IPL 2021: फिनिशर धोनी अवतरला, सीएसके नवव्यांदा अंतिम फेरीत
फोटो स्रोत, Robert Cianflone
सातत्यासाठी प्रसिद्ध चेन्नई सुपर किंग्सने 2021 आयपीएल हंगामात दिल्ली कॅपिटल्सला नमवत दिमाखात अंतिम फेरी गाठली.
ऋतुराज गायकवाड, रॉबिन उथप्पा आणि कॅप्टन कुल महेंद्रसिंग धोनी या विजयाचे शिल्पकार ठरले. दडपणाच्या क्षणी सामना जिंकून देणारा लाडका माही परतला अशी भावना क्रिकेट रसिकांमध्ये पाहायला मिळाली.
'आणि राजा परतला, धोनी ग्रेटेस्ट फिनिशर आहे. धोनीची खेळी पाहून मी खुर्चीतून उडी मारायचाच बाकी होतो', असं ट्वीट भारतीय संघाचा कर्णधार विराट कोहलीनं केलं आहे.
दिल्ली कॅपिटल्सने प्रथम फलंदाजी करताना 172 धावांची मजल मारली. पृथ्वी शॉ याने 34 चेंडूत 60 धावांची खेळी केली.
कर्णधार ऋषभ पंतने 35 चेंडूत 51 तर शिमोरन हेटमायरने 24 चेंडूत 37 धावांची खेळी करत संघाला सन्मानजनक धावसंख्या उभारून दिली.
फोटो स्रोत, BCCI/IPL
प्रत्युत्तरादाखल खेळताना ऋतुराज गायकवाड (70) आणि रॉबिन उथप्पा (63) यांनी चेन्नईच्या विजयाचा पाया रचला. या दोघांनी दुसऱ्या विकेटसाठी 110 धावांची भागीदारी केली.
हे दोघे बाद झाल्यानंतर चेन्नईची घसरण झाली. मात्र थरारक खेळीच्या बळावर सामने जिंकून देणाऱ्या धोनीने 6 चेंडूत नाबाद 18 धावांची खेळी करत संघाच्या विजयावर शिक्कामोर्तब केलं.
धोनीने 300 च्या स्ट्राईक रेटने म्हणजेच 6 चेंडूत 18 धावा केल्या. या खेळीत 3 चौकार आणि एका षटकाराचा समावेश आहे.
फोटो स्रोत, Getty Images
धोनी खेळायला उतरला तेव्हा चेन्नईची स्थिती डळमळीत झाली होती. चेन्नईला 12 चेंडूत 24 धावा हव्या होत्या. याआधी अनेकदा अशा परिस्थितीतून मॅच काढून देणाऱ्या धोनीने चाहत्यांना अनोखी भेट दिली.
ऋतुराजला मॅन ऑफ द मॅच पुरस्काराने गौरवण्यात आलं. ऋतुराजने विजयी खेळीदरम्यान हंगामात 600 धावांचा टप्पाही ओलांडला.
चेन्नईने बारा हंगामात खेळताना नवव्यांदा आयपीएल स्पर्धेची अंतिम फेरी गाठली आहे. चेन्नईच्या नावावर तीन जेतेपदं आहेत. गेल्या वर्षी चेन्नईचा संघ प्लेऑफसाठी पात्र ठरू शकला नव्हता. 2010, 2011 आणि 2018 मध्ये चेन्नईने जेतेपदार नाव कोरलं होतं.
हे वाचलंत का?
या लेखात सोशल मीडियावरील वेबसाईट्सवरचा मजकुराचा समावेश आहे. कुठलाही मजकूर अपलोड करण्यापूर्वी आम्ही तुमची परवानगी विचारतो. कारण संबंधित वेबसाईट कुकीज तसंच अन्य तंत्रज्ञान वापरतं. तुम्ही स्वीकारण्यापूर्वी सोशल मीडिया वेबसाईट्सची कुकीज तसंच गोपनीयतेसंदर्भातील धोरण वाचू शकता. हा मजकूर पाहण्यासाठी 'स्वीकारा आणि पुढे सुरू ठेवा'.
YouTube पोस्ट समाप्त
(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.
बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.
'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)
