मोहित उल्वा : पाकिस्तानविरुद्ध अंडर-19 मध्ये हरलेला सामना फिरवणारा 'हा' खेळाडू कोण?

फोटो स्रोत, ACC
ओमानमध्ये शनिवारी झालेल्या अंडर-19 आशिया कप 2026 च्या अंतिम सामन्यात भारताने पाकिस्तानवर एका विकेटने रोमहर्षक विजय मिळवला.
या विजयाचा शिल्पकार ठरला तो म्हणजे मोहित उल्वा. त्याने अवघ्या 26 चेंडूंमध्ये नाबाद 49 धावांची खेळी करत भारताला विजय मिळवून दिला.
भारताच्या विजयाचा हिरो ठरलेल्या 18 वर्षीय मोहितने आठव्या क्रमांकावर फलंदाजीला येत कठीण परिस्थितीत डावाची सूत्रे हाती घेतली. त्यावेळी भारताची अवस्था आठ बाद 252 अशी होती आणि विजयासाठी आणखी 84 धावांची गरज होती.
मोहितने मनल चौहानसोबत नवव्या विकेटसाठी 57 धावांची भागीदारी केली. त्यानंतर सी. वेंकटसोबत शेवटच्या विकेटसाठी 29 धावा जोडत भारताला विजयापर्यंत पोहोचवले.
या शानदार खेळीसाठी मोहितला अंतिम सामन्यात 'प्लेअर ऑफ द मॅच' पुरस्काराने गौरवण्यात आलं.
मोहित भारताकडून गोलंदाजीची सुरुवातही करतो. या अंडर-19 आशिया कपमध्ये त्याने तीन विकेट्स घेतल्या आहेत.
ऑस्ट्रेलियाविरुद्ध झालेल्या तीन सामन्यांच्या यूथ वनडे मालिकेतही त्याने चांगली कामगिरी केली होती. या मालिकेत त्याने तीन सामन्यांत पाच विकेट्स घेतल्या होत्या.
'द हिंदू' समूहाच्या 'स्पोर्ट्स स्टार' या क्रीडा मासिकानुसार, मोहित जामनगरमधील क्रिकेट बंगल्यात महेंद्रसिंह चौहान यांच्याकडून प्रशिक्षण घेतो.
महेंद्रसिंह चौहान हे भारतीय क्रिकेटपटू रवींद्र जडेजाचेही प्रशिक्षक होते. मोहितने वडिलांच्या माहितीनुसार, मोहितनं लहानपणी क्रिकेट खेळायला सुरुवात केली.
मोहितने 'स्पोर्ट्स स्टार'ला दिलेल्या मुलाखतीत सांगितले होते, "माझ्या वडिलांना नेहमीच क्रिकेटमध्ये रस होता. मात्र, दुर्दैवाने त्यांना त्यांच्या काळात क्रिकेट खेळता आले नाही. पण मी लहान असताना त्यांना माझ्यात काही गुण दिसले. त्यामुळे मी क्रिकेट खेळू शकतो, असे त्यांना वाटले."

फोटो स्रोत, ACC
मोहितचे वडील रेल्वे सुरक्षा दलात (आरपीएफ) काम करतात. त्यांनीच मोहितला क्रिकेट अकादमीत प्रवेश घेण्यास सांगितले.
मोहितच्या म्हणण्यानुसार, त्याने वडिलांचे म्हणणे मान्य केले. मात्र, त्यामागे आणखी एक आकर्षण होते.
तो सांगतो, "खरं तर मी अभ्यासापासून वाचता येईल, या विचाराने क्रिकेट अकादमीत जाण्यास तयार झालो!"
मोहित याआधीच आपल्या गावात चुलत भावांसोबत टेनिस बॉल क्रिकेट खेळत होता. तो सांगतो, "तिथेही क्रिकेट खेळताना मला खूप मजा यायची. मला वैयक्तिकरीत्या हा खेळ आवडत होता. त्यामुळे मी वडिलांचे ऐकले आणि अकादमीत जाण्यास सुरुवात केली."
ऑफ स्पिनर ते वेगवान गोलंदाज बनण्याचा प्रवास
मोहितचे प्रशिक्षक महेंद्रसिंह चौहान यांनी त्याच्या फिटनेसवर विशेष लक्ष दिले. त्याचा फायदा मोहितला चांगली कामगिरी करण्यात झाला.
मोहितने सुरुवातीला ऑफ स्पिनर म्हणून क्रिकेट खेळायला सुरुवात केली होती. मात्र, एके दिवशी महेंद्रसिंह चौहान यांनी त्याला वेगवान गोलंदाजी करून पाहण्याचा सल्ला दिला.
मोहित सांगतो, "एके दिवशी महेंद्र सरांनी मला वेगवान गोलंदाजी करून पाहायला सांगितले. माझी शरीरयष्टी सडपातळ आहे आणि मी चांगल्या प्रकारे धावू शकतो, त्यामुळे मी वेगवान गोलंदाजी करायला हवी, असे त्यांचे म्हणणे होते."

