ټرمپ: له ایران سره خبرې روانې دي او له سخت اقدام مخکې وروستی فرصت ورکوو

ژوندی پوښښ

1. ۹ زمری ۱۴۰۵ - ۳۱ جولای ۲۰۲۶وروستی, کوېت وايي، هوايي حریم ته یې د ایران ننوتي ډرونونه له منځه وړي دي

   د کویت پوځ وايي چې نن سهار یې د ایران هغه ډرونونه ویشتلي او له منځه وړي دي چې د کوېت هوايي حریم ته ننوتلي وو.

   دغو ځواکونو پر اېکس خواله رسنۍ لیکلي چې د دغو بې‌پېلوټو غورځول کېدو مادي زیان اړولی خو په وینا یې، په پېښه کې "څوک وژل شوي یا ټپي شوي نه دي".

   د کوېت پوځ همداراز ویلي چې د "ایران د تېري" په ترڅ کې "څو مهم او نظامي تاسیسات په نښه شوي‌ دي".

   د ایران پوځ هم نن جمعه سهار په یوه خبرپاڼه کې ویلي وو چې په کوېت کې یې د امریکا پر (احمد الجابر) پوځي اډه د ډرون برید کړی دی.

   خو د کوېت پوځ په اعلامیه کې داسې څه نه دي یاد شوي.

2. ۹ زمری ۱۴۰۵ - ۳۱ جولای ۲۰۲۶وروستی, سپاه پاسداران وايي، له هرمز تنګي تېردونکې دوه بېړۍ یې ویشتلې دي

   د ایران انقلابي ګارد یا سپاه پاسداران ځواکونو ویلي چې نن جمعه یې هغه دوه تېل وړونکې بېړۍ ویشتلې دي چې په "سرغړونې" سره یې له هزمز تنګي د تېرېدو هڅه کوله.

   دغو ځواکونو په یوه خبرپاڼه کې ویلي چې دا دواړه بېړۍ د امریکايي پوځ "د هوايي ملاتړ په ترڅ کې له یوې ناامنه او ناقانونه لارې" له هرمز تنګي د تېرېدو په حال کې وې چې "وویشتل شوې".

   په اعلامیه کې راغلي چې "څلورو نورو بېړیو ژر خپله لار بدله کړه" او بېرته ستنې شوې.

   سپاه پاسداران ویلي، "د بېړیو او د بیمې ټول شرکتونه مو خبر کړي دي چې د سېنټکام په خبرو باور و نه کړي. [کنه نو] له هغو پوښتنه وکړئ چې تېروتلي/دوکه شوي او اوس له پېښې سره مخ شوي دي".

   د امریکا مرکزي قومندانۍ یا سېنټکام پرون دا رد کړه چې هرمز تنګي ته څېرمه د بېړیو د ازاد تګ‌راتګ لارې دې "ناامنه" وي. ویلي یې وو چې سوداګریزو بېړیو او د هغوی ملکي خدمې ته اصلي خطر د سپاه له امله ورپېښ دی.

   پر اېکس خواله رسنۍ د سپاه پاسداران سمندري ځواکونو ته منسوبې یوې پاڼې هغه عکسونه خپاره کړي چې څو بېړۍ پکې د سوځېدو په حال کې برېښي. له عکسونو سره یې په فارسۍ او انګرېزۍ لیکلي چې، "د سرغړونې انجام".

3. ۹ زمری ۱۴۰۵ - ۳۱ جولای ۲۰۲۶وروستی, برېتانیا: په قبرص کې یو سړی ایران ته د جاسوسۍ په شک نیول شوی

   د برېتانیا پولیسو نن جمعه ویلي چې په قبرص کې د برېتانیا او اذربایجان دوه‌ګونی تابعیت لرونکی سړی "د ایران سپاه پاسداران ته د جاسوسۍ په شک" نیول شوی دی.

   دوی ویلي چې پر دغه کس په قبرص کې د برېتانیا د هوايي ځواک په یوه اډه کې "ایران ته د جاسوسۍ شک" پورې شوی او ټاکل شوې چې برېتانیا ته ولېږدول شي.

   د رشاد سلطانوف په نوم دغه ۴۴ کلن سړی دوه اوونۍ مخکې د قبرص پولیسو نیولی. دی په دې اډه کې د لندن د ترهګرۍ ضد پولیسو د "ځينو پېښو د پلټنې" په پایله کې نیول شوی.

   د برېتانیا پولیسو په یوه اعلامیه کې راغلي، داسې ښکاري چې دغه سړي دا اډه چې یوه "ممنوعه/منع شوې سیمه" ده، تر خپل څار لاندې ساتله او "خپل معلومات یې [د ایران] سپاه پاسداران او یوه بهرني استخباراتي اژانس ته ورکول".

