‘ఇంటర్వ్యూ కోసం వెళితే దుస్తుల్లోనే మూత్రం పోసుకునే డ్రగ్ ఇచ్చారు’

అది జులై 2011.

అప్పుడు అనైస్ డి వోస్ వయసు 27ఏళ్లు.

ఫ్రెంచ్ సాంస్కృతిక మంత్రిత్వ శాఖలో ఉద్యోగ ఇంటర్వ్యూ కోసం ఆమె పారిస్‌లో ఉన్నారు.

అనైస్ సాధారణంగా కాఫీ తాగరు. కానీ ఇంటర్వ్యూ చేస్తున్న సీనియర్ ప్రభుత్వ అధికారి క్రిస్టియన్ నెగ్రే కాఫీ ఆఫర్ చేయడంతో ఆమె మర్యాద కోసం తీసుకున్నారు.

"ఆయనే స్వయంగా కాఫీ తయారు చేశారు. కానీ దాని రుచి అస్సలు బాలేదు. అందుకే నేను సగం మాత్రమే తాగాను" అని అనైస్ బీబీసీ గ్లోబల్ విమెన్‌తో చెప్పారు.

‘ఇంటర్వ్యూకోసమని వెళ్తే...’

" నేను చాలా బలహీనంగా అయిపోయాను. నా కాళ్లు తేలిపోతున్నట్టు అనిపించింది. నాకు చాలా భయమేసింది. ఏం జరుగుతోందో నాకు అర్థం కాలేదు" అని అనైస్ డి వోస్ చెప్పారు. ఫ్రెంచ్ సాంస్కృతిక శాఖలో ఉద్యోగ ఇంటర్వ్యూకి హాజరైనప్పుడు ఆమెకిలా జరిగింది.

ఆ రోజు అసలేం జరిగిందో ఆమె మాటల్లోనే...

''ఇంటర్వ్యూ మొదట ఆఫీసులోనే జరిగింది. కొన్ని నిమిషాల తర్వాత నెగ్రే బయటకు వెళ్దామన్నారు. పారిస్ వీధుల్లో నడుస్తున్నప్పుడు నాకు అకస్మాత్తుగా అత్యవసరంగా మాత్రవిసర్జన చేయాల్సిన అవసరం ఉన్నట్టు అనిపించింది.

టాయ్‌లెట్ కోసం వెతకాలని నెగ్రేతో అన్నా. ఆయన నా కళ్లలోకి సూటిగా చూస్తూ... 'ఓ.. నీకు మూత్రం వస్తోందా?' అని అడిగారు. ఆయన నన్ను చూసిన తీరు నాకు చాలా విచిత్రంగా అనిపించింది. నా పరిస్థితి చూసి ఆయన సంతోషిస్తున్నట్టుగా నా వైపు చూడడం చాలా వింతగా అనిపించింది. చిన్నతనంగా అనిపించింది'' అని అనైస్ చెప్పారు.

దుస్తుల్లోనే మూత్రవిసర్జన చేయాల్సిన పరిస్థితి

సీన్ నది కింద ఉన్న వంతెన దగ్గర ఒక స్టోరేజ్ గది ఉందని, ఆ గది తలుపు దగ్గరకు నెగ్రే తనను తీసుకువెళ్లి "నువ్వు ఇక్కడ మూత్ర విసర్జన చేయవచ్చు" అని చెప్పారని అనైస్ తెలిపారు.

నెగ్రే తమకు డ్రగ్ ఇచ్చారని భావిస్తున్న దాదాపు 250 మంది మహిళల్లో అనైస్ ఒకరు. 2009 నుంచి 2018 మధ్య ఈ ఘటనలు జరిగినట్టు చెబుతున్నారు.

ఒక వ్యక్తిపై నియంత్రణ సాధించడానికి వారికి డ్రగ్ ఇచ్చి "కెమికల్ సబ్మిషన్" అని పిలిచే స్థితిలోకి మహిళలను నెట్టినట్టు ఆరోపిణలున్నాయి.

