GTA 6: 13 वर्षांच्या प्रतीक्षेनंतर आलेल्या या गेमची भारतासह जगभरात एवढी क्रेझ का?

GTA 6: भारतासह जगभरात या गेमची एवढी क्रेझ का? 13 वर्षांच्या प्रतीक्षेनंतर आलेल्या गेमला 'मास्टरपीस' म्हटलं जातंय
    • Author, दुष्यंत कुमार
    • Role, बीबीसी प्रतिनिधी
  • Published
  • वाचन वेळ: 6 मिनिटे

ग्रँड थेफ्ट ऑटो 6 (GTA 6) हा लोकप्रिय व्हीडिओ गेम जगातील अनेक भागांत नुकताच रिलीज झाला आहे. यासोबतच या गेमच्या नव्या भागाची तब्बल 13 वर्षांपासून सुरू असलेली प्रतीक्षा संपली असून चाहत्यांमध्ये याबाबती मोठी उत्सुकता पाहायला मिळतेय.

वेगवेगळ्या टाइम झोननुसार मध्यरात्र होताच हा गेम टप्प्याटप्प्यानं रिलीज केला जात असून जगभरातील अनेक लोकांनी गेम खेळायलाही सुरुवात केली आहे.

भारतातही GTA 6 हा गेम आज गुरुवारी (19 नोव्हेंबर) रिलीज होत आहे.

या गेममध्ये खेळाडूंना लिओनिडा नावाच्या काल्पनिक अमेरिकन राज्यात फिरण्याची आणि तेथील जगाचा अनुभव घेण्याची संधी मिळणार आहे. थ्रीडी तंत्रज्ञानावर आधारित या गेमच्या नव्या आवृत्तीमध्ये पहिल्यांदाच या सिरीजमधील पहिल्या महिला पात्राचा समावेश करण्यात आला आहे.

13 वर्षांची प्रतीक्षा, विक्रमी व्ह्यूज मिळवणारे ट्रेलर आणि अनेकदा पुढे ढकलण्यात आलेली रिलीजची तारीख या सगळ्यानंतर समीक्षकांनी वर्षातील सर्वांत मोठ्या प्रश्नांपैकी एका प्रश्नाचे उत्तर दिले आहे. हे उत्तर नेमके काय आहे, ते आपण पुढे जाणून घेऊया.

GTA 6 काय आहे आणि 13 वर्षांनंतर नवीन ग्रँड थेफ्ट ऑटो सिरीजबद्दल एवढी चर्चा का सुरू आहे?

एखाद्या चित्रपटाच्या पुढील भागासाठी 13 वर्षे वाट पाहणं ही मोठी गोष्ट वाटू शकते.

मात्र, GTA 6 ची क्रेझ इतकी आहे की, हा गेम खेळण्यासाठी अनेकजण ऑफिसमधून सुट्ट्यादेखील घेत आहेत. तर काही जण मध्यरात्री जागून गेम खेळत आहेत.

हा गेम रॉकस्टार गेम्स या कंपनीने तयार केला आहे. रॉकस्टार गेम्स ही अमेरिकेतील व्हीडिओ गेम तयार करणारी कंपनी आहे. 'ग्रँड थेफ्ट ऑटो' आणि 'रेड डेड रिडेम्प्शन' यांसारख्या लोकप्रिय गेम सिरीजसाठी ही कंपनी ओळखली जाते.

GTA 6 बद्दल समीक्षक काय म्हणतात?

Skip podcast promotion and continue reading
BBC News मराठी आत्ताच फॉलो करा WhatsApp कर
बीबीसी न्यूज मराठी आता व्हॉट्सॲपवर

तुमच्या कामाच्या गोष्टी आणि बातम्या आता थेट तुमच्या फोनवर

फॉलो करा

End of podcast promotion

आतापर्यंत सर्वाधिक प्रतीक्षा केल्या गेलेल्या गेम्सपैकी एक मानल्या जाणाऱ्या GTA 6 ने लोकांच्या अपेक्षा पूर्ण केल्या आहेत का?

सुरूवातीच्या समीक्षणांनुसार, याचे उत्तर ठामपणे 'हो' असे आहे.

वेगवेगळ्या समीक्षकांची मते एकत्रितपणे मांडणाऱ्या मेटाक्रिटिक या वेबसाइटने या गेमला 100 पैकी सरासरी 99 गुण दिले आहेत. हा ओपन-वर्ल्ड ॲक्शन गेम महत्त्वाकांक्षी असून गेमिंग क्षेत्रात नवीन मापदंड निर्माण करणारा असल्याचं मत जवळपास सर्वच समीक्षकांनी नोंदवलं आहे.

