా సాధించారు?

అమెరికా అధ్యక్షుడు డోనల్డ్ ట్రంప్‌కు అత్యంత సన్నిహితులలో ఒకరిగా ఇటీవలి కాలంలో నటాలీ హార్ప్ ఎదిగారు. ట్రంప్ వెన్నంటి ఉండేవారిలో ఆమె కనిపించినంత ఎక్కువగా ఇతరులెవరూ కనిపించరు.

ట్రంప్‌ దగ్గర సుదీర్ఘ కాలంగా పనిచేస్తున్న అత్యంత నమ్మకస్థులైన సహాయకుల్లో 35 ఏళ్ల హార్ప్ ఒకరు.

ట్రంప్ అధికారిక సోషల్ మీడియా ప్లాట్‌ఫామ్ 'ట్రూత్ సోషల్' పోస్టులు సహా పలు కీలక బాధ్యతలను ఆమె ఎంతో నమ్మకంగా నిర్వర్తిస్తున్నారు.

జార్జియా సెనేటర్ జాన్ ఒసాఫ్ ఈ వారం తన ప్రసంగంలో హార్ప్ పేరును ప్రస్తావించడంతో మళ్లీ ఆమె వార్తల్లో నిలిచారు.

ఒసాఫ్, డెమొక్రాట్ పార్టీకి చెందినవారు. ఆయన తరచుగా ట్రంప్‌ను విమర్శిస్తుంటారు. ఆయన చేసిన తాజా ప్రసంగం సోషల్ మీడియాలో వైరల్ అయింది.

ఖతర్ బహుమతిగా ఇచ్చినట్లు చెబుతున్న విలాసవంతమైన విమానంలో నటాలీ హార్ప్‌తో కలిసి ట్రంప్ చేసిన ప్రయాణంపై ఒసాఫ్ విమర్శలు గుప్పించారు.

గత నెలలో తుర్కియే నుంచి బయలుదేరే సమయంలో ట్రంప్ రహస్యంగా విమానం మారారని, ఆ సమయంలో ఆయన వెంట ఉన్న అతి కొద్దిమందిలో హార్ప్ కూడా ఒకరని వచ్చిన వార్తలను ఆయన ప్రస్తావించారు.

ట్రంప్‌కు సన్నిహితురాలైన నటాలీ గురించి ప్రజల్లో ఆసక్తి పెరిగింది. ఆమెను 'గేట్‌కీపర్', 'కంఫర్ట్ బ్లాంకెట్' అని పిలుస్తున్నారు.

క్యాన్సర్ బాధితురాలి నుంచి వైట్ హౌస్ వరకు...

కాలిఫోర్నియాలో సంప్రదాయ క్రైస్తవ కుటుంబంలో జన్మించిన హార్ప్, వైట్ హౌస్‌కు చేరుకోవడానికి ఒక భిన్నమైన మార్గాన్ని ఎంచుకున్నారు.

ట్రంప్ తన ప్రాణాలు కాపాడారని చెప్పడం ద్వారా ఆమె మొదటిసారి వార్తల్లో నిలిచారు.

ట్రంప్ తొలి విడత అధ్యక్ష పాలనలో 'రైట్ టు ట్రై యాక్ట్' ఆమోదం పొందింది. తీవ్ర అనారోగ్యంతో లేదా ప్రాణాంతక వ్యాధులతో బాధపడే రోగులు ప్రయోగాత్మక చికిత్సలు పొందేందుకు ఈ చట్టం వీలు కల్పించింది. ఆ సమయంలో ఎముకల క్యాన్సర్‌తో బాధపడుతున్న హార్ప్, సరిగ్గా అలాంటి ప్రయోగాత్మక చికిత్సనే తీసుకుంటున్నారు.