2024లో ఫ్రాన్స్‌లో జిసెల్ పెల్లికో భర్త ఆమెకు మత్తుమందు ఇచ్చి, అపరిచితులతో అత్యాచారం చేయించిన కేసులో దోషిగా తేలడంతో కెమికల్ సబ్మిషన్ అనే విషయం ఫ్రాన్స్‌లో బాగా చర్చకు వచ్చింది.

''నేను చాలా భయపడ్డాను. నెగ్రే నన్ను ఆ గదిలోకి తోసి నా వెనుక తలుపు మూసేస్తారేమోనని ఊహించుకున్నా. ఇదంతా చాలా వింతగా అనిపించడంతో అక్కడినుంచి ముందుకెళ్లాలని పట్టుబట్టా'' అని అనైస్ చెప్పారు.

లూవ్ర్ మ్యూజియం దగ్గరకు వెళ్లి అక్కడి టాయ్‌లెట్ ఉపయోగించుకోవాలనుకుని అలైస్ భావించారు. కానీ దానికి ఒక యూరో చెల్లించాలి. అనైస్ తన పర్సును ఇంటర్వ్యూ కార్యాలయంలోనే మర్చిపోయారు. నెగ్రే కూడా తన దగ్గర డబ్బు లేదని చెప్పారు.

మూత్రాన్ని ఆపుకోవడానికి ప్రయత్నించడం వల్ల తీవ్రమైన నొప్పి, అసౌకర్యంతో బాధపడుతున్న అనైస్, చివరకు ఓ కేఫ్ కనిపించడంతో అక్కడి టాయిలెట్ వాడడానికి అనుమతి తీసుకున్నారు.

"అప్పటికే నాకు చాలా బలహీనంగా అనిపించింది. బాత్రూమ్‌కు వెళ్తుండగానే మూత్రం ఆగలేని పరిస్థితి వచ్చింది. దుస్తుల్లోనే మూత్ర విసర్జన అయిపోయింది'' అని అనైస్ గుర్తుచేసుకున్నారు.

ఇది 2011లో జరిగిందని అనైస్ చెప్పారు.

మూత్రవిసర్జన చేస్తున్నప్పుడు నెగ్రే తనను చూడలేదనే విషయం కొంత ఊరటనిచ్చిందని ఆమె అన్నారు.

"నేను పూర్తిగా డ్రెస్ వేసుకోవడంతో జరిగిన విషయాన్ని దాచడం సులభమైంది.

నెగ్రేతో సుమారు మూడు గంటలు గడిపిన తర్వాత నాకు తల తిరిగినట్టు, పూర్తిగా అలసిపోయినట్టు అనిపించింది'' అని అనైస్ అప్పటి విషయాన్ని వివరించారు.

'ఎక్స్‌పెరిమెంట్స్ పి' అంటే ఏంటి?

అనైస్‌కు ఆ ఉద్యోగం రాలేదు. నెగ్రే గురించి ఆమెకు కొన్ని అనుమానాలు ఉండేవి. కానీ ఆ ఇంటర్వ్యూ తనకు అంత అసౌకర్యం ఎందుకు కలిగించిందో మాత్రం ఆమెకు అర్ధం కాలేదు.

ఆ సంఘటన తన ఆత్మవిశ్వాసాన్ని దెబ్బతీసిందని అనైస్ భావించారు. ఆ తర్వాతి సంవత్సరాల్లో తన కెరీర్ తన తొలినాటి ఆశయాలకు అనుగుణంగా సాగలేదని చెప్పారు.

అనైస్‌కు 2019లో పోలీసుల నుంచి ఒక లేఖ అందింది. ఆమె పోలీసులను కలిసినప్పుడు సాంస్కృతిక మంత్రిత్వ శాఖలోని ఉద్యోగాల ఇంటర్వ్యూల సమయంలో నెగ్రే దాదాపు 200 మంది మహిళలకు డ్రగ్ ఇచ్చినట్టు ఆరోపణలొచ్చినట్టు తేలింది. ఆ 200 మంది మహిళల్లో అలైస్ కూడా ఒకరని పోలీసులు అనుమానిస్తున్నట్టు ఆమెకు తెలిసింది.

