'भावासोबत अनैतिक संबंध असल्याच्या' संशयातून सख्ख्या बहिणींनी केली आत्याची हत्या; पोलिसांनी कसा लावला छडा?

फोटो स्रोत, HARESH BHALIYA
- Author, भार्गव पारिख
- Role, बीबीसी गुजरातीसाठी
- Published
- वाचन वेळ: 3 मिनिटे
गुजरातच्या राजकोटमधील जेतपूर येथे 40 वर्षीय हकुबेन यांची हत्या करून त्यांचा मृतदेह नवागढ रस्त्यावर फेकून दिल्याची घटना समोर आली आहे. या प्रकरणी पोलिसांनी दोन सख्ख्या बहिणींसह 4 जणांना अटक केली आहे.
या घटनेबाबत समोर आलेल्या प्राथमिक माहितीनुसार, राधा शेख आणि मधु बावाजी या दोन बहिणींना त्यांचा लहान भाऊ रवी आणि आत्या हकुबेन यांच्यात अनैतिक संबंध असल्याचा संशय होता.
मिळालेल्या माहितीनुसार, "यावरून कुटुंबात वारंवार वाद होत असत. याच गोष्टीचा राग मनात धरून दोघा बहिणींनी 11 नोव्हेंबरला म्हणजेच भाऊबीजेच्या दिवशी हकुबेन यांना जेतपूर येथे बोलावलं. तिथे आधी त्यांना सोड्यातून विष देऊन मारण्याचा प्रयत्न केला. त्यानंतर गळा आवळून त्यांची हत्या केली."
आरोपींनी मृतदेहाची 'विल्हेवाट लावण्याचा' प्रयत्न केला होता. तरीही पोलीस त्यांच्यापर्यंत कसे पोहोचले?
तक्रारदाराने काय सांगितलं?
आपल्या भाचींनी म्हणजेच राधा आणि मधु यांनी आपली बहीण हकुबेन परमार यांची हत्या केल्याची तक्रार अरविंद वाघेला यांनी पोलिसांत दिली आहे.
ते म्हणतात, "माझी बहीण हकुबेन परमार पालिताना येथील हथियाधार गावात राहत होती. राधा आणि मधु या माझ्या लहान भावाच्या मुली आहेत. त्या दोघी आपल्या पतींसोबत जुनागढ येथे राहत होत्या.

फोटो स्रोत, HARESH BHALIYA
त्यांना हकुबेनचं भावाचा मुलगा रवी याच्यासोबत अनैतिक संबंध असल्याचा संशय होता. यावरून कुटुंबात वारंवार वाद होत असत."
"रवीच्या दोन्ही बहिणींना हे अजिबात मान्य नव्हतं. दरम्यान, हकुबेन जेतपूरला गेली आहे, असं आमचं बोलणं झालं होतं. 12 नोव्हेंबरला पोलिसांचा मला फोन आला. त्यांनी हकुबेनचा मृतदेह राजकोटच्या सिव्हिल हॉस्पिटलमध्ये असल्याचं सांगितलं."
ते पुढे सांगतात, "मी राजकोटला गेलो आणि मृतदेहाची ओळख पटवली. डॉक्टरांनी माझ्या बहिणीचा गळा आवळून खून झाल्याचं सांगितलं. त्यानंतर मी माझ्या दोन भाच्या राधा आणि मधु, मधुचा पती आणि आमचे नातेवाईक भूपत वाघेला यांच्याविरोधात जेतपूर पोलिसांत तक्रार दाखल केली. तपासानंतर पोलिसांनी चारही आरोपींना अटक केली."
राजकोट पोलिसांनी काय सांगितलं?
जेतपूरच्या एसीपी सिमरन भारद्वाज यांनी बीबीसी गुजरातीशी बोलताना सांगितले, "मृत महिलेच्या भावाने दिलेल्या तक्रारीनंतर आम्ही तपास सुरू केला.
हकुबेन परमार यांचा मृतदेह जिथे सापडला, तिथल्या सीसीटीव्ही फुटेजमध्ये 4 जण टेम्पो रिक्षातून मृतदेह आणून टाकताना दिसले. त्यानंतर त्या ठिकाणी येणाऱ्या आणि तिथून जाणाऱ्या रस्त्यांवरील 90 सीसीटीव्ही कॅमेऱ्यांचे फुटेज तपासले. त्यात ती टेम्पो रिक्षा एका रस्त्याने येताना आणि दुसऱ्या रस्त्याने परत जाताना दिसली."
"या फुटेजच्या आधारे आम्ही सलग 3 दिवस तांत्रिक माहिती आणि स्थानिकांकडून मिळालेल्या माहितीच्या आधारे राधा सय्यद, मधु बावाजी, लक्ष्मण बावाजी आणि भूपत वाघेला यांना ताब्यात घेतले आणि त्यांची चौकशी केली."
"आरोपींनी सांगितलं की, त्यांच्या सख्ख्या आत्याचे म्हणजेच हकुबेन यांचे त्यांचा लहान भाऊ रवीसोबत अनैतिक संबंध असल्याचा त्यांना संशय होता. यावरून कुटुंबात वारंवार वाद होत असत. त्यांनी पालिताना येथून आपल्या आत्याला जेतपूरला बोलावून घेतलं होतं. सुरुवातीला त्यांनी सोड्यातून विष देऊन आत्याला मारण्याचा प्रयत्न केला. त्यानंतर दुसऱ्या नातेवाईकाला घेऊन येण्याचं कारण सांगून ते तिथून निघून गेले. साधारण एक तासाने ते परत आले. परंतु, विषाचा काहीच परिणाम झाला नसल्याचे त्यांच्या लक्षात आले. त्यानंतर त्यांनी ओढणीने गळा आवळून आत्या हकुबेनची हत्या केली."

फोटो स्रोत, HARESH BHALIYA
एसीपी भारद्वाज यांनी सांगितलं की, पोलिसांनी आरोपींच्या घरातून हकुबेन यांना ज्या सोड्याच्या बाटलीतून विष दिलं होतं, ती बाटली जप्त करण्यात आली आहे.
"मृतदेहाची विल्हेवाट लावण्यासाठी वापरण्यात आलेली टेम्पो रिक्षाही पोलिसांनी जप्त केली आहे. या कुटुंबातील सर्वजण रोजंदारीवर काम करतात. त्यांच्या कुटुंबात आपापसांतही वाद आहेत."
आरोपी राधाची धाकटी बहीण गौरी ही महुवा इथल्या गलचर गावात राहते. तिने बीबीसी गुजरातीशी बोलताना सांगितलं, "आमच्या संपूर्ण कुटुंबाला माझा भाऊ रवी आणि त्याच्या अनैतिक संबंधांबद्दल माहिती होती. हे संबंध संपवावेत, यासाठी आमच्या नातेवाईकांनी दोघांनाही समजावलं होतं. या विषयावरून माझ्या मोठ्या बहिणींचे आत्यासोबत भांडणही झाले होते. परंतु त्या आत्याची हत्या करतील, यावर माझा विश्वास बसत नाही. पोलिसांच्या तपासातून जे समोर आले आहे, ते ऐकून आम्हालाही मोठा धक्का बसला आहे."
(बीबीसीसाठी कलेक्टिव्ह न्यूजरूमचे प्रकाशन.)






