फोटो स्रोत, ACC
मोहितने प्रशिक्षकांचा सल्ला तो मानला. तो सांगतो, "मी वेगवान गोलंदाजी करायला सुरुवात केली आणि हळूहळू नैसर्गिकरीत्या वेगवान गोलंदाज बनत गेलो."
विशेष म्हणजे, या बदलामागे कोणताही वैयक्तिक किंवा विशेष वेगवान गोलंदाजी प्रशिक्षक नव्हता.
मोहित सांगतो, "मी वेगवान गोलंदाजीसाठी कधीही कोणत्याही वैयक्तिक प्रशिक्षकाकडून प्रशिक्षण घेतलेले नाही. अंडर-16 आणि अंडर-19 स्तरावर बीसीसीआयच्या शिबिरांमध्ये तसेच इतर प्रशिक्षकांसोबत काम केले आहे. मात्र, माझा स्वतंत्र असा वेगवान गोलंदाजीचा प्रशिक्षक कधीच नव्हता."
उनाडकटने दिला स्लो बाउन्सरचा सल्ला
भारतीय क्रिकेटपटू जयदेव उनाडकटने मोहितला एका खास गोलंदाजीच्या प्रकारावर काम सुरू ठेवण्याचा सल्ला दिला होता. मोहितने नेट्समध्ये उनाडकटला स्लो बाउन्सर टाकताना पाहिले होते. त्यानंतर त्यानेही या चेंडूचा सराव करण्यास सुरुवात केली.
मोहित सांगतो, "मी त्यांना नेट्समध्ये हा चेंडू टाकताना पाहिले आणि त्यानंतर स्वतःही प्रयत्न केला. जयदेव भाईंनी ते पाहिले आणि मला हा चेंडू टाकणे कधीही सोडू नकोस, असा सल्ला दिला. जर तू हा चेंडू चांगल्या प्रकारे टाकत असशील, तर तो टाकत राहा, असे ते म्हणाले."
वडिलांसोबत घेतली मेहनत
मोहितने 'स्पोर्ट्स स्टार'ला सांगितले की, फलंदाजी हादेखील आता त्याच्या खेळाचा महत्त्वाचा भाग बनला आहे. मात्र, फलंदाजीचे कौशल्य त्याला नैसर्गिकरीत्या मिळालेले नाही, असे तो सांगतो.
तो म्हणतो, "माझे वडील मला बॉलिंग मशीनवर सराव करायला लावतात. ते मला थ्रोडाउन देतात आणि वेगवेगळे ड्रिल्सही करून घेतात. त्यामुळे माझ्या फलंदाजीत सुधारणा झाली."

फोटो स्रोत, ACC
इतर खेळाडूंचा खेळ पाहून त्यांच्याकडून शिकण्याचाही मोहितला फायदा झाला.
त्याच्या अलीकडच्या खेळींमध्ये या मेहनतीचे प्रतिबिंब दिसून आले. मोहितने केवळ मोठे फटके मारण्यावर भर दिला नाही, तर स्ट्राइक रोटेट करत संघाच्या गरजेनुसार फलंदाजी केली.
त्यामुळेच पाकिस्तानविरुद्धच्या अंतिम सामन्यात दबावाच्या परिस्थितीत त्याला भारताला विजय मिळवून देता आला.
(बीबीसीसाठी कलेक्टिव्ह न्यूजरूमचे प्रकाशन)

![[ photo caption- अफगाणिस्तानमधील लोगार प्रांतातील मुगुलखील खाणीतील क्रोमाइटचे साठे ]](https://ichef.bbci.co.uk/ace/ws/660/cpsprodpb/38cc/live/6a668fd0-e230-11f1-a094-5fdc692f3e33.jpg.webp)






















