अंडर 19 आशिया कप फायनल: अखेरच्या चेंडूवर चौकार ठोकत भारताने पाकिस्तानला हरवले

अंडर 19 आशिया कप फायनल: अखेरच्या चेंडूवर चौकार ठोकत भारताने पाकिस्तानला हरवले
Published
वाचन वेळ: 3 मिनिटे

अंडर 19 आशिया कपच्या अंतिम सामन्यात भारताने पाकिस्तानला एक गडी राखून पराभूत करत स्पर्धेचे विजेतेपद पटकावले.

अल अमिरातमध्ये शनिवारी खेळल्या गेलेल्या विजेतेपदासाठीच्या रोमांचक सामन्यात प्रथम फलंदाजी करताना पाकिस्तानने 50 षटकांत 9 गडी गमावून 337 धावा केल्या.

प्रत्युत्तरात, भारतीय संघानं 50 षटकांत 339 धावा करून विजय मिळवला.

लक्ष्याचा पाठलाग करताना, भारतीय कर्णधार लक्ष्य राजेश रायचंदानीने 50 धावा केल्या आणि आर्यवीर सेहवागने 58 धावांची शानदार खेळी केली.

दोन्ही फलंदाजांनी संघाला चांगली सुरुवात करून दिली. व्ही. के. विनीतने 24, अन्वय द्रविडने 19, अर्जुन राजपूतने 16 आणि यशवर्धन चौहानने 9 धावा केल्या.

8 गडी गमावल्यानंतर भारताचा डाव अडखळला. पण मोहित उल्वा आणि मनाल चौहान यांनी डाव सावरला आणि संघाला विजय मिळवून दिला.

सामन्याचा थरार शेवटच्या चेंडूपर्यंत टिकून राहिला.

आठव्या क्रमांकावर फलंदाजी करताना मोहित उल्वाने अवघ्या 26 चेंडूंमध्ये 49 धावांची नाबा विजयी खेळी केली.

शेवटच्या चेंडूपर्यंत रंगलेल्या सामन्यात भारताला शेवटच्या षटकात विजयासाठी आठ धावांची गरज होती.

अहमद हुसेनच्या षटकातील पाचव्या चेंडूवर, चिगुरुपती व्यंकटने एक धाव घेतली आणि स्ट्राईक मोहित उल्वाकडे सोपवली.

यानंतर, शेवटच्या चेंडूवर उल्वाने लाँग ऑफवरून एक शानदार चौकार मारून भारताला रोमांचक विजय मिळवून दिला.

उल्वाने आपल्या नाबाद 49 धावांच्या खेळीत 5 षटकार आणि 3 चौकार मारले.

पाकने उभारली मोठी धावसंख्या

पाकिस्तानकडून सलामीवीर उस्मान खानने 107 धावा करत शानदार शतक झळकावले. 19 वर्षांखालील एकदिवसीय सामन्यांमधील हे त्याचे चौथे शतक होते.

कर्णधार फरहान युसूफनेही 63 घावा करत अर्धशतक पूर्ण केले, तर अब्दुल कादिरने 54 चेंडूंमध्ये 80 धावांची वेगवान खेळी केली. त्याने आपल्या खेळीत आठ षटकार आणि तीन चौकार मारले.

पाकिस्तानची इनिंग

पाकिस्तानने अत्यंत आक्रमक सुरुवात करत पॉवरप्लेमध्ये 93 धावा केल्या. उस्मान आणि अब्दुल कादिर यांनी दुसऱ्या विकेटसाठी 135 धावांची भागीदारी करून भारतीय गोलंदाजांवर दबाव आणला. 27 व्या षटकात कादिर बाद झाला, तर शतक पूर्ण केल्यानंतर उस्मान 37 व्या षटकात बाद झाला.

एके वेळी, 40 षटकांत पाकिस्तानची धावसंख्या 3 बाद 274 होती आणि ते एक मोठी धावसंख्या उभारतील असे वाटत होते. मात्र, शेवटच्या 10 षटकांत भारतीय गोलंदाजांनी पाकिस्तानचा वेग मंदावला.

भारतासाठी काव्या पटेल सर्वात यशस्वी गोलंदाज ठरला. त्याने 4 बळी घेतले, तर चिगुरुपती व्यंकटने 3 बळी घेतले.

सलग दुसऱ्यांदा अंतिम सामन्यात आमने-सामने

भारत आणि पाकिस्तान सलग दुसऱ्या वर्षी 19 वर्षांखालील आशिया चषक स्पर्धेच्या अंतिम सामन्यात एकमेकांसमोर उभे ठाकले होते.

पाकिस्तान गतविजेता होता. त्यांनी 2025 मध्ये अंतिम सामन्यात भारताला 191 धावांनी पराभूत करून विजेतेपद पटकावले होते.

सलग दुसऱ्यांदा अंतिम सामन्यात आमने-सामने

अंतिम सामन्यापूर्वी पाकिस्तानने स्पर्धेतील आपले सर्व चारही सामने जिंकले होते, तर भारताने उपांत्य फेरीत अफगाणिस्तानला हरवून विजेतेपदाच्या लढतीत आपले स्थान निश्चित केले होते.

पाकिस्तानने अंतिम सामन्यासाठी प्लेइंग इलेव्हनमध्ये कोणताही बदल केला नव्हता. तर भारताने पाठीच्या दुखण्यामुळे स्पर्धेतील सर्वात यशस्वी गोलंदाज ईशान सूदच्या जागी चिगुरुपती व्यंकटला संघात स्थान दिले होते.

बीबीसीसाठी कलेक्टिव्ह न्यूजरूमचे प्रकाशन.