   پولیسو ویلي چې دا کس اوس برېتانیا ته د سپارل کېدو لپاره په توقیف کې دی.

   رشاد سلطانوف نومی دا سړی لومړی ځل یوه میاشت مخکې په قبرص کې ایران ته د جاسوسۍ او "په دغه هېواد پورې د تړلو ترهګریزو کړنو" په شک نیول شوی و.‌

   د یادولو ده چې د روان میلادي کال په مارچ میاشت کې د ایران او امریکا او اسرائيلو ترمنځ د جګړې پرمهال په قبرص کې د برېتانیا د شاهي‌ هوايي ځواکونو (اکروتېري) اډه پر یوه ایراني ډرون ویشتل شوې وه.

4. ۹ زمری ۱۴۰۵ - ۳۱ جولای ۲۰۲۶وروستی, پر غزې د اسرائيلو د تازه بریدونو خبر ورکړل شوی

   پر غزې د اسرائيلو د تازه هوايي بریدونو خبر ورکړل شوی. دا بمبار د امریکا ولسمشر ډونلډ ټرمپ له هغه اعلانه یوازې څو ساعته وروسته کېږي چې ویلي یې دي، حماس د بې‌وسلې کېدو هوکړه منلې او د همدې موافقې له مخې به اسرائيلي ځواکونه هم له غزې وځي.

   رويټرز اژانس په غزه کې د طبي کارکوونکو له خولې ویلي چې په دغو بریدونو کې څو فلسطینیان ژوبل شوي دي.

   په همدې حال کې الجزیره خبري شبکې د غزې ښار په شمال (الکرامه)‌ سیمه کې یوه جومات ته څېرمه د بمبار خبر ورکړی دی.‌

   د اسرائيلو دفاعي ځواکونو یا (ای‌ډي‌اېف) بي‌بي‌سي ته ویلي چې د پېښې پلټنه کوي او وروسته به معلومات شریک کړي.

   په غزه کې د حماس تر کنټرول لاندې د روغتیا وزارت ویلي چې په تېر اکتوبر میاشت کې د اسرائيل او حماس ترمنځ له اوربند راهیسې د اسرائيلو په بریدونو کې لږترلږه ۱۱۶۸ فلسطينیان وژل شوي دي. په همدې موده کې په غزه کې څلور اسرائيلي سرتېري هم وژل شوي دي.

5. ۹ زمری ۱۴۰۵ - ۳۱ جولای ۲۰۲۶وروستی, قاهره به "ډېر ژر د غزې سولې" په اړه د منځګړو د ناستې کوربه وي

   د مصر حکومت اړوند خبري رسنۍ (القاهره نیوز) نن جمعه سهار خبر ورکړی چې د دغه هېواد پلازمېنه قاهره به "ډېر ژر د غزې د سولې پلان" په اړه د منځګړو ترمنځ د یوې غونډې کوربه‌توب وکړي.

   د رسنۍ د خبر له مخې، مصر، امریکا، قطر او ترکیه د دغو منځګړو په ډله کې دي.

   القاهره نیوز د "مصر باخبره سرچینې" له خولې ویلي چې د دې غونډې موخه دا ده چې "ټولې ښکېلې خواوې د هوکړې د شرطونو د منلو ژمنه وکړي".

   دې رسنۍ د غونډې کره نېټه نه ده په ډاګه کړې.

   د مصر حکومت اړوند دا خبري رسنۍ داسې مهال دا خبر خپروي چې د حماس یوه لوړپوړي چارواکي بي‌بي‌سي ته منلې چې په غزه کې یې "په بشپړ ډول د بې‌وسلې کېدو پلان" منلی دی.

   خو اسرائیلو لا کوم غبرګون نه دی ورته ښکاره کړی.

   دې نه مخکې د امریکا ولسمشر ډونلډ ټرمپ ویلي وو چې د ''سولې پلاوي'' له لوري د غزې په تړاو داسې یوه هوکړه شوې چې له مخې به یې حماس او نورې وسله‌والې ډلې ''په بشپړه توګه بې وسلې'' شي.

6. ۹ زمری ۱۴۰۵ - ۳۱ جولای ۲۰۲۶وروستی, حماس په بشپړ ډول د بې‌وسلې کېدو هوکړه منلې خو اسرائیلو لا غبرګون نه دی ښودلی

   د حماس یوه لوړپوړي چارواکي بي‌بي‌سي ته ویلي چې دې ډلې په غزه کې په بشپړ ډول د بې‌وسلې کېدو پلان منلی او تمه ده چې ډېر ژر په دې اړه رسمي اعلامیه خپره شي.

