'విశ్వనాథ్ అండ్ సన్స్' రివ్యూ: సూర్య నటించిన ఫ్యామిలీ ఎంటర్‌టైనర్ ఎలా ఉందంటే..

విశ్వనాథ్ అండ్ సన్స్' రివ్యూ, సూర్య, మమిత

- రచయిత, జీఆర్ మహర్షి
- హోదా, బీబీసీ కోసం
ప్రచురణ 9 గంటలు క్రితం
చదివే సమయం: 4 నిమిషాలు

'కరుప్పు' (తెలుగులో 'వీరభద్రుడు') హిట్ తర్వాత కొన్ని నెలల గ్యాప్‌లోనే సూర్య సినిమా 'విశ్వనాథ్ అండ్ సన్స్' థియేటర్లలోకి వచ్చింది. ల‌క్కీభాస్క‌ర్ లాంటి ఫీల్ గుడ్ మూవీ తీసిన వెంకీ అట్లూరి ద‌ర్శ‌కుడు. ప్ర‌ముఖ సంస్థ సితార ఎంట‌ర్‌టైన్‌మెంట్స్ (నిర్మాత నాగ‌వంశీ) నిర్మించారు.

మ‌రి, ఈ మూవీ అంచనాల‌ను అందుకుందా?

కథ ఏమంటే, సంజయ్ విశ్వనాథ్ (సూర్య) ఒలింపిక్ స్థాయి పిస్టల్ షూటర్. బిలియనీర్ బిజినెస్‌మెన్‌గా ఉన్నా, 42 ఏళ్ల వయసు వచ్చినా పెళ్లి చేసుకోడు. తమ వంశం ఇంతటితో అంతమైపోతుందని తల్లి నిర్మల (రాధిక) బాధపడుతూ ఉంటుంది. తల్లిని విపరీతంగా ప్రేమించే సూర్య అమెరికా వెళ్లి అక్కడ వైద్యులను సంప్రదించి సరోగసీ ద్వారా బిడ్డను తీసుకొస్తాడు.

తల్లికి ఇది ఇష్టం లేకపోయినా బిడ్డ మీద ప్రేమతో అంగీకరిస్తుంది. అయితే, పసిబిడ్డకు బోన్ మ్యారో ట్రాన్స్‌ప్లాంటేషన్ అవసరమవుతుంది. తల్లి బోన్ మ్యారో అవసరం కావడంతో ఆమె కోసం సూర్య అమెరికా వెళ్తాడు.

మ్యాడీ (మమితా బైజు) అనే అల్లరి చిలిపి అమ్మాయి సరోగసీ మదర్. ఆమె ఈ పనికి ఎందుకు ఒప్పుకుంటుంది?

అలాగే, ఆపరేషన్ కోసం ఇండియా వచ్చిన మ్యాడీకి క్రమంగా బిడ్డపై ఇష్టంతో పాటు సూర్య వైపు ప్రేమగా మారుతుంది. చివరికి వాళ్లిద్దరూ ఒకటయ్యారా? లేదా? ఇవి తెలియాలంటే సినిమా చూడాల్సిందే.

ఫొటో క్యాప్షన్, బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

పాత కథే అయినా..

కథగా చూస్తే ఇదేం కొత్తది కాదు. ఎన్టీఆర్ 'రాము' (1966), భాగ్యరాజా 'ముందానై ముడిచ్చు' (1983), నాగార్జున 'సంతోషం' (2002).. ఇదే లైన్. పెళ్లి అయిన వ్యక్తిపై హీరోయిన్ ప్రేమ పెంచుకుంటుంది.

ఇక్కడ కొత్త పాయింట్ ఏమంటే హీరోకు పెళ్లి కాలేదు. చేసుకునే ఇష్టం కూడా లేదు. అందుకే సరోగసీ ద్వారా బిడ్డను తెచ్చుకుంటాడు. బిడ్డ తల్లి అతన్ని ఇష్టపడుతుంది.