"నేను ఆశ్చర్యపోయాను. కానీ నేను పిచ్చిదాన్ని కాదని తెలుసుకున్నందుకు సంతోషంగా అనిపించింది. ఆ రోజు ఏదో జరిగింది" అని ఆమె చెప్పారు.

ఆ తర్వాత పదుల సంఖ్యలో మహిళలు ఇలాంటి ఆరోపణలు చేశారు.

డైయురెటిక్స్ (మూత్రవిసర్జనను ఎక్కువ చేసే మందులు) నెగ్రే ఉపయోగించారని పోలీసులు భావించారు.

అధిక రక్తపోటు సహా అనేక ఆరోగ్య సమస్యలకు చికిత్స చేయడానికి ఈ మందులను ఉపయోగిస్తారు. ఇవి శరీరంలో మూత్రం ఎక్కువగా ఉత్పత్తి అయ్యేలా చేస్తాయి.

నెగ్రే ఆ రోజు తనకు కాఫీలో ఏదైనా కలిపి ఉంటారేమోనని అనైస్ ఒక్క క్షణం ఆలోచించారు. కానీ సాంస్కృతిక మంత్రిత్వ శాఖలో అలా చేయడం అసాధ్యమని తనకు తాను సర్ది చెప్పుకుని ఆ ఆలోచనను విరమించుకున్నారు.

నెగ్రే కంప్యూటర్‌లో 'ఎక్స్‌పెరిమెంట్స్ పి' అనే పేరుతో బాధిత మహిళల జాబితా ఉన్న ఒక స్ప్రెడ్‌షీట్‌ను పోలీసులు గుర్తించారని, దాని ఆధారంగానే పోలీసులు తనను సంప్రదించారని అనైస్ చెప్పారు.

మహిళలు ఇంటర్వ్యూకి వచ్చిన సమయం, వారికి డైయురెటిక్ ఇచ్చిన సమయం, తర్వాత వారు మూత్రవిసర్జన చేయడానికి పట్టిన సమయం, వాళ్లు ఎలాంటి లోదుస్తులు ధరించారు వంటి వివరాలున్నాయని ఆమెకు చెప్పారు.

‘‘మహిళలను అవమానకరమైన పరిస్థితుల్లోకి నెట్టాను’’

నెగ్రే కాఫీకి ఆ వింత రుచి రావడానికి కారణం ఆ మందు కలపడమే అని అప్పటి ఘటనను గుర్తుచేసుకుంటూ అనైస్ నమ్ముతున్నారు.

నెగ్రేపై 2018 జూన్‌లో దర్యాప్తు మొదలైంది. ఒక మహిళను టేబుల్ కింద నుంచి ఫోటో తీస్తుండగా ఆయన సహోద్యోగి పట్టుకోవడంతో ఈ విషయం బయటపడిందని ఈ ఏడాది ఫిబ్రవరిలో విడుదల చేసిన ఒక ప్రకటనలో ప్రాసిక్యూటర్ల ఆఫీస్ తెలిపింది.

ఆ తర్వాత ఆయన్ను మొదట సాంస్కృతిక వ్యవహారాల ప్రాంతీయ డైరెక్టర్ పదవి నుంచి సస్పెండ్ చేశారు. 2019లో సాంస్కృతిక మంత్రిత్వ శాఖ ఆయనను ఉద్యోగం నుంచి తొలగించింది.

ఉద్యోగ ఇంటర్వ్యూల సమయంలో తాను "మహిళలను అవమానకరమైన పరిస్థితుల్లోకి నెట్టానని" 2018లో దర్యాప్తు సందర్భంగా నెగ్రే చెప్పినట్టు ప్రాసిక్యూటర్లు తెలిపారు.

అనైస్, ఇతర ఆరోపణలు చేసిన మహిళల గురించి మీడియాలో వచ్చిన వార్తలు చూసిన తర్వాత మరికొంతమంది మహిళలు ముందుకొచ్చారు.

60 ఏళ్ల నెగ్రేపై మందులు ఇవ్వడం, ఇతరుల వ్యక్తిగత గోప్యతకు భంగం కలిగించడం, లైంగిక వేధింపులు వంటి ఆరోపణలపై అధికారికంగా దర్యాప్తు జరుగుతోంది. ఆయనపై ఇంకా విచారణ ప్రారంభం కాలేదు.