   له دې لږ مخکې د امریکا ولسمشر ډونلډ ټرمپ ویلي چې د ''سولې پلاوي'' له لوري د غزې په تړاو داسې یوه هوکړه شوې چې له مخې به یې حماس او نورې وسله‌والې ډلې ''په بشپړه توګه بې وسلې'' شي.

   اسرائیل تر اوسه په دې هکله څه نه دي ویلي.

   بشپړ خبر دلته ولولئ:

7. ۹ زمری ۱۴۰۵ - ۳۱ جولای ۲۰۲۶وروستی, په عراق کې د سعودي او امریکا په برید کې د سپاه پاسداران د وژل شوو مړي ایران ته لېږدول شوي

   ایرانیو رسنیو په عراق کې د سعودي عربستان او امریکا په بریدونو کې د سپاه پاسدران د وژل شوو "پنځو غړو" د تابوتونو عکسونه خپاره کړي چې ایران ته لېږدول شوي دي.

   د ایران دولتي خبري اژانس ایرنا خبر ورکړی چې د انقلابي ګارد یا سپاه پاسداران د غړو مړي "د مهران پولې له لارې" ایران ته اړول شوي.

   په وروستیو څو ورځو کې د عراق له خاورې د سعودي عربستان د تېلو پر تاسیساتو د ډرون بریدونو په غچ کې امریکا او سعودي په ګډه هلته په ایران پورې تړلو ملېشو باندې بریدونه کړي دي.

   د ولسي خوځښت ځواکونو یا (پي‌اېم‌اېف)‌ چې د (الحشد الشعبي) په نوم هم یادېږي، ویلي چې د امریکا او سعودي عربستان په بریدونو کې یې لږترلږه ۲۰ غړي وژل شوي او ۳۲ نور ژوبل دي.‌

   د ایران له ملاتړه برخمنې دې شیعه ملېشې ویلي چې په دغو بریدونو کې د سپاه پاسداران "پنځه سلاکاران هم وژل شوي دي".

8. ۹ زمری ۱۴۰۵ - ۳۱ جولای ۲۰۲۶وروستی, له باب المندب تنګي ۲۵ بار وړونکې بېړۍ تېرې شوې دي

   د بار وړونکو بېړیو شرکت (کیپلر) وايي چې د پنجشنبې په ورځ ټولټال ۲۵ سوداګریزې بېړۍ له باب المندب تنګي تېرې شوې دي.

   دا په داسې حال کې ده چې له هرمز تنګي د تېرېدونکو بېړیو شمېر تر ټولو ټيټې کچې کې پاتې دی او په دې موده کې یوازې دوه تېل وړونکې بېړۍ پرې تېرې شوې دي.

   د رویټرز خبري اژانس د خبر له مخې، له باب المندب تنګي د تېرو ۲۵ بېړیو له ډلې یې ۱۸ بېړۍ راغلې او ۷ ترې تللې دي.

   د یادولو ده چې له هرمز تنګي تېرو دوو بېړیو کې بار نه و.

9. ۹ زمری ۱۴۰۵ - ۳۱ جولای ۲۰۲۶وروستی, د ایران پوځ وايي، په کویت کې یې د امریکا پر اډې د ډرون برید کړی

   د ایران پوځ د جمعې په سهار په یوه اعلامیه کې ویلي چې په کویت کې یې د امریکا پر یوه پوځي مرکز ډرون برید کړی دی.

   د پوځ په خبرپاڼه کې راغلي:

   ''د صاعقه عملیاتو په اووه ویشتم پړاو کې او زموږ پر هېواد د امریکا د ترهګر پوځ د وروستیو تېریو او د قشم ټاپو پر یوه استوګنیز کور د وحشیانه برید په ځواب کې، څو ساعته مخکې د کویت په احمد الجابر اډه کې د دې ماشوم وژونکي پوځ د جنګي الوتکو هنګرونه، د سپوږمکۍ مخابراتي سیسټمونه او د تجهیزاتو زېرمتونونه د پوځ د انهدامي ډرونونو له خوا په نښه شول.''

   د اعلامیې له مخې، ایران ادعا کوي چې احمد الجابر هوايي اډه یې د امریکا د هوايي او څارنیزو عملیاتو په ترسره کولو کې د هغې د رول له امله هدف ګرځولې ده.