त्यांच्या मते, या गेमसाठी केलेली प्रतीक्षा खरोखरच सार्थ ठरली आहे.

मात्र, प्रत्येकजण या कौतुकाशी सहमत नाही. ऑनलाइन फोरमवर काही जणांनी या गेमबद्दल दाखवल्या जाणाऱ्या अवाजवी उत्साहावर आक्षेप घेतला आहे. एका युजरने याला 'चाहत्यांनी केलेला अतिउत्साही प्रचार' असं म्हटलं आहे.

तरीही समीक्षकांनी या गेमचं भरभरून कौतुक केलं आहे, यात शंका नाही. गेमिंग वेबसाइट आयजीएनने (IGN) GTA 6 ला अभूतपूर्व आणि अविश्वसनीय म्हटलं आहे.

तर हा गेम तयार करणाऱ्या रॉकस्टारने ग्राफिक्स आणि कथानकाच्या बाबतीत 'पुन्हा एकदा व्हीडिओ गेमच्या मर्यादा विस्तारल्या आहेत', असं मत युरोगेमरने या गेमला फाईव्ह-स्टार रेटिंग देताना व्यक्त केलं.

समीक्षक युसूफ कोल यांच्या मते, GTA 6 त्याच्या अविस्मरणीय कार अपघात आणि दरोड्यांच्या पलीकडे गेला आहे. त्यामुळे या गेममध्ये प्रत्येक कृतीचे परिणामही पाहायला मिळतात.

मात्र, त्यांनी या गेमचं कौतुकही केलं आहे. ते म्हणाले, "गेममधील माझ्या सर्वात आवडत्या क्षणांपैकी काही क्षण ते आहेत, जेव्हा पोलीस गाड्या माझा पाठलाग करत असतात आणि मी वेगाने रस्त्यांवरून गाडी चालवत असतो."

GTA 6 हा गेम भारतात गुरुवारी 19 नोव्हेंबररोजी रिलीज होत आहे.
फोटो कॅप्शन, GTA 6 हा गेम भारतात गुरुवारी 19 नोव्हेंबररोजी रिलीज होत आहे.

या गेमच्या ग्राफिक्सबद्दल मोठ्या अपेक्षा होत्या आणि आतापर्यंत समीक्षकांनी त्याबाबत निराशा व्यक्त केलेली नाही. 'द गार्डियन'ने गेमची पार्श्वभूमी असलेल्या लिओनिडाचे वर्णन इतके जिवंत असे केले आहे की, 'काही वेळा त्यावर विश्वास ठेवणेही कठीण होते.'

गेममधील मुख्य पात्रं जेसन आणि लुसिया यांच्यातील नात्यानेही समीक्षकांना आश्चर्यचकित केले आहे. गार्डियनच्या कीझा मॅकडोनाल्ड यांनी लिहिलं की, "ही पात्रं तुमच्या इच्छेनुसार वागणाऱ्या पात्रांसारखी वाटत नाहीत, तर खऱ्याखुऱ्या माणसांसारखी वाटतात."

ब्लूमबर्गनंही GTA 6 ला पाच स्टारचे रेटिंग देत याला 'मास्टरपीस' म्हटलं आहे.

रॉकस्टारने अद्याप हा गेम तयार करण्यासाठी झालेल्या खर्चाची माहिती जाहीर केलेली नाही. मात्र, काही अंदाजांनुसार हा गेम तयार करण्यासाठी एक अब्ज अमेरिकी डॉलरपेक्षाही अधिक खर्च आला असावा.

गेमिंग पत्रकार जॉर्डन मिडलर यांनी हा गेम आतापर्यंत जवळपास 100 तास खेळला आहे. तरीही या गेममध्ये अजूनही अनेक गोष्टी आजमावून पाहायच्या बाकी असल्याचे त्यांचे म्हणणे आहे.

ते म्हणाले, "याआधीच्या GTA गेममध्ये महिलांना ज्या पद्धतीने दाखवण्यात आले होते, त्यातून पुरुषप्रधान विचारसरणी दिसून येत होती. लुसियाचा समावेश करणे आणि तिला केवळ नावापुरते पात्र न ठेवता कथानकात तिला एक नैसर्गिक स्थान देणे, ही मोठी गोष्ट आहे. ती लवकरच चाहत्यांची आवडती बनेल, यात शंका नाही."