ఈ అనుభవాన్ని ప్రజలతో పంచుకోవడం ద్వారా రిపబ్లికన్ పార్టీలోని ట్రంప్ అనుకూల 'మాగా' (మేక్ అమెరికా గ్రేట్ అగైన్) వర్గంలో ఆమె వేగంగా గుర్తింపు తెచ్చుకున్నారు. ఆ తర్వాత 2020లో ట్రంప్ ఎన్నికల ప్రచార సలహా మండలిలో ఆమె చేరారు.

"మార్కెట్లో అందుబాటులో ఉన్న కీమోథెరపీ నా వ్యాధిని నయం చేయలేకపోయినప్పుడు, ఎవరూ నన్ను తమ క్లినికల్ ట్రయల్స్‌లోకి తీసుకోలేదు'' అని 2020 రిపబ్లికన్ నేషనల్ కన్వెన్షన్‌లో ఆమె ప్రసంగించారు.

"వారు నాకు ప్రయోగాత్మక చికిత్స పొందే హక్కు ఇవ్వలేదు మిస్టర్ ప్రెసిడెంట్. ఆ హక్కు మీరు ఇచ్చారు. మీరు లేకపోతే, ఆ చికిత్సలకు అధికారిక అనుమతుల కోసం ఎదురుచూస్తూనే నేను ప్రాణాలు కోల్పోయేదాన్ని'' అని ఆమె చెప్పారు.

ఆ కార్యక్రమం ముగిసిన తర్వాత హార్ప్ గురించి ట్రంప్ మాట్లాడారు.

''టెలివిజన్ స్క్రీన్‌పై ఆమె కనిపించిన తీరు, మాట్లాడిన విధానం చాలా అరుదైనది'' అని ట్రంప్ ప్రశంసించారు.

ఆ ఎన్నికల్లో ట్రంప్ ఓడిపోయిన తర్వాత, సంప్రదాయవాద 'వన్ అమెరికా న్యూస్ నెట్‌వర్క్' (ఓఏఎన్)లో హార్ప్‌కు టీవీ హోస్ట్‌గా ఉద్యోగం వచ్చింది.

అక్కడ ఆమె ట్రంప్ గట్టి మద్దతుదారుగా గుర్తింపు పొందారు. 2020 ఎన్నికల్లో ట్రంపే గెలిచారనే వాదనను ఆమె బలంగా ప్రచారం చేశారు. అనంతరం 2022లో ఆమె ఆ నెట్‌వర్క్‌ చానెల్ నుంచి బయటకు వచ్చి, తర్వాతి అధ్యక్ష ఎన్నికల ప్రచార బృందంలో చేరారు.

‘అందుకే ఆమెకు ట్రంప్ అంటే అంత అభిమానం’

హార్ప్ పట్ల ట్రంప్ దృక్పథం ఎలా ఉంటుందనే వివరాలు మ్యాగీ హేబర్‌మాన్, జోనాథన్ స్వాన్, మైఖేల్ వోల్ఫ్ వంటి జర్నలిస్టులు రాసిన పుస్తకాల ద్వారా వెలుగులోకి వచ్చాయి.

ఆమె వ్యక్తిగత జీవితానికి సంబంధించి బహిరంగంగా చాలా తక్కువ సమాచారం మాత్రమే అందుబాటులో ఉంది.

ఆమె సోదరుడు ప్రెస్టన్ హార్ప్ మంగళవారం సీఎన్‌ఎన్‌తో మాట్లాడుతూ ట్రంప్, హార్ప్ గురించి ప్రస్తావించారు.

''మా అమ్మ మాకు కొన్ని విలువలు నేర్పించారు. ఆ విలువల్ని గౌరవించాలని చెప్పారు. ఆ విలువలకు ప్రతిరూపంగా ట్రంప్ ఉంటారు. నిజాయితీగా చెప్పాలంటే ట్రంప్ పట్ల ఆమెకు అంతటి అభిమానం కలగడానికి ఇదే కారణమని నేను భావిస్తున్నా.