   تر اوسه د دې ادعا شویو ډرون بریدونو په اړه نور جزییات نه دي خپاره شوي، او لا هم نه ده څرګنده چې د کویت په هوايي حریم کې له دغو ډرونونو سره څنګه چلند شوی یا د بریدونو پایله څه وه.

   کویتي او امریکایي چارواکو تر اوسه په رسمي ډول د دې ادعا په اړه غبرګون نه دی ښودلی.

10. ۹ زمری ۱۴۰۵ - ۳۱ جولای ۲۰۲۶قالیباف: امریکا به په قشم کې د ملکي خلکو وژنې تاوان پرې کړي

    د ایراني پارلمان رئیس او له امریکا سره د ایران لوړپوړي مذاکره کوونکي محمدباقر قالیباف د پنجشنبې سهار پر قشم ټاپو د امریکا بریدونو ته غبرګون کې ویلي چې امریکا هره ورځ په ''نوي جرم'' لاس پورې کوي.

    قالیباف پر اېکس پاڼه لیکلي:

    ''متحده ایالات هره ورځ خپل لاسونه په یوه نوي جرم ککړوي. د قشم ټاپو پر ملکي استوګنیزو کورونو ترهګریز برید د میناب او لامرد د جنایتونو دوام دی. امریکایان عادت لري هغه څپېړې چې د جګړې په ډګر کې یې خوري، د بې ګناه خلکو په وینو تویولو جبران کړي. هغوی به د دې کړنو بیه پرې کړي.''

    د پنجشنبې په سهار له قشم څخه ګڼ انځورونه او ویډیوګانې خپرې شوې چې پکې د ژغورنې ډلې هغه کسان را ایستل چې ویل کېدل د امریکا د هوايي بریدونو له امله تر نړېدلو ودانیو لاندې بند پاتې دي.

    وروسته سیمه‌ ییزو چارواکو اعلان وکړ چې په دغو بریدونو کې د یوې کورنۍ درې غړي وژل شوي دي.

    د هرمزګان د طبي علومو پوهنتون د معلوماتو له مخې، د قشم ښار د ''چاه‌ تنګو'' په سیمه کې پر یوه استوګنیز کور د برید په پایله کې د کورنۍ پلار، مور او یو دوه کلن ماشوم وژل شوي دي.

    د راپور له مخې، د همدې کورنۍ دوه نور ماشومان ټپیان شوي او د درملنې لپاره روغتون ته لېږدول شوي دي.

11. ۸ زمری ۱۴۰۵ - ۳۰ جولای ۲۰۲۶رویټرز: پر سعودي عرب د حوثیانو بریدونه د عراقي ډلو په همغږۍ ترسره شوي

    رویټرز خبري اژانس په یوه راپور کې وايي، د سعودي عرب او د هغه د ځینو سیمه ییزو شریکانو ارزونې ښيي، د یمن حوثیانو روانه اوونۍ پر سعودي عرب بریدونه د عراق له خاورې او د عراقي وسله والو ډلو په همغږۍ ترسره کړي دي. د راپور له مخې، دا چاره په سیمه کې د ایران پلوه ډلو ترمنځ د همغږۍ د زیاتېدو نښه ګڼل کېږي.

    دوو سیمه ییزو چارواکو رویټرز ته ویلي چې د دغو بریدونو یوه برخه، چې د سعودي عرب په ختیځ ولایت کې پر نفتي تاسیساتو بریدونه هم پکې شامل دي، د حوثیانو او عراقي وسله والو ډلو په ګډه او د سپاه پاسداران تر څارنې لاندې ترسره شوي دي.

    دغو ارزونو له هغو رسمي روایتونو سره توپیر ښودلی چې تر دې مخکې خپاره شوي وو.

    سعودي عرب او امریکا د چهارشنبې په ورځ په ګډو بریدونو کې په عراق کې هغه هدفونه په نښه کړل چې ریاض یې له وروستیو بریدونو سره تړلي بولي. سعودي چارواکو په رسمي ډول په عراق کې ایران پلوه وسله والې ډلې د دغو بریدونو مسوولې بللې دي، په داسې حال کې چې حوثیانو خپله د سعودي پر ضد د بریدونو مسوولیت منلی دی.

    د عراق حکومت ویلي چې دا موضوع تر څېړنې لاندې ده.

    بل خوا، ایران ته نږدې رسنیو د امریکا او سعودي له ګډو بریدونو وروسته راپور ورکړی چې د سپاه پاسداران یو شمېر غړي، عراقي وسله وال او لږ تر لږه یو حوثي غړی په دغو بریدونو کې وژل شوي دي.