गेमिंग क्षेत्रातील सर्वाधिक पाहिला जाणारा कार्यक्रम 'द गेम अवॉर्ड्स'ने मंगळवारी (17 नोव्हेंबर) 2026 मधील पुरस्कारांसाठीची नामांकनं जाहीर केली. त्यावेळी GTA 6 रिलीज झाला नसतानाही त्याला सर्वाधिक नामांकनं मिळाली होती.

या गेमला आठ पुरस्कारांसाठी नामांकन मिळाले आहे. त्यामध्ये 'गेम ऑफ द इयर' आणि 'सर्वोत्कृष्ट संगीत' या पुरस्कारांचाही समावेश आहे.

भारतात GTA 6 कधी आणि कसा खेळता येणार?

भारतात 19 नोव्हेंबरच्या मध्यरात्री 12 वाजल्यापासून GTA 6 खेळता येणार आहे. रॉकस्टारच्या माहितीनुसार, प्रत्येक देशात तेथील स्थानिक वेळेनुसार हा गेम उपलब्ध होईल.

प्लेस्टेशन 5 आणि एक्सबॉक्स सीरिज एक्स किंवा एस हे व्हीडिओ गेम खेळण्यासाठी वापरले जाणारे कन्सोल आहेत. ही स्वतंत्र उपकरणं असून टीव्ही किंवा मॉनिटरला जोडून त्यावर हँडहेड म्हणजेच हातात धरून वापरल्या जाणाऱ्या कंट्रोलरच्या मदतीने गेम खेळता येतात. GTA 6 खेळण्यासाठी यापैकी एक कन्सोल असणं आवश्यक आहे.

भारतातील प्लेस्टेशन आणि एक्सबॉक्स स्टोअरवर या गेमच्या स्टँडर्ड एडिशनची किंमत 5,999 रुपये, तर अल्टिमेट एडिशनची किंमत 7,499 रुपये आहे.

स्टँडर्ड एडिशनमध्ये गेममध्ये संपूर्ण मुख्य कथेचा समावेश आहे. तर अल्टिमेट एडिशनमध्ये अतिरिक्त वाहनं, शस्त्रे, कपडे आणि इतर डिजिटल गोष्टींचा समावेश आहे. जर तुम्हाला फक्त गेमचे कथानक खेळायचे असेल, तर स्टँडर्ड एडिशनही पुरेसे आहे.

तसेच, तुमच्याकडे GTA 6 चालवू शकणारे कन्सोल नसेल, तर तुम्हाला तो खरेदी करावा लागेल. उदाहरणार्थ, प्लेस्टेशन 5 डिजिटल एडिशनची किंमत 64,990 रुपये आहे. त्यात गेमचे 5,999 टाकल्यास एकूण खर्च 70,989 रुपये इतका होतो. मात्र, हा खर्च टीव्ही किंवा मॉनिटर आणि इंटरनेटचा खर्च वगळून आहे.

भारतात 19 नोव्हेंबरच्या मध्यरात्री 12 वाजल्यापासून GTA 6 खेळता येणार आहे.
फोटो कॅप्शन, भारतात 19 नोव्हेंबरच्या मध्यरात्री 12 वाजल्यापासून GTA 6 खेळता येणार आहे.

यासह गेम डाउनलोड करण्यासाठी कन्सोलच्या प्रकारानुसार 212 जीबीपर्यंतचा स्टोरेज उपलब्ध असावा लागतो. हा गेम 18 वर्षे आणि त्यापुढील वयोगटातील लोकांसाठी आहे. यामध्ये हिंसा, अमली पदार्थ, लैंगिक आशय आणि नग्नतेशी संबंधित दृश्यं असल्याचा इशाराही देण्यात आला आहे.

मात्र, सध्या उपलब्ध असलेल्या भाषांच्या यादीत हिंदीचा समावेश नाही.

GTA 6 च्या पहिल्या अधिकृत ट्रेलरला डिसेंबर 2023 मध्ये रिलीज झाल्यानंतर पहिल्या 24 तासांतच यूट्यूबवर 9.3 कोटींपेक्षा अधिक व्ह्यूज मिळाले होते. तर, मे 2025 मध्ये रिलीज झालेल्या दुसऱ्या ट्रेलरला विविध प्लॅटफॉर्मवर पहिल्या 24 तासांत 47.5 कोटींपेक्षा अधिक व्ह्यूज मिळाले.