నటాలీకి చిన్నప్పటి నుంచే వైట్ హౌస్ అంటే చాలా ఆసక్తి ఉండేది. ఇరాక్ యుద్ధ సమయంలో జార్జ్ డబ్ల్యూ బుష్ సహా గత అధ్యక్షులకు కూడా ఆమె లేఖలు రాసేవారు.

వైట్‌హౌస్‌లో అడుగుపెట్టడంతో ఆమె కల నేరవేరింది. నా సోదరి ట్రంప్‌కు అతిపెద్ద అభిమాని'' అని ప్రెస్టెన్ హార్ప్ వివరించారు.

సోదరి హార్ప్ వ్యక్తిత్వం అందర్నీ ఆకట్టుకుంటుందని ప్రెస్టన్ అన్నారు.

‘‘ట్రంప్ తన ప్రాణాన్ని కాపాడారని ఆమె బలంగా నమ్ముతారు. అంతటి కృతజ్ఞతతో ఉండే వ్యక్తి ఎవరికైనా సహజంగానే నచ్చుతారు" అని ఆయన అన్నారు.

వైట్ హౌస్‌లో హార్ప్ అధికారిక హోదా 'ప్రెసిడెంట్ ఎగ్జిక్యూటివ్ అసిస్టెంట్'.

సాధారణంగా ఈ హోదాలో షెడ్యూల్ నిర్వహణ, వార్తలను సమీక్షించడం, రోజువారీ సెక్రటేరియట్ బాధ్యతలు చూడటం వంటి పనులు ఉంటాయి.

అయితే హార్ప్ ఈ పదవికి కొత్త గుర్తింపు తెచ్చారని, గతంలో ఈ పదవిలో పనిచేసిన మెడేలిన్ వెస్టర్‌హౌట్ కంటే అత్యంత ప్రభావవంతమైన వ్యక్తిగా గుర్తింపు పొందారని అందుబాటులో ఉన్న సమాచారం ద్వారా తెలుస్తోంది.

హార్ప్ ఎంత ప్రభావవంతమైన వ్యక్తి?

ఈ వారం ప్రారంభంలో ఒసాఫ్ చేసిన వ్యాఖ్యలపై సీఎన్‌ఎన్ రిపోర్టర్ ట్రంప్‌ను ప్రశ్నించారు. దీనిపై వైట్ హౌస్ తన అధికారిక ఎక్స్ ఖాతా ద్వారా ఆగ్రహం వ్యక్తం చేసింది. రిపోర్టర్ క్రిస్టెన్ హోమ్స్ ఒక ఉద్యోగిపై వ్యక్తిగత దాడికి పాల్పడ్డారని ఆ ట్వీట్‌లో ఆరోపించింది.

''భవిష్యత్తులో మీ పిల్లలు మీరు అడిగిన ఈ నీచమైన ప్రశ్నను చూస్తారు. వారి తల్లిదండ్రులు ఇంత క్రూరంగా వ్యవహరించారని తెలిసి సిగ్గుపడతారు" అని మరో ట్వీట్‌లో వైట్‌హౌస్ పేర్కొంది.

ట్రంప్ రెండో పదవీకాలంలో సిబ్బందిగా హార్ప్ ఎప్పుడూ ఆయన వెంటే ఉంటున్నారు.

ఓవల్ ఆఫీస్‌లో ట్రంప్‌కు కొన్ని అడుగుల దూరంలో నిలబడి ఉండటం, దేశీయ- అంతర్జాతీయ పర్యటనల కోసం ఎయిర్ ఫోర్స్ వన్ విమానంలో ప్రయాణించడం వంటి సందర్భాల్లో రిపోర్టర్లు తరచుగా ఆమెను చూస్తుంటారు.

"ఆమె ఎప్పుడూ ఆయన చుట్టుపక్కలే ఉంటారు. నిజంగా ఆయన పక్కనే ఉంటారు'' అని వైట్‌హౌస్ అంతర్గత వర్గాలు తెలిపాయి.