    د چتم هاوس د منځني ختیځ او شمالي افریقا د پروګرام څېړونکي فرع المسلمي ویلي:

    ''اوس د تش په نوم مقاومت محور د غړو ترمنځ نه یوازې له ایران سره، بلکې له یو بل سره هم مستقیمه روزنه او همغږي موجوده ده.''

    شنونکي رویټرز ته ویلي چې په سوریه کې د بشار اسد له سقوط او په لبنان کې د حزب الله د نفوذ له کمېدو وروسته، عراق د ایران پلوه ډلو ترمنځ د اړیکو او همغږۍ په یوه مهم مرکز بدل شوی دی.

    د راپور له مخې، د سعودي عرب، ایران او عراق حکومتونو او دغه راز حوثیانو، د دې ارزونو په اړه د رویټرز د تبصرې غوښتنې ته ځواب نه دی ویلی.

    حوثیانو تر دې وړاندې ویلي وو چې پر سعودي عرب د دوی بریدونه په یمن کې د سعودي د پوځي اقداماتو په غبرګون او د هغه څه د ماتولو لپاره دي چې دوی یې ''محاصره'' بولي. خو سعودي عرب د داسې محاصرې شتون رد کړی دی.

12. ۸ زمری ۱۴۰۵ - ۳۰ جولای ۲۰۲۶سعودي عرب په باب المندب تنګي کې د بېړۍ چلونې خونديتوب لپاره ''سمندري دفاعي ائتلاف'' جوړ کړ

    سعودي عربستان د پنجشنبې په ورځ اعلان وکړ چې د باب المندب د ستراتیژیک تنګي په شاوخوا کې د سمندري تګ راتګ د امنیت د ټینګښت لپاره یې یو ''سمندري دفاعي ائتلاف'' جوړ کړی دی.

    دا اقدام وروسته له هغه ترسره کېږي چې د ایران ملاتړ لرونکو حوثي یاغیانو په یمن کې تېره اوونۍ اعلان وکړ چې پر سعودي عربستان، چې د نړۍ د نفتو له سترو صادرونکو هېوادونو دی، سمندري بندیز لګوي.

    حوثیانو دغه راز ادعا کړې چې په سره سمندرګي کې یې د سعودي د نفتو پر بېړیو او د دې هېواد پر نفتي زیربناوو بریدونه کړي دي.

    دې تنګې او مهمې سمندري لارې وروسته له هغه لا ډېر اهمیت وموند، چې د هرمز تنګي په سیمه کې د امریکا او ایران د کړکېچ له امله د خلیج د سیمې د انرژۍ صادرات تر ډېره اغېزمن شوي او نړیوالو بازارونو ته سعودي د خامو نفتو د لېږد یوه مهمه لاره ګرځېدلې ده.

    تفصیل په دې رپوټ کې لوستلای شئ.

13. ۸ زمری ۱۴۰۵ - ۳۰ جولای ۲۰۲۶وروستی, قطر پر اردن او کویت د ایران بریدونه وغندل

    قطر پر اردن او کویت د ایران تازه بریدونه په کلکه غندلي او دا یې د دواړو هېوادونو د حاکمیت او ځمکنۍ بشپړتیا ښکاره سرغړونه او همدارنګه د نړیوالو قوانینو او د ملګرو ملتونو د منشور خلاف عمل بللی دی.

    د قطر د بهرنیو چارو وزارت په یوه اعلامیه کې خبرداری ورکړی چې دغه بریدونه د سیمې د تاوتریخوالي د لا زیاتېدو خطر رامنځته کوي او د کړکېچ د مهار لپاره روانې دیپلوماتیکې هڅې کمزورې کوي.

    قطر د ټولو پوځي اقداماتو د سملاسي بندېدو او د خبرو اترو او مذاکراتو د بیا پیل غوښتنه کړې ده.

    د قطر په وینا: "د دغو بریدونو دوام د وضعیت د خطرناک کړکېچ لامل کېږي، د تاوتریخوالي د مهار هڅې لا پېچلې کوي او د سیمې د امنیت او ثبات لپاره سیاسي او دیپلوماتیکې هڅې کمزورې کوي."

14. ۸ زمری ۱۴۰۵ - ۳۰ جولای ۲۰۲۶وروستی, د (سینټکام) ویاند: د ایران د توغندیو او ډرون وړتیاوو د محدودولو لومړنیو اهدافو ته رسېدلي یو

    د امریکا د مرکزي قوماندانۍ (سینټکام) ویاند کپتان ټیم هاوکینز تېره شپه بي بي سي فارسي ته په مرکه کې وویل چې امریکا د ایران د توغندیو او بې‌پیلوټه الوتکو (ډرون) د وړتیاوو د محدودولو خپلو لومړنيو هدفونو ته رسېدلې ده.