GTA 6 च्या ट्रेलरमुळे निर्माण झालेली उत्सुकता गेमच्या विस्तारित प्रीव्ह्यूमध्येही दिसून आली. 27 ऑगस्ट 2026 रोजी हा प्रीव्ह्यू सर्वप्रथम नेटफ्लिक्सवर दाखवण्यात आली होती. 'ॲम्पिअर ॲनालिसिस'च्या 10 सप्टेंबरच्या अहवालानुसार, या प्रीव्ह्यूमुळे त्याच दिवशी अमेरिकेत एक लाखांहून अधिक लोकांनी नेटफ्लिक्ससाठी साइन अप केले होते.

गेमिंग बाजारावर लक्ष ठेवणाऱ्या न्यूझू या आणखी एका कंपनीच्या अंदाजानुसार, रिलीजच्या पहिल्या आठवड्यात GTA 6 ची विक्री 3.25 अब्ज ते 5.2 अब्ज डॉलरपर्यंत पोहोचू शकते.

GTA चा प्रवास नेमका कुठून सुरू झाला?

पहिला GTA गेम 1997 साली लॉन्च करण्यात आला. त्यावेळचा गेम आजच्या GTA पेक्षा पूर्णपणे वेगळा होता. या गेममध्ये खेळाडूला वरून दिसणाऱ्या पिक्सेलच्या स्वरूपातील जगात गाड्या चोराव्या लागायच्या तसेच गुन्हेगारी टोळ्यांसाठी काम करावे लागत असे. कालांतराने या गेममधील दृश्ये, कथानक आणि संपूर्ण जग अधिकाधिक तपशीलवार होत गेले.

या गेम सिरीजची सुरुवात अमेरिकेत नव्हे, तर स्कॉटलंडमधील डंडी शहरातील एका छोट्या गेम स्टुडिओमध्ये झाली होती. बीबीसीच्या 'द ग्लोबल स्टोरी' या कार्यक्रमात 13 नोव्हेंबर 2026 रोजी GTA च्या याच प्रवासावर एक विशेष भाग प्रसारित करण्यात आला होता.

पुढील गेममध्ये लिबर्टी सिटी, व्हाइस सिटी आणि लॉस सॅंटोस यांसारखी काल्पनिक अमेरिकी शहरं एका विशाल खुल्या जगाच्या स्वरूपात दाखवण्यात आली.

पहिला GTA गेम 1997 साली लॉन्च करण्यात आला.
फोटो कॅप्शन, पहिला GTA गेम 1997 साली लॉन्च करण्यात आला.

सप्टेंबर 2013 मध्ये रिलीज झालेल्या GTA 5 चे कथानक लॉस एंजेलिसपासून प्रेरित असलेल्या लॉस सॅंटोस शहरात घडते. या गेममध्ये मायकेल, फ्रँकलिन आणि ट्रेव्हर ही तीन प्रमुख पात्रं होती.

त्यानंतर GTA मालिकेतील मुख्य गेमची कोणतीही नवी आवृत्ती आली नाही. त्यामुळे GTA 6 ची प्रतीक्षा वर्षागणिक वाढत गेली.

गेम तयार करणाऱ्या रॉकस्टार कंपनीने 4 फेब्रुवारी 2022 रोजी पहिल्यांदाच अधिकृतपणे जाहीर केलं की, नव्या GTA गेमवर काम सुरू असून त्याचे काम बऱ्यापैकी पुढे गेले आहे.

मात्र, हा गेम तयार करण्याचे काम प्रत्यक्षात कधी सुरू झाले, याची माहिती कंपनीने दिली नव्हती.

या काळात रॉकस्टारने 2018 मध्ये 'रेड डेड रिडेम्प्शन 2' हा मोठा ओपन-वर्ल्ड गेमही रिलीज केला. कंपनीच्या गेममध्ये विशाल जग, असंख्य पात्रं आणि अगदी छोट्या-छोट्या गोष्टींचीही बारकाईने केलेली मांडणी पाहायला मिळते. असे गेम तयार करण्यासाठी अनेक वर्षे लागतात.

त्याचबरोबर GTA ऑनलाइन हा गेमही सातत्याने सुरू राहिला. यामध्ये खेळाडूंना इंटरनेटच्या माध्यमातून मित्रांसोबत आणि जगभरातील इतर खेळाडूंसोबत गेम खेळता येतो. रॉकस्टार कंपनी या गेममध्ये सातत्याने नवी मिशन्स, गाड्या, व्यवसाय आणि इतर गोष्टींची भर घालत आली आहे.

बीबीसीसाठी कलेक्टिव्ह न्यूजरूमचे प्रकाशन.