"Aga m eweghachite 'fuel subsidy' ma wepụ nrụrụaka dị na ya"

Peter Obi bụ onye ji ọkọlọtọ pati Nigeria Democratic Congress (NDC) azọ ọkwa onyeisiala Nigeria n'afọ 2027 ekwuola na ọ ga-eweghachịte ego enyemaka gọọmentị na-akwụ iji belata ọnụego mmanụ ụgbọala a kpọrọ 'fuel subsidy' na Bekee ma ọbụrụ na o merie na ntuliaka ahụ.

O kwuru nke a na mkparịtaụka pụrụiche ya na BBC nwere bụ ebe Obi kwuru na obi ya agbanwebeghi banyere atụmatụ ego enyemaka mmanụ ụgbọala kamgbe okwu banyere ya pụtara ihe.

"Agbanweghi m n'ebe m kwụụ. Ihe gbanwere bụ na mgbe ọbụla m kwuru okwu maka inwe ezi usoro a ga-agbaso, ndị mmadụ na-ekwu na-ekwu na echiche m agbanweela.

"Kamgbe m bidoro ikwu maka ego enyemaka mmanụ ụgbọala, m na-ekwusi ike na nrụrụaka bụ nnukwu nsogbu dị na ya."

Obi gara n'ihu kwuo sị na ọ ga-eweghachịte ego enyemaka ahụ gọọmentị na-akwụ maka mbelata ọnụego mmanụ ụgbọala.

"Ee, m ga-eweghachite ya, mana chetakwa na akọwara m na a ga-ewepụ nrụrụaka dị na ya."

'E meriri m ntuliaka afọ 2023 mana e nweghi ihe akaebe'

Mgbe a jụrụ Peter Obi maka ihe o kwuru na ọ bụ ya meriri na ntuliaka ọkwa onyeisiala nke afọ 2023 kama na e ji aghụghọ napụ ya ọkwa ahụ.

Obi kwuru na ọ chọghị ịlaghachị azụ n'ihe mere eme na mbụ kama na ihe ọ maara bụ na o meriri na ntuliaka aka ahụ mana o nweghi ihe akaebe.

"Eziokwu, anaghị m achọ ịlaghachi azụ na-ekwu ihe gachara aga, mana m ka na-ekwusi ike n'ihe m kwuru na mbụ."

Mgbe a jụrụ ya ma o nwere ihe akaebe mana Obi kwuru na o nweghi ihe akaebe.

"Enweghị m; ihe niile abụghị ịgosi ihe akaebe".

'Ọ bụrụ na ị naghị ezu ohi, nrụrụaka ga-ebelata'

BBC jụrụ Peter Obi etu ọ ga-esi buo agha megide nrụrụaka, o kwuru na ọ bụrụ na ọ bụrụ na ọ naghị eme nrụrụaka, ezinaụlọ anaghị eme ya, na nke ahụ pụtara na nrụrụaka ga-ebelata n'ọkara.

"Ọ bụrụ na ị naghị ezu ohi, ọ bụrụ na ị naghị esonye ndị na-ezu ohi, ọ bụrụ na nwunye gị maọbụ ezinaụlọ gị anaghị ezu ohi, nrụrụaka ga-ebalata site na pasentị iri ise".

Obi gara n'ihu kwuo na ọ ga-anọ n'isi ọchịchị iji hụụ na ihe niile gara ka o kwesịrị isi aga ma kọwaa na ihe mere nrụrụaka jiri karịa n'oge Onyeisiala Buhari na-achị bụ maka na ọ nọghị n'isi ọchịchị.

"Ọ na-ewute m na m ga-ekwu ihe a, mana o (Buhari) ejighị nchịkwa oge ọ nọ n'isi ọchịchị. Ihe ga-adị iche n'oge nke m bụ na m ga-anọ n'isi ọchịchị.