    کپتان هاوکینز د مرکې پر مهال پر اردن د ایران د برید، په لامرد کې د امریکايي ځواکونو په عملیاتو کې د ځانګړو وسلو د کارولو او پر مناب د برید په اړه پوښتنو ته ځوابونه ورکړل.

    هغه وویل چې د امریکايي عملیاتو موخه د ایران د پوځي وړتیاوو، په ځانګړې توګه د توغندیو او ډرون پروګرام، کمزوري کول وو او په دې برخه کې لومړني اهداف ترلاسه شوي دي.

15. ۸ زمری ۱۴۰۵ - ۳۰ جولای ۲۰۲۶وروستی, سپاه د اردن په الازرق اډه کې د امریکا د درې اف-۳۵ جنګي الوتکو د ویجاړېدو ادعا وکړه

    سپاه پاسداران ادعا کړې چې د اردن پر الازرق هوايي اډه یې توغندیز برید کړی او د امریکا درې اف-۳۵ جنګي الوتکې یې "په بشپړ ډول ویجاړې" کړې او درې نورې الوتکې یې سختې زیانمنې کړې دي.

    تر اوسه دغه ادعا د امریکايي یا اردني چارواکو او خپلواکو سرچینو له خوا نه ده تایید شوې.

    د سپاه د عامه اړیکو ادارې ویلي چې دغه برید د امریکا هغو هوايي بریدونو ته ځواب و چې د قشم ټاپو پر دوو استوګنیزو کورونو ترسره شوي وو. سپاه ادعا کړې چې په دغو بریدونو کې د یوې کورنۍ درې غړي، چې یو یې ماشوم و، وژل شوي او دوه نور ماشومان ټپیان شوي دي.

    سپاه همدارنګه ادعا کړې چې د الازرق اډه کې د جنګي الوتکو د ځای پر ځای کېدو او ترمیم پر مرکز د برید پر مهال یو شمېر امریکايي افسران او تخنیکي کارکوونکي وژل شوي، خو د مړو کره شمېر یې نه دی ښودلی.

    د اردن پوځ تر دې مخکې ویلي وو چې د دغه هېواد دفاعي سیستمونو له ایرانه توغول شوي پنځه توغندي تعقیب او له منځه وړي دي او په دې برید کې هېڅ مرګ‌ژوبله نه ده اوښتې.

    امریکا تر اوسه د اف-۳۵ الوتکو د ویجاړېدو یا په دې برید کې د خپلو ځواکونو د مرګ‌ژوبلې په اړه کوم راپور نه دی خپور کړی.

16. ۸ زمری ۱۴۰۵ - ۳۰ جولای ۲۰۲۶وروستی, د زنجان سپاه: د امریکا په توغندیزو بریدونو کې درې پاسداران وژل شوي

    د زنجان ولایت سپاه پاسداران په یوه خبرپاڼه کې اعلان کړی چې د نن سهار په توغندیزو بریدونو کې د دې ځواکونو درې غړي وژل شوي دي.

    د تسنیم خبري اژانس د راپور له مخې، د سپاه انصارالمهدي د عامه اړیکو ادارې د دغو کسانو نومونه هم اعلان کړي او ویلي یې دي چې هغوی "د هېواد او خاورې په دفاع کې" وژل شوي دي، خو د هغوی د وژل کېدو د ځای او دندو په اړه یې جزییات نه دي ورکړي.

    د امریکا مرکزي قوماندانۍ اعلان کړی چې د پنجشنبې په سهار یې د ایران له خوا په اردن کې پر امریکايي ځواکونو د تېرې ورځې د توغندیزو بریدونو په ځواب کې بریدونه ترسره کړي دي.

    د سینټکام د خبرپاڼې له مخې، په دغو بریدونو کې په ایران کې د سپاه پاسداران اړوند هدفونه په نښه شوي، چې پکې پوځي قوماندې مرکزونه، د توغندیو او ډرون تاسیسات، د څارنې او ساحلي دفاع مرکزونه او سمندري وړتیاوې شاملې دي.

17. ۸ زمری ۱۴۰۵ - ۳۰ جولای ۲۰۲۶وروستی, د ایران په قشم ټابو کې چاودنې

    د پنجشنبې په ورځ (د جولای ۳۰مه) شپه کې د قشم ټاپو اسمان وروسته له هغه چې د امریکا پوځ اعلان وکړ چې پر ایران یې بریدونه کړي، د یوې چاودنې له امله روښانه شو.