ఈ కథనంలో ఉన్న ఆరోపణలపై స్పందన కోసం బీబీసీ నెగ్రే న్యాయవాదిని సంప్రదించడానికి ప్రయత్నించగా ఆయన వ్యాఖ్యానించడానికి నిరాకరించారు.

‘ఆయన అలా చూస్తూనే ఉన్నారు’

నెగ్రే రికార్డుల్లో పేరున్న మరో మహిళ మేరీ-హెలెన్ బ్రైస్. 2016లో స్ట్రాస్‌బర్గ్‌లోని సాంస్కృతిక మంత్రిత్వ శాఖలో ఉద్యోగం కోసం ఆమెను నెగ్రే ఇంటర్వ్యూ చేశారు. అప్పట్లో నెగ్రే అక్కడ పనిచేస్తున్నారు.

''నేను ఒత్తిడికి గురైనట్టు కనిపిస్తున్నాని నెగ్రే నాతో చెప్పారు. ఆందోళనను తగ్గించుకోవడానికి బయట నడుద్దామన్నారు'' అని ఆమె గుర్తుచేసుకున్నారు.

కానీ కాలువ వెంట నడుస్తున్నప్పుడు అనైస్ లాగే మేరీ-హెలెన్‌కు కూడా అకస్మాత్తుగా అత్యవసరంగా మూత్రవిసర్జన చేయాలనిపించడం, మూత్రం ఆపుకోలేనట్టు అనిపించడం మొదలయింది.

''నాకు నొప్పి కూడా మొదలయింది. దగ్గరలో ఒక పబ్లిక్ టాయ్‌లెట్ ఉన్నట్టు తనకు తెలుసని నెగ్రే చెప్పారు. కానీ అక్కడికి వెళ్ళేసరికి ఎలాంటి టాయ్‌లెట్ కనిపించలేదు. నాకు చాలా నొప్పి అనిపించింది. నొప్పి ఎంతగా పెరిగిపోయిందంటే నా ముఖం పాలిపోయి, కన్నీళ్లు కారిపోతున్నాయి.

బహిరంగంగా మూత్ర విసర్జన చేయడం తప్ప నాకు వేరే మార్గం లేదు. ఇతరులకు కనిపించకుండా తన జాకెట్ అడ్డుపెడతానని నెగ్రే చెప్పారు. నాకు చాలా ఇబ్బందిగా అనిపించింది. ఆయన నా వైపు నుంచి ఒక్క క్షణం కూడా చూపు తిప్పలేదు" అని ఆమె గుర్తుచేసుకున్నారు.

ఈ సంఘటనను తలచుకుని ఏళ్లపాటు తాను సిగ్గుతో కుమిలిపోయానని మేరీ హెలెన్ చెప్పారు

అనైస్ లాగ, మేరీ-హెలెన్‌ను కూడా పోలీసులు సంప్రదించారు. నెగ్రే బాధితులుగా అనుమానిస్తున్న మహిళల్లో ఆమె కూడా ఒకరని చెప్పారు.

"అది నాకు చాలా పెద్ద షాక్ ఇచ్చింది" అని మేరీ-హెలెన్ అన్నారు.

కెమికల్ సబ్మిషన్

ఈ సంఘటన వల్ల మానసిక వేదనతో పాటు, మూత్రవిసర్జనకు సంబంధించిన ఆరోగ్య సమస్యలు కూడా వచ్చాయని మేరీ-హెలెన్ చెప్పారు.

సాధారణంగా ప్రజలు అనుకునే లైంగిక దాడి కేసులలాగా ఈ సంఘటన అనిపించక పోయినప్పటికీ ఏం జరిగిందనే దానిపై తనకు ఎలాంటి సందేహం లేదని ఆమె అన్నారు.

''నాపై దాడి జరిగింది, నాకు మత్తు కలిగించే పదార్థం ఇచ్చారు. నాకు విషం పెట్టినట్టే చేశారు. కానీ నా దృష్టిలో ఇది స్పష్టంగా లైంగిక దాడే'' అని మేరీ-హెలెన్ ఆవేదన వ్యక్తంచేశారు.