Skip ఎక్కువమంది చదివినవి and continue reading

ఎక్కువమంది చదివినవి

End of ఎక్కువమంది చదివినవి

ఇలాంటి కథలని డీల్ చేయడం కష్టం. అయితే సూర్య, మమితా, రాధిక నటన సినిమాని నిలబెట్టాయి. దర్శకుడు వెంకీ అట్లూరి ఎక్కడా బ్యాలెన్స్ తప్పకుండా అతి డ్రామా లేకుండా, మంచి డైలాగులు, ఎమోషన్స్‌తో నడిపాడు.

క‌థ‌కు అవ‌స‌రం లేని సన్నివేశాలు

అయితే సమస్య ఏమంటే, మొదటి అరగంటలోనే సినిమా ఎలా ముగుస్తుందో మనకు అర్థమైపోతుంది. ప్రిడిక్టబుల్ కథని బిగువుగా నడపడంలో సెకెండాఫ్‌లో దర్శకుడు తడబడ్డాడనిపిస్తుంది. కథకు పూర్తిగా అవసరం లేని ఫైట్స్, సబ్‌ప్లాట్స్ అనవసరంగా వస్తాయి.

సూర్య అభిమానులు బాధపడతారేమో అన్నట్టు రెండు ఫైట్స్ పెట్టారు. అవి అతికించినట్టున్నాయి. పాటలు కూడా అంతే.

హీరో తండ్రి రెండో పెళ్లి కథ, చెల్లెలి పెళ్లి, నాజర్ ఎపిసోడ్ ఇవన్నీ కథలో ఇమడలేదు. చిన్న లైన్‌ను రెండు గంటల 40 నిమిషాలు సాగదీసినట్టు అక్కడక్కడా అనిపిస్తుంది.

హీరోను షూటింగ్‌లో గోల్డ్ మెడలిస్ట్‌గా చూపించడం కథకు ఎక్కడా ఉపయోగపడలేదు. లక్కీభాస్కర్‌లో కనిపించిన ఇంటెలిజెన్స్, స్క్రీన్ ప్లే ఈ సినిమాలో కనపడలేదు. పసిబిడ్డ ఆరోగ్యం చుట్టూ కథని తిప్పకుండా జాగ్రత్తపడటం మాత్రం దర్శకుడి ప్రతిభే.

Skip content and continue reading

End of content

ఎవరెలా చేశారు?

అయితే కొంత బోర్‌ను భరిస్తే ఇది క్లీన్ ఫ్యామిలీ ఎంటర్‌టైనర్. సూర్య, మమితా బైజు, రాధిక పోటీ పడి నటించారు. ఫస్టాఫ్‌లో హీరో డ్రైవర్ సీన్ ఎమోషనల్‌గా పండింది. డైలాగులు క్లుప్తంగా, అర్థవంతంగా ఉన్నాయి.

ఉదాహరణకి - "మన కలల కోసం దేన్నయినా త్యాగం చేయవచ్చు. దేని కోసం మన కలల్ని త్యాగం చేయకూడదు.

రవీనా టాండన్, సర్వదమన్ బెనర్జి, నాజర్ ఉన్నా వాళ్లకు పెద్దగా స్క్రీన్ స్పేస్ లేదు. వైవా హర్ష, ఆది ఉన్నా వాళ్లకు కామెడీ లేదు. ఉన్న కామెడీ అంతా సూర్య, మమితా, రాధిక మధ్యనే ఉంది.

జీవీ ప్రకాశ్‌కుమార్ బీజీఎం బావుంది. అయితే, పాటలు గుర్తు పెట్టుకునే విధంగా లేవు. కెమెరా బాగుంది. ఎడిటింగ్‌లో 20 నిమిషాలు కుదించి ఉంటే సినిమా ఇంకా షార్ప్‌గా ఉండేది. నిర్మాణం రిచ్‌గా ఉంది.