    د ویډیو نېټه د قشم ټاپو د برید په اړه د رسمي او رسنیزو راپورونو له مخې تایید شوې ده.

    د تسنیم خبري اژانس د پنجشنبې په ورځ ویلي چې په قشم کې چاودنې اورېدل شوې او یو استوګنیز ځای د توغندي له امله زیانمن شوی دی. تر جولای ۳۰مې مخکې د دې ویډیو کومه پخوانۍ نسخه نه ده موندل شوې.

    د امریکا مرکزي قوماندانۍ (CENTCOM) په اېکس کې وروستي بریدونه "په منځني ختیځ کې پر مېشتو امریکايي ځواکونو د پرونیو ایراني بریدونو د هڅې په وړاندې پیاوړی ځواب" بللي دي.

    د راپور له مخې، د ایران جګړه د ۲۰۲۶ کال د فبرورۍ په ۲۸مه هغه مهال پیل شوه چې امریکا او اسرائیلو پر ایران بریدونه وکړل او تهران په ځواب کې پر اسرائیلو او هغو خلیجي هېوادونو بریدونه وکړل چې امریکايي اډې پکې شته.

18. ۸ زمری ۱۴۰۵ - ۳۰ جولای ۲۰۲۶وروستی, پاکستان بیا د امریکا او ایران ترمنځ تړون ته د ستنولو هڅه کوي

    پاکستان وايي چې د امریکا او ایران ترمنځ د وضعیت د عادي کولو لپاره خبرې روانې دي او اسلام‌اباد په پوره هڅه کې دی چې دواړه لوري بېرته د اسلام‌اباد تړون ته راستانه کړي.

    د پنجشنبې په ورځ په اسلام‌اباد کې د اونیزې خبري غونډې پر مهال د پاکستان د بهرنیو چارو وزارت ویاند طاهر اندرابي وویل، که څه هم په تېرو څو ورځو کې وضعیت نسبتاً ارام و، خو د سیمې امنیتي حالت لا هم نازک دی.

    هغه وویل: "دې نسبي ارامۍ دا هیله پیدا کړې وه چې دا مثبت پرمختګ به په یوه دوامدار او بشپړ درناوي وړ اوربند ته واوړي او د خبرو اترو لاره به هواره کړي".

    طاهر اندرابي زیاته کړه چې د روان تاوتریخوالي په منځ کې پاکستان بیا ټینګار کوي چې خبرې اترې او دیپلوماسي د پرمختګ یوازېنۍ عملي لار ده.

    هغه وویل: "موږ د هغو ټولو هڅو هرکلی کوو چې د ایران او امریکا ترمنځ د جګړې د پای ته رسولو او د خبرو د بېرته پیلولو لپاره کېږي".

    د پاکستان د بهرنیو چارو وزارت ویاند وویل چې پاکستان په دې برخه کې فعال دی او خپل رول ته به دوام ورکړي.

    هغه وویل چې د دواړو لورو ترمنځ د وضعیت د عادي کولو، په ځانګړې توګه د هرمز تنګي د وضعیت د ښه کولو او د تاوتریخوالي د کمولو په اړه خبرې روانې دي.

    اندرابي زیاته کړه: "موږ په پوره هڅه کې یو چې دواړه لوري بېرته د اسلام‌اباد د تفاهم یادداشت ته راوګرځوو، څو د اسلام‌اباد تړون او د پاکستان ـ قطر د ګډې اعلامیې د روحیې له مخې ټول خنډونه او اختلافي موضوعات حل شي".

    هغه له دواړو لورو وغوښتل چې اعظمي زغم وښيي او د اسلام‌اباد د تفاهم یادداشت د عملي کولو لپاره د تخنیکي کچې د خبرو د بیا پیلولو پر ژمنتیا ټینګ پاتې شي.

19. ۸ زمری ۱۴۰۵ - ۳۰ جولای ۲۰۲۶وروستی, د مصر حکومت: د امریکا د ګازو وړونکې بېړۍ د دمیاط بندر کې د ډرون هدف ګرځېدلې

    د مصر حکومت د پنجشنبې په ورځ اعلان وکړ چې د دمیاط بندر کې د تېرې ورځې اورلګېدنه د ډرون برید له امله رامنځته شوې وه.

    دا د امریکا او ایران ترمنځ د وروستۍ جګړې له پیل راهیسې لومړی برید دی چې د مصر خاوره یې په نښه کړې ده.

    مصري چارواکو تر دې مخکې ویلي وو چې د چهارشنبې ورځې د اورلګېدنې له امله د ګازو دوه وړونکې بېړۍ زیانمنې شوې دي.