కెమికల్ సబ్మిషన్ అంశాన్ని ఫ్రాన్స్ ఎంపీ సాండ్రిన్ జోస్సో కూడా లేవనెత్తారు.

డ్రింక్‌లో ఎక్స్టసీ అనే మత్తు పదార్థం కలిపి, సాండ్రిన్ జోస్సోపై లైంగిక దాడి చేయడానికి ప్రయత్నించిన కేసులో ఫ్రెంచ్ సెనేటర్ జోయెల్ గెర్రియో ఈ ఏడాది దోషిగా తేలారు. అప్పటినుంచి ఈ అంశంపై జోస్పో ప్రముఖంగా ప్రచారం చేస్తున్నారు.

బాధిత మహిళలకు సహాయం చేయడంలోనూ, వారికి మత్తుమందు ఇచ్చేవారిపై చర్యలు తీసుకోవడంలో ఫ్రాన్స్ చాలాకాలంగా తగినంత మద్దతుగా లేదని జోస్సో వాదిస్తున్నారు.

తమకు మత్తుమందు ఇచ్చారేమోనని అనుమానం ఉన్న మహిళలు పోలీసులకు ఫిర్యాదు చేయాల్సిన అవసరం లేకుండా తమ రక్తం, మూత్రం లేదా జుట్టు నమూనాలను ల్యాబ్‌లో పరీక్షించుకునేలా ఈ ఏడాది ఒక పైలట్ కార్యక్రమాన్ని ప్రారంభించడంలో కూడా ఆమె కీలక పాత్ర పోషించారు.

"ప్రజలకు ఈ అంశంపై అవగాహన పెరుగుతోంది. ఎక్కువ మంది మహిళా బాధితులు ముందుకు వచ్చి మరిన్ని ఫిర్యాదులు చేస్తున్నారు. ఇది చాలా ముఖ్యం" అని జోస్సో బీబీసీ గ్లోబల్ ఉమెన్‌తో అన్నారు.

కానీ దీనికి కొన్ని పరిమితులు కూడా ఉన్నాయి.

‘ఇంతకుముందెప్పుడూ వినని సంఘటన’

అనైస్, మేరీ-హెలెన్‌తో పాటు నెగ్రేపై ఆరోపణలు చేసిన అనేకమంది మహిళలకు తమకు మత్తుమందులు ఇచ్చారనే అనునమానమే మొదట రాలేదు. అలాగే మందులు ఇచ్చిన వెంటనే పరీక్ష చేయకపోతే రక్తం మూత్ర నమూనాల్లో దాని ఆనవాళ్లు కనిపించకపోవచ్చు.

ఈ పదార్థాలను వెంట్రుకలలో ఎక్కువ కాలం పాటు గుర్తించవచ్చు. కానీ కాలం గడిచేకొద్దీ మందు వారి శరీరంలోకి ఎప్పుడు వెళ్లిందో నిర్ధరించడం కష్టమవుతుంది.

డైయురిటిక్స్‌ని ఇలా ఉపయోగించడం చాలా అసాధారణమైన విషయమని రేమండ్-పాయింకరే ఏపీ-హెచ్‌పీ హాస్పిటల్‌లో పైలట్ ప్రోగ్రామ్‌ నిర్వహిస్తున్న ప్రొఫెసర్ జీన్-క్లాడ్ అల్వారెజ్ చెప్పారు.

టాక్సాలిజస్ట్‌గా తన 26 ఏళ్ల కెరీర్‌లో ఇంతకు ముందెన్నడూ ఇలాంటి కేసును చూడలేదని ఆయన అంటున్నారు.

ఈ ల్యాబ్ రోజూ 400 రకాల పదార్థాలను పరీక్షిస్తుంది.

"ఇప్పుడు ఫ్రాన్స్‌లో మేము డైయురిటిక్స్‌ను కూడా పరిశీలిస్తున్నాం" అని ఆయన అన్నారు.

నెగ్రేను అనైస్ కలిసి 15 ఏళ్లు. పోలీసులతో దీనిపై మొదటిసారి మాట్లాడి కూడా ఏడేళ్లయింది.