ఆమె చేతిలో ఎప్పుడూ పోర్టబుల్ ప్రింటర్ ఉంటుంది. అందుకే వైట్ హౌస్ వర్గాలు, మీడియా ప్రతినిధులు ఆమెను 'హ్యూమన్ ప్రింటర్' అని పిలుస్తుంటారు.

ట్రంప్ చదవాలనుకునే వార్తా కథనాలు, సోషల్ మీడియా పోస్టులను ఆమె ప్రింట్ తీసి ఆయనకు ఇస్తుంటారు.

ఈ విధంగా ట్రంప్ వద్దకు ఏ సమాచారం వెళ్లాలి, ఏ అప్‌డేట్స్ చేరాలనే విషయాన్ని నిర్ణయించే అసాధారణమైన శక్తి హార్ప్‌కు ఉందని వైట్‌హౌస్ కార్యకలాపాలను పర్యవేక్షించే మరో వ్యక్తి చెప్పారు.

ఇతర అంతర్గత వర్గాలు అమెరికన్ మీడియాతో మాట్లాడుతూ ఆమెను 'గేట్‌కీపర్', 'కంఫర్ట్ బ్లాంకెట్' అని పేర్కొన్నాయి.

ట్రంప్ సోషల్ మీడియా ఖాతాల నిర్వహణను కూడా హార్ప్ చూస్తుంటారు. ఆయన తరఫున 'ట్రూత్ సోషల్' ఖాతాలో పోస్టులు పెడుతుంటారు.

2024లో కమలా హారిస్ ప్రసంగాన్ని చూస్తూ ట్రంప్ నోటితో చెబుతుండగా, ఆయన శైలికి తగినట్లుగా హార్ప్ పోస్ట్ టైప్ చేస్తున్న ఫోటో ఒకటి ఒసాఫ్ వ్యాఖ్యల తర్వాత బాగా వైరల్ అయింది.

హార్ప్‌పై ప్రస్తుతం విస్తృత చర్చ జరుగుతున్న వేళ, వైట్‌హౌస్ ఆమెను బృందంలోని 'విశ్వసనీయమైన, విలువైన' సభ్యురాలిగా పేర్కొంది.

తుర్కియే నుంచి ట్రంప్ బయలుదేరిన విమానంలో హార్ప్ కూడా ఉన్నారని విమర్శకులు అన్నారు.

ఇరాన్ నుంచి ముప్పు ఉందనే సమాచారంతో ట్రంప్ ఆ రహస్య విమానంలో వెళ్లారని వార్తలు వచ్చాయి.

ట్రంప్ ఆ రహస్య విమానంలో హార్ప్‌ను ఎందుకు తీసుకెళ్లారని ట్రంప్ అధ్యక్ష పదవికి సంబంధించి విస్తృతంగా వార్తలు రాసిన జర్నలిస్ట్ మ్యాగీ హేబర్‌మాన్‌ను ఒక కార్యక్రమంలో ఎంఎస్‌ఎన్ నౌ అనే న్యూస్ నెట్‌వర్క్ ప్రశ్నించింది.

''చెప్పాలంటే.. ఆమె ఆయనకు మానసిక సాంత్వన ఇచ్చే, ఒత్తిడిని తగ్గించి ప్రశాంతతను ఇచ్చే భరోసా లాంటిది'' అని మ్యాగీ సమాధానం ఇచ్చారు.

మ్యాగీ హేబర్‌మాన్, స్వాన్ 2024లో 'న్యూయార్క్ టైమ్స్' కోసం రాసిన కథనంలో పేర్కొన్న వివరాల ప్రకారం.. ట్రంప్‌కు రాసిన ఒక లేఖలో 'మీరే నాకు సర్వస్వం' అని హార్ప్ పేర్కొన్నారు.

( బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)