    د سمندري سوداګرۍ د څارنې شرکت کپلر هم ویلي چې دې پېښې د مایع طبیعي ګاز د وارداتو د یوه مهم ترمینل فعالیتونه ګډوډ کړي دي.

    تر اوسه روښانه نه ده چې د دغه برید مسؤل څوک دی. دا پېښه لږ وروسته له هغه رامنځته شوه چې ایران په اردن کې د امریکايي ځواکونو پر ضد توغندیز برید وکړ او امریکا او سعودي عربستان هم په عراق کې د ایران ملاتړو وسله‌والو ډلو پر ضد بریدونه وکړل.

    د پنجشنبې په ورځ رویټرز د دغو بېړیو په اړه معلومات خپاره کړل.

    د چهارشنبې په ورځ د بریتانیا سمندري امنیتي شرکت 'مبري' ویلي وو چې د لومړنیو ارزونو له مخې، یوه ډرون د مصر په دمیاط بندر کې د یوې امریکايي کمپنۍ اړوند د ګازو ذخیره کوونکې بېړۍ سره ټکر کړی دی.

    رویټرز ویلي چې دا پېښه ښايي په منځني ختیځ کې د شخړو د پراخېدو نښه وي.

    د بندري خدمتونو شرکت 'انچکېپ' هم په جلا خبر کې ویلي چې د مصر د دمیاط بندر کې د ګازو دوو وړونکو بېړیو اور اخیستی دی.

    رویټرز د درېیو سوداګریزو سرچینو له قوله راپور ورکړی چې ډرون د 'انرګوس وینټر' په نوم بېړۍ لګېدلی او د اورلګېدو سبب شوی، چې وروسته اور بلې بېړۍ 'ګازلګ سلیم' ته هم خپور شوی دی. رویټرز ویلي چې دوو نورو امنیتي سرچینو هم احتمال ښودلی چې د ډرون برید د اورلګېدنې لامل و.

    رویټرز ویلي چې د انځورونو د ارزونې له لارې یې د دغو بېړیو ځانګړتیاوې معلومې کړې دي.

    د رویټرز د راپور له مخې، 'انرګوس وینټر' یوه داسې بېړۍ ده چې د مایع طبیعي ګاز د ذخیره کولو او بېرته ګاز ته د اړولو (FSRU) وړتیا لري او د امریکايي شرکت 'انرګوس انفراسټرکچر' ملکیت دی.

    د چهارشنبې په ورځ د مصر د تېلو وزارت په یوه بیان کې ویلي وو چې د دمیاط بندر کې د ګازو د ذخیره کولو او بدلون یوه بېړۍ او یوه د ذخیرې بېړۍ کې اور لګېدلی و، چې د بېړنیو اقداماتو له لارې د اور وژونکو او امنیتي ډلو په وسیله کنټرول شو.

    وزارت زیاته کړې چې د مصر د تېلو وزیر کریم بدوي د ژغورنې عملیاتو او د پېښې د کنټرول د څارنې لپاره سیمې ته تللی و.

    همدارنګه ویل شوي چې په دې اورلګېدنه کې هېڅوک نه دي وژل شوي او نه ټپیان شوي او تخنیکي او ژغورونکې ډلې لا هم د پېښې د ارزونې او د زیانونو د معلومولو لپاره کار کوي.

20. ۸ زمری ۱۴۰۵ - ۳۰ جولای ۲۰۲۶وروستی, ملګرو ملتونو د ایران-امریکا ترمنځ پر تازه نښتو اندېښنه ښودلې

    د ملګرو ملتونو د سرمنشي انتونیو ګوترېش ویاند له امریکا او ایرانه وغوښتل چې جګړه پای ته ورسوي او د دیپلوماسۍ لارې ته بېرته وګرځي.

    فرحان حق په نیویارک کې خبریالانو ته وویل:"سرمنشي له څه مودې راهیسې اندېښمن و چې که دواړه لوري د خبرو مېز ته بېرته ستانه نه شي، د شخړې لمن به پراخه شي او داسې ښکاري چې په وروستیو ساعتونو کې همدا کار روان دی."

    د هغه په وینا: "دا پرمختګونه مثبت نه دي او د ملګرو ملتونو سرمنشي غواړي ډاډ ترلاسه کړي چې دواړه لوري کولی شي شخړه ودروي او یو ځل بیا دیپلوماتیکو هڅو ته مخه کړي."

    د ملګرو ملتونو د سرمنشي ویاند زیاته کړه: "د پاکستان، قطر او نورو منځګړو هېوادونو هڅې روانې دي".