నెగ్రేపై కేసు కోర్టుకు చేరడానికి ఇంత సమయం పట్టడంపై అనైస్‌తో పాటు ఇతర బాధిత మహిళలు తీవ్ర అసంతృప్తితో ఉన్నారు.

ఆరోపణలు ఎదుర్కొంటున్న వ్యక్తి ఇప్పటికీ మానవ వనరుల రంగంలో పనిచేస్తున్నారని 30 మంది బాధిత మహిళలకు సహాయం చేస్తున్న మహిళా హక్కుల సంస్థ ఫౌండేషన్ డెస్ ఫెమ్స్ తెలిపింది.

"ప్రతిదీ బాధ కలిగిస్తోంది. మాతో వ్యవహరిస్తున్న తీరుపై నాకు కోపంగా ఉంది" అని అనైస్ అన్నారు. ఇప్పుడామె వయసు 42ఏళ్లు.

2019లో తాను మొదటిసారి పోలీసులతో మాట్లాడానని ఆమె చెప్పారు. ఆ తర్వాత 2023 వరకు కేసుపై పోలీసుల నుంచి ఎలాంటి సమాచారం రాలేదన్నారు. పోలీసులకు ఎన్నిసార్లు ఈ మెయిల్స్ పంపినప్పటికీ స్పందన లేదన్నారు.

" నేను బాధితురాలిననే వాస్తవం నాలుగేళ్లపాటు నాకు మాత్రమే తెలుసు. ఏం చేయాలో నాకు తెలియలేదు. న్యాయ వ్యవస్థపై నాకు చాలా కోపంగా ఉంది" అని అనైస్ చెప్పారు.

‘ఇంకోసారి బాధితురాలిగా మారినట్టుంది’

మేరీ-హెలెన్ ఈ సుదీర్ఘ నిరీక్షణను "రెండోసారి బాధితురాలిగా మారడం"గా అభివర్ణించారు.

కేసులో జరుగుతున్న జాప్యం వల్ల తనకు జరిగిన విషయాన్ని భరించడం మరింత కష్టంగా మారిందని ఆమె తెలిపారు.

"మమ్మల్ని పూర్తిగా పట్టించుకుంటున్నారని మాకు అనిపించడం లేదు" అని మేరీ-హెలెన్ చెప్పారు.

మత్తుమందులు ప్రయోగించి లైంగిక దాడులకు పాల్పడే ఘటనలను అరికట్టడానికి ప్రభుత్వాలు, పోలీసులు, న్యాయవ్యవస్థ మరింత కృషి చేయాల్సిన అవసరం ఉందని యూఎన్ ఉమెన్‌కు చెందిన కల్లియోపి మింగైరో బీబీసీతో చెప్పారు.

ఈ కేసు నిర్వహణపై వచ్చిన విమర్శల గురించి ఫ్రెంచ్ పోలీసులు, న్యాయవ్యవస్థ, ప్రభుత్వం స్పందించాలని బీబీసీ కోరగా ఎలాంటి స్పందన రాలేదు.

చాలా కాలం పాటు మేరీ-హెలెన్ ఆ సంఘటన గురించి ఎవరితోనూ మాట్లాడలేదు. తర్వాత ఆమె సిగ్గుపడటం మానేశారు.

" నన్ను నేను దాచుకోవాల్సిన అవసరం లేదు. నేను బాధితురాలిని" అని ఆమె చెప్పారు.

నేను బహిరంగంగా మాట్లాడటం నాకు చాలా ముఖ్యం. ఎందుకంటే నా మాటల వల్ల కొంతమంది బాధితులు ఈ కథలో తమను తాము గుర్తుంచుకోవడానికి, తాము కూడా బాధితులమేనని గ్రహించి, ఫిర్యాదు చేయడానికి వీలు కలిగింది.

మనం జీవిస్తున్న ఈ సమాజంలో గొంతు విప్పడం చాలా అవసరం. లింగవివక్షతో కూడిన హింస, లైంగిక హింస గురించి మాట్లాడటం చాలా ముఖ్యం'' అని మేరీ హెలెన్ చెప్పారు.

( బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)